Иегованың ады Иисуска кандыг уткалыг?

1, 2. а) Өлүрүнүң бетинде кежээни Иисус канчаар эрттирген? б) Бо статьяга кандыг айтырыгларны сайгарар бис?

ОРАЙ кежээ, четвергте, б. э. 33 чылдың нисан 14-те, удавас ону садыптар, шиидер, буруудадыр, эриидээш шаажылап каар деп, Иисус билир. Ол Иерусалимде бир бажыңның кырыккы каъдында шынчы элчиннери-биле кады олурар. Тускай кежээки чем доозулган. Иисус өөреникчилеринге хөй буянныг сөстерни чугаалааш, бажыңдан үнериниң бетинде мөргээн. Ол чугула мөргүл Иоанның номунда 17-ги эгеде бижиттинген.

² Ол кежээ Иисустуң бодалдарын ооң мөргүлү канчаар көргүскен? Чер кырынга бүгү бараалгалының дургузунда аңаа чүү эң-не чугула турган? Ол айтырыгларның харыыларын сайгарыптаалыңар.

«СЭЭҢ АДЫҢНЫ АЖЫДЫП БЕРДИМ»

3. «Сээң адыңны ажыдып бердим» дээни-биле, Иисус чүнү чугаалаксааныл? (Иоанн 17:6, 26).

³ «Сээң адыңны ажыдып бердим» — деп, Иисус мөргүп турган. Ол бодалды мөргүлүнге ийи катап чугаалаан. (Номчуптуңар: Иоанн 17:6, 26.) Ооң-биле чүнү чугаалаксааныл? Өөреникчилери еврейлер болгаш, Бурганның ады Иегова деп билир турган. Еврей Бижилгелерде ол атты муң-муң катап бижээн. Оон алырга, Иисус ол аттың эдилекчизин улуска таныштырып чораан. Иегованың күзел-бодалдарын, ажыл-херектерин база шынарларын эки билип алырынга, Иисус өөреникчилеринге дузалажып чораан. Ол Иегованы кымдан-даа артык эки билир.

4, 5. а) Бир кижиниң ады биске канчаар чаа уткалыг апарып болур? Чижекти чугаалаңар. б) Иисустуң өөреникчилери Иегованы чүнүң ачызында эки билип ап турган?

⁴ Кым-бир кижиниң ады биске канчаар чаа уткалыг апарып болур? Мындыг байдалды сагыштаалап көрүңер. Чыыжыңарда Александр деп аттыг удуртукчу — хирург дижик. Ол акывысты хөй чылдар ишти таныыр силер. Бир катап силерге эмчи дузазы херек апаарга, ол кезиишкин кылгаш, амы-тыныңарны камгалап каан. Ол акывыстың адын дыңнааш-ла, силерге ооң буянын сактып кээр боор силер. Александр дээрге таныырыңар удуртукчунуң анаа-ла ады эвес, а силерни өлүмден камгалаан эмчиңер ады болур.

⁵ Ооң-биле дөмей Иисустуң өөреникчилери Иегованың адын эки билир чораан. Ынчалза-даа Иисустуң бараалгалының ачызында ол ат ханы уткалыг апарган. Чүге ынча деп болурул? Чүге дизе Иисус бүгү талазы-биле Адазы ышкаш алдынып чораан. Иисустуң канчаар өөредирин, өске улуска хамаарылгазын көргеш, өөреникчилери Иегованы оон-даа эки билип ап турган (Ин. 14:9; 17:3).

«МЕҢЭЭ БЕРГЕНИҢ... АДЫҢНЫҢ КҮЖҮ-БИЛЕ»

6. Иегова бодунуң адын Иисуска кандыг уткалыг берген? (Иоанн 17:11, 12).

⁶ Иисус өөреникчилери дээш: «Ыдыктыг Адам! ...Меңээ бергениң Бодуңнуң адыңның күжү-биле оларны кадагалап көр» — деп мөргээн. (Номчуптуңар: Иоанн 17:11, 12.) Ынчаарга Иисустуң ады Иегова апаар бе? Чок. Иисус: «Адыңның күжү-биле» дээн болгай (Ин. 5:43; 10:25). Бурган адын Иисуска кандыг уткалыг берген? Иисус Иегованың төлээзи болгаш, ооң адындан чугаалаар турган. А черге чорааш, Адазының адындан кайгамчык ажыл-херектерни кылып турган. Иисустуң адының утказы «Иегова — камгалал». Оон алырга, Бурган биле Иисустуң аттары сырый харылзаалыг.

7. Иисус чүге Иегованың адындан чугаалап болур турган? Чижекти чугаалаңар.

⁷ Чижээ, президентиниң төлээзи өске чурттарга баргаш, ооң адындан чугаалаар. Ооң сөстери президентиниң бодунуң сөстери дег күштүг боор. Шак ынчаар Иисус Иегованы төлээлеп, улус-биле ооң адындан чугаалажып турган (Мф. 21:9; Лк. 13:35).

8. Иисус черже кээриниң бетинде Иегованың адындан канчаар төлээлеп турган? (Хосталыышкын 23:20, 21).

⁸ Библияда Иисусту Сөс деп адаан, чүге дизе Иегова ангелдерге база кижилерге медээни, айтыышкыннарны ону таварыштыр дамчыдып турган (Ин. 1:1—3). Кургаг ховуга израильчилер дээш сагыш човап турган ангел дээрге Иисус болганы чугаажок. Ол ангелди «Мээң өмүнээмден айбылаткан»a дээни-биле, Иегова израиль чонну, аңаа дыңнангыр болурунче кыйгырганы көскү. (Номчуптуңар: Хосталыышкын 23:20, 21.) Шак ынчалдыр Иегова Иисусту төлээзи деп тода көргүскен. Адазының адын камгалаар, ыдыктаар хемчегде Иисус кол черни ээлеп турар.

«АДАМ! БОДУҢНУҢ АДЫҢНЫ АЛДАРЖЫТ-ЛА»

9. Иегованың ады Иисуска дыка чугула деп кайыын көскү?

⁹ Черже кээриниң бетинде-ле, Иисуска Иегованың ады дыка чугула турган. Бурганның адынга хамаарылгазы өскерилбээни ооң черге ажыл-херээнден көскү. Бараалгалы доостур мурнунда Иисус Адазындан: «Бодуңнуң адыңны алдаржыт-ла» — деп дилээн. Адазы ол дораан дээрден ыыткыр үн-биле: «Алдаржыткан мен, ам-даа алдаржыдар мен!» — деп харыылаан (Ин. 12:28).

10, 11. а) Иисус Иегованың адын канчаар алдаржыткан? (Чурукту база көрүңер.) б) Иегованың ат-алдарын чүге ыдыктап, камгалаар ужурлуг бис?

¹⁰ Иисус база Адазының адын алдаржыдып чораан. Канчаар? Бурганның кайгамчык шынарларын болгаш ажыл-херектерин өске улуска ол чугаалап турган. Оон аңгыда, Иисус Иегованың адын ыдыктап, ат-алдарын камгалап чораанb. Ооң чугулазын өөреникчилеринге мөргүүрүн өөредип тургаш: «Дээрде Адавыс! Сээң ыдыктыг адың алдаржызын!» деп сөстери-биле көргүскен (Мф. 6:9).

¹¹ Эрлик Эдем сесерлиинге Иегованың адын нүгүлдээн. Ынчангаш бис ооң адын арыглап, камгалаар ужурлуг бис. Эрлик Адам биле Евага оларны Иегова мегелеп турар, бир-ле эки чүүлдү бербээн дээн (Э. д. 3:1—5). Ынчалдыр Эрлик Иегованы шын эвес чүве кылып турар деп буруудаткан. Ооң-биле Эрлик Иегованың буянныг адын бужартаткан. А Иовтуң үезинде Эрлик кижилерни Иеговага боттарының ажыын сүрүп бараалгап чоруур деп чугаалаан. Оон аңгыда, нүгүлчү Эрлик: «Чаңгыс-даа кижи Иеговага херек кырында ынак эвес база бергелерге таваржы бергеш, кижилер аңаа бараалгавайн баар» — дээн (Иов 1:9—11; 2:4). Иегова биле Эрликтиң кайызы мегечи деп тодарадырынга үе херек турган.

«АМЫ-ТЫНЫМНЫ БЕРИП ТУР МЕН»

12. Иегованың адынга ынакшылын көргүзер дээш, Иисус чүнү кылырынга белен болган?

¹² Иисус Иеговага ынак болгаш, Адазының буянныг адын ыдыктап, камгалаар дээш бүгү күжүн үндүрүп турган. Иисус: «Амы-тынымны берип тур мен» — дээн (Ин. 10:17, 18). Иегованың ады дээш, ол өлүрүнге безин белен турганc. Тергиин Адам биле Ева Бургандан хая көрүнгеш, Эрликтиң талазын шилип алганнар. Оларга көөрде, Иисус эки туразы-биле черже келгеш, бүгү чуртталгазында Адазынга ынакшылын бадыткаан (Евр. 4:15; 5:7—10). Чагыга хилинчектиг өлүмүнге чедир безин, Бурганга бердинген арткан (Евр. 12:2). Шак ынчаар ол Иеговага болгаш ооң адынга ынакшылын бадыткаан.

13. Эрликти мегечи деп чүге Иисус эң-не дээре кылдыр бадыткап шыдаан? (Чурукту база көрүңер.)

¹³ Иисус бүгү чуртталгазы-биле Иегованы эвес, а Эрликти мегечи деп шынзыткан (Ин. 8:44). Ол Иегованы дээрге-даа, черге-даа чурттап чораан кижилерден артык эки билир турган. Бир эвес Иеговага удур Эрликтиң буруудадыышкыннарында бичии-ле шын турган болза, Иисус билир ийик. Ынчалза-даа Иеговага долузу-биле бүзүрелдиг болгаш, Оглу ооң буянныг адын төнчүзүнге чедир камгалаан. Иегова Иисусту каапкан ышкаш байдалда безин, шынчы арткаш, ол өлүрүнге белен болган (Мф. 27:46)d.

«ДААСКАН АЖЫЛ-ХЕРЭЭҢНИ КҮҮСЕТКЕШ, МЕН СЕНИ... АЛДАРЖЫТТЫМ»

14. Иегова Иисусту шынчызы дээш канчаар шаңнаан?

¹⁴ Иисус өлүрүнүң мурнунда кежээ, Иеговага: «Дааскан ажыл-херээңни күүсеткеш, Мен Сени... алдаржыттым» — деп чугаалаан. Иегова шынчызы дээш шаңнаар деп, Иисус чигзинмээн (Ин. 17:4, 5). Бердингени дээш, Иегова Иисусту өлүмден хостап алган (Аж.-ч. 2:23, 24). Оглун диргискеш, өрү дээрге эң-не бедик эргени берген (Флп. 2:8, 9). Соонда Иисус Бурганның Чагыргазының Хааны апарган. Ол Чагырга чүнү кылыптар? Ол айтырыгга харыыны үлегерлиг мөргүлден номчуп турар бис: «Сээң Чагыргаң чедип келзин. Дээрге дег, черге база Сээң күзел-сорууң чогуп бүтсүн» (Мф. 6:10).

15. Келир үеде Иисус чүнү кылыр?

¹⁵ Удавас Иисус Бурганның дайзыннары-биле дайылдашкаш, Армагеддонга каржы улусту узуткаар (Ажыд. 16:14, 16; 19:11—16). Ооң соонда Эрликти «тамыже» октаптарга, өлүмге дөмей байдалга ол чүнү-даа кылып шыдавас (Ажыд. 20:1—3). Муң чыл башкарылгазының үезинде Иисус бүгү черге тайбыңны тургузуптар, кижилерге катап тергиин апаарынга дузалаар. Ол чок апарган улусту диргизер, черге дываажаңны эгидер. Шак ынчаар Иегованың күзел-соруу күүсеттинер! (Ажыд. 21:1—4).

16. Муң чыл башкарылганың соонда чуртталга кандыг болур?

¹⁶ Муң чылдың соонда бачыт чок чуртталганы сагыштаалап көрүңер даан. Кижилер төлевирни таварыштыр өршээл дилевес апарган. Чагдырган бараалгакчыларның дузазы доозулган, чүге дизе кижилерниң Бурган-биле харылзаазы долузу-биле катап эгиттинген. «Сөөлгү дайзын» өлүм узуткаттырган. А өлген улус дирлип келген. Шупту черде кижилер тергиин (1 Кор. 15:25, 26).

17, 18. а) Муң чыл башкарылганың төнчүзүнде кандыг чедиишкиннер болур? б) Иисус чагыргазының төнчүзүнде чүнү кылыр? (1 Коринфичилерге 15:24, 28). (Чурукту база көрүңер.)

¹⁷ Муң чыл башкарылганың соонда ёзулуг онзагай чүүл болур! Иегованы ыдыктыг болгаш чөптүг Бурган деп кым-даа кажан-даа чигзинмес. Чүге? Эдем сесерлиинге Эрлик Иегованы мегечи, кижилерге ынак эвес деп буруудаткан. Ындыг-даа болза, Иеговага ханы хүндүткелдиг улус шупту үелерде турган. Бурганның башкарылгазы эң-не эки деп оларның чуртталгазы бадыткаан. Муң чыл башкарылганың төнчүзүнде Иегованың ады долузу-биле арыглаттынар. Ол бодун ёзулуг ынакшылдыг Ада деп шынзыдар.

¹⁸ Түңнелинде Эрликтиң Иеговага удур буруудадыышкыннары меге деп кезээ-мөңгеде бадыткаттынар. Иисус чагыргазының төнчүзүнде чүнү кылыр? Эрлик дег, Иеговага удур тура халыыр бе? Чок. (Номчуптуңар: 1 Коринфичилерге 15:24, 28.) Иисус Адазынга хаан эргезин эгидип бергеш, Иеговага чагыртыр. Эрликке бодаарга, Иисус Адазынга ынак болгаш, бүгү эрге-чагыргадан ойталаарынга белен.

19. Иегованың ады Иисуска чүнү илередип турар?

¹⁹ Бодунуң адын Иисуска бээр дээн Иегованың күзелинде кайгамчык чүве чок! Бурган Оглун бодунуң төлээзи кылдыр томуйлап каарга, ол даалгазын дыка эки күүсеткен. Иисуска Иегованың ады кайы хире чугулазын бо статьядан көрдүвүс. Ол Адазы дээш амы-тынын харам чокка өргээн. Муң чыл башкарылганың соонда Оглу бүгү эргезин Иеговага өөрүшкүлүг эгидип бээр. Иисусту канчаар өттүнүп болур бис? Ону дараазында статьяга сайгарар бис.