Оолдар-кыстар, Бурганче чоокшулаарынга дузалаар сорулгаларже чүткүп турар силер бе?

1—3. а) Шупту оолдар-кыстар кандыг шилилгени кылыр ужурлуг? Чижектен чугаалаңар. (Статьяның эгезинде чурукту көрүңер.) б) Ындыг байдалда аныяк христианнарга чүү дузалаар?

ЧУГУЛА херек кылыр дээш, өске хоорайже автобустап чоруур ужурлуг дижик сен. Автовокзалче кээриңге, кижилер хайнып турар, автобустар эңмежок — ону көөрге, баш дескине берип болур. Ынчалза-даа сээң сорулгаң — сеңээ херек автобусту тып алыры. Бир эвес сен таварышкан-на автобуска олуруптар болзуңза, өскээр чоруй баар сен.

² Чуртталганы аян-чорук-биле, а силерни, аныяктар, автовокзалда пассажирлерге дөмейлеп болур. Силерниң мурнуңарда дыка хөй аргалар ажыттынган, ынчангаш шилилгени кылыры белен эвес. Ынчалза-даа чүнү күзеп турарыңарны эки билир болзуңарза, силерге белен боор. Ынчаарга баар уун канчаар билип аарыл?

³ Бо статья ол айтырыгга харыылап, Иегованы өөртүр чуртталганың оруун шилииринче деткип турар. Ол дээрге каяа өөренир, каяа ажылдаар, өг-бүле тудар бе дээн чижектиг янзы-бүрү шиитпирлерни хүлээрде, Иегованың саналын херекке алыры-дыр. Оон ыңай ынаар бараалгалга хамаарышкан сорулгаларны салыры база кирип турар. Оолдар-кыстар, Иеговага бараалгал чуртталгаңарда чугула черни ээлеп турар болза, Ол силерни йөрээп, сорулгаңарны чедип алырынга дузалаар дээрзинге бүзүреп болур силер. (Чугаалар 16:3 номчуптуңар.)

БУРГАНЧЕ ЧООКШУЛААРЫНГА ДУЗАЛААР СОРУЛГАЛАРНЫ САЛЫРЫ ЧҮГЕ ЧУГУЛА?

4. Бо статьяга чүнү көөр бис?

⁴ Аныяктарга Бурганче чоокшулаарынга дузалаар сорулгаларны салыры чүге чугула? Ооң үш чылдагаанын бо статьяга сайгарар бис. Ындыг сорулгалар Иегова-биле найыралды быжыглаарынга дузалаар деп, баштайгы ийи чылдагаан көргүзүп турар, а үшкүзү ол сорулгаларже чүткүүрү кандыг ажык-дузаны эккээрин демдеглеп турар.

5. Бурганче чоокшулаарынга дузалаар сорулгаларны салырының кол чылдагаанын адап көрүңер.

⁵ Бурганче чоокшулаарынга дузалаар сорулгаларны салып турарывыстың кол чылдагааны кандыгыл? Бис Иеговага Ооң ынакшылы дээш база Ооң биске кылган бүгү чүвези дээш өөрүп четтиргенивисти илередиксеп турар бис. Ыр күүседикчизи: «Дээрги-Чаяакчыны алгап-мактаары ачылыг-дыр... Дээрги-Чаяакчы, Сээң ажыл-херээң мени өөртүп тур, Сээң холуңнуң боттандырган чүүлдери дээш, өөрүп ырлап тур мен» — деп бижээн (Ыд.ыр. 91:2, 5). Бодап көр даан, Иегованың ачызында сенде чүү бар? Амы-тын, Ооң дугайында билиглер, Библия, чыыш, кайгамчыктыг келир үеже идегел! Иеговага ооң белектери дээш четтиргениңни канчаар илередип болур сен? Чижээ, Бурганче чоокшулаарынга дузалаар сорулгаларны салып тургаш. Ол чүүл сеңээ Олче чоокшулаарынга дузалаар.

6. а) Бурганче чоокшулаарынга дузалаар сорулгаларның Иегова-биле хамаарылгавыска салдары кандыгыл? б) Бичии тургаш-ла, кандыг сорулгаларны салып ап болурул?

⁶ Ийиги чылдагааны — Бурганче чоокшулаарынга дузалаар сорулгаларны чедип аар дээш, Иеговага таарымчалыг, эки херектерни кылырыңга, Ооң-биле найыралың улам быжыгар. Павел элчин: «Бурган чөптүг. Эрткен болгаш амгы үеде Ооң улузунга бараан бооп тура, кылган ажыл-херээңерни база Аңаа көргүскен ынакшылыңарны Ол уттур хире эвес» — деп бижээн (Евр. 6:10). Бурганче чоокшулаарынга дузалаар сорулгаларны бичии уруглар безин салып болур. Чижээ, Кристина 10 харлыг тургаш, Иегованың Херечилериниң допчу-намдарларын үргүлчү номчуур деп шиитпирлээн. А Тоби 12 харлыг тургаш, сугга суктурарының мурнунда Библияны төндүр номчуур сорулга салып алган. Максим 11 харлыында, а ооң дуңмазы Ноеми 10 харлыында сугга суктуруп алгаш, Вефилге бараалгаар сорулга салып алганнар. Ооң дугайында утпас дээш, олар өрээлиниң ханазынга Вефилге бараалгаар билдириишкинни азып алган. Сен база кандыг-бир сорулганы салгаш, ону чедип аар дээш, бичиилеп хөделип эгелезиңзе кандыгыл? (Филипчилерге 1:10, 11 номчуптуңар.)

7, 8. а) Сорулга бар болза, шиитпирлерни хүлээри чүге чиик болурул? б) Бир кыс уруг университетке өөренмес деп чүге шиитпирлээнил?

⁷ Элээди назынында сорулгаларны салыр кандыг үшкү чылдагаан барыл? Аныяк үезинде кижи хөй шиитпир хүлээр апаар: каяа өөренир, каяа ажылдаар дээш оон-даа өске. Шиитпирлерни хүлээри белдир орукка шын орукту шилииринге дөмей. Кайнаар баарын билир болзуңза, ону кылыры берге эвес боор. Чүүже чүткүп турарыңны билир болзуңза, шын шилилгени кылыры сеңээ база белен боор. Чугаалар 21:5-те мынча дээн: «Кызымак кижиниң бодалдары ыяап-ла элбекшилге эккээр». Сорулганы баш удур салып аар болзуңза, ону амыдыралыңга боттандырары дүрген болур. Ол чүүл Дамаристиң чижээнден көскү. Ол элээди назынында чугула шиитпир хүлээр ужурлуг турган.

⁸ Дамарис школаны эки демдектерлиг дооскан. Ол университетке юрист кылдыр халас өөренир аргалыг турган. Ынчалза-даа ол чартык хүн ажылдаарын шиитпирлээн. Чүге? Ол тайылбырлаан: «Бичии тургаш-ла, эгелекчи болур сорулга салып алган мен, ынчангаш меңээ чартык хүннүң ажылы херек турган. Бир эвес юрист черин доозуп алган болзумза, хөй шалыңныг ажылга ажылдап болур турган мен, ынчалза-даа таарымчалыг ажылды тып ап шыдавас ийик мен». Дамарис барык 20 чыл ишти эгелекчи бооп бараалгап чоруур. Ол элээди үезинде салган сорулгазының болгаш хүлээп алган шиитпириниң дугайында чүнү бодап турарыл? «Ажылымда юристерге бо-ла таваржыр мен. Университетке өөредилгени шилип алган болзумза, оларның кылып турар ажылын кылыр ийик мен. Оларның хөй кезии ажылынга таарзынмас. А мен эгелекчи болурун шиитпирлээш, ындыг чөгениишкинге таварышпайн, Иеговага хөй чылдар дургузунда өөрүшкүлүг бараалгаар аргалыг болган мен» — деп, ол чугаалаан.

9. Аныяк христианнар чүге макталга төлептиг?

⁹ Бүгү делегейде муң-муң оолдар-кыстар Иеговага ынанып, Бурганче чоокшулаарынга дузалаар сорулгаларже чүткүп турар. Ол дээш олар макталга төлептиг! Оларның чуртталгазы солун болгаш уткалыг, ооң кадында олар өөредилгеге, ажылынга болгаш өг-бүлеге Бурганның Сөзүнден сүмелерни ажыглап өөренип турарлар. «Дээрги-Чаяакчыга чүрээңниң ханызындан идеге... Кандыг-даа оруктап чоруп орзуңза, Дээрги-Чаяакчыны билип аарын кызыт, Ол ынчан сээң орууңну дорттап бээр» — деп, Соломон бижээн (У.ч. 3:5, 6). Иегова аныяк христианнарга дыка ынак болгаш оларны камгалап, сүме кадып, йөрээп турар.

СУРТААЛГА ЭКИ БЕЛЕТКЕН

10. а) Буянныг медээни улуска чугаалаары чүге аажок чугула? б) Оон-даа эки суртаалдаарынга чүү дузалаар?

¹⁰ Иегованы өөртүрүн күзээр кижи суртаалга тускай кичээнгейлиг боор. Төнчү кээриниң мурнунда «Буянныг Медээни бүгү чоннарга суртаалдаан турар ужурлуг» деп, Иисус Христос онзалап демдеглээн (Мк. 13:10). Суртаал ажылын соңгаарладып болбас болганда, ол чуртталгавыста эң-не чугула чүүлдерниң бирээзи боор ужурлуг. Оон-даа идепкейлиг суртаалдап азы эгелекчи бооп бараалгап болур сен бе? А бир эвес суртаалдаарынга ындыг кончуг ынак эвес болзуңза канчаар? Канчаар оон-даа эки суртаалдап өөренип алырыл? Сеңээ ийи сүме дузалаар: эки белеткен база улус сени дыңнавас-даа болза, муңгарава. Бараалгал кайы хире өөрүшкү эккээрин көргеш, кайгап каар чадавас сен.

11, 12. а) Иегованың дугайында чугаалаарынга оолдар-кыстар канчаар белеткенип ап болур? б) Бир оол чаңгысклассчыларынга Иегованың дугайында чугаалаар арганы канчаар ажыглааныл?

¹¹ Баштай чаңгысклассчыларыңның бо-ла салыр айтырыынга харыыны тып алырын шенеп көр. Аңаа сеңээ дептерлеривистен статьялар дузалаар. Чижээ, бир эвес сенден: «Бурган бар деп чүге бүзүрээр сен?» — деп айтырар болза, «Аныяктарның 10 айтырыынга харыылар» деп брошюрада «Эволюцияга бүзүреп болур бе?» дээн статья харыыны белеткеп алырыңга дузалаар. Ол ышкаш ында бердинген Еврейлерге 3:4-те шүлүктү ажыглап болур сен. (1 Пётр 3:15 номчуптуңар.)

¹² Чамдык аныяк христианнар чаңгысклассчыларынга боттарының айтырыгларынга харыыны дептерлеривистен канчаар дилээрин айтып берип турар. Лука база ынчаар кылган. Бир катап башкызы кичээл үезинде янзы-бүрү шажыннарны класс-биле сайгарып турган. Өөредилге номунда Иегованың Херечилериниң дугайында шын эвес информацияны бижээнин Лука эскерген. Ол дидимненип алгаш, шын информацияны тайылбырлаарын башкызындан чөпшээредип алган. Лука бодунуң бүзүрелин үлешкенинден аңгыда, Иегованың Херечилериниң үндүрүп турар материалдарының чамдыызын бүгү класска таныштырган. «Чогушпайн, дүржок кижилерге харыыдан берип өөрен» деп фломастер-биле чураан анимацияны көрүп алырын башкызы шупту өөреникчилерге онаалга кылдыр берген. Лука өскелер-биле буянныг медээни үлежип шыдаанынга аажок өөрээн.

13. Сорулгаларже чүткүп тургаш, бергелерге таваржыр болзуңза, чүге дүжүп бербес болза эки?

¹³ Сорулгаларже чүткүп тургаш, бергелерге таварышкаш, дүжүп бербе (2 Тим. 4:2). Катаринаның чижээн көрээли. Ол 17 харлыг тургаш, ажылында улуска шуптузунга Иегованың дугайында чугаалаарын шиитпирлээн. Оларның бирээзи ону каш-даа катап бак сөглээн, ынчалза-даа ол дүжүп бербээн. Ол байдалга ооң эки алдынганын Ханс деп ажылчын аажок магадаан. Ол бистиң дептерлеривисти номчуп, Библияны өөренип эгелээш, сугга суктуруп алган. Катарина өскээр көже берген болгаш, ону билбээн. 13 чыл эрткенде, Катарина өг-бүлези-биле чыышка кээрге, сценаже өске чыыштан илеткелчини чалаан. Сценада Хансты көргеш, ол кайы хире өөрээнил, бодап көр даан! Кады ажылдап турар улустуң шуптузунга Бурганның дугайында чугаалаар дээн сорулгазын Катаринаның чедип алганы эки болган.

СОРУЛГАЛАРЫҢ УТПА

14, 15. а) Аныяк христианнар чүнү сактыр болза эки? б) Үе-чергеңниң базыышкынынга алыспазынга сеңээ чүү дузалаар?

¹⁴ Бо статьяда Бурганче чоокшулаарынга дузалаар сорулгаларны салырының болгаш чуртталганы Иеговага таарымчалыг кылдыр тургузарының кайы хире чугулазын хөй катап демдеглээн. Сен хире аныяктарның чуртталгазында кол черни оюн-тоглаа биле дыштанылга ээлеп турар чадавас. Ынчангаш олар сени кады хөглээринче кыйгырар чадавас. Сенде чугула сорулгалар бар деп оларга дөмей-ле көргүзер апаар сен. Статьяның эгезинде автобус дугайында чижекти сактып кээр болза, таварышканың-на автобуска, ында солун үе эрттирип турар улус чыглып келген дээш-ле, олурбас болгай сен!

¹⁵ Үе-чергеңниң базыышкынынга алыспазынга сеңээ чүү дузалаар? Багай чүвени белени-биле кылып болур байдалдарже кирбезин кызыт (У.ч. 22:3). Багай улус-биле эдержир болзуңза, кайы хире коргунчуг чүүлдерге таваржып болуруңну бодан (Гал. 6:7). Меңээ эки сүме херек деп миннип, биче сеткилдиг бол. Ада-иең болгаш дуржулгалыг акы-угбаларыңның чугаазын дыңна. (1 Пётр 5:5, 6 номчуптуңар.)

16. Томаарыыр чорук чугула деп көргүскен таварылганы чугаалаңар.

¹⁶ Дуржулгалыг акыларның сүмезин дыңнаарынга Кристофка томаарыыр чорук дузалаан. Сугга суктурган соонда ол удатпаанда спорткомплекс барып эгелээн. Ынаар барып турган өске оолдар ону спортчу клувунче кирип аарынче кыйгырып-ла турганнар. Кристоф ооң дугайында удуртукчу-биле чугаалажырга, ол ону кандыг айыылдарга таваржып болурун сагындырып, аңаа адааннажыр хөөн тыпты берип болур деп чугаалаан. Ынчалза-даа Кристоф клубче дөмей-ле кирип алган. Ынчалзажок ол спорттуң хевири каржы болгаш айыылдыг деп, Кристоф чоорту билип каан. Ол катап элээн каш удуртукчулар-биле чугаалажырга, олар аңаа Библиядан сүмелерни берген. Кристоф: «Иегова акылар таварыштыр меңээ ажыктыг сүмелерни берген. Мен Ону, дораан эвес-даа болза, дыңнаан мен» — деп үлешкен. Эки сүмени хүлээп алыр хире, томаарыыр чорук сенде бар бе?

17, 18. а) Иегова аныяктарга чүнү күзеп турар? б) Аныяктар улуг апаргаш, чүү дээш хараадап болур? Ону болдурбас дизе чүнү канчаар? Чижектен чугаалаңар.

¹⁷ Библияда: «Аныяк оол, аныяк шааңда хөглеп чор, база чүрээң чалыы назыныңда өөрүшкүнү чооглап чорзун» — дээн (Эккл. 11:9). Иегова сени чалыы назыныңда аас-кежиктиг болуруңну күзеп турар. Бо статьяга ону канчаар чедип ап болурунуң бир аргазын көрдүвүс. Бурганче чоокшулаарынга дузалаар сорулгаларыңны утпайн, шиитпирлерни хүлээрде Иегованың саналын херекке алыр болзуңза эки. Ону чалыы үеңден эгелээш кылыр болзуңза, Иегованың сеңээ канчаар шын орук айтып берип, камгалап база йөрээп турарын эрте көрүп каар сен. Бурганның Сөзүнден ажыктыг сүмелерниң дугайында боданып, Экклесиаст 12:1-де: «Аныяк-чалыы назыныңда Чаяакчыңны утпайн чор» — дээн сөстерге дүүштүр чуртта.

¹⁸ Чалыы үе дораан эртип каар. Оолдар-кыстар дораан өскүлеп кээр. Оларның чамдыызы чалыы үезинде шын эвес орук шилип алганынга азы шуут сорулга чок чурттап чораанынга аажок хараадап чоруур. Ынчалза-даа Бурганче чоокшулаарынга дузалаар сорулгалар салып чораан аныяк христианнар боттарының шилилгези дээш кажан-даа хараадавас. Ону элээди назынында спортка улуг чедиишкиннерлиг бооп болур турган Мирьяна бадыткап болур. Ону кышкы Олимпий оюннарга киржиринче чалап турган, ынчалза-даа ол Иеговага долузу-биле бараалгаарын шиитпирлээн. Оон бээр 30 ажыг чыл эрткен. Мирьяна ам-даа ашаа-биле долу бараалгалын уламчылап чоруур. Ол мынча дээн: «Ат-сураг, алдар-ат, эрге-дужаал болгаш байлакшыл — эртип каар хоозун чүүлдер-дир. Чуртталгада эң-не эки сорулга — Бурганга бараалгап, кижилерге Ооң дугайында билип алырынга дузалаары-дыр».

19. Чалыы үезинден-не Бурганче чоокшулаарынга дузалаар сорулгаларны салыры чүге ажыктыг?

¹⁹ Иеговага бараалгалын чуртталгазынга бирги черге салып, бергелерге торулбайн, бараалгап чоруур аныяк дуңмаларывыс макталга төлептиг. Олар Бурганче чоокшулаарынга дузалаар сорулгаларны салып, суртаал ажылынга шыңгыы хамаарылгазын көргүзүп, бо делегейниң салдарынга алыспайн чоруур. Сээң күжениишкиннериң хилис барбас деп черле чигзинме. Кады бүзүрээн акы-угбаларыңның дузазынга болгаш Иегованың деткимчезинге идегеп болур сен. Иеговага ажыл-херектериңни дагзып бер, ынчан сээң бодалдарың боттаны бээр!