Куартолэзь

Нырысетӥ даурын христианъёс трос шуг-секытъёсын пумиськизы, куке «быдэс дунне вылын туж секыт сютэм ар» кутскиз. Картъёс но атайёс туж сюлмаськизы, луоз, семьязылэн сиёнэз уз луы шуыса. Нош мар вераны луоз егит агайёс но сузэръёс сярысь, кудъёсызлэн тросгес тодытэмзы потэ вал? Соос малпазы, вылды, пуктэм ужпумзэс али быдэстыны уз быгатэ шуыса. Но секыт югдурзы шоры учкытэк, соос тодытэмысь ӧз дугдэ но Иудеяын улӥсь вын-агайёссылы но сузэр-апайёссылы шумпотыса юрттӥзы соин, маин быгатӥзы (Ап. уж. 11:29, 30). Соос, кинъёслы юрттэт ыстэмын вал, ас вылазы шӧдӥзы Иеговалэсь сюлмаськемзэ (Матф. 6:31—33). Вын-агайёсын но сузэр-апайёсын, кудъёсыз соослы юрттӥзы, кусыпъёссы эшшо но юнмазы, луоз. Нош соос, кинъёс юрттӥзы, мукетъёсызлы мае ке сётыса, шумпотон басьтӥзы (Ап. уж. 20:35). w23.04 16 б., 12, 13 абз.

Куддыръя Иегова милемлы юрттыны быгатэ адямиос пыр, кудъёсыз солэн ужась-тыршисьёсыз уг луо. Кылсярысь, Иегова мылкыдзэ ӝутӥз Артаксеркс эксэйлэсь Неемияез лэзьыны Иерусалиме берытскыны но сое тупатыны (Неем. 2:3—6). Туннэ но Инмар милемлы юрттыны быгатэ соос пыр, кинъёс солы уг йыбыртъяло. Малпано ӧвӧл, Иегова вӧсяськонъёсмылы ответ котьку но паймымон амалэн сётоз шуыса. Озьы ке но солэн ответъёсыз юртто милемлы солы оскымон ужаны-тыршыны. Соин ик Иеговалэсь ответъёссэ адӟыны тырше но дырын-дырын соос сярысь малпаське (Пс. 65:19, 20). Иеговалы вӧсяськыса гинэ, ми осконмес ум возьматӥське. Ми сое возьматомы соку но, куке соглаш кариськомы Иеговалэн ответъёсыныз, кыӵеесь гинэ соос медам луэ (Евр. 11:6). w23.05 12 б., 13, 15 абз.; 13 б., 16 абз.

Куке ми улонмес Иеговалы сӥзимы, ми кылмес сётӥмы пырак дауръёс ӵоже солы ужаны-тыршыны но солэсь эриксэ быдэсъяны. Ми быгатӥськомы сётэм кылмес быдэстыны, малы ке шуоно ми кылдытэмын Инмарлэсь эриксэ быдэсъяны (Усьт. 4:11). Иегова милемыз аслыз укшатыса кылдытӥз, озьы ик сое тодыны но солы йыбыртъяны мылкыд сюлмамы понӥз. Соин ик ми быгатӥськомы солы матэ кариськыны но шумпотыса солэсь эриксэ быдэсъяны. Со сяна, Инмарлэсь но солэн Пиезлэсь кылзӥськыса, ми юнматскиськомы (Матф. 11:28—30). Азьланяз но тырше Иеговаез эшшо но золгес яратыны. Со понна малпаське, мае со тӥледлы кузьмаз ини но мае со тӥледлы кузьмалоз на. Инмарез яратонды юнмамъя тӥледлы солэсь кылзӥськыны капчигес луоз (1 Иоанн 5:3). Мар Иисуслы юрттӥз Инмарлэсь эриксэ быдэсъяны? Со Иеговалэсь юрттэт куриз но вуоно бакель каронъёсыз сярысь малпаськиз (Евр. 5:7; 12:2). Иисус сямен, Иеговалэсь кужым куре но ноку эн вунэтэ, кызьы со тӥледыз бакель кароз,— со пырак улон сётоз. w23.08 27—28 б., 4, 5 абз.

Ваньмылы милемлы кельшо чидась адямиос. Ми гажаськомы соосты, кинъёс мае ке кема возьмано луо ке но, асьсэды киязы куто. Ми дунъяськомы соосты, кинъёс милесьтым янгышъёсмес чидало. Со сяна, ми тау кариськомы агайлы яке сузэрлы, кудӥз милемын Библиез дышетӥз. Ми Библиысь дышетонъёсты соку ик ӧм валалэ яке уже ӧм кутэ ке но, соос милесьтым ӧз куштӥське. Но эшшо но тау ми кариськомы Иегова Инмарлы, кудӥз милемлы бадӟым чиданзэ возьматэ! Милемлы кельше, куке мукетъёсыз милемлы чиданзэс возьмато. Но милемлы асьмелы та сямез котьку ик возьматыны капчи ӧвӧл. Кылсярысь, секыт луэ асьмеды киямы кутыны, куке, кытчы ке дыртыкумы, пробкаын сылӥськомы. Яке ми пурӟыны быгатӥськомы, куке мукетъёсызлэн ужъёссы милемыз йыркуръяськыто. Нош куддыръя малпан кылдыны быгатэ, Иеговаен сӥзем выль дунеез ми ноку ум адӟе шуыса. Вань та учыръёсын чидась луыны кулэ. w23.08 20 б., 1, 2 абз.

Иеговалэн косэмезъя, Гедеон ожгарчиосызлэсь лыдзэс ог 99 процентлы кулэстӥз. Гедеон малпаз, дыр: «Тае одно ик лэсьтоно-а? Быгатомы-а ми соку вормон басьтыны?» Озьы ке но Гедеон кылзӥськиз. Асьме нуналъёсы но тӧроос Гедеонлэсь адӟем каро — соос кылзӥсько организацимылэн кивалтэтэзлэсь, куке мае ке воштоно но мукет сямен лэсьтоно (Евр. 13:17). Гедеон Иеговалэсь кылзӥськиз, солы сётэм ужез быдэстыны кышкыт вал ке но (Суд. 9:17). Иегова Гедеонэз оскытӥз, солы юрттоз шуыса. Соин ик Гедеон юн оскиз, Инмарлэсь калыксэ утьыны быгатоз шуыса. Туннэ куд-ог шаеръёсын кивалтӥсьёс ужмес нуыны уг лэзё. Сыӵе шаеръёсын улӥсь тӧроос Гедеонлэсь адӟем каро. Соос кышкатэк кенешлэсь пумиськонъёссэ ортчыто, тодытон ужез радъяло, озьы ик асьсэос но отчы ӟырдыт мылкыдын пырисько. Таин сэрен соос пытсэтэ сюрыны, ужзэс ыштыны яке соосты жугыны но быгато. Бадӟым куректон дыръя кивалтэтлэсь кылзӥськон понна, тӧроослы кышкасьтэм сям кулэ луоз. w23.06 5—6 б., 12, 13 абз.

Иегова Иодай быдӟым священниклэн умой ужъёсыз сярысь Библие гожтӥз, милемыз дышетон понна (Рим. 15:4). Нош кулэмез бере Иодайлы нимысьтыз дан сётэмын вал. Со сярысь ми лыдӟиськомы: «Сое Давидлэн городаз эксэйёсын огазе ватӥзы, малы ке шуоно со Израильын ӟеч ужъёс лэсьтӥз Инмар понна но, Солэн коркаезлы но» (2 Пар. 24:15, 16).Иодайлэн учырез милемыз дышетыны быгатэ Инмарлэсь кышканы. Тӧроос быгато Иодайлэсь адӟем карыны, вань сюлмысьтызы кенеш сярысь сюлмаськыса но Иеговалэсь ыжъёссэ утьыса (Ап. уж. 20:28). Иодайлэн учырез арлыдоосты но юнматыны быгатэ. Соос Иеговалэсь кышкало но солы оскымон луо ке, Инмар соосты уг вунэты. Егитъёслы но умой луоз саклыксэс висъяны солы, кызьы Иегова Иодаен ассэ возиз. Соос быгато Инмарлэсь адӟем карыны, мур гажаса арлыдоосты, тужгес но соосты, кинъёс трос аръёс ӵоже ини Иеговалы ужало-тыршо (Мад. 16:31). Ойдолэ кылзомы но юрттомы соослы, кинъёс «визь-нод сёто, дышето» (1 Фес. 5:12). w23.06 17 б., 14, 15 абз.

Валан понна, макем ӵем пумиськонын кимес ӝутъяно, тани мар сярысь малпаське. Ми кимес укыр трос ӝутъямы ке, эскеронэз ортчытӥсь агайлэн малпанэз кылдоз, со милемыз гинэ ялан юаны кулэ шуыса. Нош мукетъёсызлэн кизэс ӝутъямзы уз поты ни (Екк. 3:7). Куке пумиськонын трос вын-агайёслэн но сузэр-апайёслэн валэктон сётэмзы потэ, кидэс ӝутыкуды, тӥледыз котьку ик уз юалэ, дыр. Оло нош, пумиськон куспын тӥледыз одӥг пол но юаны уз вуэ. Таин сэрен мылкыд куашканы быгатэ, но эн малпалэ, тӥледыз юри уг юало шуыса (Екк. 7:9). Мар тӥляд каремды луэ, кидэс ӝутыкуды, тӥледыз уз юалэ ке? Сак кылзэ соосты, кинъёс валэктон сёто. Пумиськон бере соосты ушъялэ. Валэктонъёс сямен ик, ушъян кылъёс вын-агайёслэсь но сузэр-апайёслэсь мылкыдзэс ӝутыны быгато. Ушъян кылъёсты вераса но, ми ог-огмес юнматыны быгатӥськомы. w23.04 23—24 б., 14—16 абз.

Инмарлэсь Кылзэ эскере но со вылын малпаське. Писпу юн сылэ мур выжыосызлы луыса. Ми но ум лябӟе, Иеговалы юн осконмы луиз ке. Писпу будэмъяз выжыоссэ мургес но мургес лэзе. Инмарлэсь Кылзэ эскерыкумы но со вылын малпаськыкумы, ми но осконмес юнматӥськомы но эшшо но умойгес валаськомы, Инмарлэн сюресэз самой умой шуыса (Кол. 2:6, 7). Малпаське, кызьы Иегова азьвыл аслэсьтыз ужась-тыршисьёссэ утьылӥз но кызьы соослы солэн курон-косонъёсыз но визь-кенешъёсыз юрттылӥзы. Кылсярысь, Иезекиильлы возьматэмын вал адӟон, кудаз кылчин храмез мертаз. Пророк та адӟонэз туж сак учкиз. Та сое юнматӥз. Та адӟон милемыз но дышетэ чылкыт йыбырттон пумысен Иеговалэн курон-косонъёсызлэсь кылзӥськыны (Иез. 40:1—4; 43:10—12). Милемлы дыр висъяно, Инмарлэн Кылысьтыз мур зэмлыкъёсты эскерон понна но соос вылын малпаськон понна. Милям сюлэммы оскымон луоз, ми быдэсак Иеговалы оскиськимы ке (Пс. 111:7). w23.07 18 б., 15, 16 абз.

Библиын гожтэмын оскымон пиосмуртъёс сярысь. Соос Иеговаез яратӥзы но солэн калыкез сярысь сюлмаськизы. Озьы ик тӥ адӟем карыны быгатӥськоды семьяысьтыды но кенешысьтыды оскымон христианъёслэсь (Евр. 13:7). Нош самой умой адӟем карон милемлы кельтӥз Иисус Христос (1 Пётр 2:21). Малпаське, кыӵе умой сямъёссы вань та пиосмуртъёслэн, но соослэсь адӟем карыны тырше (Евр. 12:1, 2). Ужъёсты дыртыса лэсьтоно ӧвӧл. Нырысь умой малпаськоно но тыршоно валаны, мар малпа со сярысь Иегова. Малпаське, малы та визь-кенеш тӥледлы пайда гинэ ваёз. Собере, та визь-кенешез лыдэ басьтыса, ужпум кутэ. Озьы тӥ Иеговаез шумпоттоды (Пс. 118:9). Та юрттоз тӥледлы зэмос христианъёс луыны (Мад. 2:11, 12; Евр. 5:14). w23.12 24—25 б., 4, 5 абз.

Школаын егит агайёслы но сузэръёслы осконзы сярысь юанъёс сётъяны быгато. Кызьы анай-атайёс нылпиоссэс дышетыны быгато лякытэн вераськыны? (Иак. 3:13). Куд-ог анай-атайёс нылпиосынызы ӵош семьяен йыбырттонзы дыръя пӧртэм адямиосын вераськыны дасясько. Соос быръё юанъёсты, кудъёссэ школаын сётыны быгато, соосты эскеро но возьмато, кызьы лякытэн но гажаса ответ сётыны луэ. Семьяен йыбырттонзы дыръя нылпиос дышетско валэктыны, малы соос оско. Соку соослэн асьсэлэн Библилы осконзы юнма. «Вопросы молодёжи» серияысь трос статьяослы, кудъёссэ jw.org сайтысь шедьтыны луэ, нылпиос понна схемаос дасямын. Соос юртто егит агайёслы но сузэръёслы осконзэс юнматыны но ас кылъёсынызы валэктон сётыны. Та статьяосты быдэс семьяен эскерыса, нылпиос но, анай-атайёс но дышетско лякытэн но зӥбыт-востэмен осконзэс утьыны. w23.09 17 б., 10 абз.; 18 б., 15, 16 абз.

Пуктӥды-а тӥ куке но ас азяды духовной ужпум, но сое быдэстыны нокызьы ӧд быгатэ? Таӵе шуг-секытэн тросэз пумиськыло. Кылсярысь, Фи́лип ас азяз ужпум пуктӥз ӵемгес вӧсяськыны. Озьы ик солэн потэ вал вӧсяськонъёсаз тросгес аслаз шӧдонъёсыз сярысь верамез. Но солы котьку ик капчи ӧй вал вӧсяськон понна дыр шедьтыны. Э́рика ас азяз ужпум пуктӥз тодытонлы сӥзем пумиськонъёсы дырыз дыръя вуылыны. Озьы ке но со котькуд пумиськонэ кадь бере кыле вал. Тӥляд вань ке ужпумды, кудзэ тӥ нокызьы но быдэстыны уд быгатӥське, со уг возьматы, тӥ пӧрмостэм адями шуыса. Огшоры ужпумъёсты быдэстон понна гинэ но, дыр но кужым кулэ. Ужпумъёстэс быдэстыны мылкыдды возьматэ: тӥ Иеговаен эшъяськондэс дунъяськоды но тӥляд сётэмды потэ солы ваньзэ умойзэ, марды тӥляд вань. Иегова тыршемдэс дунъя. Со уг возьма тӥлесьтыд сое, мае тӥ лэсьтыны уд быгатӥське (Пс. 102:14; Мих. 6:8). Соин ик ас азяды пуктоно сыӵе ужпум, кудзэ тӥ быдэстыны быгатоды. w23.05 26 б., 1, 2 абз.

Кышкасьтэм адямиос но куддыръя кышкало. Но соос кышканлы уг лэзё соослы люкетыны асьсэды шонер возьыны. Даниил туж кышкасьтэм егит пиосмурт вал. Со Инмарлэн пророкъёсызлэсь книгаоссэс эскериз, кылсярысь, Иеремиялэсь азьпалзэ ивортонзэ. Та юрттӥз солы валаны, вавилон пленын кема улэмзы ӝоген йылпумъяськоз шуыса (Дан. 9:2). Библиысь азьпалзэ ивортонъёслэн быдэсмемзы Данииллэсь Иеговалы осконзэ юнматӥз. Нош куке адями Инмарлы юн оске, со туж кышкасьтэм луыны быгатэ. (Ӵошатэ Римъёслы 8:32, 37—39.) Но самой валтӥсез, Даниил инмысь Атаезлы ӵем вӧсяськиз (Дан. 6:10). Со Иеговалы аслаз сьӧлыкъёсыз но шӧдонъёсыз сярысь вералляз. Озьы ик со Инмарлэсь юрттэтсэ куриз (Дан. 9:4, 5, 19). Даниил ми кадь ик адями вал. Озьыен со кышкасьтэм луыса ӧз вордӥськы. Со кышкасьтэм луиз, Священной Гожтэмез эскерыса, Иеговалы вӧсяськыса но солы оскыса. w23.08 3 б., 4 абз.; 4 б., 7 абз.

Кивалтӥсьёслэсь кылзӥськон милемлы но, мукетъёсызлы но пайда вае. Ми катъёслэсь кылзӥськимы ке, соку кыл кутытэмын ум луэ (Рим. 13:1, 4). Со сяна, ми пӧлысь котькудӥз кылзӥськиз ке, соку Иеговалэн Адӟись-Ивортӥсьёсыз шоры но кивалтӥсьёс умоен учкозы. Тани мар луиз Нигериын кӧня ке дасо аръёс талэсь азьло. Огпол пумиськон дыръя залэ солдатъёс пыризы. Соос утчазы соосты, кинъёс вытъёсты тыронлы пумит ӝутско. Куке офицер тодӥз, залын Иеговалэн Адӟись-Ивортӥсьёсыз люкаськемын шуыса, со солдатъёсты кошкыны косӥз. Со шуиз: «Иеговалэн Адӟись-Ивортӥсьёсыз выт тыронлы пумит уг мыно». Тӥ катъёслэсь кылзӥськиды ке, Иеговалэн калыкезлэн ӟеч нимыз луоз. Нош та азьланяз но вын-агайёсты но сузэр-апайёсты утьыны быгатоз. w23.10 9 б., 13 абз.

Иеговалэн куд-ог ужась-тыршисьёсыз та дуннелэсь пумзэ туж кема возьмало ини. Адями синмын учкыса, малпан кылдыны быгатэ, Иегова кылсётонзэ быдэстыны уг дырты шуыса. Но Инмар ужась-тыршисьёсызлэсь шӧдонъёссэс вала. Та адӟиське кылъёсысь, кудъёссэ со Аввакум пророклы вераз: «Уго адӟон возьматэ вуоно, нимысьтыз пуктэм дырез, со пумыз сярысь вера, уз пӧя; со ӝегаса ке но улӥз, возьма сое, уго одно ик быдэсмоз, уз воштӥськы» (Авв. 2:3). Та кылъёсты Инмар Аввакумлы гинэ вераз-а? Яке соос милемын но герӟаськемын? Святой духлэн валтэмез улсын апостол Павел та кылъёсты герӟаз христианъёсын, кудъёсыз выль дунеез туж возьмало (Евр. 10: 37). Соку но, куке милемлы потэ, выль дунне кема уг вуы шуыса, ми юн оскыны быгатӥськомы: Иеговалэн сётэм кылыз «одно ик быдэсмоз, уз воштӥськы». w23.04 30 б., 16 абз.

Израиль калык ӧз оскы, Моисей пыр Иегова кивалтэ шуыса (Лыд. 14:10, 11). Соин ик Инмар соослы ӧз лэзьы Сӥзем музъеме пырыны (Лыд. 14:30). Но израиль калык пӧлысь куд-огъёсыз Иеговалэсь кылзӥськизы. Кылсярысь, Инмар вераз, Халев солэсь кылзӥськиз шуыса (Лыд. 14:24). Иегова сое бакель кариз но аслыз бырйыны лэзиз Ханаанысь музъем люкетэз (Иис. Н. 14:12—14). Со сяна, луоё кыр дуннеын кулэм израиль калыклэн нылпиосыз но умой адӟем карон возьматӥзы. Соос Иеговалэсь кылзӥськизы. Куке Моисей интые Иисус Навин пуктэмын вал, соос сое гажаса, «солэсь кышкаса улыны кутскизы» (Иис. Н. 4:14). Соин ик Иегова соосты бакель кариз но Сӥзем музъеме пыртӥз (Иис. Н. 21:43, 44). w24.02 21 б., 6, 7 абз.

Куке эмъясь сюлэммылэсь жугиськемзэ эскере, со вала, сюлэммы висе-а, уг-а. Ӵапак озьы ик мукетъёсты яратэммыя валаны луэ, макем зол ми Инмарез яратӥськомы. Кылсярысь, ми шӧдӥськомы ке, вын-агайёсты но сузэр-апайёсты яратонмы сӥя шуыса, валаны луэ, Инмарез яратонмы но сӥя, дыр, шуыса. Нош ми огъя оскисьёсмылы яратонмес уж вылын возьматӥськомы ке, валаны луэ, Инмарез яратонмы но ӧз лябӟы шуыса. Вын-агайёсмес но сузэр-апайёсмес яратонмы сӥя ке, ӝегатскытэк мар ке но карыны кулэ. Малы? Малы ке шуоно со возьматэ, Иеговаен кусыпъёсмы сӧриськыны кутскизы шуыса. Апостол Иоанн та сярысь тазьы гожтӥз: «Агай-вынзэ адӟыса вылысь сое яратӥсьтэм мурт кызьы быгатоз Инмарез яратыны, Кудзэ со уг адӟы?» (1 Иоанн 4:20). Малы та милемыз дышетэ? Ог-огмес яратыса гинэ, ми Инмарлы ярамонэсь луомы (1 Иоанн 4:7—9, 11). w23.11 8 б., 3 абз.; 9 б., 5, 6 абз.

Егит дыръяз Иоас ассэ шонер возиз. Пичи дыръяз анай-атайтэк кыльыса, со Иодай быдӟым священниклэсь кылзӥськыса улӥз. Иодай та пияшез аслэсьтыз пизэ кадь будэтӥз. Со юрттӥз Иоаслы визьмо ужпум кутыны — Иеговалы ужаны-тыршыны но калыклы юрттыны солы ярамон луыны. Со сяна, Иоас Иеговалэсь храмзэ тупатъян борды басьтӥськиз (2 Пар. 24:1, 2, 4, 13, 14). Егитъёс, анай-атайды тӥледыз Иеговаез яратыны но солэсь кылзӥськыса улыны дышето ке, учке со шоры дуно кузьым шоры кадь (Мад. 2:1, 10—12). Анай-атайёс пӧртэм амалъёсын дышетыны быгато. Библия вылэ пыкиськыса сётэм визь-кенешсылэсь кылзӥськиды ке, соос шумпотозы! Нош самой валтӥсез, тӥ Инмарез шумпоттоды. Со сяна, соин кусыпъёсты эшшо но юнэсь луозы (Мад. 22:6; 23:15, 24). Соин ик егит Иоаслэсь адӟем кароно. w23.09 8—9 б., 3—5 абз.

Иегова кылзэ сётэ вӧсяськонъёсмес кылзыны. Инмар аслэсьтыз оскымон ужась-тыршисьёссэ яратэ. Соин ик со соослэсь вӧсяськонъёссэс котьку но сак кылзэ (Пс. 9:38, 39; 36:28). Но та уг возьматы, Инмар вань куронъёсмес быдэсъялоз шуыса. Оло нош, куд-ог куронъёсмы выль дуннеын гинэ быдэстэмын луозы. Иегова лыдэ басьтэ, кызьы милям куронъёсмы герӟаськемын соин, мар со малпаз музъем но адямиос понна (Ис. 55:8, 9). Инмарлэн потэ вал, музъем вылын адямиос мед улозы шуыса, кудъёсыз солэсь шумпотыса кылзӥськысалзы. Но Шайтанлэн верамезъя, адямиос Инмартэк шудогес луозы (Ул.-выл. 3:1—5). Шайтан пӧяське шуыса возьматон понна, Иегова адямиослы лэзиз асьсэлы кивалтыны. Али адямиос кивалто бере, дунне шуг-секытъёсын тырмемын (Екк. 8:9). Ми валаськомы, Иегова со шуг-секытъёсты али уз быдты шуыса. w23.11 21 б., 4, 5 абз.

Иегова кылзэ сётӥз, Авраам пыр «вань калык выжыос бакель каремын луозы» шуыса. Но куке Авраамлы 100 арес вал, нош Сарралы — 90, соослэн пизы вордӥськемын ӧй вал на. Адями синмын учкыса, осконтэм кадь вал, соослэн пиналзы вордӥськоз на шуыса. Та учыр Авраамлэсь осконзэ эскериз. Но со оскиськиз, трос калыкъёслы атай луоз шуыса. Со Авраамлэсь осконзэ юнматӥз (Рим. 4:18, 19, ВД). Кызьы ми тодӥськомы, солэн кема витем Исаак пиез вордӥськиз (Рим. 4:20—22). Авраамлэн учырез возьматэ: ми быгатӥськомы Инмарлы ярамон луыны но соин эшъяськыны. Та сярысь гожъяз Павел: «Нош Гожтэмысь та кылъёс: „Шонерлык шуыса гожтӥз”, солы [Авраамлы] огназлы гинэ верамын ӧй вал, асьмелы но верамын вал. Асьмелэн осконмы шонерлык шуыса гожтӥськоз,— асьмелы, Солы оскисьёслы, Кин Кузё-Инмармес Иисус Христосэз кулэмысь улӟытыса султытӥз» (Рим. 4:23, 24). Авраамлы кадь ик, милемлы но Иеговалы осконо, ӟеч ужъёс лэсьтоно но, номыр шоры учкытэк, возьмано Иеговалэн кылсётонъёсызлэсь быдэсмемзэс. w23.12 7 б., 16, 17 абз.

Шуг-секытъёсын пумиськыкумы, тодамы возёно, Иегова тодэ шуыса, кыӵе шуг-секытъёсын ми пумиськиськомы но мае шӧдӥськомы. Кылсярысь, Инмар адӟиз, кыӵе шуг-секытъёсын израиль калык Египетын пумиськиз но макем солы секыт вал (Пот. 3:7). Бадӟым шуг-секытъёс дыръя кышкаменымы сэрен куддыръя Инмарлэсь юрттэмзэ адӟыны секыт луэ. Соку мар кароно? Инмарлэсь куроно, ми солэсь юрттэмзэ мед адӟомы шуыса (3 Экс. 6:15—17). Оло нош, тӥледыз юнматӥз кенешын верам речь яке кинлэн ке валэктонэз. Оло нош, тӥледыз юнматӥз сайтысьтымы статья, видеоролик яке кырӟан. Оло нош, тӥледлы кин ке но юнматӥсь малпан яке Библиысь кылбур вераз. Куддыръя ми вунэтӥськомы, огъя оскисьёсмы но духовной сиён — со Инмарлэн кузьымъёсыз шуыса (Ис. 65:13, 14; Марк 10:29, 30). Иеговалэн та кузьымъёсыз возьмато, со милемыз яратэ но со вылэ котьку оскиськыны луэ шуыса (Ис. 49:14—16). w24.01 4—5 б., 9, 10 абз.

Инме ӝутскемез азьын Иисус дышетскисьёсызлы тодазы вайытӥз, соос «Иерусалимын но, быдэс Иудеяын но, Самарияын но, быдэс музъемлэн пумысеныз пумозяз ик» со сярысь тодытыны кулэ шуыса (Ап. уж. 1:8; Лука 24:46—48). Та бере ӝоген иудейёслэн религиозной кивалтӥсьёссы Пётрез но Иоаннэз кутӥзы но Сӥнедрионэ вайизы. Соос та оскымон ужась-тыршисьёсты косӥзы тодытэмысь дугдыны. Соосты кышкатӥзы но (Ап. уж. 4:18, 21). Соослы пумит Пётр но Иоанн шуизы: «Асьтэос судить каре: Инмар азьын шонер-а луоз, Инмарез сярысь, тӥледыз золгес кылзӥськыны? Ми ум быгатӥське адӟеммес но, кылэммес но вератэк улыны» (Ап. уж. 4:19, 20). Куке Пётрез но Иоаннэз лэзизы, дышетскисьёс Иеговалэсь юрттэтсэ курыны кутскизы солэсь эриксэ быдэсъяны. Иегова сюлмысь вӧсяськемзылы ответ сётӥз (Ап. уж. 4: 31). w23.05 5 б., 11, 12 абз.

Иегова но Иисус трос миллион аръёс ӵоже ӵош улӥзы. Со дыр куспын соослэн кусыпъёссы туж матынэсь луизы. Иегова Иисуслы вера вал, сое яратэ шуыса. Та сярысь гожтэмын туннэлы кылбурын. Иегова вераны быгатэ вал: «Со бордын Мынам ӟеч эрике». Но ми мед тодомы шуыса, макем юн со Иисусэз яратэ, Иегова вераз: «Та Мынам Яратоно Пие». Иегова данъяське вал соин, мае Иисус лэсьтӥз ини, но быдэсак оске вал, Иисус азьланяз но аслаз ужъёсыныз сое шумпоттоз шуыса (Еф. 1:7). Иисус тодэ вал, Атаез сое яратэ шуыса, но солэсь яратэмзэ ас вылаз шӧдэ вал. Соин ик со ӵем вералляз Атаезлэн яратонэз сярысь (Иоанн 3:35; 10:17; 17:24). w24.01 28 б., 8 абз.

Пуктэ син азяды таӵе учырез: адями, кудзэ тӥ яратӥськоды, тӥ сярысь оло мар но супыльтыса ветлэ. Тӥ тодӥськоды, со зэм ӧвӧл шуыса, но куд-огъёсыз солы оско. Со сяна, соос мукетъёсызлы но сое верало на. Кыӵе тӥляд шӧдонъёсты кылдозы соку? Юнме кыл вӧлдон тӥлесьтыд сюлэмдэс вӧсь кароз, дыр. Та пример милемлы валаны юрттэ, кыӵе шӧдонъёсыз кылдӥзы Иеговалэн, куке солэсь ӟеч нимзэ саптазы. Одӥг кылчин нырысетӥ кышномуртлы, Евалы, Иегова сярысь шонертэмзэ вераз. Со солы оскиз. Озьы нырысетӥ адямиослэн Иеговаен кусыпъёссы сӧриськизы но дунне вылэ сьӧлык но кулон вӧлмиз (Ул.-выл. 3:1—6; Рим. 5:12). Вань курадӟонъёс — кулон, ожъёс, шуг-адӟонъёс — Шайтанлэн пӧяськемез бордысь пото. Иеговалы туж вӧсь вал кылыны, кызьы солэсь ӟеч нимзэ саптазы но кытчы со вуттӥз. Озьы ке но Иегова ӧз куатаськы но вожпотонэзлы ӧз сётскы. Библиын верамын, со шудо Инмар шуыса (1 Тим. 1:11). w24.02 8 б., 1, 2 абз.

Кызьы тӥ Иосифлэсь адӟем карыны быгатӥськоды? Али ик ужпум кутэ, мар кароды, визь сынаськон кылдыку. Дышетске соку ик палэнтыны сое, мае Иегова адӟемпотостэм каре. Эн ик малпалэ со сярысь, мар Инмарез ӝоже уськытысал (Пс. 96:10; 118:165). Соку тӥ визь сынаськонлы уд сётске. Шуом, тӥ оскиськоды, зэмлыкез шедьтӥды шуыса, но вань сюлмыныды Иеговалы ужамды-тыршемды потэ, озьы ке но сӥзиськыны но пылатӥськыны уд дӥсьтӥське. Мар соку кароно? Тӥ быгатӥськоды адӟем карыны Давид эксэйлэсь. Вӧсяське Иеговалы: «Чакла-эскеры монэ, Инмаре, тод, мар мынам сюлмам. Чакла-эскеры монэ, тод мынэсьтым малпанъёсме. Учкы, кышкыт сюрес вылын ӧвӧл-а мон,— бырисьтэм улон сюрес вылтӥ ну монэ» (Пс. 138:23, 24). Таӵе вӧсяськон возьматоз, тӥ Иеговалэсь юрттэтсэ утчаськоды но улондэс Инмарлы сӥзьыны но пылатӥськыны тыршиськоды шуыса. Нош Иегова «Ассэ утчасьёсты» бакель каре (Евр. 11:6). w24.03 6 б., 13—15 абз.

Быдӟым священникъёс калыклы юртто вал Инмарен умой кусыпъёс возьыны. Нырысетӥез быдӟым священник, Аарон, ужаны-тыршыны кутскиз, куке скиния усьтэмын вал. Но, кызьы валэктӥз апостол Павел, «священникъёс трос вал, малы ке шуоно одӥг муртлы священникын кема возиськыны кулон маза ӧз сётылы» (Евр. 7:23—26). Со быдӟым священникъёс сьӧлыкоесь вал. Соин ик асьсэлэн сьӧлыкъёссы понна курбонъёс вайылӥзы. Нош Иисус Христослы сое лэсьтоно ӧй вал. Иисус Христос Быдӟым священникмы ужа-тырше «зэмос скинияын», кудзэ «адями ӧз, Кузё-Инмар пуктӥз-ӝутӥз» (Евр. 8:1, 2). Павел валэктӥз, Иисус «пумтэм вапумъёс ӵоже улӥсь, священник луонэз но Солэн пумтэм вапумъёс ӵоже улэ» шуыса. Озьы ик со ватсаз, Иисус дун-шектэм, «сьӧлыкоослэсь висъямын» шуыса. Со сяна, Израильысь быдӟым священникъёслы кадь, Иисуслы «нуналлы быдэ... аслаз сьӧлыкъёсыз понна... курбон сётыны кулэ ӧвӧл». w23.10 26 б., 8, 9 абз.

«Азьвылэз ин» возьматэ дунне вылысь кивалтэтъёсты, кудъёсыз Шайтанлэн но периослэн киулазы возисько (Матф. 4:8, 9; 1 Иоанн 5:19). Нош Библиысь «музъем» кыл музъем вылын улӥсь адямиосты возьматыны быгатэ (1 Пар. 16:31; Пс. 95:1). Озьыен, «азьвылэз музъем» — со асьме нуналъёсы улӥсь лек адямиос. Иегова туала «инмез» но «музъемез» тупатъяса уз улы. Со соосты быдтоз. Соос воштэмын луозы «выль инлы но выль музъемлы» — выль кивалтэтлы но выль адямиослы. Иегова музъемез райлы пӧрмытоз но адямиосты тырбыдэс кароз. Исаия пророк азьло ик вераз, музъеммы нош ик чебер Едем сад кадь луоз шуыса. Ми пӧлысь котькудӥз шӧдоз, кызьы со бурме но солы кужым пыре. Чутъёс, синтэмъёс но пельтэмъёс бурмозы. Кулэмъёс но улӟозы! (Ис. 25:8; 35:1—7). w23.11 4 б., 9, 10 абз.

«Бадӟым куректон» шӧдтэк шорысь лыктоз (Матф. 24:21). Бадӟым куректон пӧртэм луоз мукет шимучыръёслэсь, малы ке шуоно ми тодӥськомы, со вуоз шуыса. Ог 2000 ар талэсь азьло Иисус аслаз дышетскисьёсызлы вераз, со нуналлы дась луоно шуыса. Ми дасяськимы ке, милемлы капчигес луоз со секыт дыре юн луыны но мукетъёсызлы юрттыны (Лука 21:36). Соку ми быгатомы Иеговалэсь кылзӥськыны но оскыны, со милемыз утёз шуыса. Нош мар ми каромы, агайёсмы улэм-вылэмзэс ыштӥзы ке? (Авв. 3:17, 18). Соослы юрттон понна, милемлы кулэ гажась-жалясь луыны. Кызьы ми асьмеды возёмы, куке калыкъёслэн огазеяськонзы ми вылэ урдскоз но милемлы кыӵе ке дыр ӵоже мукет агайёсын но сузэръёсын ӵош пичи интыын ватскыса улоно луоз? (Иез. 38:10—12). Со секыт дырез чидан понна, милемлы соосты юн яратоно луоз. w23.07 2 б., 2, 3 абз.

Картъёс но кышноос тросэзлы дышетскыны быгато Акилалэсь но Прискиллалэсь, кудъёссэ нырысетӥ даурын тросэз христианъёс яратӥзы (Рим. 16:3, 4). Со кузпалъёс ӵошен ужазы, тодытӥзы но мукетъёсызлы юрттӥзы (Ап. уж. 18:2, 3, 24—26). Учконо ке, Библиын Акила и Прискилла сярысь нимаз ноку уг вераськы. Кызьы кузпалъёс соослэсь адӟем карыны быгато? Малпаське лэсьтоно ужъёсты сярысь. Соос трос, дыр. Быгатысалды-а тӥ мае ке ӵош быдэсъяны? Кылсярысь, Акила но Прискилла ӵош тодытӥзы. Нош тӥ ӵош тодытон понна дырдэс висъяськоды-а? Со сяна, Акила но Прискилла ӵош ужазы. Тӥ пӧртэм интыосын ужаськоды ке но, быгатысалды-а тӥ корка котырысь ужъёстэс ӵош быдэсъяны? (Екк. 4:9). Тӥ мае ке ӵош лэсьтӥды ке, тӥледлы капчигес луоз шӧдыны, тӥ одӥг команда шуыса. Озьы ик ог-огеныды тросгес вераськыны быгатоды. w23.05 22—23 б., 10—12 абз.

Котькуд адямилэн аслаз кышканъёсыз вань. Кылсярысь, куке Давид сьӧры Саул эксэй уйиськиз, со кышказ но Геф филистим каре пегӟиз. Ӝоген Геф карлэн Анхус эксэезлы веразы, Давид — туж кужмо ожгарчи шуыса, кудӥз сярысь израиль калык кырӟан но гожтӥз. Со кырӟанын вераськиз, Давид филистим ожгарчиос пӧлысь «дасо сюрсъёссэ» погыртӥз шуыса. Давид сюлмаськиз, Анхус сое виыны малпалоз шуыса. Соин ик Давид «юн кышказ» (1 Экс. 21:10—12). Мар юрттӥз Давидлы кышканзэ вормыны? Давид 55-тӥ псаломын вера, кыӵе солэн шӧдонъёсыз вал Геф карын дыръяз. Со валэктэ, малы со кышказ но кызьы кышканзэ вормиз. Кышкыт дыръя со Иегова вылэ оскиськиз (Пс. 55:2—4, 12). Инмар солы юрттӥз. Давид визьтэм улэ аналскиз но, Анхус сое улляны косӥз. Озьы Давид пегӟыны быгатӥз (1 Экс. 21:13—22:1). w24.01 2 б., 1—3 абз.

Кинъёс сярысь вераське туннэлы кылбурын? Улӟытэм зырӟем христианъёс сярысь. Татысь адӟиське, одӥгез уж, кудӥз инме ӝутскемзы бере соослы нырысь ик сётэмын луоз,— со ожмаськон. Зырӟем христианъёс Иисусэн но солэн святой кылчинъёсыныз ӵош Инмарлэн тушмонъёсыныз ожмаськозы. Со берпуметӥез ожмаськон луоз. Малпалэ гинэ! Куд-ог зырӟем христианъёс арлыдоесь но лябесь ини. Нош инме ӝутскемзы бере соос кужмоесь, ноку кулӥсьтэм духъёс луозы. Иисус Христос Эксэен ӵош соос Армагеддон ожын ожмаськозы. Та ож йылпумъяськем бере соос Христосэн ӵош адямиослы юрттозы тырбыдэсэсь луыны. Ӵошатоно ке со дырен, куке соос тырбыдэстэм адямиос вал, инмысен зырӟем христианъёс музъем вылысь яратоно вын-агайёссы но сузэр-апайёссы понна тросгес лэсьтыны быгатозы! w24.02 6—7 б., 15, 16 абз.

Куд-огъёсыз Инмарлы сӥзиськыны но пылатӥськыны дась ини, но та вамышъёсты лэсьтыны уг дӥсьто. Соос кышкало, вылды, пылатӥськемзы бере бадӟым сьӧлык лэсьтозы но соосты кенешысь поттозы шуыса. Тӥляд но таӵе ик малпанъёсты кылдо ке, юн оске, Иегова тӥледлы «котьмар ласянь Солы тэрытскыса» улыны юрттоз шуыса (Кол. 1:10). Озьы ик со тӥледлы кужым сётоз асьтэды шонер возьыны. Трос вын-агайёс но сузэр-апайёс ас вылазы шӧдӥзы ини, Инмар вылэ оскиськыны луэ шуыса (1 Кор. 10:13). Христиан кенешысь туж ӧжытсэ гинэ потто. Та возьматэ, Иегова аслаз ужась-тыршисьёсызлы солы оскымон кыльыны юрттэ шуыса. Котькуд тырбыдэстэм адями визь сынаськонъёсын пумиськылэ (Иак. 1:14). Но тӥ асьтэос бырйиськоды, соослы сётсконо-а, ӧвӧл-а. Тӥ асьтэос ужпум кутӥськоды, кызьы асьтэды возёно. Куд-огъёсыз та пумысен воксё мукет сямен малпасько ке но, тӥ быгатӥськоды шонертэм мылпотонъёстэс палэнтыны. w24.03 4—5 б., 11, 12 абз.