Иегованы өттүнүп, өскелерни деткиңер

1. Ада́м биле Ева үймээн үндүрерге, Иегова кандыг сорук киирер сөстерни чугаалаан?

КИЖИЛЕР бачыттыг апарып, бачыттың болгаш өлүмнүң кулданыынче кире берген үеден тура Иегова оларны чаңгыс удаа эвес деткип келген. Чижээ, Ада́м биле Ева Эдемге үймээн үндүрген соонда, Иегова оларның үре-салгалынга идегел читпээн деп көргүскен өттүр билген медеглелди дораан чугаалаан. Эге дөс 3:15-те Эрликти, шаандагы чыланны, болгаш ооң ажыл-херектерин дазылындан тура тыртар деп, Ол аазаан. Ол өттүр билген медеглелдиң утказы билдингир апаарга, кижилерге идегел тыптып келген (Ажыд. 12:9; 1 Ин. 3:8).

ИЕГОВА БУРУНГУ БАРААЛГАКЧЫЛАРЫН ДЕТКИП ЧОРААН

2. Иегова Нойну канчаар деткээн?

² Ной Бурганны бичии-даа херекке албас улус аразынга чурттап чораан. Иеговага чүгле Ной биле ооң өг-бүлези чүдүп турган. Долгандыр күчүлел биле мөзү-шынар чок чорук тергиидеп турган, ол дээш Ной ундарай берип болур турган (Э.д. 6:4, 5, 11; Иуда 6). Ынчалза-даа Иегова Нойга моон-даа соңгаар «Бурганга бүзүрелдиг, дыңнангыр» артар кылдыр сорук киирер чүве чугаалаан (Э.д. 6:9). Бурган ол каржы делегейни узуткаар деп турарын чугаалааш, өг-бүлезин камгалаар дизе, чүнү канчаарын Нойга тайылбырлаан (Э.д. 6:13—18). Иегова Нойга чөленгииш болган.

3. Иегова Нуннуң оглу Иисусту канчаар деткээн? (Статьяның эгезинде чурукту көрүңер.)

³ Соонда Нуннуң оглу Иисус Бургандан белен эвес даалганы алган. Ол Бурганның чонун Аазаттынган черже киирер дээш, ында чурттап чораан күчүлүг чоннар-биле чаалажыр ужурлуг турган. Нуннуң оглу Иисуста дүвүрээр чылдагааннар турган. Иегова ону билгеш, Моисейге: «Иисусту чагып-сурга, ону быжыктырып, сорук киирип каг, чүге дээрге бо чонну баштап чоруур база сээң ам көрүп каарың черни оларга ээлээр кылдыр бээр кижи — ол-дур» — деп чагаан (Ы.х.к. 3:28). Нуннуң оглу даалгазын күүседир деп турда, Иегова: «Сеңээ дужаадым чоп: кадыг-быжыг болгаш эрес-дидим бол, коргуп-сүртеве! Дээрги-Чаяакчы Бурганың каяа-даа сээң-биле кады боор» — деп сөстер-биле деткээн (Иис. 1:1, 9). Чугаажок, ол сөстер Нуннуң оглу Иисусту сорук киирген.

4, 5. а) Иегова бурунгу үеде чонун канчаар деткип турган? б) Иегова Оглун Бодунуң деткимчезинге канчаар бүзүреткен?

⁴ Иегова бараалгакчыларын чүгле тус-тузунда эвес, а чонун ниитизи-биле база деткип турган. Чижээ, Бурганның чугаалаан өттүр билген медеглели Вавилонда туттурган еврейлерни аргалаан. «Кортпа, чүге дээрге Мен — сээң Бурганың-дыр мен, сүрээдеве, чүге дээрге Мен сээң-биле кады мен. Сени быжыктырып, сеңээ дузалаар мен. Мээң тиилелгелиг холум сеңээ деткимче көргүзер» — деп, Иегова чугаалаан (Иса. 41:10). Шак ындыг деткимчени бирги векте чурттап чораан христианнар болгаш амгы үеде Бурганның бараалгакчылары боттарынга көрген. (2 Коринфичилерге 1:3, 4 номчуптуңар.)

⁵ Иегова Бодунуң Оглун база деткээн. Сугга суктуруп тургаш, Иисус дээрден: «Бо дээрге Мээң ханы ынак оглум-дур, Ол Мээң сеткилимге кирер-дир!» — дээн үннү дыңнаан (Мф. 3:17). Иегованың сөстери Иисусту ооң черге бараалгап турган үезинде деткип турган.

ИИСУС ӨСКЕЛЕРНИ КАНЧААР ДЕТКИП ТУРГАН?

6. Иисустуң акша дугайында угаадыглыг чугаазы бисти канчаар сорук киирип болур?

⁶ Иисус бодунуң Адазын өттүнүп чораан. Иисус христианнарны Бурганга шынчы артарынче деткип, акша дугайында угаадыглыг чугааны чугаалаан. Ында дээргизи шынчы чалчаларын мактап: «Кончуг эки-дир, сен эки болгаш шынчы чалча-дыр сен! Сен бичии херек башкарарынга шынчың көргүстүң, ам сеңээ улуг ажыл-херек дагзыр мен. Мээң өөрүшкүм үлежип көр» — дээн (Мф. 25:21, 23). Бо сөстер Иисустуң өөреникчилерин сорук киирип, моон-даа соңгаар Иеговага шынчы бараалгаарынче дыка-ла деткээн!

7. Иисус элчиннерин, ылаңгыя Пётрну, канчаар деткээнил?

⁷ Иисустуң элчиннери аразында кым улуг дээш бо-ла маргыжа бээр турган. Ындыг-даа болза ол оларга шыдамык бооп, боттарын даргалар дег эвес, а чалчалар дег, биче сеткилдиг алдынарынче кыйгырып турган (Лк. 22:24—26). Пётр Иисусту чаңгыс удаа эвес чөгендирген (Мф. 16:21—23; 26:31—35, 75). Ынчалза-даа ол Пётрдан хая көрүнмээн. Харын-даа ол ону деткип, ха-дуңманы быжыглаарын дааскан (Ин. 21:16).

БУРУНГУ ҮЕДЕ ДЕТКИМЧЕ

8. Эзекия шериг баштыңчыларын болгаш чонну канчаар деткээнил?

⁸ Бурганның Оглу эки үлегер көргүскениниң мурнунда-ла, Иегованың бараалгакчылары деткимчениң кайы хире чугулазын билип чорааннар. Ассирийлер Иерусалимче халдаар деп турда, Эзекия хаан шериг баштыңчыларын болгаш чонну деткиир дээш чыып алган. Ооң сөстерин дыңнааш, чон «сорук кире берген». (2 Чылдар 32:6—8 номчуптуңар.)

9. Иов номундан деткимчениң дугайында чүнү билип ап турар бис?

⁹ Иов аргалалды боду хереглеп турган хирезинде, ол «аргалакчыларынга» өскелерни канчаар деткиирин өөреткен. Оларның орнунга турган болза, ол чүнү канчаарын чугаалаан: «Силерни аксы-сөзүм-биле быжыктырып, аргалал сөстери-биле аарышкыңарны чиигедир ийик мен!» (Иов 16:1—5, Библияның Заок очулгазы). Соонда Иов Элиуйдан болгаш Иегованың бодундан аргалалды алган (Иов 33:24, 25; 36:1, 11; 42:7, 10).

10, 11. а) Иеффайның уруунга деткимче чүге херек турган? б) Бөгүн кым деткимче биле макталга төлептиг?

¹⁰ Иеффайның уруунга база деткимче херек турган Ооң ачазы, баштыңчы Иеффай, аммоннар-биле дайылдажып чоруур деп турган. Бир эвес Иегова аңаа тулчуушкунга тиилеп аарынга дузалаар болза, чанып кээрге, ону бир дугаар уткуп аар кижи Иегованың ыдыктыг өргээ-майгынынга бараалгаар деп, ол аазаан. Израильчилер тулчуушкунга тиилеп алган. Бир дугаар Иеффайны тиилелгези дээш байыр чедирери-биле, аңаа уткуй ооң чаңгыс борбак уруу үнүп келген. Аданың чүрээ чымырт дээн. Ынчалза-даа ол сөзүн тудуп, ыдыктыг өргээ-майгынга бүгү назынында бараалгаар кылдыр уруун Силомче чорудупкан (Башт. 11:30—35).

¹¹ Иеффайга кайы хире берге турганын билип болур бис, ынчалза-даа ачазының шиитпирин күзелдии-биле деткээн уруунга оон-даа берге турган чадавас (Башт. 11:36, 37). Иеффайның уруу өглениринден база ажы-төлдүг болурундан ойталаан. Ооң ук-салгалы ынчаар төнүп каар турган. Чугаажок, ол деткимчени аажок хереглеп турган. Библияда: «Израильде мындыг чаңчыл кылып каан: чылдың-на, дөрт хонук иштинде галаадчы Иеффайның уруун мактаар дээш, кыс уруглар аңаа кээп турган» — дээн (Башт. 11:39, 40, Чаа делегейниң очулгазы). Ооң-биле дөмей, Бурганга хөй бараалгаар дээш өгленмейн турар христианнар деткимче биле макталга төлептиг эвес-тир бе? (1 Кор. 7:32—35).

ЭЛЧИННЕР ХА-ДУҢМАНЫ ДЕТКИП ТУРГАН

12, 13. Пётр ха-дуңманы канчаар деткип турган?

¹² Өлүмүнүң мурнуу чарыында Иисус Пётр элчинге: «Симон, Симон, көрдүң бе! Кызыл-тасты богундан арыглаары дег, силерни шишкиир эргени эрлик негеп алыксап турду. Ынчалза-даа Мен сен дээш, бүзүрелиң читпези дээш, мөргүп турдум. А сен ооң соонда, Менче катап эглип келгеш, ха-дуңмаң быжыктырып көр» — деп чугаалаан (Лк. 22:31, 32).

¹³ Пётр бирги векте христиан чыышка удуртулга ап турган улустуң бирээзи апарган (Гал. 2:9). Б. э. 33 чылдың Беженги хүннүң байырлалында Пётрнуң чугаалаан илеткели болгаш соонда көргүскен эрес-дидим чоруу акы-угбаларны сорук киирген. Хөй чылдар иштинде бараалгаан соонда, ол чагаазында мынча дээн: «Чагаам сагыжыңарны часкарарын база Бурганның авыралы алыс шынныг деп херечилээрин күзеп тур мен. Ол авырал ачызында чаныш-сыныш чок туржуңар!» (1 Пет. 5:12). Пётрнуң чагаалары ол үениң христианнарын деткип турган. Амгы үеде, Иегованың аазаашкыннарының күүсеттинерин манап турар үевисте, бис база ындыг деткимчени аажок хереглеп турар бис (2 Пет. 3:13).

14, 15. Иоанның бижээн чагаалары чүс-чүс чылдар дургузунда христианнарны канчаар деткип чоруур?

¹⁴ Иоанн элчин база бирги векте христиан чыышка удуртулга ап турган. Иисустуң бараалгалының дугайында Иоанның бижээн Буянныг Медээзи христианнарны амгы үеге чедир деткип чоруур. Алыс шын христианнарның ылгавырлыг демдээ ынакшыл боор деп Иисустуң сөстерин чүгле Иоанн бижээн. (Иоанн 13:34, 35 номчуптуңар.)

¹⁵ Иоанның бижээни үш чагаазында оон-даа өске үнелиг бодалдар бар. Кылган частырыгларывыс дээш муңгарап турар болзувусса, бисти бо сөстер оожургадыр: «Иисустуң төккен ханы бисти кандыг-даа бачыттан арыглаар» (1 Ин. 1:7). А бодувусту үргүлчү буруудадып турар болзувусса, «Бурган бистиң арын-нүүрүвүстен артык улуг» деп сөстерни номчааш, сеткиливис чиигей бээр (1 Ин. 3:19, 20). «Бурган — ынакшыл-дыр» деп сөстерни чүгле Иоанн бижээн (1 Ин. 4:8, 16). Ийиги биле үшкү чагаазында ол «алыс шынның оруу-биле бар» чыдар христианнарны мактаан (2 Ин. 4; 3 Ин. 3, 4).

16, 17. Павел элчин христианнарны канчаар деткээнил?

¹⁶ Павел элчин акы-угбаларны деткииринге хамаарыштыр кайгамчык үлегерни арттырган. Христиан чыыштың чаа тургустунган үезинде элчиннерниң хөй кезии Иерусалимге, удуртукчу чөвүлелдиң турар черинге, чурттап турган (Аж.-ч. 8:14; 15:2). Иудеяда христианнар чаңгыс Бурганга бүзүрээр, иудей шажынныг улуска Иисус Христостуң дугайында медээни чедирип турган. А Павелди ыдыктыг сүлде янзы-бүрү бурганнарга чүдүүр гректерге, римчилерге болгаш өске-даа чоннарга суртаалдаар кылдыр чоруткан (Гал. 2:7—9; 1 Тим. 2:7).

¹⁷ Павел амгы Турцияның, Грецияның болгаш Италияның девискээрин кезип, еврей эвес улуска суртаалдап, христиан чыыштарны үндезилээн. Чаа христианнар апарган улус «боттарының-на чаңгыс чер чурттугларындан когарап» турган болгаш, деткимчени хереглеп турган (1 Фес. 2:14). Б. э. 50 хире чылда Павел Фессалоникада чоокта тургустунган чыышка: «Мөргүл кылган санывыста-ла, силерни сактып, дөгереңер дээш, Бурганга үргүлчү өөрүп четтирер-дир бис. Силерниң бүзүрелиңерге үндезилеттинген ажыл-херээңерни, ынакшылыңардан сорук кирген ажылыңарны... идегелиңерниң чайгылыш чогун... доктаамал сактып чор бис» — деп бижээн (1 Фес. 1:2, 3). Оон ыңай ол оларны: «Бот-боттарыңарны моон-даа соңгаар аргалаңар база быжыглаңар» — деп кыйгырган (1 Фес. 5:11).

УДУРТУКЧУ ЧӨВҮЛЕЛДЕН ДЕТКИМЧЕ

18. Удуртукчу чөвүлел Филиппти канчаар деткээнил?

¹⁸ Бирги векте Иегова чыыштарда шупту христианнарны, оларның санында удуртукчу акыларны, деткиир дээш удуртукчу чөвүлелди ажыглап турган. Чижээ, удуртукчу чөвүлелден акыларның деткимчезин самарийжилерге Иисустуң дугайында суртаалдап турган Филипп бодунга көрген. Удуртукчу чөвүлел, чаа бүзүрээн улус Ыдыктыг Сүлдени алыр кылдыр мөргүзүн дээш, төлээлекчилери болур Пётр биле Иоанны чорудупкан (Аж.-ч. 8:5, 14—17). Филипптиң болгаш чаа акы-угбаларның кайы хире сорук киргенин бодап көрүңер даан!

19. Бирги векте христианнар удуртукчу чөвүлелдиң чагаазын номчааш, чүнү миннип турган?

¹⁹ Сөөлзүредир удуртукчу чөвүлелдиң мурнунга «Еврей эвес христианнар Моисейниң Хоойлузу ёзугаар кыртыжап демдектедир ужурлуг бе?» деп айтырыг тургустунуп келген (Аж.-ч. 15:1, 2). Акылар ыдыктыг сүлдени дилеп, ол айтырыгга хамаарыштыр Бижилгени шинчилээн соонда кыртыжап демдектедири моон соңгаар негеттинмейн турар деп шиитпирлээн. Оон удуртукчу чөвүлел ол шиитпирни тайылбырлаан чагааны акылар дамчыштыр чыыштарже чорудупкан. «А демгилери ону номчааш, деткимчелиг медээге аажок өөрээннер» (Аж.-ч. 15:27—32).

20. а) Удуртукчу чөвүлел бисти шуптувусту канчаар деткип турарыл? б) Дараазында статьяга чүнү сайгарар бис?

²⁰ Амгы үеде Иегованың Херечилериниң Удуртукчу чөвүлели тускай долу бараалгакчыларга, оларның санында вефилчилерге, ол ышкаш делегей чергелиг ха-дуңмага деткимчени берип турар. Бирги векте ышкаш, ол чүүл шуптувуска өөрүшкүнү эккеп турар! Оон аңгыда 2015 чылда Удуртукчу чөвүлелдиң шиитпири-биле «Вернись к Иегове» деп брошюра үнген. Ооң сорулгазы — чыышты каапкан улусту деткиири. Ынчалза-даа удуртулга ап турар акылардан аңгыда, өскелерни кым деткиир ужурлуг? Ону дараазында статьяга сайгарар бис.