Акы-угбаларга ынакшылыңарны соотпаңар

1, 2. а) Бүзүрел, идегел болгаш ынакшыл дугайында чугаалааш, Павел чүге оларның эң чугулазы ынакшыл дээнил? б) Кандыг айтырыгларны сайгарар бис?

БҮЗҮРЕЛ, идегел болгаш ынакшыл дугайында чугаалап тургаш, Павел элчин чүге: «Оларның эң чугулазы — ынакшыл» дээнил? (1 Кор. 13:13). Бурганның чаа делегей дугайында аазаашкыннарынга бүзүрел келир үеде херекчок апаар. Чүге дизе идегеп чораан аазаашкыннар күүсеттине бээр. Ынчалза-даа Иеговага болгаш кижилерге ынакшыл читпес. Ол хамаанчок ынакшыл мөңгеде өзер.

² Ынакшыл биске кезээде херек болганда, үш айтырыгны көрээлиңер. Бирээде, бот-боттарывыска ынак болуру чүге чугула? Ийиде, акы-угбаларывыска ынакшылывысты канчаар көргүзүп болур бис? Үште, бот-боттарывыска ынакшылды канчаар өжүрбес бис?

БОТ-БОТТАРЫНГА ЫНАК БОЛУРУ ЧҮГЕ ЧУГУЛА?

3. Бот-боттарывыска ынак болур кандыг чылдагааннарывыс бар?

³ Бот-боттарывыска ынак болуру чугула. Ынакшыл — алыс шын христианнарның ылгавыр демдээ. Иисус мынча дээн: «Араңарга ынакшыл-ла турар болза, силерни Мээң өөреникчилерим-дир деп делегейде хамык улус танып алыр» (Ин. 13:35). Павел ынакшыл бүгүдени «чаңгыс эп кылдыр тудуштурар» деп бижээн (Кол. 3:14). Аравыска ынакшыл көргүзери чүге чугулазын Иоанн элчин база бижээн: «Бурганга ынак кижи бодунуң ха-дуңмазынга база ынак болур ужурлуг» (1 Ин. 4:21). Бот-боттарывыска ынак болзувусса, Бурганга ынаавысты көргүзүп турар бис.

4, 5. Бурганга болгаш акы-угбаларга ынакшылывыстың харылзаазы кандыг чижектен көскү?

⁴ Бурганга болгаш акы-угбаларга ынакшылды чүге дорт харылзаалыг деп болур? Чүрек биле мага-боттуң өске кезектериниң аразында харылзаазын бодап көрүңер. Эмчи судалыңарны хынааш, чүрээңерниң байдалын билип алыр. Ол чижекти сайгарып турар темавыска канчаар ажыглап болур?

⁵ Эмчи судал таварыштыр чүрээвис кадык азы аарыг деп тодарадып болур. Шак-ла ынчаар өске улуска хамаарылгавыстан Бурганга кайы хире ынаавыс билдине бээр. Акы-угбаларга ынакшылывыс кошкап эгелээни, Бурганга ынакшылывыстың кошкай бергениниң демдээ-дир. А кады бүзүрээн акы-угбаларга ынакшылды херек кырында көргүзерин утпас болзувусса, Бурганга ынакшылывыс күштүг.

6. Акы-угбаларга ынакшылывыс сооп эгелээни чүнү көргүзүп турар? (1 Иоанн 4:7—9, 11).

⁶ Акы-угбаларга ынакшылывыс соой берзе, ону кичээнгейге алыры чугула. Чүге дизе бистиң Бурган-биле найыралывыс айыылда! Иоанн элчин ону мынчаар тайылбырлаан: «Көрүп чорууру эжинге ынак эвес кижи көрүп көрбээни Бурганга канчап ынак боорул?» (1 Ин. 4:20). Мында кандыг кичээл бар? Бот-боттарывыска ынак болзувусса, чүгле ынчан Иегова өөрүүр. (Номчуптуңар: 1 Иоанн 4:7—9, 11.)

АКЫ-УГБАЛАРГА ЫНААВЫСТЫ КАНЧААР КӨРГҮЗЕР БИС?

7, 8. Акы-угбаларга ынакшылывысты канчаар көргүзүп болур бис?

⁷ Бот-боттарывыска ынак болурунче Бурганның Сөзү хөй катап кыйгырып турар (Ин. 15:12, 17; Рим. 13:8; 1 Фес. 4:9; 1 Пет. 1:22; 1 Ин. 4:11). Ынакшыл кымга-даа көзүлбес чүректе болганда, акы-угбалар ону канчаар билип каар? Ынакшылды аксы-сөзүвүс болгаш ажыл-херээвис-биле көргүзүп болур бис.

⁸ Ынакшылды көргүзер аргалар аңгы-аңгы. «Бот-боттарыңарга шынны чугаалаңар» (Зах. 8:16). «Эп-найыралдыг амыдыраңар» (Мк. 9:50). «Бирээңер өскеңерни бодундан артык хүндүткеп көрзүн» (Рим. 12:10). «Бот-боттарыңарны [эп-сеткил-биле]... хүлээп алыңар» (Рим. 15:7). «Ак сеткилдии-биле өршээңер» (Кол. 3:13, Чаа делегей). «Аар-бергелерни ажып эртеринге бот-бодуңарга дузалажыңар» (Гал. 6:2). «Бот-бодуңарны аргалап чоруңар» (1 Фес. 4:18). «Бот-боттарыңарны... быжыглаңар» (1 Фес. 5:11). «Бот-боттарыңар дээш мөргүңер» (Иак. 5:16).

9. Ынакшыл көргүзер эң-не дээштиг арга дээрге чүге аргалал деп болур? (Чурукту база көрүңер.)

⁹ Эрткен абзацта чугаалаан ынакшыл илередириниң бир талазын көрээлиңер. Павел: «Бот-бодуңарны аргалап чоруңар» — дээн. Аргалал таварыштыр өске улуска ынакшыл көргүзерге чүге эң-не дээштиг? Бир библейжи справочниктен алырга, «аргалаар» деп очулдурган сөс, дошкун шылгалдаларга таварышкан кижиниң чанынга турары дээн уткалыг. Бергелерге таварышкан кижини аргалааш, ону сорук киирип, улаштыр шынчы бараалгаарынга дузалаар бис. Акывыс азы угбавыс ишти-хөңнүн ажыдарга, ыы-сыызын үлежип чоруур болзувусса, ынакшылывысты көргүзер бис (2 Кор. 7:6, 7, 13).

10. Кээргел биле аргалал кандыг харылзаалыг?

¹⁰ Аргалал кээргел-биле сырый харылзаалыг. Кээргээчел кижи өске улусту аргалап, оларның сеткилинде аарышкызын чиигедирин кызар. Өскээр чугаалаар болза, баштай кээргелди миннир, оон аргалаар бис. Ону «өршээлдиг Адавыс» Иегованың чижээнге көрээлиңер. «Шинчилел Библиязында» мынча дээн: «Бурганны кээргелдиң Адазы азы үнер Дөзү деп адаан, чүге дизе кээргел оон үнүп турар». Ол кээргелдиг болгаш, «кандыг-даа аар-берге байдалга... бисти аргалап чоруур» (2 Кор. 1:3, 4). Дамырактың арыг суу кижиниң суксаанын хандырары дег, Иегова дуза дилээн улусту сорук киирип, аргалап турар. Өске улусту кээргеп, аргалаар болзувусса, Иегованың үлегерин эдерер бис. Ону кылырда чүрээвиске херек шынарларны сайзырадыры чугула. Ол кандыг шынарлар?

11. Өске улусту аргалап, оожуктурар күзеливис күштүг болзун дээш, кандыг шынарларны сайзырадыр болзувусса экил? (Колосчуларга 3:12; 1 Пётр 3:8).

¹¹ Хүнден-хүнче бот-боттарывысты аргалаарда ээ көрүүшкүннү, буянны илередип өөренир ужурлуг бис. (Номчуптуңар: Колосчуларга 3:12; 1 Пётр 3:8.) Кээргелди, ээ көрүүшкүннү болгаш буянны сайзыраткан тудум, муңгараан улусту аргалаар күзеливис дам күштелир. Иисус мынча дээн: «Кижиниң чүрээнде чүү бар болдур, ол ооң аксындан үнер болгай. Буянныг кижи буян шыгжаан черинден буянын уштуп кээр» (Мф. 12:34, 35). Бергелерге таварышкан акы-угбавысты аргалаарывыска олар ынакшылывысты миннир.

БОТ-БОТТАРЫВЫСКА ЫНАКШЫЛДЫ КАНЧААР СООТПАЗЫЛ?

12. а) Серемчилелдиг болуру биске чүге чугула? б) Улаштыр чүнү сайгарар бис?

¹² «Бот-боттарывыска ынак» болурувусту шупту күзээр бис (1 Ин. 4:7). Ынчалза-даа Иисустуң «эңдерик улустуң ынакшылы соой бээр» деп сагындырыын утпазы чугула (Мф. 24:12). Ону өөреникчилеринге хамаарыштырбаан-даа болза, бо делегейниң соок, бодун бодаар хөөнү биске дамчый бербезин дээш оваарныры чугула. Кырында чугаалаан чүүлдү кичээнгейге алгаш, акы-угбаларга ынакшылывыстың күжүн канчаар хынап болур?

13. Акы-угбаларга ынакшылывыстың күжүн канчаар хынаар?

¹³ Ынакшылывыстың күжүн хынаар арганың бирээзи — амыдыралга аңгы-аңгы байдалдарга алдынарывысты эскерери (2 Кор. 8:8). Чижээ, Пётр элчин мынча деп бижээн: «Эң кол чүүл болза, бот-боттарыңарга быжыг ынакшылыңарны кадагалаңар, чүге дээрге ынакшыл бар болза, хөй-ле бачытты өршээп боор» (1 Пет. 4:8). Акы-угбалар чазыптарга азы хомудадыптарга канчаар алдынарывыстан оларга кайы хире ынаавыс көстүп кээр.

14. 1 Пётр 4:8-тен алырга, акы-угбаларга канчаар ынак болур болза эки? Чижекти чугаалаңар.

¹⁴ Пётрнуң ол сөстерин тодаргай көрүптээлиңер. 8-ки шүлүктүң бирги кезиинде аравыста ынакшыл быжыг болзун деп чугаалаан. «Быжыг» деп очулдурган сөстүң дорт утказы «шөйер, хере тыртар» дээн. Шүлүктүң ийиги кезиинде ооң түңнелин чугаалаан: ындыг ынакшыл акы-угбаларның бачыттарын дуглаптар. Сагыштаалап көрүңерем: ынакшылды ийи холувус-биле туткаш, шөйлүп турар пөс ышкаш херип-ле, херип-ле турар бис. Ынчалдыр бир-ийи эвес, а хөй бачытты дуглаптарынга чедир херер бис. Пөс-биле чараш эвес чүүлдү дуглап болур, а ынакшыл өске улустуң частырыгларын болгаш четпестерин дуглаптар азы өршээптер.

15. Күштүг ынакшыл бисти чүже оттурар? (Колосчуларга 3:13).

¹⁵ Акы-угбаларның четпес талаларын өршээр дээш хөлчок кызар апаар-даа болза, күштүг ынакшыл дузалаар. (Номчуптуңар: Колосчуларга 3:13.) Өске улусту өршээп шыдап турар болзувусса, ынакшылывыстың байдалы эки. Ынчалдыр Иегованы өөртүр күзеливисти көргүзер бис. Улустуң частырыгларынче кичээнгей салбазынга база биске эпчок чаңын эскербезинге оон ыңай чүү дузалаар?

16, 17. Өске улустуң чугула эвес частырыгларынче кичээнгей салбазынга биске оон ыңай чүү дузалаар? Чижекти чугаалаңар. (Чурукту база көрүңер.)

¹⁶ Акы-угбаларның четпестерин эвес, а эки талаларын көөрүн кызыңар. Деңнелгеден кылыптаалыңар. Эштериңер-биле чыглып келген дижик силер. Үени хөглүг эрттиргеш, сөөлүнде чурукка тырттыржып алган силер. Чурук болдунмайн баар болза дээш, улай-улай тырттырыптар силер. Оон көөрүңерге, бир чурукта акый багай үнүп кээрге, канчаар силер? Ону балап кааптар силер, чүге дизе ол акый биле шупту улус өске ийи чурукта эки үнген.

¹⁷ Сактыышкыннарывысты чуруктарга дөмейлеп болур. Акы-угбалар-биле үе эрттирип, эдержиринге ынак бис. Бир кижи эпчок чүве чугаалаар азы кылыр болза, канчаар бис? Демги чурукту ышкаш ол болуушкунну баштан үндүр октаптарын чүге кызып болбас деп? (У. ч. 19:11; Эф. 4:32). Бичии частырыгларны сагышка шыгжаар хире чылдагаан чок. Ол кижиге хамаарыштыр эки сактыышкыннарывыс хөй болгай. Ону үнелээр болзувусса эки!

АМГЫ ҮЕДЕ ЫНАКШЫЛ ЧҮГЕ КАЖАНГЫЗЫНДАН АРТЫК ЧУГУЛА?

18. Бо статьядан ынакшыл дугайында чүнү билип алган бис?

¹⁸ Бот-боттарывыска ынак болуру чүге чугула? Акы-угбаларывыска ынак болзувусса, Иеговага ынак бис деп сайгардывыс. Ынакшылды херек кырында канчаар көргүзүп болур бис? Бир аргазы — акы-угбаларны аргалап оожургадыры. Чүрээвис кээргел-биле долган болза, бот-боттарывысты аргалап шыдаар бис. А ынакшылды канчаар соотпазыл? Өске улустуң частырыгларын өршээрде болдунар-ла чүүлдү кылыр херек.

19. Амгы үеде бот-боттарывыска ынак болуру чүге кажангызындан артык чугула?

¹⁹ Бот-боттарывыска ынак болуру чүге кажангызындан артык чугула? Пётр: «Бүгү чүүлдүң төнчүзү чоокшулап келген-дир. Ынчангаш... бот-боттарыңарга быжыг ынакшылыңарны кадагалаңар» — деп харыылаан (1 Пет. 4:7, 8). Бо делегейниң төнчүзүнде чүнү манап болур бис? Иисус: «Мээң адым ужун бүгү кижи төрелгетен силерни көөр хөңнү чок апаар» — деп өттүр сөглээн (Мф. 24:9). Демниг арткаш удурланыышкыннарны шыдажыптар бис. «Чаңгыс эп кылдыр тудуштурар ынакшылдыг» болганывыста, Эрликтиң бисти маргыштырар дээн күзели бүтпес (Кол. 3:14; Флп. 2:1, 2).