Ihea vau e nehenehe ai e ite i te tiaturiraa?
Te pahonoraa a te Bibilia
Te parau ra te Bibilia e te hinaaro ra te Atua e horoa mai i “te tahi oraraa no a muri aˈe e te tahi tiaturiraa.”a (Ieremia 29:11) Hoê tumu no te aha te Atua i horoa mai i te Bibilia, “ia noaa atoa te tiaturiraa . . . e te tamahanahanaraa a te mau Papai.” (Roma 15:4) Mai ta tatou e ite mai, e nehenehe te aˈoraa a te Bibilia e horoa mai i te hoê tiaturiraa e te fafau atoa ra i te tiaturiraa faahiahia no a muri aˈe.
I roto i teie tumu parau
Nafea te Bibilia e horoa mai ai i te hoê tiaturiraa?
Ma te faaite mai i te taahiraa faufaa no te haamaitai i to tatou oraraa, e nehenehe te Bibilia e tauturu mai ia noaa mai te hoê tiaturiraa. A hiˈo te tahi hiˈoraa.
A hiˈo i te Bibilia no te aratairaa faufaa. Te parau ra te Salamo 119:105: “E mori to parau no to ˈu nei avae, e mori turama no to ˈu nei eˈa.” E nehenehe te puai o te maramarama e rave e piti mea. E nehenehe te reira, e turama i te mau mea i mua ia tatou, e nehenehe atoa te reira e turama i te vahi atea. E nehenehe atoa te faaueraa tumu Bibilia e tauturu mai ia faaruru i te mau fifi ta tatou e farerei nei, ma te horoa mai i te hoê tiaturiraa i te mau mahana atoa. E nehenehe te mau haapiiraa Bibilia e horoa mai i te puai e e “oaoa te aau i te reira.” (Salamo 19:7, 8) I te hoê â taime, te faaite ra te Bibilia i te opuaraa faahiahia a te Atua no te a muri aˈe o te huitaata e te fenua. E horoa mai tera tiaturiraa i te oaoa e te mauruururaa i te mea e vai ra ia tatou ra.
A vaiiho ia vetahi ia tauturu ia oe. Mai te peu, tei roto tatou i te hoê tupuraa aita e ravea, eita paha tatou e hinaaro i te tauturu a to tatou utuafare e te mau hoa. Tera râ, te parau ra te Bibilia eiaha tatou e na reira no te mea e turai te reira ia tatou ia rave i te mea maamaa. (Maseli 18:1) E nehenehe te feia ta tatou e here ra e tauturu ia tatou ia vai aifaito noa. E nehenehe atoa ratou e horoa mai i te tahi ravea no te faatitiaifaro i te mau tupuraa fifi. (Maseli 11:14) Te mea papu râ, e nehenehe ratou e tamahanahana mai e e horoa mai i te puai tae roa i te taime e maitai mai ai te tupuraa.—Maseli 12:25.
A pure i te Atua. Te parau ra te Bibilia: “A huri i ta oe hopoia i nia ia Iehova, e na ˈna e tauturu ia oe. Eita roa oia e vaiiho ia marua te taata parau-tia.”b (Salamo 55:22) Ua tano te piiraahia Iehova ‘te Atua o te horoa mai i te tiaturiraa.’ (Roma 15:13) E nehenehe outou e pure ia ˈna no nia i “to outou mau ahoaho atoa,” ma te tiaturi e te haapeapea mai ra oia ia outou. (Petero 1, 5:7) No reira te Bibilia e parau ai: “E faaitoito oia ia outou, e haapuai oia ia outou, e haamau papu oia ia outou.”—Petero 1, 5:10.
A vaiiho i te mau tamataraa e haapuai i to oe tiaturiraa. Te fafau ra te Bibilia: “Area te taata o te faaroo [i te Atua], e parahi ïa ma te taiâ ore e eita oia e riaria i te ati.” (Maseli 1:33) I to te mataˈi rorofai vavahiraa i to ˈna fare, ua ere te hoê vahine i Auteralia o Margaret te iˈoa, te rahiraa o ta ˈna mau faufaa. Aita râ o ˈna i haapeapea rahi roa, te haapiiraa ta ˈna i huti mai, mea ohie ia ere i te mau faufaa atoa. I muri iho i tera tupuraa, ua tiatonu oia i nia i te mea faufaa aˈe, to ˈna utuafare, te mau hoa, to ˈna auhoaraa e te Atua e te tiaturiraa ta te Bibilia e horoa mai.—Salamo 37:34; Iakobo 4:8.
Eaha te tiaturiraa ta te Bibilia e horoa mai no te huitaata?
Te fafau ra te Bibilia i te hoê a muri aˈe faahiahia no te huitaata e te fenua. Fatata te reira i te tupu mai. Oia mau, te faaite ra te mau fifi ta te huitaata e faaruru ra i teie mahana e te ora nei tatou i “te mau mahana hopea” o teie nei ao. (Timoteo 2, 3:1-5) Fatata roa te Atua i te faatere i te fenua e i te faaore i te parau-tia ore e te mauiui. E na reira oia maoti te Faatereraa arii a te Atua. (Daniela 2:44; Apokalupo 11:15) Ua faahiti Iesu i tera Faatereraa arii i te raˈi na roto i te Pure a te Fatu: “Ia tae mai ta oe Faatereraa arii. Ia tupu to oe hinaaro i te fenua nei.”—Mataio 6:9, 10.
Mea papu to te Atua hinaaro no te huitaata i roto i te Bibilia. A nota na te tahi mau fifi ta te Faatereraa arii e faaore:
Aita faahou te poia. “E horoa te fenua i ta ˈna e faahotu.”—Salamo 67:6.
Aita faahou te maˈi. “Aita e taata e parau: ’E maˈi to ˈu.’”—Isaia 33:24.
Aita faahou te pohe. “E tamǎrô [te Atua] i te mau roimata atoa o to [te huitaata] mata. E ore roa te pohe, e ore atoa te oto e te auê e te mauiui. Ua mou hoi te mau mea tahito.”—Apokalupo 21:3, 4.
a E tiaturi tatou te tahi mea ia hinaaro tatou i te reira e ia papu e e noaa mai te reira ia tatou. E nehenehe atoa tatou e faaau i te tiaturiraa i te tahi mea ta tatou e tiai ra.
b O Iehova te iˈoa o te Atua i te roto i te Bibilia.—Salamo 83:18.