«Чер дываажаң апаар!» — деп, Иегова быжыы-биле аазап турар

1. Исайя медээчи израильчилерге кандыг бодалды чедириксээн?

ИСАЙЯ медээчи Иегованы «алыс шынның Бурганы» дээн (Иса. 65:16, Чаа делегей). «Алыс шын» кылдыр очулдурган сөс дорту-биле «аминь» азы «ындыг-ла болзунам» дээн уткалыг. Иегова биле Иисустуң сөзүн албан тударын бадыткаарда, Библияда «аминь» деп сөстү бо-ла ажыглаар. Иеговага долузу-биле идегеп болур, ол аазаашкыннарын албан күүседир деп бодалды Исайя израильчилерге чедириксээн.

2. Бисте Иегованың аазаашкыннарынга бүзүрээр кандыг бадыткалдар бар база кандыг айтырыгларны сайгарар бис?

² Иегованың аазаашкыннарынга бүзүрээр үндезин бар бе? Исайяның соонда 800 хире чыл эрткенде, Павел элчин Бурганның шупту аазаашкыннары чүге бүзүрелдиин мынчаар тайылбырлаан: «Бурган... мегелеп шыдава[с]» (Евр. 6:18). Дустуг база дус чок сугнуң катай хаара акпазы-биле дөмей, Иегова, алыс шынның Бурганы, мегелеп шыдавас. Ооң шупту сөстери бүзүрелдиг. Бо статьяга мындыг айтырыгларны сайгарар бис: Иегова биске кандыг келир үени аазап турар? Ооң аазаашкыннары албан күүсеттинер деп чүге бүзүреп болур бис?

ИЕГОВА ЧҮНҮ ААЗАП ТУРАР?

3. а) Бурганның бараалгакчылары кайы медеглелге дыка ынак? (Ажыдыышкын 21:3, 4). б) Ол аазаашкынны чамдык улус канчаар хүлээп алыр?

³ Бурганның бараалгакчыларының дыка ынак өттүр билген медеглелин сайгарыптаалыңар. (Номчуптуңар: Ажыдыышкын 21:3, 4.) «Өлүм-даа, ыы-сыы-даа, ажыг-шүжүг-даа, аарышкы-даа турбас» үе чедип кээр деп, Иегова бүзүредип турар. Дываажаңга чуртталга кандыг болурун көргүзерде, ол сөстерни бо-ла номчуур бис. Чамдык улус ол аазаашкынны дыңнааш: «Тоол-даа ышкаш» — дээр.

4. а) Иегова чүнү өттүр сөглээн? б) Аазаашкын бээринден аңгыда, Иегова чүнү кылган?

⁴ Ажыдыышкындан медеглелди номчуп бээривиске, чамдык улуска аңаа бүзүрээри берге боорун Иегова билген (Иса. 42:9; 60:2; 2 Кор. 4:3, 4). Ажыдыышкын 21:3, 4-те бижээн үе албан кээринге, бодувусту болгаш өске улусту канчаар бүзүредип болур бис? Иегова ол аазаашкыннарга бүзүрээр чугула чылдагааннарны айыткан.

ИЕГОВАНЫҢ ААЗААШКЫНЫ БЫЖЫГ

5. Иегованың аазаашкынынга бүзүрээр чылдагааннар кайы шүлүктерде бар?

⁵ Черни дываажаң кылыр дээн аазаашкын соонда, Ажыдыышкын 21:5, 6-да Иегованың сөстеринге бүзүрээр чылдагааннарны бижээн: «Дүжүлгеде саадаан Бурган ынчан меңээ: „Көр! Хамык чүвени чаартып тур мен!“ — диди. Ол ооң соонда: „Ону бижи, ол болза шынныг болгаш бүзүрелдиг сөстер-дир“ — деп немеп кагды. Ол ооң соонда... мынча диди: „Боттанган-дыр! Мен Альфа болгаш Омега, эгези болгаш төнчүзү-дүр мен“».

6. Ажыдыышкын 21:5, 6-да сөстер Бурганның аазаашкынынга бүзүреливисти канчаар быжыктырып турар?

⁶ Ол библейжи шүлүктер Бурганның аазаашкынынга бүзүреливисти быжыглап турар. Ооң дугайында «Апогей Откровения» деп номда мынча дээн: «Келир үеде шынчы кижилерни йөрээрин аазаан документиде Иегова адын салганы-биле дөмей»b. Ажыдыышкын 21:3, 4 — Иегованың аазаашкыны, а дараазында ийи шүлүкте ол адын салган деп болур. Хол үжүү Бурганның сөзүнүң быжыын бадыткаан. 5, 6-гы шүлүктерни тодаргай сайгарып, чамдык чугула талаларынче кичээнгейни салыылыңар.

7. 5 дугаар шүлүктүң эгези чүзү-биле онзагай?

⁷ Ажыдыышкын номунда Иегова ангелди азы Иисусту таварыштыр эвес, а бодунуң чугааланганы үш таварылганы бижээн. Бирээзиниң эгезинде: «Дүжүлгеде саадаан Бурган» дээн (Ажыд. 21:5а). Ол сөстер улаштыр чугаалаан чүүлдүң кайы хире бүзүрелдиин көргүзүп турар. Чүге дизе Иегова «кажан-даа мегелеп көрбээн» (Тит. 1:1—2). Ынчалдыр 5-ки шүлүктүң эгези Ажыдыышкын 21:5, 6-да бижээн чүүлге долузу-биле бүзүреп болурун бадыткаан.

«КӨР! ХАМЫК ЧҮВЕНИ ЧААРТЫП ТУР МЕН!»

8. Иегова бодунуң аазаашкыны күүсеттине бээрин канчаар ылавылаан? (Исайя 46:10).

⁸ Ажыдыышкын номунда хөй катап таваржып турар: «Көр» деп сөстү сайгарыптаалыңар (Ажыд. 21:5). «Көр» деп очулдурган грек терминни, бир эртем ажылынга, номчукчунуң кичээнгейин хаара тудар арга деп тайылбырлаан. Иегова кичээнгейни хаара туткаш: «Хамык чүвени чаартып тур мен!» — дээн. Бурган келир үениң өскерлиишкиннерин ам болуп турар дег чугаалаан. Оон алырга, ооң аазаашкыны албан күүсеттинер. (Номчуптуңар: Исайя 46:10.)

9. а) Иегова шупту чүвени канчаар чаартыр? б) Бо үениң «чер», «дээри-биле» чүү болур?

⁹ «Хамык чүвени чаартып тур мен!» дээн сөстерниң бир талазын көрээлиңер. Иегова шупту чүүлдү канчаар чаартыр, чүнү солуур, а чүнү эде тургузар? Ажыдыышкын 21:1-де: «Биеэги дээр болгаш биеэги чер чиде берген» деп бижээн. «Биеэги дээр» — Эрликтиң салдарынга алыскан эрге-чагыргалар (Мф. 4:8, 9; 1 Ин. 5:19). Библияда «чер» деп сөс черниң чурттакчыларын база илередип болур (1 Чыл. 16:31; Ыд. ыр. 95:1). Ынчаарга, «биеэги чер» — бистиң үевисте кижи төрелгетенниң үрелген ниитилели. Иегова амгы «дээр» биле «черни» эде тургуспайн долузу-биле узуткааш, чаа чазак болгаш чаа кижилер ниитилелинге солуур.

10. Иегова чүнү катап тургузар?

¹⁰ Ынчалза-даа Иегова шупту чүвени солувас — чамдык чүүлдерни чаартыр, эде тургузар (Ажыд. 21:5). Иегова черни болгаш кижилерни экирткеш, тергиин байдалга эккээр. Исайя бистиң бөмбүрзээвисти чурумалдыг Эдем сесерлии дег апаарын чугаалаан. Кижи бүрүзү канчаар күш кирип, чаартынып эгелээнин билип каар. Аскак, согур болгаш дүлей улус кадык апаар, өлген улус безин дирлип кээр! (Иса. 25:8; 35:1—7).

ОЛ ШЫННЫГ БОЛГАШ БҮЗҮРЕЛДИГ СӨСТЕР БОТТАНГАН-ДЫР!

11. Иегова Иоаннга чүнү кылырын дааскан база чүге?

¹¹ Иегова өске кандыг бадыткал чугаалаан? Иоаннга ол мынчаар тайылбырлаан: «Ону бижи, ол болза шынныг болгаш бүзүрелдиг сөстер-дир» (Ажыд. 21:5). Даалганы дыңнангыр күүсеткени дээш, Иоаннга өөрүп четтирер-дир бис! Ооң ачызында Иегованың черни дываажаң кылыр аазаашкынын билир болгаш, келир үе дугайында сагыштаалап болур бис.

12. Иегова ол сөстерни чүге: «Боттанган-дыр!» дээн?

¹² Бурган улаштыр: «Боттанган-дыр!» дээни-биле черни бо үеде-ле дываажаң апарган кылдыр чугаалаан (Ажыд. 21:6). Иегова ынчаар чугаалаар эргелиг. Чүге дизе ооң күзел-бодалынга кым-даа, чүү-даа шаптыктап шыдавас. Аңаа чүге бүзүреп болурунуң база бир күштүг бадыткалын Иегова чугаалаан.

«МЕН ДЭЭРГЕ АЛЬФА БОЛГАШ ОМЕГА-ДЫР МЕН»

13. Иегова бодун чүге: «Альфа болгаш Омега-дыр мен» дээнил?

¹³ Ажыдыышкын номунда Иегова бодунуң чугаалаан сөстеринде: «Мен дээрге Альфа болгаш Омега-дыр мен» деп үш удаа катаптап турар (Ажыд. 1:8; 21:5, 6; 22:13). Альфа — грек алфавиттиң бир дугаар үжүү, а омега — сөөлгүзү. «Альфа болгаш Омега» дээни-биле Иегова эгелеп алган чүүлүн эчизинге чедирерин көргүскен.

14. а) Иегова доора уткалыг кылдыр кажан «Альфа» дээнин база кажан «Омега» дээрин тайылбырлаптыңар. б) Эге дөс 2:1—3-те кандыг быжыг аазаашкын бар?

¹⁴ Иегова Адам биле Еваны чаяап кааш, кижилерге болгаш черге хамаарыштыр күзел-бодалын чугаалаан: «Алгап-йөрээвишаан, Бурган оларга мынча дээн: „Өзүп-көвүдеңер, черниң кырын ээлеңер“» (Э. д. 1:28). Ол үеде, Иегова доора уткалыг «Альфа» деп чугаалаан. Адам биле Еваның дыңнангыр тергиин ажы-төлү бүгү черни дываажаң кылгаш, долдуруп ээлээр. Тодазы-биле тайылбырлаан күзел-бодалы бүде бээрге, Иегова доора уткалыг «Омега» деп чугаалаар. Чер биле дээрни чаяап кааш, ол-ла дораан шак-ла ынчаар болур деп аазаашкынны Эге дөс 2:1—3-те бижээн (номчуптуңар). Ында Иегова чедиги хүннү ыдыктыг деп чарлаан. Ынчалдыр ол хүннүң төнчүзүнде бодап алган чүүлүн чигзиниг чок күүседирин ол көргүскен.

15. Эрликтиң хайындан Бурганның күзел-бодалы чүге буураан ышкаш сагындырып болур?

¹⁵ Адам биле Ева Бурганга удурлангаш, бачыттыг апарганнар (Рим. 5:12). Ынчангаш олар ажы-төлүнге бачыт биле өлүмнү дамчыткан. Ынчаарга Иегованың күзел-бодалы бүтпээн база чер кырынга тергиин дыңнангыр кижилер чурттавас дээни ол бе? Эрлик дээш Иегова «Омега» деп чугаалап шыдавас деп бе? Эрлик Иегованы аргажок берге байдалче киирипкен мен база Бурган Адам биле Еваны узуткааш, өске ийи кижи чаяаптар деп бодаан чадавас. Иегова ынчалган болза, Эрлик Бурганны — мегечи деп чарлап болур ийик. Чүге дизе Эге дөс 1:28-тен алырга, Иегова Адам биле Евага, оларның салгалдары бүдүн черни ээлээр деп аазаан болгай.

16. Эрлик Иегованы ажыл-херээн төндүрүп шыдавас деп буруудадыптарынга чүге чигзинмээн?

¹⁶ Оон аңгыда Эрлик, Адам биле Евага ажы-төлдүг болурун Иегова чөпшээрээр-даа болза, олар кажанда-даа тергиин болбас деп идегээн чадавас (Эккл. 7:20; Рим. 3:23). Ынчан Эрлик Иегованы бодап алган чүүлүн эчизинге чедирип шыдавас деп буруудадып болур турган. Ынчаарга чер кырынга тергиин дыңнангыр кижилер чурттаар деп Бурганның күзел-бодалы күүсеттинмес ийик.

17. Иегова Эрликтиң планнарын канчаар буураткан база хамык чүве канчаар төнер? (Чурукту база көрүңер.)

¹⁷ Эрликтиң Иеговага удур хамык планнары бүтпээн (Ыд. ыр. 91:6). Бурган Адам биле Евага ажы-төлдүг болурун чөпшээрээрге, Эрлик Бурганны мегечи деп буруудадып шыдаваан. Эгелеп алган ажылын эчизинге чедирип шыдавас деп база буруудадыры болдунмаан. Чүге дизе Бурган Адам биле Еваның дыңнангыр ажы-төлүн камгалап аар дээш, төлевирни берген (Э. д. 3:15; 22:18). Иегованың ынакшылы ажык харавас болгаш, ындыг берге арганы шилип алыр деп бодал Эрликтиң бажынга канчап-даа кирбээн (Мф. 20:28; Ин. 3:16). Чүге дээрге Эрлик чүгле бодун бодаар. Төлевирниң ачызында чүү болдунар? Иисустуң Муң чыл башкарылгазының төнчүзүнде чер кырынга Адам биле Еваның дыңнангыр ажы-төлү чурттаар. Шупту чүве Бурганның эгезинде бодап кааны ышкаш апаар. Ынчан Иегова доора уткалыг «Омега» деп чугаалаар.

ИЕГОВАНЫҢ ААЗААШКЫНЫНГА БҮЗҮРЕЛДИ КАНЧААР БЫЖЫГЛААР?

18. Чер дываажаң апаарынга бисте кандыг бадыткал бар? («Иегованың аазаашкынынга бүзүрээр үш чылдагаан» деп көзенекти база көрүңер.)

¹⁸ Бо статьяга чер дываажаң апаар деп быжыг бадыткалдарны сайгардывыс. Бирээде, Иегова боду аазаашкын берген. Ажыдыышкын номунда: «Дүжүлгеде саадаан Бурган ынчан меңээ: „Көр! Хамык чүвени чаартып тур мен!“» дээн. Бурган мерген угаанныг, күштүг база аазаашкынын күүседир күзелдиг. Ийиде, Иегова бодунуң сөзүнге бүзүрелдиг болгаш: «Ол болза шынныг болгаш бүзүрелдиг сөстер-дир» база «Боттанган-дыр!» дээн. Үште, Иегова бир-ле ажыл-херек эгелээн болза, ыяап-ла төнчүзүнге чедирер. Чүге дизе ол бодун «Альфа болгаш Омега» деп адаар болгай. Эрликтиң мегечизин база Бурганның күзел-соруунуң күүсеттинеринге ол канчап-даа шаптыктап шыдавазын Иегова бадыткаан.

19. Бурган черни дываажаң кылдыр хуулдуруптарынга бүзүревес кижиге канчаар дузалап болур силер?

¹⁹ Суртаалга Бурганның аазаашкыннарын чугаалаан санында-ла бүзүрелиңер быжыгар деп утпаңар. Бир кижиге Ажыдыышкын 21:4-тү номчуп бээриңерге: «Тоол-даа ышкаш» дээр болза, чүнү канчап болур силер? 5, 6 дугаар шүлүктерни номчааш, тайылбырлап болур силер бе? Иегованың аазаашкыннары ыяап-ла күүсеттинер, чүге дизе ол адын салган болгай (Иса. 65:16).