Визь сынаськонлы эн сётске!

1, 2. а) Малэсь алӥз Иисус аслэсьтыз дышетскисьёссэ? б) Малы дышетскисьёс Иисусэз кельтӥзы? (Озьы ик учке суредъёсты.)

ИИСУС шуиз: «Дух сэзь, нош лулмугор кужымтэм» (Матф. 26:41б)a. Мар сярысь Иисуслэн верамез потэ вал? Иисус вала вал, адямиос сьӧлыкоесь но янгышало шуыса. Но озьы ик та кылъёсын Иисус дышетскисьёссэ алӥз, ас вылазы оскиськоно ӧвӧл шуыса. Кӧня ке часлы азьлогес апостолъёс шуизы, Иисуслэсь ноку уз куштӥське шуыса (Матф. 26:35). Соослэн асьсэды шонер воземзы потэ вал. Но соос ӧз но малпалэ, секыт дыръя асьсэды воксё мукет сямен возёзы шуыса. Соин ик Иисус соослы шуиз: «Визь сынаськонэ медад сюре шуыса, сак улэ, вӧсяське» (Матф. 26:41а).

² Жаляса верано луэ, дышетскисьёс Иисуслэсь ӧз кылзӥське. Кызьы соос асьсэды возизы, куке Дышетӥсьсэс кутӥзы? Соос веразы вал ке но, Иисуслэсь ноку уз куштӥське шуыса, соос кышказы но бызьыса кошкизы (Матф. 26:56).

3. а) Малы, Иеговалы оскымон луон понна, ас выламы оскиськоно ӧвӧл? б) Мае ми эскеромы та статьяын?

³ Милемлы ас выламы оскиськоно ӧвӧл, малы ке шуоно со урод бервылъёсы вуттыны быгатэ. Веранэз ӧвӧл, милям потэ асьмеды шонер воземмы но Иеговаез шумпоттэммы. Но вунэтоно ӧвӧл, ми сьӧлыкоесь но визь сынаськонлы сётскыны быгатӥськомы шуыса (Рим. 5:12; 7:21—23). Малпамтэ шорысь милям кужмо мылкыдмы кылдыны быгатэ мае ке шонертэмзэ лэсьтыны. Иеговалы но солэн Пиезлы оскымон кылён понна, милемлы Иисуслэн алэмезлэсь кылзӥськоно. Та статьяын нырысь ми эскеромы, кыӵе удысъёсын тужгес но чакласьконо. Собере тодомы, кызьы визь сынаськонлэсь утиськоно. Озьы ик вераськомы со сярысь, мар юрттоз азьланяз но сак улыны.

КЫӴЕ УДЫСЪЁСЫН ТУЖГЕС НО ЧАКЛАСЬКОНО?

4, 5. Куд-ог сьӧлыкъёс туж ик секытэсь ӧвӧл ке но, малы соослэсь палэнскыны кулэ?

⁴ Куд-ог сьӧлыкъёс туж ик секытэсь ӧвӧл ке но, соос но кышкытэсь, малы ке шуоно Иеговаен кусыпъёсмес лябӟытыны быгато. Озьы ик соос эшшо но секыт сьӧлыкъёсы вуттыны быгато.

⁵ Ми пӧлысь котькудӥз визь сынаськонъёсын пумиськылэ. Ми ваньмы пӧртэмесь, соин ик котькудӥзлэн аслаз ляб палъёсыз вань. Кин ке но палэнскыны тырше азон-калгон сьӧлыклэсь, мастурбациен выремлэсь яке порнографиез учкемлэсь. Нош кинлы ке но секыт вормыны вожпотонзэ, адямиослэсь кышкамзэ яке ваньзэ ас сяменыз лэсьтыны мылкыдзэ. Валамон, мукет но визь сынаськонъёс луо. Кызьы гожтӥз Иаков, «котькин но, аслаз кырсь малпанъёсызлы сётӥськыса, мылкыдзэ отчы понэ ке, соин со ассэ визь сынаськон улэ сётэ» (Иак. 1:14).

6. Малы валаны тыршоно ляб палъёсмес?

⁶ Тодӥськоды-а тӥ асьтэлэсь ляб палъёстэс? Кин ке но малпа, солэн ляб палъёсыз воксё ӧвӧл шуыса. Нош кин ке но малпа, солэн ляб палъёсыз вань ке но, соин номыр уродэз уз луы шуыса. Но сыӵе малпаськон номыр умойзэ уг вайы (1 Иоанн 1:8). Тодады вае, апостол Павел гожтӥз, юн осконэн улӥсь христианъёс но, ӧз ке чаклаське, визь сынаськонлы сётскыны быгато шуыса (Гал. 6:1). Милемлы валаны тыршоно, кыӵе ляб палъёсмы вань но кыӵе учыръёсы визь сынаськонэн пумиськыны быгатомы (2 Кор. 13:5).

7. Малы милемлы саклыкмес висъяно? Вералэ пример.

⁷ Мар кароно ляб палъёсмес валаммы бере? Соослы саклыкмес висъяно! Учкомы тае пример вылын. Вашкала дыръя карлэн капкаез кар котырысь борддорлэн самой ляб интыез вал. Соин ик капкаез тужгес но сак утизы. Ӵапак озьы ик милемлы но утиськыны кулэ, визь сынаськон кылдыку, солы медам сётске шуыса (1 Кор. 9:27).

КЫЗЬЫ УТИСЬКОНО ВИЗЬ СЫНАСЬКОНЪЁСЛЭСЬ?

8, 9. Мар карыны быгатэ вал Мадёнъёсын книгаысь пияш, бадӟым сьӧлыклэсь палэнскон понна? (Мадёнъёс 7:8, 9, 13, 14, 21).

⁸ Кызьы милемлы визь сынаськонъёслэсь утиськоно? Эскеромы, малы милям дышетскеммы луэ пияшлэсь, кудӥз сярысь вераське Мадёнъёсын книгаысь 7-тӥ люкетын. Куке азыса-калгыса улӥсь кышномурт солы ӵектӥз уйзэ соин ортчытыны, со пумит ӧз луы. 22-тӥ кылбурын вераське: «Та пияш соку ик кышномурт сьӧры мынӥз». Малпан кылдыны быгатэ, таӵе учыр шӧдтэк шорысь кылдӥз шуыса. Но учконо ке 7-тӥ люкетлэн кутсконаз, солэсь азьвыл пияш кӧня ке шонертэм ужпумъёс кутӥз, кудъёсыз сьӧлыке вуттӥзы.

⁹ Кыӵе ужпумъёс сярысь татын вераське? Нырысь пияш бер ӝыт «кышномуртлэн корка сэрегез вӧзтӥ» ортчиз но «солэн корка палаз мынӥз». (Лыдӟе Мадёнъёсты 7:8, 9.) Кышномуртэз адӟыса, пияш берыктӥськыса ӧз кошкы, нош со доры мынӥз. Со ассэ чупаны лэзиз но солэсь верамзэ кылзӥз. Кышномурт вераз, «тупаса улон понна курбон» сётӥз шуыса. Озьы солэн возьматэмез потэ вал, дыр, со туж ик урод адями ӧвӧл шуыса. (Лыдӟе Мадёнъёсты 7:13, 14, 21.) Пияш таӵе шонертэм ужпумъёсты ӧй ке кутысал, визь сынаськонэн ӧй пумиськысал но бадӟым сьӧлык ӧй лэсьтысал.

10. Кызьы туннэ кин ке но янгышаны быгатэ, Мадёнъёсын книгаысь пияш сямен?

¹⁰ Иеговалэн котькуд ужась-тыршисез сюрыны быгатэ учыре, кудӥз сярысь вераське Мадёнъёсын книгаысь 7-тӥ люкетын. Сьӧлыкам мурт ачиз но паймыны быгатэ, кызьы озьы луиз шуыса. Озьы ик со вераны быгатэ, сыӵе учыр малпамтэ шорысь кылдӥз шуыса. Но малпаськыса со валалоз, вылды, мар вуттӥз сыӵе сьӧлыке. Оло нош, со эшъяськыны кутскиз соосын, кинъёс Иеговаез уг ярато. Яке со кутскиз бырйыны сыӵе шутэтскон амалъёсты, ветлыны сыӵе интыосы но пыраны сыӵе сайтъёсы, кудъёсыз христианъёслы уг тупало. Оло нош, со дугдӥз вӧсяськемысь, Библиез лыдӟемысь, пумиськонъёсы ветлэмысь яке тодытэмысь. Озьыен, сьӧлык шӧдтэк шорысь лэсьтэмын ӧй вал.

11. Малэсь милемлы палэнсконо, сьӧлык медам лэсьтэ шуыса?

¹¹ Малы ми дышетскиськомы? Палэнсконо сьӧлыклэсь но, озьы ик солэсь но, мар сьӧлыке вуттыны быгатэ. Ӵапак сыӵе алон гожтэмын пияш но азыса-калгыса улӥсь кышномурт сярысь веранлэн пумаз. Соломон милемыз алэ: «Солэн сюресъёсыз кузя йыромыса эн ветлы» (Мад. 7:25). Та выллем визь-кенеш гожтэмын Мадёнъёсын книгаысь 5-тӥ люкетын: «Сюресэд со калгись кышномуртлэн палэнэтӥз мед ортчоз, солэн коркаезлэн ӧс дораз матаз но эн лыкты» (Мад. 5:3, 8). Озьыен, милемлы палэнсконо ваньмызлэсь, мар сьӧлыке вуттыны быгатэb. Кыӵе ке но ужъёс христианъёслы тупало ке но, милемлы асьмелы соос кышкытлык вайыны быгато (Матф. 5:29, 30).

12. Кыӵе ужпум кутӥз Иов но кызьы со сое визь сынаськонъёслэсь утиз? (Иов 31:1).

¹² Сьӧлыке вуттӥсь учыръёсы медам сюре шуыса, милемлы юнэсь луоно. Та пумысен ми быгатӥськомы Иовлэсь адӟем карыны. Со шуиз: «Мон юн кыл сётӥ: синъёсме медам берыкъя нылъёс пала». (Лыдӟе Иов книгаез 31:1.) Иов сётэм кылызъя улӥз, соин ик кышноезлы котьку оскымон вал. Ми но быгатӥськомы юнэсь луыны но палэнскыны ваньмызлэсь, маин сэрен визь сынаськонэн пумиськысалмы.

13. Малы чакланы кулэ, мар сярысь ми малпаськиськомы? (Озьы ик учке суредъёсты.)

¹³ Озьы ик чакланы кулэ, мар сярысь ми малпаськиськомы (Пот. 20:17). Куд-огъёсыз верало: «Номыр уродэз ӧвӧл, мон син азям пуктӥ ке, мае ке шонертэмзэ лэсьтӥсько шуыса. Мон зэмзэ ик сое уг лэсьтӥськы ук!» Но озьы малпаськыны шонер ӧвӧл. Адями шонертэмез сярысь малпаське ке, солэн эшшо но зол сое лэсьтэмез потэ. Соку солы эшшо но секыт визь сынаськонлы сётскытэк улыны. Валамон, ваньмылэн куддыръя шонертэм малпанъёсмы кылдыло. Но туж кулэ соосты соку ик палэнтыны но умоез сярысь малпаськыны. Соку ми ум сётэ шонертэм малпанъёсмылы мылпотонъёсмес пуромытыны, кудъёссэ кутыны ум быгатэ ни. Озьы ик со юрттоз милемлы бадӟым сьӧлыклэсь утиськыны (Иак. 1:13—15; Флп. 4:8; Кол. 3:2).

14. Мар эшшо карыны луэ на, визь сынаськонъёслэсь палэнскон понна?

¹⁴ Мар эшшо кароно на, визь сынаськонъёслэсь палэнскон понна? Юн осконо, Инмарлэн законъёсызъя улон милемлы котьку пайда вае шуыса. Куддыръя секыт малпанъёсмес но мылпотонъёсмес тупатыны, соос Инмарлы ярамонэсь мед луозы шуыса. Но тыршимы ке, ми зэмзэ ик шудоесь луомы!

15. Кызьы ӟечез яратон юрттоз милемлы визь сынаськонъёслэсь палэнскыны?

¹⁵ Озьы ик чылкыт мылпотонъёсты будэтоно. Ми дышетскимы ке уродэз адӟемпотостэм карыны, нош ӟечез яратыны, милемлы капчигес луоз асьмеды шонер возьыны но палэнскыны ваньмызлэсь, мар сьӧлыке вуттыны быгатэ (Ам. 5:15). Со сяна, визь сынаськон малпамтэ шорысь кылдӥз ке, ми тодомы, мар карыны.

16. Кызьы Иеговалы йыбыртъянэн герӟаськем ужъёс милемыз шонертэм мылпотонъёслэсь утё? (Озьы ик учке суредъёсты.)

¹⁶ Мар юрттоз шонер мылпотонъёсты будэтыны? Милемлы тыршоно тросгес пыриськыны Инмарлы йыбыртъянэн герӟаськем ужъёсы. Христиан пумиськонъёсын яке тодытыкумы ми тыршиськомы Иеговаез шумпоттыны. Соку шонертэм мылпотонъёсмы уз кылдэ, дыр (Матф. 28:19, 20; Евр. 10:24, 25). Инмарлэсь Кылзэ малпаськыса лыдӟимы но эскеримы ке, ми дышетскомы ӟечез яратыны, нош уродэз адӟемпотостэм карыны (Иис. Н. 1:8; Пс. 1:2, 3; 118:97, 101). Эн вунэтэ Иисуслэсь кылъёссэ: «Визь сынаськонэ медад сюре шуыса... вӧсяське» (Матф. 26:41). Вӧсяськыкумы ми инмысь Атаенымы дырмес ортчытӥськомы но солы луонлык сётӥськомы милемлы юрттыны но мылкыдмес юнматыны сое шумпоттыса улыны (Иак. 4:8).

САК УЛЭ

17. Кыӵе ляб палыз вал Пётрлэн?

¹⁷ Куд-ог ляб палъёсмес ми вормыны быгатомы, нош куд-огъёссэ — ум, вылды. Эскеромы тае Пётрлэн учырез вылын. Адямиослэсь кышкаменыз со куинь пол Дышетӥсезлэсь куштӥськиз (Матф. 26:69—75). Нош берлогес, Сӥнедрион азьын, со кышкатэк Иисус сярысь вераз. Малпаны луэ вал, со адямиослэсь кышканзэ вормиз шуыса (Ап. уж. 5:27—29). Но аръёс ортчыса, со еврей луисьтэм адямиосын сиськемысь дугдӥз, малы ке шуоно кышказ, со еврейёслы уз кельшы шуыса (Гал. 2:11, 12). Адӟиське, Пётр нош ик адямиослэсь кышказ. Та ляб палзэ со ноку ӧз вормы, вылды.

18. Мар сярысь тодамы возёно, ми кыӵе ке урод сяммес вормимы ке но?

¹⁸ Ӵапак озьы ик ми но малпаны быгатӥськомы, кыӵе ке но урод сяммес вормимы шуыса, но со нош ик шарае потэ. Одӥг агай вера: «Мон дас ар порнографиез ӧй учкы но малпай, та урод сямме кемалась ворми ини шуыса. Но со нокытчы пырымтэ — со сьӧсь пӧйшур кадь шып кариськем но тупась дырез возьма вылэм». Но агаймы кизэ ӧз лэзьы. Со валаз, солы азьланяз но — та дуннелэн пумозяз, вылды,— котькуд нунал нюръяськоно луоз шуыса. Кышноезлэн но тӧроослэн юрттэменызы со тыршиз эшшо но сак улыны.

19. Мар кароно, милям вань ке сяммы, кудзэ ми ӧм ворме на?

¹⁹ Оло нош, милям вань сяммы, кудзэ ми ӧм ворме на. Мар кароно, со милемыз медаз вормы шуыса? Иисуслэн верамезъя, котьку сак улоно. Ми малпаськомы ке но, урод сяммылы ум сётске шуыса, палэнсконо учыръёслэсь, куке шонертэм мылпотонъёс кылдыны быгато (1 Кор. 10:12). Азьланяз но лэсьтэ сое, мар тӥледлы азьло юрттэ вал. Мадёнъёсын 28:14 вераське: «Шудо адями, кудӥз ялан Инмарлэсь кышканэн улэ» (2 Пётр 3:14).

КЫӴЕ ПАЙДА МИ БАСЬТОМЫ?

20, 21. а) Кыӵе ми пайда басьтомы, визь сынаськонъёслэсь палэнскыны тыршимы ке? б) Мар кароз Иегова, ми асьмеос лэсьтӥськомы ке ваньзэ, мае быгатӥськомы? (2 Коринфъёслы 4:7).

²⁰ Ми оскиськомы, визь сынаськонъёслэсь палэнскыны тыршимы ке, со милемлы пайда ваёз шуыса. Сьӧлык «вакчи дыр ӵоже» гинэ шумпотон вае (Евр. 11:25). Нош Иеговалэн куронъёсызъя улыса, ми зэмзэ ик шудо луиськомы (Пс. 18:9). Со озьы, малы ке шуоно ми Инмарлэсь кылзӥськыса улыны кылдытэмын (Ул.-выл. 1:27). Соин ик, ми Иеговаез шумпоттыны тыршиськомы ке, ми чылкыт возьытлыкен улӥськомы, нош азьланяз пырак улыны оскиськомы (Иуда 20, 21; 1 Тим. 6:12; 2 Тим. 1:3).

²¹ Зэм, «лулмугор кужымтэм». Но та уг возьматы, ми сьӧлыклэсь палэнскыны ум быгатӥське шуыса. Иегова милемлы кужым сётыны дась. (Лыдӟе 2 Коринфъёслы 4:7.) Висъялэ саклыктэс: Инмар милемлы «мертантэм бадӟым кужым» сётэ. Огшоры кужым — со нуналысь нуналэ визь сынаськонъёсын нюръяськыны тыршеммы. Но милям оскеммы луэ, лэсьтӥмы ке ваньзэ, мае быгатӥськомы, Иегова вӧсяськонъёсмылы ответ сётоз но кулэ дыръяз милемыз юнматоз шуыса (1 Кор. 10:13). Солэн юрттэменыз ми котькыӵе визь сынаськонэн нюръяськыны быгатомы!