Salamo

37 Eiaha e inoino no te feia ohipa ino,

Eiaha atoa e pohehae i te huru o te feia ohipa ino.+

 2 E maemae oioi ratou mai te aihere.+

Oia, e maemae ratou mai te matie apî.

 3 A tiaturi ia Iehova e a rave i te mea maitai.+

A parahi i te fenua nei e a haa ma te haapao maitai.+

 4 Ia oaoa roa oe ia Iehova,

E e horoa mai oia i ta to aau e hinaaro ra.

 5 A vaiiho na Iehova e aratai ia oe.+

A turui i nia ia ˈna e na ˈna e tauturu ia oe.+

 6 E faaanaana oia i to parau-tia mai te aahiata,

E te mau ohipa parau-tia ta oe e rave, mai te mahana i te avatea.

 7 A mamû i mua ia Iehova+

E a tiai maite ia ˈna.

Eiaha e inoino i te taata

O te manuïa ra i te faatupu i ta ˈna mau opuaraa iino.+

 8 A tuu i te riri e a faarue i te riri rahi.+

Eiaha e inoino a rave atu ai i te mea ino.*

 9 E haamouhia hoi te feia ohipa ino,+

E fatu râ te feia o te tiaturi ia Iehova i te fenua.+

10 Tau taime â, e aita faahou te feia ino.+

E hiˈo oe i to ratou vahi,

Eita râ oe e ite ia ratou i reira.+

11 E fatu râ te feia mǎrû i te fenua,+

E e au roa ratou i te rahi o te hau.+

12 Te opua ra te taata ino i te tahi ohipa i nia i te taata parau-tia.+

Te mauu ra to ˈna niho ia ˈna.

13 E ata râ Iehova ia ˈna,

Ua ite hoi Oia e te piri mai ra to ˈna mahana.+

14 Te huti ra te feia ino i ta ratou ˈoˈe e te huti ra i ta ratou fana

No te taparahi pohe i tei haavîhia e te veve,

No te haapohe i tei afaro te eˈa.

15 O to ratou iho râ aau te puta i ta ratou mau ˈoˈe.+

E ofatihia ta ratou mau fana.

16 Mea maitai aˈe te faufaa haihai a te taata parau-tia

I te taoˈa rahi a te rahiraa feia ino.+

17 E fati hoi te rima o te feia ino,

E turu râ Iehova i te feia parau-tia.

18 Ua ite Iehova i ta te feia hapa ore e faaruru ra,*

E e vai ta ratou tuhaa e a muri noa ˈtu.+

19 Eita ratou e haama i te tau o te ati.

E rahi ta ratou maa i te tau oˈe.

20 E pohe râ te feia ino.+

E mou te mau enemi o Iehova mai te mau vahi aihere ruperupe ra.

E pee ratou mai te au auahi.

21 Te tipee ra te taata ino ma te ore e faahoˈi,

Mea horoa râ te taata parau-tia ma te aau tae.*+

22 Te feia ta te Atua i haamaitai, e fatu ratou i te fenua,

E haamouhia râ te feia ta ˈna i faatae atu i te ino.+

23 Ua mauruuru anaˈe Iehova i te haerea o te hoê taata+

E aratai* oia i to ˈna taahiraa avae.+

24 Ia hiˈa noa ˈtu oia, e ore oia e taorahia i raro,+

Te turu nei hoi Iehova ia ˈna i to ˈna rima.+

25 I vai apî na vau e ua ruhiruhia i teie nei,

Aita râ vau i ite i te taata parau-tia i te faarueraahia+

E ta ˈna mau tamarii i te imiraa i te faraoa.*+

26 Te horoa noa ra oia ma te hamani maitai,+

E te tiai ra ta ˈna mau tamarii i te tahi haamaitairaa.

27 A fariu ê atu i te ino e a rave i te mea maitai,+

E ora oe e a muri noa ˈtu.

28 Mea au na Iehova i te parau-tia,

E eita oia e faarue i tei ore i taiva ia ˈna.+

E paruru-noa-hia ratou.+

Te huaai râ o te feia ino, e haamouhia ïa.+

29 E fatu te feia parau-tia i te fenua,+

E e parahi ratou i nia iho e a muri noa ˈtu.+

30 Te faaite nei te vaha o te taata parau-tia i te paari,

E te faaite ra to ˈna arero no nia i te parau-tia.+

31 Tei roto te ture a to ˈna Atua i to ˈna aau.+

Eita to ˈna avae e hee ia haere oia.+

32 Te hiˈo ra te taata ino i te taata parau-tia,

A imi ai i te haapohe ia ˈna.

33 Eita râ Iehova e faarue ia ˈna i te rima o taua taata ra,+

E eita oia e faahapa ia ˈna ia haavahia oia.+

34 A tiaturi ia Iehova e a pee i to ˈna eˈa,

E faateitei ïa oia ia oe ia fatu oe i te fenua.

35 Ua ite au i te taata ohipa ino e te taehae

E tupu ra mai te hoê tumu raau ruperupe i to ˈna ra vahi.+

36 Ua mou râ oia e ua moˈe.+

Ua imi noa vau ia ˈna, aita râ oia i itea mai.+

37 A tapao na i te taata hapa ore

E a hiˈo noa i te taata afaro,+

E ananahi hau hoi to taua taata ra.+

38 E haamouhia râ te feia rave hara.

E haapohehia te feia ino.+

39 No ǒ mai ia Iehova ra te faaoraraa o te feia parau-tia.+

O ˈna to ratou haapuraa i te tau ahoaho.+

E faaora oia ia ratou i te feia ino ra,

Te imi ra hoi ratou i te haapuraa ia ˈna ra.+