Ioane 1
TE FEIA HINAARO I TE ATUA, E HINAARO ATOA I TO ˈNA TAATA.
5 O tei faaroo e, o Iesu te Mesia mau, ua faafanauhia oia e te Atua: o tei hinaaro i tei faafanau ra, te here atoa ra ïa i tei faafanauhia e ana ra. 2 Teie te mea e ite ai tatou e, te aroha nei tatou i te tamarii a te Atua, ia hinaaro tatou i te Atua, e ia haapao i ta ˈna parau. 3 Teie hoi te hinaaro i te Atua, o te haapao i ta ˈna ra parau: e ere hoi ta ˈna parau i te mea teimaha. 4 O ta te Atua hoi i fanau ra, te vî nei teie nei ao ia ˈna; teie hoi te mea e vi ai teie nei ao ia tatou, o to tatou faaroo. 5 O vai te taata i vi teie nei ao ia ˈna ra, maori râ o tei faaroo e, o Iesu te Tamaiti a te Atua? 6 O tei haere mai ïa ma te pape e te toto, o te Mesia ra o Iesu: eiaha ma te pape anaˈe ra, ma te pape râ e te toto. E o te Varua tei faaite mai, e e parau mau hoi ta te Varua. 7 Tootoru hoi e faaite i nia i te raˈi, o te Metua, o te Logo, e o te Varua Maitai; e o taua tootoru ra hoi hoê â ïa. 8 E toru hoi e faaite i te ao nei, o te Varua, o te pape, e o te toto; e o taua toru nei hoi, te au nei ïa i te parau hoê. 9 Te farii nei tatou i ta te taata nei faaite; e rahi atu ïa te faaite a te Atua: teie hoi taua faaite a te Atua ra, o te parau no ta ˈna Tamaiti ta ˈna i faaite maira. 10 O tei faaroo i te Tamaiti a te Atua ra, tei roto ia ˈna iho te ite; o tei ore i faaroo i te Atua ra, ua faariro ïa ia ˈna ei haavare; oia aore i faaroo i te parau o ta ˈna Tamaiti ta te Atua i faaite maira. 11 Teie hoi taua parau ra, ua horoa mai te Atua i te ora mure ore no tatou; e tei ta ˈna Tamaiti hoi taua ora nei. 12 Tei ia ˈna te Tamaiti ra, tei ia ˈna atoa taua ora nei; e aore ia ˈna te Tamaiti a te Atua ra, aore atoa teie nei ora ia ˈna. 13 I papai au i teie nei parau ia outou i te feia i faaroo i te iˈoa o te Tamaiti a te Atua ra, ia ite outou e e ora mure ore to outou, e ia faaroo â outou i te iˈoa o te Tamaiti a te Atua ra.
14 Teie taua taiâ ore no tatou i noaa ia ˈna ra, ia ani noa ˈtu tatou i te mau mea atoa i au ia ˈna ra, te faaroo maira ïa oia ia tatou. 15 E te ite nei tatou e te faaroo maira oia ia tatou i te mau mea atoa ta tatou i ani atu, ua ite tatou e e roaa ia tatou ta tatou i ani atu ia ˈna ra. 16 Ia ite te hoê taata i tana taeae i te raveraa i te hara eita e pohe roa ra, e pure oia, e na te Atua e horoa mai i te ora no ˈna, no tei rave i te hara eita e pohe roa ra. Te vai nei te hara pohe roa; aore au i parau e e pure te taata i te reira. 17 E hara anaˈe â te mau parau-tia ore atoa nei, e te vai nei hoi te hara pohe ore. 18 Ua ite tatou e o ta te Atua i fanau, e ore ïa e rave i te hara: o ta te Atua râ i fanau ra te tiai ra ïa ia ˈna iho, e ore taua varua ino ra e rave mai ia ˈna. 19 Ua ite hoi tatou e no te Atua tatou, e te vai noa nei to te ao atoa i raro aˈe i taua varua ino ra. 20 Ua ite ra tatou e, ua tae mai te Tamaiti a te Atua, e ua horoa mai i te ite no tatou ia ite tatou ia ˈna ra i te mea mau: e tei roto tatou ia ˈna i taua mea mau ra, tei roto i ta ˈna Tamaiti ra ia Iesu Mesia. Oia te Atua mau e te ora mure ore. 21 E au mau tamarii ra, e ara ia outou i te mau idolo ra. Amene.