Бир-ле чүүлдү билбези чүге эки?

1. Иегова биске кандыг аргаларны берген база чүге?

ИЕГОВА бисти чаа чүүлге өөренир, боданыр база мерген угаанныг шиитпирлер үндүрер кылдыр чаяаган. Чүге дизе «Бурган дугайында билигни» тып алгаш, угаан-сарыылдыг бараалгаарывысты ол күзеп турар (У. ч. 2:1—5; Рим. 12:1).

2. а) Бисте кандыг кызыгаарлар бар? (Иов 37:23, 24). (Чурукту база көрүңер.) б) Билиивистиң чедишпезин миннири чүге ажыктыг?

² Өөрениринге сундулуг-даа болзувусса, билиглеривис кызыгаарлыг. (Номчуптуңар: Иов 37:23, 24.) Иовту сактып кээлиңер. Кажан Иегова аңаа хөй айтырыглар салырга, билиглери кайы хире чедишпезин ол билип каан. Бурган-биле чугаа Иовту томаартып, угаан-бодалын өскертиринге дузалаан (Иов 42:3—6). Бис база хөй чүүлдү билбезивисти чөпшүл миннир болзувусса, чүгле ажыктыг болур. Шак ындыг хөөн, шилилге кылыр апаарывыска, Иеговага идегеливисти оон-даа күштелдирер. Бурган шынап херек билигни ажыдып бээринге бүзүрээр бис (У. ч. 2:6).

3. Бо статьяга чүнү сайгарар бис?

³ Бо статьяга билбес чүүлүвүстү болгаш ооң ужурундан кандыг бергелер тыптып болурун сайгарар бис. Бир чүвени билбези чүге ажыктыын база көөр бис. Иегованың «билии четче-долу» болгаш, биске херек билиглерни ажыдып бээринге бүзүреливисти бо статья быжыктырар (Иов 37:16).

ТӨНЧҮ КАЖАН КЕЛИРИН БИЛБЕС БИС

4. Матфей 24:36-дан алырга, чүнү билбес бис?

⁴ Номчуптуңар: Матфей 24:36. Бо делегейниң төнчүзү кажан болурун билбес бис. Иисус безин черге чорааш, ол «хүннүң база шактың» кажан кээрин билбес турганa. Элчиннеринге болуушкуннарның «үезин болгаш хуусааларын» Иегова боду тургузар эргелиг деп, Иисус чугаалаан (Аж.-ч. 1:6, 7). Эрликтиң делегейин кажан узуткаарын Иегова шагда-ла доктаадып каан. Ол үе кажан кээрин санап шыдавас бис.

5. Төнчү кажан кээрин билбезивис биске кандыг салдар чедирип болур?

⁵ Төнчүнү кайы хире үр манаарын билбес бис. Ону шагда-ла манаан кижи шыдажып чадап каар азы ундарай берип болур. А бир кижиге өг-бүлезинде азы өске-даа улустуң кыжырыглары дыка муңгаранчыг чадавас (2 Пет. 3:3, 4). Ооң ужурундан биске: «Ол хүннү, шакты билир турган болза, бүгү бергелерни ажып эртип аары чиик боор ийик» деп бодал тыптып болур.

6. Төнчү кажан кээрин билбеске чүге эки?

⁶ Иегованың төнчү хүнүн ажыдып бербээни биске-ле ажыктыг. Чүге дизе ооң ачызында бис Адавыска ынакшылывысты, бүзүреливисти көргүзүп болур бис. Иеговага чүгле төнчү келгижеге чедир эвес, а кезээ-мөңгеде бараалгаар күзелдиг бис. «Бурганның шииткел хүнү» кажан болурун эвес, а кайы хире хөй йөрээлдер эккээрин боданганы дээре. Ынчан Бурган-биле найыралывысты быжыглап, бүгү күжүвүс-биле ону өөртүр дээш кызар бис (2 Пет. 3:11, 12).

7. Чүнү билир бис?

⁷ Ылап билир чүүлүвүстү боданыылыңар. Өттүр сөглээн медеглелдерден алырга, сөөлгү хүннер 1914 чылда эгелээн. Оон тура делегейде байдал кандыг болурун Библияда тодаргайы-биле баш удур чугаалап каан. Ынчангаш Иегованың «өндүр улуг хүнү» чоокшулаанынга чигзинмес бис (Соф. 1:14). Оон аңгыда, Иегова хөй-ле улуска Бурганның Чагыргазының дугайында өөрүшкүлүг медээни дамчыдар чугула ажылды дааскан (Мф. 24:14). Ол медээ 240 чурттарда болгаш девискээрлерде 1 000 ажыг дылдарда тараттынып турар. Ол чугула ажылга идепкейлиг киржирде, «хүннү, шакты» билири биске албан эвес.

ИЕГОВА БИСКЕ КАНЧААР ДУЗАЛАЖЫРЫН ТОДА БИЛБЕС БИС

8. Экклесиаст 11:5-те «Бурганның ажыл-херектери» дээн сөстер чүнү илереткенил?

⁸ Алыс шын «Бурганның ажыл-херектерин» чамдыкта билбес бис. (Номчуптуңар: Экклесиаст 11:5.) Иегова күзел-соруун күүседир дээш, чамдык чүүлдерни боду кылыр азы кандыг-бир болуушкуннарны чөпшээреп болур. Иегова шупту чылдагааннарны биске ажытпаан. Ол биске канчаар дузалаарын база тода билбес бис (Ыд. ыр. 36:5). Чаш төлдүң иезиниң иштинге сайзыраарын эртемденнер безин ам-даа долузу-биле билбес. Ооң-биле дөмей Бурганның ажыл-херээ биске тывызык.

9. Иегова канчаар дузалажырын тода билбес болганывыстан кандыг бергелерге таваржып болур бис?

⁹ Иегова канчаар дузалажырын тода билбес болганывыстан, шиитпир хүлээри биске берге апаар. Чуртталгавысты бөдүүнчүдерде чидириглерни азы хөй суртаалчылар херек черже көжерде өскерлиишкиннерни хүлээри берге апарып болур. А чамдыкта сорулгавысты чедип шыдавайн баар бис. Чеже-даа суртаалдаарга, өөренир күзелдиг улус тывылбас. Азы организацияның ажылынга киржиривиске, ол бир-ле чылдагаан-биле туруптар. Ол ышкаш байдалдарда Иегова биске таарзынмаан, деткивейн турар деп бодал кирип кээр чадавас.

10. Иегованың канчаар дузалаарын тода билбес болганывыстың ачызында кандыг чугула шынарларны сайзырадып ап болур бис?

¹⁰ Иегованың биске канчаар дузалаарын тода билбес бис. Ооң ачызында биче сеткил, чөпшүл дээн ышкаш чугула шынарларны сайзырадып ап турар бис. База Бурганның оруктары болгаш бодалдары оранчок бедик деп оон-даа эки билип эгелээн бис (Иса. 55:8, 9). Иегова кандыг-даа ажылга дузалап болур болганда, аңаа оон-даа идегеп өөренип ап турар бис. Суртаалывыс азы күүсеткен даалгаларывыс эки түңнелдиг болза, ол дээш дээрде Адавысты алгап-мактаар бис (Ыд. ыр. 126:1; 1 Кор. 3:7). Ынчалза-даа шупту чүве манаанывыс ышкаш эвес апаарга-даа, Иегова байдалды долузу-биле хайгаарап турар деп сактыры чугула (Иса. 26:12). Бодувустуң талавыстан ажылды кылып турар болгаш, Иегова бодунуң үлүүн албан киирер деп чигзинмес бис. Иеговадан бурун шагның хуулгаазыннарын манавас болгай бис, ынчалза-даа кайнаар углаарын ол ыяап-ла айтып бээр (Аж.-ч. 16:6—10).

11. Иегованың дугайында кандыг чугула барымдаалар билир бис?

¹¹ Иегованы ынакшылдыг, чөптүг база мерген угаанныг деп билир бис. Аңаа болгаш акы-угбаларга кылган бүгү ажыл-херээвисти ол бедик үнелээр. Иегова аңаа бердинген улусту шуптузун албан шаңнаар деп билир бис (Евр. 11:6).

ДААРТА ЧҮҮ БОЛУРУН БИЛБЕС БИС

12. Иаков 4:13, 14-тен алырга, бис чүнү билбес бис?

¹² Номчуптуңар: Иаков 4:13, 14. Даарта чуртталгавыс-биле чүү болурун билбезивис шын. Бо делегейде шупту чүве «үе-хуусаа биле таварылгадан» хамааржыр (Эккл. 9:11). Ынчангаш күзелдеривисти күүседип, ажыл-херээвисти эчизинге чедирип шыдаарывысты ылаптыы-биле билбес бис.

13. Келир үе тодаргай эвес апарганда, чүнү миннип болур бис?

¹³ Келир үе тодаргай эвесте сагышка анчыг. Даартагы хүн дээш дүвүрел өөрүшкүвүстү бо-ла хемдий бээр. Хенертен келген халаптар сеткиливисти хоозурадыптар. А манаашкыннарывыс бүтпеске муңгарааш, чөгеливис төнүп болур (У. ч. 13:12).

14. Аас-кежиивис чүден хамааржыр? (Чуруктарны база көрүңер.)

¹⁴ Библиядан алырга, Иегова чуртталгавыс кандыг болурун баш удур шиитпирлевес база шупту бергелерден камгалавас. Келир үени билиривистен аас-кежиивис хамаарышпас деп ол билир. Иегова-биле сүмележип, ону дыңнаар болзувусса, аас-кежиктиг болур бис (Иер. 10:23). Ынчангаш бергелерге туруштуувус-биле дээрде Ачавыска хуу ажык бодааш эвес, а ынак болгаш, бараалгап чоруурувусту бадыткаар бис. А шиитпир үндүрерде, дузаны дилээнивис-биле: «Дээрги-Чаяакчы күзээр болза, ам-даа амыдыраар бис, ону азы мону кылы[р] бис» — дээн Иаковтуң сөстеринге каттыжар бис (Иак. 4:15).

15. Келир үениң дугайында чүнү билир бис?

¹⁵ Даартагы хүннү тода билбес-даа болзувусса, Иегова мөңге чуртталганы белекке бээр деп билир бис. Чамдыывыс өрү дээрге, а өскелеривис черге чурттаар. Бурган кажан-даа мегелевес база ооң аазаашкыннары күүсеттинеринге кым-даа шаптыктап шыдавас (Тит. 1:2). «Төнчүзүнде чүү боорун эгезинде-ле, ам-даа болбаан чүве дугайында» чүгле Иегова чугаалап турар. Библейжи үелерде ооң сөстери шуптузу бүткен, келир үеде база күүсеттинер (Иса. 46:10). Иегованың биске ынакшылын чүү-даа өжүрүп шыдавас деп чигзинмес бис (Рим. 8:35—39). Кандыг-даа бергелерге таваржырывыска, ол бисти оожургадыр, мерген угаанны болгаш күштү бээр. Иегова Бурганывыс бисти кезээде йөрээр, дузалажыр (Иер. 17:7, 8).

ИЕГОВА БИСТИ КАЙЫ ХИРЕ ЭКИ БИЛИРИН УГААП ШЫДАВАС БИС

16. Иегова кижи бүрүзүнүң дугайында чүнү билир база ол чүүл силерге кандыг минниишкиннер оттурар-дыр? (Ырлар 138:1—6)?

¹⁶ Номчуптуңар: Ырлар 138:1—6. Бистиң Чаяакчывыс мага-бодувустуң, сагыш-сеткиливистиң канчаар сайзырап келгенин дыка эки билир. Ынчангаш ооң биске сонуургалы кажан-даа кошкавас. Канчаар чугааланып, чүнү кылып турарывыстың артында сеткиливисти безин ол билир. Иегова бис дээш сагыш човап, кичээнгейни көргүзүп, биске дузалажыр дээш кезээде чанывыста чоруурун Давид хаан бижээн. Өрүкү Дээргивис, чер-дээрниң Өндүр улуг Чаяакчызы силерни аажок сонуургаарын бодап көрүңер даан! Ону билири силерге кандыг минниишкиннер оттурар-дыр? «Сээң билииң меңээ кайгамчык онза, аажок бедик — ону билип аар харыым чок» — дээн Давид-биле, чугаажок, чөпшээрежир боор силер (Ыд. ыр. 138:6).

17. Иегова биске ынак база дыка эки билип турар деп бүзүрээри чүге берге апаар?

¹⁷ Чамдыывыска кижизидилгевис, ооң мурнунда шажынчы көрүштеривис дээш, биске сонуургалды илередип турар, Иегованы ынакшылдыг Ада кылдыр хүлээри берге чадавас. Азы частырыгларывысты сактып келгеш: «Ол коргунчуг үүлгедиглерни көргеш, Иегова каяа-ла мээң өңнүүм болуксаар» — деп бодап болур бис. Давид безин шак ындыг минниишкиннерлиг чораан (Ыд. ыр. 37:19, 22). А бир кижиге Бурганны өөртүр дээш чуртталгазын өскертири дыка берге. Ындыг кижи: «Бурган мени билип турар болганда мени ол-ла хевээр чүге хүлээп албас? Чаңчыккан чуртталгамдан ойталаарын ол чүге негеп турар?» деп айтырып болур.

18. Иегова бисти бодувустан артык эки билиринге чигзинмези чүге чугула? (Чуруктарны база көрүңер.)

¹⁸ Иегова бисти бодувустан артык билиринге чигзинмези чугула. Эскербээн эки талавысты безин ол көрүп турар. Частырыгларывысты ол билир. Ынчалза-даа биске дөмей-ле ынак, чүге дизе бир-ле чүүл кылган сеткиливисти ол бодап билир (Рим. 7:15). Иегова удавас экижий бээривисти база көрүп турар. Ону утпас болзувусса, бараалгалга оон-даа улуг өөрүшкүнү болгаш күштү алыр бис.

19. Иегованың дугайында чүнү ылаптыг билир бис?

¹⁹ Ынакшылдың Чаяакчызы — Иегова (1 Ин. 4:8). Бир-ле чүүлдү кылырын азы кылбазын дилээрге, ол биске чүгле экини күзээр база биске ынак деп билир бис. Бисти мөңгеде чурттазын дээш, Бурган аар өртекти төлээнин билир бис. Иисустуң өргүлүнүң ачызында тергиин эвес кижилер, бараалгалы-биле Иегованы өөртүп болуру чигзиниг чок (Рим. 7:24, 25). «Бурган бистиң арын-нүүрүвүстен артык улуг база Ол бүгү чүүлдү билир» — деп бүзүрелдиг бис (1 Ин. 3:19, 20). Бодалдарывыс, минниишкиннеривис Иеговага дыка эки билдингир. Ынчангаш ооң күзел-соруун күүседип шыдаптарывыска, ол бүзүрээр.

20. Билбес чүүлүвүс дээш, чүге эмин эрттир сагышсыравас болза эки?

²⁰ Херек бүгү чүүлдү Иегова бараалгакчыларынга ажыдып турар. Ынчангаш чүнү билбезивис дээш, дүвүрээн ажыы чок. Ооң орнунга ёзулуг чугула чүүлче кичээнгей салганы дээре. Ынчалдыр «билии четче-долу» Иеговага долузу-биле бүзүрээривисти көргүзер бис (Иов 36:4). Амдыызында бир-ле чүүлдү чедир билбес-даа болзувусса, Иеговадан кезээ-мөңгеде өөрениривисти билир бис. Кайгамчыктыг Бурганывыстың дугайында чаа-чаа билиглерниң ажыттынарын четтикпейн манап турар бис (Эккл. 3:11).