«Кезээ-мөңгеде турар» хоорайны манаңар

1. Иисустуң сөстеринден алырга, Иерусалим-биле чүү болур ужурлуг турган?

ИИСУС өлүрүнүң мурнунда каш хонук бурунгаар чугула өттүр билген медеглел чугаалаан. Удавас Иерусалимни «аг-шериг бүзээлеп» алырга, дораан-на Иудеядан дезиптерин өөреникчилеринге чагып каан (Лк. 21:20—22).

2. Павел элчин Иудея биле Иерусалимде чурттап турган христианнарны келир болуушкуннарга канчаар белеткеп каан?

² Иерусалимни римчилер бүзээлээриниң бетинде, Павел элчин Иудеяда болгаш Иерусалимде христианнарга чагаа бижээн. Амгы үеде ол Еврейлерге чагаа-дыр. Ында Павел акы-угбаларны келир болуушкуннарга белеткээн чуртталгага херек чугула айтыышкыннарны бижээн. Кандыг айтыышкыннар? Христианнар Иерусалим-биле кады узуткаттырбас дээш, бажыңнарын, ажыл-агыйын каггаш, дүрген дезер ужурлуг турган. Павел Иерусалимниң дугайында: «Мында, чер кырында, кезээ-мөңгеде турар хоорайывыс чок» деп бижээн. Оон улаштыр: «А келир үеде чедип кээр хоорайже чүткүп чоруур бис» — дээн (Евр. 13:14).

3. «Үндезини [быжыг]... хоорай» деп чүл база ону бис чүге манап турар бис?

³ Иерусалим биле Иудеядан чоруп турда, христианнарны улус кочулап, чемелеп турган. Ынчалза-даа ол шиитпир оларның амы-тынын камгалаан. Акша-төгерик кол эвес, делегейниң бергелерин кижилер боттары шиитпирлеп шыдавас деп санаар боорувуска бисти база улус чиктиг кылдыр көөр. А чүже идегээр бис? Удавас бо каржы делегей узуткаттырар деп билир бис. Ынчангаш «үндезини [быжыг]... хоорайны» — Бурганның Чагыргазын манап турар бисa (Евр. 11:10; Мф. 6:33). Бо статьяның биче эгелеринге: 1) Павелдиң чагаазы бирги вектиң христианнарынга «чедип кээр хоорайны» манаарынга дузалаанын, 2) Павел оларга келир үеде бергелерге канчаар белеткээнин база 3) ооң сүмелери амгы үеде чүзү-биле ажыктыын сайгарар бис.

ИЕГОВАГА ИДЕГЕҢЕР — ОЛ СИЛЕРНИ КАЖАН-ДАА КАГБАС

4. Иерусалим христианнарга чүге чугула хоорай турган?

⁴ Иерусалим христианнарга чугула хоорай турган. Чүге дизе б. э. 33 чылда аңаа удуртукчу чөвүлел болгаш христиан чыыш тургустунган. Ол хоорайга оларның хөй кезии бажың-балгаттыг, өнчү-хөреңгилиг чурттап чораан. Ынчалза-даа Иисус өөреникчилерин чүгле Иерусалимден эвес, Иудеядан безин дезерин сагындырган (Мф. 24:16).

5. Павел христианнарны Иерусалимниң узуткаашкынынга канчаар белеткээн?

⁵ Павел христианнарны Иерусалимни каарынга белен болзун дээш, Иегованың ол хоорайга хамаарылгазын билип алырынга дузалашкан. Өргээ, ыдыктыг бараалгалдың тургузуу база өргүлдер Бурганга таарымча чок апарганын элчин сагындырган (Евр. 8:13). Хоорайның чурттакчылары хөй кезии Мессиядан ойталаан. Иерусалимде өргээ арыг чүдүлгениң төвү эвес апарган, ынчангаш ону узуткаашкын манап турган (Лк. 13:34, 35).

6. Еврейлерге 13:5, 6-да Павелдиң сагындырыглары чүге үе-шаанда болган?

⁶ Павел Еврейлерге чагаазын бижип турда, Иерусалим чурттаарынга таарымчалыг, аянныг хоорай турган. Ол үеде рим төөгүчү Иерусалимни «чүгле Иудеяның эвес, а бүгү Чөөн чүктүң хоорайларының эң-не алдарлыы» деп адаан. Ынаар аңгы-аңгы чурттардан еврейлер чылдың болур байырлалдарже баар турган. Ол байырлалдарның ачызында хоорайның экономиктиг байдалы сайзырап турган. Христианнар ындыг үеде ажылдап алыр аргалыг болган. Павел оларга ооң ужурундан: «Акша-мөңгүнге ынак амыдырал тутпаңар, бар чүвеңерге сеткил ханыңар» дээн чадавас. А ооң соонда бараалгакчы бүрүзүнге: «Сени кажан-даа кагбас мен, сенден кажан-даа ойталавас мен» — деп, Иегованың аазаашкынын ол бижээн (номчуптуңар: Еврейлерге 13:5, 6; Ы. х. к. 31:6; Ыд. ыр. 117:6). Иерусалимге болгаш Иудеяга чурттап турган христианнарга ол сагындырыглар дыка-ла үе-шаанда болган. Чүге? Удавас олар бажыңнарын, ажыл-агыйын болгаш бүгү өнчү-хөреңгизин каар ужурлуг. Олар чаа чуртталганы өске черге тудар турган.

7. Амдан эгелеп Иеговага бүзүреливисти быжыглаары чүге чугула?

⁷ Биске кичээл. «Коргунчуг хилинчекти» база бо делегейниң төнчүзүн удавас чурттап эртер бис (Мф. 24:21). Ынчангаш келир болуушкуннарга белен база одуг-сергек болур херек (Лк. 21:34—36). Ол үеде шупту өнчүвүстү каар апаар чадавас бис. Ынчан бисти кажан-даа кагбас дээн Иегованың аазаашкынынга ылаңгыя идегээр ужурлуг бис. Ынчалза-даа амдан эгелеп Иеговага бүзүреп, ынаныры чугула. Бодуңдан айтыр: «Мээң шиитпирлерим, планнарым кандыгыл? Акшага эвес, а Иеговага ынанып турарым көскү бе?» (1 Тим. 6:17). Бирги вектиң болуушкуннарындан өөренип ап болур бис, ынчалза-даа «коргунчуг хилинчек» ышкаш айыыл-халап, ооң мурнунда кажан-даа болуп көрбээн. Ындыг тускай байдалда канчаар алдынарынга хамаарыштыр удуртулганы кайыын алыр бис?

«УДУРТУКЧУЛАРЫҢАРНЫ ДЫҢНА[ҢАР]»

8. Иисус өөреникчилеринге кандыг айтыышкын берген?

⁸ Иерусалимни рим аг-шериг бүзээлептерге, христианнар Павелдиң чагаазын сактып келген. Хоорай удавас узуткаттырар деп көрүп кааш, акы-угбалар ол дезериниң демдээ деп билип кааннар (Мф. 24:3; Лк. 21:20, 24). Ынчалза-даа кайнаар дезер? Иисус: «Иудеяда чурттаан улус дагларже дезипсин» — дээн болгай (Лк. 21:21). Долгандыр даглар хөй, а кайызынче дезип болур турган?

9. Христианнар кайы дагларже дезерин чүге аайын тыппайн барып болур турган? (Картаны база көрүңер.)

⁹ Самария, Галилея, Эрмон, Ливан дагларынче база Иорданның өске талазында дагже христианнар дезип болур турган. (Картаны көрүңер.) Ол дагларда чамдык хоорайлар айыыл чок кылдыр санаттынып турган. Чижээ, Га́мла хоорай бедик кадыр дагның белинде болгаш, аңаа чедери амыр эвес боорга, чамдык улус ону чаштынар чер деп санап турган. Ынчалза-даа соонда Гамлага еврейлер биле римчилерниң аразынга каржы тулчуушкун үезинде ооң хөй чурттакчылары чок болганb.

10, 11. а) Иегова христианнарга херек айтыышкыннарны канчаар берген? (Еврейлерге 13:7, 17). б) Удуртукчуларга дыңнангыр болуру христианнарга чүге чугула турган? (Чурукту база көрүңер.)

¹⁰ Оон алгаш көөрге, Иегова христианнарга удуртулганы акылар таварыштыр берип турган. Евсе́вий Памфи́л деп төөгүчү: «Иерусалимниң Церковунга хамааржыр улус Иерусалимни каапкаш, Переяда Пелла хоорайга турумчуп алган» деп бижээнc. Пелла хоорай Иерусалимден ырак эвес, ынчангаш аңаа чедери берге эвес турган. Ол хоорайда чон колдуунда еврей эвес болгаш, дайынзырак кижилер турбаан. (Картаны көрүңер.)

¹¹ Павелдиң: «Удуртукчуларыңарны дыңнап, оларга чагыртыңар» дээн сүмезинге дыңнангыр болган христианнар дагларже дезе берген. (Номчуптуңар: Еврейлерге 13:7, 17.) Түңнелинде олар дириг арткан. «Үндезини [быжыг]... хоорайны» — Бурганның Чагыргазын ол акы-угбалар манап турган боорга, Иегова оларны кагбаан (Евр. 11:10).

12, 13. Иегова чонун берге үелерде башкарып турганының чижектерин чугаалаңар.

¹² Биске кичээл. Иегова чонунга удуртукчу акылар таварыштыр тода айтыышкыннарны берип турар. Берге үелерде Иегова чонун шынчы эр улустуң дузазы-биле удуртуп чораан чижектер Библияда хөй (Ы. х. к. 31:23; Ыд. ыр. 76:21). Амгы үеде база Иегованың шак-ла ынчаар удуртуп турарының бадыткалдары хөй.

¹³ Чижээ, COVID-19 пандемиязы өөскүй бээрге, удуртукчуларга херек айтыышкыннарны берген. Ужуражылгаларны канчаар эрттиреринге база чаа байдалга суртаалдаарынга хамаарыштыр удуртукчулар айтыышкыннарны алган. Пандемия эгелээн соонда, каш ай эрткенде, хары угда 500 дылдарга шуулганнар болуп эрткен. Акы-угбалар ону интернеттен, телевизор таварыштыр көрген база радиодан дыңнап турган. Ындыг шуулган кажан-даа болуп көрбээн! Ном-дептерлерни үзүк-соксаал чок, үезинде ап турган болгаш, демниг арткан бис. Келир үеде кандыг-даа бергелер келзе, Иегова удуртулга ап турар акыларга мерген угаанныг шиитпирлер үндүреринге дузалажыр. Бо каржы делегейниң хүннерин чурттап эртип алыр дизе, Иеговага ынанып, аңаа дыңнангыр болуру чугула деп тода билдингир. Коргунчуг хилинчекке белеткенип алырынга, оон өске кандыг шынарларны сайзырадыр болза эки?

ААЛЧЫЛАРГА БАЗА БОТ-БОТТАРЫҢАРГА, АЛЫШКЫЛАР ДЕГ, ЫНАК БОЛУҢАР

14. Еврейлерге 13:1—3-тен алырга, Иерусалим буураар мурнунда христианнарга кандыг шынарлар херек болган?

¹⁴ Коргунчуг хилинчек эгелей бээрге, биске кажангызындан-даа артык ынакшыл херек апаар. Иерусалимден, Иудеядан христианнар биске эки үлегер. Олар кезээде бот-боттарынга ынак турган (Евр. 10:32—34). Ынчалза-даа Иерусалимниң буураарының бетинде, олар ынакшылды, аалчыларга хүндүткелди оон-даа артык сайзырадыр ужурлуг турган. (Номчуптуңар: Еврейлерге 13:1—3.)d Бо делегейниң төнчүзү дыка чоокшулаан болгаш, ол чүүл биске база хамааржыр.

15. Иерусалимден дескен соонда, христианнар бот-боттарынга ха-дуңмашкы ынакшылды болгаш эки хамаарылганы чүге көргүзер ужурлуг турган?

¹⁵ Кажан римчилер Иерусалимден хенертен аткаарлай бээрге, христианнарга дезер арга тыптып келген. Дүрген чоруур апарган болгаш, олар чүгле эвээш эт-сеп ап болур турган (Мф. 24:17, 18). Ынчангаш олар чүгле Пеллаже баар орукка эвес, харын-даа аңаа чеде бергеш, боттарын деткижер ужурлуг турган. Дүрген дуза херек улустуң саны хөй болган чадавас (Тит. 3:14). Акы-угбаларга аъш-чем, идик-хеп болгаш чурттаар оран-сава херек турган. Христианнар бот-боттары дээш сагыш човап, кады бүзүрээн ха-дуңмазынга кайы хире ынаан көргүзер үе келген.

16. Дуза херек акывыска азы угбавыска ынакшылды канчаар көргүзүп болур бис? (Чурукту база көрүңер.)

¹⁶ Биске кичээл. Бис акы-угбаларга ынак бис. Ынчангаш оларга бир-ле чүве херек апаарга, анаа олурбас бис. Чижээ, сөөлгү үеде дыка хөй Херечилер дайыннар болгаш бойдус халаптарының хайындан бажыңнарын каар ужурга таваржып турар. Бис оларга Иегова-биле хамаарылгазын быжыглаарынга база акша-төгерик талазы-биле дузаны дүрген чедирер бис. Дайын дээш бажыңын каапкан бир украин угбавыс мынча дээн: «Акы-угбалар таварыштыр Иегованың деткимчезин миннип, удуртулгазын көрдүвүс. Кайнаар-даа чеде бээривиске, төрээн чуртувуска-даа, Венгрияга-даа, ам Германияда ха-дуңмавыс бисти хүлээп ап, сагыш човап турар!» Сагыш човангыр база аалчыларга ынак акы-угбаларывыс — Иегованың холунда херекселдер (У. ч. 19:17; 2 Кор. 1:3, 4).

17. Амдан эгелеп ха-дуңмага ынакшылды көргүзүп, аалчылар хүлээринге белен болурунга өөренири чүге эргежок чугула?

¹⁷ Коргунчуг хилинчек үезинде биске кажангызындан артык деткимче херек (Авв. 3:16—18). Ынчангаш Иегова бисти бот-боттарывыска база аалчыларга ынак болурунга өөредип турар. Ол шынарларны берге үеде көргүзери эргежок чугула.

БИСТИ ЧҮҮ МАНАП ТУРАР?

18. Бирги векте Иерусалимге болгаш Иудеяга чурттап чораан христианнарның үлегеринден чүнү өөренип ап болур бис?

¹⁸ Дагларже дезе берген христианнар камгалалды алган. Иегова оларны кагбаан. Мында биске кандыг кичээл бар? Байдал канчаар өскерли бээрин билбес бис. Ынчалза-даа Иисустуң: «Силер база белен болуңар» — дээн сөстерин сактыр бис (Лк. 12:40). Еврейлерге чагааның дугайында база боданып болур. Павелдиң бирги векте христианнарга берген сүмелери амгы үеде-даа ажыктыг. Оон ыңай Иегова бисти кажан-даа кагбас база бистен ойталавас деп бүзүреткен (Евр. 13:5, 6). «Кезээ-мөңгеде турар» хоорайны — Бурганның чагыргазын манаалыңар. Ынчан мөңге йөрээлдерни алыр бис (Мф. 25:34).