Гудырикошкон

Висъялэ саклыктэс та псаломысь кык кулэ луись малпанъёслы: 1) шонер улӥсьёслэн но куректон-кайгуоссы вань; 2) Иегова милемыз шуг-секытъёслэсь мозмытэ. Кызьы Иегова сое лэсьтэ? Со юрттэ милемлы улон шоры шонер учкыны. Иегова кылзэ сётэ, солы ужан-тыршон милемлы шумпотон ваёз шуыса. Озьы ке но со уг вера, та дуннеын ми шуг-секытъёстэк уломы шуыса (Ис. 66:14). Со мылкыдмес ӝутэ вуоно улонлы саклыкмес висъяны, малы ке шуоно выль дуннеын ми пырак дауръёс ӵоже шудо уломы (2 Кор. 4:16—18). Нош али Иегова милемлы юрттэ, номыр шоры учкытэк, солы ужаны-тыршыны (Бӧрд. 3:22—24). Малы ми дышетскыны быгатӥськомы Иеговалэн оскымон ужась-тыршисьёсызлэсь, кудъёсыз вашкала дыръя улӥзы но кудъёсыз асьме нуналъёсы уло? Инмарлэн ужась-тыршисьёсыз малпамтэ шорысь шуг-секытъёсын пумиськыны быгато. Но куке адями Иеговалы оскиське, Инмар солы одно ик юрттыны тыршоз (Пс. 54:23). w23.04 14—15 б., 3, 4 абз.

Иосиф но Мария туж умой адӟем карон возьматӥзы, кызьы «вылӥ властьёслэсь-кивалтӥсьёслэсь» кылзӥськоно, со капчи ӧвӧл ке но (Лука 2:1—6). Мария укмысэтӥ толэзьзэ ини секытэн вал. Ӵапак соку солы но Иосифлы секыт ужпум кутоно луиз. Август кивалтӥсь косон поттӥз, Рим империын вань улӥсьёс перепись ортчыны кулэ шуыса. Иосифлы но Мариялы Вифлееме мыноно луиз. Нош отчыозь вырйыло интыостӥ ог 150 иськем мыноно вал! Сыӵе сюрес капчи ӧй вал. Та кузпалъёс сюлмаськизы, вылды, мар соос карозы, Мария сюрес вылын ик пияны кутскиз ке. Соос нылпизы понна сюлмаськизы, малы ке шуоно со вал Мессия, кудӥз сярысь Иегова азьло ик вераз. Малпазы-а соос, та мугъёсын сэрен соос кивалтӥсьлэсь кылзӥськытэк но быгато шуыса? Иосиф но Мария сюлмаськизы ке но, соос катлэсь кылзӥськизы. Иегова кылзӥськемзэс бакель кариз. Иосиф но Мария Вифлееме умоен вуизы. Нунызы умой тазалыкен вордӥськиз. Озьы ик Мария юрттӥз Библиысь азьпалзэ ивортонэз быдэстыны (Мих. 5:2). w23.10 8 б., 9 абз.; 9 б., 11, 12 абз.

Мар кароно, пумиськонъёсын валэктон сётоно шуыса малпаса гинэ но, тӥ сюлмаськыны кутскиськоды ке? Соку тӥледлы юрттоз умой дасяськон (Мад. 21:5). Эскероно материалэн умой тодматскиды ке, соку кидэс ӝутыны капчигес луоз. Со сяна, вакчиесь валэктонъёс сётъялэ (Мад. 15:23; 17:27). Валэктонды вакчигес луиз ке, сюлмаськоно но трос уз луы. Вакчи но асьтэ кылъёсыныды валэктонъёс сётъяса, тӥ возьматоды, умой дасяськиды но эскероно материалэз умой валаськоды шуыса. Шуом, тӥ та визь-кенешъёсты уже кутӥды, озьы ке но сюлмаськонды уг быры но одӥг-кык поллэсь тросгес валэктон сётыны тӥледлы секыт. Мар соку кароно? Юн оске, Иегова тыршемдэс дунъялоз шуыса (Лука 21:1—4). Со уг куры тӥледыз быгатэмдылэсь тросгес лэсьтыны (Пс. 102:14). Малпалэ, мае тӥ карыны быгатӥськоды. Ас азяды ужпум пуктэ но Иеговалэсь юрттэт куре каньыл сюлмын улыны. Нырысь ужпум пуктыны луэ одӥг ке но вакчи валэктон сётыны. w23.04 21 б., 6—8 абз.

Апостол Павел милемыз ӵошатӥз ожгарчиосын, кудъёсыз вань ожмаськон дӥсьсэс дӥсязы но котьку сак уло. Ожгарчи ожмаськонлы котьку но дась луыны кулэ вал. Тае ик вераны луэ ми сярысь но. Ми Иеговалэн нуналэзлы дась луомы, ми вылын луизы ке осконлэн но яратонлэн корт дӥсьсы, озьы ик оскиськонлэн, яке вуоноезлы осконлэн, изьыез. Корт дӥсь ожгарчилэсь сюлэмзэ утьылӥз. Ӵапак озьы ик оскон но яратон милесьтым «сюлэммес» утё. Та сямъёс юртто милемлы Иеговалы ялан ужаны-тыршыны но Иисус сьӧры мыныны. Осконмы вань ке, ми тодӥськомы, Иегова вань сюлмысьтымы ужам-тыршеммес бакель кароз шуыса (Евр. 11:6). Оскон мылкыдмес ӝутоз, шуг-секытъёс шоры учкытэк, Иисус Эксэймылы оскымон луыны. Оскон юрттоз милемлы улонысьтымы шуг-секытъёсмес чиданы. Ми быгатӥськомы адӟем карыны вын-агайёслэсь но сузэр-апайёслэсь, кудъёсыз, уйылон-уллянъёс яке коньдонэн герӟаськем шуг-секытъёссы шоры учкытэк, Инмарлы оскымон кылизы. Со сяна, юн оскон юрттоз милемлы ваньбур люкан сьӧлтэтлэсь палэнскыны. Соин ик милемлы адӟем кароно соослэсь, кинъёс огшоры уло но Эксэйлыкез улоназы нырысетӥ интые пукто. w23.06 10 б., 8, 9 абз.

Астэ кияд кутон — со аслэсьтыд малпанъёстэ но ужъёстэ чакланы быгатон. Озьы ик астэ кияд кутыны быгатоно, куке духовной ужпумъёсты быдэстыны кулэ, тужгес но соку, куке со капчи ӧвӧл яке сое лэсьтыны мылкыд ӧвӧл. Тодады возе: астэ кияд кутыны быгатон, яке возиськыны быгатон, духлэн емышез пӧлы пыре. Соин ик куре Иеговалэсь святой духсэ, кудӥз юрттоз тӥледлы та кулэ луись сямез будэтыны (Лука 11:13; Гал. 5:22, 23). Эн возьмалэ, куке ваньмыз туж умой луоз. Та дуннеын шуг-секытъёстэк уг луы. Ми возьмамы ке, куке милям ваньмыз умой луоз, ужпуммес быдэстыны ноку ум быгатэ. Куддыръя милям мылкыдмы уг луы, малы ке шуоно ужпуммы быдэстонтэм кадь потэ. Тӥляд учырады но озьы ке, быгатысалды-а тӥ ужпумдэс кӧня ке пичи ужпумъёслы люкыны? Тӥляд потэ ке кыӵе ке сямдэс будэтэмды, умой луысал нырысь кыӵе ке пичи ужын та сямез возьматыны. Тӥ ужпум пуктӥды ке быдэс Библиез лыдӟыны, быгатысалды-а тӥ сое пичиен-пичиен лыдӟыны? w23.05 29 б., 11—13 абз.

Берпум нуналъёс ӵоже Иегова аслаз организациез пыр милемлы ялан духовной сиён сётэ, ми «дун-шектэм сюрес» вылысь медам коже шуыса (Ис. 35:8; 48:17; 60:17). Куке адями Библиез дышетыны соглаш кариське, вераны луоз, солэн луонлыкез кылдэ «дун-шектэм сюрес» вылэ султыны. Куд-огъёсыз та сюрес вылтӥ кӧня ке мыно, нош собере со вылысь кожо. Мукетъёсызлэн та сюрес вылтӥ мыныны юн мылкыдзы вань, кулэ интые вуытозязы. Кыӵе инты сярысь татын вераське? Соосты, кинъёс инмын улыны оско, «дун-шектэм сюрес» нуэ инмысь «Инмар рае» (Усьт. 2:7). Соосты, кинъёс музъем вылын улыны оско, Христослэн сюрс ар ӵоже кивалтонэзлэн пумаз та сюрес вуттоз тырбыдэстэм улонэ. Тӥ али та сюрес вылтӥ мынӥськоды ке, берлань эн учке. Со вылысь эн коже, кулэ интые вуытозяды — выль дуннее вуытозяды. w23.05 17 б., 15, 16 абз.; 19 б., 17, 18 абз.

Тӥ малпаськиды ке со сярысь, мае Иегова тӥледлы лэсьтӥз ини, тӥляд потоз солы тау каремды но солы улондэс сӥземды (Пс. 115:3—5). Библиын Иегова нимаське Атаен, кудӥз котькуд «ӟеч, дун-шектэм кузьымез» сётэ (Иак. 1:17). Самой бадӟым кузьым — со Пиезлэн, Иисус Христослэн, мозмытӥсь курбонэз, кудӥз тӥледлы луонлык сётэ Инмарлэн матысь эшъёсыз луыны но пырак улыны (1 Иоанн 4:9, 10). Иеговалы сӥзиськыса, тӥ возьматоды, Инмарлэн та но мукет кузьымъёсыз понна тау кариськоды шуыса (К. Зак. 16:17; 2 Кор. 5:15). w24.03 5 б., 8 абз.

Асьме нуналъёсы адямиос асьсэды уродгес но уродгес возё. Тае адӟыса, ми шӧдӥськомы сое ик, мае шӧдӥз шонерлыко Лот. Со «ортчыт азыса-калгыса улӥсь адямиос пӧлын» улыны жадиз, малы ке шуоно тодӥз, инмысь Атаез сыӵе ужъёсты адӟемпотостэм каре шуыса (2 Пётр 2:7, 8). Лот Инмарлэсь кышказ но сое яратӥз. Талы луыса со ассэ котырысьтыз адямиос кадь ӧз возьы. Ми но улӥськомы адямиос пӧлын, кудъёсыз Иеговалэсь вылӥ эсэпъёссэ лыдэ уг басьто. Но ми быгатӥськомы асьмеды чылкыт возьыны. Со понна дышетсконо Инмарез яратыны но солэсь кышканы. Милемлы юрттон понна, Иегова Мадёнъёсын книгаез сётӥз. Та книга милесьтым мылкыдмес ӝутэ асьмеды шонер возьыны. Вань христианъёслы — пиосмуртъёслы но кышномуртъёслы, арлыдоослы но егитъёслы — умой луоз та книгаысь визь-кенешъёс вылын малпаськыны. Ми Иеговалэсь кышкамы ке, соку урод ужъёсты шонере поттыны ум тырше. w23.06 20 б., 1, 2 абз.; 21 б., 5 абз.

Оло нош, тӥледлы семьяды пумитъяське. Яке тӥ мае ке кельтӥды, огшорыгес улон понна но тросгес дырдэс но кужымдэс Эксэйлыклэн ужезлы висъян понна (Матф. 6:33). Юн оске: Иегова адӟе ваньзэ, мае тӥ со понна лэсьтӥськоды (Евр. 6:10). Тӥ ас вылады шӧдӥды, дыр, ини, кызьы быдэсмо Иисуслэн кылъёсыз: «Кин Мон понна, Евангелие понна корказэ, я агай-вынъёссэ, я сузэр-апайёссэ, я атайзэ, я анайзэ, я кышнозэ, я нылпиоссэ, я музъемзэ кельтӥз ке, али, таӵе дыре, уллянъёс пӧлын улыса, сю пол тросгес коркаос, агай-вынъёс, сузэр-апайёс, атайёс, анайёс, нылпиос, музъем басьтытэк одӥгез но уз кыльы, вуоно даурын но быронтэм улон басьтытэк уз кыльы» (Марк 10:29, 30). Ӵошатоно ке соин, мае тӥ кельтӥськоды, Иегова тросгес бакель каре (Пс. 36:4). w24.03 9 б., 5 абз.

Иудеяын «секыт сютэм ар» кутскиз. Сирияысь Антиохияын улӥсь христианъёс «котькудӥз аслаз луонлыкезъя Иудеяын улӥсь агай-вынъёссылы юрттэт ыстыны мылкыд каризы» (Ап. уж. 11:27—30). Иудея кыдёкын интыяськемын вал ке но, Антиохияысь христианъёслэн туж потэ вал вын-агайёссылы юрттэмзы (1 Иоанн 3:17, 18). Туннэ но ми быгатӥськомы гажан-жалянмес возьматыны огъя оскисьёсмылы, кудъёсыз кыӵе ке шимучырен пумиськизы. Ми соку ик соослы юрттыны тыршиськомы. Кылсярысь, юрттыны дась луэммы сярысь тӧроослы вераськомы, дунневыл ужлы ас мылкыд кареммыя коньдонмес сётӥськомы яке шимучырен пумиськемъёс понна вӧсяськиськомы. Оло нош, агайёс но сузэръёс ӟудыса уло. Ӝоген Иисус Христос Эксэймы адямиосты судъяны лыктоз. Милям потэ, агайёсты но сузэръёсты гажам-жаляммес Иисус мед адӟоз шуыса! Соку со милемлы шуоз: «Басьтэлэ... Эксэйлыкез» (Матф. 25:34—40). w23.07 4 б., 9, 10 абз.; 6 б., 12 абз.

Иисус, Атаез сямен, валась луэмзэ возьматӥз. Иегова Иисусэз музъем вылэ ыстӥз «Израиль юртлэн бырем ыжъёсыз доры гинэ». Но, та ужзэ быдэстыкуз, Иисус валась луэмзэ возьматӥз. Огпол мукет калыкысь кышномурт сое туж куриз бурмытыны нылзэ, кудӥз пушкын трос периос вал но кудӥз туж курадӟыса улӥз. Иисус та кышномуртэз гажаз-жаляз но нылзэ бурмытӥз (Матф. 15:21—28). Тани мукет учыр. Апостолъёссэ дышетыкуз, Иисус шуиз: «Кин калык азьын Мынэсьтым куштӥськиз ке, солэсь Мон но... куштӥсько» (Матф. 10:33). Но куштӥськиз-а Иисус Пётрлэсь, кудӥз куинь пол вераз, сое уг тоды шуыса? Ӧз. Иисус апостоллэсь ӧпкелемзэ но юн осконзэ адӟиз. Улӟемез бере Иисус Пётрлы возьматскиз но сое оскытӥз, дыр, сое яратэ но простить каре шуыса (Лука 24:33, 34). Иегова но Иисус валась луэмзэс возьмато. Нош мар вераны луоз ми сярысь? Иеговалэн потэ, ми но валасесь мед луомы шуыса. w23.07 21 б., 6, 7 абз.

Малы милям оскеммы луэ, музъем райлы пӧрмоз шуыса? Нырысетӥез, ачиз Иегова кылзэ сётэ, озьы луоз шуыса. Усьтӥськон книгаын гожтэмын: «Престол вылын Пукись шуиз: „Тани, Мон ваньзэ выльзэ кылдытӥсько“». Кылсётонзэ быдэстон понна, Инмарлэн визьлыкез но, кужымез но, мылкыдыз но вань. Кыкетӥез, Иегова тодэ, верам кылъёсыз одно ик быдэсмозы шуыса. Соин ик со вераз: «Та кылъёс зэмесь, шонересь» но «Быдэсмиз!» Куинетӥез, Иегова кутскем ужзэ котьку но пумозяз вуттэ. Соин ик со ассэ «Альфа но Омега» шуыса нима (Усьт. 21:6). Иегова возьматоз, Шайтан пӧяське шуыса. Озьы ик валамон луоз, Инмарлэн малпанэзлы быдэсмыны Шайтан люкетыны уг быгаты шуыса. Озьыен, куке кин ке но вера, «та выжыкыл гинэ» шуыса, лыдӟе но валэктэ Усьтӥськонэз 21:5, 6. Возьматэ, кызьы Иегова кылзэ сётэ верам кылъёссэ быдэстыны (Ис. 45:19). w23.11 7 б., 18, 19 абз.

Куке Авраамлы 75 арес вал, Иегова солы кылзэ сётӥз со бордысь быдӟым калык поттыны. Адӟиз-а Авраам, кызьы со быдэсмиз? Туж ик ӧз. Евфрат шур вамен потэмез бере 25 ар ортчыса гинэ, солэн Исаак пиез вордӥськиз. Со туж паймымон вал. Эшшо 60 ар ортчыса, солэн Исав и Иаков внукъёсыз вордӥськизы (Евр. 6:15). Но Авраам ӧз адӟы, кызьы солэн выжыез быдӟым калык луиз но Сӥзем музъемез басьтӥз. Та шоры учкытэк, солэн кулытозяз ик Иеговаен матысь кусыпъёсыз вал (Иак. 2:23). Нош куке Авраам улӟоз, со тодоз, солэн осконэзлы но чиданэзлы луыса музъем вылысь вань калыкъёс бакель каремын вал шуыса (Ул.-выл. 22:18). Со туж шумпотоз! Малы та милемыз дышетэ? Оло нош, ми соку ик ум адӟе, кызьы Иеговалэн куд-ог кылсётонъёсыз быдэсмозы. Но милям, Авраамлэн кадь ик, чиданмы вань ке, ми юн оскыны быгатӥськомы, Иегова милемыз али ик ини бакель кароз шуыса. Нош выль дуннеын милемыз эшшо но бадӟымесь бакель каронъёс возьмало (Марк 10:29, 30). w23.08 24 б., 14 абз.

Егит дыръяз Озия зӥбыт-востэм вал но Инмарлэсь кышкаса улӥз. Со 68 ар улӥз. Трос аръёс ӵоже Иегова сое бакель карылӥз (2 Пар. 26:1—4). Озия Иудеялэсь трос тушмонъёссэ вормиз но трос лэсьтӥз, Иерусалиме тушмонъёс пырыны медаз быгатэ шуыса (2 Пар. 26:6—15). Инмарлэн юрттэменыз со трос лэсьтыны быгатӥз. Та сярысь малпаськыкуз, Озия туж шумпотэ вал, дыр (Екк. 3:12, 13). Озия эксэй курон-косонъёс сётъяны дышемын вал. Соин ик со малпаз, вылды, солы котьмае карыны яра шуыса. Огпол Озия ас вылаз оскиськиз. Со Иеговалэн храмаз пыриз фимиам ӵындытыны. Нош эксэйёслы сое карыны уг яра вал (2 Пар. 26:16—18). Куке Азария быдӟым священник сое дугдытыны турттӥз, Озиялэн туж вожез потӥз. Жаляса верано луэ, Озия Инмарен кусыпъёссэ тӥяз. Со понна кымесаз гижлочер потӥз (2 Пар. 26:19—21). Со азьланяз но зӥбыт-востэм луысал ке, со воксё мукет сямен улысал! w23.09 10 б., 9, 10 абз.

Христиан мурт луэмез бере но апостол Пётрлы урод сямъёсыныз нюръяськоно вал. Асьме вакытысь 36-тӥ арын вандӥськымтэ еврей луисьтэм Корнилий вылэ святой дух васькиз. Соку отын Пётр но вал. Та учыр умой возьматӥз, «Инмар адямиосты вылтус шоры учкыса улӥё-вылӥё уг кары» но мукет калыкъёсысь адямиос но христиан кенеше пырыны быгато шуыса (Ап. уж. 10:34, 44, 45). Талэсь азьвыл Пётр мукет калыкысь адямиосын ӧз сиськылы. Нош та учыр бере каньыл сюлмын сиськиз. Но еврейёс пӧлысь куд-ог христианъёс малпазы, соослы мукет калыкысь адямиосын сиськыны уг яра шуыса. Куке тазьы малпаськисьёс пӧлысь куд-огъёсыз Антиохияе вуизы, Пётр еврей луисьтэм вын-агайёсызлэсь палэнскыны кутскиз. Со ассэ озьы возиз, малы ке шуоно еврей луись христианъёсты ӝоже уськытэмез уг поты вал, вылды. Куке апостол Павел адӟиз, кызьы ассэ возе Пётр, со солы ваньмыз азьын визь-кенеш сётӥз (Гал. 2:13, 14). Но, янгышамез шоры учкытэк, Пётр азьланяз но Инмарлы оскымон ужаз-тыршиз. w23.09 22 б., 8 абз.

Тӧроос, дась-а тӥ азьланяз но мылысь-кыдысь но тыршыса Иеговалэн ыжъёсыз сярысь сюлмаськыны? Асьтэды эскерыкуды, тӥ адӟоды, вылды, тӥледлы мае ке но умоятоно шуыса. Но мылкыдды медаз куашка! Иисус Христос тӥледлы юрттоз (1 Пётр 2:3). Апостол Пётр милемыз оскытэ: «Инмар... тӥледыз юнматоз». Куке но Пётр шӧдӥз, Инмарлэн Пиез вӧзын луыны со ярамон адями ӧвӧл шуыса (Лука 5:8). Озьы ке но Иеговалэн но Иисуслэн юрттэмзылы луыса со кизэ ӧз лэзьы но азьланяз но Христос сьӧры оскымон мынӥз. Со понна Пётрлы дан сётэмын вал «Утисьмылэн Иисус Христослэн пумтэм вапумъёсысь Эксэйлыказ» пырыны (2 Пётр 1:11). Тӥ Пётрлэсь адӟем кариськоды ке — кидэс уд ке лэзиське но Иеговалы лэзиськоды ке тӥледлы юрттыны,— тӥ но пырак улон басьтоды. «Озьы асьтэ осконэн» улондэс утёды (1 Пётр 1:9). w23.09 30 б., 14 абз.; 31 б., 16, 17 абз.

Вашкала скиния котыр азбар лэсьтэмын вал. Со азбарын священникъёс ужазы-тыршизы. Отын пуктэмын вал ыргонлэсь лэсьтэм тылын сутӥськись курбон сётон ӝӧк но ыргонлэсь мисьтӥськон, кудӥз вуэн тырмытэмын вал. Отысь вуэн священникъёс мисьтӥськизы соослы оскем ужез быдэстэмзылэсь азьло (Пот. 30:17—20; 40:6—8). Туннэ, инме ӝутскемзылэсь азьло, зырӟем христианъёс духовной храмлэн пуш азбараз ужало-тыршо. Вуэн тырмытэм бадӟым мисьтӥськон соослы но, милемлы но тодамы вайытэ, милемлы Иеговалы гинэ йыбыртъяно но солэн вылӥ эсэпъёсызъя улоно шуыса. Нош кытын Инмарлы ужа-тырше «туж-туж трос калык»? Апостол Иоанн адӟиз, соос «престол азьын... сыло», яке духовной храмлэн педпал азбараз «уй но нунал... [Инмарлы] служить каро» шуыса (Усьт. 7:9, 13—15). Ми туж тау кариськомы Иеговалы, со милемлы быдӟым духовной храмаз солы йыбыртъяны лэзиз шуыса! w23.10 28—29 б., 15, 16 абз.

Иегова милемлы тӧроос пыр юрттыны быгатэ (Ис. 32:1, 2). Соин ик, тӥляд кыӵе ке сюлмаськонды вань ке, тӧроосыныды вераське. Нош куке соос юрттэтсэс ӵекто, тау карыса соглаш кариське. Тӧроос пыр Иегова тӥледыз кужмо кароз. Озьы ик милемыз юнматыны быгатэ Библия вылэ пыкиськем пырак улыны оскон: кин ке но рай музъем вылын улыны оске, нош кин ке но — инмысь Эксэйлыкын (Рим. 4:3, 18—20). Вуоноезлы оскон милемлы кужым сётэ шуг-секытъёсты чиданы, ӟеч иворез тодытыны но кенешын пӧртэм ужъёсты быдэсъяны (1 Фес. 1:3). Пырак улыны оскон апостол Павеллы но кужым сётэ вал. Павел вераз, сое ӝикатыса, уйылыса-улляса возизы, озьы ик со кышкыт учыръёсы сюрылӥз шуыса. Куддыръя со кулон калэ но вуэмын вал (2 Кор. 4:8—10). Павел быгатӥз шуг-секытъёссэ чиданы, малы ке шуоно со саклыксэ висъяз солы, мар сое азьланяз возьма (2 Кор. 4:16—18). Инмын пырак улыны оскон солы туж дуно потэ вал. Вуоноезлы оскон сярысь малпаськон Павелэз юнматэ вал. Соин ик со дась вал котькыӵе курадӟонъёсты чиданы. w23.10 15—16 б., 14—17 абз.

Вӧсяськыкуды малпаське: «Иеговалэн малпамезъя, тупась-а али дыр мынэсьтым куронме быдэстыны?» Милям потэ, дыр, Иегова вӧсяськонмылы ответ соку ик мед сётоз шуыса. Но со умойгес тодэ, ку солы тупась дыр вуоз (Евр. 4:16). Иегова милемлы ответ соку ик ӧз сёты ке, ми малпаны быгатомы, со куронмес ноку уз быдэсты шуыса. Но со возьматыны быгатэ, Иегова сое мукет дыръя быдэстоз шуыса. Шуом, егит агай Иеговаез куре сое бурмытыны. Но со уг бурмы. Иегова агаез паймымон амалэн бурмытысал ке, Шайтан шуысал, агай соин гинэ Инмарлы ужа-тырше шуыса (Иов 1:9—11; 2:4). Со сяна, Иегова дыр пуктӥз, куке со вань висёнъёсты быдтоз (Ис. 33:24; Усьт. 21:3, 4). Нош со дырозь возьмано ӧвӧл, Иегова адямиосты паймымон амалэн бурмытъялоз шуыса. Соин ик агай Иеговалэсь кужым но каньыллык курыны быгатэ, висемез шоры учкытэк, азьланяз но Иеговалы оскымон ужан-тыршон понна. w23.11 23—24 б., 13 абз.

Самсон бадӟым янгыш лэсьтӥз ке но, киоссэ ӧз лэзьы. Солэн азьло сямен ик потэ вал Инмарен сётэм ужзэ быдэстэмез (Суд. 16:28—30). Соин ик со Иеговаез куриз: «Филистим калыклы пунэмме берыктыны мед быгатысал». Зэмос Инмар Самсонлэн вӧсяськонэзлы ответ сётӥз но солы паймымон кужымзэ берыктӥз. Талы луыса Самсон азьло сярысь но тросгес филистим пиосты вииз. Самсонлэн янгышамез секыт бервылъёсы вуттӥз ке но, солэн азьло сямен ик Иеговалэсь эриксэ быдэсъямез потэ вал. Янгышаменымы сэрен милемыз тупатоно ке яке ми кенешын дано ужъёсмес ыштӥмы ке, Самсон сямен, милемлы но сётсконо ӧвӧл. Эн вунэтэ: Инмармы милемыз простить карыны дась (Пс. 102:8, 9). Азьвыл янгышаммы шоры учкытэк, Самсонлы кадь ик, Иегова милемлы но выль ужъёс но кужым сётыны быгатэ. w23.09 6 б., 15, 16 абз.

Иегова шумпотэ, шуг-секытъёс дыръя тӥ солы оскымонэсь кылиськоды шуыса. Талы луыса тӥ Инмарлы ярамонэсь луиськоды. Ми туж шумпотӥськомы, шуг-секытъёсты чидаммес адӟыса, Иегова милемын данъяське шуыса! (Пс. 5:13). Тодады вае Авраамлэсь учырзэ. Бадӟым шуг-секытъёсын пумиськыса но, со ваньзэ чидаз. Соин ик Иегова сое аслаз эшеныз но шонерлыко адямиен лыдъяз (Ул.-выл. 15:6; Рим. 4:13, 22). Тӥ но быгатӥськоды Инмарлы ярамонэсь луыны. Инмар уг учкы, кыӵе ужъёс ми быдэсъяськомы яке кытын ужаськомы-тыршиськомы. Со шумпотэ, шуг-секытъёс дыръя ми солы оскымонэсь луыны тыршиськомы ке. Кыӵе гинэ арлыдмы, югдурмы яке быгатонлыкъёсмы медам луэ, котькудмы чидасесь луыны быгатӥськомы. Тӥ али кыӵе ке шуг-секытэн пумиськиды ке, эн вунэтэ: оскымон луэмдэс адӟыса, Иегова шумпотэ. Ми Иеговалы ярамонэсь бере, со милемыз одно ик бакель кароз. Нош та оскиськонмес эшшо но юнматэ. w23.12 11 б., 13, 14 абз.

Агайлы дышетсконо адямиосын вераськыны. Со, кин адямиосын вераськыны быгатэ, соосты сак кылзэ но тырше соосты валаны (Мад. 20:5). Со понна дышетсконо валаны, мае возьматэ адямилэн куараез, ымныр тусыз но выросъёсыз. Но тӥ солы дышетскыны уд быгатэ, адямиосын дырдэс ӧд ке ортчытъялэ. Тӥ адямиосын мессенджеръёс пыр гинэ вераськиды ке, тӥледлы секыт луоз соосын пумиськыса вераськыны. Соин ик тырше тросгес адямиосын ваче ымныр вераськыны (2 Иоанн 12). Озьы ик агайлы аслаз но семьяезлэн кулэяськонъёсыз сярысь сюлмаськоно (1 Тим. 5:8). Тӥ егит дыръяды ик кыӵе ке ужлы дышетскиды ке, азьланяз со юрттоз тӥледлы тупась уж шедьтыны (Ап. уж. 18:2, 3; 20:34; Еф. 4:28). Тыршыса ужалэ но кутскем ужез котьку но пумозяз вуттэ. Соку мукетъёсыз адӟозы, тӥ умой ужаськоды шуыса, но тӥледлы капчигес луоз уж шедьтыны. w23.12 27 б., 12, 13 абз.

Куке Библиын гожтэмын «Иеговалэн нуналыз» сярысь, отын вераське дыр сярысь, куке Инмар аслэсьтыз тушмонъёссэ судъя но ужась-тыршисьёссэ уте. Азьвыл Иегова куд-ог калыкъёсты кыл кутытылӥз (Ис. 13:1, 6; Иез. 13:5; Соф. 1:8). Асьме нуналъёсы «Иеговалэн нуналыз» кутскоз Быдӟым Вавилон вылэ урдсконысен но йылпумъяськоз Армагеддон ожмаськонэн. Со «нуналэ» утиськон понна, али ик ини дасяськыны кулэ. Малы ке шуоно Иисус дышетӥз, ми бадӟым куректонлы котьку но дась луыны кулэ шуыса (Матф. 24:21; Лука 12:40). Фессалоникаослы 1-тӥ гожтэтын апостол Павел куд-ог примеръёсты вера, христианъёс Иеговалэн бадӟым судъян нуналэзлы дась мед луозы шуыса. Павел тодӥз, Иеговалэн нуналыз берлогес вуоз шуыса (2 Фес. 2:1—3). Озьы ке но вын-агайёсызлэсь со мылкыдзэс ӝутӥз Иеговалэн нуналэзлы дась луыны, со ӵуказе ик вуоз кадь шуыса. Ми но быгатӥськомы апостол Павеллэсь визь-кенешсэ уже кутыны. w23.06 8 б., 1, 2 абз.

Токио карын 1970-тӥ аръёслэн пумазы 60 этажъем корка пуктӥзы. Адямиос паймо вал, уз куашка-а со музъемзурканъёс дыръя, кудъёсыз отын туж ӵем луыло. Малы та корка ӧз куашка? Инженеръёслэн тыршемзылы луыса со юн но со дыре ик някырес вал. Соин ик со быгатӥз музъемзурканъёсты чиданы. Христианъёсты таӵе коркаен ӵошатыны луэ. Малы? Христиан муртлы та удысын зарни шорзэ шедьтоно. Солы юн луоно, куке вераськон мынэ Иеговалэн катъёсыз но эсэпъёсыз сярысь. Номыр шоры учкытэк, со кылзӥськыны тырше. Со дыре ик, солы валась луоно, яке кулэ дыръяз тупатскыны тыршоно (Иак. 3:17). Христиан мурт та удысын зарни шорзэ шедьтӥз ке, соку со укыр юн но, укыр ляб но уз луы. w23.07 14 б., 1, 2 абз.

Шайтан Иисуслэсь визьзэ сыназ. Солэн потэ вал, Иисус Инмарез мед вузалоз шуыса (Матф. 4:1—11). Шайтанлэн туж потэ вал, Иисус мед сьӧлыкалоз шуыса. Солэн малпанэз быдэсмысал ке, Иисус дун тырыны ӧй быгатысал. Ужаны-тыршыны кутскемез бере но Иисус шуг-секытъёсын пумиськылӥз. Тушмонъёсыз сое уйылӥзы-уллязы, кӧня ке пол виыны но турттӥзы (Лука 4:28, 29; 13:31). Со сяна, солы чидано вал дышетскисьёсызлэсь янгышъёссэс (Марк 9:33, 34). Иисусэз судъямзы бере сое сантэмазы, ултӥязы, мыскыл каризы, нош собере йыруж лэсьтӥсез кадь юбо борды кортӵогазы (Евр. 12:1—3). Юбо бордын Иисус огназ курадӟиз — со дыре Иегова сое ӧз утьы (Матф. 27:46). Бен, дун тырон понна, Иисус трос курадӟоно луиз. Куке ми малпаськомы ваньмыз сярысь, мае Иисус ми понна чиданы дась вал, милям сюлэммы яратонэн но тау каронэн пачылме. w24.01 10—11 б., 7—9 абз.

Чидась адямилы капчигес мукетъёсыныз умой кусыпъёс возьыны. Чидан юрттэ милемлы сак кылзыны, куке милемлы мае ке верало (Иак. 1:19). Озьы ик та сям юрттэ милемлы тупаса улыны но малпаськыса ответ сётыны. Ми чидасесь луимы ке, соку секыт дыръя лек кылъёсты ум вералэ. Озьы ик милемыз вӧсь каризы ке, ми ум пурӟе. Ми пунэмзэ ум берыктӥське. Со интые, ми уже кутӥськомы Библиысь таӵе визь-кенешез: «Ог-огдэс чидаса улэ... ог-огдылы простить каре» (Кол. 3:12, 13). Ми чидасесь ке, соку кутэм ужпумъёсмы умойгес луозы. Ми дыртыса яке малпаськытэк ужпумъёс ум кутэ. Ми ваньзэ лыдэ басьтыны тыршомы но шонер ужпум кутомы. Шуом, ми уж утчаськомы. Оло нош, ми дась соглаш кариськыны нырысетӥ шедьтэм ужлы. Но ми чидасесь ке, ми лыдэ басьтомы, кызьы со шӧдӥськоз семьямы но Инмарен кусыпъёсмы вылын. Ми чидасесь ке, малпаськытэк кутэм ужпумъёсмы понна берло ум жалялэ. w23.08 22 б., 8, 9 абз.

Шонертэм мылпотонъёстэс адӟыса, тӥляд мылкыдды куашканы быгатэ. Но кидэс эн лэзе! Малпаське, мар карыны тӥ кылдэс сётӥды Иеговалы, солы сӥзиськыкуды. Та мылкыддэс юнматоз визь сынаськонъёслы сётскытэк улыны. Кызьы? Улондэс Иеговалы сӥзьыса, тӥ асьтэлэсь асьтэос куштӥськиды. Тӥ палэнтӥды вань мылпотонъёстэс но пуктэм ужпумъёстэс, кудъёсыз Иеговаез ӝоже уськытыны быгатысалзы (Матф. 16:24). Тӥ ужпум пуктӥды Иеговалы оскымон луыны. Соин ик, шуг-секытэн пумиськыкуды, тӥ тододы, кызьы асьтэды возёно. Тӥляд юн мылкыдды луоз Инмарез шумпоттыны. Иов сямен, тӥ тыршоды, номыр шоры учкытэк, солы оскымон кыльыны (Иов 27:5). w24.03 9 б., 6, 7 абз.

Иегова, «яратыса... улонлэн Инмарез», милемын артэ! (2 Кор. 13:11). Со адӟе, мар котькуд адямилы кулэ, но котькудӥзлы яратэмзэ возьматэ (Пс. 31:10). Куке ми малпаськиськомы со сярысь, кызьы Инмар милемлы яратэмзэ возьматэ, соин кусыпъёсмы юнгес луо. Ми быгатӥськомы солы вӧсяськыны но вераны, макем милемлы кулэ, со милемыз мед яратоз шуыса. Озьы ик ми быгатӥськомы солы сюлмаськонъёсмес вераны но юн оскыны, со милемыз валалоз но милемлы одно ик юрттоз шуыса (Пс. 144:19). Кызьы кезьыт нуналэ тылскем милемыз шунтэ, ӵапак озьы ик Иеговалэн яратэмез шуг-секытъёс дыръя милемыз буйгатыны быгатэ. Ми туж шумпотӥськомы, ачиз Иегова милемыз яратэ шуыса. Ойдолэ ми но, псаломъёсты гожъясь сямен, шуомы: «Кузё-Инмаре, Тонэ яратӥсько!» (Пс. 17:2). w24.01 31 б., 19, 20 абз.

Иисус Инмарлэсь нимзэ гинэ адямиослы ӧз вера. Еврейёс, кудъёссэ со дышетӥз, тодо вал ини, Инмарлэн нимыз — Иегова шуыса. Нош Иисус соослы юрттӥз умойгес валаны Инмарлэсь сямъёссэ (Иоанн 1:17, 18). Кылсярысь, Еврей Гожтэмъёсын верамын, Иегова адямиез яратӥсь но гажась-жалясь шуыса (Пот. 34:5—7). Иисус валэктӥз, кызьы Иегова та сямъёссэ возьматэ, йыромем пи сярысь мадёнэз вераса. Куке ми лыдӟиськомы, кызьы йыромем пилэн атаез, бертӥсь пизэ кыдёкысен ик адӟыса, солэн пумитаз бызьыса мынэ, кызьы со сое ӟыгыртэ но вань сюлмысьтыз простить каре, ми валаськомы, макем яратӥсь но гажась-жалясь луэ Иегова (Лука 15:11—32). Иисус возьматӥз, кыӵе солэн Атаез зэмзэ ик. w24.02 10 б., 8, 9 абз.

Иегова адямиосты туж гажа-жаля. Иеговалэсь адӟем карыса, милемлы но мукетъёсты гажано-жаляно но буйгатоно. Нош асьмеды озьы возён понна, мукет сямъёсты будэтоно на. Кыӵе сямъёс сярысь татын вераське? Нуналысь нуналэ ог-огмес буйгатон понна, милемлы ӟеч сямоесь луыны кулэ (Кол. 3:12; 1 Фес. 4:18; 1 Пётр 3:8). Гажан-жалянмес но ӟеч сямъёсмес возьматӥмы ке, соку милям юн мылкыдмы луоз куректӥсьёсты буйгатыны. Иисус шуиз: «Сюлэм пачылмыку, кыл вера. Ӟеч адями ӟеч шыкысысьтыз ӟечсэ поттэ» (Матф. 12:34, 35). Секыт югдуре шедем вын-агайёсмес но сузэр-апайёсмес буйгатӥмы ке, соку соос шӧдозы, ми соосты яратӥськомы шуыса. w23.11 10 б., 10, 11 абз.

Библиысь азьпалзэ ивортонъёсты валан понна, милемлы юрттэт кулэ. Эскеромы тае пример вылын. Пуктэ син азяды, тӥ тодмотэм интые вуиды шуыса. Но тӥ огнады ӧвӧл — тӥледын эшты, кудӥз та интыез туж умой тодэ. Со тодэ, кытын тӥ али но кытчы нуэ котькуд сюрес. Иеговаез сыӵе эшен ӵошатыны луэ. Со тодэ, историлэн кыӵе вакытаз ми улӥськомы но мар милемыз азьланяз возьма. Озьыен, Библиысь азьпалзэ ивортонъёсты валан понна, милемлы зӥбыт-востэмесь луоно но Иеговалэсь юрттэт куроно (Дан. 2:28; 2 Пётр 1:19, 20). Умой анай-атайёс нылпиоссылы шуд гинэ сӥзё. Иегова — ӵапак сыӵе Атай (Иер. 29:11). Но адямиосын ӵошатыса, Инмар пыр-поч вераны быгатэ, мар азьланяз луоз. Куд-ог пиосмуртъёслэсь со мылкыдзэс ӝутӥз, азьпалзэ ивортонъёсты гожтыны. Солы луыса ми тодыны быгатӥськомы кулэ луись югдуръёс сярысь, кудъёсыз азьланяз луозы (Ис. 46:10). w23.08 8 б., 3, 4 абз.