12. Сорулгалар

ОЛ ЧҮҮ ДЭЭНИ ОЛ?

Сорулгалар салыры дээрге бир-ле чүүлдү күзеп азы сагыштаалаары эвес-тир. Сорулганы чедип алыр дизе, ону эки планнап, аргаларны ажыглап, хөй ажылдаар херек.

Сорулгалар кыска хуусаалыг (каш хонук азы каш неделя дургузунда), ортумак хуусаалыг (каш ай ишти), узун хуусаалыг (чыл ажыг) болур. Узун хуусаада сорулгаларны элээн каш кезектерге чарып алгаш, чедип ап болур.

ОЛ ЧҮГЕ ЧУГУЛА?

Чедип алган сорулгалар бодунга бүзүрелди, эш-өөр-биле чоок хамаарылганы болгаш аас-кежикти минниринге дузалаар.

Бодунга бүзүрел. Бичии сорулгаларны чедип алыр болзуңза, улуг сорулгаларны чедип ап шыдаар мен деп бүзүрел сеңээ тыптып кээр. Оон ыңай ол чүүл хүн бүрүнүң бергелерин ажып эртеринге, чижээ, үе-чергеңниң базыышкынынга удур туржурунга дузалаар.

Найырал. Салган сорулгазынче чүткүлдүг кижилер-биле улус эдержиксээр. Чүге дизе ындыг кижилер чүнү күзеп турарын билир база ону чедип ап чоруур. Найыралды быжыктырарының эң эки аргаларының бирээзи — чаңгыс сорулгаже кады чүткүүрү-дүр.

Аас-кежик. Кажан сорулганы салгаш, ону чедип алыр болзуңза, сеткилиң ханар.

«Мен сорулгалар салырынга ынак мен. Ынчангаш өскээр чардыкпайн, кайнаар чүткүп чоруурумну эки билир мен. Сорулгаларымны чедип алгаш: „Оо! Ол бүгүнү кылып шыдапкан-дыр мен!“ — деп өөрүп боданыр чордум» (Кристофер).

БИБЛЕЙЖИ ДҮРҮМ: «Хатты хайгаарап чоруур кижи үрезинин чажып тарывас база булуттарже көрүп чоруур кижи дүжүт ажаавас» (Экклесиаст 11:4).

ЧҮНҮ КЫЛЫП БОЛУРУЛ?

Дараазында базымнар сеңээ сорулгаларны салгаш, чедип алырынга дузалаар.

Сорулгаларың тодарадып ал. Күзеп турар сорулгаларың даңзылап бижээш, чугула сорулгаларны мурнунче салып ал.

Планнап ал. Сорулга бүрүзүнге дараазында чүүлдү кыл:

• болдунар хире хуусааны салып ал;

• чүнү кылыр ужурлууңну тодарадып ал;

• туруп болур шаптараазыннарны канчаар ажып эртерин бижип ал.

Хөделип эгеле. Шупту чүве билдинип кээрин манава. «Сорулгамны чедип алырынга херек бир дугаар базым кандыгыл?» деп бодуңдан айтыргаш, хөделип эгеле. Бурунгаарлаан тудум, чедиишкин бүрүзүн демдегле.

БИБЛЕЙЖИ ДҮРҮМ: «Кызымак кижиниң бодалдары ыяап-ла элбекшилге эккээр» (Чугаалар 21:5).