Haapiiraa 7

A haafatata ˈtu i te Atua na roto i te pure

No te aha e mea faufaa ia pure tamau? (1)

O vai ta tatou e pure, e nafea? (2, 3)

Eaha te mau tumu parau e tano ia faahiti i roto i te pure? (4)

Afea oe e pure ai? (5, 6)

E faaroo anei te Atua i te mau pure atoa? (7)

1. Te pure, o te paraparauraa ˈtu ïa i te Atua ma te haehaa. E tia ia oe ia pure tamau i te Atua. E fatata roa ˈtu ïa oe ia ˈna mai te hoê hoa piri roa. Noa ˈtu e e Atua hanahana e te puai rahi o Iehova, te faaroo nei oia i ta tatou mau pure! Te pure tamau ra anei oe i te Atua?—Salamo 65:2; Tesalonia 1, 5:17.

2. E tuhaa te pure no ta tatou haamoriraa. E tia ïa ia pure tatou i te Atua ra o Iehova anaˈe. I to Iesu vairaa mai i nia i te fenua nei, ua pure noa oia i to ˈna Metua, eiaha i te taata ê. E tia atoa ia tatou ia na reira. (Mataio 4:10; 6:9) Teie râ, e tia i ta tatou mau pure atoa ia faataehia na roto i te iˈoa o Iesu. E faaite te reira e te faatura ra tatou i te tiaraa o Iesu e te tiaturi ra tatou i roto i ta ˈna tusia ei hoo.—Ioane 14:6; Ioane 1, 2:1, 2.

3. Ia pure anaˈe tatou, e tia ia tatou ia paraparau i te Atua mai roto mai i to tatou mafatu. Eiaha e tamau aau i ta tatou mau pure aore ra e taio i roto i te hoê buka pure. (Mataio 6:7, 8) E nehenehe tatou e pure ma te hoê tiaraa faatura, i te mau taime atoa, e i te mau vahi atoa. E nehenehe te Atua e faaroo i te mau pure mamû noa e faahitihia i roto i to tatou mafatu. (Samuela 1, 1:12, 13) E mea maitai ia imi i te hoê vahi hau ma te faaatea mai ia vetahi ê no te faatae i ta tatou mau pure tataitahi.—Mareko 1:35.

4. Eaha te mau tumu parau ta oe e nehenehe e faahiti i roto i ta oe mau pure? Te mau mea atoa ïa o te nehenehe e faaino i to oe auhoaraa e o ˈna. (Philipi 4:6, 7) Te faaite ra te pure faahiˈoraa e e tia ia tatou ia pure no te iˈoa e te opuaraa a Iehova. E nehenehe atoa tatou e ani e ia haapaohia to tatou mau hinaaro i te pae tino, ia faaorehia ta tatou mau hara, e ia noaa mai te tauturu no te patoi i te faahemaraa. (Mataio 6:9-13) Eiaha tatou e pure no te tahi tumu miimii. E tia ia tatou ia pure no te mau mea noa e tuea ra e te hinaaro o te Atua.—Ioane 1, 5:14.

5. E nehenehe oe e pure i te mau taime atoa e turai ai to oe mafatu ia oe ia haamauruuru aore ra ia arue i te Atua. (Paraleipomeno 1, 29:10-13) E tia ia oe ia pure ia roo-noa-hia ˈtu oe i te fifi e ia tamatahia to oe faaroo. (Salamo 55:22; 120:1) E tano ia pure na mua ˈˈe i te taime tamaaraa. (Mataio 14:19) Te ani nei Iehova ia tatou ia pure “i te mau huru taime atoa.”—Ephesia 6:18, MN.

6. E tia iho â râ ia tatou ia pure mai te peu e ua rave tatou i te hoê hara ino mau. I taua mau taime ra, e tia ia tatou ia taparu e ia aroha mai Iehova e ia faaore mai oia i ta tatou hara. Mai te peu e e faˈi tatou i ta tatou mau hara ia ˈna ra e e tutava tatou eiaha e na reira faahou, e ‘tia i te Atua i te faaore mai i te hara.’—Salamo 86:5; Maseli 28:13.

7. E faaroo noa Iehova i te mau pure a te feia parau-tia. Ia faaroo mai te Atua i ta oe mau pure, e tia ia oe ia tutava i te ora ia au i ta ˈna mau ture. (Maseli 15:29; 28:9) E tia ia oe ia faahaehaa ia pure anaˈe oe. (Luka 18:9-14) E tia ia oe ia ohipa ia au i ta oe mau pure. Mea na reira ïa oe e faaite ai e e faaroo to oe e te tiaturi mau ra oe i ta oe e parau ra. I reira noa Iehova e pahono mai ai i ta oe mau pure.—Hebera 11:6.