Шынчы бараалгакчыларның сөөлгү сөстеринден чүнү өөренип алыр бис?

1. Назылай берген акы-угбалардан өөренири чүге чугула?

ШИИТПИРЛЕР хүлээрде, бир кижи сүме кадарга өөрүп четтирер бис. Ындыг дузаны удуртукчулардан, бүзүрели быжыг акы-угбалардан ап болур бис. Назылай берген-даа болза, оларның сүмелери эргижирээн деп болбас. Иегова бисти улуг назылыг улустан өөренирин күзээр. Олар дуржулгалыг, мерген угаанныг, чүге дизе бистен хөйнү чурттаан (Иов 12:12).

2. Бо статьяга чүнү сайгарар бис?

² Библейжи үелерде Иегова улуг назылыг шынчы эр улус таварыштыр чонун удуртуп, деткип чораан. Оларның аразында Моисей, Давид болгаш Иоанн элчин бар. Аңгы-аңгы үелерде чурттап чораан болгаш, оларның байдалдары ылгалдыг. Назыны дөгүй бергенде, кайызы-даа соонда салгалга мерген угаанныг чагыг-сүмени берген. Ол эр улус Бурганга дыңнангыр болурунуң чугулазын демдеглээн. Иегова ол сөстерни бистиң хүннерге чедир Библияда кадагалаан. Элээди-даа, улуг-даа улуска ол сүмелерниң дугайында боданыры ажыктыг (Рим. 15:4; 2 Тим. 3:16). Бо статьяга ол үш бараалгакчының сөөлгү чагыындан чүнү өөренип ап болурувусту көөр бис.

ҮР ЧУРТТААР СИЛЕР

3. Моисей кым чораан?

³ Моисей бүгү назынында Иеговага шынчы бараалгап чораан. Ол медээчи, шииткекчи, шериг баштыңы база төөгүчү турган. Ооң чуртталгада дуржулгазы улуг. Моисей израиль чонну Египеттен үндүргеш, Иегованың хөй хуулгаазыннарын ийи караа-биле көрген. Библияның беш номун, 89, 90 дугаар Ырыларны бижииринче ону Бурган оттурган. Моисей Иовтуң номун база бижээн боор.

4. Моисей кымны чагып-сургаан база чүге?

⁴ Өлүрүнүң бетинде 120 харлыг Моисей бүгү чонну чыггаш, Иегованың оларга кылган буянын сагындырган. Чамдыызы бичии азы элээди турда оларның караанга Бурган хуулгаазыннарны кылып, египетчилерни кезеткен (Хост. 7:3, 4). Кызыл далай ийи чарлы бээрге, ооң кургаг дүвү-биле эрткеш, Египеттиң шериин Иегованың узуткаанын чон көрген (Хост. 14:29—31). Кургаг ховуга турда, Бурган сагыш човап, оларны камгалаан (Ы. х. к. 8:3, 4). Ам Аазаттынган черже киреринге белен турда, Моисей израильчилерни сөөлгү катап быжыктырарын күзээнa.

5. Ыдыктыг хоойлуну катаптааны 30:19, 20-де бижээн Моисейниң сөөлгү сөстери израильчилерни чүү чүвеге бүзүреткен?

⁵ Моисей чүнү чугаалаан? (Номчуптуңар: Ыдыктыг хоойлуну катаптааны 30:19, 20.) Израильчилерге кайгамчыктыг келир үе ажыттынып турганын ол сагындырган. Иегованың ачызында олар чараш, дүжүткүр Аазаттынган черге үр чурттап болур турган! Моисей мынча дээн: Иегова «бодуңнуң тутпааның, чурттаарынга таарымчалыг улуг хоорайларлыг черже сени киире бээр; сээң чыып долдурбааның янзы-бүрү эт-хөреңги долган бажыңнарны, сээң казып кылбааның кудуктарны, сээң тарывааның виноград сыптары биле олива ыяштары үнген шөлдерни сеңээ бээр» (Ы. х. к. 6:10, 11).

6. Израиль чонну өске чоннар дарлап алырын, Бурган чүге чөпшээрээн?

⁶ Моисей израиль чонга ол байлак черге үр чурттаар дизе, Иегованың дүрүмнерин сагыырының чугулазын сагындырган. Бурганга дыңнангыр, шынчы болурун, өскээр чугаалаарга, амыдыралды шилииринче оттурган. Ынчалза-даа чон Иеговадан хая көрнү бээрге, ассирийжилер, а соонда вавилончулар оларны тиилээш, кулданыгже апаарын Бурган чөпшээрээн (4 Хаан. 17:6—8, 13, 14; 2 Чыл. 36:15—17, 20).

7. Моисейниң сөстеринде биске кандыг кичээл бар? (Чурукту база көрүңер.)

⁷ Биске кандыг кичээл бар? Дыңнангыр чорук амы-тынны камгалаар. Аазаттынган черниң кызыгаарында израиль чон дег, бис база Бурганның аазаан чаа делегейиниң эжииниң аксында турар бис. Удавас бүгү чер дываажаң апаарын көөр бис (Иса. 35:1; Лк. 23:43). Аңаа Эрлик-даа, буктар-даа турбас (Ажыд. 20:2, 3). Меге шажын моон соңгаар кымны-даа төөретпес (Ажыд. 17:16). Кижи чагыргалары албатыларын кызып-кыйып шыдавас апаар (Ажыд. 19:19, 20). Дываажаңга үймээнчилер турбас (Ыд. ыр. 36:10, 11). Шупту Иегованың чөптүг дүрүмнерин сагып, ынакшылдыг болгаш бүзүрелдиг байдалга амырап, тайбың, демниг чурттаар (Иса. 11:9). Ол үени дыка-ла манап турар бис! Иеговага дыңнангыр болур болзувусса, дываажаңга чуртталгавыс чүс-чүс чылдар-даа эвес, а мөңгеде уламчылаар! (Ыд. ыр. 36:29; Ин. 3:16).

8. Бир миссионер акывыска мөңге чурттаар идегел канчаар дузалаан? (Иуда 20, 21).

⁸ Мөңге чурттаар идегел Бурганга бердинген артарынга, бергелерни ажып эртеринге дузалаар база кошкак талаларывыс-биле туржурунга күштү бээр. (Номчуптуңар: Иуда 20, 21.) Африкада хөй чылдарда миссионерлеп чоруур акывыс багай күзелдери-биле демисежип келген. Ол мынча дээн: «Иеговага дыңнангыр болурумдан, мөңге чуртталгам хамааржыр деп билип кааш, дүжүп бербес деп хөөнненген мен. Берге айтырыым дээш Иеговага сеткилимден оон-даа күштүг мөргүп тургаш, ооң дузазы-биле ону ажып эрткен мен».

«ЧЕДИИШКИННИГ БОЛУР СЕН»

9. Давидтиң чуртталгазынга кандыг шенелделер турган?

⁹ Давид алдарлыг хаан чораан. Ол хөгжүмчү, чогаалчы, дайынчы база медээчи турган. Эвээш эвес шенелделерни ол ажып эрткен. Адааргак Саул хаан истеп сүрерге, ол хөй чылдар ишти дезип чурттап келген. Давид боду хаан апаргаш, катап база дезер ужурга таварышкан, чүге дизе оглу Авессалом ачазын өлүргеш, дүжүлгезин эжелээр дей берген. Хамык бергелеринге, частырыгларынга торулбайн, Давид Бурганга эчизинге чедир бердинген арткан. Иегова бараалгакчызын сеткилимге кирер кижи деп адаан. Давидтиң чагыглары биске ажыктыг! (3 Хаан. 15:5; Аж.-ч. 13:22).

10. Соломонга чүге Давидтиң чагыг-сүмези херек болган?

¹⁰ Чижээ, дараазында хаан апаар оглу Соломонга берген Давидтиң чагыг-сүмезин көрээлиңер. Ол аныяк оолду Иегова арыг чүдүлгени деткип, өргээ тудар кылдыр шилип алган (1 Чыл. 22:5). Соломон медээжок улуг ажыл бүдүрер, бүгү чон дээш сагыш човаар ужурлуг турган. Иегованың дузазы чокта ол ону шыдавас. Давид аңаа чүнү чугаалаанын көрээлиңер.

11. 3 Хааннар 2:2, 3-тен алырга, Давид Соломонга кандыг чагыг берген? Ол сөстерни сагып чорда, Соломоннуң чуртталгазы кандыг турган? (Чурукту база көрүңер.)

¹¹ Давидтиң сөөлгү сөстери. (Номчуптуңар: 3 Хааннар 2:2, 3.) Иеговага дыңнангыр болза, чедиишкинниг болурун Давид оглунга чугаалаан. Дараазында чылдарда Соломон шынап-ла хөйнү чедип алган (1 Чыл. 29:23—25). Ол өндүр улуг өргээни туткаш, Библияның каш номун бижээн. Ооң сөстери Библияның өске-даа номнарында таваржып турар. Соломоннуң мерген угааны, байлакшылы Израильден дашкаар сурагжаан (3 Хаан. 4:34). Ынчалза-даа ооң чедиишкини Иеговага дыңнангырындан хамааржыр деп, Давидтиң сөстерин ол сактыр ужурлуг турган. Харааданчыг чүүл, соонда ол өске бурганнарга чүдүп эгелээн. Иегова аңаа таарзынмайн, Соломонга мерген угаанны бербейн барган. А ол чокта ооң чагыргазы чөптүг-шынныг эвес апарган (3 Хаан. 11:9, 10; 12:4).

12. Давидтиң сөстеринде биске кандыг кичээл бар?

¹² Биске кандыг кичээл бар? Чедиишкин дыңнангыр чоруктан хамааржыр (Ыд. ыр. 1:1—3). Соломон ышкаш алдарлыг, бай болурувусту Иегова аазаваан. Ынчалза-даа Бурганны дыңнаар болзувусса, ол мерген угаанны бээр (У. ч. 2:6, 7; Иак. 1:5). Ажыл, эртем-билиг, дыштанылга, акша-төгерик айтырыгларын шиитпирлээринге биске библейжи дүрүмнер дузалаар. Бурганның сүмелерин ажыглап тура, ооң-биле хамаарылгавысты камгалап алгаш, мөңге чурттаар бис (У. ч. 2:10, 11). А өңнүктеривис идегелдиг, өг-бүлевис аас-кежиктиг болур.

13. Карменниң чуртталгазы чүнүң дузазы-биле ёзулуг чедиишкинниг болган?

¹³ Мозамбиктен Ка́рмен дээди эртем чокка чуртталгага чедиишкин болдунмас деп бодап чораан. Ынчангаш ол университеттиң архитектура факультединче кирип алган. Ол мынча дээн: «Өөредилгемге ынак-даа болзумза, кичээлим 7:30-ден кежээ 18:00 шакка чедер болгаш, ынаар-ла үем, күжүм үнүп каар турган. Чыышче четтигери берге болган. Түңнелинде Бурган-биле найыралым кошкай берген. Ынчан ийи дээргиге бараалгаарын кызып келгенимни билип каан мен» (Мф. 6:24). Кармен мөргүп, ном-дептеривисти шинчилеп турган. «Удуртукчулар-биле, авам-биле сүмелешкеш, эгелекчилээр дээш, университеттен үнер деп шиитпирлээн мен. Ёзулуг шын шиитпир үндүргенимге бичии-даа хараадавас-тыр мен» — деп ол үлешкен.

14. Моисей биле Давид сөөлгү сөстери-биле кандыг кол бодалды чедириксээнил?

¹⁴ Моисей биле Давид Иеговага ынак болгаш, ону дыңнаары чугула деп билир турган. Ынчангаш сөөлгү чагыгларынга арттырган үлегерин эдерип, Бурганга бердинген болурунче өске бараалгакчыларны олар кыйгырган. Иеговадан хая көрүнген улус, ооң ээ көрүүшкүнүн, аазаан йөрээлдерин албас деп сагындырганнар. Ол сөстер амгы үеде база күштүг. Чүс-чүс чылдар эрткенде, Иегованың база бир бараалгакчызы Бурганга шынчы болурунуң чугулазын көргүскен.

МЕҢЭЭ ООН АРТЫК ӨӨРҮШКҮ ТУРБАС

15. Иоанн элчин узун назынында чүнү көрген?

¹⁵ Иоанн Иисус Христостуң чоок эжи, элчини чораан (Мф. 10:2; Ин. 19:26). Дээргизи-биле кады ол хөй суртаалдап, ооң хуулгаазыннарын көрүп, берге үелерде эжин деткип турган. Иоанн Иисустуң шаажылалын база ооң дирлип келгенин көрген. Бичежек христиан бөлүк улуг чыыш апарганын, а өөрүшкүлүг медээни «Бурганның бүгү чаяалгазынга медеглээн[ин]» база ол элчин көрген (Кол. 1:23).

16. Иоанның чагаалары эрткен үеде кымны деткээн, а бистиң үеде кымны деткип турарыл?

¹⁶ Иоанн чуртталгазының төнчүзүнде Библияның бижилгезинге киришкен. Иисус Христостуң сонуурганчыг ажыдыышкынын, дөрт өөрүшкүлүг медээниң бирээзин база үш чагааны ол бижээн (Ажыд. 1:1). Иоанн үшкү чагаазын, оглу дег ынак, шынчы бараалгакчыга Гаийге тураскааткан (3 Ин. 1). Иоанн шак ындыг ада минниишкиннерин чыышта өске-даа христианнарга илереткен. Ол назылай берген бараалгакчының чагаалары амгы үеде Иисустуң өөреникчилерин быжыктырып турар.

17. 3 Иоанн 4-тен алырга, улуг өөрүшкү чүден хамааржыр?

¹⁷ Иоанн чагааларынга чүнү бижээн? (Номчуптуңар: 3 Иоанн 4.) Бурганга дыңнангыр болуру өөрүшкү эккээрин Иоанн чугаалап турган. Үшкү чагаазын бижээн үеде, меге өөредиглер тарадыр, чыышка аңгылажыг үндүрер улус тыптып эгелээн. Ынчалза-даа шынчызы-биле «алыс шынның изин истээн» улус база турган. Олар Иегованы дыңнап, «Адавыстың чагыгларын ёзугаар» амыдырап чораан (2 Ин. 4, 6). Ол шынчы христианнар чүгле Иоанны эвес, а Иегованы база өөрткен (У. ч. 27:11).

18. Иоанның сөстери бисти чүү чүвеге өөредип турар?

¹⁸ Биске кандыг кичээл бар? Шынчы чорук өөрүшкү эккээр (1 Ин. 5:3). Чижээ, Иегованы өөрткеш, аас-кежикти миннир бис. Ооң хоойлулары-биле чурттап, бо делегейниң күткүлгелеринден ойталаар болзувусса, Бурган биле дээрде ангелдер өөрүүр (У. ч. 23:15; Лк. 15:10). Акы-угбаларывыс күткүлгелерге-даа, истеп сүрүүшкүннерге-даа таварышкаш, Бурганга шынчы артып турары база өөрүнчүг (2 Фес. 1:4). А кажан Эрликтиң делегейи ис чок чиде бээрге, Иеговага бердинген артканывыс дээш, өөрүп хөглээр бис.

19. Рейчел өске улусту алыс шынга өөредип тургаш, чүнү миннип турар? (Чурукту база көрүңер.)

¹⁹ Улуска Иегованың дугайында чугаалааш, тускай өөрүшкүнү миннип турар бис. Доминикан Республикадан Ре́йчел улуска Бурганның бараалгакчылары апаарынга дузалажыр хүндүнү дыка үнелээр. Ол өөредип турар улузунуң дугайында мынча дээн: «Иеговага олар ынак апарып, аңаа идегеп база чуртталгазын өскертиринге белен болганынга дыка-ла өөрүүр-дүр мен. Ону көргеш, бүгү үндүрген күжениишкиннерим болгаш чидириглерим хилис эвес деп билир мен».

ШЫНЧЫ БАРААЛГАКЧЫЛАРНЫҢ СӨӨЛГҮ СӨСТЕРИНГЕ КИЧЭЭНГЕЙЛИГ БОЛУҢАР

20. Моисей, Давид, Иоанн-биле бистиң аравыста ниити чүү бар?

²⁰ Моисей, Давид болгаш Иоанн бурунгу үеде чурттап чораан болгаш, байдалы бистен дыка ылгалдыг. Ынчалза-даа ниити чүүлүвүс хөй. Олар база бистиң чүдүп чоруур алыс шын Бурганывыска бараалгап чораан. Иеговага идегеп, дузаны болгаш сүмени дилеп мөргүп турганнар. Бис база шак ынчаар кылып турар бис. Дыңнангыр чоруу дээш, Иегова ол эр улусту йөрээген. Бис база шаңналывыс бар деп бүзүрээр бис.

21. Моисей, Давид, Иоанның сөстеринге кичээнгейлиг болган улусту чүү манап турар?

²¹ Мерген угаанныг, дуржулгалыг үш бараалгакчы Иегованың дүрүмнерин сагыырынче бисти кыйгырып турар. Бис база ынчаар кылып чоруулуңар. Ынчан каяа-даа ёзулуг чедиишкинниг болур бис. Чуртталгавыс узун — төнчү чок апаар, өөрүшкү-биле долар, чүге дизе дээрде Адавыс бис дээш амыраар (Ы. х. к. 30:20). Ол бүгү аазаашкыннарын күзээнивистен артык күүседир (Эф. 3:20).