Иегова мээң мөргүлдеримге харыылаар бе?

1, 2. Мөргүлдеривиске Иегова харыылавайн турар деп чүге бодай бээр бис?

«ИЕГОВА сээң эң-не улуг өөрүшкүң болзун, ол чүрээңниң күзелдерин күүседип бээр» (Ыд. ыр. 37:4, Чаа делегей). Дыка-ла кайгамчык аазаашкын! Ынчаарга чүнү-даа дилээш, шуптузун алыр бис дээни ол бе? Чүге ындыг айтырыг тургустунуп кээрил? Дараазында байдалдарны көрүптээлиңер. Бот угбавыс Чагырганың медээчилериниң школазынга өөрениксээш, Иеговадан дилеп турар. Чылдар эртерге, ону чалаваан. Аныяк акывыс чыышка хөй дузалажыксааш, аарыын экиртиптерин Иеговадан дилеп турар. Ынчалза-даа ооң кадыкшылы экиживээн. Алыс шынга артып каарын ада-иези дилеп мөргүүрге-даа, оглу Иеговага бараалгавайн барган.

² Бир-ле чүвени Иеговадан дилээш, харыызын көрбээн чадавас силер. Иегова мээң мөргүлүмден аңгыда, шупту мөргүлдерни дыңнаар азы ооң мурнунга буруудай берген мен деп бодаар чадавас силер. Джа́нисb база ынчаар боданган. Ол өөнүң ээзи-биле Вефилге бараалгаар күзелин илередип мөргүп турганнар. Ол мынча дээн: «Карак чивеш аразында Вефилче чалаптарынга чигзинмээн мен». Ынчалза-даа манаашкын айлардан чылдарже шөйлү берген. Джанис уламчылаан: «Меңээ муңгаранчыг болган. Чүү болуп турарын билбээн мен. Бодаарымга Иегованы хомудадыпкан ышкаш болган мен. Вефилге бараалгаар дээн тодаргай дилээмге ол чүге харыылавааныл?»

3. Бо статьяга чүнү сайгарар бис?

³ Иегова бистиң мөргүлдеривисти дыңнавайн турар деп боданы берип болур бис. Бурунгу үеде Бурганның бараалгакчыларынга база ындыг бодалдар турган (Иов 30:20; Ыд. ыр. 21:3; Авв. 1:2). Ынчалза-даа Иегова мөргүлдериңерге харыылаар деп чигзинмейн барып болур силер (Ыд. ыр. 64:3). Аңаа шынзыгарда үш айтырыгны көрүптээлиңер: 1) Иеговадан чүнү манап болур бис? 2) Иегова бистен чүнү манап турар? 3) Кандыг таварылгада дилээвисти өскертир апаар бис?

ИЕГОВАДАН ЧҮНҮ МАНАП БОЛУР БИС?

4. Иеремия 29:12-де Иегова биске чүнү аазап турар?

⁴ Иегова мөргүлдеривисти дыңнаарын аазап турар. (Номчуптуңар: Иеремия 29:12.) Бурган шынчы бараалгакчыларынга ынак, оларның дилеглеринге кезээде кичээнгейлиг (Ыд. ыр. 9:38; 36:28). Ынчалза-даа дилээн-не чүүлүвүстү дөгерезин албас бис. Чамдык дилеглеривис чүгле чаа делегейге күүсеттинер чадавас.

5. Мөргүлдеривисти дыңнааш, Иегова чүнү кичээнгейге ап турар? Тайылбырлаптыңар.

⁵ Дилээвис ооң күзел-бодалы-биле кандыг харылзаалыын Иегова көөр (Иса. 55:8, 9). Чер кыры аңаа өөрүшкүлүг чагыртыр эр-кыс кижилер-биле доларын Бурган күзээн. Бурган чокка кижилер оон-даа аас-кежиктиг болур деп, Эрлик нүгүлдээн (Э. д. 3:1—5). Эрликти мегечи деп шынзыдар дээш, Иегова кижи чагыргаларын чөпшээрээн. Түңнелинде кижи чагыргалары делегейде ынча хөй бергелерни тургускан (Эккл. 8:9). Иегова ол бергелерни ам дораан шиитпирлевес деп билир бис. Бир эвес шиитпирлептер болза, чамдык улус кижи чагыргалары Бурган чокка шыдаар деп бодай берип болур.

6. Иегова биске кажан-даа ынак, чөптүг-шынныг деп бүзүрээри чүге чугула?

⁶ Дөмей дилеглерге Иегова аңгы-аңгы харыылап болур. Чижээ, улуг аарыгдан экиртип каарын Эзекия хаан дилээрге, Иегова күүсеткен (4 Хаан. 20:1—6). Ынчалза-даа Павел элчин бодунда «тен» деп адааны аарыгны экиртирин дилээрге, Иегова күүсетпээн (2 Кор. 12:7—9). Иаков, Пётр элчиннер-биле чүү болганын сактып кээлиңер. Ирод оларның кайызын-даа өлүрер деп турган. Пётр дээш чыыш аажок мөргүп турганын билир бис. Иаков дээш база акы-угбалар мөргүп турганы чугаажок. Түңнелинде Пётрну ангел камгалап каан, а Иаков шаажылаттырган (Аж.-ч. 12:1—11). «Иегова Иаковту чүге камгалаваан?» деп бодап болур бис. Библияда ооң тайылбыры чокc. Ынчалза-даа Иеговада «меге чүү-даа чок, Ол чөптүг» (Ы. х. к. 32:4). Бурган ол элчиннерниң кайызынга-даа ынак деп билир бис (Ажыд. 21:14). Иегова мөргүлдеривиске чамдыкта күзээнивис дег харыылавас. Ындыг-даа болза ол биске ынак, кезээде шын алдынар деп бүзүрээр болгаш, мөргүлдеривиске өске арга-биле харыылааны дээш хомудавас бис (Иов 33:13).

7. Чүнү кылбазын кызар бис база чүге?

⁷ Байдалывысты өскелер-биле деңневезин кызар бис. Чижээ, бистиң дилээвиске дөмей өске кижиниң дилээнге харыылааш, Иегова биске харыылаваан дижик. Анна деп угбавыс ындыг байдалга таварышкан. Рак-биле аарый берген өөнүң ээзи Мэ́тью сегий берзин дээш, ол мөргүп турган. Ол-ла үеде чыышта ийи назылай берген угбавыс шак-ла ындыг аарыг-биле демисежип турган. Анна өөнүң ээзи, ийи угбавыс дээш база мөргүп турган. Угбаларывыс сегий берген, а муңгаранчыг чүүл, Мэтью чок апарган. Анна баштай бодунга мындыг айтырыгларны салып турган: ол угбаларга эттине бээринге Иегова дузалашкан бе? Бир эвес ындыг болза, ооң өөнүң ээзинге ол чүге дузалашпаан, ол дээш база мөргүп турган болгай? Угбаларывыстың чүге сегий бергенинге хамаарыштыр бисте долу харыы чок. Иегова шупту бергелерни шиитпирлептер деп улуг бүзүрел бисте бар. Ол бодунуң эштерин диргизиптер үени четтикпейн манап турар (Иов 14:15).

8. а) Исайя 43:2-ден алырга, Иегова бисти канчаар деткип турар? б) Шенелделер үезинде мөргүл канчаар дузалап болур? («Мөргүл дүжүп бербезинге дузалаар» деп видеону көрүңер.)

⁸ Иегова бисти кандыг-даа үеде деткиир. Ынакшылдыг Адавыска бистиң хилинчээвисти көөрү аарышкылыг (Иса. 63:9). Ынчалза-даа хем-суг, от-көс ышкаш шенелделерден бисти камгалавас-даа болза, дөмей-ле ону кады эртер мен деп Бурган аазаан. (Номчуптуңар: Исайя 43:2.) Бурган бисти ооң-биле чарарын кымга-даа, чүге-даа чөпшээревес. Шупту чүвени шыдажырынга Иегова биске күчүлүг ыдыктыг сүлдезин берип турар (Лк. 11:13; Флп. 4:13). Бурганга шынчы, туруштуг артарынга херек бүгү чүүлүвүс кезээде бар боорd.

ИЕГОВА БИСТЕН ЧҮНҮ МАНАП ТУРАР?

9. Иеговага бүзүрээри база ол дузалаар деп чигзинмези чүге чугула? (Иаков 1:6, 7).

⁹ Иегова аңаа бүзүрелдиг болурувусту күзээр (Евр. 11:6). Чамдыкта шенелделер эрттинмес даглар дег апаарга: «Иегова безин дузалап шыдавас» деп бодай бээр бис. Ынчалза-даа Бурган-биле чүнү-даа шыдаар бис деп, Библия бүзүредип турар (Ыд. ыр. 17:30). Ынчангаш чигзиниглер бодаарының орнунга Иеговага бүзүреп мөргүңер, ол албан харыылаар. (Номчуптуңар: Иаков 1:6, 7.)

10. Мөргүлдеривиске дүүштүр алдынары дээрге чүү дээни ол? Чижекти чугаалаңар.

¹⁰ Иегова мөргүлдеривиске дүүштүр алдынарывысты манаар. Чижээ, бир акывыс регион шуулганы баарда, ажылындан айтыртынып аар дээш, Иеговадан дуза дилеп турар. Бурган бараалгакчызынга канчаар харыылаар? Чугаа кылырынга дидим чорукту бээр. Ынчалза-даа акывыс даргазынга боду баргаш чугаалажыр. Баштай чөпшээрешпеске, ол катап-катап баар апаар. Өске ажылчын-биле солчур азы төлевир чок шөлээ алыр чадавас.

11. Мөргүлге кызымак болуру чүге чугула?

¹¹ Иегова мөргүлге соксаал чок болурувусту күзээр (1 Фес. 5:17). Иисустуң сөстеринден алырга, чамдык мөргүлдерниң харыызын дораан албас бис (Лк. 11:9). Ынчангаш дүжүп бербеңер! Катап-катап мөргүңер (Лк. 18:1—7). Ынчан дилээңер түр када күзел эвес, а силерге чугула чүүл деп Иеговага көргүзер силер. Оон аңгыда, Иегова силерге дузалап шыдаар деп бүзүрээриңерни ол көрүп каар.

ДИЛЕГЛЕРНИ ЧАМДЫКТА ЧҮГЕ ЭДЕ КӨӨР БОЛЗА ЭКИ?

12. а) Кандыг айтырыгны боданып болур бис база чүге? б) Мөргүлге Иеговага хүндүткеливисти канчаар хынаар? («Иеговага хүндүткелим мөргүлдеримден көстүп турар бе?» деп көзенекти көрүңер.)

¹² Мөргүлүвүстүң харыызын албайн баргаш, бодувуска үш айтырыгны салып болур бис. Бирээде: «Шынап-ла херек чүүл дээш мөргүп турар мен бе?» Чамдыкта чүү эки боорун бодувус билир бис деп бодаар бис. Иегова байдалды эки билир, ынчангаш ооң шиитпири дээре. Бистиң чамдык дилеглеривис Бурганга шуут дүүшпес (1 Ин. 5:14). Чижээ, бирги абзацта ада-иениң чижээнче эглип кээли. Олар оглунга алыс шынга артып каарынга дузалаар кылдыр Иеговадан дилеп мөргүп турар. Бодаарга ол дыка эки дилег ышкаш. Ынчалза-даа Иегова аңаа бараалгаарынга кымны-даа албадавас. Бурган аңаа бараалгаарын ажы-төл-даа, улуг-даа кижи боду шиитпирлезин деп күзээр (Ы. х. к. 10:12, 13; 30:19, 20). Ынчангаш ада-иелер ажы-төлү Бурганның өңнүү болуп, аңаа ынак апаарынга дузалаар дээштиг сөстерден база канчаар алдынарын көргүзерин Иеговадан дилеп мөргүңер (У. ч. 22:6; Эф. 6:4).

13. Еврейлерге 4:16-дан алырга, Иегова биске кажан дузалаар? Тайылбырлаптыңар.

¹³ Ийи дугаар айтырыг мындыг: «Мээң дилээмни күүседири ам Иеговага таарымчалыг үе бе?» Иегова мөргүлүвүске дораан харыылапкан болза деп күзээр бис. Ынчалза-даа харыылаарынга таарымчалыг үени ол эки билир. (Номчуптуңар: Еврейлерге 4:16.) Күзээн чүүлүвүстү дораан албайн баргаш, «чок» дээн деп бодаар бис. Ынчалза-даа Иегова «бичии мана» дээн чадавас. Чижээ, аарыындан дыка эттинип алыксаан акывысты сактып кээлиңер. Бир эвес Иегова акывысты хуулгаазын арга-биле экиртиптер болза, Эрлик ону чемелээр арга кылып аар. Акывысты ол чүгле экирий бергени дээш Бурганга бараалгап турар деп болур (Иов 1:9—11; 2:4). Шупту аарыгларны экиртиптер үени Иегова шагда-ла шилип каан (Иса. 33:24; Ажыд. 21:3, 4). Амдыызында хуулгаазын эмнээшкин манавас бис. Ынчангаш акывыс аарыгга бастырбайн, улаштыр шынчы бараалгаар дээш, Иеговадан күштү болгаш сагыш сеткилге оожургалды дилеп болур (Ыд. ыр. 28:11).

14. Джанистиң төөгүзүнде кандыг кичээл бар?

¹⁴ Вефилге бараалгаарын мөргүп турган Джанис Иегованың харыызын чүгле беш чыл эрткенде билип каан. «Ол үеде Иегова мени эдип-чазап, өөредип турган. Иеговага оон-даа артык идегеп өөренири чугула болган. Хууда шинчилелимни экижидерин билип каан мен. А оон ыңай мээң өөрүшкүм даштыкы байдалдардан хамаарышпас кылдыр чурттап өөренири чугула турган» — деп угбавыс үлешкен. Сөөлүнде Джанисти өөнүң ээзи-биле эргий кезиир бараалгалче чалаан. Эрткен үени сактып, ол мынча дээн: «Күзээним ышкаш эвес-даа болза, Иегова мээң мөргүлдеримге харыылаан. Ооң кайы хире чараш кылдыр харыылаанын үезинде эскербээн мен. Меңээ көргүскен ынакшылы дээш, аңаа дыка-ла өөрүп четтирер-дир мен».

15. Мөргүлге чамдыкта ниити кылдыр чугаалаары чүге чугула? (Чурукту база көрүңер.)

¹⁵ А үш дугаар айтырыг мындыг бооп болур: «Мөргүлүмнү өскертир болзумза эки эвеспе?» Тодаргай мөргүүрү эки-даа болза, Иегованың орнунга мөргүлге канчаар харыылаарын шиитпирлевес болза эки. Ынчан биске хамаарыштыр Иегованың күзел-соруун эскерери чиик болур. Чагырганың медээчилериниң школазынга өөренирин мөргээн угбавыстың байдалын чугаалажыптаалыңар. Аңаа өөренгеш, суртаалчылар херек черге бараалгаарын угбавыс дыка күзеп турар. Ынчангаш өөредилге дугайында мөргүвүшаан, угбавыс күжүн бо үеде канчаар ажыглаарын Иеговадан айтырып болур (Аж.-ч. 16:9, 10). Ооң соонда мөргүлүнге дүүштүр алдынары чугула. Чижээ, кожуун хайгааракчызындан эгелекчилер херек чоок чыышты айтырар азы суртаалчылар херек черни билип алыры-биле салбырже чагаа бижип болурe.

16. Бо статьядан чүнү билип алган бис?

¹⁶ Бистиң мөргүлдеривиске Иегова кезээде ынакшылдыг болгаш чөптүү-биле харыылаарын көрдүвүс. (Ыд. ыр. 4:4; Иса. 30:18). Чамдыкта Бурган манап турганывыс ышкаш харыылавайн барып болур. Ынчалза-даа чаңгыс-даа мөргүлдү кичээнгей чок арттырбас. Иегова биске дыка ынак. Ол кажан-даа бисти кагбас (Ыд. ыр. 9:11). Ынчангаш «кандыг-даа үеде Аңаа идегеңер» база чүрээңерде чүү барын аңаа шуптузун чугаалап бериңер (Ыд. ыр. 61:9).