«Чедишкен улуг улус апарып көрээли»

1. Иегова бистен чүнү манап турарыл?

ЧАШ төлдүң төрүттүнүп келири — ада-иениң чуртталгазында аас-кежиктиг болуушкуннарның бирээзи. Чаптанчыг төлдүң кезээде бичии артып каарын ада-иези күзевес. Ажы-төлү өспеске ада-иези дүвүрей бээр. Бис база христиан оруувуска базымнарны чаңгыс черге турбайн кылыр болзувусса, Иегова өөрүүр. Ол бисти бүзүрелге чаш хевээр артпайн, быжыгып өзеринче оттуруп турар (1 Кор. 3:1; 14:20).

2. Бо статьяга чүнү сайгарар бис?

² Бүзүрели быжыг христиан кижи болуру дээрге чүү дээн база ону канчаар чедип алырыл? Бүзүрелди быжыктырарынга ханы билиглер кандыг салдарлыг? Кижи бодунга чүге идегеп болбас? Ол айтырыгларның харыызын сайгарыптаалыңар.

ЧЕДИШКЕН БАРААЛГАКЧЫ ЧҮЗҮ-БИЛЕ ЫЛГАЛДЫГ?

3. Чедишкен бараалгакчы болурунга чүү херек?

³ Библияда «өзүп чедишкен улус» деп очулдурган грек сөс эчизинге чедирер азы долу хемчээл деп бодалды дамчыдып турар (1 Кор. 2:6)a. Бүзүрелге чаш артпайн өзер болзувусса, улгадып, чедишкен христианнар апаар бис. Ынчалза-даа сорулгавысты чедип алгаш, улаштыр база өзери чугула (1 Тим. 4:15). Элээди ажы-төл безин чедишкен христианнар апарып болур. Сорулганы чедип алганын канчаар билип ап болур?

4. Чедишкен бараалгакчы чүзү-биле ылгалдыг?

⁴ Чедишкен христиан кижи Бурганның шупту хоойлуларынга ынак, кайызын сагыыр-сагывазын шиливес. Ол тергиин эвес болгаш, частырыгларны кылыр. Ынчалза-даа чедишкен кижи бодалдары, ажыл-херээ-биле Иегованы өөртүп, хүннүң хынаныр. Ол чаа овур-хевирни кедип алган база Бурганның угаан-бодалын оон-даа өттүнерин кызып чоруур (Эф. 4:22—24). Шиитпирлер хүлээрде Иегованың хоойлу-дүрүмнеринге даяныр. Ынчангаш аңаа хөй санныг дүрүмнер херекчок. Бот-сагылга чурумунуң ачызында эгелээн чүүлүн ол эчизинге чедирип турар (1 Кор. 9:26, 27).

5. Бүзүрели чаш болурунда кандыг айыылдар бар? (Эфесчилерге 4:14, 15).

⁵ Чедишкен христиан болурунче чүткүвес кижини мегелээри белен. Ол меге медээлер база хоп-чугаа сонуургаар, ойталакчы өөредиглерге бүзүрээрb. (Номчуптуңар: Эфесчилерге 4:14, 15.) Ол адааргак, маргыжарынга ынак, хомудаачал база күткүлгелерге белен алзыр (1 Кор. 3:3).

6. Мага-боттуң өзүлдезинден бүзүрелдиң өзүлдези чүзү-биле ылгалдыг? (Чурукту база көрүңер.)

⁶ Бүзүрелдиң четчип быжарын мага-боттуң өзүлдезинге деңнээн бис. Бичии төлдүң дуржулгазы чок боорга, ада-иези аңаа чүнү кылырын чугаалаар, ону камгалаар. Чижээ, орук кежерде авазы уруунуң холундан чедип алыр. Шору өзе бээрге, чааскаандырзын чорударда кичээнгейлиг боорун дөмей-ле катап сагындырар. А улуг апаргаш, боду орукту айыыл чок эртип шыдаар. Чедир өспээн христианнар бичии ажы-төл ышкаш. Бүзүрелди кошкадыптар айыылдан ойталаарынга база мерген угаанныг шиитпирлер үндүреринге, оларга чедишкен бараалгакчыларның дузазы үргүлчү херек. А чедишкен христианнар хууда шиитпирлерни боттары үндүрер. Олар библейжи дүрүмнерни кызып боданып, Иегованың көрүжүн билип алгаш, аңаа дүүштүр алдынар.

7. Бүзүрели быжыг христианнарга өске улустуң дузазы херек бе?

⁷ Чедишкен христиан кижиге дуза шуут херекчок дээни ол бе? Чок, ол сүмени база дилеп болур. Ынчалза-даа өске улустан чүнү канчаарын айтырып азы ооң орнунга шиитпир үндүрерин манавас. Бүзүрели быжыг кижи харыысалгазын база «үүрге-чүъгүн» боду чүктээрин билир (Гал. 6:5).

8. Бүзүрели быжыг христианнар шупту дөмей болур бе? Тайылбырлаптыңар.

⁸ Улуг улус бот-бодунга дөмей болбас. Кижилерниң Бурган-биле найыралы база ылгалдыг. Чамдык улус мерген угаанныг, дидим, а өскелери беримчелиг база кээргээчел. Дөмей байдалда бүзүрели быжыг христианнар ийи аңгы шиитпирни үндүрүп болур. Библияның көрүжү-биле ол шиитпирлер ийилээ шын болур. Колдуунда аңаа арын-нүүр айтырыглары хамааржыр. Бистен ылгалдыг-даа болза, өске кижиниң шиитпирин шиитпейн, ооң орнунга демнештирер чүүлдерже кичээнгей салыр бис (Рим. 14:10; 1 Кор. 1:10).

ЧЕДИШКЕН ХРИСТИАН КИЖИ БОЛУРУ

9. Кижи ала чайгаар чедишкен христиан апаар бе? Тайылбырлаптыңар.

⁹ Мага-бот ала-чайгаар өзер. А быжыг бүзүрелдиг болур дизе, хөй күжениишкиннер херек. Чижээ, коринфичилер өөрүшкүлүг медээни хүлээп алгаш, сугга суктурган соонда ыдыктыг сүлдени алган. Оларны Павел элчин хууда база өөредип турган (Аж.-ч. 18:8—11). Элээн улус сугга суктуруп алгаш, каш чыл эрткенде Бурган-биле найыралын өстүрбейн барган (1 Кор. 3:2). Ол частырыгны канчап өттүнмезил?

10. Кижиниң Бурган-биле найыралы чүден эгелээр? (Иуда 20).

¹⁰ Чедишкен христиан болурунче кижи боду чүткүүр ужурлуг. Бүзүрээчел, дуржулга чок артыксаар улустуң өзүлдези туруптар (У. ч. 1:22). Улгады бергеш, чүгле ада-иезиниң шиитпирин манаар кижиге дөмей болуксавас бис. Бурган-биле найыралывыстың өзүлдезинге харыысалгалыг болур бис. (Номчуптуңар: Иуда 20.) Өскертип алыр талаларывысты билип кааш, Иегова «чүткүүр күзелди-даа, күштү-даа» бээр кылдыр мөргүүлүңер (Флп. 2:13).

11. Иегова бүзүрелди быжыктырарынга биске канчаар дузалап турарыл? (Эфесчилерге 4:11—13).

¹¹ Бүзүреливисти быжыктырарынга Иегова бисти кагбаан. Христиан чыыштарга ол биске удуртукчуларны, башкыларны берген. Ол акылар биске «Христостуң дээди деңнелин» чедип алырынга дузалажып турар. (Номчуптуңар: Эфесчилерге 4:11—13.) «Христостуң угаанын» сайзырадырынга Иегова биске сүлдезин база берип турар (1 Кор. 2:14—16). Иисустуң черге чурттап тургаш, канчаар боданып, чугааланып, алдынып чораанын Өөрүшкүлүг медээниң дөрт номундан билип алыр бис. Ооң угаан-бодалын өттүнүп, шак ынчаар алдынарын кызар болзувусса, чедишкен христиан болур сорулгавысты чедип алыр бис.

КАДЫГ ЧЕМНИҢ ЧУГУЛАЗЫ

12. «Христос дугайында өөредигниң эге билиглери» деп чүл?

¹² Быжыг бүзүрелге «Христос дугайында өөредигниң эге билиглери» азы чүгле кол өөредиглер чедишпес. Чижээ, буруузун миннири, бүзүрел, сугга суктурары болгаш диргизиишкин — христиан бүзүрелдиң кол үндезини (Евр. 6:1, 2). Ынчангаш Беженги хүннүң байырлалынга Пётр элчин ооң дугайында суртаалдап турган (Аж.-ч. 2:32—35, 38). Христостуң өөреникчизи апаар дизе, ол эгеки өөредиглерни хүлээри чугула. Чижээ, диргизиишкинге бүзүрел чокка алыс шын христиан болуру болдунмас деп, Павел тода көргүскен (1 Кор. 15:12—14). Ынчалза-даа кол өөредиглерни шиңгээдип алгаш, чаңгыс черге турбайн улаштыр өзери чугула.

13. Еврейлерге 5:14-те чугаалаан кадыг чем биске ажыктыг болзун дизе, чүнү кылыры чугула? (Чурукту база көрүңер.)

¹³ Эге өөредиглерге бодаарга, кадыг чем чүгле хоойлулардан эвес, а Иегованың бодалдарын эки билип алырынга дузалаар дүрүмнерден тургустунган. Библияны өөренип, ооң дугайында боданып, билиглеривисти кызып ажыглаарга, ол чем биске ажыктыг болур. Ынчан Иегованы өөртүр шиитпирлерни үндүрүп өөренип алыр бисc. (Номчуптуңар: Еврейлерге 5:14.)

14. Павел коринфичилерге чедишкен христианнар болурунга канчаар дузалаан?

¹⁴ Чүгле эге билиглерлиг христианнарга дүрүмнерге даяныр апаар байдалда, тода хоойлу чокта шиитпир үндүрери берге. Чамдык улус ындыг байдалда канчаар күзээни-биле алдынып болур деп санаар. А өскелери дүрүм негеттинмес байдалда безин, дүрүм турзун деп күзээр. Коринфте христианнар дүрзү-бурганнарга өргээн аъш-чемге хамаарыштыр дүрүм тургузарын дилээрге, Павел кижи бүрүзүнде хостуг шилиир эрге барын база арын-нүүрнүң чугулазын сагындырган. Каш дүрүмнү сайгаргаш, арын-нүүрге карышпас, өске улуска моондак тургуспас шиитпир үндүрүп болурун көргүскен (1 Кор. 8:4, 7—9). Павел коринфичилерни кижилер бодалынга азы оларның дүрүмнеринге эвес, а Бурганның Сөзүнге идегээринче кыйгырган. Олар ынчаар алдынгаш, чедишкен христианнар апаар турган.

15. Еврей христианнарга бүзүрелин улаштыр быжыктырарынга Павел канчаар дузалашкан?

¹⁵ База бир чугула кичээлди Павелдиң еврейлерге чагаазындан көрүп болур бис. Оларның чамдыызы Бурган-биле найыралын сайзыратпайн, чаңгыс черге турупкан. Ынчангаш Павел: «Силерге кадыг чем эвес, а [катап] сүт херек-тир» — дээн (Евр. 5:12). Иегованың чоорту ажыткан чаа билиглерин олар херекке албайн барган (У. ч. 4:18). Чижээ, хоойлуну солаандан бээр, Иисустуң өлүмүнүң соонда 30 чыл эрткен-даа болза, элээн хөй еврейлер Моисейниң хоойлузун сагып турган (Рим. 10:4; Тит. 1:10). Үжен чыл ишти чаа өскерлиишкиннерге чаңчыгып болур деп чөпшээрежир боор силер! Павел ынчангаш акы-угбаларынга ханы билигни шиңгээдип алырынга дузалаар дээш чагаа бижээн. Амгы чүдүлгези оранчок дээре деп бүзүрелин быжыктырарынга, ол христианнарга сагындырыглар херек болган. Иудейлер удурланза-даа, тогбайн дидим суртаалдаарынга ханы билиг оларга дузалаар турган (Евр. 10:19—23).

БОТ ТОГДУНМАҢАР

16. Чедишкен христиан апарган кижиге чүнү кылыры чугула?

¹⁶ Чедишкен христиан апаарындан аңгыда, бот тогдунарындан ойталаары чугула (1 Кор. 10:12). Чаңгыс черге тапталбас дээш, үргүлчү хынаныр болза эки (2 Кор. 13:5).

17. Колосчуларга чагаа чедишкен христиан болурунуң чугулазынче канчаар кичээнгей салган?

¹⁷ Колосчуларга чагаазынга Павел чедишкен христиан болуп артарының чугулазынче база катап кичээнгей салган. Ол чедишкен акы-угбаларны Павел бо делегейниң философиязындан дөмей-ле оваарындырган (Кол. 2:6—10). Эпафрас ол акы-угбаларын эки билир болгаш, оларның бүзүрели «четчип-бышкан» болуп артсын дээш, үргүлчү мөргүп турган (Кол. 4:12). Бурганның деткимчези база хууда күжениишкиннер чокка ол болдунмас деп, Павел биле Эпафрас билип турган. Кандыг-даа шаптараазыннар турза, колосчулар кошкай бербезин күзээн.

18. Чедишкен христиан кижиге кандыг айыыл туруп болур? (Чурукту база көрүңер.)

¹⁸ Чедишкен христиан кижи безин Иегова-биле хамаарылгазын олчаан чидирип ап болурун, Павел еврейлерге сагындырган. Бурганга буруузун миннип, өршээл ап шыдавас кылдыр кижиниң чүрээ дашталып болур. Аас-кежик бооп, еврейлер ындыг байдалга четпээн (Евр. 6:4—9). Бистиң үевисте байдал кандыг? Суртаалдаарын соксаткан азы чыыштан үндүрткеш буруузун миннип келген акы-угбаларга хамаарыштыр Иегованың бодалы кандыг? Павелдиң бижээн улузунга бодаарга, олар биче сеткилдиг буруузунган. Иеговага эглип кээрге, ол акы-угбаларга ооң дузазы херек турган (Иез. 34:15, 16). Эглип келген кижиге быжыгарынга дузалаар кылдыр удуртукчулар дуржулгалыг бараалгакчыны дилээр.

19. Кандыг сорулгалар салыр болзувусса эки?

¹⁹ Чедишкен христиан кижи болурунче чүткээш, сорулгаңарны чедип алыр силер. Кадыг чемни чип, Бурганга дөмейлештир угаан-бодалыңарны өскертиңер. Бир эвес силер чедишкен христиан апарган болзуңарза, ол байдалды чидирбезин кызыңар.