ӨӨРЕНИР СТАТЬЯ 23
ЫРЫ 2 Сээң адың — Иегова
Иегованың ады биске кандыг уткалыг?
«„Силер мээң херечилерим силер“, — деп, Иегова чугаалап тур» (ИСА. 43:10, ЧД).
КОЛ БОДАЛ
Иегованың адын канчаар ыдыктап, камгалап болур бис?
1, 2. Иисуска Иегованың ады чүден-даа артык чугулазы кайыын көскү?
ИИСУСКА Иегованың адындан артык чугула чүве турбаан. Ол Адазының адын өске улуска ажыдып берген. Иегова ыдыктыг база кажан-даа шын эвес чүүл кылбас деп бадыткаар дээш, Иисус амы-тынын бергенин мурнунда статьядан билип алган бис (Мк. 14:36; Евр. 10:7—9). Иисус бүгү алдар-макталды Адазынга чедириксээр, ынчангаш Муң чыл башкарылгазының төнчүзүнде Иеговага чагырар эргезин хүлээдип бээр (1 Кор. 15:26—28). Иегованың адынга ол хире хүндүткелдиг хамаарылгазындан Адазынга Иисустуң күштүг ынакшылы көскү.
2 Иисус черже Иегованың адындан келген (Ин. 5:43; 12:13). Ол бодунуң өөреникчилеринге Бурганның адын ажыдып берген (Ин. 17:6, 26). Адазының адындан ол өөредип, хуулгаазыннарны база кылып турган (Ин. 10:25). Иисус өөреникчилерин карактаар кылдыр Иеговага мөргүп тура, бодунуң ады дээш ону кылырын Адазындан дилээн (Ин. 17:11). Иисуска Адазының ады дыка чугула турганы көскү. Иисустуң алыс шын эдерикчизи канчап ооң Адазының адын билбес база ажыглавас боорул?
3. Бо статьяга чүнү сайгарар бис?
3 Христианнар болганывыста Иисустуң үлегерин эдерип, ооң Адазының адынга ынак болгаш ону хүндүлээр бис (1 Пет. 2:21). Бурганның Чагыргазының дугайында өөрүшкүлүг медээни суртаалдап турар улус чүге Иегованың адын эдилээрин бо статьяга көөр бис (Мф. 24:14). Оон аңгыда, бистиң кижи бүрүзүнге ооң ады кандыг хамаарылгалыын чугаалажыр бис.
МЭЭҢ АДЫМНЫ ЭДИЛЭЭН ЧОН
4. а) Дээрже чоруурунуң бетинде Иисус өөреникчилеринге кандыг даалга берген? б) Улаштыр кандыг айтырыгны сайгарар бис?
4 Дээрже чоруурунуң бетинде Иисус өөреникчилеринге: «Ыдыктыг Сүлде силерже бадып кээрге, күчү-күштү хүлээп алгаш, Иерусалимге, бүгү Иудеяга, Самарияга база чер-делегейниң кыдыынга чедир Мээң херечилерим боор силер» — деп чугаалаан (Аж.-ч. 1:8). Ол сөстер өөрүшкүлүг медээниң Израильден дашкаар нептерээрин база өске чоннардан улус Иисустуң өөреникчилери болур аргалыг апаарын көргүскен (Мф. 28:19, 20). Иисустуң: «Мээң херечилерим боор силер» дээни солун. Чаа өөреникчилер чүгле Иисустуң херечилери апаар бе азы олар Иегованың адын база билир ужурлуг бе? Ону Ажыл-чорудулга номунуң 15-ки эгезинден билип ап болур.
5. Иерусалимге элчиннер биле удуртукчуларның ужуражылгазы шупту кижилер Иегованың адын билип алыр ужурлуун канчаар көргүскен? (Чурукту база көрүңер.)
5 Элчиннер биле удуртукчулар б. э. 49 чылда: «Христиан болуксаар еврей эвес улус кыртыжап демдектээр ёзулалды кылыр ужурлуг бе?» деп чугула айтырыгны сайгарар дээш, Иерусалимге чыглып келгеннер. Ужуражылга төнерге, Иисустуң кады төрээн дуңмазы: «Бурган эң баштай өске чоннар улузунче ээ көрүп, Бодунуң адын хүндүлээр кылдыр, оларның аразындан улусту шилип алганын... Пётр биске чугаалады» — дээн. Иаковтуң улаштыр чугаалааны Амостуң сөстеринден ол ат көскү: «Кижи төрелгетен артынчызы — Мээң адымны эдилээн бүгү өске чоннар Дээрги-Чаяакчыже чүткүп эгелээр. ...[Иегова] ынча деп турар-дыр» (Аж.-ч. 15:14—18). Чаа өөреникчилер Иегованың адын билиринден аңгыда, ооң адын эдилээр ужурлуг турган. Ол дээрге кижилер христианнарны ол ат-биле танып алыр база олар улуска ол атты ажыдып бээр дээн уткалыг.
Бирги векте удуртукчу чөвүлелдиң ужуражылгазынга христианнар Бурганның адын эдилээр чон болур ужурлуун тода билип кааннар (абзац 5).
6, 7. а) Иисус чер кырынга кандыг сорулгалыг келген? б) Иисустуң мурнунга оон-даа чугула кандыг даалга турган?
6 Иисустуң ады — «Иегова камгалал» деп уткалыг. Бүзүрелди илередип чоруур шупту улусту Иегова чүгле Иисусту таварыштыр камгалаар. Иисус черже кижилер дээш, амы-тынын бээри-биле келген (Мф. 20:28). Ооң берген төлевириниң ачызында бачыттарывыс өршээдип, мөңге чурттап болур бис (Ин. 3:16).
7 Чүге кижилерге төлевир херек? Ол чүүл Эдем садынга болган болуушкун-биле холбаалыг. Адам биле Ева Иеговага удурлангаш, мөңге чурттаар аргазын чидирипкенин эрткен статьяга сайгардывыс (Э. д. 3:6, 24). Ынчалза-даа Иисус черже чүгле кижи төрелгетенни камгалаар дээш келбээн. Эрлик Бурганның адын карарткан. Ынчангаш ол Иегованың адын ыдыктаар оон-даа чугула даалгалыг турган (Э. д. 3:4, 5). Бүгү кижилер Бурган кезээде чөптүг, ынакшылдыг Ада деп билип алыр ужурлуг. Иисус Иегованың төлээзи болгаш, шупту чүвени ооң күзел-соруу ёзугаар кылган. Ынчангаш ол Иегованың адын, кымдан-даа артык, ыдыктап шыдаан.
Иисустуң алыс шын эдерикчизи канчап ооң Адазының адын билбес база ажыглавас боорул?
8. Иисустуң шупту өөреникчилери чүнү билир ужурлуг турган?
8 Иисустуң шупту өөреникчилеринге камгалал ооң Адазы, Иегова Бургандан кээрин билири чугула турган (Ин. 17:3). Оон аңгыда, олар Иисус ышкаш Иегованың адын хүндүлеп, эдилээри, ыдыктаары кайы хире чугулазын база камгалалы оон хамааржырын билир ужурлуг турган (Аж.-ч. 2:21, 22). Ынчангаш Иисустуң өөреникчизи болуксаар шупту улуска Иегованы база билип алыры херек турган. Иоанн 17-ги эгеде бижээн мөргүлүнүң төнчүзүнде Иисус: «Сээң Меңээ ынакшылың дег... ынакшыл оларга турзун дээш база Мээң олар-биле сырый харылзаалыг болурум дээш, Мен Сээң адыңны оларга ажыдып берген мен база ам-даа ажыдар мен» деп сөстерни чугаалааны кайгамчык эвес (Ин. 17:26).
«МЭЭҢ ХЕРЕЧИЛЕРИМ СИЛЕР»
9. Иисустуң шупту ёзулуг өөреникчилери чүнү кылыр ужурлуг?
9 Иисустуң ёзулуг өөреникчилеринге Иегованың адын ыдыктаары чугула (Мф. 6:9, 10). Ооң ады биске өске аттардан эң-не бедик боор ужурлуг. Иегованың адын канчаар ыдыктаар? Эрликтиң Бурганга удур буруудадыышкыннарын меге деп канчаар бадыткап болур бис?
10. Исайя номунуң 42—44 эгелеринде кандыг шииткелди көргүскен? (Исайя 43:9; 44:7—9). (Чурукту база көрүңер.)
10 Исайя номунуң 42—44 эгелеринден Иегованың адын канчаар ыдыктап болурун билип алыр бис. «Кым алыс шын Бурганыл?» деп айтырыгны сайгарган доора уткалыг шииткелди ында бижээн. Оон алырга, аңаа чүдүвейн турар улусту оларның бурганнары херек кырында бар деп бадыткаарынче Иегова кыйгырган. Оон аңгыда, бурганнарны бадыткаар херечилерни кыйгырарга, чок болган! (Номчуптуңар: Исайя 43:9; 44:7—9.)
Аксы-сөзүвүс, ажыл-херээвис-биле Иегова — алыс шын Бурган деп бадыткап турар бис (абзац 10, 11).
11. Исайя 43:10—12-де Иегова бараалгакчыларынга чүнү чугаалап турарыл?
11 Номчуптуңар: Исайя 43:10—12. Иегова бодунуң бараалгакчыларынга: «Мээң херечилерим — силер силер... Мен — Бурган мен» — дээн. Оон олардан: «Менден өске Бурган бар бе?» — деп, Иегова айтырган (Иса. 44:8). Ол айтырыгга харыылаар улуг алдар-хүндүнү алган бис. Иегова — дың чаңгыс алыс шын Бурган деп ажыл-херээвис-биле бадыткап турар бис. Ооң ады өске бүгү аттардан эң-не бедик. Иеговага ёзулуг ынакшылывысты чуртталгавыс-биле көргүзүп чоруур бис. Эрлик бисче канчаар-даа халдаарга, Бурганга бердинген арткаш, ооң адын ыдыктаарынче үлүүвүстү киирип турар бис.
12. Исайя 40:3, 5-те өттүр сөглээн медеглел канчаар күүсеттинген?
12 Исайя медээчи Иегованың оруун белеткээр кижи чедип кээр деп база өттүр медеглээн (Иса. 40:3). Ол медеглел канчаар күүсеттинген? Иоанн медеглекчи Иисустуң оруун белеткеп каан. А херек кырында ол Иеговага орукту белеткеп каан, чүге дизе Иисус Иегованың адындан келген (Мф. 3:3; Мк. 1:2—4; Лк. 3:3—6). Ол-ла медеглелде: «Дээрги-Чаяакчының өндүр чырыы ажыттынып кээр» деп чугаалаан (Иса. 40:5). Ол сөстер канчаар күүсеттинген? Иисус Иегованың төлээзи болгаш, даалгазын дыка эки күүсеткен. Ооң ажыл-херээн көргеш, кижилер Иегованы дыка эки билип ап болур турган (Ин. 12:45).
13. Иисустуң үлегерин канчаар эдерип болур бис?
13 Иегованың ат-алдарын камгалаарда, Иисусту өттүнүп турар бис. Бис ол ышкаш, Иегованың Херечилери бис. Бурганның бараалгакчылары болгаш, ооң кайгамчык ажыл-херектерин шупту улуска чугаалап турар бис. Иисус Иегованың адын канчаар арыглаанын база өскелерге дамчыдар ужурлуг бис (Аж.-ч. 1:8). Иисус — Иегованың кол Херечизи болганда, ооң үлегерин эдерер бис (Ажыд. 1:5). Иегованың ады бистиң кижи бүрүзүнге чүнү илереткенин, көрээлиңер.
ИЕГОВАНЫҢ АДЫ БИСКЕ КАНДЫГ УТКАЛЫГ?
14. Ырлар 104:3-ке дүүштүр Иегованың адынга кандыг хамаарылгалыг бис?
14 Иегованың адын чоргаарал-биле чугаалаар бис. (Номчуптуңар: Ырлар 104:3.) Иегова бисти ооң адын ажыглап, мактанырывысты күзеп турар (Иер. 9:23, 24; 1 Кор. 1:31; 2 Кор. 10:17). Ооң ады-биле мактаныры дээрге Бурганывыска чоргаарланыры-дыр. Иегованың ат-алдарын камгалаары, ону ыдыктыг Бурган деп улуска чугаалаары биске улуг алдар-хүндү. Ынчангаш кады ажылдап турар улузувуска, чаңгысклассчыларывыска, кожаларывыска база өске-даа улуска Иегованың Херечилери бис деп чугаалаарындан ыятпас ужурлуг бис. А Эрлик ону кылырынга шаптыктап турар (Иер. 11:21; Ажыд. 12:17). Иегованың адын кижилер уттуптарын Эрлик күзеп чоруур (Иер. 23:26, 27). Ынчалза-даа бис Иеговага ынак бис база арга тыптып кээрге-ле, ооң адын алгап-мактаар бис (Ыд. ыр. 5:12; 88:17).
15. Иегованың адын кыйгырары дээрге кандыг уткалыг?
15 Иегованың адын кыйгырып турар бис (Иоил 2:32; Рим. 10:13, 14). Иегованың адын кыйгырары дээрге, анаа-ла ооң адын адап, билиринден аңгыда, аңаа бүзүреп, оон удуртулганы болгаш дузаны дилээри болур (Ыд. ыр. 19:8; 98:6; 114:4; 144:18). Оон аңгыда, өске улуска Бурганывыстың адын база ооң кайгамчык шынарларын чугаалап турар бис. Кижилер Иегованы өөртүп, камгаланып алзын дээш, чуртталгазын өскертиринге оларга дузалажып турар бис (Иса. 12:4; Аж.-ч. 2:21, 38).
16. Эрлик — мегечи деп канчаар бадыткап болур бис?
16 Иегованың ады дээш бергелерни шыдажырынга белен бис (Иак. 5:10, 11). Шенелделер үезинде безин Иеговага шынчы арткаш, Эрлик — мегечи деп бадыткап турар бис. Иовтуң үезинде Эрлик Бурганның бараалгакчыларынга удур мындыг буруудадыышкын үндүрген: «Амы-тыны дээш кижи бодунда бар-ла чүвени бериптер» (Иов 2:4). Кижилер Иеговага чүгле эки үеде бараалгаар, а бергелерге таварышкаш Бурганны кааптар деп, Эрлик сөгленген. А Иов ооң сөстери меге деп шынзыткан. Бис база Эрликке шак-ла ындыг харыыны берип болур бис. Чуртталгавысты ол канчаар-даа бергедедип, шаптыктаарга, Иеговадан кажан-даа хая көрүнмес бис. Иегова бодунуң ады дээш, бисти камгалаар деп бичии-даа чигзинмес бис (Ин. 17:11).
17. 1 Пётр 2:12-ге дүүштүр Иегованың адын канчаар алдаржыдып болур бис?
17 Иегованың ады алдаржызын дээш, бүгү чүүлдү кылып турар бис (У. ч. 30:9; Иер. 7:8—11). Иегованы херечилеп турар болганывыста, ооң адын алдаржыдып азы бак атка киирип болур бис. (Номчуптуңар: 1 Пётр 2:12.) Ынчангаш Иегованы аксы-сөзүвүс, шын алдынарывыс-биле алдаржыдарын кызар бис. Бачыттыг-даа болзувусса, Иегованы шыдаар-ла шаавыс-биле алгап-мактаар бис.
18. Иегованың ады биске чугула деп оон ыңай канчаар бадыткап болур бис? (Немелде тайылбырны база көрүңер.)
18 Иегованың ады ат-сураавыстан чугула (Ыд. ыр. 137:2). Бис Иеговага ынак болгаш, ооң хоойлуларын сагып чурттаарывыска улус аңаа таарзынмайн, бисти бо-ла бактаарa. Ооң-биле дөмей Иисусту кем-херек үүлгедикчизи кылдыр буруудадып каан база кижилер ону куду көрүп турган. Ынчалза-даа ол Адазының адын алдаржыдар дээш, өлүрүнге белен турган. Иисус өске улус мурнунга бак атка киреринден кортпаан (Евр. 12:2—4). Аңаа Иегованың күзел-соруун күүседири кол турган (Мф. 26:39).
19. Иегованың ады силерге кандыг уткалыг база чүге?
19 Иеговага бараалгап чоруурувуска чоргаарланыр бис. Ооң Херечилери деп адаттырары биске дыка улуг алдар-хүндү. Кандыг-даа чемелээшкинни ооң ады дээш шыдажырынга белен бис. Иегованың ады боттарывыстың ат-алдарывыстан чугула. Ынчангаш Эрлик биске шаптыктаар дээш кызып турза-даа, Бурганның адын улаштыр-ла алдаржыдаалыңар. Ынчалдыр биске, Иисус ышкаш, Иегованың адындан чугула чүве чок деп көргүзер бис.
ЫРЫ 10 Иегова Бурганывысты алдаржыдыңар!
a Иов ышкаш шынчы бараалгакчы безин, кажан ону үш эжи буруудады бээрге, бодунче хөй кичээнгейни салган. Ажы-төлүн, эт-хөреңгизин чидирип алгаш, Иов эгезинде «бачыт үүлгетпээн, Бурган дугайында багай чүве чугаалаваан» (Иов. 1:22; 2:10). Ынчалза-даа хууда ат-алдарын шүгүмчүлеткеш, ол угаан чок сөстер чугаалап эгелээн. Бурганның адын ыдыктап, камгалаарының орнунга, бодунче кичээнгей салган (Иов. 6:3; 13:4, 5; 32:2; 34:5).