Инвожо

Иегова нырысетӥ даурысь христианъёсты бакель кариз, воштӥськем югдурлы тупатскемзы понна. Соосты ӵем уйылӥзы-уллязы, ӵем дыръя чик малпамтэ шорысь. Эскеромы, мар луиз Варнаваен но апостол Павелэн, куке соос Листра карын тодытӥзы. Нырысь соосты туж умой пумитазы. Но берлогес, тушмонъёссылэн узатэменызы сэрен, Павелэз изъёсын жугизы но кулыны кельтӥзы (Ап. уж. 14:19). Озьы ке но Варнава но Павел мукет интые тодытыны кошкизы. Кыӵе пайда со вайиз? «Трос муртъёс дышетскись радэ пыризы», озьы ик Варнавалэн но Павеллэн кылъёссы но ужъёссы огъя оскисьёссэс юнматӥзы (Ап. уж. 14:21, 22). Варнава но Павел малпамтэ шорысь кылдэм уйылон-уллянъёслы ӧз сётске бере, со тросэзлы пайда вайиз. Ми но, номыр шоры учкытэк, Иеговалэсь ужзэ быдэсъямы ке, Иегова милемыз бакель кароз. w23.04 16—17 б., 13, 14 абз.

Быдэс улонэз ӵоже Давид эксэй трос тушмонъёсын пумиськылӥз. Соин ик со трос пол вазиськылӥз Иеговалы юрттэт курыса. Давид юн оскиз, Иегова солэсь вӧсяськонъёссэ кылэ но соослы ответ сётэ шуыса. Талы тӥ но оскыны быгатӥськоды. Библия милемыз оскытэ, ваньзэ чидан понна, Иегова милемлы визьлык но кужым одно ик сётоз шуыса. Со милемлы юрттыны быгатэ огъя оскисьёсмы пыр, озьы ик соос пыр но, кинъёс солы уг йыбыртъяло. Зэм, куддыръя Иегова ответ уг сёты озьы, кызьы ми возьмаськомы. Но ми тодӥськомы, со одно ик ответ сётоз шуыса. Со сётэ сое, мар кулэ, но соку, ку со кулэ. Соин ик азьланяз но Иеговалы вӧсяське. Юн оске: со тӥ сярысь сюлмаськоз али но, выль дуннеын но, кудаз вань ужась-тыршисьёсызлэсь мылкыд каронъёссэс быдэстоз (Пс. 144:16). w23.05 8 б., 4 абз.; 13 б., 17, 18 абз.

Саклыктэс висъялэ солы, кыӵе пайда ваёз тӥледлы ужпумдэс быдэстон. Нош кыӵе пайда со вайыны быгатэ? Тӥляд ужпумды герӟаськемын ке Библиез лыдӟонэн яке вӧсяськонэн, малпаське, макем юнмалозы Иеговаен кусыпъёсты (Пс. 144:18, 19). Тӥляд потэ ке кыӵе ке христиан сямдэс будэтэмды, малпаське, макем умойгес луозы мукетъёсыныз кусыпъёсты (Кол. 3:14). Умой луысал пыр-поч гожтыны, кыӵе пайда ваёз тӥледлы ужпумдэс быдэстон. Гожтэмдэс ялан учкылэ. Дырдэс ортчытъялэ соосын, кинъёс тӥледлы ужпумдэс быдэстыны юрттозы (Мад. 13:21). Зэмзэ вераса, котькудмылэн луо сыӵе нуналъёсыз, куке ужпуммес быдэстыны мылкыдмы ӧвӧл. Возьматэ-а та, ми сое быдэстыны ум быгатэ шуыса? Уг. Азьлань мынон понна, ми быгатӥськомы мукет амалъёсты уже кутыны. Со понна асьмеды киямы кутыны кулэ. w23.05 27—28 б., 5—8 абз.

Ми валаськомы ке, лэсьтэм ужъёсмы понна кыл кутӥськомы шуыса, ми сьӧлыкъёсмес ум ватэ, янгышъёсмес тупатомы но азьланяз соосты ум лэсьтэ. Соку ми бызёно сюрес вылысь ум коже. Тӥ урод уж лэсьтӥды ке, мар тӥ карыны быгатӥськоды? Валалэ, ортчемзэ тупатыны уг луы ини шуыса. Оло нош, тӥ асьтэды шонере поттыны тыршиськоды. Оло нош, асьтэды яке кинэ ке мукетсэ янгыше уськытӥськоды. Талы кужымдэс эн быдтэ. Со интые, янгыштэс валалэ но лэсьтэ ваньзэ, мае али карыны быгатӥськоды. Лэсьтэм ужды понна тӥ асьтэды янгыше уськытӥськоды ке, зӥбыт-востэмен Иеговалы вӧсяське но куре сое тӥледыз простить карыны (Пс. 24:11; 50:5, 6). Озьы ик куре тӥледыз простить карыны сое, кинэ тӥ вӧсь кариды. Кулэ ке, тӧроослы юрттэт курыса вазиське (Иак. 5:14, 15). Асьтэлэн янгышъёсты вылын дышетске но азьланяз соослэсь палэнскыны тырше. Соку тӥ оскыны быгатоды, Иегова тӥледыз гажалоз-жалялоз но тӥледлы юрттоз шуыса (Пс. 102:8—13). w23.08 28—29 б., 8, 9 абз.

Куке Иоасэз Иодай дышетылӥз, Иоас ассэ шонер возиз. Солы луыса егит эксэйлэн Иеговаез шумпоттэмез потэ вал. Но Иодайлэн кулэмез бере Иоас кылзыны кутскиз Иудеяысь кивалтӥсьёсты, кудъёсыз Иеговаез кельтӥзы (2 Пар. 24:4, 17, 18). Та Инмарлэсь сюлэмзэ туж вӧсь кариз. «Соосты Кузё-Инмар пала берыктон понна Кузё-Инмар соос доры пророкъёсты ыстылӥз... нош соос кабыл ӧз басьтэ». Соос ӧз кылзэ Иодайлэсь пизэ но, Захарияез, кудӥз Иеговалэн пророкез но священникез луыса ужаз-тыршиз, озьы ик Иоаслэн ӵыжы-выжыез вал. Иоас Захарияез виыны косӥз (2 Пар. 22:11; 24:19—22). Иоас Иеговалэсь кышкамысь дугдӥз. Иегова шуиз: «Монэ сантэмасьёс возьытэ вуттэмын луозы» (1 Экс. 2:30). Берлогес ӧжыт гинэ сири ожгарчиос Иоаслэсь трос ожгарчиоссэ быдтӥзы, нош ассэ вӧсь каризы (2 Пар. 24:24, 25). Иоаслэн ожгарчиосыз сое ассэ виизы, Захарияез виемез понна. w23.06 18—19 б., 16, 17 абз.

Апостол Павел Ефесын кема дыр ӵоже улӥз. Со ӟеч иворез тодытӥз но дышетскисьёсты дасяз (Ап. уж. 19:1, 8—10; 20:20, 21). Павел агайёссэ но сузэръёссэ туж яратӥз, соин ик солэн потэ вал, соос Иеговалы оскымонэсь мед кылёзы шуыса. Азьло Ефес карын улӥсьёс зэмос луисьтэм инмаръёслы йыбыртъязы но асьсэлэн сям-йылолъёссыя улӥзы. Соос выемын вал азон-калгонэн герӟаськем ужъёс пӧлы. Театръёсын но религиозной праздникъёс дыръя юрӟым вераськонъёс вӧлмемын вал (Еф. 5:3). Тросэз сыӵе ужъёсын пичи но возьдаськытэк выризы (Еф. 4:17—19). Соос уг тодо вал, мае Иегова ӟечен лыдъя, нош мае — уродэн. Соин ик возьытлыксы соосты нокӧня но ӧз йырйы. Тӥни малы Павел гожтӥз: «Соос визьмынызы сураськемын, Инмар бордын улонлэсь палэнскемын». Но Ефесын улӥсьёс пӧлысь куд-огъёсыз пеймытлыкысь потӥзы. w24.03 20 б., 2, абз.; 21 б., 4—6 абз.

Гедеон судьялы, солы сётэм ужез быдэстон понна, туж тыршыны кулэ вал. Куке уйин ожмаськемзы бере мадиан калык пегӟыса кошкиз, Гедеон соос сьӧры уйиськиз. Со соосты уйиз Изреель нёжалысен Иордан шурозь (Суд. 7:22). Гедеон Иордан азьын дугдӥз-а? Ӧз! Со но солэн 300 ожгарчиосыз жадизы ке но, соос, шур вамен потыса, азьланяз но тушмонъёссэс уйизы. Собере соос мадиан калыкез сутӥзы но пазьгизы (Суд. 8:4—12). Гедеон юн оскиз, Иегова солы кужым сётоз шуыса. Инмар озьы ик лэсьтӥз (Суд. 6:14, 34). Куке Гедеон но солэн ожгарчиосыз мадиан эксэйёсты уйизы, соос израиль ожгарчиослэсь верблюдъёс вылын ворттыса пегӟизы. Нош израиль ожгарчиос соос сьӧры пыдын уйиськизы (Суд. 8:12, 21). Озьы ке но Инмарлэн юрттэменыз соос тушмонъёссэс сутӥзы но пазьгизы. Туннэ но тӧроос юн оскыны быгато, кулэ дыръяз Иегова соослы кужым сётоз шуыса, малы ке шуоно «Со уг жадьы, уг катьтэммы» (Ис. 40:28, 29). w23.06 6 б., 14, 16 абз.

Кыӵе гинэ шуг-секытъёсын ми медам пумиське, милям сюлэммы оскымон луыны быгатэ. Соин ик Иеговалы оске. Эскеромы, кызьы Иеговалэн кивалтэтэз Варак судьялы юрттӥз вормон басьтыны. Израиль калыклэн щитъёсыз но, шибодыосыз но ӧй вал. Озьы ке но Иегова Варакез косӥз Ханаанысь Сӥсараен ожмаськыны. Со кивалтӥз ожгарчиосын, кудъёсызлэн трос ожмаськон тӥрлыкъёссы вал (Суд. 5:8). Азьпалзэ тодытӥсь Девора Вараклы шуиз нёжалэ васькыны, кытын Сӥсара 900 ожмаськон уробоосыныз сылӥз. Кыр интыын Сӥсара Варакез капчиен вормыны быгатэ вал. Но Варак кылзӥськиз. Куке солэн ожгарчиосыз Фавор гурезьысь васько вал, Иегова инмысен туж зол зор лэзиз. Сӥсаралэн ожмаськон уробоосыз дэрие нӧдӥзы. Озьы Инмар Вараклы вормон кузьмаз (Суд. 4:1—7, 10, 13—16). Инмар милемлы но вормон кузьмалоз, ми оскимы ке солы но солэн кивалтэтэзлы, кудзэ со аслаз организациез пыр сётэ. w23.07 19 б., 17, 18 абз.

Чидан туж герӟаськемын утиськонэнымы. Вашкала дыръя Инмарлы оскымон адямиос чидаса возьмазы, ку со аслэсьтыз кылсётонъёссэ быдэстоз. Милемлы но озьы ик кароно (Евр. 6:11, 12). Библия христианъёслэсь мылкыдзэс ӝутэ музъемен ужасьлэсь адӟем карыны (Иак. 5:7, 8). Со бусызэ кизе, со вылэ ву киська. Но со пыр-поч уг тоды, ку кизем кидысъёсыз удалозы. Соин ик со чидаса возьма но юн оске, емышъёсты бичалоз шуыса. Милям но ужъёсмы туж трос — ми Иисус Христослэсь ужзэ быдэсъяськомы, «кӧняетӥ часын... [со] лыктоз» ум тодӥське ке но (Матф. 24:42). Ми чидаса возьмаськомы но юн оскиськомы, пуктэм дыре Иегова сётэм кылзэ быдэстоз шуыса. Чиданмы ӧжыт луиз ке, возьманы милемлы секыт луоз но ми Иеговалэсь палэнскыны кутскомы. Озьы ик ми кутскомы вырыны сыӵе ужъёсын, кудъёсыз, ми малпамъя, али ик милемыз шудо карозы. Но ми чидасесь луимы ке, соку пумозяз юн луомы но утиськомы (Мих. 7:7). w23.08 22 б., 7 абз.

Азьпалзэ ивортонэз, кудӥз гожтэмын Данииллэн 2:41—43, ӵошатоно ке Данииллэн книгаысьтыз но Усьтӥськон книгаысь мукет азьпалзэ ивортонъёсын, валаны луэ: пыдъёс возьмато Англо-Американской дунневыл державаез, кудӥз али та дуннеын самой кужмо луэ. Та дунневыл держава сярысь Даниил вераз, солэн «оглюкетэз юн луоз, нош мукетыз шальтрамын луоз» шуыса. Малы солэн оглюкетэз шальтрамын луоз? Малы ке шуоно огшоры адямиос, кудъёсыз горшок лэсьтон сюен ӵошатӥсько, та дунневыл державалы люкето вань кужымзэ поныса кивалтыны. Сульдэр сярысь Данииллэн верамез куд-ог кулэ луись зэмлыкъёсты усьтэ. Нырысетӥез, Англо-Американской дунневыл державалэн туж бадӟым кужымез вань. Со сое кӧня ке пол возьматъяз ини. Кылсярысь, Великобритания но Огазеяськем Штатъёс вал шаеръёс пӧлын, кудъёсыз кыказ ик дунневыл ожъёсын вормон басьтӥзы. Но та дунневыл державалэсь кужымзэ лябӟыто солэн кивалтэмез улсын ик улӥсьёс. Соос кивалтэтлы пумит ӝутскыло но ог-огенызы нюръясько. Таӵе югдур луоз азьланяз но. Кыкетӥез, ӵапак та дунневыл держава кивалтоз, куке Инмарлэн Эксэйлыкез адямиослэсь вань кивалтэтъёссэс быдтоз. w23.08 10—11 б., 12, 13 абз.

Куддыръя, шуг-секытъёсын пумиськыса, Давид малпа вал, номыр карыны уг быгаты ини шуыса (Пс. 17:5, 6). Но Иегова солы юрттэ вал. Вераны луоз, Инмар катьтэммем эшсэ «удалтэм турыно возь вылын... кӧлытэ, визыл кошкись ву дуре нуллэ» вал шуыса. Талы луыса Давидлы кужым пыре вал но, со нош ик быгатэ вал Инмарлы ужаны-тыршыны (Пс. 17:29—33). Ми но шуг-секытъёсын пумиськылӥськомы. Но Иегова милемлы юрттэ (Бӧрд. 3:22; Кол. 1:11). Давидлэн трос кужмо тушмонъёсыз вал бере, вал трос учыръёс, куке сое виыны быгато вал. Но Иеговалэн яратэмез юрттӥз солы кышкатэк улыны. Давид котьку шӧдӥз, Иегова соин ӵош шуыса. Соин ик со Иегова сярысь кырӟаз: «Со... вань кышкытлыкъёслэсь монэ мозмытӥз» (Пс. 33:5). Давидлэн кышканы мугъёсыз вал ке но, Иеговалэн юн яратэмез юрттӥз солы кышканзэ вормыны. w24.01 30 б., 15—17 абз.

Мар пумысен Иоаслэсь адӟем кароно ӧвӧл? Иодай быдӟым священниклэн кулэмез бере Иоас эшъяськыны кутскиз соосын, кинъёс сое уродэзлы дышетӥзы (2 Пар. 24:17, 18). Со кылзӥз Иудеяысь кивалтӥсьёсты, кудъёсыз Иеговаез ӧз яратэ. Иоаслы соослэсь палэнын возиськоно вал, малы ке шуоно соос урод ужъёс лэсьтӥзы. Но со соосты кылзӥз. Куке Иодайлэн Захария пиез Иоасэз визьманы турттӥз, Иоас сое виыны косӥз (2 Пар. 24:20, 21; Матф. 23:35). Макем кышкыт уж со лэсьтӥз! Егит дыръяз Иоас умой ужъёс лэсьтӥз, нош берло зэмос йыбырттонлэсь палэнскиз но адямиез вииз. Нош сое ассэ аслаз ляльчиосыз ик виизы (2 Пар. 24:22—25). Иоас азьланяз но Иеговаез но солэсь эшъёссэ кылзысал ке, со воксё мукет сямен улысал. w23.09 9 б., 6 абз.

Иисус тодӥз, Пётр Инмарлы оскымон кыльыны быгатоз шуыса. Соин ик Иисус сое лякытэн оскытӥз: «Эн курда». Иисуслэн та кылъёсыз Пётрлэсь улонзэ воштӥзы. Берлогес со но Андрей выныз чорыган ужзэс кельтӥзы но Мессия сьӧры мынӥзы. Та понна Иегова соосты туж бакель кариз (Марк 1:16—18). Иисус сьӧры мыныса, Пётр трос паймымон ужъёсты адӟиз. Солэн син азяз Иисус висисьёсты бурмытъяз, периосты улляз но кулэмъёсты улӟытъяз (Матф. 8:14—17; Марк 5:37, 41, 42). Озьы ик Пётр вал соос пӧлын, кинъёс азьын Иисус вуоно Эксэй кадь возьматскиз. Тае Пётр вань улытозяз тодаз возиз (Марк 9:1—8; 2 Пётр 1:16—18). Со Иисуслэн дышетскисез ӧй луысал ке, та паймымон ужъёсты ноку ӧй адӟысал. Пётр туж шумпотӥз, вылды, кышканъёсызлы но урод малпанъёсызлы ӧз сётскы но та бакель каронъёсты басьтӥз шуыса. w23.09 21 б., 4, 5 абз.

Нырысетӥ гожтэтаз апостол Пётр валэктӥз: сюлмысь яратон милемлы юрттоз «трос сьӧлыкъёсты» простить карыны (1 Пётр 4:8). Оло нош, Пётр тодаз вайиз, кызьы трос аръёс солэсь азьвыл Иисус сое дышетӥз простить карыны. Соку Пётр малпа вал, вылды, вын-агаез сизьым пол простить карыны — со туж умой шуыса. Но Иисус солы шуиз: «Уг шуиськы тыныд „сизьым пол“, но сизьымдонэз сизьым пол йылэтытозь». Татысь адӟиське: лыдъяно ӧвӧл, кӧня пол тон адямиез простить карид (Матф. 18:21). Тӥледлы та туж секыт потэ ке, кидэс эн лэзе! Ми ваньмы сьӧлыкоесь, соин ик простить карыны секыт луэ. Но милемлы лэсьтоно ваньзэ, мае быгатӥськомы, мукетъёссэ простить карон но соосын кусыпъёсмес тупатон понна. w23.09 29 б., 12 абз.

Иона Иеговалэсь ӧз кылзӥськы ке но, со оскиз, Инмар солэсь ӧпкелемзэ адӟе, вӧсяськемзэ кылэ но солы юрттоз шуыса. Берлогес, куке бадӟым чорыг Ионаез музъем вылэ поттӥз, со дась вал Иеговалэсь выль ужзэ быдэстыны (Иона 2:11—3:4). Вал-а тӥляд сыӵе учыръёсты, куке туж сюлмаськеменыды вӧсяськыны секыт вал яке эскерон ортчытыны чик но кужымды ӧй вал? Эн вунэтэ, Иегова тӥледыз котькинлэсь умой вала шуыса. Соин ик, вӧсяськонды туж вакчи луиз ке но, Иегова сётоз тӥледлы ӵапак сое, мар тӥледлы кулэ (Еф. 3:20). Куке тӥ жадемын, висиськоды яке мар ке понна сюлмаськиськоды, кылзэ Библилэсь яке публикациосмылэсь аудиогожтэмъёссэс. Озьы ик луэ кыӵе ке но кырӟанэз кылзыны яке jw.org сайтысь видео учкыны. Тӥ Иеговалы вӧсяськиды ке но уже кутӥды ке ваньзэ, мае сётэ солэн организациез, Иегова тӥледыз кужмо карыны быгатоз. w23.10 13 б., 6 абз.; 14 б., 9 абз.

Скиния но Иерусалимын берлогес пуктэм храмъёс пуш ласянь ог-огзылы кельшо вал. Пушказы кык люкет вал: Святой инты но Святойлэсь но святой инты. Соос вискы катанчи ошемын вал (Евр. 9:2—5; Пот. 26:31—33). Святой интыын пуктэмын вал зарни лампада, фимиамез сутон ӝӧк но вӧсям нянез тырон ӝӧк. Отчы «вӧйын зырӟыса пуктэм... священникъёс» гинэ пыраны быгато вал (Лыд. 3:3, 7, 10). Святойлэсь но святой интыын сылэ вал сӥзён-косонэн зарни ковчег, кудӥз возьматэ вал, Иегова отын шуыса (Пот. 25:21, 22). Отчы араз огпол, Чылкытатӥськон-сузяськон нуналэ, быдӟым священниклы гинэ пыраны яра вал (Лев. 16:2, 17). Быдӟым священник отчы пыра вал аслаз сьӧлыкъёсыз понна но калыклэн сьӧлыкъёсыз понна ваем пудолэн вирыныз. Дыр ортчыса, Иегова ужась-тыршисьёсызлы возьматӥз, мае возьмато скиниялэн люкетъёсыз (Евр. 9:6, 7). w23.10 27 б., 12 абз.

Инмарлэн Кылыз трос пол ӧте милемыз ог-огмес яратыны (Иоанн 15:12; 1 Пётр 1:22; 1 Иоанн 4:11; Рим. 13:8; 1 Фес. 4:9). Яратон сюлмын улэ. Нош адямиос уг адӟо, мар сюлэм пушкын вань. Соку кызьы вын-агайёсмы но сузэр-апайёсмы яратонмес адӟозы? Милям сое кылъёсынымы но ужъёсынымы возьматэммы луэ. Тани куд-ог амалъёс. «Ог-огеныды ӧрекчаськытэк вераське» (Зах. 8:16). «Куспады тупаса улэлэ» (Марк 9:50). «Мукетъёссэ асьтэ сярысь умоесьгес луо шуыса лыдъялэ» (Рим. 12:10). «[Вӧсяськисьёслы] юрттӥське» (Рим. 12:13). «Ог-огдылы простить каре» (Кол. 3:13). «Ог-огдылэсь секытлыкъёстэс нуллыны юрттӥське» (Гал. 6:2). «Куректон-кайгуэ сюремъёсты... буйгатыны мед быгатомы» (2 Кор. 1:4). «Ог-огдэс юнматэ» (1 Фес. 5:11). «Огды понна огды вӧсяськелэ» (Иак. 5:16). w23.11 9 б., 7, 8 абз.

Котькуд нунал ми кутӥськомы ужпумъёсты, кудъёсыз понна юн оскон кулэ. Кылсярысь, ми бырйиськомы, кинэн эшъяськоно, кызьы шутэтсконо, кытын дышетсконо. Озьы ик сыӵе ужпумъёс герӟаськемын кузпалъяськонэн, нылпиосын яке ужен. Умой луысал аслэсьтыд юаны: «Кутэм ужпумъёсысьтым адӟиське-а оскеме, та дунне ӝоген быроз но со интые Инмарлэн выль дуннеез ӝоген вуоз шуыса? Яке мон малпаськисько адямиос сямен, кудъёсыз уг оско, выль дунне вуоз шуыса, но та нуналэн гинэ уло?» (Матф. 6:19, 20; Лука 12:16—21). Ми визьмо ужпумъёс кутомы, юн оскимы ке, ӝоген выль дунне вуоз шуыса. Шуг-секытъёсын пумиськыкумы но, юн оскон кулэ. Соос пӧлы пыртыны луэ уйылон-уллянъёсты, эмъяны луонтэм висёнъёсты яке мукет югдуръёсты, кудъёсыныз сэрен мылкыдмы куашканы быгатэ. Оло нош, нырысь ми малпаськомы, ваньзэ чидаммы луоз шуыса. Но шуг-секыт кема кыстӥське ке — нош ӵем дыръя озьы ик луэ — ваньзэ чидан понна но Иеговалы шумпотыса ужан-тыршон понна, юн оскон кулэ (1 Пётр 1:6, 7). w23.04 27 б., 4, 5 абз.

Иегова возьма, ми асьмеды вӧсяськеммыя возёмы шуыса. Шуом, улосысь конгрессэ мынон понна, агайлэн уж дорысьтыз куриськемез потэ. Соин ик со Иеговалэсь юрттэтсэ куре. Кызьы Иегова солы ответ сётоз? Кузёеныз вераськон понна, Инмар солы кышкасьтэм сям сётыны быгатэ. Озьы ке но агайлы аслыз мыноно но кузёеныз вераськоно. Оло нош, одӥг пол вераськыса гинэ, сое уз лэзе, но солы кӧня ке пол вераськоно луоз. Оло нош, мукет ужасен воштӥськоно луоз яке та толэзь понна ӧжытгес уждун басьтоно луоз. Иегова возьма, ми выльысь но выльысь вӧсяськомы шуыса. Кызьы адӟиське Иисуслэн кылъёсысьтыз, вань вӧсяськонъёсмылы Иегова ответ соку ик уз сёты (Лука 11:9). Соин ик кидэс эн лэзе! Выльысь но выльысь вӧсяське (Лука 18:1—7). Озьы тӥ Иеговалы возьматоды, со, мае тӥ куриськоды, тӥледлы туж кулэ шуыса. Озьы ик Иегова адӟоз оскемдэс, со тӥледлы юрттыны быгатэ шуыса. w23.11 22—23 б., 10, 11 абз.

Иегова Авраам эшезлы кылзэ сётӥз, солэн выжыез пыр дунне вылысь вань калыкъёс бакель каремын луозы шуыса (Ул.-выл. 15:5; 22:18). Авраам Инмарлы юн оскиз. Соин ик, номыр шоры учкытэк, со возьмаз, Инмар сётэм кылзэ одно ик быдэстоз шуыса. Озьы ке но, куке Авраамлы 100 арес вал ини, нош Сарралы — 90, соослэн пизы вордӥськемын ӧй вал на (Ул.-выл. 21:1—7). Но Авраам оскиськиз, трос калыкъёслы атай луоз шуыса (Рим. 4:18, ВД). Кызьы тӥ тодӥськоды, Авраам юнме ӧз оскиськы — солэн кема витем Исаак пиез вордӥськиз. Нош малы Авраам оскиськиз, Иегова сётэм кылзэ быдэстоз шуыса? Авраам Иеговаез умой тодӥз (Рим. 4:21). Осконэз понна Иегова Авраамез аслыз ярамон но шонерлыко адямиен лыдъяз (Иак. 2:23). w23.12 8 б., 1, 2 абз.

Оскиськымон агай солы сётэм ужъёсты тыршыса быдэсъя. Ойдолэ эскеромы Иисуслэсь примерзэ. Со ужъёссэ мылыз потытэк, суп-сап ӧз лэсьты. Иисус Иеговалэсь сётэм котькыӵе ужзэ быдэсъяз, со котьку но капчи ӧй вал ке но. Со яратӥз адямиосты, тужгес но аслэсьтыз дышетскисьёссэ, соин ик соос понна улонзэ сётӥз (Иоанн 13:1). Иисуслэсь адӟем карыса, тырше мылысь-кыдысь быдэстыны котькыӵе ужез, кудзэ тӥледлы сётӥзы. Нош тӥ уд ке тодӥське, кызьы сое лэсьтоно, куре юрттэт агайёслэсь, кудъёсыз тодо, кызьы сыӵе ужъёсты быдэстоно. Эн лэсьтэ сое гинэ, мае тӥлесьтыд куро, тырше тросгес лэсьтыны. Котькыӵе ужез пумозяз вуттэ (Рим. 12:11). Сое «адямиослы кадь эн, Кузё-Инмарлы кадь лэсьтэ» (Кол. 3:23). Веранэз ӧвӧл, ваньмы тырбыдэстэмесь но ваньмы янгышаськомы. Соин ик зӥбыт-востэмесь луэ но янгышъёстэс эн ватэ (Мад. 11:2). w23.12 26 б., 8 абз.

Макем ми шумпотӥськомы, куке пылатӥськиськомы но Иеговалэн семьяяз пыриськомы! Солэн эшез луыны — туж бадӟым дан. Ми соглаш Давид эксэен, кудӥз вераз, кызьы ассэ шӧдэ адями, кудзэ Иегова ас дораз ӧте: «Тынад быръем, матад карем адями шудо — со Тынад азбаръёсад улоз» (Пс. 64:5). Кинэ Иегова аслаз азбаръёсаз ӧте? Инмар матэ кариське соослы, кинъёс асьсэос солэн матаз карисько (Иак. 4:8). Тӥ Иеговалы сӥзиськиды но пылатӥськиды ке, оскыны быгатоды, со тӥ вылэ трос бакель каронъёс кисьтоз шуыса (Иер. 17:8; Мал. 3:10). Пылатӥськон — со кутсконэз гинэ. Номыр шоры учкытэк, милемлы сӥзиськыкумы сётэм кылмыя улоно но Инмарлы оскымон кылёно (Екк. 5:3, 4). Иисуслэн дышетскисьёсыз луыса, милемлы тыршоно солэсь адӟем карыны но солэн курон-косонъёсызъя улыны (Матф. 28:19, 20; 1 Пётр 2:21). w24.03 8 б., 1—3 абз.

Мар кароно, тӥледлы дырдэс ӵош ортчытъяны уг кельшы ке? Тылскем но соку ик ӝуаны уг кутскы. Нырысь пичи шелепъёсты кенжыто, собере гинэ отчы бадӟым писъёсты тыро. Озьы ик тӥ но тырше котькуд нунал ӧжыт ке но дырдэс ӵош ортчытъяны. Лэсьтэ сыӵе ужъёсты, кудъёсыз тӥледлы кыкнадылы но кельшо (Иак. 3:18). Ӧжыт ке но дырдэс ӵош ортчытъяса, тӥ быгатоды яратондэс выльысь кенжытыны. Тылскем мед ӝуалоз шуыса, солы омыр кулэ. Озьы ик кузпалъёс ог-огзэс мед яратозы шуыса, соослы ог-огзэс гажаны кулэ. Карт но кышно ог-огзэс гажало ке, соослэн яратонзы уз кысы. Тодады возе: тӥ малпаськоды ке, кузпалдэс гажаськоды шуыса, туж кулэ, со гажамдэс мед шӧдоз шуыса. w23.05 22 б., 9 абз.; 24 б., 14, 15 абз.

Библиын гожтэмын, мар шӧдӥзы Инмарлэн ужась-тыршисьёсыз, кудъёсыз туж кышкаса улӥзы, кылсярысь, куке соосты тушмонъёссы уйылӥзы-уллязы (Пс. 17:5; 54:2, 6). Ми но куддыръя кышкаськомы, куке милесьтым секыт висёнмес шедьто яке ӵош ужасьёсмы, ӵош дышетскисьёсмы, семьямы но кивалтӥсьёс милемлы пумитъясько. Сыӵе вакытъёсы ми асьмеды номыр карыны быгатӥсьтэм, пичи нылпи кадь шӧдӥськомы, вылды. Кызьы Иегова соку юрттыны быгатэ? Со милемыз буйгатэ. Соин ик ялан Иеговалы вӧсяське но солэсь Кылзэ лыдӟе (Пс. 76:2, 13—15). Соку, секыт учырен пумиськыку, тӥ нырысь ик инмысь Атайдылэсь юрттэтсэ утчалоды, вылды. Вералэ Иеговалы сюлмаськонъёсты но кышканъёсты сярысь. Нош собере кылзэ, мар со тӥледлы вера Библия пыр. Соку тӥ Инмарлэсь буйгатэмзэ шӧдоды (Пс. 118:28). w24.01 24—25 б., 14—16 абз.

Духовной ужпумез быдэстон понна, туж кулэ юн мылкыд. Адямилэн мылкыдыз вань ке, со вань кужмысьтыз тыршоз ужпумзэ быдэстыны. Пуктэм ужпуммес быдэстыны капчигес луоз, со понна юн мылкыдмы луиз ке. Мар карыны луэ, ужпумез быдэстыны мылкыд мед луоз шуыса? Вӧсяське, ужпумдэс быдэстыны мылкыдды юнгес мед луоз шуыса. Иегова святой духеныз сыӵе мылкыд сётыны быгатэ. Куддыръя ми ас азямы ужпум пуктӥськомы, малы ке шуоно тодӥськомы, озьы кулэ шуыса. Та шонер. Нош мар кароно, ужпуммес быдэстыны мылкыдмы туж ик юн ӧвӧл ке? Малпаське со сярысь, мар Иегова тӥ понна лэсьтэ (Пс. 142:5). Апостол Павел малпаськиз Иеговалэн ӟечлыкез сярысь (1 Кор. 15:9, 10; 1 Тим. 1:12—14). Та солэсь мылкыдзэ ӝутӥз Иеговалы вань сюлмысьтыз ужаны. Макем тросгес тӥ малпаськоды, мае Иегова тӥ понна лэсьтэ, сокем золгес мылкыдды луоз ужпумдэс быдэстыны (Пс. 115:3). w23.05 27 б., 3—5 абз.

Ми инмысь Атаймес шумпоттӥськомы, куке солэсь нимзэ данъяськомы (Пс. 68:31, 32). Иеговалы но, сьӧлыко адямиослы сямен ик, кулэ-а, сое одно ик мед ушъялозы шуыса? Ӧвӧл. Инмысь Атаймес, Иеговаез, данъяса, ми шараяськомы Шайтанлэсь пӧяськонзэ, кудӥз асьмемын но герӟаськемын. Шайтан вера, одӥг адями но, шуг-секытъёсын пумиськиз ке, Иеговаез уз данъя ни шуыса (Иов 1:9—11; 2:4). Но Иов, шуг-секытъёсын пумиськыса но, Инмарлы оскымон кылиз. Озьы со возьматӥз, Шайтан — пӧяськись шуыса. Нош мар вераны луоз ми сярысь? Ми но быгатӥськомы Иеговалэсь ӟеч нимзэ утьыны но сое шумпоттыны, солы оскымон ужаса-тыршыса (Мад. 27:11). Ми понна со бадӟым дан! w24.02 8—9 б., 3—5 абз.

Моисейлэн но Иисус Навинлэн кулэмзы бере Иегова аслаз калыкеныз судьяос пыр кивалтӥз. Собере, эксэйёс кивалтыку, Инмар пророкъёс пыр кивалтӥз. Инмарлы оскымон эксэйёс пророкъёслэсь кылзӥськизы. Кылсярысь, Давид эксэй Нафан пророклэсь кылзӥськиз (2 Экс. 12:7, 13; 1 Пар. 17:3, 4). Иосафат эксэй Иозиил пророклы ачиз но оскиз, Иудеяын улӥсьёсты но ӧтиз Инмарлэн пророкъёсызлы оскыны (2 Пар. 20:14, 15). Туж секыт югдуре сюрыса, Езекия эксэй Исаия пророклы вазиськиз (Ис. 37:1—6). Куке эксэйёс Иеговалэсь кылзӥсько вал, со соосты бакель каре вал но калыксэ уте вал (2 Пар. 20:29, 30; 32:22). Адӟиське вал, Иегова аслаз калыкеныз пророкъёс пыр кивалтэ шуыса. w24.02 21 б., 8 абз.

Шайтан шумпотысал, ми эшъяськысалмы ке соосын, кинъёс Иеговаез уг ярато. Малы ке шуоно соку милемлы секытгес луысал Библиысь куронъёсъя улыны. Милемлы вунэтоно ӧвӧл, туннэ адямиос социальной сетьёс пыр но эшъясько шуыса. Та дунне азон-калгонэз уродэн уг лыдъя. Но милемлы озьы малпано ӧвӧл (Еф. 4:19, 20). Юалэ асьтэлэсь: «Тыршисько-а мон ӧжытгес дырме ортчытъяны ӵош ужасьёсыным, ӵош дышетскисьёсыным но мукетъёсыныз, кинъёс Библиысь куронъёсъя уг уло? Тыршисько-а мон Иеговалэсь кылзӥськыса улыны, соин сэрен монэ визьзэ ыштэм адямиен лыдъязы ке но?» Христиан кенешын но эшъёсты чакласькыса быръёно. Та сярысь вераз апостол Павел 2 Тимофейлы 2:20—22. Милям потэ эшъяськеммы соосын гинэ, кинъёс милемлы юрттозы Иеговалы ужаны-тыршыны. w24.03 22—23 б., 11, 12 абз.

Кызьы тӥ Иеговаез син азяды пуктӥськоды? Ми Инмарез ум адӟиське ке но, со сярысь трос гожтэмын Библиын. Кылсярысь, отын вераське, Иегова — «шунды но щит», озьы ик «ваньзэ сиись-ньылӥсь тыл» шуыса (Пс. 83:12; Евр. 12:29). Нош Иезекиильлы возьматэмын вал, Инмар сапфирлэсь престол вылын пуке но со котырын ваньмыз чиля-пиштэ шуыса, дуно кортъёс но вуюись кадь (Иез. 1:26—28). Ми Иеговаез ум адӟиське бере, со милемыз яратэ шуыса оскыны куддыръя секыт луэ. Куд-огъёсыз малпало, Инмар соосты уз яраты шуыса, малы ке шуоно соос ноку ӧз шӧдэ, соосты ярато шуыса. Иегова милемыз туж умой вала но тодэ, малы милемлы секыт луэ солы матэ кариськыны. Соин ик Библия пыр со возьматэ, макем со ӟеч но яратӥсь. Вань кыл, кудӥз тужгес но умой возьматэ, кыӵе со Иегова. Со — яратон (1 Иоанн 4:8). Инмарлэн котькуд ужысьтыз адӟиське солэн яратэмез. Иегова яратэ соосты но, кинъёс сое уг ярато (Матф. 5:44, 45). w24.01 26 б., 1—3 абз.

Иегова Моисеез пуктӥз израиль калыкез Египетысь поттыны. Кызьы Инмар возьматӥз калыклы, Моисей пыр со ачиз кивалтэ шуыса? Нуназе соос пилем юбоез адӟизы, нош уйин — тыл юбоез (Пот. 13:21). Моисей мынӥз юбо сьӧры, кудӥз соосты Горд зарезь дуре вуттӥз. Нош куке адямиос адӟизы, азьпалазы — зарезь, нош беразы — соос сьӧры уйиськись египет ожгарчиос шуыса, соос туж кышказы. Но нокыӵе янгыш ӧй вал. Иеговалэн потэ вал, Моисей соосты ӵапак отчы мед вуттоз шуыса (Пот. 14:2). Собере Инмар израиль калыкез паймымон амалэн утиз (Пот. 14:26—28). Моисей юн оскиз, 40 ар ӵоже луоё кыр дуннеетӥ ветлыкузы, Иегова аслаз калыкезлы пилем юбо пушкысен сюрес возьматылӥз шуыса (Пот. 33:7, 9, 10). Иегова Моисеен юбо пушкысен вераськиз, нош Моисей Иеговалэсь кылъёссэ калыклы вералляз. Израиль калык адӟиз, Иегова соосын Моисей пыр кивалтэ шуыса. w24.02 21 б., 4, 5 абз.