Куарусён

Инмар Иисуслы кужым сётӥз адямиослэсь вань шуг-секытъёссэс сэрттыны-пертчыны. Паймымон ужъёс лэсьтыса, Иисус возьматӥз, вань шуг-секытъёсмес сэрттыны-пертчыны быгатэ шуыса, кудъёсыныз ми асьмеос номыр карыны ум быгатӥське. Кылсярысь, со быгатэ быдтыны курадӟонъёсмылэсь валтӥсь мугзэс — Адамлэсь выжем сьӧлыкез. Озьы ик Иисус быдтоз сьӧлыклэсь бервылъёссэ, висёнъёсты но, кулонэз но (Матф. 9:1—6; Рим. 5:12, 18, 19). Иисуслэн паймымон ужъёсыз возьматӥзы, со адямиосты пӧртэм висёнъёслэсь бурмытыны но кулэмъёсты улӟытыны быгатэ шуыса (Матф. 4:23; Иоанн 11:43, 44). Со сяна, со быгатэ зарезь вылысь кужмо сильтӧлъёсты дугдытыны но адямиосты лек периослэсь мозмытыны (Марк 4:37—39; Лука 8:2). Ми туж шумпотӥськомы, Иегова аслаз Пиезлы сыӵе кужым сётӥз шуыса! Ми оскыны быгатӥськомы, Инмарлэн вань кылсётонъёсыз Эксэйлыкезлэн кивалтэмез улсын быдэсмозы шуыса. Иисуслэн паймымон ужъёсыз возьмато, мар со кароз быдэс дунне вылын, инмысь Эксэйлыкын Эксэй луыса кивалтыкуз. w23.04 3 б., 5—7 абз.

Тӥ бадӟым кенешын ужаськоды-тыршиськоды но тӥлесьтыд кидэс уг адӟо ке, сыӵе дыре валэктон сётыны уг поты ни, вылды. Но кидэс эн лэзе! Котькуд пумиськонлы кӧня ке валэктонъёс дасялэ. Тӥледыз эскеронлэн кутсконаз ӧз юалэ ке, тӥ быгатоды берлогес валэктон сётыны. «Возьмаськон башняез» эскеронлы дасяськыкуды, малпаське, кызьы котькуд абзац статьялэн темаеныз герӟаськемын. Соку тӥ трос умой валэктонъёс дасяны быгатоды. Со сяна, дасялэ валэктонъёс сыӵе абзацъёслы, кудъёсаз мур зэмлыкъёс эскерисько. Сыӵе абзацъёсты валэктыны секытгес бере, валэктонъёс сётыны мылкыд карисьёс ӧжытгес луозы, вылды. Нош мар кароно, тӥледыз кӧня ке пумиськонъёс ӵоже ини уг юало ке? Вуоно пумиськон азьын эскеронэз ортчытӥсь агайлы вералэ, кыӵе юанлы валэктон сётэмды потэ. w23.04 21—22 б., 9, 10 абз.

Иосиф дась вал Иеговалэсь кылзӥськыны, соин ик со умой карт луиз. Библиын верамын куинь учыръёс сярысь, куке солы, семьялэн йырызлы кадь, Инмар кивалтэт сётылӥз. Со котьку но ӝегатскытэк кылзӥськылӥз, со понна бадӟым воштӥськонъёс лэсьтоно вал ке но (Матф. 1:20; 2:13—15, 19—21). Инмарлэсь кылзӥськыса, Иосиф Марияез утиз, сое юнматӥз но со сярысь сюлмаськиз. Та понна Мария сое эшшо но золгес яратӥз но гажаз, луоз. Дуно картъёс, кызьы тӥ Иосифлэсь адӟем карыны быгатӥськоды? Утчалэ Библиысь визь-кенешъёсты, кызьы семьяды сярысь сюлмаськоно. Та визь-кенешъёсты уже кутыса,— со понна бадӟым воштӥськонъёс лэсьтоно луиз ке но,— тӥ кышнодылы яратондэс возьматоды но кусыпъёстэс юнматоды. Вануа́ту шаерысь сузэр, кудӥз 20 арлэсь но кемагес быземын ини, вера: «Куке картэ Иеговалэсь кивалтэтсэ утча но сое уже кутэ, мон сое эшшо но золгес гажасько. Мон номырлэсь уг кышкаськы но оскисько, со шонер ужпум кутӥз шуыса». w23.05 21 б., 5 абз.

Вавилонысь берытскем израиль калыклы аслаз Инмарез понна «святой калык» луоно вал (К. Зак. 7:6). Но та уг возьматы, соослы номыре тупатоно ӧй вал шуыса. Еврей калык пӧлысь тросэз Вавилонын вордӥськизы но вавилон калыклэн сям-йылолъёсызъя улӥзы, вылды. Израиле берытскемзы бере кӧня ке дасо аръёс ортчыса, Неемия кивалтӥсь туж паймиз, Израильын вордӥськем куд-ог нылпиос еврей кылын уг верасько шуыса (К. Зак. 6:6, 7; Неем. 13:23, 24). Быгато вал-а та нылпиос Иеговаез яратыны но солы йыбыртъяны, соос еврей кылын гожтэм Инмарлэсь Кылзэ ӧз валалэ ке? (Езд. 10:3, 44). Соин ик еврей калыклы бадӟым воштӥськонъёс лэсьтоно вал. Израильын чылкыт йыбырттон пичиен-пичиен тупатскиз бере, отын сое лэсьтыны капчигес вал (Неем. 8:8, 9). w23.05 15 б., 6, 7 абз.

Жаляса верано луэ, кыӵе гинэ мылкыдмы медам луы яке кӧня гинэ медам тырше, куддыръя милемлы мар ке но люкетыны быгатэ. Кылсярысь, малпамтэ шорысь кылдэм югдуръёсын сэрен ужпуммес быдэстыны милям дырмы уз кыльы ни, вылды (Екк. 9:11). Ми быгатомы пумиськыны шуг-секытэн, кудӥныз сэрен мылкыдмы куашкалоз яке кужыммы ӧжыт луоз (Мад. 24:10). Озьы ик, ми тырбыдэстэмесь бере, ми быгатомы лэсьтыны янгышъёсты, кудъёсыз люкетозы милемлы ужпуммес быдэстыны (Рим. 7:23). Оло нош, ми жадёмы но (Матф. 26:43). Мар юрттоз милемлы азьлань мыныны? Тодады возе, тӥляд мае ке лэсьтэмды уг пӧрмы ке, со уг возьматы, ужпумдэс быдэстыны уд быгатэ шуыса. Библиын верамын, ужпумъёсмес быдэстыкумы, ми шуг-секытъёсын пумиськомы шуыса. Озьы ик отын верамын, милям соосты вормеммы луоз шуыса. Шуг-секытъёсты шоры учкытэк, азьлань мынӥськоды ке, тӥ Иеговалы возьматӥськоды, сое шумпоттэмды потэ шуыса. Макем Иегова шумпотэ, луоз, куке, номыр шоры учкытэк, тӥ азьланяз но тыршиськоды ужпумъёстэс быдэстыны! w23.05 30 б., 14, 15 абз.

Куке егит агай пионер луыса ужа-тырше, со дышетске пӧртэм адямиосын огкыл шедьтыны. Озьы ик со дышетске коньдонзэ визьмо кутыны (Флп. 4:11—13). Тросэз агайёс нырысь юрттӥсь пионеръёс луыса ужазы-тыршизы. Собере пионеръёс луизы. Нош дыр ортчыса, соос азьын мукет ӧсъёс но усьтӥськизы. Кылсярысь, куд-огъёссэ ӧтизы Вефильын ужаны-тыршыны яке пуктӥськон проектъёсын юрттӥськыны. Вань агайёслы тыршоно тӧро луыны. Нош со понна соослы Библиысь куронъёслы тупано. Библиын вераське, кинлэн тӧро луэмез потэ, со «ӟеч уж лэсьтыны мылкыд каре» шуыса (1 Тим. 3:1). Нырысь агай кӧня ке дыр ӵоже кенешлы юрттӥсь луыса ужаны-тыршыны кулэ. Кенешлы юрттӥсьёс тӧроослы юртто кенешысь агайёс но сузэръёс сярысь сюлмаськыны. Тӧроос но, кенешлы юрттӥсьёс но — зӥбыт-востэм агайёс, кудъёсыз Иеговалэн ужась-тыршисьёсызлы юртто но мылысь-кыдысь тодытон уже пырисько. w23.12 28 б., 14—16 абз.

16 арес дыръяз Иосиялэн потӥз Иеговаез умойгес тодэмез но солэсь эриксэ быдэсъямез. Но та егит эксэйлэн шуг-секытъёсыз но вал. Тросэз адямиос зэмос луисьтэм инмаръёслы йыбыртъязы. Тае быдтон понна, кышкасьтэм луоно вал. Иосия ассэ озьы ик возиз. Солы 20 арес но ӧй вал на, куке со шаерез сульдэр-идолъёслэсь сузяны кутскиз (2 Пар. 34:1, 2). Егит агайёсмы но сузэръёсмы, тӥ быгатӥськоды Иосиялэсь адӟем карыны но Иегова сярысь тросгес тодыны. Соку тӥляд мылкыдды луоз улондэс Инмарлы сӥзьыны. Кызьы соку улонды воштӥськоз? Лу́ка агай 14 арес дыръяз пылатӥськиз. Со таӵе ужпум кутӥз: «Та дырысен Иеговалы ужан-тыршон улонам валтӥсез луоз. Мынам котьку но сое шумпоттэме потэ» (Марк 12:30). Тӥ но таӵе ик ужпум пуктӥды ке, тӥ трос бакель каронъёс басьтоды! w23.09 11 б., 12, 13 абз.

Апостол Павел Фессалоникаослы гожтэтсэ гожтыкуз, та карысь кенешлы ар но ӧй вал на. Та кенешысь тӧроос трос ужаса-тыршыса ӧз вуэ на. Соос янгышъёс лэсьтылӥзы. Озьы ке но соосты гажано вал. Бадӟым куректон матэктэ бере, азьланяз тӧроос пыр сётэм кивалтэт милемлы эшшо но кулэ луоз, дыр. Оло нош, ми ум быгатэ валтӥсь кивалтонниен яке филиалэн герӟаськыны. Соин ик туж кулэ али ик дышетскыны дуно тӧроосмес яратыны но гажаны! Мар гинэ медам луы, ойдолэ сак луомы но тӧроослэн тырмымтэоссылы саклыкмес ум висъялэ. Со интые, тодамы возёмы, Иегова та оскымон пиосмуртъёсын Иисус Христос пыр кивалтэ шуыса. Корт изьы ожгарчилэсь йырзэ утьылӥз. Нош вуоноезлы оскон милесьтым йырвизьмес уте. Ми валаськомы, та дуннеын солэсь но дуноез номыр ӧвӧл шуыса (Флп. 3:8). Вуоноезлы оскон юрттэ милемлы котькыӵе югдурын каньыл сюлмын улыны но асьмеды киямы кутыны. w23.06 11—12 б., 11, 12 абз.

Соослы, кинъёс «визьзэ ыштэм... кышномуртлэсь» ӧтёнзэ кыло, бырйыны кулэ: ӧтёнэзлы соглаш кариськоно яке сое палэнтоно. Милям вань трос мугъёсмы азон-калгонлэсь палэнскыны. «Визьзэ ыштэм... кышномурт» вера: «Лушкам ву ческыт йӧтэ» (Мад. 9:17). Мар со сыӵе «лушкам ву»? Библиын картлэн но кышнолэн кусыпъёссы ӵошатӥсько сюэз юзматӥсь вуэн (Мад. 5:15—18). Пиосмурт но кышномурт гожтӥськемын ке, озьы ик соос асьсэды чылкыт возё ке, соос быгато сыӵе кусыпъёссылы шумпотыны. Но тае уг луы вераны «лушкам ву» сярысь — азон-калгон сярысь. Ӵем дыръя адямиос азон-калгон сьӧлыке пыро мукетъёсызлэсь лушкемен, лушкаськисьёс кадь. «Лушкам ву» ческыт потыны быгатэ тужгес но соослы, кинъёс малпало, сьӧлыкамзы понна соослы номыр уродэз уз луы шуыса. Но со озьы ӧвӧл! Малы ке шуоно Иегова ваньзэ адӟе. Самой уродэз, кытчы вуттыны быгатэ сыӵе сьӧлык,— адями Иеговалы ярамон уг луы ини. Нош соку отын номыр «ческытэз» ӧвӧл ини (1 Кор. 6:9, 10). w23.06 22 б., 7—9 абз.

Мар кароно, тӥ шӧдӥськоды ке, вань сюлмысьтыды уд вӧсяськиське яке ужан-тыршон азьвыл мында шумпотон уг вайы ини шуыса? Эн малпалэ, Иегова тӥледлы святой духсэ уг сёты ни шуыса. Ми тырбыдэстэм адямиос бере, шӧдонъёсмы вошъяськыны быгато. Мылкыдды куашка ке, малпаське апостол Павел сярысь. Со туж тыршиз Иисуслэсь адӟем карыны, но со тодӥз, Инмарлы ужамез-тыршемез котьку ик уз поты шуыса. Озьы ке но Павел дась вал ужаны-тыршыны соку но, куке солэн мылыз уг поты вал. Павел сямен, тӥ но, шӧдонъёсты вылэ пыкиськыса гинэ, ужпумъёс эн кутэ. Мылды уг поты ке но, тырше лэсьтыны сое, мар шонер луэ. Дыр ортчыса, шонер ужъёс лэсьтыны мылкыдды но луоз (1 Кор. 9:16). w24.03 11—12 б., 12, 13 абз.

Ми быгатӥськомы агайёсмылы но сузэръёсмылы яратонмес возьматыны но соосын эшъяськыны (2 Кор. 6:11—13). Кенеше ветло пӧртэм калыкъёсысь но пӧртэм сямо вын-агайёс но сузэр-апайёс. Туж кулэ соослэн умой сямъёссылы саклык висъяны. Соку ми соосты эшшо но золгес яратомы. Куке ми тыршиськомы адямиос шоры Иеговалэн синмыныз учкыны, ми соослы яратэммес возьматӥськомы. Яратонмес возьматыны тужгес но кулэ луоз бадӟым куректон дыръя. Кызьы Иегова милемыз утёз, со кутскыку? Тани мар карыны кулэ вал Инмарлэн ужась-тыршисьёсыз, куке мидян но перс ожгарчиос вашкала Вавилон вылэ урдскизы: «Калыке, мын, шутэтскон интыосад пыр но ас бӧрсяд ӧсъёстэ ворса, огдырлы, вожпоттон дыр ортчытозьлы, ватӥськы» (Ис. 26:20). Та кылъёсты герӟаны луэ, дыр, милемын но, бадӟым куректон азьын улӥсьёсын. w23.07 6—7 б., 14—16 абз.

Милемлы тыршоно валасесь луыны. Юалэ асьтэлэсь: «Малпало-а адямиос, мон валась луыны тыршисько, асме лякыт возисько но мукетъёсызлэсь малпанъёссэс лыдэ басьтӥсько шуыса? Яке мукетъёсызлэн малпамзыя, мон ваменэс, лек но чурыт адями? Мон мукетъёсты кылзӥсько-а но, луэ ке, соослэсь малпанъёссэс лыдэ басьтӥсько-а?» Ми валасесь луимы ке, соку Иеговалы но Иисуслы кельшомы. Ми валась луэммес возьматомы, воштӥськем югдурлы тупатскыны тыршимы ке. Сыӵе воштӥськонъёсын сэрен малпамтэ шорысь шуг-секытъёс кылдыны быгато. Кылсярысь, тазалыкмы уродмыны быгатэ. Нош коньдонэн яке политикаен герӟаськем бугыръяськонъёсын сэрен улонмы чылкак мукет луыны быгатэ (Екк. 9:11). Озьы ик секыт луэ, куке Иеговалэн организацияз мукет ужъёсты быдэсъяно яке мукет интыын ужано-тыршоно луэ. Милемлы юрттозы ньыль вамышъёс: 1) валалэ, югдурды воштӥськиз шуыса, 2) азьлань учке, 3) умойзэ адӟыны тырше но 4) мукетъёсызлы юрттэ. w23.07 21—22 б., 7, 8 абз.

Егит дыръяз Даниил пророкез вордскем карысьтыз кыдёкысь вавилон пленэ нуизы. Адямиос соку солы саклыксэс висъязы. Ваньзы адӟизы, Даниил «чик шектэм мугоро, чебер тусбуё» но сӥё-дано семьяысь потэмын шуыса. Соин ик Вавилонын улӥсьёс сое дасяны кутскизы эксэй юртын ужаны (Дан. 1:3, 4, 6; 1 Экс. 16:7). Иегова Даниилэз яратӥз, малы ке шуоно Даниил вань сюлмысьтыз тыршиз Инмарез шумпоттыны. Малпалэ гинэ: Даниил 20 ареслэсь ӧжыт гинэ бадӟымгес вал. Озьы ке но Иегова сое одӥг радэ пуктӥз Ной но Иов ужась-тыршисьёсыныз, кудъёсыз трос дасо аръёс ӵоже оскымон ужазы-тыршизы (Ул.-выл. 5:32; 6:9, 10; Иов 42:16, 17; Иез. 14:14). Даниил кема улӥз но пӧртэм учыръёсын пумиськылӥз. Иегова сое вань улонэз ӵоже яратӥз (Дан. 10:11, 19). w23.08 2 б., 1, 2 абз.

Тӥ корка басьтыны малпады ке, тӥляд потоз отчы мынэмды но ваньзэ пыр-поч учкемды. Тае ик лэсьтыны луэ, Библиез лыдӟыкумы но сое эскерыкумы. Ӝог лыдӟыса, тӥ Библиысь валтӥсь зэмлыкъёсты гинэ тододы (Евр. 5:12). Корка басьтыкумы, ми пушказ пырыса ваньзэ умой-умой учкиськомы. Библиез лыдӟыкумы но, озьы ик карыны луэ. Соин ик адӟыны тырше, кызьы Библиысь пӧртэм зэмлыкъёс ог-огенызы герӟаськемын. Озьы ик валаны тырше, кыӵе зэмлыкъёслы тӥ оскиськоды но малы тӥ соослы оскиськоды. Библиез умой валан понна, милемлы сое мур эскерыны кулэ. Апостол Павел ӧтиз вын-агайёссэ но сузэр-апайёссэ Инмарлэсь Кылзэ эскерыны, соос зэмлыклэсь «пасьталазэ, кузьдалазэ, ӝуждалазэ но мурдалазэ» пыр-поч мед валалозы шуыса. Та соослы юрттысал осконзэс юнматыны (Еф. 3:14—17). Милемлы но озьы ик кароно. w23.10 18 б., 1—3 абз.

Библиын вераське на трос мукет адямиос сярысь, кудъёсыз чиданзэс возьматылӥзы. Умой луысал соосын матэгес тодматскыны. Кылсярысь, вераськомы Давид сярысь. Иегова сое бырйиз Израильын эксэй луыны, куке со быдэ вуэмын ӧй вал на. Эксэй луытозяз, Давидлы трос аръёс возьмано луиз. Симеон но Анна трос дасо аръёс ӵоже Мессиялэсь лыктэмзэ возьмазы но Иеговалы оскымон ужазы-тыршизы (Лука 2:25, 36—38). Инмарлэн оскымон ужась-тыршисьёсыз сярысь малпаськыкуды, юалэ асьтэлэсь: «Мар юрттӥз та адямилы чидась луыны? Кыӵе пайда та солы вайиз? Кызьы мон солэсь адӟем карыны быгатӥсько?» Озьы ик тӥ тросэзлы дышетскыны быгатӥськоды соослэсь, кинъёс чиданзэс ӧз возьматэ (1 Экс. 13:8—14). Юалэ асьтэлэсь: «Мар люкетӥз солы чидась луыны? Кытчы со вуттӥз?» w23.08 25 б., 15 абз.

Апостол Пётр оскымон вал. Номыр шоры учкытэк, со Иисус сьӧры мынӥз. Солэн оскымон луэмез тужгес но умой адӟиськиз, куке мукет дышетскисьёс Иисуслэсь верамзэ ӧз валалэ (Иоанн 6:68). Иисуслэсь валэктэмзэ возьматэк, тросэз Иисус сьӧры мынэмысь дугдӥзы. Нош Пётр ӧз. Со туж умой валаз, Иисуслэн гинэ «быронтэм улонлэн кылъёсыз вань» шуыса. Иисус тодӥз, Пётр но мукет апостолъёс сое кельтозы шуыса. Озьы ке но Иисус Пётрлы шуиз, со оске, берлогес Пётр юнматскоз но Инмарлы оскымон ужалоз-тыршоз шуыса (Лука 22:31, 32). Иисус вала вал, «дух сэзь, нош лулмугор кужымтэм» шуыса (Марк 14:38). Соин ик, Пётр Иисуслэсь куштӥськиз ке но, Иисус дышетскисезлы оскемысь ӧз дугды. Улӟемез бере Иисус Пётрлы возьматскиз, куке со огназ вал, вылды (Марк 16:7; Лука 24:34; 1 Кор. 15:5). Куректыса улӥсь апостолэз та туж юнматӥз, луоз. w23.09 22 б., 9, 10 абз.

Куке адями Инмарлы оске, Инмар сое быдэсак простить каре но солэсь сьӧлыкъёссэ тодаз уг ни вайы (Пс. 31:1, 2). Инмар сыӵе адямиез шонерлыкоен лыдъя солэн осконэзлы луыса. Авраамез, Давидэз но мукет оскымон ужась-тыршисьёссэ Инмар шонерлыко адямиосын лыдъяз ке но, соос азьло сямен ик тырбыдэстэмесь но сьӧлыкоесь вал. Но Инмар аслэсьтыз ужась-тыршисьёссэ шектэм адямиосын лыдъяз, малы ке шуоно соослэн осконзы вал (Еф. 2:12). Апостол Павеллэн кылъёсыз умой возьмато: Инмарлэн эшез луон понна, оскон кулэ. Авраам но Давид быгатӥзы Инмарен эшъяськыны, малы ке шуоно соослэн осконзы вал. Милям но осконмы луиз ке, ми но быгатомы Инмарлэн эшъёсыз луыны. w23.12 3 б., 6, 7 абз.

Туннэ вань христианъёслы бадӟым дан сётэмын Иеговалы курбонъёс вайылыны. Кылсярысь, ми солы сётыны быгатӥськомы дырмес, кужыммес но коньдонмес. Иеговалы самой умойзэ сётыса, ми возьматомы, солы йыбыртъяны луонлыкез дунъяськомы шуыса. Еврейёслы гожтэтэзлэн пумаз апостол Павел вера, мар сярысь милемлы ноку вунэтыны уг яра (Евр. 10:22—25). Кылсярысь, со вера вӧсяськон, тодытон уж, кенешлэн пумиськонъёсыз но ог-огмылы юрттӥськон сярысь. Инмарлэн «нуналэзлэсь матэгес вуэмзэ» шӧдыса, милемлы эшшо но зол тыршоно та ужъёсты быдэсъяны. Усьтӥськон книгалэн пумаз Иеговалэн кылчинэз кык пол вера: «Инмарлы йыбыртты» (Усьт. 19:10; 22:9). Та кылъёсты кылчин кык пол вераз бере, соослэсь кылзӥськыны туж кулэ. Ойдолэ котьку тодамы возёмы Иеговалэн быдӟым духовной храмез сярысь мур зэмлыкъёсты но дунъяломы Инмарлы ужаны-тыршыны луонлыкез! w23.10 29 б., 17, 18 абз.

Милям ог-огмес яратэммы потэ. Озьы ке но милемлы тодамы возёно Иисуслэсь алонзэ, «тросэзлэн яратонэз сӥялоз» шуыса (Матф. 24:12). Тае веракуз, Иисус аслаз дышетскисьёсыз сярысь ӧз вера ке но, милемлы чакласьконо, та дуннеысь асьсэды гинэ яратӥсь адямиос кадь асьмеды медам возе шуыса. Ваньзэ тае лыдэ басьтыса, ойдолэ тодомы, луэ-а кызьы ке эскерыны, макем юн ми яратӥськомы вын-агайёсмес но сузэр-апайёсмес? Валан понна, макем юн милям яратонмы, чакланы кулэ, кызьы ми асьмеды пӧртэм учыръёсын возиськомы (2 Кор. 8:8). Кылсярысь, апостол Пётр гожтӥз: «Уката ик огдэс огды сюлмысь яратыса улэ, малы ке шуоно яратон трос сьӧлыкъёсты шобыртэ» (1 Пётр 4:8). Куддыръя вын-агайёсмы но сузэр-апайёсмы янгышаны яке милемыз вӧсь карыны быгато. Со, кызьы ми асьмеды сыӵе дыръя возиськомы, возьматэ, макем юн ми соосты яратӥськомы. w23.11 10—11 б., 12, 13 абз.

Ми кенешысь куд-огъёссэ гинэ яратӥмы ке, соку уз луы вераны, ми Иисуслэсь «огдэс огды яратэ» курон-косонэзлэсь кылзӥськиськомы шуыса. Зэм, куд-ог агайёсын но сузэръёсын милям матысьгес кусыпъёсмы луыны быгато. Иисуслэн но вань дышетскисьёсыныз одӥг кадь матысь кусыпъёсыз ӧй вал (Иоанн 13:23; 20:2). Но апостол Пётр тодамы вайытэ, милемлы кенешысь ваньзэс вын-агайёсты кадь яратыны тыршоно шуыса. Соку котькудӥз ассэ яратӥсь семья пӧлын кадь шӧдоз (1 Пётр 2:17). Пётр милемыз ӧте: «Огдэс огды чылкыт сюлэмен яратэлэ» (1 Пётр 1:22). Татын та кылъёс возьмато, сюлэммес паськыт усьтоно шуыса, яратон понна соосты но, кинъёсты яратыны капчи ӧвӧл. Шуом, кин ке но милемыз вӧсь кариз. Нырысь ик милям пунэмзэ берыктэммы потоз, вылды. Но Иисус Пётрлы валаны юрттӥз, Иеговалы сыӵе ужъёс уг кельшо шуыса (Иоанн 18:10, 11). Пётр гожтӥз: «Уродлы пумит уродэн яке керетонлы пумит керетыса пунэмзэ эн берыктэ. Нош тӥ, эшшо ке, бакель каре» (1 Пётр 3:9). Озьыен, чылкыт сюлэмен яратон тӥлесьтыд мылкыддэс мед ӝутоз асьтэды лякытэн возьыны. w23.09 28—29 б., 9—11 абз.

Нылпиос туж ӝог будо. Со понна номыр кароно но ӧвӧл, кадь. Но зэмос христианъёс луон понна, мар ке но карыны кулэ (1 Кор. 13:11; Евр. 6:1). Со понна Иеговаен матысь кусыпъёс возёно. Озьы ик милемлы святой дух кулэ. Со милемлы юрттоз христиан сямъёсты будэтыны, дышетскыны солы, мар котькуд нунал кулэ луоз, но вуоноезлы дасяськыны (Мад. 1:5). Иегова пиосмуртэз но кышномуртэз кылдытӥз (Ул.-выл. 1:27). Соос туж пӧртэмесь. Со сяна, Иегова соослы пӧртэм ужъёс сётӥз. Соосты быдэстон понна, пиосмуртъёслы но кышномуртъёслы пӧртэм сямъёс но быгатонлыкъёс кулэ (Ул.-выл. 2:18). w23.12 18 б., 1, 2 абз.

Потэ вал-а Иисуслэн, мукет адямиос Атаезлэсь нимзэ мед вералозы шуыса? Потэ вал! Куд-ог религиозной кивалтӥсьёс малпало вал, Инмарлэн нимыз святой, соин ик сьӧлыко адямиослы сое вераны уг яра шуыса. Но Иисус ноку ӧз лэзьы, сыӵе шонертэм малпанъёс Атаезлэсь нимзэ вераны но сое данъяны солы мед люкетозы шуыса. Тодамы ваёмы учырез, куке Гадара шаерын Иисус перияськем муртэ бурмытӥз. Соку адямиос кышказы но Иисусэз отысь кошкыны куризы. Соин ик Иисус отысь кошкиз (Марк 5:16, 17). Но солэн потэ вал, со шаерын улӥсьёс Иеговалэсь нимзэ мед тодозы шуыса. Соин ик со куриз бурмытэм муртсэ бертыны но вераны, сое Иегова бурмытӥз шуыса (Марк 5:19). Озьы ик туннэ но Иисуслэн потэ, адямиос Атаезлэсь нимзэ мед тодозы шуыса! (Матф. 24:14; 28:20). Куке ми Инмарлэсь нимзэ мукетъёсызлы вераськомы, озьы ми Иисусэз, асьмелэсь Эксэймес, шумпоттӥськомы. w24.02 10 б., 10 абз.

Та дуннеын улон секытгес но секытгес луэ. Но милемлы юрттон понна, Иегова сётӥз милемлы агайёсмес но сузэръёсмес (Пс. 132:1). Озьы ик со юрттэ семьяослы шудо луыны (Еф. 5:33—6:1). Со сяна, Инмар милемыз дышетэ каньыл сюлмын улыны. Озьы ке но Иеговалы ужаны-тыршыны котьку ик капчи ӧвӧл. Куддыръя агайёслэн яке сузэръёслэн кылъёссы милемыз вӧсь каро. Куддыръя милям мылкыдмы куашка асьмелэн янгышъёсмы сэрен, тужгес но выльысь но выльысь соосты лэсьтӥськомы ке. Но кимес лэзёно ӧвӧл. Азьланяз но Иеговалы ужано-тыршоно, соку но, куке: 1) агай яке сузэр милемыз вӧсь каре, 2) кузпалмы милемыз вӧсь каре яке 3) ми асьмеос янгышаськомы. w24.03 14 б., 1, 2 абз.

Куддыръя тӥ кылоды вын-агайёс но сузэр-апайёс сярысь, кудъёсыз ужпум кутӥзы тросгес ужаны-тыршыны. Оло нош, кин ке но Эксэйлыкез тодытӥсьёслы школаез йылпумъяз яке кошкиз отчы, кытын ивортӥсьёс уг тырмо. Тӥ но сыӵе ик ужпумъёсты пуктыны быгатӥськоды ке, со туж умой! Иеговалэн калыкез котьку тырше Инмар понна тросгес лэсьтыны (Ап. уж. 16:9). Нош мар кароно, тӥ али сыӵе ужпумъёсты пуктыны уд ке быгатӥське? Эн малпалэ, тӥ мукетъёсызлэсь уродгес шуыса. Валтӥсез — тӥ христиан сюрес вылысь уд кожиське (Матф. 10:22). Куке тӥ тыршиськоды лэсьтыны ваньзэ, мае быгатӥськоды, Иегова туж шумпотэ. Та юрттоз тӥледлы пылатӥськемды бере но Иисус сьӧры мыныны (Пс. 25:1). w24.03 10 б., 11 абз.

Инмысь Атаймы кылзэ сётӥз ӧпкелисьёсты гажаны-жаляны но простить карыны (Пс. 85:5). Соин ик, ми лэсьтэм сьӧлыкъёсмы понна вань сюлмысьтымы ӧпкелиськомы ке, ми оскыны быгатӥськомы, Иегова сётэм кылзэ быдэстӥз но милемыз простить кариз шуыса. Милям ваньмылэн потэ Иеговалы ужан-тыршонын лэсьтэммы ваньзэ, мае быгатӥськомы. Но куд-огъёсыз малпало, Иеговалы ярамон луон понна, соос тырмыт лэсьтыны ноку уз быгатэ шуыса. Мар кароно, ми озьы малпаськомы ке? Тодады возе: Инмар укыр троссэ уг куры. Со милесьтым лэсьтыны луонтэмзэ ноку уг возьма. Со шумпотэ, куке ми лэсьтӥськомы сое, мае быгатӥськомы. Озьы ик малпаське соос сярысь, кинъёс, кужымзэс жалятэк, Иеговалы ужазы-тыршизы. Кылсярысь, апостол Павел. Со, ассэ жалятэк, трос аръёс ӵоже Иеговалы ужаз-тыршиз, сюрс иськемъёсты ортчиз но трос кенешъёсты кылдытӥз. Но куддыръя солэн югдуръёсыз воштӥсько вал. Соин ик азьвыл мында со тодытыны уг быгаты ни вал. Возьматэ вал-а та, со Иеговалы ярамон ӧвӧл ни шуыса? Уг. Павел лэсьтӥз сое, мае быгатӥз, соин ик Инмар сое бакель кариз (Ап. уж. 28:30, 31). Ми быгатомы куддыръя тросгес лэсьтыны, куддыръя — ӧжытгес. Но со валтӥсез ӧвӧл. Иегова понна валтӥсез — малы ми солы ужаськомы-тыршиськомы. w24.03 27 б., 7—9 абз.

Ми быгатӥськомы Иисуслэсь адӟем карыны, кызьы вӧсяськыны кулэ. Музъем вылын ужакуз-тыршыкуз, Иисус ӵем Иеговалы вӧсяськиз. Со понна Иисуслы дыр висъяно вал, малы ке шуоно солэн котьку трос ужез вал но со котырын трос адямиос вал (Марк 6:31, 45, 46). Огназ вӧсяськон понна, Иисус вазь ӵукна султылӥз. Огпол Иисус кулэ луись ужпум кутон азяз уйбыт вӧсяськиз (Лука 6:12, 13). Нош кулон азяз ӝытэ, музъем вылын ужан-тыршонэзлэн самой секыт вакытэз азьын, со кӧня ке пол вӧсяськиз (Матф. 26:39, 42, 44). Иисус возьматӥз, кӧня гинэ ужъёсмы милям медам луэ, вӧсяськонлы дыр висъяно шуыса. Со понна юри дыр висъяно луоз, вылды. Кылсярысь, ми быгатӥськомы ӵукна вазьгес султыны яке бергес изьыны выдыны. Озьы ми возьматомы, Иеговалэсь та кузьымзэ дунъяськомы шуыса. w23.05 3 б., 4, 5 абз.

Висъялэ саклыктэс туннэлы кылбурысь «Аслэсьтыз яратонзэ... кисьтэ» кылъёслы. Одӥг книгаын та кылъёс сярысь вераське, яратон зырӟем христианъёслэн сюлэмъёсазы «ӧръяськем шур кадь кисьтӥськиз» шуыса. Та туж умой возьматэ, макем юн яратэ Иегова зырӟем христианъёсты. Соос тодо, Инмар соосты яратэ шуыса (Иуда 1). Соослэн шӧдонъёссы сярысь апостол Иоанн гожтӥз: «Учкелэ, Атай кыӵе юн асьмеды яратӥз,— Инмарлэн нылпиосыз шуыса нимаз» (1 Иоанн 3:1). Нош Иегова зырӟем христианъёсты гинэ яратэ-а? Уг! Со ваньмылы аслэсьтыз яратэмзэ возьматэ. Иисуслэн ми понна кулэмез тужгес но умой возьматэ, макем юн яратэ милемыз Иегова (Иоанн 3:16; Рим. 5:8). w24.01 28 б., 9, 10 абз.

Туннэлы кылбурысь адӟиське, мар юрттӥз Давидлы кышканзэ вормыны. Сое виыны быгато вал ке но, со малпаськиз со вылын, мае Иегова солы азьланяз лэсьтоз. Давид тодӥз, дырыз дыръя Иегова сое утёз шуыса, малы ке шуоно Инмар сое Израильын эксэй луыны бырйиз (1 Экс. 16:1, 13). Давид оскиз, Иегова сётэм кылзэ быдэстоз шуыса. Мае лэсьтыны Иегова кылзэ сётэ котькудмылы? Ми ум возьмаське, Иегова милемыз вань шуг-секытъёслэсь утёз шуыса. Но ми тодӥськомы, выль дуннеын Иегова курадӟонъёсмес быдтоз шуыса (Ис. 25:7—9). Солэн кужымез вань кулэмъёсты улӟытыны, вань висёнъёсмес бурмытыны но тушмонъёсмес быдтыны (1 Иоанн 4:4). w24.01 6 б., 12, 13 абз.

Малпаське сӥзиськонды но пылатӥськонды сярысь. Малы тӥ та вамышъёсты лэсьтӥды? Малы ке шуоно Иегова пала султэмды потӥз. Тодады вае, мар тӥледыз оскытӥз, тӥ зэмлыкез шедьтӥды шуыса. Тӥ Иегова сярысь шонер тодон валан басьтӥды, инмысь Атайдэс яратыны но гажаны кутскиды. Тӥ оскондэс будэтӥды но азьвыл лэсьтэм сьӧлыкъёсты понна ӧпкелиды. Тӥляд мылкыдды ӝутскиз шонертэм ужъёстэс кельтыны но Иеговалэн эрикезъя улыны. Куке тӥ валады, Инмар тӥледыз простить кариз шуыса, тӥляд сюлэмды капчи луиз (Пс. 31:2). Тӥ кутскиды христиан пумиськонъёсы ветлыны но басьтэм тодон-валанъёсты сярысь мукетъёсызлы вераны. Собере тӥ сӥзиськиды но пылатӥськиды. Табере тӥ мынӥськоды улонэ нуись сюрес вылтӥ. Тӥляд юн мылкыдды вань азьланяз но та сюрес вылтӥ мыныны (Матф. 7:13, 14). Котьку юнэсь, Иеговалы оскымонэсь луэ но солэн кивалтэтэзлэсь кылзӥське. w23.07 17 б., 14 абз.; 19 б., 19 абз.

Тӥ тодады возиды ке, Иеговалэсь эриксэ нырысетӥ интые пуктыны кылдэс сётӥды шуыса, тӥледлы капчигес луоз визь сынаськонъёслы сётскытэк улыны. Кылсярысь, тӥ кузпалъяськем муртлы мултэс саклыктэс висъялоды-а? Уд! Малы ке шуоно тӥ Иеговалы кылдэс сётӥды ини сыӵе ужъёслэсь палэнскыны. Тӥ умойтэм мылпотонъёстылы пуромыны ӧд лэзе ке, тӥ трос шуг-секытъёслэсь палэнскоды но сюлэмды куректыса уз улы. Тӥ туж шумпотоды, «сьӧлыклэсь кышкасьтэмъёслэн сюрес вылазы» ӧд султэ шуыса! (Мад. 4:14, 15). Эн вунэтэ Иисус сярысь. Солэн юн мылкыдыз вал котьку но Атайзэ шумпоттыны. Солэсь адӟем карыса, тӥ но быгатоды соку ик палэнтыны ваньзэ, мар Инмарез ӝоже уськытыны быгатэ (Матф. 4:10; Иоанн 8:29). Шуг-секытъёс но визь сынаськонъёс дыръя тӥ возьматыны быгатӥськоды, Иисус сьӧры мыныны юн мылкыдды вань шуыса. Юн оске: Иегова тӥледлы юрттоз. w24.03 9—10 б., 8—10 абз.