Толсур

Вань-а Иеговалэн кужымез кулэмъёсты улӟытыны? Одно ик вань! Со «Дунне Кутӥсь» бере, со котькинлэсь кужмо Инмар (Усьт. 1:8). Со быгатэ вормыны котькыӵе тушмонзэ, кулонэз но (1 Кор. 15:26). Вань на мукетыз муг, кудӥз милемыз оскытэ, Инмарлэн кулэмъёсты улӟытэмез луэ шуыса,— со ваньзэ тодаз возьыны быгатэ. Инмар котькуд кизилиез нимызъя вера (Ис. 40:26). Со сяна, со кулэмъёсты но тодаз возе (Иов 14:13; Лука 20:38). Инмар капчиен тодаз ваёз ваньзэ, мар герӟаськемын соосын, кинъёсты со улӟытоз. Кылсярысь, соослэсь вылтуссэс, сямъёссэс, быгатонлыкъёссэс но тодэ ваёнъёссэс. Озьыен, ми оскыны быгатӥськомы кулэмъёсты улӟытыны Иеговалэн кылсётонэзлы, малы ке шуоно сое быдэстыны солэн мылкыдыз но, кужымез но вань. Тани эшшо одӥг муг, малы та кылсётонлы оскыны луэ: Иегова адямиосты улӟытъяз ини. Вашкала дыръя со кужым сётылӥз кулэмъёсты улӟытъяны куд-ог оскымон пиосмуртъёслы, озьы ик Иисуслы но. w23.04 9—10 б., 7—9 абз.

Ми малпанъёсмес лякытэн но зӥбыт-востэмен валэктӥмы ке, адямиослы милемыз кылзыны но вераськонэз азьланьтыны капчигес луоз. Нош кин ке но милемын ченгешыны турттэ яке осконмес серем каре ке, милемлы соин одно ик вераськоно ӧвӧл (Мад. 26:4). Но сыӵе адямиос туж ӧжыт. Зэмзэ вераса, кылзӥськись адямиос тросгес. Кызьы ми адӟимы, зӥбыт-востэм сям туж кулэ. Куке адямиос милемын споръяськыны туртто яке верало, милям осконмы шонертэм шуыса, асьтэды кияды кутон понна, Иеговалы вӧсяське. Эн вунэтэ: зӥбыт-востэм луэмды споръяськонлэсь палэнскыны юрттоз. Лякытэн но гажаса вераськемды куд-ог адямиослэсь мылкыдзэс ӝутоз ми шоры но Библия шоры мукет сямен учкыны. «Оскиськонды пумысен котькудӥзлы кылдэс юасьлы востэмен, гажась мылкыдын ответ сётыны котьку но дась луэ» (1 Пётр 3:15). Ойдолэ азьланяз но зӥбыт-востэм сяммес будэтомы, малы ке шуоно со милемыз зэмзэ ик кужмо каре! w23.09 19 б., 18, 19 абз.

Ойдолэ эскеромы ньыль амалъёсты, кызьы ми чиданмес возьматыны быгатӥськомы. Нырысетӥез, чидась адями вожзэ уг потты. Со ассэ кияз кутэ но пунэмзэ уг берыкты, соку но, куке солэсь вожзэ поттыны тыршо яке солэн аслаз сюлмаськонъёсыз вань (Пот. 34:6). Кыкетӥез, чидась адями возьманы быгатэ. Мае ке малпамезлэсь кемагес возьмано луэ ке но, сыӵе адями каньыл сюлмын улыны тырше (Матф. 18:26, 27). Куинетӥез, чидась адями дыртыса номыре уг лэсьты. Куке чидась адямилы кулэ луись уж сёто, со малпаськытэк но дыртыса сое уг лэсьты. Со дыр висъя ваньзэ радъян понна, озьы ик тырмыт дыр висъя та ужез умой быдэстон понна. Ньылетӥез, чидась адями шуг-секытъёсты ӝожтӥськытэк чида. Со тырше тодаз возьыны ваньзэ умойзэ, маиз солэн вань, озьы ик тырше ваньзэ шумпотыса чиданы (Кол. 1:11). Ми христианъёс бере, милемлы кулэ чиданмес возьматыны, вань та ньыль амалъёсты уже кутыса. w23.08 21 б., 3—6 абз.

Милемлы малпанъёсмес, шӧдонъёсмес но мылпотонъёсмес утёно, малы ке шуоно Иегова сюлэммес чакла-эскере. Со адӟе сое, мае мукетъёсыз уг адӟо, но тодэ, кыӵеесь ми зэмзэ ик луиськомы. Солы кельше, куке ми визьмес тырмытӥськомы визьлыкен, кудӥз улон сётэ (Иоанн 4:14). Соин ик ми тыршиськомы палэнтыны малпанъёсты но ужъёсты, кудъёсыз Шайтанлэсь но солэн дуннеезлэсь пото (1 Иоанн 5:18, 19). Иеговаен кусыпъёсмес юнматыса, ми сое эшшо но золгес яратӥськомы но гажаськомы. Милям инмысь Атаймес вӧсь кареммы уг поты. Соин ик сьӧлыко ужъёс сярысь малпанъёс гинэ но милемлы юрӟым пото. Хорватиысь Марта сузэр, ӧжыт гинэ азон-калгон сьӧлыке ӧз пыры. Со гожтӥз: «Соку мыным туж секыт вал шонер малпаськыны но шонертэм мылкыдме палэнтыны. Но монэ Иеговалэсь кышкан утиз». Кызьы солы юрттӥз Инмарлэсь кышкан? Марта малпаськиз, мар луысал, со шонертэм мылкыдызлы сётскысал ке. Со милемлы умой адӟем карон возьматӥз. w23.06 20—21 б., 3, 4 абз.

Иисус тодэ вал, Иеговалэн аслэсьтыз нимзэ чылкытатэмез но шонере поттэмез потэ шуыса. Тӥни малы Иисус, Быдӟым Дышетӥсь, тазьы вӧсяськыны дышетӥз: «Инмысь Атаймы! Тынад нимыд дано мед луоз» (Матф. 6:9). Иисус вала вал, Иеговалэсь нимзэ чылкытатон — туж кулэ луись юан шуыса. Нокин но Инмарлэсь нимзэ чылкытатон понна Иисус мында ӧз лэсьты. Нош куке Иисусэз кутӥзы, мар понна сое судъязы? Веразы, со Инмарез сантэма шуыса. Сое янгыше уськытӥзы ӵапак со понна, мае Иисус бадӟым сьӧлыкен лыдъяз. Соин, вылды, кутон азязы Иисуслы сокем секыт вал (Лука 22:41—44). w24.02 11 б., 11 абз.

Христианъёслы кулэ Иеговаез но Иисусэз, ӵыжы-выжыоссы сярысь, золгес яратыны (Матф. 10:37). Но со уг возьматы, Инмарез но Христосэз шумпоттыны тыршыса, ми семьямылы саклыкмес ум висъяське шуыса. Семьяямы быдэстоно ужъёсмес ӧм палэнтэ ке, соку Инмарлы но Христослы ярамон луомы (1 Тим. 5:4, 8). Озьы ми шудогес луомы. Иегова тодэ, мар кароно, семья шудо мед луоз шуыса: кузпалъёслы ог-огзэс яратоно но гажано, анай-атайёслы нылпиоссэс яратоно но дышетоно, нош нылпиослы анай-атайзылэсь кылзӥськоно (Еф. 5:33; 6:1, 4). Картъёс, кышноос но нылпиос, Библиысь визь-кенешъёсты уже кутэ. Эн оскиське шӧдонъёстылы, калык сям-йылолъёслы яке семья удысэз эскерисьёслы. Пыр-поч эскере публикациосты, кудъёссэ поттэ милям организацимы. Отын вань пайдаё визь-кенешъёс со сярысь, кызьы Библиысь возетъёсты улонэ пыртоно. w23.08 28 б., 6, 7 абз.

Со, малы дышетскоз нылаш пичи дыръяз, солы будэм бераз но пайда ваёз. Кылсярысь, дышетскы умой лыдӟиськыны но гожъяськыны. Куд-ог калыкъёсын малпало, кышномуртлы лыдӟиськыны но гожъяськыны одно ик кулэ ӧвӧл шуыса. Но талы вань христианъёслы дышетсконо (1 Тим. 4:13). Соин ик, тӥледлы капчи ӧвӧл ке но, дышетске умой лыдӟиськыны но гожъяськыны. Кызьы со тӥледлы улонын юрттоз? Тӥледлы капчигес луоз уж шедьтыны. Тӥ быгатоды пыр-почгес Инмарлэсь Кылзэ эскерыны но мукетъёссэ умойгес дышетыны. Нош валтӥсез, Библиез лыдӟыса но со вылын мур малпаськыса, тӥ Иеговаен кусыпъёстэс юнматоды (1 Тим. 4:15). w23.12 20 б., 10, 11 абз.

Иеговалэсь юрттэт куре визь сынаськонъёслы сётскытэк улыны. Сьӧлыко луэменымы сэрен, ми ялан нюръяськиськомы шонертэм мылпотонъёсынымы. Шайтан лэсьтэ ваньзэ, мае быгатэ, ми та нюръяськонын медам ворме шуыса. Кылсярысь, малпаськон амалмес суран-пожан понна, со азон-калгонэн герӟаськем шутэтскон амалъёсты кутэ. Сыӵе шутэтскон амалъёсын сэрен милям кырсь малпанъёсмы кылдо. Соос милемыз саптало но секыт сьӧлыке вуттыны быгато (Марк 7:21—23; Иак. 1:14, 15). Визь сынаськонъёслы медам сётске шуыса, милемлы Иеговалэн юрттэмез кулэ. Вӧсяськыны дышетыкуз, Иисус таӵе курон сярысь вераз: «Милемыз визь сынаськонлэсь но утьы, уродлэсь но мозмыты милемыз» (Матф. 6:13). Иегова дась милемлы юрттыны. Но со понна сое та сярысь курыны кулэ. Озьы ик асьмеды вӧсяськеммыя возёно. w23.05 6—7 б., 15—17 абз.

Куке кузпалъёс инмысь Атаенызы кусыпъёссэс дунъяло, соос, дась луыса, солэсь визь-кенешъёссэ улоназы пырто. Нош та юрттэ соослы вормыны шуг-секытъёссэс, кудъёсыз яратонзэс сӥятыны быгато. Соос, кинъёслэн Иеговаен юн кусыпъёссы, солэсь адӟем каро но солэн кадь сямъёсты будэтыны тыршо. Соос тыршо ог-огзылы ӟеч но чидась сямзэс возьматыны, озьы ик вань сюлмысьтызы ог-огзэс простить карыны (Еф. 4:32—5:1). Сыӵе семьяын яратон будэ. Лена, кудӥз 25 арлэсь но кемагес быземын ини, вера: «Сое, кинлэн Иеговаен матысь кусыпъёсыз вань, яратыны но гажаны капчигес». Тани Библиысь пример. Куке Иегова вуоно Мессиялы анай-атай бырйиз, со саклыксэ висъяз Иосифлы но Мариялы, кудъёсыз Давидлэн выжыысьтыз потӥзы. Малы? Соослэн кыкназылэн ик Иеговаен юн кусыпъёссы вал. Инмар тодӥз, та кузпалъёс нырысь ик сое яратозы шуыса. w23.05 21 б., 3, 4 абз.

Кенешлэн йырыз, Иисус Христос,— тырбыдэс. Нош соос, кинъёс пыр со кивалтэ,— огшоры, сьӧлыко адямиос. Куддыръя милемлы кылзӥськыны секыт луэ, тужгес но куро ке лэсьтыны сое, мар милемлы уг кельшы. Сыӵе учыре огпол сюриз апостол Пётр но. Кылчин вераз солы сиыны пудо-животъёсты, кудъёсыз Моисейлэн законэзъя чылкыттэмесь вал. Пётр соосты сиыны соглаш ӧз кариськы — одӥг пол гинэ ӧвӧл, куинь пол! (Ап. уж. 10:9—16). Малы? Та выль курон-косон солы валантэм потӥз. Но мукет дыръя, куке Иерусалимысь тӧроос апостол Павеллы веразы ньыль пиосмуртъёсын ӵош храме мыныны но чылкытатӥськон сямез ортчыны, со кылзӥськиз. Соку ваньзы адӟизы, Павел Моисейлэн законэзъя улэ шуыса. Павел тодэ вал, христианъёс Законъя уг уло ини но со номыр шонертэмзэ уг лэсьты шуыса. Озьы ке но «Павел та пиосмуртъёсты басьтӥз но мукетаз нуналэ соосын ӵош чылкытатӥськон сямез ортчытӥз» (Ап. уж. 21:23, 24, 26). Тӧроослэсь кылзӥськеменыз Павел вын-агайёслы юрттӥз огкылысь улыны (Рим. 14:19, 21). w23.10 10 б., 15, 16 абз.

Тӥ уд малпалэ, дыр, эшъёс ог-огзылэсь кышканы кулэ шуыса. Но, Иеговаен эшъяськон понна, солэсь кышканы кулэ. Кемалась-а ми Иеговалы ужаськомы-тыршиськомы, ум-а, ваньмылы Инмарлэсь кышкано. Мае возьматэ Иеговалэсь кышкан? Адями, кудӥзлэн Инмар азьын шонер кышканэз вань, сое яратэ но соин кусыпъёссэ утьыны тырше. Ӵапак сыӵе кышканэз Иисуслэн вал. Библиын вераське, со Инмарлэсь кышказ шуыса (Евр. 5:7, ВД). Но Иисус Инмарлэсь дыр куалекъяса ӧз кышка (Ис. 11:2, 3). Иисус Иеговаез туж яратэ вал но солэсь котьку кылзӥськемез потэ вал (Иоанн 14:21, 31). Иисус сямен, ми но Иеговаез туж гажаськомы, малы ке шуоно со яратӥсь, визьлыко, шонерлыко но кужмо Инмар. Ми тодӥськомы: Иегова милемыз яратэ но учке, кылзӥськиськомы-а ми солэсь, ум-а. Асьмелэн ужъёсынымы ми быгатӥськомы Иеговалэсь сюлэмзэ вӧсь карыны яке шумпоттыны (Пс. 77:41; Мад. 27:11). w23.06 14 б., 1, 2 абз.; 15 б., 5 абз.

Куке Озия эксэй кужмо но азинлыко луиз, со вунэтӥз, ваньзэ тае солы Иегова сётӥз шуыса. Малы та милемыз дышетэ? Милемлы тодамы вайылоно: ваньмыз умоез, мармы милям вань улонамы но ужан-тыршонамы,— со Иеговалэсь. Азинсконъёсынымы ушъяськем интые, милемлы Иеговаез данъяно (1 Кор. 4:7). Милемлы зӥбыт-востэм луоно но валано: ми тырбыдэстэмесь, соин ик янгышаломы. Одӥг агай, кудӥзлы 60 ареслэсь тросгес ини, вера: «Куке мон янгышасько но адямиос монэ тупато, мон уг куатаськиськы. Соос мыным визь-кенеш сёто ке, мон сое лыдэ басьтӥсько но уже кутыны тыршисько. Та юрттэ мыным умойгес луыны». Ми Иеговалэсь кылзӥськимы ке но асьмелы укыр трос саклык ӧм висъялэ ке, ми зэмзэ ик шудоесь луомы (Мад. 22:4). w23.09 10 б., 10, 11 абз.

Нырысетӥ христианъёслы юнэсь луоно вал. Соос пумиськылӥзы трос шуг-секытъёсын, кудъёсыныз со дыре улӥсь адямиос пумиськылӥзы. Со сяна, соосты уйылӥзы-уллязы иудей религиозной кивалтӥсьёс яке рим кивалтӥсьёс, озьы ик ӵыжы-выжыоссы но (Матф. 10:21). Нош куддыръя кенеш пушкын соослы нюръяськоно вал зэмос йыбырттонлэсь палэнскемъёсын но соослэн дышетонъёсынызы, кудъёсыз сэрен люкиськылонъёс кылдӥзы (Ап. уж. 20:29, 30). Озьы ке но со христианъёс юнэсь вал (Усьт. 2:3). Мар соослы юрттӥз? Соос малпаськизы Иов кадь адямиос сярысь, кудъёсыз сярысь Библиын гожтэмын (Иак. 5:10, 11). Озьы ик соос кужым курыса вӧсяськизы (Ап. уж. 4:29—31). Со сяна, со христианъёс тодазы возизы, Иегова соосты юн луэмзы понна бакель кароз шуыса (Ап. уж. 5:41). Ми но быгатомы юн луыны, малпаськимы ке адямиос сярысь, кудъёсыз юнэсь вал. Соос сярысь гожтэмын Библиын но публикациосамы. w23.07 3 б., 5, 6 абз.

Иегова но Иисус милемыз ноку уз кельтэ. Иисуслэсь куштӥськемез бере апостол Пётрлы быръёно вал: кизэ лэзёно яке азьланяз но Христос сьӧры мыноно. Иисус Иеговаез туж куриз, Пётрлэн осконэз медаз лябӟы шуыса. Иисус Пётрлы вераз, со сярысь вӧсяськиз шуыса, но оскытӥз, берлогес Пётр вын-агайёссэ юнматыны быгатоз шуыса (Лука 22:31, 32). Иисуслэсь та кылъёссэ тодаз вайылыкуз, Пётр юнматске вал, луоз. Милемлы но та выллем быръён лэсьтоно луиз ке, Иегова ми сярысь яратӥсь тӧроос пыр сюлмаськыны быгатоз. Соос милемлы юрттозы оскымонэсь кыльыны (Еф. 4:8, 11). Иегова Пётрлы но мукет апостолъёслы улон понна ваньзэ кулэзэ сётӥз. Ӵапак озьы ик Инмар ми сярысь но сюлмаськоз, солы ужан-тыршон улонамы нырысетӥ интыын луиз ке. w23.09 24—25 б., 14, 15 абз.

Иегова адӟе котькуд ӟеч ужмес, со туж пичи ке но. Со сое дунъя но аслаз пунэм тыронэныз лыдъя. Тон кенешлы юрттӥсь яке тӧро луыса ужамысь-тыршемысь дугдӥд ке, Иегова уг вунэты тынэсьтыд ужъёстэ но яратондэ, кудӥз тынэсьтыд мылкыддэ ӝутэ вал ӟеч ужъёс лэсьтыны (1 Кор. 15:58). Инмар адӟе, тон али но яратондэ возьматӥськод шуыса. Иеговалэн потэ, ми сое но мукетъёссэ эшшо но золгес мед яратомы шуыса. Иеговаез яратонмы юнгес луоз, куке ми солэсь Кылзэ лыдӟомы, со вылын малпаськомы но ӵем вӧсяськомы. Нош вын-агайёсмес но сузэр-апайёсмес яратонмы юнмалоз, куке ми соослы уж вылын юрттомы. Соку Иеговаен но духовной семьяенымы кусыпъёсмы юнмалозы но ноку уз сӧриське! w23.07 10 б., 11 абз.; 11 б., 13 абз.; 13 б., 18 абз.

Котькуд христиан мурт ачиз быръе, кызьы солы эмъяськоно. Библиын вань кӧня ке законъёс гинэ, кудъёсыз эмъяськон амалэн герӟаськемын, кылсярысь, вирлэсь но спиритизмлэсь палэнсконо шуыса (Ап. уж. 15:20; Гал. 5:19, 20). Мукет эмъяськон амалъёсты котькудӥз ачиз быръе. Кыӵе гинэ эмъяськон амалэз ми шонерен медам лыдъялэ, агайёслэсь но сузэръёслэсь учконзэс гажаны кулэ. Эн вунэтэ таӵе малпанъёсты: 1) Инмарлэн Эксэйлыкез гинэ быдэсак но пыраклы адямиосты бурмытыны быгатоз (Ис. 33:24); 2) котькуд христиан мурт ачиз быръе, кызьы солы эмъяськоно (Рим. 14:5); 3) мукетъёсты судъяно ӧвӧл яке кылъёсынымы но ужъёсынымы мукетъёсызлэсь осконзэс лябӟытоно ӧвӧл (Рим. 14:13); 4) христианъёс ог-огзэс ярато но кенешын огкылысь улонэз асьсэлэн учконъёссылэсь вылӥегес пукто (Рим. 14:15, 19, 20). w23.07 25 б., 15 абз.

Яратӥськоды-а тӥ Иеговаез? Тодӥськомы, яратӥськоды шуыса! Котьку вал сыӵе адямиос, кудъёсыз Иеговаез вань сюлмысьтызы яратӥзы (Пс. 103:33, 34). Соос котьку дась Иегова понна малэсь ке но куштӥськыны. Вашкала Израильын сыӵе адямиос вал назорейёс. «Назорей» кыл еврей кылысь потэмын. Со «висъямын; сӥземын» шуэмез возьматэ. Та кыл умой возьматэ со муртъёслэсь мылкыдзэс, кудъёсыз, Иеговалы нимысьтыз амалэн ужан-тыршон понна, дась вал малэсь ке но куштӥськыны. Моисейлэн законаз верамын вал, пиосмурт но, кышномурт но Иеговалы кыл сётыны быгатэ вал, кыӵе ке дыр ӵоже со назорей кадь улоз шуыса (Лыд. 6:1, 2). Кин ке назорей луыны кылзэ сётэ вал ке, солэсь возьмало вал, со лэсьтоз шуыса сое, мае назорей луисьтэм адями уг лэсьты вал. Соку малы куд-огъёсызлэн назорей луэмзы потэ вал? Соос Иеговаез туж ярато вал но соослэн солы тау каремзы потэ вал (К. Зак. 6:5; 16:17). w24.02 14 б., 1, 2 абз.

Еврей кыл, кудӥз Библиын «оскымон луон» яке «оскымон яратон» шуыса берыктӥське, возьматэ шуныт, юн кусыпъёсты. Удмурт Библиын та кыл «гажан-жалян» шуыса берыктӥське. Сыӵе яратонэз Инмар аслаз эшъёсызлы возьматэ. Озьы ик сыӵе яратонэз ужась-тыршисьёсыз ог-огзылы возьмато (2 Экс. 9:6, 7). Дыр ортчыса, оскымон луонмы юнгес луыны быгатэ. Та умой адӟиське Данииллэн учырысьтыз. Данииллэн Иеговалы оскымон луэмез быдэс улонэз ӵоже эскериськиз. Но самой бадӟымез шуг-секыт кылдӥз, куке Данииллы 90 ареслэсь тросгес вал ини. Эксэй юртысь кузёйыръёс ӧз яратэ Даниилэз но ӧз гажалэ Инмарез, кудӥзлы со йыбыртъяз. Даниилэз виён понна, соослэн кескич малпанзы кылдӥз. Соос эксэез куризы гожтыны косон, кудӥз возьматысал, кинлы Даниил оскымон луоз: аслаз Инмарезлы яке эксэйлы. Арлыдо пророклы 30 нунал ӵоже Иеговалы вӧсяськыны уг яра вал. Озьы со эксэйлы оскымон луэмзэ возьматысал но улэп кыльысал. Даниил та косонлэсь ӧз кылзӥськы. w23.08 5 б., 10—12 абз.

Иеговалэн потэ, ми агайёсмес но сузэръёсмес яратэмысь медам дугдэ шуыса. Соос милемыз кылъёсынызы вӧсь каро ке, малпано ӧвӧл, соос юри озьы каризы шуыса (Мад. 12:18). Ми оскиськомы, соослэн шонерзэ лэсьтэмзы потэ шуыса, но котьку ик уг пӧрмы. Инмар яратэ аслэсьтыз оскымон ужась-тыршисьёссэ, соос янгышало ке но. Библиын гожтэмын: «Пумтэм дауръёс ӵоже йыркуръяськыса, Со уг улы» (Пс. 102:9). Милемлы инмысь Атаймылэсь адӟем кароно но мукетъёссэ простить кароно (Еф. 4:32—5:1). Озьы ик тодады возе: та дуннелэн пумыз матэктэмъя агайёсын но сузэръёсын кусыпъёсмы юнгес луыны кулэ. Уйылон-уллянъёс эшшо но золгес луыны быгато. Осконмы понна ми пытсэтэ но сюрыны быгатӥськомы. Соку агайёсмы но сузэръёсмы милемлы эшшо но кулэ луозы (Мад. 17:17). w24.03 15—16 б., 6, 7 абз.

Библиын гожтэмын Инмарлэн егит ужась-тыршисьёсыз сярысь, кудъёсыныз солэн матысь кусыпъёсыз вал но кудъёсыз шудо улӥзы. Соос пӧлысь одӥгез — Давид. Егит дыръяз ик со Иеговаен эшъяськиз, нош берлогес солэн оскымон эксэез луиз (3 Экс. 3:6; 9:4, 5; 14:8). Давидлэн улонэз но ужан-тыршонэз сярысь тросгес тодыса, Иеговалы ужаны-тыршыны мылкыдды юнмалоз. Со сяна, эскерыны луэ Марклэсь яке Тимофейлэсь учыръёссэс. Тӥ адӟоды, соос егит дыръязы ик Иеговалы ужаны-тыршыны кутскизы но пумозяз солы оскымон кылизы шуыса. Егит агайёс но сузэръёс, али кутэм ужпумъёсыныды герӟаськемын со, кыӵе луоз тӥляд улонды азьланяз. Ас вылады оскиськем интые, Иеговалы оскиськиды ке, со быдэс улонды ӵоже тӥледлы кивалтэт сётоз. Тӥ зэмзэ ик шудоесь луоды. Эн вунэтэ: Иегова дунъя ваньзэ, мае тӥ со понна лэсьтӥськоды. Соин ик самой умой улон сюрес, кудзэ тӥ бырйыны быгатӥськоды,— со инмысь яратӥсь Атаймылы, Иеговалы, ужан-тыршон! w23.09 13 б., 18, 19 абз.

Апостол Павел тодэ вал, агайёсыз но сузэръёсыз тырбыдэстэмесь шуыса. Кылсярысь, христиан мурт луэмез бере куд-огъёсыз ӧз оске, со Иисуслэн дышетскисез шуыса (Ап. уж. 9:26). Берлогес куд-огъёсыз со сярысь уродзэ веразы, мукетъёсыз солы медаз оске шуыса (2 Кор. 10:10). Павел адӟиз, кызьы тӧро ассэ шонертэм возиз, нош соин сэрен мукетъёсызлэн осконзы лябӟыны быгатэ вал (Гал. 2:11, 12). Нош огпол Павеллэн Марк нимо ӵош ужасез шонертэм ужпум кутӥз, кудӥз сэрен Павел солы оскемысь дугдӥз (Ап. уж. 15:37, 38). Котькуд учыр бере Павел быгатэ вал со агайёсын кусып воземысь дугдыны. Но со тыршиз агайёсызлэсь но сузэръёсызлэсь умойзэ адӟыны но Иеговалы ужамысь-тыршемысь ӧз дугды. Мар солы юрттӥз? Павел яратэ вал агайёссэ но сузэръёссэ, соин ик со соослэсь умой сямъёссэс адӟыны тыршиз. Озьы ик яратон юрттӥз Павеллы лэсьтыны сое, мар сярысь вераське туннэлы кылбурын. w24.03 15 б., 4, 5 абз.

Библиын вераське трос зӥбыт-востэм адямиос сярысь. Соос пӧлысь одӥгез — Исаак. Куке со филистим пиослэн Герар нёжалазы интыяськиз, вожъяськись бускельёсыз сюен ӵоксазы колодчаосты, кудъёссэ атаезлэн ляльчиосыз гудӟизы вал. Исаак соосын ӧз ченгешы. Со мукет интые кошкиз но выль колодчаосты гудӟиз (Ул.-выл. 26:12—18). Но филистим пиос веразы, та колодчаос но соослэн шуыса. Соку но Исаак соосын ченгешыны ӧз кутскы (Ул.-выл. 26:19—25). Мар юрттӥз солы зӥбыт-востэм луыны, мукетъёсыз соин ченгешыны турттӥзы ке но? Со адӟем кариз Авраам но Сарра анай-атаезлэсь. Со адӟиз, кызьы атаез пӧртэм учыръёсын мукетъёсыныз тупаса улӥз, нош анаез «зӥбыт, востэм духен» улӥз (1 Пётр 3:4—6; Ул.-выл. 21:22—34). w23.09 15 б., 4 абз.

Иегова музъем вылэ аслэсьтыз Пизэ ыстӥз, со адямиослы ин Эксэйлык сярысь мед вералоз но милемыз, сьӧлыклэсь но кулонлэсь мозмытон понна, аслэсьтыз улонзэ мед сётоз шуыса. Собере Иегова Иисусэз улӟытӥз но, Иисус инме берытскиз, Инмарлэн Эксэйлыказ Эксэй луон понна. Библилэн кыӵе валтӥсь темаез? Иегова аслэсьтыз нимзэ чылкытатоз, куке Эксэйлыкез музъем пумысен малпанзэ быдэстоз. Номыр уз люкеты Иеговалы аслэсьтыз малпанзэ быдэстыны. Инмар кылзэ сётэ: ваньмыз луоз озьы, кызьы со вераз (Ис. 46:10; Евр. 6:17, 18). Музъем райлы пӧрмоз, Адамлэн но Евалэн нылпиоссы тырбыдэсэсь луозы но пумтэм вапумъёс ӵоже шумпотыса улозы (Пс. 21:27). Но Инмарлэн тае гинэ лэсьтэмез уг поты. Иегова инмысь но музъем вылысь вань ужась-тыршисьёссэ огазеялоз, соос солэсь гинэ кылзӥськыса мед улозы шуыса (Еф. 1:8—12). Макем паймымон Иегова аслэсьтыз малпанзэ быдэстэ! w23.10 20 б., 7, 8 абз.

Куке Вавилонысь кошкем еврейёс Иерусалиме вуизы, соос нош ик шуг-секытъёсын пумиськизы. Кылсярысь, семьяоссэс сюдон-вордон понна, соослэн коньдонзы уг тырмы вал, Персияын бугыръяськонъёс луылӥзы, нош артысь калыкъёс соослы пумитъяськизы. Таин сэрен куд-огъёсызлы храмез пуктонлы валтӥсь саклыксэс висъяны секыт вал. Соин ик Иегова соос доры ыстӥз кык пророкъёссэ, Аггеез но Захарияез. Соос калыклэсь мылкыдзэ ӝутыны кулэ вал Иеговалы ужаны-тыршыны. Пророкъёс соослы сётэм ужез туж умой быдэстӥзы (Агг. 1:1; Зах. 1:1). Но ог 50 ар ортчыса, еврейёслэн мылкыдзы нош ик пуксиз. Соку Вавилонысь Иерусалиме ыстэмын вал Ездра, «Моисей пыр сётэм законзэ тодӥсь-валась мурт вал со». Со калыклэсь мылкыдзэ ӝутӥз но юрттӥз Иеговалы ужан-тыршонэз улоназы нырысетӥ интые пуктыны (Езд. 7:1—6). Аггей но Захария израиль калыклы юрттӥзы Иегова вылэ оскиськыса улыны, артысь калыкъёс соослы пумитъяськыса улӥзы ке но. Та пророкъёслэн кылъёссы милемлы но юрттозы, кыӵе гинэ шуг-секытъёсын ми медам пумиське (Мад. 22:19). w23.11 14—15 б., 2, 3 абз.

Кызьы яратонэз уж вылын возьматыны луэ? Кылсярысь, вын-агайёсты но сузэр-апайёсты буйгатыса. Ог-огмес буйгатон понна, милям гажан-жалянмы луыны кулэ (1 Фес. 4:18). Нош мар кароно, мукетъёсты яратонмы медаз сӥя шуыса? Со понна мукетъёсызлэсь янгышъёссэс простить кароно, со капчи ӧвӧл ке но. Малы туннэ туж кулэ ог-огмес яратыса улыны? Учке, мар со сярысь вераз апостол Пётр: «Котьмарлы но пум вуэ ини». Соин ик со христианъёсты ӧтиз: «Огдэс огды сюлмысь яратыса улэ» (1 Пётр 4:7, 8). Ӝоген та лек дуннелы пум вуоз. Кыӵе югдур соку луоз? Иисус шуиз: «Мынам нимы понна тӥледыз вань калыкъёс адӟемпотостэм карозы» (Матф. 24:9). Шайтан милемыз люкыны медаз быгаты шуыса, милемлы огкылысь но ог-огмес яратыса улоно (Флп. 2:1, 2). w23.11 13 б., 18, 19 абз.

Куке ми вераськомы адямиослы Библиысь зэмлыкез, соос пумен валаны кутско, Шайтан пӧяське шуыса. Соос адӟо Инмарлэсь умой сямъёссэ, кылсярысь, макем со кужмо (Ис. 40:26). Соос Инмарлы оскыны кутско, малы ке шуоно адӟо, со котьку но котьмае шонер лэсьтэ шуыса (К. Зак. 32:4). Инмарлэсь адӟем карыса, соос дышетско визьмо улыны (Ис. 55:9; Рим. 11:33). Озьы ик соос тодо, Иегова — со яратон но со соосты туж буйгатэ шуыса (1 Иоанн 4:8). Куке адямиос Иегова сярысь тросгес тодо, соос азьын пырак улыны луонлык усьтӥське. Макем бадӟым дан милемлы сётэмын — Иеговалэн ужась-тыршисьёсыз луыны но юрттыны адямиослы Инмарен эшъяськыны! (1 Кор. 3:5). w24.02 12 б., 15 абз.

Тӥ Библиез дышетӥськоды ке яке Адӟись-Ивортӥсьёслэн семьяязы будӥськоды ке, малпаськиды-а ини тӥ пылатӥськон сярысь? Со туж умой ужпум! Но нырысь улондэс Иеговалы сӥзёно. Кызьы сое кароно? Инмарлы вӧсяськоно но солы верано, тӥ солы гинэ йыбыртъялоды но солэсь эриксэ улонады нырысетӥ интые пуктоды шуыса. Вераны луоз, тӥ Иеговалы кылдэс сётӥськоды, сое вань сюлмыныды, вань лулыныды, вань визьмыныды, вань кужмыныды яратоды шуыса (Марк 12:30). Сӥзиськон — со Иеговаен вераськон, кудӥз сярысь тӥ но Иегова гинэ тодӥськоды. Нош пылатӥськон ваньмыз азьын ортчытӥське. Пылатӥськыса тӥ ваньмыз азьын возьматӥськоды, Инмарлы сӥзиськиды шуыса. Табере тӥляд ужпумды — сӥзиськыкуды сётэм кылдыя улыны. Иегова но сое ик возьма (Екк. 5:3). w24.03 2 б., 2 абз.; 3 б., 5 абз.

Котькуд кузпалъёслэн шуг-секытъёссы вань. Библия вера, кузпалъяськись адямиослэн шуг-секытъёссы луозы шуыса (1 Кор. 7:28). Малы? Малы ке шуоно карт но кышно — кык тырбыдэстэм адямиос, кудъёсызлэн пӧртэм сямъёссы. Соос пӧртэм калыкъёсысь но пӧртэм семьяосысь луыны быгато. Дыр ортчемъя шарае потыны быгато сыӵе сямъёссы, кудъёсыз кузпалъяськемзылэсь азьло ӧз шӧдӥське. Таин сэрен тупамтэос кылдо. Огкыл шедьтэм интые, кузпалъёс ог-огзэс янгыше уськытыны кутско. Соос малпаны быгато, та учырын нимаз улыны яке люкиськыны гинэ луэ на шуыса. Нош соку соос шудогес луозы-а? Уз. Иеговалэн потэ, шуг-секытъёссы шоры учкытэк, кузпалъёс ӵош мед улозы шуыса. w24.03 16 б., 8 абз.; 17 б., 11 абз.

Инмарлы сӥзиськемды но пылатӥськемды бере тӥ Иегова сярысь эшшо но тросгес тодӥды но сое эшшо но золгес яратӥды. Талы луыса музъем вылын пырак улыны осконды эшшо но юн луиз (Евр. 5:13—6:1). Тӥ ас вылады шӧдӥды, луоз, мар вераз Павел Римъёслы гожтэтысь 5-тӥ люкетлэн кутсконаз. Тӥляд пӧртэм шуг-секытъёсты вал. Но соосты чидаса, тӥ валады, Инмарлы ярамонэсь луиськоды шуыса. Тӥ тодӥськоды, Инмар тӥледыз яратэ шуыса. Соин ик оскиськоды, со вань кылсётонъёссэ быдэстоз шуыса. Ӵошатоно ке со дырен, куке тӥ Библиез дышетыны кутскиды, али оскиськонды тӥледлы эшшо но дуно потэ. Со быдэс улонды вылын шӧдӥське. Кылсярысь, со вылын, кызьы тӥ асьтэды ӵыжы-выжыосыныды возиськоды, кыӵе ужпумъёс кутӥськоды но малы дырдэс висъяськоды. Собере Павел вера, оскиськыса улэммы юнме ӧвӧл шуыса. Тӥ адӟоды ваньзэ, малы оскиськыса улӥськоды (Рим. 15:13). w23.12 12—13 б., 16—19 абз.

Куддыръя, бадӟым шуг-секытъёсын пумиськыку, милемлы секыт асьмеды киямы кутыны, асьмеды дышем сяммыя возьыны. Кызьы зарезь вылын кужмо сильтӧл дыръя кораблез палэнысь палэнэ сэрпалля, милям пӧртэм шӧдонъёсмы кылдыны быгато но ми кытчы пырон инты ум шедьтӥське. Кызьы Иегова милемлы юрттэ, куке милям таӵе шӧдонъёсмы кылдо? Со кылзэ сётэ, милемыз юнматоз но асьмеды киямы кутыны юрттоз шуыса. Корабль медаз бекырскы шуыса, ву пушкын кык палаз ик солэн стабилизаторъёсыз вань. Соослы луыса со сокем уг лэйка ни, нош кораблен мынӥсьёс кышкатэк но гань-гань мыныны быгато. Стабилизаторъёс умойгес ужало, куке корабль одӥг интыяз уг сылы, нош кытчы ке мынэ. Ӵапак озьы ик Иегова но милемыз юнматоз но асьмеды киямы кутыны юрттоз, куке секыт дыръя ми одӥг интыямы ум сылӥське. w24.01 22 б., 7, 8 абз.

Куке тӥледлы кышкыт, малпаське, мае Иегова лэсьтӥз ини. Малпалэ солэн кылдытэмъёсыз сярысь. Кылсярысь, учке тылобурдоос но сяськаос шоры. Соос Инмарлы укшатыса кылдытэмын ӧй вал, соос Инмарлы но уг йыбыртъяло. Озьы ке но Иегова соос сярысь сюлмаське. Нош Инмар соос сярысь но сюлмаське бере, со тӥ сярысь но сюлмаськоз (Матф. 6:25—32). Та сярысь малпаськон тӥледлы юрттоз Иегова вылэ оскиськыса улыны. Озьы ик малпаське, кызьы Иегова аслаз ужась-тыршисьёсызлы юрттэ. Кылсярысь, тросгес тодэ пиосмуртъёс но кышномуртъёс сярысь, кудъёсыз вашкала дыръя улӥзы яке кудъёсыз асьме нуналъёсы уло. Озьы ик тодады ваелэ, мае Иегова тӥ понна лэсьтӥз ини. Кызьы со тӥледыз ас дораз вайиз? (Иоанн 6:44). Кызьы со вӧсяськонъёстылы ответ сётэ? (1 Иоанн 5:14). Кыӵе пайда тӥледлы вае Иисус Христослэн курбонэз? (Еф. 1:7; Евр. 4:14—16). w24.01 4 б., 6 абз.; 7 б., 17 абз.