Кыӵе бакель каронъёс сётэ асьмелы Иеговалэн яратонэз?

1. Кызьы ми Иеговаез шумпоттыны быгатӥськомы?

ШУОМ, тӥ эштылы чебер но пайдаё кузьым кузьмады. Нош со сое ӝажы вылэ пуктӥз но со сярысь вунэтӥз! Соин сэрен тӥляд кӧтты ӝож луоз, дыр. Нош эшты кузьымды понна тӥледлы тау кариз ке но сое уже кутӥз ке, тӥ туж шумпотоды. Мае возьматэ та пример? Иегова но милемлы кузьым лэсьтӥз — ми понна аслэсьтыз Пизэ сётӥз. Ми солэсь кузьымзэ но милемыз яратэмзэ дунъямы ке, со туж шумпотоз! (Иоанн 3:16; Рим. 5:7, 8).

2. Мае ми эскеромы та статьяын?

² Дыр ортчыса, дун тырон понна тау карон мылкыдмы сӥяны быгатэ. Вераны луоз, озьы ми Инмарлэсь дуно кузьымзэ ӝажы вылэ пуктӥськомы. Нырысь ми солы шумпотӥмы вал, нош собере со сярысь вунэтӥмы. Мар кароно, тау карон мылкыдмы медаз сӥя шуыса? Ялан тодамы вайылоно, мар ми понна каризы Инмар но Иисус Христос. Та статья милемлы юрттоз сое тодамы возьыны. Ми эскеромы, кыӵе бакель каронъёс сётэ дун тырон али ик ини но мар милемыз возьма азьланяз. Озьы ик ми тодомы, кызьы Инмарлэн яратонэз понна тау кареммес возьматоно, тужгес но Ӝытанэз пусъён вакытэ.

КЫӴЕ БАКЕЛЬ КАРОНЪЁС МИ БАСЬТӤСЬКОМЫ АЛИ

3. Кыӵе пайда вае дун тырон туннэ ик ини?

³ Дун тырон туннэ ик ини милемлы трос пайда вае. Кылсярысь, солы луыса Иегова сьӧлыкъёсмес простить каре. Со милемыз простить карыны кулэ ӧвӧл ке но, солэн потэ милемыз простить каремез. Тау карыса псаломъёсты гожъясь кырӟаз: «Кузё-Инмаре... Тон ӟечлыко, туж гажась, жалясь луиськод» (Пс. 85:5; 102:3, 10—13).

4. Кин понна Иегова дун тыриз? (Лука 5:32; 1 Тимофейлы 1:15).

⁴ Куд-огъёсыз малпало, соос номырлы ярантэм адямиос шуыса, соин ик Иегова соосты простить уз кары. Но зэмзэ верано ке, одӥг адями но ярамон ӧвӧл, Инмар сое простить мед кароз шуыса. Апостол Павел вала вал, со «апостол шуыса лыдъяны но сылӥсьтэм» шуыса. Озьы ке но со шуиз: «Инмарлэн сётэм дэлетэныз-ӟечлыкеныз мон луи сыӵе, кыӵе али вань» (1 Кор. 15:9, 10). Куке ми ӧпкелиськомы, Иегова милемыз простить каре. Малы? Малы ке шуоно со милемыз яратэ. Тӥ асьтэды номырлы ярантэм адямиен лыдъяськоды ке, эн вунэтэ: Иегова сьӧлыктэм адямиос понна дун ӧз тыры, со ӧпкелись сьӧлыко адямиос понна дун тыриз. (Лыдӟе Лукалэсь 5:32; 1 Тимофейлы 1:15.)

5. Быгатэ-а кин ке но вераны, Иегова сое одно ик простить карыны кулэ шуыса? Валэктэ.

⁵ Нокудмылы но тазьы малпано ӧвӧл: «Мон Иеговалы туж кемалась ужасько-тыршисько ини, соин ик со монэ одно ик простить карыны кулэ». Зэм но, Иегова дунъя ваньзэ, мае ми со понна лэсьтӥськомы (Евр. 6:10). Но дун тырон — со ужаммы-тыршеммы понна уждун ӧвӧл, со Инмарлэн кузьымез. Ми верасалмы ке, трос ужаммы-тыршеммы понна Иегова милемыз простить карыны кулэ шуыса, озьы ми возьматысалмы, дун тырон милемлы кулэ ӧвӧл но Иисус Христос юнме кулӥз шуыса. (Ӵошатэ Галатъёслы 2:21.)

6. Малы Павел, вань кужымзэ поныса, Иеговалы ужаз-тыршиз?

⁶ Павел тодэ вал, кӧня гинэ со Иеговалы медаз ужа-тыршы, Иегова сое одно ик простить карыны кулэ ӧй вал шуыса. Соку малы со, вань кужымзэ поныса, ужаз-тыршиз? Павеллэн возьматэмез потэ вал, Иеговалы туж тау каре шуыса (Еф. 3:7). Ми но Иеговалы вань сюлмысьтымы ужаськомы-тыршиськомы. Ми сое ум лэсьтӥське, Иеговалэсь мае ке басьтон понна. Озьы милям Иеговалы возьматэммы потэ милемыз гажамез-жалямез понна тау кареммес.

7. Мар эшшо али ик ини сётэ дун тырон? (Римъёслы 5:1; Иаков 2:23).

⁷ Дун тыронлы луыса милям Иеговаен матысь кусыпъёсмы луыны быгатоa. Кызьы вераськиз ини кылем статьяын, сьӧлыко луэменымы сэрен, нокин но Инмарлэн эшез луыса уг вордӥськы. Но дун тырон луонлык сётэ Инмарен тупаса улыны но соин эшъяськыны. (Лыдӟе Римъёслы 5:1; Иаковлэн 2:23.)

8. Малы милемлы дунъяно Иеговалы вӧсяськыны луонлыкез?

⁸ Иеговалэн эшъёсыз солы вӧсяськыны быгато. Иегова кылзэ, куке ужась-тыршисьёсыз ваньзы ӵош солы вӧсясько, кылсярысь, кенешлэн пумиськонъёсаз, озьы ик куке котькудӥз нимаз солы вӧсяське. Вӧсяськон милемыз буйгатыны быгатэ. Но валтӥсез муг, малы ми вӧсяськиськомы,— Инмарен вераськыса, ми солы матэгес кариськиськомы (Пс. 64:3; Иак. 4:8; 1 Иоанн 5:14). Музъем вылын улыкуз, Иисус ӵем вӧсяськиз. Со тодэ вал, Иегова сое кылзэ но вӧсяськон кусыпъёссэс юнматэ шуыса (Лука 5:16). Иисус Христослэн курбонэзлы луыса ми быгатӥськомы быдэс дуннеез Кылдытӥсьлэн эшъёсыз луыны но соин вераськыны. Ми сое туж дунъяськомы!

КЫӴЕ БАКЕЛЬ КАРОНЪЁС МИ БАСЬТОМЫ АЗЬЛАНЯЗ

9. Кызьы бакель кароз Инмар аслэсьтыз ужась-тыршисьёссэ азьланяз?

⁹ Кызьы Инмар бакель кароз аслэсьтыз ужась-тыршисьёссэ азьланяз? Со соослы пырак улон кузьмалоз. Тросэз малпало, пырак улыны уг луы шуыса, малы ке шуоно али котькин кулэ. Но Иеговалэн эрикезъя адямиос пырак улыны кулэ вал. Адам ӧй сьӧлыкасал ке, ваньзы пырак улысалзы. Али пырак улон осконтэм потэ ке но, эрикез мед быдэсмоз шуыса, Иегова самой бадӟым дун тыриз: ми понна аслэсьтыз яратоно Пизэ сётӥз (Рим. 8:32).

10. Мар возьма азьланяз зырӟем христианъёсты но мукет ыжъёсты?

¹⁰ Иегова милемлы пырак улон азьланяз гинэ кузьмалоз ке но, солэн потэ, ми солы али ик ини мед дасяськомы шуыса. Зырӟем христианъёсты туж трос уж возьма инмын, кытын соос Христосэн ӵош кивалтозы (Усьт. 20:6). Нош мукет ыжъёс курадӟытэк, кайгырытэк но вӧсь луытэк рай музъем вылын улозы (Усьт. 21:3, 4). Тӥ мукет ыжъёс пӧлы пыриськоды ке, эн малпалэ, пырак улон, инмын улонэн ӵошатыса, сокем дуно ӧвӧл шуыса. Иегова адямиез музъем вылын улыны кылдытӥз! Соин ик рай музъем вылын пырак улон милемлы самой бадӟым шумпотон ваёз.

11, 12. Мае тӥ возьмаськоды выль дуннеын улонлэсь? (Озьы ик учке суредъёсты.)

¹¹ Малпалэ гинэ, кыӵе улон луоз рай музъем вылын! Тӥледлы кышкано уз луы ини, тӥ висёды яке кулоды шуыса (Ис. 25:8; 33:24). Иегова вань ӟеч мылкыд каронъёстэс быдэстоз. Мар карыса тӥляд улэмды потэ? Потэ-а тӥляд пудо-животъёсты эскеремды, суредаськемды яке крезьгуро инструментэн шудэмды? Яке тӥляд потэ мургес эскеремды физикаез, химияез но математикаез? Райын туж кулэ луозы архитекторъёс, пуктӥськисьёс но музъем бордын ужасьёс. Озьы ик кулэ луоз сиён пӧраны, тӥрлыкъёсты лэсьтыны но музъемез чебер карыны (Ис. 35:1; 65:21). Музъем вылын пырак улыкумы, милям ваньзэ тае но мукетсэ лэсьтэммы луоз.

¹² Ми туж шумпотомы улӟытэм адямиосты пумитаны! (Ап. уж. 24:15). Макем умой луоз Иегова сярысь тросгес но тросгес тодон-валан басьтыны, солэсь кылдытэмъёссэ эскерыса (Пс. 103:24; Ис. 11:9). Озьы ик ми туж шумпотомы, асьмеды шонер возиськомы но сьӧлыкатэк улӥськомы шуыса! Воштоды-а тӥ та бакель каронъёсты «вакчи дыр ӵоже сьӧлыко ужъёс пӧлын эзылыса улонлы»? (Евр. 11:25). Уд воштэ! Мае гинэ ми туннэ кельтоно медам луэ, бакель каронъёсмы тросгес луозы. Эн вунэтэ: рай музъем вылын улонэз ми котьку ум возьмалэ. Куке но ми отын уломы. Та луыны быгатэ Иеговалы луыса гинэ, кудӥз милемыз туж яратэ но ми понна аслэсьтыз Пизэ сётӥз!

КЫЗЬЫ ВОЗЬМАТОНО ИЕГОВАЛЫ ЯРАТОНЭЗ ПОННА ТАУ КАРЕММЕС

13. Кызьы милям Иеговалы возьматэммы луэ яратонэз понна тау кареммес? (2 Коринфъёслы 6:1).

¹³ Кызьы милям Иеговалы возьматэммы луэ дун тырон понна тау кареммес? Ужан-тыршонэз котьку но улонамы нырысетӥ интые пуктоно (Матф. 6:33). Малы ке шуоно Иисус кулӥз, «улӥсьёс асьсэлы медаз ни улэ, мед улозы Со понна, кин соос понна кулӥз но улӟыса султӥз» (2 Кор. 5:15). Милям уг поты вунэтэммы, малы Иегова милемлы яратонзэ возьматэ. (Лыдӟе 2 Коринфъёслы 6:1.)

14. Кызьы возьматоно Иеговалы, ми солы оскиськомы но солэсь кылзӥськиськомы шуыса?

¹⁴ Озьы ик ми Иеговалы возьматӥськомы солэн яратонэз понна тау кареммес, солы оскыса но солэсь кылзӥськыса. Кылсярысь, куке ми малпаськомы, кытын дышетскыны яке кытын ужаны, милемлы Иеговаен кенешоно (1 Кор. 10:31; 2 Кор. 5:7). Иеговалэсь кылзӥськыса, ми осконмес уж вылын возьматӥськомы. Соку Иеговаен кусыпъёсмы но вуоноезлы осконмы эшшо но юн луо (Рим. 5:3—5; Иак. 2:21, 22).

15. Кызьы Ӝытан азьын, со дыръя но со бере Иеговалы возьматоно, ми дун тырон понна тау кариськомы шуыса?

¹⁵ Кызьы эшшо милям Иеговалы возьматэммы луэ дун тырон понна тау кареммес? Ӝытан азьын, со дыръя но со бере лэсьтэм ужъёсынымы. Ми асьмеос но тыршомы Ӝытанэ лыктыны, озьы ик мукетъёсызлы но со сярысь вераломы (1 Тим. 2:4). Валэктэ соослы, кинэ тӥ ӧтиськоды, кызьы Ӝытан ортчытӥське. Кылсярысь, возьматэ соослы jw.org сайтысь «Малы Иисус кулӥз?» но «Иисус Христослэсь кулонзэ тодэ ваён» видеороликъёсты. Тӧроос одно ик тыршозы ӧтьыны агайёсты но сузэръёсты, кудъёсыз пумиськонъёсамы ветлэмысь дугдӥзы. Малпалэ гинэ, макем шумпотозы инмысь но музъем вылысь Иеговалэн ужась-тыршисьёсыз, куке солэн ышем ыжъёсыз кенеше берытскозы! (Лука 15:4—7). Нош Ӝытанэ лыктыса, ог-огенымы ӟечбуръяськем сяна, ойдолэ ӟечбуръяськомы соосын но, кинъёс нырысетӥзэ лыктозы яке кинъёс кемалась ӧз ветлэ ни. Милям потэ, ваньзы мед шӧдозы, ми соослы шумпотӥськомы шуыса (Рим. 12:13).

16. Малы малпаськоно со сярысь, быгатӥськомы-а ми Ӝытан вакытэ тросгес ужаны-тыршыны?

¹⁶ Быгатӥськоды-а тӥ Ӝытан вакытэ тросгес тодытыны? Озьы тӥ Иеговалы но солэн Пиезлы тау каремдэс возьматоды ваньмыз понна, мае соос тӥледлы лэсьтӥзы. Тросгес тодытыса, тӥ эшшо но зол шӧдоды, кызьы Иегова тӥледлы юрттэ но кызьы осконды юнма (1 Кор. 3:9). Озьы ик лыдӟе кылбуръёсты, кудъёссэ Ӝытан вакытэ лыдӟоно. Соосты шедьтыны луэ «Котькуд нунал Библиез эскериськомы» брошюраысь яке «Улон но ужан-тыршон» ужан тетрадьысь. Оло нош, куд-ог кылбуръёсты тӥляд мургес эскеремды потоз.

17. Мар шумпоттэ Иеговаез? (Озьы ик учке «Кызьы тон быгатӥськод Иеговалэн яратэмез понна тау каремдэ возьматыны» рамкаез.)

¹⁷ Оло нош, тӥляд потэ уже кутэмды та статьяысь визь-кенешъёсты, но кыӵе ке мугъёсын сэрен уд быгатӥське. Соку тодады возе: Иегова уг ӵошаты сое, мае тӥ со понна лэсьтӥськоды, соин, мае мукетъёсыз лэсьто. Инмар тодэ, тӥ сое яратӥськоды шуыса. Со шумпотэ, тӥ тау кариськоды шуыса дун тырон понна — солэн дуно кузьымез понна (1 Экс. 16:7; Марк 12:41—44).

18. Малы ми тау кариськомы Иеговалы но Иисус Христослы?

¹⁸ Дун тыронлы луыса гинэ Иегова милемыз простить карыны быгатэ, милям соин матысь кусыпъёсмы луыны быгато но милям пырак улыны осконмы вань. Ойдолэ котьку Иеговалы тау кареммес возьматомы дуно кузьымъёсыз но яратонэз понна (1 Иоанн 4:19). Озьы ик ойдолэ ужъёсынымы тау кареммес возьматомы Иисуслы, кудӥз милемыз туж яратэ но ми понна аслэсьтыз улонзэ сётӥз! (Иоанн 15:13).