Кажан-даа Иегованың удуртулгазынга бүзүреңер

1. Баштакчывыс Иегованы эдерери биске чүге чугула?

ШЫРГАЙ аргага аза бергениңерни сагыштаалап көрүңер даан. Черлик араатаннарга, оо-хоранныг курттарга болгаш караңгы ханы оңгарларга таваржып болур силер. Чаныңарга дуржулгалыг орук баштакчызы бар болза, чүден-даа кортпас ийик силер. Шыргай аргада ышкаш, бо делегейде Бурган-биле найыралывыска айыылдар хөй. Ынчалза-даа тергиин баштакчывыс Иегова бар. Ол оруувуска бисти камгалап, чаа делегейге мөңге чуртталгаже, сорулгавысче эдертип бар чыдар.

2. Иегова бисти канчаар башкарып турар?

² Иегованың бисти башкарып турар кол аргазы — ооң Сөзү, Библия. Чижээ, ол кижилерни ажыглап, «шынчы болгаш сарыылдыг чалчаны» таварыштыр биске ном-дептерлерни берип турар. Ооң ачызында мерген угаанныг шиитпирлерни хүлээп болур бис (Мф. 24:45). Оон аңгыда, Иегова кожуун хайгааракчылары, тус черде удуртукчулар дээн ышкаш дуржулгалыг акыларның дузазы-биле бергелерни ажып эртеринге херек удуртулганы берип, бисти деткип турар. Бо делегейниң төнчүзүнде идегелдиг удуртулга дээш, өөрүп четтирер-дир бис! Ол бүгү чүүл Иегова-биле найыралывысты кадагалап, мөңге чуртталгага чедирер орукка артарынга дузалап турар.

3. Бо статьяга чүнү сайгарар бис?

³ Чамдыкта бачыттыг улустан Иегованың удуртулгазын дыңнаары ындыг-ла амыр эвес. Чүге дизе оларның шиитпири бодаанывыстан өске болур чадавас. Чок болза, айтыышкыннары мерген угаанныг эвес, Иеговадан эвес деп бодал кирип болур. Ындыг үелерде ол айтыышкыннарны Иегова боду берип турар база олар кезээде биске ажыктыг боор деп бүзүрээри эргежок чугула. Иеговага бүзүреливисти быжыктырар дээш: 1) библейжи үелерде Бурган чонун канчаар башкарып чораанын, 2) Иегова амгы үеде бисти канчаар башкарып турарын, 3) кажан-даа Иегованың удуртулгазын дыңнаары чүге ажыктыын сайгарар бис.

ИЕГОВА ИЗРАИЛЬ ЧОННУ КАНЧААР БАШКАРЫП ЧОРААН?

4, 5. Иегова чонун Моисейни таварыштыр удуртуп турарын канчаар көргүскен? (Журналдың даштында чурукту көрүңер.)

⁴ Иегова Моисейге чонун Египеттен хостаар даалганы берген. Моисейни таварыштыр Бурган боду башкарып турарын израильчилерге бадыткалдарны көргүскен. Чижээ, хүндүс олар булут чагыны, а дүне от чагыны көрүп турганнар (Хост. 13:21). Моисей ол чагыны эдерип, Кызыл далайга чонну эккелген. Ынчалза-даа мурнунда далай, а соонда Египеттиң шерии сүрүп чоруп органын көргеш, олар девидеп, дузакта бис деп бодааннар. Израильчилер оларны Кызыл далайга эккелгени Моисейниң частырыы деп бодаан. Ынчалза-даа кандыг-даа частырыг чок. Моисей чонну Иегованың айыткан черинче эккелген (Хост. 14:2). А соонда Бурган оларны хуулгаазын арга-биле камгалаан (Хост. 14:26—28).

⁵ Дараазында 40 чыл дургузунда, Иегова чонун булут чагы дузазы-биле эдертирин Моисей чигзинмээн.a Ооң майгынының кырынга булут чагы туруптарын израильчилер көрүп турган (Хост. 33:7, 9, 10). Ол чагы таварыштыр Иегова Моисей-биле чугаалажып, айтыышкыннарын чонга дамчыдып турган (Ыд. ыр. 98:7). Иегова удуртулганы Моисейни таварыштыр берип турар деп израильчилер тода көрүп кааннар.

6. Израильчилер Иегованың удуртулгазынга кандыг хамаарылгалыг турган? (Саннар 14:2, 10, 11).

⁶ Харааданчыг чүүл, израильчилерниң хөй кезии Моисей Иегованың төлээзи деп тода бадыткалды хүлээвээннер. (Номчуптуңар: Саннар 14:2, 10, 11.) Түңнелинде Бурган ол салгалды аазаан черже кирерин чөпшээревээн (Сан. 14:30).

7. Иегованың удуртулгазын кым эдерип чораан? (Саннар 14:24). (Чурукту база көрүңер.)

⁷ Ынчалза-даа чамдык израильчилер Иегованың удуртулгазын дыңнаан. Чижээ, Бурган мынча дээн: «Халев... Меңээ бүрүнү-биле чагырткан...». (Номчуптуңар: Саннар 14:24.) Иегова ону шаңнаан, безин Ханаандан девискээр шилип алырын чөпшээрээн (Иис. 14:12—14). Израильдиң дараазында салгалы эки үлегерни база көргүзүп, дыңнангыр болганнар. Баштыңчызы Нуннуң оглу апаарга, олар «Моисейни ханы хүндүлээр турганы дег, Иисусту бүгү назынының иштинде хүндүлээр апарганнар» (Иис. 4:14). Ынчангаш Иегова оларны йөрээп, аазаан черни оларга берген (Иис. 21:43, 44).

8. Иегова чонун хааннар үезинде канчаар удуртуп турганын тайылбырлаңар. (Чурукту база көрүңер.)

⁸ Соонда чонун башкарарда Иегова баштыңчыларны томуйлаан. А хааннар үезинде айтыышкыннарны Бурган медээчилер таварыштыр берип турган. Шынчы хааннар медээчилерни дыңнап чораан. Чижээ, Давид хаан Нафан медээчиниң сөзүн биче сеткилдиг хүлээп турган (2 Хаан. 12:7, 13; 1 Чыл. 17:3, 4). Иосафат хаан Яхазиил медээчини дыңнаар болгаш, Иудеяның чурттакчыларын медээчилерге бүзүрээринче кыйгырган (2 Чыл. 20:14, 15, 20). Айыылга таварышкаш, Эзекия хаан Исайя медээчиден дуза дилээн (Иса. 37:1—6). Кажан хааннар айтыышкыннарны сагыырга, Иегова чонну йөрээп, камгалаар чораан (2 Чыл. 20:29, 30; 32:22). Иегова чонун медээчилер таварыштыр башкарарын шупту билир ужурлуг турган. Ынчалза-даа хааннарның хөй кезии, оларның албатылары Иегованың медээчилерин херекке албайн турган (Иер. 35:12—15).

БАШТАЙГЫ ХРИСТИАННАРНЫ ИЕГОВА КАНЧААР БАШКАРЫП ТУРГАН?

9. Иегова бирги векте христианнарны канчаар удуртуп турган? (Чурукту база көрүңер.)

⁹ Бистиң эраның бирги векте Иегова христиан чыышты тургускан. Ону канчаар удуртуп турган? Бурган чыыштың баштыңы кылдыр Иисусту томуйлаан (Эф. 5:23). Иисус айтыышкыннарны өөреникчи бүрүзүнге эвес, а элчиннер болгаш Иерусалимде удуртукчулар таварыштыр чыышты башкарып турган (Аж.-ч. 15:1, 2). Оон аңгыда, шупту чыыштарга удуртукчуларны томуйлаан (1 Фес. 5:12; Тит. 1:5).

10. а) Бирги векте христианнарның хөй кезии удуртулгага кандыг хамаарылгалыг болган? (Ажыл-чорудулга 15:30, 31). б) Библейжи үелерде чамдык улус Иегованың төлээлерин чүге хүлээвээн? («Чамдык улус тода бадыткалды чүге тоовааныл?» деп көзенекти көрүңер.)

¹⁰ Бирги векте христианнарның удуртулгага хамаарылгазы кандыг турган? Оларның хөй кезии алган айтыышкыннарынга дыңнангыр чораан. Чижээ, Иерусалимде акыларның шиитпирин дыңнааш, өөреникчилер өөрүп турган. (Номчуптуңар: Ажыл-чорудулга 15:30, 31.) А амгы үеде Иегова чонун канчаар удуртуп турар?

ИЕГОВА АМГЫ ҮЕДЕ БИСТИ КАНЧААР БАШКАРЫП ТУРАР?

11. XIX вектиң төнчүзүнде, XX вектиң эгезинде удуртукчуларны Иегова канчаар башкарып турган? Чижекти чугаалаңар.

¹¹ Иегова чонун амгы үеде бодунуң Сөзү болгаш чыыштың баштыңы, Оглу таварыштыр башкарып турар. Бурган чонун кижилер таварыштыр удуртуп турар деп бадыткалдар бар бе? Ийе. Чижээ, XIX вектиң төнчүзүнде төөгүнү көрээлиңер. Чарлз Тейз Расселл болгаш ооң эштери 1914 чыл — Бурганның Чагыргазының төөгүзүнде чугула болуушкун деп билип эгелээннер (Дан. 4:25, 26). Олар Библияны шинчилээш, библейжи медеглелдерге бүзүрээр болгаш, ол түңнелди кылган. Алыс шынны тып алырынга оларны Иегова башкарып турган бе? Ынчанмайн канчаар. 1914 чылдың делегейде болуушкуннары Бурганның Чагыргазы чагырып эгелээн деп бадыткаан. Бирги делегей дайынының соонда, эпидемиялар, чер шимчээшкиннери болгаш аш-чут эгелээн (Лк. 21:10, 11). Иегова бодунуң чонунга дузалажыр дээш, биче сеткилдиг Библияның шинчилекчилерин ажыглаан.

12, 13. Ийиги делегей дайынының үезинде суртаал болгаш өөредилге ажылын улгаттырар дээш, организация чүнү кылган?

¹² Ийиги делегей дайынының үезинде чүү болганын сактып кээлиңер. Ажыдыышкын 17:8-те медеглелди шинчилээш, кол башкарылга черинде харыысалгалыг акылар ол дайын Армагеддонче эвес, а оон-даа хөй суртаалдаарынга аргалар ажыттынып кээр үеже айтып турар деп билип кааннар. Ынчангаш ол үе таарымчалыг эвес-даа болза, Иегованың организациязы Таңныыл суургазының библейжи Галаад школазынb тургускан. Аңаа бүдүн делегейге суртаалдаар база улусту өөредир миссионерлерни белеткээн. Дайын үезинде безин миссионерлер бараалгаар черлеринче чоруп турганнар. Оон аңгыда, шупту бараалгакчылар оон-даа эки суртаалчылар болгаш башкылар апаарынга, сарыылдыг чалча Теократтыг бараалгал курсунc оларга организастаан. Бо бүгү Бурганның ажылын кылырынга ооң чонун белеткээн.

¹³ Иегова берге үеде бодунуң чонун башкарып чорааны тода көскү. Ийиги делегей чергелиг дайын соонда, Иегованың бараалгакчылары хөй чурттарга суртаалдаар аргалыг апарган. Ооң ачызында дыка хөй улус Иегованы билип алган, Чагырганың медээзи бүдүн делегейде тараттынып турар.

14. Иегованың организациязының база удуртукчуларның айтыышкыннарынга чүге бүзүреп болур бис? (Ажыдыышкын 2:1). (Чурукту база көрүңер.)

¹⁴ Амгы үеде Удуртукчу чөвүлел Иисуска чагыртып турар. Олар айтыышкыннарын Иегова биле Иисустуң көрүжүнге даянган болурун күзээрлер. Бодунуң ээлчээнде, кожуун хайгааракчылары биле тус черниң удуртукчулары айтыышкыннарны чыыштарга берип турарd. А чагдырган удуртукчулар, долу утказында чыыштың шупту удуртукчулары, Иисустуң «оң холунда». (Номчуптуңар: Ажыдыышкын 2:1.) Ийе, олар тергиин эвес болгаш, чазып болур. Моисей биле Нуннуң оглу Иисус база элчиннер ышкаш бо-ла чазыптар турганнар (Сан. 20:12; Иис. 9:14, 15; Рим. 3:23). Иисус Христос «бо делегейниң төнчүзүнге чедир» сарыылдыг чалчаны болгаш удуртукчуларны сагыш човангыр башкарар (Мф. 28:20). Ынчангаш Иисустуң харыысалгалыг акылар таварыштыр айтыышкыннарынга бүзүрээр шупту үндезиннер бар.

ИЕГОВАНЫҢ УДУРТУЛГАЗЫН ДЫҢНААРЫ КАЖАН-ДАА ЧҮГЕ АЖЫКТЫГ?

15, 16. Иегованың удуртулгазынга дыңнангыр болган улустуң таварылгалары силерни чүү чүвеге өөредип турар?

¹⁵ Иеговага дыңнангыр болуру кайы хире ажыктыын ам безин көрүп турар бис. Чижээ, Э́ндрюe биле Ро́уз чуртталгазын бөдүүнчүдер сүмени дыңнааш, тудугларга киржир аргалыг болган. («Шинчилел Библиязында» Матфей 6:22-де тайылбырны көрүңер.) Роуз мынча дээн: «Кухня чок дыкпыш өрээлдерге-даа чурттадывыс. Чурук тырттырарынга дыка ынак мен. А фотокамера, объективтеримни садар ужурга таварышкаш, ыглаан мен. Ынчалза-даа Авраамның кадайы Сарра дег болуксаар болгаш, эрткен үеже эвес, а бурунгаар көөрүн кыскан мен» (Евр. 11:15). Ол өг-бүлениң шиитпири эки болган бе? Роуз мынчаар харыылаан: «Иеговага бүгү бар чүүлүвүстү бээр арга дээш, дыка өөрүүр-дүр бис! Ооң даалгаларын күүседип тургаш, бис чаа делегейже бакылапкан ышкаш болдувус». Эндрю чөпшээрежип: «Бүгү үевисти, күжүвүстү Иеговага берип турарывыс дээш, аас-кежиктиг бис» — дээн.

¹⁶ Иегованың удуртулгазын эдерериниң оон өске ажыы кандыгыл? Марси́я бараалгалга оон-даа хөйнү кылыр деп сүме дыңнааш, школа соонда эгелекчилээр улуг күзелдиг апарган (Мф. 6:33; Рим. 12:11). Ол үлешкен: «Меңээ университетке халас өөренирин сүмелээн. Ынчалза-даа мен Иеговага эң экини бериксээш, курстарга өөренир деп шиитпирлээн мен. Суртаалче хөй үени үндүрүп болур ажылдыг мен. Ол чуртталгамның эң-не эки шиитпирлеримниң бирээзи болган. Амгы үеде долу бараалгакчы мен, а мээң ажылдаар графигим Вефилге база Иегованың өске-даа хөй ажылдарынга дузалажыр арганы берип турар».

17. Иегованың удуртулгазынга дыңнангыр болуру оон ыңай чүге ажыктыг? (Исайя 48:17, 18).

¹⁷ Үе-үе болгаш, бисти камгалаар сүмелерни ап турар бис. Чижээ, Иегованың организациязы бисти акша-төгерикке ынакшылдан база Бурганның хоойлуларын үрептер херектерден камгалап турар. Бурганның удуртулгазын дыңнаарывыска арын-нүүрүвүс арыг болур, херекчок стресске алыспас бис (1 Тим. 6:9, 10). Түңнелинде Иеговага сеткиливистен бараалгап болур бис. Ол чүүл биске аажок улуг өөрүшкүнү, тайбыңны, аас-кежикти эккээр. (Номчуптуңар: Исайя 48:17, 18.)

18. Кезээде Иегованың удуртулгазынга чүге бүзүрээр силер?

¹⁸ Коргунчуг хилинчек үезинде база Муң чыл башкарылгазынга Иегова удуртулгазын кижилер таварыштыр бээр деп чигзиниг чок (Ыд. ыр. 44:17). Биске таарзынмаан айтыышкыннарга дыңнангыр болур бис бе? Амдан эгелеп, Иеговага дыңнангыр болзувусса, ону күүседири белен боор. Ынчангаш Иеговага болгаш ооң харыысалгалыг акылар таварыштыр удуртулгазынга кезээде дыңнангыр болуулуңар (Иса. 32:1, 2; Евр. 13:17). Бурган-биле найыралывысты камгалаарынга дузалаар база мөңге чуртталгаже чедирер Баштакчывыс, Иеговага бүзүрээр шупту чылдагааннарывыс бар болгай.