Jinsi ya Kuendelea Kuimarisha Upendo Miongoni Mwetu

1-2. (a) Kwa nini mtume Paulo alisema kwamba upendo ndiyo sifa “kubwa zaidi”? (b) Tutachunguza maswali gani?

MTUME Paulo alipokuwa akizungumzia imani, tumaini, na upendo, alimalizia kwa kusema kwamba ‘sifa kubwa zaidi kati ya hizo ni upendo.’ (1 Kor. 13:13) Kwa nini mtume Paulo alisema hivyo? Wakati ujao, hatutahitaji kuwa na imani katika ahadi za Mungu kuhusu ulimwengu wake mpya au kutumaini kwamba ahadi zake zitatimia kwa sababu tayari zitakuwa zimetimizwa. Lakini sikuzote tutahitaji kumpenda Yehova na kuwapenda watu. Kwa kweli, upendo wetu kwao utaendelea kukua milele.

² Kwa kuwa tutahitaji kuwa na upendo sikuzote, tutachunguza maswali matatu. Kwanza, kwa nini tunapaswa kupendana? Pili, tunawezaje kuonyesha kwamba tunapendana? Tatu, tunawezaje kuendelea kuimarisha upendo miongoni mwetu?

KWA NINI TUNAPASWA KUPENDANA?

3. Tuna sababu gani za kupendana?

³ Kwa nini ni muhimu tupendane? Sababu moja ni kwamba upendo unatutambulisha kuwa Wakristo wa kweli. Yesu aliwaambia hivi mitume wake: “Kwa jambo hili wote watajua kwamba ninyi ni wanafunzi wangu—mkiwa na upendo miongoni mwenu.” (Yoh. 13:35) Isitoshe, tukiwa na upendo miongoni mwetu tutadumisha umoja. Paulo aliuita upendo “kifungo kikamilifu cha muungano.” (Kol. 3:14) Hata hivyo, kuna sababu nyingine muhimu ya kupendana. Mtume Yohana aliwaandikia waabudu wenzake hivi: “Yeyote anayempenda Mungu lazima pia ampende ndugu yake.” (1 Yoh. 4:21) Tunapopendana, tunaonyesha kwamba tunampenda Mungu.

4-5. Toa mfano wa jinsi upendo wetu kwa Mungu unavyohusiana na upendo wetu kwa wengine.

⁴ Ni kwa njia gani upendo wetu kwa Mungu unahusiana na upendo tunaowaonyesha ndugu na dada zetu? Kwa mfano, fikiria uhusiano uliopo kati ya moyo na viungo vingine vya mwili wetu. Daktari anapopima mapigo ya moyo karibu na kiganja cha mkono ili kujua ikiwa yana nguvu au ni dhaifu, anaweza kupata habari fulani kuhusu hali ya moyo wetu. Tunawezaje kutumia kanuni hiyo inapohusu upendo?

⁵ Kama tu ambavyo daktari anaweza kupata habari fulani kuhusu afya ya moyo wetu anapochunguza mapigo ya moyo, tunaweza kujua ikiwa upendo wetu kwa Mungu una nguvu au ni dhaifu kwa kuchunguza jinsi tunavyowapenda wengine. Tukitambua kwamba upendo wetu kwa waabudu wenzetu umeanza kuwa dhaifu kwa kiwango fulani, hiyo inaweza kuonyesha kwamba upendo wetu kwa Mungu umeanza kuwa dhaifu pia. Lakini tunapowaonyesha waabudu wenzetu upendo kwa ukawaida, hiyo ni ishara kwamba upendo wetu kwa Mungu uko imara.

6. Kwa nini ni tatizo kubwa ikiwa upendo wetu kwa ndugu na dada zetu unadhoofika? (1 Yohana 4:​7-9, 11)

⁶ Ikiwa upendo wetu kwa ndugu na dada zetu unakuwa dhaifu, hilo ni tatizo kubwa. Kwa nini? Kwa sababu hilo linamaanisha uhusiano wetu na Yehova uko hatarini. Mtume Yohana anaonyesha jambo hilo waziwazi anapotukumbusha hivi: “Mtu ambaye hampendi ndugu yake, ambaye amemwona, hawezi kumpenda Mungu ambaye hajamwona.” (1 Yoh. 4:20) Tunajifunza nini? Tutamfurahisha Yehova ikiwa tu ‘tutapendana.’—Soma 1 Yohana 4:​7-9, 11.

TUNAWEZAJE KUONYESHA KWAMBA TUNAPENDANA?

7-8. Tunaweza kuwaonyesha upendo ndugu na dada zetu kwa njia zipi?

⁷ Katika Neno la Mungu tunasoma mara kwa mara kuhusu amri ya ‘kupendana.’ (Yoh. 15:​12, 17; Rom. 13:8; 1 The. 4:9; 1 Pet. 1:22; 1 Yoh. 4:11) Hata hivyo, upendo ni hisia iliyo ndani ya moyo, au yule mtu wa ndani, na hakuna mwanadamu anayeweza kusoma moyo wetu. Hivyo, tunaweza kuwaonyeshaje upendo ndugu na dada zetu? Kupitia maneno na matendo yetu.

⁸ Kuna njia mbalimbali zinazoweza kuonyesha kwamba tunawapenda ndugu na dada zetu. Fikiria mifano ifuatayo: “Kila mtu amwambie mwenzake ukweli.” (Zek. 8:16) “Mdumishe amani kati yenu.” (Marko 9:50) Iweni wa kwanza “katika kuonyeshana heshima.” (Rom. 12:10) “Mkaribishane.” (Rom. 15:7) “Endeleeni . . . kusameheana.” (Kol. 3:13) “Endeleeni kubebeana mizigo mizito.” (Gal. 6:2) “Endeleeni kufarijiana.” (1 The. 4:18) “Endeleeni . . . kujengana.” (1 The. 5:11) “[Salini] kwa ajili ya mtu na mwenzake.”—Yak. 5:16.

9. Kwa nini kuwafariji wengine ni njia muhimu ya kuwaonyesha upendo wetu? (Tazama pia picha.)

⁹ Sasa tutachunguza njia moja ya kuonyeshana upendo iliyotajwa katika fungu lililotangulia. Tutachunguza himizo hili la Paulo: “Endeleeni kufarijiana.” Kwa nini kuwafariji wengine ni njia muhimu ya kuwaonyesha kwamba tunawapenda? Kulingana na rejeo fulani la Biblia, neno “kufarijiana” ambalo Paulo alitumia linamaanisha “kusimama kando ya mtu na kumtia moyo anapopata majaribu makali.” Hivyo, tunapotoa faraja tunamsaidia mwabudu mwenzetu anayekabili hali ngumu, asimame na kuendelea kutembea katika barabara ya uzima. Kila mara tunapomfariji ndugu au dada yetu, tunamwonyesha upendo mwabudu mwenzetu.—2 Kor. 7:​6, 7, 13.

10. Kuna uhusiano gani kati ya huruma na faraja?

¹⁰ Kuonyesha huruma na kufariji ni sifa zinazohusiana kwa ukaribu. Kwa njia gani? Mtu mwenye huruma huchochewa kuwafariji wengine na kujitahidi kuwapunguzia mateso yao. Hivyo, kwanza tunaonyesha huruma; kisha tunawafariji wengine. Ona jinsi Paulo anavyohusianisha huruma ya Yehova na faraja anayotoa. Paulo anamfafanua Yehova kuwa “Baba wa rehema nyororo na Mungu wa faraja yote.” (2 Kor. 1:3) Hapa mtume Paulo anatumia maneno “rehema nyororo” kufafanua hisia ya kuwaonyesha wengine huruma. Hivyo, Mungu anaitwa Baba au Chanzo cha rehema nyororo kwa sababu sifa ya huruma inatoka kwake. Na huruma hiyo inamchochea kutufariji “katika majaribu yetu yote.” (2 Kor. 1:4) Kama tu jinsi ambavyo maji safi ya chemchemi yanatuburudisha tunapokuwa na kiu, ndivyo Yehova anavyowaburudisha na kuwafariji wale wanaokabili hali ngumu. Tunawezaje kumwiga Yehova kwa kuwaonyesha wengine huruma na kuwafariji? Njia moja tunayoweza kufanya hivyo ni kwa kusitawisha sifa zitakazotusaidia kuonyesha huruma na kuwafariji wengine. Baadhi ya sifa hizo ni zipi?

11. Kulingana na Wakolosai 3:12 na 1 Petro 3:​8, ni sifa gani nyingine tunazopaswa kusitawisha ili kudumisha upendo utakaotuchochea kuwafariji wengine?

¹¹ Ni nini kitakachotusaidia tudumishe upendo wetu na ‘kuendelea kufarijiana’ kila siku? Tunahitaji kusitawisha sifa nyororo kama vile hisia-mwenzi, upendo wa kindugu, na fadhili. (Soma Wakolosai 3:12; 1 Petro 3:8.) Sifa hizo zitatusaidiaje? Tunapowahurumia ndugu zetu na kuwajali kikweli, tutakuwa na tamaa yenye nguvu ya kuwafariji wanapoteseka. Kama Yesu alivyosema, “kinywa husema mambo yaliyojaa moyoni. Mtu mwema hutoa mambo mema katika hazina yake njema.” (Mt. 12:​34, 35) Kuwafariji ndugu na dada zetu wenye uhitaji ni njia muhimu sana ya kuwaonyesha kwamba tunawapenda.

TUNAWEZAJE KUENDELEA KUIMARISHA UPENDO MIONGONI MWETU?

12. (a) Kwa nini tunapaswa kuwa makini? (b) Tutachunguza swali gani?

¹² Sote tunataka ‘kuendelea kupendana.’ (1 Yoh. 4:7) Hata hivyo, ni muhimu kukumbuka kwamba Yesu alionya kuwa “upendo wa wengi [ungepoa].” (Mt. 24:12) Yesu hakumaanisha kwamba wanafunzi wake wengi wangeacha kupendana. Hata hivyo, tunapaswa kuwa makini ili tusiathiriwe na mtazamo wa ulimwengu wa kutopendana. Tukiwa na wazo hilo akilini, acheni tujiulize swali hili muhimu: Je, kuna njia yoyote ya kupima ikiwa upendo wetu kwa ndugu zetu una nguvu au ni dhaifu?

13. Ni jambo gani linaloweza kujaribu upendo wetu?

¹³ Njia moja ya kupima ikiwa upendo wetu una nguvu au ni dhaifu ni kwa kuchunguza jinsi tunavyoshughulikia hali fulani maishani. (2 Kor. 8:8) Mojawapo ya hali hizo inatajwa na mtume Petro, alisema hivi: “Zaidi ya mambo yote, pendaneni sana, kwa sababu upendo hufunika dhambi nyingi.” (1 Pet. 4:8) Hivyo, udhaifu na kutokamilika kwa wengine kunaweza kujaribu upendo wetu.

14. Kulingana na 1 Petro 4:​8, tunahitaji kuwa na upendo wa aina gani? Toa mfano.

¹⁴ Sasa, tuchunguze kwa undani maneno ya Petro. Sehemu ya kwanza ya mstari wa 8 inafafanua upendo tunaopaswa kuwa nao—“pendaneni sana.” Neno linalotafsiriwa kuwa “sana” ambalo Petro ametumia, kihalisi linamaanisha “kujinyoosha” au “kuvutika.” Sehemu ya pili ya mstari huo inafafanua matokeo ya kupendana sana. Tukiwapenda sana ndugu zetu tutafunika dhambi zao. Tunaweza kuwazia hali hiyo kwa njia hii: Tunaushika upendo wetu kwa mikono miwili, kana kwamba tumeshika kitambaa kinachovutika, na tunakivuta zaidi na zaidi hadi kinafunika, si dhambi moja au mbili, bali “dhambi nyingi.” Kufunika kunamaanisha kusamehe. Kama kitambaa kinavyoweza kufunika doa, upendo unaweza kufunika udhaifu na kutokamilika kwa wengine.

15. Ikiwa upendo wetu kwa ndugu na dada zetu ni wenye nguvu sana, tutaweza kufanya nini? (Wakolosai 3:13)

¹⁵ Upendo wetu kwa wengine unapaswa kuwa na nguvu sana hivi kwamba tunaweza kusamehe kutokamilika kwa waabudu wenzetu—hata ikiwa ni vigumu kufanya hivyo. (Soma Wakolosai 3:13.) Tunapowasamehe wengine, tunaonyesha kwamba upendo wetu ni wenye nguvu na tunataka kumfurahisha Yehova. Ni jambo gani lingine linaloweza kutusaidia kusamehe makosa au tabia za wengine zinazotuudhi?

16-17. Ni jambo gani lingine linaloweza kutusaidia kusamehe makosa madogo ya wengine? Toa mfano. (Tazama pia picha.)

¹⁶ Kazia fikira sifa nzuri za ndugu na dada zako, si sifa zao mbaya. Fikiria mfano huu. Wazia uko kwenye tafrija pamoja na ndugu na dada wengine. Mnafurahia kuwa pamoja, na mwishoni mwa tafrija hiyo mnapiga picha. Na mnapiga picha mbili zaidi ili ikiwa picha ya kwanza haijatokea vizuri mweze kuchagua nyingine. Sasa una picha tatu. Lakini kwenye picha moja unaona ndugu amenuna. Utafanya nini? Utafuta picha hiyo kwa sababu katika zile picha mbili nyingine, kila mmoja ametabasamu, kutia ndani ndugu huyo.

¹⁷ Tunaweza kulinganisha picha na kumbukumbu tunazotunza. Kwa kawaida sisi huwa na kumbukumbu nzuri za pindi tulizofurahia pamoja na ndugu na dada zetu. Lakini huenda katika pindi hizo, ndugu au dada yetu anaweza kusema au kutenda jambo fulani lisilo la fadhili. Tunapaswa kufanya nini? Tunapaswa kufuta kumbukumbu hiyo mbaya, kama tunavyofuta picha isiyofaa. (Met. 19:11; Efe. 4:32) Tunaweza kufuta kumbukumbu hiyo isiyofaa ya kosa dogo la mwabudu mwenzetu, kwa sababu tuna kumbukumbu nyingi nzuri za pindi ambazo tulifurahia pamoja naye. Hizo ndizo kumbukumbu tunazotaka kutunza na kuzithamini.

KWA NINI LEO HASA TUNAHITAJI UPENDO?

18. Tumejifunza mambo gani makuu kuhusu upendo katika makala hii?

¹⁸ Kwa nini tunataka upendo miongoni mwetu uendelee kuwa na nguvu? Kama tulivyojifunza, tunapowapenda ndugu na dada zetu, tunaonyesha kwamba tunampenda Yehova. Tunawezaje kuwaonyesha upendo waabudu wenzetu? Njia moja ya kufanya hivyo ni kwa kuwafariji. Tutaweza ‘kuendelea kufarijiana’ ikiwa tutachochewa na huruma. Tunawezaje kuimarisha upendo miongoni mwetu? Kwa kujitahidi kadiri tuwezavyo kusamehe makosa ya wengine.

19. Kwa nini ni muhimu hasa leo kuonyeshana upendo?

¹⁹ Kwa nini ni muhimu hasa leo kuonyesha upendo miongoni mwetu? Ona sababu ambayo Petro aliitoa, aliposema hivi: “Mwisho wa mambo yote umekaribia. Kwa hiyo, . . . pendaneni sana.” (1 Pet. 4:​7, 8) Kadiri mwisho wa mfumo huu unavyokaribia, tunaweza kutarajia nini? Yesu alitabiri hivi alipozungumza kuhusu wafuasi wake: “Mtachukiwa na mataifa yote kwa sababu ya jina langu.” (Mt. 24:9) Ili kuvumilia chuki hiyo, tunahitaji kuendelea kudumisha umoja. Tukifanya hivyo, jitihada za Shetani za kutugawanya hazitafanikiwa, kwa sababu tutakuwa tumeunganishwa pamoja kwa upendo—“kifungo kikamilifu cha muungano.”—Kol. 3:14; Flp. 2:​1, 2.