A patoi i te poiri, a faaea noa râ i roto i te maramarama

1-2. (1) Teihea roa Paulo i to ˈna papairaa i to Ephesia, e no te aha? (2) Eaha na uiraa ta tatou e hiˈopoa?

A TAPEAHIA ˈI te aposetolo Paulo i roto i te hoê fare i Roma, ua hinaaro oia e faaitoito i to ˈna mau hoa Kerisetiano. No te mea eita ta ˈna e nehenehe e farerei roa ˈtu ia ratou, ua papai ïa oia i te rata. Ua papai o ˈna i to Ephesia i te area matahiti 60 aore ra 61.​—Eph. 1:1; 4:1.

² Fatata ahuru matahiti na mua ˈtu, i faaea na Paulo i Ephesia tau avaˈe a poro e a haapii ai i te taata i te parau apî oaoa. (Ohi. 19:1, 8-10; 20:20, 21) Ua here roa oia i to ˈna mau taeae e ua hinaaro e tauturu ia ratou ia tapea i te taiva ore ia Iehova. No te aha râ oia i papai ai i te mau Kerisetiano faatavaihia no nia i te poiri e te maramarama? E eaha te haapii mai i ta ˈna i papai? E hiˈopoa ïa tatou i te pahonoraa.

MAI TE POIRI I TE MARAMARAMA

3. Eaha na taˈo ta Paulo i faahiti i roto i ta ˈna rata i to Ephesia?

³ Ua papai Paulo i te mau Kerisetiano i Ephesia: “Mai te poiri hoi outou na mua ˈˈe, area i teie nei, mai te maramarama ïa.” (Eph. 5:8) I ǒ nei, ua faahiti Paulo i na taˈo poiri e maramarama no te faataa i te tauiraa rahi ta ratou i rave. E hiˈopoa tatou no te aha oia i parau ai “mai te poiri hoi [ra]tou na mua ˈˈe.”

4. Mea nafea to Ephesia i te vairaa i roto i te poiri no te haapaoraa hape?

⁴ Poiri no te haapaoraa hape. Hou a ite ai i te parau mau e a riro ai ei Kerisetiano, i tiaturi na to Ephesia i te mau haapiiraa hape e te peu manamana. Te vai ra i to ratou oire te hiero o te ruahine Aretemisa, hiˈohia e te rahiraa i tera tau ei hoê o na hitu ohipa faahiahia roa ta te taata i hamani. Ua topa roa ïa to reira mau taata i roto i te haamoriraa idolo. E imiraa hoona te hamaniraa e te hooraa ˈtu i te mau tii o taua ruahine ra. (Ohi. 19:23-27) Mea rahi atoa i reira o te rave ra i te peu manamana.​—Ohi. 19:19.

5. Mea nafea to Ephesia i te vairaa i roto i te poiri no te peu tia ore?

⁵ Poiri no te peu tia ore. Mea rave te feia no Ephesia i te peu tia ore ma te haama ore. Pinepine i te faaroohia te parau faufau na te mau tahua teata o te oire e i te mau oroa faaroo. (Eph. 5:3) “Aita faahou” e rave rahi “i ite i te haama,” te auraa na roto i te reo Heleni, “aita ratou i ite faahou i te mauiui.” (Eph. 4:17-19) Hou ratou a ite ai eaha te mea maitai e te mea ino, aita to ratou manaˈo haava i hauti ia rave ratou i te mea ino. Aita atoa ratou i tâuˈa i to Iehova manaˈo i ta ratou mau ohipa. No reira ïa Paulo i parau ai e “ua poirihia to ratou feruriraa e ua atea ê i te ora no ǒ mai i te Atua.”

6. No te aha Paulo i parau ai “i teie nei, mai te maramarama” to Ephesia?

⁶ Ua faarue râ vetahi o to Ephesia i te poiri. Ua papai Paulo e “i teie nei, mai te maramarama ïa [ra]tou, no te mea no te Fatu [ra]tou.” (Eph. 5:8) Ua farii ratou i te maramarama o te parau mau. (Sal. 119:105) Ua haapae ratou i ta ratou mau peu faaroo tano ore e to ratou haerea tia ore. Ua “pee [ratou] i te haerea o te Atua” e ua faaitoito i te haamori e i te faaoaoa ia Iehova.​—Eph. 5:1.

7. E nafea to tatou tupuraa e tuati ai e to te mau Kerisetiano e rave rahi i Ephesia?

⁷ Hou tatou a ite ai i te parau mau, i roto atoa na tatou i te poiri no te haapaoraa hape e no te peu tia ore. I faatupu na vetahi i te mau oroa a te haapaoraa hape. I rave na te tahi atu i te peu tia ore. I to tatou râ iteraa i te mau ture aveia a Iehova no nia i te mea maitai e te mea ino, ua taui tatou. Ua faatano tatou i to tatou oraraa i nia i ta ˈna mau titauraa tia, a fanaˈo atu ai e rave rahi haamaitairaa. (Isa. 48:17) E ere râ mea ohie ia faaatea ê noa mai i te poiri ta tatou i faarue, a vai noa ˈi i roto i te maramarama. Eaha ïa ta tatou e rave?

Image digitally reproduced with the permission of the Papyrology Collection, Graduate Library, University of Michigan, P.Mich.inv. 6238. Licensed under CC by 3.0

A PATOI I TE POIRI

8. Ia au i te Ephesia 5:3-5, ia haapae to Ephesia i te aha?

⁸ A taio i te Ephesia 5:3-5. No te faaatea ê noa i te poiri no te peu tia ore, ia haapae noa ïa te mau Kerisetiano i Ephesia i te mau peu mea au ore na Iehova, eiaha noa te peu taotoraa tia ore, oia atoa râ te parau faufau. Ua haamanaˈo Paulo i to Ephesia i te faufaaraa ia haapae i te reira no te “fatu i te Faatereraa arii a te Atua ta te Mesia e faatere.”

9. No te aha e vai ara ˈi i te mau mea o te turai ia tatou ia rave i te peu tia ore?

⁹ Ia vai ara atoa tatou eiaha e rave i “te mau ohipa faufaa ore o te poiri.” (Eph. 5:11) Ua itehia e ia tamau te hoê taata i te mataitai, i te faaroo e i te paraparau no nia i te mau mea tia ore, e hema ohie oia i te rave i te mea ino. (Gen. 3:6; Iak. 1:14, 15) I te hoê fenua, ua faatupu e rave rahi taeae i te hoê pûpû aparauraa i nia i te reni faahoaraa. I te haamataraa, mea au roa te aparauraa, no Iehova e te parau mau. Tera râ, ô riirii mai nei te mau parau tano ore. Ua rahi aˈe ta ratou paraparau no te peu taotoraa. Ua rave roa te rahiraa i te peu taotoraa tia ore e ua faˈi ratou e no teie aparauraa faufau i tupu ai te reira.

10. Te hinaaro ra Satani ia manaˈo tatou i te aha? (Ephesia 5:6)

¹⁰ Te faahema nei te ao a Satani ia tatou ia manaˈo e ere roa ˈtu mea ino te mea faufau i te aro o Iehova. (Pet. 2, 2:19) Eita tatou e maere. Ua haapoiri noa Satani i te feruriraa o te taata ia ore ia taa ia ratou eaha te mea maitai e te mea ino. (Isa. 5:20; Kor. 2, 4:4) No reira e rave rahi hohoˈa teata, haapurororaa teata e reni natirara e haaparare ai i te mau manaˈo aita e tuati ra i ta Iehova mau ture aveia tia. Te hinaaro ra Satani ia manaˈo tatou mea navenave e te atâta ore te mau peu e huru oraraa tia ore tei ite-pinepine-hia i teie mahana.​—A taio i te Ephesia 5:6.

11. E nafea te hiˈoraa o Angela e faaite ai i te faufaaraa ia faaohipa i te aˈoraa i roto i te Ephesia 5:7? (A hiˈo atoa i te hohoˈa.)

¹¹ Te hinaaro ra Satani ia amuimui tatou i te feia o te haafifi ia tatou ia pee i ta Iehova mau ture aveia. No reira Paulo i aˈo ai i to Ephesia: “Eiaha outou e apiti ia ratou,” oia hoi te feia e rave ra i te mea ino i te aro o te Atua. (Eph. 5:7) E titauhia râ ia vai ara tatou hau aˈe i to Ephesia, no te mea e amuimui tatou i te taata ma te farerei tino roa e i nia i te reni faahoaraa. Mea atâta roa te reni faahoaraa. Ta Angelaa ïa no Asia i taa. Te faˈi ra oia: “Ua taui riirii noa to ˈu huru feruriraa, a manaˈo roa ˈtu ai e ere mea ino ia ‘faahoa’ i te feia aita e faatura ra i te mau faaueraa tumu Bibilia. Aita atoa e fifi ia ora i te hoê huru oraraa eita Iehova e au.” Auaˈe te mau matahiapo i tauturu ia Angela. Te na ô ra oia: “I teie nei, e faaî au i to ˈu feruriraa i te mau mea pae varua, eiaha râ i te mau mea i nia i te reni faahoaraa.”

12. Eaha te tauturu mai ia pee noa i ta Iehova mau ture aveia no nia i te mea maitai e te mea ino?

¹² E titauhia ia patoi tatou i te manaˈo o teie nei ao e mea maitai te peu tia ore. Ua ite tatou e manaˈo hape tera. (Eph. 4:19, 20) Mea tano ia uiui tatou: ‘Te vai ara ra anei au eiaha e amuimui i te hoa ohipa, te hoa haapiiraa e te tahi atu aita e faatura ra i ta Iehova mau ture aveia tia? Te pee ra anei au ma te itoito i ta Iehova mau ture aveia noa ˈtu e parauhia mai mea etaeta roa vau?’ Ia au i te Timoteo 2, 2:20-22, e titauhia atoa ia vai ara i ta tatou amuimuiraa i roto i te amuiraa. Eita hoi vetahi e tauturu mai ia tavini noa ia Iehova ma te taiva ore.

“MAI TO TE TAMARII O TE MARAMARAMA” TO TATOU HAEREA

13. Eaha te auraa “mai to te tamarii o te maramarama noa to [ta]tou haerea”? (Ephesia 5:7-9)

¹³ Ua faaitoito Paulo i to Ephesia ia tamau i te patoi i te poiri, oia atoa râ “mai to te tamarii o te maramarama noa to [ra]tou haerea.” (A taio i te Ephesia 5:7-9.) Te auraa, e faaite tatou i te mau taime atoa e Kerisetiano mau tatou. E tamau ïa tatou i te taio e i te haapii i te Bibilia e ta tatou mau papai. Mea faufaa roa ia pee maite tatou i te hiˈoraa e te mau haapiiraa a Iesu Mesia, “te maramarama o teie nei ao.”​—Ioa. 8:12; Mas. 6:23.

14. E nafea te varua moˈa e tauturu mai ai?

¹⁴ E titauhia atoa ia ani i te varua moˈa o te Atua ia au noa to tatou haerea i “to te tamarii o te maramarama.” No te aha? Mea fifi ia vai viivii ore i roto i teie nei ao aita e faatura ra i ta Iehova mau ture aveia. (Tes. 1, 4:3-5, 7, 8) E tauturu mai ïa te varua moˈa ia patoi i te huru feruriraa o te feia o teie nei ao aita e tuati ra i to te Atua manaˈo. E tauturu atoa mai te varua moˈa ia faatupu i “te mau mea maitatai huru rau . . . e te parau-tia.”​—Eph. 5:9.

15. E nafea tatou e fanaˈo ai i te varua moˈa? (Ephesia 5:19, 20)

¹⁵ E fanaˈo tatou i te varua moˈa maoti te pure. Ua parau Iesu e “horoa [Iehova] i te varua moˈa na te feia e ani atu ia ˈna.” (Luka 11:13) E fanaˈo atoa tatou i te reira ia arue amui tatou ia Iehova i te mau putuputuraa. (A taio i te Ephesia 5:19, 20.) E tauturu te varua moˈa ia tatou ia rave i ta te Atua e au.

16. Eaha te tauturu mai ia rave i te mau faaotiraa paari? (Ephesia 5:10, 17)

¹⁶ Mai te peu e faaotiraa faufaa ta tatou e rave, e titauhia ia taa ia tatou “te hinaaro o Iehova” e ia haa ia au i te reira. (A taio i te Ephesia 5:10, 17.) Ia ite mai tatou i te mau faaueraa tumu Bibilia e tano i to tatou tupuraa, te imi ra ïa tatou i to te Atua manaˈo. E ia faaohipa tatou i ta ˈna mau faaueraa tumu, papu ïa e faaotiraa paari ta tatou e rave.

17. E nafea ia faaohipa maitai i to tatou taime? (Ephesia 5:15, 16) (A hiˈo atoa i te hohoˈa.)

¹⁷ Ua aˈo atoa Paulo i to Ephesia ia faaohipa maitai i to ratou taime. (A taio i te Ephesia 5:15, 16.) E au roa ïa “te varua ino,” to tatou enemi o Satani, ia pau to tatou taime no te mau mea a teie nei ao, aita faahou ïa e taime no ta tatou taviniraa i te Atua. (Ioa. 1, 5:19) Mea ohie roa no te hoê Kerisetiano ia tuu i ta ˈna mau taoˈa, ta ˈna haapiiraa aore ra ta ˈna ohipa na mua aˈe i ta ˈna taviniraa ia Iehova. Ia na reira oia, tapao faaite ïa ua peehia o ˈna i te huru feruriraa o teie nei ao. Parau mau, e ere mea ino tera mau mea, eiaha râ te reira ia tuuhia i te parahiraa matamua o to tatou oraraa. Ia au noa to tatou haerea i “to te tamarii o te maramarama,” e titauhia ia “faaohipa maitai i to [ta]tou taime,” te auraa ia haapao noa i te mea faufaa mau â.

18. Eaha ta Donald i rave no te faaohipa maitai i to ˈna taime?

¹⁸ A imi i te mau ravea no te tavini atu â ia Iehova. Ta Donald ïa no Afirika apatoa i rave. Te parau ra oia: “Ua feruri au i to ˈu oraraa e ua taparuparu ia Iehova ia tauturu mai ia tavini atu â ia ˈna. Ua pure au ia noaa mai te tahi ohipa e vata atu â vau no te pororaa, e ua noaa mai maoti Iehova. Haamata ˈtura ïa mâua ta ˈu vahine i te taviniraa taime taatoa.”

19. E nafea to tatou haerea e au noa ˈi i “to te tamarii o te maramarama”?

¹⁹ Eita e ore ua tauturu ta Paulo rata i to Ephesia ia tapea i to ratou taiva ore ia Iehova. E tauturu atoa mai te reira ia tatou, ei hiˈoraa ia maiti maitai i te faaanaanataeraa e te hoa. E turai atoa te reira ia tatou ia pee maite noa i te maramarama o te parau mau ma te haapii tamau i te Bibilia. E te haapapu ra te reira i te faufaaraa ia ani i te varua moˈa, o te faatupu i te mau huru maitatai i roto ia tatou. Ia faaohipa tatou i ta Paulo i papai, e rave ïa tatou i te mau faaotiraa paari ia au i to Iehova manaˈo. Ma te na reira, e haere ïa ia tatou ia patoi i te poiri e ia vai noa i roto i te maramarama.