Кыӵе инты басьтэ Иеговалэн нимыз Иисуслэн улоназ?

1, 2. а) Мар кариз Иисус кулон азяз ӝытэ? б) Кыӵе юанъёсты ми эскеромы та статьяын?

АСЬМЕ ВАКЫТЫСЬ 33-тӥ ар, 14-тӥ нисан. Пуктэ син азяды, мар луиз со бер ӝытэ. Иисус тодэ, ӝоген сое вузалозы, судить карозы, янгыше уськытозы, курадӟытозы но казнить карозы шуыса. Иисус аслаз оскымон апостолъёсыныз люкаськиз Иерусалимын, одӥг коркан. Али гинэ нимысьтыз ӝытан йылпумъяськиз. Иисус дышетскисьёсызлы трос ӟеч кылъёс вера. Собере, коркась потэмлэсь азьло, со вӧсяське. Со кулэ луись вӧсяськон гожтэмын Иоаннлэсь ӟеч иворын, 17-тӥ люкетын.

² Мар сярысь малпаськиз Иисус кулон азяз ӝытэ? Мае со нырысетӥ интые пуктӥз, музъем вылын ужакуз-тыршыкуз? Тае тодыны луэ Иисуслэн вӧсяськонысьтыз. Ойдолэ эскеромы та юанъёсты.

«МОН СООСЛЫ ТЫНЭСЬТЫД НИМДЭ ТОДМО КАРИ»

3. Мар сярысь Иисуслэн верамез потэ вал таӵе кылъёсын: «Мон соослы Тынэсьтыд нимдэ тодмо кари»? (Иоанн 17:6, 26).

³ Иисус вӧсяськиз: «Мон соослы Тынэсьтыд нимдэ тодмо кари». Вӧсяськыкуз Иисус та сярысь кык пол вераз. (Лыдӟе Иоаннлэсь 17:6, 26.) Мар сярысь солэн верамез потэ вал? Тодо вал-а солэн дышетскисьёсыз Инмарлэсь нимзэ? Тодо вал, малы ке шуоно соос еврейёс вал. Еврей Гожтэмъёсын Инмарлэн нимыз кӧня ке сюрс пол пумиськылэ. Озьыен, Иисус дышетскисьёсызлы ӧз вера, Инмарлэн нимыз — Иегова шуыса. Солэн соослы валэктэмез потэ вал, кыӵе со Иегова Инмар. Иисус Иеговаез котькинлэсь умой тодэ. Соин ик Иисус дышетскисьёсызлы юрттӥз Иеговаен умойгес тодматскыны. Со соослы Инмарлэн малпанъёсыз, ужъёсыз но сямъёсыз сярысь вералляз.

4, 5. а) Кызьы кинлэн ке но нимыз ми понна эшшо но дуно луыны быгатэ? Вералэ пример. б) Мар юрттӥз Иисуслэн дышетскисьёсызлы Иеговаен умойгес тодматскыны?

⁴ Кызьы кинлэн ке но нимыз ми понна эшшо но дуно луыны быгатэ? Пуктэ син азяды, кенешысьтыды Александр нимо тӧро — хирург шуыса. Со агаез тӥ трос аръёс тодӥськоды ини. Огпол тӥледлы ӝог эмъюрттэт кулэ луиз. Со агай тӥледлы операция лэсьтӥз но улондэс утиз. Со учыр бере, со агайлэсь нимзэ кылыса, тӥ тодады вайылоды, мар со тӥ понна лэсьтӥз. Табере Александр — тодмо тӧродылэн гинэ нимыз ӧвӧл, нош эмъясьлэн нимыз, кудӥз тӥледыз кулонлэсь утиз.

⁵ Ӵапак озьы ик Иисуслэн дышетскисьёсыз но Иеговалэсь нимзэ тодо вал ини. Но куке Иисус соослы юрттӥз Иеговаен умойгес тодматскыны, Инмарлэн нимыз соослы эшшо но дуно луиз. Малы? Малы ке шуоно Иисус котьку но ассэ Атаез сямен возиз. Куке дышетскисьёс адӟизы, кызьы Иисус дышетэ но кызьы ассэ мукет адямиосын возе, соос Иеговаен умойгес тодматскизы (Иоанн 14:9; 17:3).

«АСЛАД НИМЫД ПОННА, КУДЗЭ ТОН МЫНЫМ СЁТӤД»

6. Кызьы валано, Иегова Иисуслы аслэсьтыз нимзэ сётӥз шуыса? (Иоанн 17:11, 12, ВД).

⁶ Иисус дышетскисьёсыз понна вӧсяськиз: «Святой Атае, уть соосты аслад нимыд понна, кудзэ тон мыным сётӥд» (Иоанн 17:11, 12, ВД). Та кылъёсъя табере Иисусэз Иегова шуыса нималозы-а? Уз, малы ке шуоно Иисус шуиз: «Аслад нимыд понна». Озьыен, Иеговалэн нимыз Иисуслэн нимыз ӧз луы. Соку кызьы валано, Инмар Иисуслы аслэсьтыз нимзэ сётӥз шуыса? Нырысь ик, Иегова Иисусэз музъем вылэ ыстӥз, Иисус солэн нимыныз мед вераськоз но паймымон ужъёс мед лэсьтоз шуыса (Иоанн 5:43; 10:25). Со сяна, Иисуслэн нимыз возьматэ «Иегова — утиськон» шуыса. Озьыен, Инмарлэн но Пиезлэн нимъёссы туж герӟаськемын.

7. Малы Иисус Иеговалэн нимыныз вераськыны быгатэ вал? Вералэ пример.

⁷ Валан понна, малы Иисус Инмарлэн нимыныз вераськыны быгатэ вал, малпаськомы таӵе пример вылын. Кивалтӥсь кинэ ке, посол луыса, мукет шаере ыстыны быгатэ, отын со адями солэн нимыныз мед вераськоз шуыса. Со адямилэсь кивалтӥсьлэсь кадь кылзӥськоно. Ӵапак озьы ик, Иисусэз Иегова ыстӥз бере, Иисус Иеговалэн нимыныз вераськыны быгатэ вал (Матф. 21:9; Лука 13:35).

8. Мар кариз Иисус Иеговалэн нимыныз, музъем вылэ лыктытозяз? (Потон 23:20, 21).

⁸ Библиын Иисус Кыл шуыса нимаське, малы ке шуоно Иегова со пыр кылчинъёслы но адямиослы иворъёс вера но курон-косонъёс сётэ (Иоанн 1:1—3). Со сяна, кылчин, кудзэ Иегова косӥз луоё кыр дуннеын израиль калык сярысь сюлмаськыны, Иисус вал, дыр. Иегова калыкез со кылчинлэсь кылзӥськыны косӥз но валэктӥз: «Мынам нимы Со пушкын»a. (Лыдӟе Потонэз 23:20, 21.) Озьы Иегова валэктӥз, Иисус Иеговалэн нимыныз со ужез быдэстэ шуыса. Иисус котькинлэсь трос лэсьтӥз, Атаезлэсь нимзэ утён но чылкытатон понна.

«АТАЕ! АСЛЭСЬТЫД НИМДЭ ДАНЪЯ»

9. Кытысь адӟиське, Иеговалэн нимыз Иисуслы туж дуно вал шуыса?

⁹ Музъем вылэ лыктытозяз, Иеговалэн нимыз Иисуслы туж дуно вал. Музъем вылын улыкуз но, Иисуслэн ужъёсыз возьмато вал, Инмарлэн нимыз шоры со азьвыл сямен ик учке шуыса. Ужан-тыршонэзлэн йылпумъяськемез азьын Иисус куриз: «Атае! Аслэсьтыд нимдэ данъя». Атаез инмысен бадӟым куараен соку ик шуиз: «Данъяй ни, но эшшо но данъяло на» (Иоанн 12:28).

10, 11. а) Кызьы Иисус Иеговалэсь нимзэ данъяз? (Озьы ик учке суредэз.) б) Малы Иеговалэсь нимзэ чылкытатыны но утьыны кулэ вал?

¹⁰ Иисус ачиз но Атаезлэсь нимзэ данъя вал. Кызьы? Со Инмарлэн паймымон ужъёсыз но сямъёсыз сярысь вералляз. Со сяна, Иисус Иеговалэсь нимзэ чылкытатӥз но утизb. Иисус возьматӥз, сое лэсьтыны туж кулэ шуыса, куке дышетскисьёссэ вӧсяськыны дышетӥз. Со шуиз: «Инмысь Атаймы! Тынад нимыд дано мед луоз» (Матф. 6:9).

¹¹ Малы Иеговалэсь нимзэ чылкытатыны но утьыны кулэ вал? Малы ке шуоно Едем садын Шайтан Иеговалэсь нимзэ сантэмаз. Шайтан вераз, Иегова Адамез но Еваез пӧя но соослэсь мае ке умойзэ ватэ шуыса (Ул.-выл. 3:1—5). Озьы Шайтан Иеговаез янгыше уськытӥз, со ассэ шонертэм возе шуыса. Шайтанлэн пӧяськеменыз сэрен, адямиос малпаны быгато вал, Иегова — урод Инмар шуыса. Берлогес, Иов улон нуналъёсы, Шайтан вераз, адямиос, пайда басьтон понна гинэ, Иеговалы ужало-тыршо шуыса. Озьы ик со шуиз, одӥг адями но Иеговаез вань сюлмысьтыз уг яраты но шуг-секытъёс дыръя адямиос солы ужамысь-тыршемысь дугдозы шуыса (Иов 1:9—11; 2:4). Валан понна, кин пӧяське, Иегова яке Шайтан, дыр кулэ вал.

«МОН АСЛЭСЬТЫМ УЛОНМЕ СЁТӤСЬКО»

12. Мар лэсьтыны дась вал Иисус Иеговалэсь нимзэ яратэменыз?

¹² Иисус Иеговаез яратэ вал. Соин ик со туж тырше вал Иеговалэсь нимзэ чылкытатыны но утьыны. Иисус шуиз: «Мон Аслэсьтым улонме сётӥсько» (Иоанн 10:17, 18). Иеговалэн нимыз понна Иисус кулыны но дась валc. Нырысетӥ тырбыдэс адямиос, Адам но Ева, Иеговалэсь палэнскизы но Шайтан пала султӥзы. Нош Иисус музъем вылэ лыктӥз но возьматӥз, Атайзэ яратэ шуыса. Быдэс улонэз ӵоже Иисус Иеговалы оскымон вал (Евр. 4:15; 5:7—10). Иисусэз, юбо борды кортӵогаса виизы ке но, со Иеговалы оскымон кылиз (Евр. 12:2). Озьы со возьматӥз, Иеговаез но солэсь нимзэ яратэ шуыса.

13. Малы Иисус котькинлэсь умой возьматыны быгатэ вал, Шайтан пӧяське шуыса? (Озьы ик учке суредэз.)

¹³ Иисуслэн улонэз возьматӥз, Иегова уг пӧяськы, нош Шайтан пӧяське шуыса (Иоанн 8:44). Иисус Иеговаез котькинлэсь умой тодэ вал. Шайтанлэн верамез пӧлын мар ке но шонерез луысал ке, Иисус со сярысь тодысал. Но Иисус Иеговалы быдэсак оске вал, соин ик со самой пумозяз солэсь ӟеч нимзэ утиз. Соку но, куке малпан кылдыны быгатэ вал, Иегова Иисусэз кельтӥз шуыса, Иисус кулытозяз ик Инмарлы оскымон кылиз (Матф. 27:46)d.

«МОН ТОНЭ... ДАНО КАРИ, ТЫНЭСЬТЫД МЫНЫМ ЛЭСЬТЫНЫ СЁТЭМ УЖДЭ БЫДЭСТӤ»

14. Кызьы Иегова Иисусэз оскымон луэмез понна бакель кариз?

¹⁴ Кулон азяз уе Иисус Иеговалы шуиз: «Мон Тонэ... дано кари, Тынэсьтыд Мыным лэсьтыны сётэм уждэ быдэстӥ». Иисус юн оске вал, оскымон луэмез понна Иегова сое бакель кароз шуыса (Иоанн 17:4, 5). Озьы ик луиз. Иегова Иисусэз шайгуэ ӧз кельты (Ап. уж. 2:23, 24). Инмар аслэсьтыз Пизэ улӟытӥз но солы инмын вылӥ инты сётӥз (Флп. 2:8, 9). Дыр ортчыса, Иисус Инмарлэн Эксэйлыказ Эксэй луиз. Мар лэсьтоз со Эксэйлык? Со сярысь Иисус вераз, куке дышетскисьёссэ тазьы вӧсяськыны дышетӥз: «Тынад Эксэйлыкед мед лыктоз; Тынад эрикедъя мед луоз музъем вылын но инмын кадь ик» (Матф. 6:10).

15. Мар кароз Иисус азьланяз?

¹⁵ Ӝоген Иисус Инмарлэн тушмонъёсыныз ожмаськоз но лек адямиосты Армагеддонын быдтоз (Усьт. 16:14, 16; 19:11—16). Собере кема ик дыр уз ортчы, Иисус Шайтанэз сэрпалтоз «пыдэстэм дуннее», кытын со номыр но карыны уз быгаты ни (Усьт. 20:1—3). Сюрс ар ӵоже кивалтыкуз, Иисус музъем вылэ тупаса улон ваёз но адямиослы тырбыдэсэсь луыны юрттоз. Со кулэмъёсты улӟытоз но быдэс музъемез райлы пӧрмытоз. Соку Иеговалэн музъем пумысен малпанэз быдэсмоз! (Усьт. 21:1—4).

16. Кыӵе улон луоз Иисуслэн сюрс ар ӵоже кивалтэмез бере?

¹⁶ Пуктэ син азяды, кыӵе улон луоз Иисуслэн сюрс ар ӵоже кивалтэмез бере. Али, сьӧлыкъёсмы простить каремын мед луозы шуыса, милемлы Иисуслэн юрттэтэз кулэ. Нош сюрс ар кивалтэмез бере со кулэ уз луы ини, малы ке шуоно сьӧлык быдтэмын луоз, нош ми тырбыдэсэсь луомы. Иеговаен умой кусыпъёс возён понна, милемлы Иисуслэн но, 144 000-лэн но юрттэтсы кулэ уз луы ини. «Самой пумаз быдтэмын луоз кулон». Кулэмъёс улӟытэмын луозы. Музъем вылысь вань адямиос сьӧлыктэмесь луозы (1 Кор. 15:25, 26).

17, 18. а) Мар лэсьтэмын луоз Иисуслэн сюрс ар ӵоже кивалтэмез бере? б) Мар кароз Иисус кивалтэмез йылпумъяськем бере? (1 Коринфъёслы 15:24, 28). (Озьы ик учке суредэз.)

¹⁷ Мар эшшо лэсьтэмын луоз на Иисуслэн сюрс ар ӵоже кивалтэмез бере? Котькин оскоз, Иегова — святой но шонерлыко Инмар шуыса. Малы? Едем садын Шайтан вераз, Иегова адямиосты пӧя но яратытэк соосын кивалтэ шуыса. Озьы ке но котьку вал адямиос, кудъёсыз Иеговаез мур гажазы но ужъёсынызы возьматӥзы, Инмарлэн кивалтэмез самой умой шуыса. Иисуслэн сюрс ар ӵоже кивалтэмез бере Иеговалэн нимыз быдэсак чылкытатэмын луоз. Инмар возьматоз, со яратӥсь инмысь Атай шуыса.

¹⁸ Иисуслэн сюрс ар ӵоже кивалтэмез бере котькин тодоз, Шайтан Иегова сярысь пӧяськиз шуыса. Мар кароз Иисус кивалтэмез йылпумъяськем бере? Шайтан сямен, со Иеговалы пумит ӝутскоз-а? Уз. (Лыдӟе 1 Коринфъёслы 15:24, 28.) Иисус кивалтэтсэ Атаезлы берыктоз но Иеговалэсь кылзӥськыса улоз. Иисус дась кивалтэтсэ Атаезлы берыктыны, малы ке шуоно сое яратэ.

19. Кыӵе инты басьтэ вал Иеговалэн нимыз Иисуслэн улоназ?

¹⁹ Табере валамон, малы Иеговалэн Иисуслы аслэсьтыз нимзэ сётэмез потӥз. Инмар аслэсьтыз Пизэ аслаз нимыныз ыстӥз. Иисус солы сётэм ужез туж умой быдэстӥз. Та статьяысь ми тодӥмы, Иисус понна Иеговалэн нимыз — самой дуноез шуыса. Солэн нимыз понна со аслэсьтыз улонзэ сётӥз, нош сюрс ар ӵоже кивалтэмез бере кивалтэтсэ шумпотыса Иеговалы берыктоз. Кызьы милям Иисуслэсь адӟем кареммы луэ? Сое ми вуоно статьяысь тодомы.