Октябрь

Дыңнангыр болуру чамдыкта амыр эвес. Иеговага дыка ынак чораан Давид хаан безин дыңнангыр болуру берге апаарга: «Сеңээ белени-биле чагыртыр күзелди база оттуруп берем» деп мөргүлге дилеп турган (Ыд. ыр. 51:12, Чаа делегей). Бурганга дыңнангыр болуру кижилерге чүге ындыг берге? Бирээде, дыңнангыр эвес чорукту салгап алган бис. Ийиде, Иеговага удур тура халаан Эрлик бисти үргүлчү бодунуң талазынче тыртарын кызып турар (2 Кор. 11:3). Үште, үймээнчи хөөннүг делегейде чурттап чоруур бис (Эф. 2:2). Ынчангаш Эрликке, делегейниң базыышкынынга, бачыттыг күзелдеривиске алыспазы чугула. Иеговага болгаш ооң тургускан эрге-чагыргазынга дыңнангыр болур дээш, бар шаавыс-биле кызар ужурлуг бис. w23.10 ар. 6, абз. 1

Ол Иисустуң хуулгаазыны бисти чүү чүвеге өөредип турар? Биче сеткилге. Иисус сугну кызыл арага кылдыр хуулдурупкаш, мактанмаан. Ол бодунуң чедиишкиннери дээш кажан-даа мактанмас чораан. Харын-даа ол биче сеткилдиг бооп, бүгү алдар-макталды, хүндүнү Адазынга чедирип турган (Ин. 5:19, 30; 8:28). Иисустуң биче сеткилин өттүнер болзувусса, чедиишкиннеривис дээш мактанмас бис. Бодувус дээш эвес, а кайгамчык Бурганга бараан боор алдар-хүндү дээш мактаныылыңар (Иер. 9:23, 24). Ынчангаш бүрүнү-биле төлептиг Бурганывыска алдар-макталды көргүзээлиңер. Иегованың дузазы эвес болза, чүнү-даа чедип албас ийик бис (1 Кор. 1:26—31). Бир эвес биче сеткилдиг боор болзувусса, өске улуска кылган эки ажыл-херээвис дээш, тускай үнелел манавас бис. Иегова бисти көрүп, ажыл-херээвисти үнелеп турар деп билир болгаш, өөрүп турар бис (Деңнеңер: Матфей 6:2—4; Евр. 13:16). Чугаажок, Иисустуң биче сеткилин өттүнер болзувусса, Иегова аажок өөрүүр (1 Пет. 5:6). w23.04 ар. 4, абз. 9; ар. 5, абз. 11, 12

Павел элчин Бурганның сүлдезинге бүргеткеш, христианнарны өскелерниң эрге-ажыының дугайында сагыш човаарынче оттурган. Чыышка ооң сүмезин канчаар ажыглап болур бис? Өске улус сайгарылгага база киржиксеп турар деп сактыр болзувусса эки. Мынчаар боданып көрүңер. Эштериңер-биле чугаалажып тургаш, оларга сөс-даа бербейн, чүгле силер чугааланып туруп бээр силер бе? Чок, болбайн канчаар. Олар база чугаага киржир кылдыр күзээр болгай силер. Ооң-биле дөмей, чыыштарга хөй акы-угбалар харыылаан болза деп күзээр бис. Өскелерге бүзүрелин көргүзер арганы берип тургаш, оларны деткип турар боор бис (1 Кор. 10:24). Хөй акы-угбалар сайгарылгага киржип шыдаар кылдыр, кыска харыыларны бериңер. Кыска кылдыр харыылап тургаш безин, хөй бодалдарны чугаалаваңар. Бүдүн абзацты чугаалап кааптар болзуңарза, өске ха-дуңманың харыылаар аргазы чок боор. w23.04 ар. 22—23, абз. 11—13

Өскелерге улаштыр дузалажыры чугула. А эң дээре чүүл — Бурганның Чагыргазының дугайында өөрүшкүлүг медээни өскелер-биле үлежири-дир. Суртаалга эскериичел болуру чугула. Чүге дизе ук-ызыгууру, чуртталгага хамаарылгазы аңгы-аңгы улуска ужуражыр бис. Павел элчин чугаалашкан кижизиниң байдалынга таарыштыр алдынып билир турган. Бис база ооң чижээн өттүнүп болур бис. Иисус Павелди «өске чоннар улузунга элчин» кылдыр томуйлап каан (Рим. 11:13). Павел хүлээлгезин эки күүседип, еврейлерден аңгыда гректерге, эртемниг кижилерге, тараачыннарга, даргаларга база хааннарга суртаалдап чораан. Кижи бүрүзүнүң чүрээнге дээштиг болзун дээш, Павел «кандыг-даа улуска хамаарыштыр дыка чоок кижи апарып» турган (1 Кор. 9:19—22). Кижиниң культуразын, кижизидилгезин, чүдүлгезин ол кичээнгейге ап турган. Тывынгыр бооп, кижи бүрүзү-биле чугаалажыр эвин тып өөренир болзувусса, бараалгалывыс оон-даа чедиишкинниг боор. w23.07 ар. 23, абз. 11, 12

Томаанныг болуру кошкак эвес, күштүг чоруктуң демдээ. Белен эвес байдалда оожум артарынга иштики күш херек. Томаарыыр чорук — «Сүлдениң үре-түңнели» (Гал. 5:22, 23). Чамдыкта «томаарыыры» деп очулдуртунган грек сөстү черлик аътты чаажыктырып алган байдалда ажыглаар турган. Чаажыга берген эмдик аътты бодап келиңер. Ол ам дыңнангыр, ынчалза-даа күштүг. Кижилер-биле база шак-ла ындыг. Томаараан тудум, улам күштүг апаар бис. Ол чугула шынарны сайзырадырда чүгле кызымак, шудургу болурундан аңгыда, Бургандан ыдыктыг сүлдени дилеп мөргүүрү чугула. Иегованың Херечилеринден тулдур айтырыг салырга, удурланыкчыларынга эвилең-ээлдек харыылааш, ол шынарны сайзырадып ап болурун көргүскеннер (2 Тим. 2:24, 25). w23.09 ар. 15, абз. 3

Иоанн элчин сүртенчиг көстүүшкүнге дээрде 24 удуртукчунуң Иегованы алгап-мактап турарын көрген. Олар: «Бурганывыс алдарга, мактал-хүндүге... төлептиг сен» — деп турган (Ажыд. 4:10, 11). Шынчы дээрниң төлээлериниң Иегованы алгап-мактаар чылдагааннары база хөй. Олар дээрде ооң-биле кады чурттап турар болгаш, ону дыка эки билир. Олар Бурганның канчаар алдынып турарын база көрүп турарлар. Ынчангаш олар ону алгап-мактап чоруур (Иов 38:4—7). Бис база мөргүлдеривиске Иегованы алгап-мактаар болзувусса эки. Чижээ, аңаа чүге ынаавысты база ону чүге магадап турарывысты чугаалап болур бис. Библияны номчуп, шинчилеп тургаш, Иегованың силерге ылаңгыя чараш шынарларын эскериңер (Иов 37:23; Рим. 11:33). Оон Иеговага минниишкиннериңерни чугаалап бериңер. Оон ыңай Бурганны биске база чыышта ха-дуңмаларга дузалажып турары дээш, алгап-мактаңар (1 Хаан. 2:1, 2). w23.05 ар. 3—4, абз. 6, 7

1919 чылда Бурганның чону Өндүр улуг Вавилоннуң кулданыындан хосталы берген. «Ыдыктыг орукче» туруп алган ак сеткилдиг улусту уткуур дээш, ол-ла чылын «шынчы болгаш сарыылдыг чалча» дыка таптыг тыптып келген (Мф. 24:45—47; Иса. 35:8). Ол чалчаның болгаш эрткен үеде «Ыдыктыг орукту» белеткеп турган ажылчыннарның ачызында биче сеткилдиг улус Иегованың күзел-соруунуң дугайында оон-даа хөйнү билип эгелээн (У. ч. 4:18). Олар Бурганның негелделеринге дүүштүр чуртталгазын өскертип эгелээннер. Иегова ону дораан негээн бе? Чок, ол чонун чоорту арыглап турган. Чүнү-даа кылгаш, Бурганның сеткилин хомудатпас дыка-ла аас-кежиктиг үе келир! Кандыг-даа орукту үргүлчү септээр ужурлуг. Шак ынчаар 1919 чылда «Ыдыктыг орукка» эгелээн ажылдар ам-даа уламчылап турар. Кандыг сорулга-биле? Өндүр улуг Вавилоннуң аспаандан оон-даа хөй улус үнүп шыдаар кылдыр. w23.05 ар. 17, абз. 15, 16

Удуртукчу чөвүлел комитеттерде дузалакчыларын хууда өөредир. Ол дузалакчылар амдан эгелеп, улуг харыысалганы чүктеп, аңгы-аңгы даалгаларны күүседип турар. Чагдырган христианнар дээрже үне бээрге, Иисустуң хойларын башкарарынга оларны дыка эки белеткеп каан. Коргунчуг хилинчектиң төнериниң бетинде сөөлгү арткан чагдырган акывыс дээрже үне бээрге, чер кырынга арыг чүдүлге канчап-даа барбас. Хаанывыс Иисустуң ачызында бис Иеговага улаштыр бараалгаар бис. Ийе, Библияда Магогтан Гог деп адаан чоннар каттыжыышкыны бисче халдай бээр (Иез. 38:18—20). Ол халдаашкын чедиишкин чок, кыска болур. Бис Иеговага бараалгалывысты оожумнатпас бис. Ол бисти албан камгалаар! Иоанн элчин көстүүшкүнге коргунчуг хилинчекти көрүп эрткен «мөөң чонну», Христостуң өске хойларын, көрген (Ажыд. 7:9, 14). Ийе, Иегова бисти чугаажок камгалаар! w24.02 ар. 5—6, абз. 13, 14

Ыдыктыг сүлдени канчаар ап болур бис? Ооң дугайында мөргүп, Бурганның сүлдезинге бүргеткен Библияны шинчилеп, Бурганның сүлдези башкарткан организация-биле сырый ажылдажыр болзувусса эки. Ынчан ыдыктыг сүлдениң үре-түңнелин илередип шыдаар бис (Гал. 5:22, 23). Бурган ыдыктыг сүлдени бодун шын алдынып, угаан-бодалын хирлендирбейн турар улуска бээр. Бир эвес чүдек-бужар чүүлдер дугайында боданып, ол бодалдарга алзыр болзувусса, Иегова биске ыдыктыг сүлдезин бербес (1 Фес. 4:7, 8). Ыдыктыг сүлдени алыр дизивиссе, «өттүр билген медеглелдерни куду көрбеңер» дээн айтыышкынны эдерери чугула (1 Фес. 5:20). Мында «өттүр билген медеглелдер» дээрге Бурганның сүлдези таварыштыр дамчыдып турар медээлер-дир. Ынаар Иегованың хүнүнүң болгаш чурттап турарывыс тускай үениң дугайында медээлер база хамааржыр. Бис Иегованың хүнүн соңгаарладып, Армагеддонга чедир чурттай албас бис деп боданмайн турар бис. Харын-даа ол хүн мыя бо келген деп үргүлчү сактып чоруур бис. Ол чүден көскү? Бис шын алдынып, Бурганның ажыл-херээнге идепкейлиг киржип чоруур бис (2 Пет. 3:11, 12). w23.06 ар. 12, абз. 13, 14

Христианнар болганывыста, электроннуг херекселивиске порнография көстүп кээрге, чүнү канчап болур бис? Ону көрбейн, дүрген өжүрүп, шиитпирлиг хөделир ужурлуг бис. Биске чүү дузалаар? Иегова-биле найырал — биске эң-не үнелиг деп утпазы чугула. Порнография кылдыр санаттынмас чуруктар безин, эр-херээжен харылзаа кылыр күзелди оттуруп болур. Христианнар чүге ындыг чүүлдерни көрбес ужурлуг? Чүге дизе бачыттың талазынче бичии-даа базымны кылырын, ашак-кадай улустуң шынчы чоруун чүрээвиске безин үрээрин күзевес бис (Мф. 5:28, 29). Таиландыдан Дэвид дээр удуртукчу акывыс мынча дээн: «Мен кезээде бодумга мындыг айтырыгны салыр мен: „Порнография эвес-даа чүүлче көөрүмге, Иеговага анчыг болбас бе?“ Ындыг бодалдар меңээ мерген угаанныг алдынарынга дузалап турар». Иегованы муңгарадыптар коргушту сайзырадыр болзувусса, мерген угаанныг алдынып шыдаар бис. Бурганның мурнунга шын коргуш дээрге-ле «мерген угаанның үнер дөзү». w23.06 ар. 23, абз. 12, 13

«Бажың ишти» деп сөстер чыыштарывысты илереткен чадавас. Коргунчуг хилинчек үезинде ха-дуңма-биле кады турар болзувусса, Иегова бисти камгалаар. Ынчангаш амдыгааштан тура, ха-дуңмавысты анаа-ла шыдашпайн, а оларга ынакшылды сайзырадырын кызар ужурлуг бис. Оон бистиң амы-тынывыс хамааржыр! «[Иегованың] өндүр улуг хүнү» кижи төрелгетенге улуг согуг болур (Соф. 1:14, 15). Иегованың Херечилеринге база берге болур. Ынчалза-даа амдыгааштан тура белеткенир болзувусса, дүвүревейн, өске улуска безин дузалажыр бис. Кандыг-даа бергелерни туруштуг ажып эртиптер бис. А бир эвес ха-дуңмавыс багай чүвеге таваржы бээрге, оларның хереглелдери дээш сагыш човап, кээргеп, болдунар-ла чүүлдү кылыр бис. Ынак апарган акы-угбаларывыстан бисти чүү-даа ырадып шыдавас боор. Ынчан Иегова бисти хилинчек-човалаң, хай-халаптар уттундурган делегейге мөңге чуртталга-биле шаңнаар (Иса. 65:17). w23.07 ар. 7, абз. 16, 17

Кайгамчык ажыл-херектерни кылып чораан Бурганның шынчы бараалгакчыларын Библиядан билир бис. Ынчалза-даа эң күштүглери безин боттарын кошкак кылдыр миннип турган. Чижээ, Давид хаан бодун бирде «быжыг даг дег» миннип, а чамдыкта ону коргуш хөме аптар турган (Ыд. ыр. 29:8). Самсон Бурганның сүлдезиниң ачызында дендии күштүүн, а Иегованың дузазы чокта анаа улус ышкаш кошкай бээрин билип турган (Башт. 14:5, 6; 16:17). Ол шынчы бараалгакчылар чүгле Иегованың ачызында күштүг чораан. Павел элчин база Иегованың күжүнден хамааржырын билип турган (2 Кор. 12:9, 10). Ооң кадыы багай чораан (Гал. 4:13, 14). Үе-үе болгаш-ла, аңаа шынчы артары амыр эвес турган (Рим. 7:18, 19). Чуртталгазында дүвүрелдерге, девиденчиг байдалдарга Павел хөй таваржып чораан (2 Кор. 1:8, 9). Ындыг үелерде Иегова аңаа күштү берип турган. Ол шупту шенелделерни ооң ачызында ажып эрткен. w23.10 ар. 12, абз. 1, 2

Боттарывысты ажык чок деп бодаар болзувусса, Иегова ынчаар бодавазын сактыры чугула. Чүге дизе бисти ооң чоок өңнүү болур кылдыр ол боду чалаан (Ин. 6:44). Бодувустуң эскербес эки талаларывысты база чүрээвисти Иегова көрүп турар (2 Чыл. 6:30). Бурган бодунуң ынакшылынга бисти төлептиг дээрге, чигзинер чылдагаанывыс чок (1 Ин. 3:19, 20). Алыс шынны билириниң мурнунда кылган херектери дээш, чамдык акы-угбалар ам-даа ыядыр (1 Пет. 4:3). Шынчы христианнар безин бачыттыг бодалдар-биле демисежир ужурга таваржып турар. Чүрээңер силерге: «Багай сен» — деп сымыраныр бе? Ийе болза, Иегованың төлептиг бараалгакчылары ындыг минниишкинниг чорааны силерни оожургадып болур. Чижээ, Павел элчин частырыглары дээш муңгараар турган (Рим. 7:24). Ол эрткен бачыттары дээш буруузун миннип, сугга суктуруп алган-даа болза, бодун дөмей-ле «элчиннерниң эң бичиизи», бачыттыгларның эң багы деп санаар турган (1 Кор. 15:9; 1 Тим. 1:15). w24.03 ар. 27, абз. 5, 6

Иоас хаанның частырыын канчаар катаптавазыл? Эки эш-өөрнү шилип алыңар. Иеговага ынак улус ону хомудатпазын кызар. Эш-өөр албан-на үе-чергеңер болбас. Иоас бодунуң эжи Иодайдан оранчок бичии чораан. Эштериңерни билип алырда: «Олар Бурганга бүзүрелимни быжыктырарынга меңээ дузалап турар бе? Иеговага дыңнангыр болурунче мени оттуруп турар бе? Иегованың дугайында чугаалажырынга, аңаа хамаарышкан темалар сайгарарынга ынак бе? Бурганның хоойлуларын хүндүлеп турары чугаазындан көскү бе? Чүгле дыңнаксаан чүүлүмнү чугаалаар бе? Азы шын эвес орукче кирер айыылдан оваарындырар бе?» — деп боданыңар (У. ч. 27:5, 6, 17). Эштериңер Иеговага ынак эвес болза, олар силерге херекчок деп дорт чугаалап болур. Иеговага ынак болза, бүзүрелдиг эштериңерден салдынмаңар! (У. ч. 13:20). w23.09 ар. 9, абз. 6, 7

Альфа — грек алфавиттиң бир дугаар үжүү, а омега — сөөлгүзү. «Альфа болгаш Омега» дээни-биле Иегова эгелеп алган чүүлүн эчизинге чедирерин көргүскен. Иегова Адам биле Еваны чаяап кааш, мынча дээн: «Өзүп-көвүдеңер, черниң кырын ээлеңер» (Э. д. 1:28). Ол үеде, Иегова доора уткалыг «Альфа» деп чугаалаан. Адам биле Еваның дыңнангыр тергиин ажы-төлү бүгү черни дываажаң кылгаш, долдуруп ээлээр. Тодазы-биле тайылбырлаан күзел-бодалы бүде бээрге, Иегова доора уткалыг «Омега» деп чугаалаар. Чер биле дээрни чаяап кааш, ол-ла дораан шак-ла ынчаар болур деп аазаашкынны бижээн. Ынчалдыр төнчүзүнде бодап алган чүүлүн чигзиниг чок күүседирин ол көргүскен (Э. д. 2:1—3). w23.11 ар. 4—5, абз. 13, 14

Вавилондан Израильче орук берге болгаш, дөрт хире ай чоруп кээр турган. Иегова оларның оруунга шаптараазыннарны ап кааптарын аазаан. Бурганга шынчы еврейлерге Израильче чанары оларның чидирип алыр чүүлдеринден дээре турган. Эң улуг шаңнал Иеговага мөгейиишкин-биле харылзаалыг. Вавилонга Иегованың өргээзи турбаан. Оон аңгыда, Моисейниң хоойлузунга дүүштүр өргүл бээр бедигээжи-даа, оларны удуртуп-башкарар бараалгакчылары-даа израильчилерде чок турган. Олар Иегованы хүндүлевес, ооң дүрүмнерин сагывас, дүрзү-бурганнарга чүдүүр чон аразынга чурттап чораан. Ынчангаш Бургандан коргар муң-муң еврейлер арыг чүдүлгени катап тургузуп алыр дээш, чуртунче аажок чаныксап турган. w23.05 ар. 14—15, абз. 3, 4

«Чырыктың ажы-төлү» болур дизе, ыдыктыг сүлде херек. Чүге дизе ол чокка, бо хирлиг делегейге арыг артып шыдавас бис (1 Фес. 4:3—5, 7, 8). Бо делегейниң Бурганның бодалынга удур угаан-бодалы болгаш философиялары медереливисче сиңе бербезинге ыдыктыг сүлде дузалаар. Оон аңгыда, Бурганның сүлдези буянче болгаш чөптүг-шынныг чорукче чүткүүрүнге күштү берип турар (Эф. 5:9). Ыдыктыг сүлдени канчаар алырыл? Бир аргазы — ону дилеп мөргүүрү. Дилээн кижиге-ле Иегова сүлдезин бээр деп, Иисус чугаалаан (Лк. 11:13). Оон аңгыда, христиан чыыштарга Иегованы алгап-мактап тургаш, ыдыктыг сүлдени ап турар бис. (Эф. 5:19, 20). Ол сүлдениң күштүг деткимчезиниң ачызында Бурганны өөртүп чурттап шыдаар бис. w24.03 ар. 23—24, абз. 13—15

Оон-даа шыдамык болуксаар силер бе? Ийе болза, мөргүңер. Шыдамык чорук — сүлдениң үре-түңнели болганда, бис ол чараш шынарны бодувустуң күжүвүс-биле өстүрүп шыдавас бис (Гал. 5:22, 23). Кандыг-бир байдалда шыдамык болуру берге болза, Адавыстан ыдыктыг сүлдезин бээрин мөргүүр бис (Лк. 11:13). Оон ыңай Иеговадан шупту чүүлдерже ол ышкаш көөрүнге дузалаарын дилээр бис. А мөргүл соонда хүннүң-не шыдамык болур дээш күжениишкиннер үндүрер бис. Шыдамык болурун кызар болзувусса, ол шынар чүрээвиске быжыы-биле дазылданып артып каар. Түңнелинде ол шынар бистиң бир кезиивис дег апаар. Оон ыңай шыдамык чорук библейжи чижектер дугайында боданырынга дузалаар. Библияда шыдамык чораан дыка хөй кижилерни бижээн. Оларның дугайында боданыры бисти хөй чүүлге өөредир. w23.08 ар. 22—23, абз. 10, 11

Иисус Пётр элчинни Иегованың деткимчезинге бүзүреткен. Иисус дирлип келгеш, элчиннери хөй балык тудуп аар кылдыр хуулгаазын кылган (Ин. 21:4—6). Иегова бараалгакчызын акша-көпеек талазы-биле хандырар деп, ол хуулгаазын Пётрну бүзүреткен. Бурганның «Чагыргазын бирги черге салыр» улуска Иегова бүгү херек чүүлдү бээр дээн Иисустуң сөстерин Пётр ынчан сактып келген чадавас (Мф. 6:33, Чаа делегей). Ынчангаш Пётр чуртталгазын балыктаарынга эвес, а Бурганга бараалгаткан. Ол б. э. 33 чылда Беженги хүннүң байырлалынга илеткелди дидим чугаалаан. Ооң ачызында муң-муң кижилер өөрүшкүлүг медээни хүлээп алган (Аж.-ч. 2:14, 37—41). Пётр самарийжилерге болгаш өске еврей эвес улуска Иисустуң өөреникчилери апаарынга база дузалаан (Аж.-ч. 8:14—17; 10:44—48). Моон алырга, Иегова чыышче янзы-бүрү кижилерни хаара тудар дээш, Пётрну идепкейлиг ажыглаан. w23.09 ар. 20, абз. 1; ар. 23, абз. 11

Вавилончулар Иерусалимни узуткап кааптарга, ийи чыл эрткенде болган: Вавилоннуң хааны Навуходоносор коргунчуг дүш дүжээн. Дүжүнге дыка улуг көжээ көрген. Ол бодунуң мерген угаанныгларынга, ооң санында Даниилге дүжүн чугаалааш, тайылбырлап шыдавас болза өлүр деп чарлык үндүрген (Дан. 2:3—5). Кижилерниң амы-тыны айыылга келген болгаш, Даниил дүрген хөделир ужурлуг апарган. Ынчангаш «Даниил хаанга баргаш, ооң дүжүнүң утказын тайылбырлаарынга боданыр үеден бээрин дилээн» (Дан. 2:16). Аңаа дидим чорук болгаш бүзүрел херек болган. Чүге дизе Даниилдиң ооң мурнунда дүштер утказы тайылбырлаанын кайда-даа биживээн. Эштеринге ол баргаш: «Дээрде саадаан Бургандан оларны кээргеп, чажытты ажыдарын... эки дилээрин... чагаан» (Дан. 2:18). Иегова Бурган ол мөргүлдерге харыылаптарга, Навуходоносорнуң дүжүн Даниил тайылбырлап шыдапкан. Шак ынчаар Даниил эштери-биле өлүмден чайлаан. w23.08 ар. 3, абз. 4

Шыдамык чоруктуң ажыктыын боданыңар. Шыдамык кижи оожум-топтуг болгаш аас-кежиктиг. Ынчап кээрге, ону илередири сеткил-сагыштың болгаш мага-боттуң кадыкшылынга эки. Бир эвес шыдамык болзувусса, улус-биле хамаарылгавыс база эки боор. Чыыжывыс оон-даа демниг апаар. Бир-ле кижи хорададырга-даа килеңге алыспайн, байдалды нарыыдатпас бис (Ыд. ыр. 36:8; У. ч. 14:29). А эң-не кол чүүл: дээрде Адавыска дөмей бооп, аңаа оон-даа чоок кылдыр миннир бис. Шыдамык чорук — кижи бүрүзүн каастаар тускай чараш шынар. Шыдамык чорукту сайзырадыры белен эвес-даа болза, Иегованың дузазы-биле оон-даа эки илередип шыдаар бис. Чаа делегейниң кээрин шыдамыккай манап тургаш, «[Иеговадан] коргар, Ооң энерелинге идегээр улусту Ол карактап-кадагалаар» деп чигзинмес бис (Ыд. ыр. 32:18). Шыдамык чорук хевивис ышкаш бисти моон-даа соңгаар каастап чорзун! w23.08 ар. 22, абз. 7; ар. 25, абз. 16, 17

Кижиниң бүзүрели бар-даа дээр болза, ооң ажыл-херээ көңгүс өске бооп болур деп, Иаков чугаалаан (Иак. 2:1—5, 9). Иаков оон ыңай «чединмес ха-дуңмазы идик-хеп, аъш-чем» хереглээнин көрзе-даа, дуза катпас кижини чугаалаан. Ол кижи бүзүрелин ажыл-херээ-биле бадыткавайн турар. Ындыг бүзүрел ажык чок (Иак. 2:14—16). Бүзүрелди ажыл-херек-биле бадыткаарының чугулазын Иаков Раавтың чижээнге көргүскен (Иак. 2:25, 26). Израильчилерни Иегова деткип турар деп, Раав билип каан (Иис. 2:9—11). Амы-тыны айыылга келген ийи израильчи хайгыылчыны Раав камгалааш, бүзүрелин көргүскен. Түңнелинде израильчи эвес бачыттыг херээжен кижи, Авраам ышкаш, чөптүг-шынныг деп санаттырган. Бүзүрел ажыл-херек-биле бадыткаттынарын Раавтың чижээ биске көргүскен. w23.12 ар. 5, абз. 12, 13

Библияның чүгле кол билиглери биске чедишпес. «Бурганның бодалдарының ханы дүвүн» чедип аар күзелдиг бис. Аңаа ыдыктыг сүлде биске дузалаар (1 Кор. 2:9, 10). Сонуурганчыг айтырыгны азы теманы шилип алгаш, ону ханы шинчилеп болур силер. Ынчаар өөренири силерни Иеговага чоокшуладыр. Чижээ, бурунгу үеде Бурган бараалгакчыларынга ынакшылын канчаар көргүскенин база ол төөгүлер Иегова силерге ынак деп канчаар бадыткап турарын шинчилеңер. Азы бурунгу үеде израильчилер биле амгы үеде христианнарның чүдүлгези чүзү-биле дөмейин деңнеңер. Оон аңгыда, Иисустуң чуртталгазынга болгаш бараалгалынга кандыг медеглелдер күүсеттингенин шинчилеп болур. «Индекс публикаций Сторожевой башни» азы «Путеводитель по публикациям Свидетелей Иеговы» деп справочниктер дузазы-биле шинчилээри дыка солун. Библияны шупту талазындан өөренири, «Бурган дугайында билигни» тып алгаш, бүзүрелиңерни быжыглаарынга дузалаар (У. ч. 2:4, 5). w23.10 ар. 18—19, абз. 3—5

Павел элчинниң ажыглаан «быжыг» деп очулдурган сөстүң дорт утказы «шөйер, хере тыртар» дээн. Шүлүктүң ийиги кезиинде ооң түңнелин чугаалаан: ындыг ынакшыл акы-угбаларның бачыттарын дуглаптар. Сагыштаалап көрүңерем: ынакшылды ийи холувус-биле туткаш, шөйлүп турар пөс ышкаш херип-ле, херип-ле турар бис. Ынчалдыр бир-ийи эвес, а хөй бачытты дуглаптарынга чедир херер бис. Пөс-биле чараш эвес чүүлдү дуглап болур, а ынакшыл өске улустуң частырыгларын болгаш четпестерин дуглаптар азы өршээптер. Акы-угбаларның четпес талаларын өршээр дээш хөлчок кызар апаар-даа болза, күштүг ынакшыл дузалаар (Кол. 3:13). Өске улусту өршээп шыдап турар болзувусса, ынакшылывыстың байдалы эки. Ынчалдыр Иегованы өөртүр күзеливисти көргүзер бис. w23.11 ар. 10—11, абз. 13—15

Иосия хаан өргээни 26 харлыында септеп эгелээн. Ынчан «Моисейни дамчыштыр берген [Иегованың]... хоойлузунуң ному» тывылган. Хаан ыдыктыг хоойлунуң сөстерин дыңнааш, ында чүү бижээнин дораан-на күүседип эгелээн (2 Чыл. 34:14, 19—21). Библияны доктаамал номчуур күзелиңер бар бе? Номчуп эгелээн болзуңарза, чедиишкиннериңер кандыгыл? Ону кылыры солун-дур бе? Хууда силерге дузалаар чыынды шүлүктериңер бар бе? Иосия 39 хар үезинде частырыгны кылгаш, чуртталгазын чидирип алган. Ол Иегованың бодалын билип албайн, бодунуу-биле алдынган (2 Чыл. 35:20—25). Мында биске чугула кичээл бар. Библияны каш-даа чыл өөренип турар азы хар-назынывыс кайы хире-даа болза, Иегованың үзел-бодалы биске кол боор ужурлуг. Ынчангаш Бургандан үргүлчү удуртулганы дилеп, ооң Сөзүн өөренип, дуржулгалыг акы-угбалардан сүмени дилээри чугула. Чүгле ынчан аас-кежиктиг болуп, улуг частырыглар кылбайн барып болур бис (Иак. 1:25). w23.09 ар. 12, абз. 15, 16

Библияда Иеговага ынак, аңаа бараалгап чораан онзагай херээжен улустуң дугайында чугаалап турар. Олар «өйүн билир база шынчы» дээн ышкаш шынарларны илередип чораан (1 Тим. 3:11, Чаа делегей). Оон аңгыда, кыс дуңмаларывыс чыышта чедишкен христиан угбаларындан үлегерни ап болур. Аныяк кыс дуңмаларывыс, үлегерин эдериксээр христиан угбаларыңарны адап болур силер бе? Оларның онзагай шынарларын эскергеш, бодуңарга сайзырадырын бодап көрүңер. Чедишкен христиан кижи биче сеткилдиг. Ындыг кижиниң Иегова-биле болгаш өске улус-биле хамаарылгазы эки. Чижээ, Бурганга ынак кыс кижи Иегованың чыышка-даа, өг-бүлеге-даа хамаарыштыр тургускан эрге-чагыргазын биче сеткилдии-биле деткиир (1 Кор. 11:3). w23.12 ар. 18—19, абз. 3—5

Ашаа кадайынга ынак болуп, ону азыраарын Иегова күзээр. Оон аңгыда, кадайының чоок эжи болуп, Иегова-биле хамаарылгазын быжыглаарынга дузалажыр. Иегова ышкаш боданып өөренирин, херээжен улусту хүндүлээрин, идегелдиг кижи болуру чугула. Өгленген соонда ажы-төлдүг апаар чадавас силер. Эки ада болурунга Иеговадан өөренип ап болур (Эф. 6:4). Иегова оглу Иисуска ынакшылын ыятпайн чугаалап, деткиир турган (Мф. 3:17). Бир эвес ада апаар болзуңза, ажы-төлүңге үргүлчү ынак мен деп чугаалаарын утпа. Олар бичии-даа эки чүүл кылырга, ыяап-ла макта. Иеговадан үлегер ап турар адалар ажы-төлүнге Бурган-биле найыралды быжыктырарынга дузалаар. Аңаа амдан эгелеп белеткенип болур сен. Өг-бүлеңниң кежигүннери база чыышта акы-угбалар дээш сагыш чова. Оларга ынааңны бүзүредип, чүү дээш үнелээриңни чугаала (Ин. 15:9). w23.12 ар. 28—29, абз. 17, 18

Иеговага бараалгал шупту кижилерниң таваржып чоруур бергелеринден, аарыг-аржыктардан бисти камгалавас. Бурганның чонун көөр хөңнү чок улустуң талазындан удурланыышкынга азы истеп сүрүүшкүнге таваржып болур бис. Иегова бисти ол бергелерден камгалавас-даа болза, дузалаарын аазап турар (Иса. 41:10). Ооң деткимчезиниң ачызында бис өөрүшкүлүг болуп, эки шиитпирлерни хүлээп ап, дыка берге байдалдарда безин аңаа шынчы артып болур бис. Бурган биске амыр-тайбыңны аазаанын Библияда бижээн (Флп. 4:6, 7). Ол амыр-тайбың — Иегова-биле үнелиг хамаарылгавыстың ачызында тыптып кээр угаан-бодалывыстың, чүрээвистиң оожургалдыг байдалы. Ол тайбың кижилерниң «угаап-билиптер шаандан ажа бээр». Өскээр чугаалаарга, угаанга кирип болур бүгү чүүлден дээре. Сеткилиңер ханызындан мөргээн соонда кайгамчыктыг тайбыңны миннип көрген силер бе? Ол дээрге Иегова Бурганның хайырлаар амыр-тайбыңы-дыр. w24.01 ар. 20, абз. 2; ар. 21, абз. 4

Иеговага ынак кижилер бүгү сеткилинден ооң адын алгап-мактаар күзелдиг. Давид хаан Иегованың адын алдаржыткаш, Бурганның бодун алгап-мактап турарын Давид билип турган. Ол атты дыңнааш, ооң бүгү кайгамчыктыг шынарларын база өндүр улуг херектерин сактып кээр бис. Давид дээрде Адазының адынга ыдыктыг хамаарылгалыг болгаш, ону бүгү сеткилинден алдаржыдарын күзеп чораан. Шак-ла ындыг үлегерни биске левиттер арттырган. Олар Бурганның ыдыктыг адын чогуур деңнелге долузу-биле алдаржыдып шыдавазын биче сеткилдии-биле көргүскен (Неем. 9:5). Шак ындыг биче сеткилдиг алгаг-мактал Иегованы өөртүрү чигзиниг чок. w24.02 ар. 9, абз. 6

Арга-шинээңерге дүүшпес сорулганы чедип албас болзуңарза, Иегова силерден хая көрүнмес (2 Кор. 8:12). Бүтпээн сорулгадан бир-ле ажыктыг чүүлдү өөренип алырын кызыңар. Чүнү чедип алганыңарның дугайында боданыңар. Библияда: «Бурган чөптүг, ынчангаш... кылып чоруур ажыл-херээңерни... утпас» — дээн (Евр. 6:10, Чаа делегей). Ынчап кээрге, бараалгалга чүнү чедип алганыңарны утпас болза эки. Чижээ, силер Иегова-биле найыралды сайзырадып, ооң дугайында өскелерге чугаалап азы сугга суктуруп алган силер. Эрткен үеде бараалгалга сорулгаларже канчаар чүткүп, оларны чедип ап турганыңар дег, ам-даа ону кылырын уламчылаңар. Иегованың дузазы-биле бараалгалга сорулгаларны чедип ап шыдаар силер. Ынчангаш сорулгаңарже чүткүп туруңарда, Иегованың силерни канчаар йөрээп, деткип турарын эскерерин кызыңар. Ол силерге улуг өөрүшкүнү албан эккээр (2 Кор. 4:7). Дүжүп бербес болзуңарза, Иегова силерже оон-даа хөй йөрээлдерни кудар (Гал. 6:9). w23.05 ар. 31, абз. 16—18

Иегова бодунуң бараалгакчыларынга ынак база оларны үнелээр. Библияда Иисусту Иегова ээ көрнүр ынак Оглум дээн ийи таварылга бар (Мф. 3:17; 17:5). Иеговадан ындыг чылыг-чымчак сөстерни дыңнаксаар-дыр силер бе? Амгы үеде ол бистиң-биле Библияның арыннарындан чугаалажып турар. Иисустуң өөреникчилеринге чылыг-чымчак сөстерин, Иегова ону биске хууда чугаалаан кылдыр хүлээп ап болур бис. Иисус кезээде Ачазы ышкаш алдынып чораан. Тергиин эвес-даа болза, Иеговага шынчы бараалгалы дээш, Иисус өөреникчилериниң дугайында чылыг-чымчак чугаалап, мактаар турган. Ынчангаш Иисустуң өөреникчилеринге чүнү чугаалаанын номчааш, Иегова ону хууда биске чугаалаан кылдыр сагыштаалап болур бис (Ин. 15:9, 15). Шенелделер дээрге Иегова бистен хая көрнү бергениниң демдээ эвес. Ол үеде Иеговага ынакшылывысты, бүзүреливисти көргүзер аргалыг бис (Иак. 1:12). w24.03 ар. 28, абз. 10, 11