Tuhaa 5
E tumu rahi to te oraraa
1, 2. Nafea tatou e nehenehe ai e parau e te haapao maira te Atua ia tatou, e ihea tatou e fariu ai ia noaa mai te mau pahonoraa i te mau uiraa no nia i te oraraa?
Te faaite ra te huru hamaniraa o te fenua e ta ˈna mau mea ora e ua riro to ratou Poiete ei Atua no te here o te haapao mau ra. E te faaite ra ta ˈna Parau, oia hoi te Bibilia, e te haapao maira oia; te horoa maira oia i te mau pahonoraa maitatai roa ˈˈe no nia i te mau uiraa ra: No te aha tatou e vai ai i nia i te fenua? e, Te haere ra tatou ihea?
2 E tia ia tatou ia tuatapapa i te Bibilia ia noaa mai teie mau pahonoraa. Te na ô ra te Parau a te Atua e: “Ia imi outou ia ˈna, e itea ïa oia e outou: ia faarue râ outou ia ˈna, e faarue atoa oia ia outou.” (Paraleipomeno 2, 15:2) No reira, eaha ta te tuatapaparaa i te Parau a te Atua e faaite ra no nia i ta ˈna opuaraa no tatou nei?
No te aha te Atua i poiete ai i te mau taata
3. No te aha te Atua i poiete ai i te fenua?
3 Te faaite ra te Bibilia e ua faaineine te Atua i te fenua ma te feruri taa ê i te mau taata. Te parau ra te Isaia 45:18 no nia i te fenua e aita te Atua “i hamani ia vaiiho-taata-ore-noa-hia, ua hamani râ oia ia taatahia.” E ua horoa mai oia i te fenua e te mau mea atoa ta te taata e hinaaro, eiaha noa no te ora, no te oaoa atoa râ i te ora ma te mâha maitai.—Genese, pene 1 e te 2.
4. No te aha te Atua i poiete ai i na taata matamua?
4 I roto i ta ˈna Parau, te faaite ra te Atua i to ˈna poieteraa i na taata matamua, o Adamu raua o Eva, e te faataa ra oia e eaha ta ˈna i opua no te fetii taata nei. Ua parau oia e: “E hamani tatou i te taata ma to tatou iho huru, ia au i to tatou iho hohoˈa; e ei nia iho ratou i te mau iˈa o te tai, e i nia iho i te mau manu o te reva, e i nia iho i te mau puaa, e i nia iho i te fenua atoa, e i nia iho hoi i te mau mea e nee haere i te fenua nei ra.” (Genese 1:26) Na te mau taata e tiai i “te fenua atoa” e ta ˈna poieteraa animala.
5. Ihea na taata matamua i te tuuraahia?
5 Ua hamani te Atua i te hoê ô rahi, mai te hoê aua nehenehe ra te huru, i te hoê vahi piihia Edene, e vai ra i te pae Ropu Hitia o te râ. I muri iho, “ua rave ihora te Atua ra o Iehova i te taata, tuu ihora ia ˈna i roto i taua ô i Edene ra, ei faaapu, e ei tiai.” E paradaiso teie te vai ra i roto, te mau mea atoa ta te mau taata matamua e hinaaro e amu. E te vai atoa ra “te mau raau maitatai atoa ia hiˈo, e tei au ei maa,” e tae noa ˈtu te tahi atu mau raau e e rave rahi mau huru ora animala anaanatae.—Genese 2:7-9, 15.
6. Ua poietehia te mau taata e teihea mau huru maitatai i te pae feruriraa e i te pae tino?
6 Ua poietehia te tino o na feia matamua ma te tia roa, eita ïa raua e maˈihia, e ruau, aore ra e pohe. Ua tuu-atoa-hia i roto ia raua te tahi atu mau huru maitatai, mai te tiamâraa ia maiti. Te faataahia ra te huru to raua hamaniraahia i roto i te Genese 1:27: “Hamani ihora hoi te Atua i te taata ma to ˈna ihora huru, i hamani oia ia ˈna, ma te hohoˈa o te Atua ra; i hamani oia ia raua, o te tane e te vahine.” I te mea e ua poietehia tatou ia au i te hohoˈa o te Atua, aita noa i horoahia mai te mau ateributi i te pae tino e te pae feruriraa, oia atoa râ te mau tuhaa i te pae morare e te pae varua, o te tia ia haamâhahia ia oaoa mau â tatou. E horoa mai te Atua i te ravea no te faaî i teie mau hinaaro mai te hinaaro no te maa, te pape, e te mataˈi. Mai ta Iesu Mesia i parau, “e ore te taata e ora i te maa anaˈe ra, i te mau [parau] atoa râ [no roto mai i te vaha o Iehova].”—Mataio 4:4.
7. Eaha te hopoia tei horoahia i te tane e te vahine matamua?
7 Hau atu, ua horoa te Atua i te hoê hopoia faahiahia roa na te tane e te vahine matamua a parahi ai raua i te ô i Edene ra: “Ia fanau orua, e ia rahi roa, e faaî i te fenua nei.” (Genese 1:28) E nehenehe ïa raua e fanau e e haapii i te mau tamarii tia roa. E a haere ai te huiraatira taata nei i te rahi, e ohipa oaoa ïa ta ratou oia hoi te faaaanoraa i te mau otia o te aua matamua ra, te fenua paradaiso ra o Edene. I te pae hopea, e riro roa mai te fenua taatoa ei paradaiso, e faaeahia e te mau taata tia, e te oaoa o te ora e a muri noa ˈtu. Te faaite maira te Bibilia e i muri aˈe i to te Atua faanahoraa i teie mau mea atoa, “hiˈo aˈera te Atua i te mau mea atoa ta ˈna i hamani, e inaha, e mea maitai roa.”—Genese 1:31; a hiˈo atoa Salamo 118:17.
8. Mea nafea te mau taata ia haapao i te fenua?
8 Ma te feaa ore, e tia i te taata ia faaohipa i te fenua i raro aˈe i to ratou mana no to ratou maitai. E tia râ ia ravehia ma te haerea paari. E tia i te taata ia riro ei mau tiai faatura o te fenua, eiaha râ ei feia vavahi i te fenua. Te patoi ra te faainoraa i te fenua o ta tatou e ite ra i teie mahana i te hinaaro o te Atua, e te feia o te na reira nei, te patoi ra ïa ratou i te tumu o te ora i nia i te fenua nei. E titauhia ratou ia aufau i te utua no te reira, inaha te parau ra te Bibilia e e ‘haamou te Atua i te feia e haamou nei i te fenua.’—Apokalupo 11:18.
Tera noâ te opuaraa a te Atua
9. No te aha tatou e tiaturi ai e e tupu mau â te opuaraa a te Atua?
9 Mai te omuaraa mai â, tera te opuaraa a te Atua, ia parahi te fetii taata nei tia roa i nia i te fenua e a muri noa ˈtu i roto i te paradaiso. E tera noâ ta ˈna opuaraa! Ma te hape ore, e tupu teie opuaraa. Te faaite ra te Bibilia e: “Ua tǎpǔ hoi Iehova sabaota ra, na ô maira: o ta ˈu mau i imi ra, o te reira te tupu; e o ta ˈu i opua ra, o te reira te mau.” “O ta ˈu i parau ra, o ta ˈu ïa e faatupu; ua opuahia e au ra, e na ˈu ïa e rave.”—Isaia 14:24; 46:11.
10, 11. Nafea o Iesu, o Petero, e te papai salamo ra o Davida i te faahitiraa i te parau no te Paradaiso?
10 Ua faahiti o Iesu Mesia i te opuaraa a te Atua e haamau faahou i te paradaiso i nia i te fenua ia ˈna i parau atu i te hoê taata e hinaaro ra i te tahi tiaturiraa no a muri atu: “Ei [te] paradaiso ïa oe e o vau atoa.” (Luka 23:43) Ua faahiti atoa te aposetolo Petero i te ao apî no a muri aˈe ia ˈna i tohu e: “Te tatari nei râ tatou i te raˈi apî [te hoê faatereraa apî mai nia mai i te raˈi ra] e te fenua apî [te hoê totaiete apî i nia i te fenua] ta [te Atua i tǎpǔ] mai, i te vai-mau-raa o te parau-tia ra.”—Petero 2, 3:13.
11 Ua papai atoa te papai salamo ra o Davida no nia i te ao apî i mua nei e to ˈna maororaa. Ua faaite atea mai oia e: “E parahi te feia parau-tia i nia i te fenua, e parahi tamau â ratou i reira.” (Salamo 37:29) No reira o Iesu i tǎpǔ ai e: “E ao to tei mǎrû; e riro hoi ia ratou te fenua.”—Mataio 5:5.
12, 13. A faataa poto mai na i te opuaraa rahi a te Atua no te huitaata nei.
12 Auê ïa tiaturiraa faahiahia e, te oraraa e a muri noa ˈtu i roto i te paradaiso i nia i te fenua tei faatiamâhia i te ino, te taparahiraa taata, te maˈi, te oto, e te mauiui! I roto i te buka hopea a te Bibilia, te faataa poto ra te Parau tohu a te Atua i teie opuaraa faahiahia i te na ôraa e: “E na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.” Te na ô râ oia e: “E ua parau maira tei parahi i nia iho i te terono ra, Inaha, te faaapî nei au i te mau mea atoa nei. E ua parau maira oia ia ˈu, A papai, e parau mau hoi teie nei mau parau, e te haavare ore.”—Apokalupo 21:4, 5.
13 E, e opuaraa rahi ta te Atua. E ao apî parau-tia, e paradaiso mure ore, tei faaite-atea-hia mai e te Atua e nehenehe ta ˈna e e rave mau oia i te mea o ta ˈna i tǎpǔ mai, inaha, “e parau mau hoi [ta ˈna] mau parau, e te haavare ore.”
[Hohoˈa i te mau api 20, 21]
Ua opua te Atua e ia ora te taata e a muri noa ˈtu i roto i te paradaiso i nia i te fenua nei. Tera noâ ta ˈna opuaraa
[Hohoˈa i te api 22]
E nehenehe te fatu e faautua i te feia tarahu e faaino ra i to ˈna fare