Шуркынмон

Тӥляд нылпиосты вань ке, арлыдзэс лыдэ басьтыса, юрттэ соослы валэктонъёс дасяны. Куддыръя пумиськонын мур юанъёс эскерисько. Кылсярысь, вераське кузпалъёслэн шуг-секытъёссы сярысь яке вылӥ эсэпъёс сярысь. Но ӵем дыръя статьяын луо одӥг-кык абзацъёс, кудъёсызлы нылпиос но валэктон сётыны быгато. Со сяна, нылпиостылы валаны юрттэ, малы, кизэс ӝутыкузы, соосты котьку ик уз юалэ. Куке нылпиосты тае валалозы, соку, соосты ӧз юалэ ке, соослэн мылкыдзы уз куашка (1 Тим. 6:18). Ваньмы ми быгатӥськомы сётыны мылкыдэз ӝутӥсь валэктонъёс, кудъёсыз Иеговаез данъялозы но огъя оскисьёсмес юнматозы (Мад. 25:11). Куддыръя ми быгатӥськомы асьмелэсь учырмес вераны. Но ачид сярысь укыр трос верано ӧвӧл (Мад. 27:2; 2 Кор. 10:18). Умой луоз саклыкмес висъяны Иеговалы, солэн Кылызлы но калыкезлы (Усьт. 4:11). w23.04 24—25 б., 17, 18 абз.

Сак луон понна, яратон туж кулэ (Матф. 22:37—39). Инмарез яратон юрттэ милемлы, пӧртэм шуг-секытъёс шоры учкытэк, юн мылкыдын тодытыны (2 Тим. 1:7, 8). Ми Адӟись-Ивортӥсь луисьтэм адямиосты яратӥськомы бере, ми тодытэмысь ум дугдӥське, озьы ик телефон пыр жингыртыса но, гожтэтъёс гожъяса но. Ми оскиськомы, матысь адямиосмы куке но Инмарлы ужаны-тыршыны кутскозы шуыса (Иез. 18:27, 28). Огъя оскисьёсмы но матысь адямиосмы пӧлы пыро. Соослы яратонмес возьматыса, ми уже кутӥськомы апостол Павеллэсь таӵе визь-кенешсэ: «Ог-огдылэсь мылкыддэс ӝутэ, ог-огдэс юнматэ» (1 Фес. 5:11). Ожгарчиос ӵош ожмаськизы но ог-огзылы юрттыны котьку дась вал. Ӵапак озьы ик ми но вын-агайёсмес но сузэр-апайёсмес юри вӧсь ум каре яке уродэзлы пумит уродэн пунэмзэ ум берыктэ (1 Фес. 5:13, 15). Озьы ик ми яратонмес возьматомы, гажамы ке вын-агайёсты, кудъёсызлы кенешын кивалтон уж сётэмын (1 Фес. 5:12). w23.06 10 б., 6 абз.; 11 б., 10, 11 абз.

Осконмес юнматон понна одӥгез амал — дун тырон сярысь малпаськон. Дун тырон возьматэ, Инмарлэн кылсётонъёсыз одно ик быдэсмозы шуыса. Милемлы мур малпаськоно, малы Иегова дун тыриз но мар со та понна кариз. Та осконмес юнматэ, Инмар милемлы выль дуннеын пырак улон одно ик сётоз шуыса. Малы тазьы вераны луэ? Мар кариз Иегова, дун тырон понна? Инмар яратоно Пизэ, самой матысь эшсэ, музъем вылэ ыстӥз, со адями кадь мед вордӥськоз шуыса. Музъем вылын улыкуз, Иисус пӧртэм шуг-секытъёсты чидаз. Со курадӟиз но кулӥз. Макем бадӟым дун тыриз Иегова! Инмарлэн улонмес огдырлы гинэ умойгес каремез потысал ке, со ӧз лэзьысал, Пиез сокем курадӟыса мед кулоз шуыса (Иоанн 3:16; 1 Пётр 1:18, 19). Иегова сыӵе бадӟым дун тыриз бере, со милемлы выль дуннеын пырак улон кузьмалоз. w23.04 27 б., 8, 9 абз.

Вань-а Иеговалэн мылкыдыз кулэмъёсты улӟытыны? Одно ик вань! Кӧня ке адямиослэсь со мылкыдзэс ӝутӥз та кылсётонэз Библие гожтыны (Ис. 26:19; Усьт. 20:11—13). Нош Иегова кылзэ сётэ ке, со котьку но сое быдэстэ (Иис. Н. 23:14). Иеговалэн туж потэ кулэмъёсты улӟытэмез. Тодады вае Иовлэсь кылъёссэ. Со юн оскиз, кулӥз ке но, Иегова солэсь мӧзмоз но солэн сое улӟытэмез потоз шуыса (Иов 14:14, 15). Ӵапак озьы ик Иеговалэн потэ, вань кулэм ужась-тыршисьёсыз но выльысь мед улозы, медаз висе но шудоесь муд луозы шуыса. Нош мар вераны луоз трос миллиард адямиос сярысь, кудъёсыз, Иегова сярысь зэмлыкез тодытэк, кулӥзы? Яратӥсь Инмармылэн соосты но улӟытэмез потэ (Ап. уж. 24:15). Солэн потэ соослы луонлык сётэмез асэныз эшъяськыны но музъем вылын пырак улыны (Иоанн 3:16). w23.04 9 б., 5, 6 абз.

Мар карыны луэ, вуоноезлы осконмес юнматон понна? Кылсярысь, тӥ оскиськоды ке музъем вылын пырак улыны, лыдӟе Библиысь со сярысь, кыӵе улон луоз рай музъем вылын (Ис. 25:8; 32:16—18). Пуктэ син азяды, тӥ райын ини шуыса. Вуоноезлы оскондэс ялан тодады возиды ке, соку шуг-секытъёсты шоры «вакчи дырлы сётӥськись капчи курадӟонъёс» шоры кадь учкоды (2 Кор. 4:17). Иегова тӥледлы вуоноезлы оскон сётӥз, тӥ кужмоесь мед луоды шуыса. Со трос лэсьтӥз ини, тӥ солэсь кужым басьтыны мед быгатоды шуыса. Соин ик, куке тӥледлы секыт уж быдэстоно, шуг-секытэз чидано яке, номыр шоры учкытэк, шумпотыса улоно, вань сюлмысьтыды Иеговалы вӧсяське но солэсь кивалтэтсэ утчалэ, ас поннады Библиез эскерыса. Вын-агайёслэсь но сузэр-апайёслэсь юрттэтсэс эн палэнтэ. Ялан син азяды пуктэ, кызьы тӥ выль дуннеын улоды. Соку Инмар «Аслаз данлыко кужыменыз тӥледыз... юнматоз, куасаськыны сётскисьтэмесь, ваньзэ чидасесь» кароз (Кол. 1:11). w23.10 17 б., 19, 20 абз.

Иеговалы тау карыны милям трос мугъёсмы вань. Ойдолэ солы тау шуомы ваньмыз умоез понна, мармы милям вань. Малы ке шуоно вань ӟеч кузьымъёсты со сётэ (Иак. 1:17). Кылсярысь, ми быгатӥськомы Иеговалы тау шуыны чебер музъеммы но мукет кылдытэмъёс понна. Озьы ик тау шуыны луэ улон, семья, эшъёс но вуоноезлы оскон понна. Со сяна, Иеговалы тау карыны кулэ, со милемлы матысь эшъёсыныз луыны лэзиз шуыса. Малпаськыны кулэ, мар понна милям Иеговалы тау кареммы потэ. Со понна туж тыршоно луоз, дыр. Малы ке шуоно та дуннеысь адямиос ӵем дыръя малпасько со сярысь гинэ, мар соослы кулэ. Соослэн йыразы но уг лыкты тау карыны со понна, марзы соослэн вань ини. Ми но озьы ик малпаськимы ке, соку вӧсяськыкумы куронъёсмы сярысь гинэ вераны кутскомы. Озьы медам луы шуыса, Иеговалы тау карон мылкыдмес будэтоно но тау кароно ваньмыз понна, мае со милемлы лэсьтэ (Лука 6:45). w23.05 4 б., 8, 9 абз.

Яратӥсь Атаймылэн, Иеговалэн, уг поты, ми мед курадӟомы шуыса (Ис. 63:9). Озьы ке но со уг быдты вань шуг-секытъёсмес, кудъёсыз куддыръя шур яке тыл выллемесь луо (Ис. 43:2). Но со кылзэ сётэ, со милемын луоз но соос пыр потыны юрттоз шуыса. Инмар нокинлы но номырлы уз лэзьы милемыз соин люкыны. Озьы ик, ми ваньзэ чиданы мед быгатомы шуыса, Иегова милемлы кужмо святой духсэ сётэ (Лука 11:13; 2 Кор. 4:7). Озьыен, милям котьку но луоз ваньмыз, мар кулэ, ваньзэ чидан но Инмарлы оскымон луон понна. Иегова возьма, ми солы оскомы шуыса (Евр. 11:6). Куддыръя шуг-секытъёсмы гурезь кадь бадӟымесь пото. Ми малпаськомы, вылды: «Мыным Иегова но уз юртты». Но Библия милемыз оскытэ, Инмарен ӵош ми ваньзэ вормыны быгатомы шуыса (Пс. 17:30). Соин ик осконэз лябӟытӥсь малпанъёслы эн сётске. Со интые, Иеговалы вӧсяське но оске, со тӥледлы одно ик ответ сётоз шуыса (Иак. 1:6, 7). w23.11 22 б., 8, 9 абз.

Кыӵе чебер кылъёс верамын зэмос яратон сярысь! Та кылъёс кузпалъёсты оскыто: соос пырак дауръёс ӵоже ог-огзэс яратыны быгато. Кузпалъёс вань улонзы ӵоже ог-огзэс мед яратозы шуыса, соослы мар ке но карыны кулэ. Учкомы таӵе примерез. Тылскем ялан ӝуалоз соку гинэ, куке отчы пу тыро. Нокин но пу ӧз тыры ке, тыл пумен кысоз. Кузпалъёс но ялан ог-огзэс яратозы соку гинэ, куке кусыпъёссэс юнматыны тыршо. Куддыръя кузпалъёс шӧдо, соослэн яратонзы сӥя шуыса. Со луыны быгатэ коньдонэн, тазалыкен яке нылпиоссэс будэтонэн герӟаськем шуг-секытъёсынызы сэрен. Соин ик, «Йахлэн гомась тылыз» медаз кысы шуыса, картлы но, кышнолы но вань кужмысьтызы Иеговаен кусыпъёссэс юнматоно. w23.05 20—21 б., 1—3 абз.

Мар милемлы кароно, кышкасьтэмесь луон понна? Анаймы но атаймы милесьтым мылкыдмес ӝутыны быгато кышкасьтэмесь луыны. Но соослэн кышкасьтэм луэмзы милемлы уз выжы. Кыӵе ке быгатонлыклы дышетскем сямен, кышкасьтэм луыны но дышетсконо. Одӥгез амал, кызьы малы ке вылезлы дышетскыны улэ,— дышетӥсь шоры сак учконо но солэсь адӟем кароно. Нош кышкасьтэм луон понна, учконо, кызьы мукетъёсыз та сямез возьмато, но асьмеды соос кадь возёно. Даниил сямен, милемлы но Инмарлэсь Кылзэ умой тодоно. Иеговаен кусыпъёсмес юнматоно, номыре ватытэк но ӵем вӧсяськыса. Озьы ик Иеговалы осконо, со милемлы котьку юрттоз шуыса. Соку, осконмы эскериськыку, ми кышкасьтэмесь луомы. Кышкасьтэм адямиосты ӵем дыръя гажало. Кышкасьтэм луэммы адямиослы юрттыны быгатэ Иеговаен тодматскыны. Соин ик милям трос мугъёсмы вань та сямез будэтыны. w23.08 2 б., 2 абз.; 4 б., 8, 9 абз.

Грек кыл, кудӥз татын «чаклалэ-эскере» шуыса берыктэмын, кутӥськиз, куке вераськон мынӥз дуно кортъёсты эскерон сярысь. Озьыен, эскерыны кулэ, со, мае ми кылӥмы яке лыдӟимы, зэм-а шуыса. Бадӟым куректон матэктэмъя, милемлы эшшо но кулэ ваньзэ чакланы-эскерыны. Котькинлы оскем интые, чакласькись луоно. Ӵошатыны кулэ сое, мае ми лыдӟиськомы но кылӥськомы, соин, мае вера Библия но Иеговалэн организациез. Соку ми периослэн дышетонъёссылы ум оске (Мад. 14:15; 1 Тим. 4:1). Инмарлэн калыкез бадӟым куректон пыр потоз. Нош котькудмы сярысь нимаз верано ке, ми ум тодӥське, мар милемын ӵуказе луоз (Иак. 4:14). Армагеддон дырозь ми кулӥмы ке но, ми тодӥськомы, Инмарлы оскымон кылимы ке, со милемлы пырак улон сётоз шуыса. Ойдолэ тодамы возёмы вуоноезлы паймымон осконмес но Иеговалэн нуналэзлы дась луомы! w23.06 13 б., 15, 16 абз.

Ми ум тодӥське, кызьы быдэсмозы Библиысь куд-ог азьпалзэ ивортонъёс (Дан. 12:8, 9). Ми кыӵе ке азьпалзэ ивортонэз пумозяз ум ке валаське, со уг возьматы, со уз быдэсмы шуыса. Ми юн оскиськомы: ас дыраз Иегова усьтоз милемлы ваньзэ, мае милемлы тодыны кулэ. Со котьку но озьы лэсьтэ. Кыӵе ке но дыре адямиос «тупаса улон, кышкатэк улон» шуыса ялозы (1 Фес. 5:3). Собере дунне вылысь кивалтӥсьёс зэмос луисьтэм религия вылэ урдскозы но сое быдтозы (Усьт. 17:16, 17). Та бӧрсьы соос Инмарлэн калыкез вылэ урдскозы (Иез. 38:18, 19). Нош собере Армагеддон ож кутскоз (Усьт. 16:14, 16). Ми юн оскыны быгатӥськомы, со дырозь туж ӧжыт дыр кылемын ини шуыса. Нош али ойдолэ Библиысь азьпалзэ ивортонъёсты валаны тыршомы но мукетъёсызлы юрттомы соосты валаны. Озьы ми инмысь Атаймылы тау кареммес возьматомы. w23.08 13 б., 19, 20 абз.

Оскон, оскиськон но яратон сярысь веракуз, апостол Павел шуиз: «Яратон соос пӧлысь ваньмызлэсь вылӥынгес» (1 Кор. 13:13). Малы со озьы вераз? Азьланяз выль дунне сярысь Инмарлэн кылсётонэзлы милемлы осконо уз луы ини. Малы? Малы ке шуоно Инмарлэн вань кылсётонъёсыз быдэсмозы. Нош Иеговаез но адямиосты котьку но яратоно луоз. Со сяна, яратонмес пумен юнматоно луоз. Озьы ик зэмос христианъёсты ог-огзэс яратэмзыя тодманы луэ. Иисус аслаз апостолъёсызлы шуиз: «Куспады яратонды луиз ке, тӥ Мынам дышетскисьёсы шуыса, тӥледыз ваньмыз тодмалозы» (Иоанн 13:35). Озьы ик яратон огкылысь улыны юрттэ. Павел вераз, яратон огазея шуыса (Кол. 3:14, ВД). Апостол Иоанн вын-агайёсызлы но сузэр-апайёсызлы гожтӥз: «Инмарез яратӥсь мурт агай-вынъёсты но мед яратоз» (1 Иоанн 4:21). Озьыен, ог-огмес яратыса, ми возьматӥськомы, Инмарез яратӥськомы шуыса. w23.11 8 б., 1, 3 абз.

Библия христиан улонэз бызёнэн ӵошатэ. Соос, кинъёс бызёно сюрессылэн пумаз вуозы, пырак улон басьтозы (2 Тим. 4:7, 8). Бызёно сюреслэн пумыз туж матын ини, соин ик быземысь дугдоно ӧвӧл. Апостол Павел вераз, мар милемлы юрттоз пумозяз бызьыны. Со шуиз: «Ваелэ сэрпалтоме вылысьтымы ёртӥсь зӥбетэз... чиданмес поныса, ортчоме асьмелы сётэм удыстӥ». Павеллэн верамезъя, милемлы сэрпалтоно вылысьтымы мултэс зӥбетэз, кудӥз милемлы бызьыны люкетэ но кужыммес быдтэ. Номыр шоры учкытэк, пумозяз вуон понна, ӝоггес валаны тыршоно, мар милемлы люкетэ, но сое сэрпалтоно. Со дыре ик сэрпалтоно ӧвӧл сое, мае нуыны кулэ. Озьы ӧм лэсьтэ ке, милемыз бызёно сюрес вылысь палэнтозы (2 Тим. 2:5). w23.08 26 б., 1, 2 абз.

Ми валась луэммес возьматомы, куке мукетъёсызлэсь учконзэс гажаломы. Кылсярысь, куд-ог сузэръёслы буяськыны кельше, нош мукетъёсызлы уг кельшы. Куд-ог христианъёслы кӧня ке вина юыны кельше, нош мукетъёсыз ужпум кутӥзы воксё юытэк улыны. Вань христианъёслэн тазалыко луэмзы потэ, но ваньзы пӧртэм сямен эмъясько. Ми малпамы ке, ми гинэ шонер эмъяськиськомы шуыса, но мукетъёсты озьы ик эмъяськыны косӥмы ке, соин сэрен вын-агайёс но сузэр-апайёс канжаськыны быгатозы но валамтэос кылдозы (1 Кор. 8:9; 10:23, 24). Иегова пыр-поч уг вера, кызьы дӥсяськыны яра, нош кызьы — уг яра. Со интые, со милемлы возетъёс сётэ. Милемлы Инмарлэн ужась-тыршисьёсыз кадь дӥсяськоно — зӥбыт-востэм но визьмо луэммы адӟиськыны кулэ (1 Тим. 2:9, 10). Милям уг поты, адямиос милемлы укыр трос саклыксэс мед висъялозы шуыса. Библиысь возетъёс тӧроослы но юртто дӥськут но вылтус пумысен курон-косонъёс пуктылытэк улыны. w23.07 23—24 б., 13, 14 абз.

Иегова валэктэ, мар кароно, шудо луон понна. Соос, кинъёс «визьзэ ыштэм, куашетыны яратӥсь... кышномуртлэн» ӧтёнэзлы соглаш карисько, азон-калгонэн герӟаськем ужъёсысь шумпотон утчало. Но азьланяз соосты кулон возьма (Мад. 9:13, 17, 18). Нош соос, кинъёс визьлыклэн ӧтёнэзлы соглаш карисько, асьсэды чылкак мукет сямен возё! (Мад. 9:1). Ми дышетскиськомы яратыны сое, мае яратэ Иегова, но адӟемпотостэм карыны сое, мае со адӟемпотостэм каре (Пс. 96:10). Милемлы туж кельше мукетъёссэ визьлык доры куное ӧтьыны. Городлэн ӝужыт интыосысеныз ми ялӥськомы кадь: «Визьнодтэмъёс, берытске!» Соос, кинъёс та ӧтёнлы соглаш карисько, али но, вуонояз но та сярысь уз жалялэ. Ми быгатомы пырак улыны но котьку визьлыклэн сюрес вылтӥз мыныны! (Мад. 9:3, 4, 6). w23.06 24 б., 17, 18 абз.

Кызьы тӥ асьтэды шӧдӥськоды, куке ӵош ужасьты яке ӵош дышетскисьты тӥледлы осконды сярысь юан сётэ? Зэм, таӵе учыре тросэз сюлмаськыны кутско. Но сыӵе юанъёслэсь кышкано ӧвӧл. Соос валаны юртто, малы оске адями. Нош сое валаса, капчигес луоз солы ӟеч иворез вераны. Но куддыръя адямиос сыӵе юанъёс сётъяло, малы ке шуоно соос милемын соглаш ӧвӧл яке соослэн споръяськемзы потэ. Ӵем дыръя соос асьсэды озьы возё Иеговалэн Адӟись-Ивортӥсьёсыз сярысь шонертэм информацилы оскеменызы (Ап. уж. 28:22). Со сяна, Библиын азьло ик гожтэмын вал, берпум нуналъёсы адямиос «уродэсь-лекесь, ӟечез-уродэз валасьтэмесь луозы» шуыса (2 Тим. 3:1, 3). Оло нош, тӥ малпаськоды: «Кызьы мон быгато асме киям кутыны но лякыт луыны, куке кин ке но, споръяськон вылысь, осконэ сярысь юанъёс сётъя?» Тӥледлы юрттоз зӥбыт-востэм луон. Куке зӥбыт-востэм адямиен споръяськыны туртто яке малпамтэ шорысь юан сёто, со ассэ кутыны быгатэ. w23.09 14 б., 1, 2 абз.

Куддыръя милемлы сёто сыӵе курон-косонъёс, кудъёсыз милемыз утё. Кылсярысь, Иегова алэ милемыз коньдонэз яратэмлэсь но ужъёслэсь, кудъёссэ лэсьтыса, ми солэсь катъёссэ тӥясалмы. Иеговалэсь кылзӥськон милемлы котьку пайда вае (Ис. 48:17, 18; 1 Тим. 6:9, 10). Иегова милемын адямиос пыр кивалтоз бадӟым куректон дыръя но, Иисус Христослэн Сюрс ар ӵоже кивалтонэз дыръя но. Кылзӥськомы-а ми Иеговалэсь? Соку милемлы кылзӥськыны капчигес луоз, ми Иеговалэсь али ик ини кылзӥськимы ке. Соин ик ойдолэ котьку Иеговалэсь кылзӥськомы, соку но, куке со милемын быръем пиосмуртъёс пыр кивалтэ (Ис. 32:1, 2; Евр. 13:17). Ми быгатӥськомы быдэсак оскиськыны Иеговалы, Сюрес Возьматӥсьмылы, кудӥз милемлы юрттэ палэнскыны ваньмызлэсь, мар соин кусыпъёсмес лябӟытыны быгатэ, но милемыз выль дуннеын пырак улонэ нуэ. w24.02 25 б., 17, 18 абз.

Апостол Павел шумпотыса Иеговалы ужаз-тыршиз. Но солэн трос шуг-секытъёсыз но вал. Ӵем дыръя со кытчы ке кыдёке ветлылӥз. Со вакытэ кытчы ке мыныны капчи ӧй вал. Сюрес вылын дыръяз со «шуръёс вылын кышкыт учыръёсы» сюрылӥз но «йырвандӥсьёслэсь... кышкаса улоно» луылӥз. Озьы ик зэмлыклы пумит мынӥсьёс сое кӧня ке пол жугылӥзы (2 Кор. 11:23—27). Вын-агайёс но соослы юрттыны сюлмысь тыршемзэ котьку ик ӧз дунъялэ (2 Кор. 10:10; Флп. 4:15). Мар юрттӥз Павеллы юн луыны? Священной Гожтэмез лыдӟыса но Инмарлы ужаса-тыршыса, со тодӥз, кыӵе сямо Иегова. Павел валаз, Инмар сое яратэ шуыса (Рим. 8:38, 39; Еф. 2:4, 5). Со ачиз но Иеговаез туж яратӥз. Павел Инмарлы яратонзэ возьматӥз, «вӧсяськись калыклы ӟеч лэсьтыса» (Евр. 6:10). w23.07 9 б., 5, 6 абз.

Куке Библиын вераське «вылӥ властьёс-кивалтӥсьёс» сярысь, соос возьмато шаерысь кивалтӥсьёсты. Тросэз валало, кивалтӥсьёстэк улыны уг луы но шаерлэн катъёсызлэсь кылзӥськыны кулэ шуыса. Но со ик адямиос малпало ке, катъёс шонертэмесь яке туж секытэсь шуыса, соослэн кылзӥськемзы уг поты ини. Библиын вераське, адями кивалтэтъёс курадӟонъёс ваё, Шайтанлэн киулаз возисько но ӝоген быдтэмын луозы шуыса (Пс. 109:5, 6; Екк. 8:9; Лука 4:5, 6). Но озьы ик отын вераське, «кин властьлы пумитъяське, со Инмарлэн пуктонэзлы-косонэзлы пумитъяське» шуыса. Али Иегова адями кивалтэтъёслы кивалтыны лэзе но возьма, ми соослэсь кылзӥськомы шуыса. Соин ик милемлы, кинлы мар сётонмы вань, сётоно — озьы ик вытъёсты тыроно, гажанмес возьматоно но кылзӥськоно (Рим. 13:1—7). Куддыръя милям малпанмы кылдыны быгатэ, кыӵе ке кат шонертэм яке сое быдэсъяны туж секыт шуыса. Но ми кивалтӥсьёслэсь кылзӥськиськомы, малы ке шуоно Иегова вера милемлы соослэсь кылзӥськыны, соослэн куронъёссы солэн катъёсызлы пумит уг мыно ке (Ап. уж. 5:29). w23.10 8 б., 9, 10 абз.

Самсон вордӥськиз, куке филистим калык Инмарлэсь калыксэ киултыса возиз (Суд. 13:1). Израиль калык туж курадӟиз, малы ке шуоно филистим калык туж лек вал. Иегова Самсонэз бырйиз «Израилез филистим калыклэсь мозмытыны» (Суд. 13:5). Сое быдэстон понна, Самсонлы Иеговалы оскиськоно вал. Одӥг пол филистим пиос, Самсонэз кутон понна, вуизы Лехи интые. Со Иудеяын вал, дыр. Иудейёс филистим калыклэсь кышкаса улӥзы. Соин ик соос малпазы Самсонэз, асьсэлэсь агай-вынзэс, тушмонъёссы кие сётыны. Соос Самсонэз кык выль гозыосын думылӥзы но филистим пиослы сётӥзы (Суд. 15:9—13). Но Самсон вылэ «Кузё-Инмарлэн Духез васькиз» но, гозыос ки вылысьтыз усьылӥзы. Собере со «ишаклэсь анлызэ шедьтӥз... сое басьтӥз но со выль лыэн сюрс... [филистим пиосты] вииз»! (Суд. 15:14—16). w23.09 2—3 б., 3, 4 абз.

Иегова музъем но адямиос сярысь малпанзэ пичиен-пичиен Библия пыр усьтылӥз. Нокыӵе шуг-секытъёс солы люкетыны уг быгато. «Ваньзэ Аслыз кызьы кулэ», озьы лэсьтэ (Мад. 16:4). Куке Инмарлэн малпанэз быдэсмоз, ми котьку уломы озьы, кызьы со нырысь ик малпаз вал. Нош кыӵе улон малпаз Иегова аслаз кылдытэмъёсыз понна но мар со кариз, аслэсьтыз малпанзэ быдэстон понна? Инмар нырысетӥ адямиослы вераз, кыӵе улон со малпаз соос понна. Со шуиз: «Йылэ, трос луэ, музъемез тырмытэ, сое киулады кутэ... [музъем вылысь вань кылдытэмъёсын] кузёяськыса улэ» (Ул.-выл. 1:28). Куке Адам но Ева Инмарлы пумит султӥзы, адямиос сьӧлыкоесь луизы. Но та ӧз люкеты Иеговалы аслэсьтыз малпанзэ быдэстыны. Сое быдэстон понна, Инмар мукет амал бырйиз. Иегова соку ик малпаз инмын Эксэйлык кылдытыны, кудӥз адямиос но музъем пумысен солэсь малпанзэ быдэстоз (Матф. 25:34). w23.10 19—20 б., 6, 7 абз.

Иегова милемлы юрттоз солы оскымон ужаны-тыршыны. Со секыт луэ, тужгес но кыӵе ке урод сяммы ялан потылэ ке. Милям малпанмы но кылдыны быгатэ, апостол Пётрлы сярысь, милемлы секытгес шуыса. Но Иегова милемлы юрттоз (Пс. 93:18, 19). Кылсярысь, одӥг агай Иеговалэн Адӟись-Ивортӥсез луэмезлэсь азьло трос аръёс ӵоже гомосексуалист вал. Со быдэсак воштӥськиз но Библиысь куронъёсъя улыны кутскиз. Озьы ке но куддыръя урод мылпотонъёсыз нош ик потылӥзы. Мар солы юрттӥз юн луыны? Та агай вера: «Мон валай, святой духлэн юрттэмезлы луыса мон зэмлыклэн сюрестӥз мыныны быгатӥсько шуыса... ...Иегова лэзиз мыным солэн ужась-тыршисез луыны. Янгышъёсы шоры учкытэк, со мыным котьку но юрттэ». w23.09 23 б., 12 абз.

Егит агайёс, зэмос христианъёс луон понна, тӥледлы тыршоно луоз. Тӥледлы адӟем кароно оскымон пиосмуртъёслэсь, дышетсконо Иегова сямен малпаськыны но оскиськымон луыны. Озьы ик тӥледлы дышетсконо солы, мар котькуд нунал кулэ луоз, но вуоноезлы дасяськоно. Тӥ малпаны быгатоды, ноку но солы уд дышетске шуыса. Но эн кышкалэ, тӥляд ваньмыз пӧрмоз! Иегова котьку но тӥледын артэ (Ис. 41:10, 13). Озьы ик кенешысьтыды агайёс но сузэръёс тӥледлы юрттозы. Иеговалэн потэ, тӥ зэмос христианъёс мед луоды шуыса. Со тодэ, соку улонды трослы шудогес но тунсыкогес луоз шуыса. Егит агайёс, ми тӥледыз туж яратӥськомы! Тырше зэмос христианъёс луыны. Иегова тӥледыз одно ик бакель кароз! w23.12 29 б., 19, 20 абз.

Пуктэ син азяды, тӥ эшъёсыныды ӵош люкаськиды шуыса. Тӥ малпады ваньды ӵош туспуктэм лэсьтыны. Ваньзы чебер мед пуксёзы шуыса, тӥ куинь туспуктэм лэсьтӥськоды. Тӥ адӟиськоды, одӥгаз туспуктэмын одӥг агай умой ӧз пуксьы шуыса. Соин ик тӥ сое ӵушиськоды, малы ке шуоно мукет туспуктэмын ваньзы, со агай но, чебер пуксемын. Милемлы кельше вын-агайёсынымы но сузэр-апайёсынымы дырмес ортчытъяны. Нош мар кароно, куке огъя оскисьмы вераз яке лэсьтӥз сое, мар милемлы туж ик ӧз кельшы? Умой луоз со учырез вунэтыны, ӵапак озьы ик, кызьы ми пӧрмымтэ туспуктэмез ӵушысалмы (Еф. 4:32). Милям озьы кареммы луэ, малы ке шуоно ми тодӥськомы трос умой учыръёсты, кудъёсыз со адямиен герӟаськемын. Милям соосты тодамы воземмы потэ! w23.11 12 б., 16, 17 абз.

Грек кылъёс, кудъёсыз та кылбуръёсын кутӥсько, возьмато, сузэръёслы ӝикыт дӥсяськоно, озьы ик мукетъёсызлэсь шӧдонъёссэс но учконъёссэс гажано шуыса. Ми данъяськиськомы сузэръёсынымы, кудъёсыз та визь-кенешлэсь кылзӥсько. Озьы ик егит сузэръёслы валасесь луоно. Валась адями умойзэ уродэзлэсь висъяны быгатэ но ассэ визьмо возе. Тодамы ваёмы Авигеяез. Солэн картэз урод ужпум кутӥз, кудӥныз сэрен быдэс семьязы бырыны быгатэ вал. Но Авигея кышкатэк но ӝегатскытэк югдурез тупатыны тыршиз. Солэн валась луэмез трос адямиосты утиз (1 Экс. 25:14—23, 32—35). Озьы ик та сям юрттоз валаны, ку вераськоно, нош ку шып улоно. Со сяна, валасесь луимы ке, ми адямиослэсь ум юалэ сое, мае милемлы тодыны уг яра яке маин сэрен соос асьсэды умойтэм шӧдысалзы (1 Фес. 4:11). w23.12 20 б., 8, 9 абз.

Апостол Павел та кылъёсты вераз Римын улӥсь вын-агайёслы но сузэр-апайёслы. Куке но соос Иегова но Иисус сярысь тодӥзы, соослы оскизы но христианъёс луизы. Осконзы понна Инмар соосты шонерлыко адямиосын лыдъяз но святой духеныз зырӟиз (Рим. 5:1). Соин ик соос юн оско, азьланяз Инмар соосты бакель кароз шуыса. Берлогес Павел Ефес карысь зырӟем христианъёслы гожъяз оскиськон сярысь, кудзэ соослы Инмар сётӥз. Павел вераз, соослы «вӧсяськись калыклэн басьтоно люкетэз» сётэмын луоз шуыса (Еф. 1:18). Нош Колоссы карысь христианъёслы со гожъяз, та люкет соослы инмын дасямын шуыса (Кол. 1:4, 5). Соку кыӵе оскиськонзы вань зырӟем христианъёслэн? Соос инмын пырак улон понна улӟытэмын луозы но отын Христосэн ӵош кивалтозы (1 Фес. 4:13—17; Усьт. 20:6). w23.12 9 б., 4, 5 абз.

Грек кыл, кудӥз «утьыса возёз» шуыса берыктэмын, вашкала дыръя кутӥськиз, куке вераськон мынэ вал ожгарчиос сярысь, кудъёсыз карез утизы. Сыӵе карын адямиос каньыл сюлмын улӥзы, малы ке шуоно тодӥзы, соосты утё шуыса. Ӵапак озьы ик, куке Инмарлэн каньыллыкез сюлэммес но визьмес уте, ми кышкатэк улӥськомы (Пс. 4:9). Югдурмы соку ик ӧз воштӥськы ке но, Анна сямен, Самуил пророклэн анаез сямен, ми каньыл сюлмын улӥськомы (1 Экс. 1:16—18). Нош куке ми каньыл сюлмын улӥськомы, ми быгатӥськомы малпаськыны но шонер ужпумъёс кутыны. Вашкала дыръя карын улӥсьёс, кышкыт учыр кылдыку, юрттэт курыса, ожгарчиослы вазиськыны быгато вал. Нош мар кароно милемлы, кышкатэк улон понна? Вӧсяськоно, сюлэммы каньыл луытозь (Лука 11:9; 1 Фес. 5:17). Тӥ кышкыт учыре сюриды ке, ялан вӧсяське. Тӥ одно ик адӟоды, кызьы Инмарлэн визьлыкез визьдэс но сюлэмдэс уте (Рим. 12:12). w24.01 21 б., 5, 6 абз.

Атаезлэсь нимзэ чылкытатон понна, Иисус трос курадӟонъёсты чидаз. Сое сантэмазы, ултӥязы. Но Иисус Атаезлэсь кылзӥськиз но солы оскымон кылиз (Евр. 12:2). Иисус вала вал, вань та курадӟонъёс Шайтан бордысь пото шуыса (Лука 22:2—4; 23:33, 34). Шайтан малпа вал, Иисус Инмарлэсь куштӥськоз шуыса. Но со Иеговалы оскымон кылиз но валамон возьматӥз, Шайтан пӧяськись шуыса. Озьы ик Иисус возьматӥз, музъем вылын котьку но луозы шуыса адямиос, кудъёсыз, номыр шоры учкытэк, Иеговалы оскымон кылёзы! Нош тӥляд Иисусэз, асьмелэсь Эксэймес, шумпоттэмды потэ-а? Соку Иеговаез данъямысь но мукетъёсызлы со сярысь верамысь эн дугдэ. Та возьматоз, тӥ Иисуслэн пытьы кузяз мынӥськоды шуыса (1 Пётр 2:21). Озьы лэсьтӥды ке, тӥ, Иисус сямен ик, Иеговаез шумпоттоды но возьматоды, Инмарлэн тушмонэз, Шайтан,— пӧяськись шуыса! w24.02 11 б., 11—13 абз.

Берло вить аръёс ӵоже миллионлэсь но тросгес адямиос пылатӥськизы но Иеговалэн Адӟись-Ивортӥсьёсыз луизы. Иеговалы сӥзиськыса, адями ужпум кутэ Иисус Христослэн дышетскисез луыны но Инмарлэсь эриксэ улоназ нырысетӥ интые пуктыны. Кызьы улыны кулэ Инмарлы сӥзиськем адями? Иисус шуиз: «Кин Мон сьӧры мыныны малпа, аслэсьтыд ачид куштӥськы» (Матф. 16:24). Грек кылъёсты, кудъёсыз татын «аслэсьтыд ачид куштӥськы» шуыса берыктэмын, озьы ик берыктыны луэ «ас мылпотонъёсыдъя эн улы ни» шуыса. Иеговалы сӥзиськем адямилы палэнтоно ваньзэ, мар Инмарлэн эрикезлы пумит мынэ (2 Кор. 5:14, 15). Озьыен, солы куштӥськоно «лулмугорлэн сьӧлыко ужъёсызлэсь», кылсярысь, азон-калгонлэсь (Гал. 5:19—21; 1 Кор. 6:18). Сыӵе курон-косонъёсъя улыны секыт-а? Ӧвӧл, тӥ Иеговаез яратӥськоды ке но оскиськоды ке, Инмарлэн курон-косонъёсыз тӥледлы пайда ваё шуыса (Пс. 118:97; Ис. 48:17, 18). w24.03 2 б., 1 абз.; 3 б., 4 абз.

Аслыз ярамон адямиослы Иегова святой духсэ сётэ (Матф. 12:18). Та дух юрттэ милемлы умой сямъёсты будэтыны. Юалэ асьтэлэсь: «Кыӵе сямъёсы мынам вань ини?» Кылсярысь, ӵошатэ, кыӵе тӥ али но кыӵе тӥ вал, Библиез дышетыны кутскыкуды? Тӥ чидасьгес луиды-а? Тӥ тыршиды ке святой духлэн емышез пӧлы пырись сямъёсты возьматыны, тӥ оскыны быгатоды, Иегова тӥледыз яратэ шуыса. Иегова, дун тыронлы луыса, аслыз ярамон адямиослэсь сьӧлыкъёссэс простить каре (1 Тим. 2:5, 6). Но пылатӥськемды бере но тӥ малпаськоды, вылды, Иегова тӥледыз простить уз кары шуыса. Ойдолэ тодамы возёмы: ми асьмелы котьку ик оскыны ум быгатӥське, нош Иеговалы котьку оскыны луэ. Соосты, кинъёс дун тыронлы оско, Иегова шонерлыко адямиосын лыдъя но соосты бакель карыны кылзэ сётэ (Пс. 5:13; Рим. 3:26). w24.03 30 б., 15 абз.; 31 б., 17 абз.