Утчалэ «вуонозэ дормес»

1. Мар Иерусалимен луыны кулэ вал, Иисуслэн верамезъя?

КӦНЯ ке нунал кулэмезлэсь азьвыл Иисус кулэ луись азьпалзэ ивортон вераз. Со дышетскисьёсызлы шуиз, куке соос адӟозы, Иерусалим солдатъёсын котыртэмын шуыса, соослы Иудеяысь соку ик пегӟоно луоз шуыса (Лука 21:20—22).

2. Кызьы апостол Павел Иудеяысь но Иерусалимысь христианъёсты вуоно югдуръёслы дасяз?

² Иисуслэн кылъёсыз быдэсмизы. Иерусалимез рим солдатъёс котыртӥзы. Но кӧня ке ар солэсь азьвыл Павел Иудеяысь но Иерусалимысь христианъёслы гожтэт гожтӥз. Али со Еврейёслы гожтэт шуыса нимаське. Со гожтэтын Павел агайёслы но сузэръёслы курон-косонъёс сётӥз, кудъёсыз соосты вуоно югдуръёслы дасязы. Кыӵе югдуръёслы? Азьланяз Иерусалимез куашкан возьма вал. Иерусалимен ӵош медам быре шуыса, христианъёс отысь кошкыны кулэ вал. Со понна соослы улон интызэс но ужзэс кельтоно вал. Павел Иерусалим сярысь гожтӥз: «Татын уго пырак ӵоже улоно дормы ӧвӧл». Но ватсаз: «Вуонозэ дормес утчаны тыршиськомы» (Евр. 13:14).

3. Мае возьматэ город, кудӥз «бырисьтэм инъет вылэ» пуктэмын, но малы ми сое возьмаськомы?

³ Иерусалимысь но Иудеяысь кошкыкузы, христианъёсты серекъязы, вылды. Но кошкыса соос утиськыны быгатӥзы. Туннэ но милемыз мыскыл каро, малы ке шуоно ми ум малпаське, коньдон но адямиос вань шуг-секытъёсты сэрттыны-пертчыны быгато шуыса. Нош мар вылэ ми оскиськиськомы? Ми тодӥськомы, та лек дунне быдтэмын луоз шуыса. Соин ик ми возьмаськомы городэз, кудӥз «бырисьтэм инъет вылэ» пуктэмын,— Инмарлэсь Эксэйлыксэa (Евр. 11:10; Матф. 6:33). Та статьяын ми эскеромы: 1) кызьы Павел нырысетӥ даурысь христианъёслы юрттӥз «вуонозэ дорзэс» возьманы, 2) кызьы Павел соосты вуоно югдуръёслы дасяз но 3) кызьы солэн визь-кенешъёсыз милемлы юрттыны быгато.

ИЕГОВА ВЫЛЭ ОСКИСЬКЕ —СО ТӤЛЕДЫЗ НОКУ УЗ КЕЛЬТЫ

4. Малы Иерусалим христианъёслы дуно вал?

⁴ Иерусалим христианъёслы туж дуно вал. Асьме вакытысь 33-тӥ арын отын христиан кенеш кылдытэмын вал. Озьы ик кивалтӥсь кенешысь агайёс со карын улӥзы. Со сяна, тросэз христианъёслэн Иерусалимын коркаоссы но мукет ваньбурзы вал. Но Иисус дышетскисьёсызлы азьло ик вераз, соослы Иерусалимысь гинэ пегӟоно уз луы, Иудеяысь но пегӟоно луоз шуыса (Матф. 24:16).

5. Кызьы Павел христианъёсты вуоно югдуръёслы дасяз?

⁵ Павеллэн потэ вал, христианъёс дась мед луозы шуыса солы, мар Иерусалимез возьма вал. Соин ик со соослы валэктӥз, кызьы Иегова учке та город шоры. Апостол Павел христианъёслы тодазы вайытӥз, Инмар Иерусалимысь храмез, священникъёсты но курбонъёсты святоен уг лыдъя ни шуыса (Евр. 8:13). Иерусалимын тросэз улӥсьёс Мессияез палэнтӥзы но Иеговалы йыбыртъян понна храме ӧз ветлэ ни. Ӝоген храм но Иерусалим куашкатэмын луыны кулэ вал (Лука 13:34, 35).

6. Малы Павеллэн визь-кенешъёсыз, кудъёсыз гожтэмын Еврейёслы 13:5, 6, туж дырыз дыръя сётэмын вал?

⁶ Куке Павел Еврейёслы гожтэтэз гожтӥз, Иерусалим улон понна туж умой город вал. Со вакытэ улӥсь Римысь тодосчи вераз, Иерусалим «Шундыӝужан палась самой умой город вал шуыса». Пӧртэм шаеръёсын улӥсь еврейёс отчы арлы быдэ ортчылӥськись праздникъёсы ветлӥзы. Соин ик Иерусалим туж узыр город вал. Иерусалимын ужаса, христианъёс бадӟым уждун басьтыны быгато вал. Соин, дыр, Павел соослы вераз: «Коньдонэз яратӥсесь эн луэ, марды вань, соин кӧтты мед тыроз». Собере Павел вераз Иеговалэсь кылъёссэ, кудъёсыз котькуд ужась-тыршисьсэ юнматыны быгато: «Уг кельты тонэ, уг кушты тонэ» (лыдӟе Еврейёслы 13:5, 6; К. Зак. 31:6; Пс. 117:6). Та визь-кенешъёс Иерусалимын но Иудеяын улӥсь христианъёслы туж дырыз дыръя сётэмын вал. Малы? Малы ке шуоно ӝоген соослы улон интыоссэс, умой ужзэс но вань ваньбурзэс кельтоно луиз но, тодмотэм интые кошкыса, ваньзэ выльысен кутсконо луиз.

7. Малы али ик ини Иегова вылэ оскиськыса улоно?

⁷ Малы ми дышетскиськомы. Нош мар возьма милемыз? «Бадӟым куректон» но та дуннелэн пумыз (Матф. 24:21). Соин ик сак улоно но вуоно югдуръёслы дась луоно (Лука 21:34—36). Оло нош, бадӟым куректон дыръя милемлы вань улэм-вылэммес кельтоно луоз. Соку милемлы тужгес но осконо луоз, Иегова милемыз ноку уз кельты шуыса. Но Иегова вылэ оскиськыны али ик ини кулэ. Соин ик юалэ асьтэлэсь: «Возьмато-а мынам ужъёсы но пуктэм ужпумъёсы, коньдон вылэ оскиськем интые, мон Иегова вылэ оскиськисько шуыса?» (1 Тим. 6:17). Нырысетӥ даурысь христианъёс шоры учкыса, ми дышетскиськомы секыт дыръя Инмарлы оскымон кыльыны. Но милемыз возьма бадӟым куректон, кыӵеез дунне вылын ноку ӧй вал на. Кытысь ми соку тодомы, кызьы асьмеды возёно?

КЫЛЗӤСЬКЕ СООСЛЭСЬ, КИНЪЁС ТӤЛЕДЛЫ КИВАЛТЭТ СЁТО

8. Кыӵе кивалтэт сётӥз Иисус аслаз дышетскисьёсызлы?

⁸ Павеллэсь гожтэтсэ басьтэмзы бере кӧня ке ар ортчыса, христианъёс адӟизы, рим солдатъёс Иерусалимез котыртӥзы шуыса. Агайёс но сузэръёс валазы, соослы пегӟоно шуыса, малы ке шуоно Иерусалим ӝоген куашкатэмын луоз (Матф. 24:3; Лука 21:20, 24). Со сярысь, кытчы пегӟоно, Иисус шуиз: «Соку Иудея музъеме учырамъёс гурезьёсы мед пегӟозы» (Лука 21:21). Но Иудея палан трос гурезьёс вал. Соку кыӵе гурезьёсы соослы пегӟыны кулэ вал?

9. Малы христианъёс нырысь ӧз тодэ, вылды, кыӵе гурезьёсы пегӟоно? (Озьы ик учке мутусэз.)

⁹ Тани кытчы христианъёс пегӟыны быгато вал: Самарияысь гурезьёс, Галилей гурезьёс, Ермон гурезь, Ливан гурезьёс но Иорданлэн мукет палаз интыяськем гурезьёс. (Учке мутусэз.) Та гурезьёсысь куд-ог каръёсын адямиос кышкатэк уло вал. Кылсярысь, Га́мла кар интыяськемын вал ӝужыт гурезьлэн меӵ бамаз. Отчы вуыны туж секыт вал. Соин ик кин ке но малпаны быгатэ вал, отчы пегӟоно шуыса. Но берлогес Римын улӥсьёс Гамла карын улӥсь еврейёс вылэ урдскизы но туж трос адямиосты виизыb.

10, 11. а) Кызьы, вылды, Иегова христианъёслы кивалтэт сётӥз? (Еврейёслы 13:7, 17). б) Малы христианъёслы кылзӥськоно вал соослэсь, кинъёс соослы кивалтэт сётӥзы? (Озьы ик учке суредэз.)

¹⁰ Кулэ луись кивалтэт Иегова христианъёслы агайёс пыр сётӥз, дыр. История удысысь Евсе́вий Памфи́л нимо тодосчи берлогес та вакыт сярысь гожъяз. Солэн верамезъя, Инмар Иерусалимысь агайёслы кивалтэт сётӥз, христианъёслы Иерусалимез кельтоно но Переяын интыяськем Пеллае кошконо шуыса. Пегӟон понна Пелла туж умой тупа вал. Со Иерусалимлэсь кыдёкын интыяськемын ӧй вал бере, отчы мыныны туж ик секыт ӧй вал. Озьы ик Пеллаын тросэз улӥсьёс еврейёс ӧй вал, соин ик соос рим ожгарчиосын ӧз ожмаське.

¹¹ Христианъёс, кудъёсыз кылзӥськизы Павеллэн визь-кенешезлэсь но агайёс пыр сётэм кивалтэтлэсь, гурезьёсы пегӟизы. (Лыдӟе Еврейёслы 13:7, 17.) Талы луыса соос улэп кылизы. Иегова ӧз кельты соосты, кинъёс возьмазы «бырисьтэм инъет вылэ пуктэм городэз» — Инмарлэсь Эксэйлыксэ (Евр. 11:10).

12, 13. Вералэ, кызьы Иегова нуэ аслэсьтыз калыксэ секыт дыръя.

¹² Малы ми дышетскиськомы. Иегова аслаз калыкезлы кивалтэт сётэ агайёс пыр. Библиын трос гожтэмын со сярысь, кызьы туж секыт дыръя Иегова аслэсьтыз калыксэ оскымон пиосмуртъёс пыр нуиз (К. Зак. 31:23; Пс. 76:21). Туннэ но Иегова озьы ик лэсьтэ.

¹³ Кылсярысь, COVID-19 пандемия кутскем бере кивалтӥсь кенеш быдэс дунне вылысь кенешъёслы кивалтэт сётӥз. Тӧроослы валэктӥзы, кызьы сыӵе вакытэ пумиськонъёс ортчытъяно но тодытоно. Нош пандемиялэн кутскемез бере кӧня ке толэзь ортчыса гинэ, ми 500-лэсь тросгес кылъёсын конгресс ортчытӥмы. Агайёс но сузэръёс сое интернет но телевизор пыр учкизы, озьы ик радио пыр кылзӥзы. Азьвыл сыӵе конгрессмы милям ноку ӧй вал! Со вакытэ но ми духовной сиёнтэк ӧм кыле. Соин ик быдэс дунне вылысь агайёс но сузэръёс одӥг кивалтэт басьтӥзы. Ми оскиськомы, маин гинэ азьланяз медам пумиське, Иегова агайёслы визьмо ужпумъёс кутыны юрттоз шуыса. Та лек дуннелы пум вуыку улэп кылён понна, милемлы Иегова вылэ оскиськоно но солэсь кылзӥськоно. Нош мар эшшо кароно на, бадӟым куректонлы дась луон понна?

ОГДЭС ОГДЫ АГАЙ-ВЫНЪЁС КАДЬ ЯРАТЭ НО КУНО КАРЕ

14. Кыӵе сямо луоно вал христианъёслы, кудъёсыз Иерусалимлэн куашканэз азьын улӥзы? (Еврейёслы 13:1—3).

¹⁴ Бадӟым куректон кутскыку, милемлы эшшо но кулэ луоз ог-огмылы яратонмес возьматыны. Ми быгатӥськомы адӟем карыны Иерусалимын но Иудеяын улӥсь христианъёслэсь. Соос котьку ог-огзэс яратӥзы (Евр. 10:32—34). Но Иерусалим куашкан азьын соослы эшшо но кулэ вал ог-огзэс яратыны но куно карыны. (Лыдӟе Еврейёслы 13:1—3.)c Милемлы но асьмеды озьы ик возьыны тыршоно, малы ке шуоно та дуннелэн пумыз туж матын ини.

15. Малы Иерусалимысь пегӟемзы бере христианъёслы ог-огзэс агай-вынъёс кадь яратоно вал но ог-огзылы ӟеч ужъёс лэсьтоно вал?

¹⁵ Куке рим солдатъёс Иерусалим котырысь кошкизы, христианъёс пегӟыны быгатӥзы. Соослы ӝегатскытэк кошконо вал бере, соос трос арбериос сьӧразы басьтыны ӧз быгатэ (Матф. 24:17, 18). Соин ик соослы, Пеллае мыныкузы но, отчы вуэмзы бере но юрттэт кулэ вал. «Ёрмыса улӥсьёс» трос вал, дыр (Тит. 3:14). Агайёслы но сузэръёслы сиён-юон, дӥськут но улон инты кулэ вал. Ог-огзылы юрттӥськыса, христианъёс юн яратэмзэс возьматӥзы.

16. Кызьы милям яратэммес возьматэммы луэ агайлы яке сузэрлы, кудӥзлы юрттэт кулэ? (Озьы ик учке суредэз.)

¹⁶ Малы ми дышетскиськомы. Ми агайёсмес но сузэръёсмес яратӥськомы. Соин ик, соослы мар ке но кулэ ке, ми соослы юрттыны тыршиськомы. Кылсярысь, берло дыре трос Адӟись-Ивортӥсьёс ожмаськонъёс яке инкуазь шимучыръёс сэрен улон интыоссэс кельтоно луизы. Ми соку ик тыршиськомы соослы улон понна ваньзэ кулэзэ сётыны но соосты юнматыны, соос Иеговалы ужамысь-тыршемысь медаз дугдэ шуыса. Тани мар шуиз Украинаысь одӥг сузэр, кудӥз ожмаськон сэрен дорысьтыз кошконо луиз: «Ми шӧдӥмы, кызьы Иегова милемыз валтэ но агайёс пыр милемлы юрттэ. Кытын гинэ ми медам луэ, асьме шаерамы, Венгриын, нош али Германиын, котькытын огъя оскисьёсмы милемыз пумитазы но милемлы юрттӥзы!» Куке ми агайёсмы но сузэръёсмы сярысь сюлмаськиськомы но соосты куно кариськомы, ми пыр Иегова соос сярысь сюлмаське (Мад. 19:17; 2 Кор. 1:3, 4).

17. Малы али ик ини кулэ дышетскыны ог-огмес вын-агайёс кадь яратыны но куно карыны?

¹⁷ Бадӟым куректон дыръя ог-огмылы юрттыны эшшо но кулэ луоз (Авв. 3:16—18). Соин Иегова туннэ ик ини милемыз дышетэ ог-огмес вын-агайёс кадь яратыны но куно карыны, малы ке шуоно со секыт вакытэ со туж кулэ луоз.

МАР МИЛЕМЫЗ ВОЗЬМА АЗЬПАЛАН

18. Кызьы милям адӟем кареммы луэ Иерусалимысь но Иудеяысь христианъёслэсь, кудъёсыз нырысетӥ даурын улӥзы?

¹⁸ Христианъёс, кудъёсыз Иерусалимысь кошкизы но гурезьёсы пегӟизы, утиськизы. Соос Иерусалимез кельтӥзы, нош Иегова соосты ӧз кельты. Малы та милемыз дышетэ? Ми пыр-поч ум тодӥське, кыӵе югдур луоз азьланяз. Но ми тодамы возиськомы Иисуслэсь кылъёссэ: «Тӥ но дась луэ» (Лука 12:40). Озьы ик ми малпаськиськомы Еврейёслы гожтэт вылын. Павеллэн визь-кенешъёсыз, кудъёссэ со нырысетӥ даурысь христианъёслы сётӥз, туннэ но пайда вайыны быгато. Со сяна, Иегова оскытэ, милемыз ноку уз кельты шуыса (Евр. 13:5, 6). Ойдолэ азьланяз но Инмарлэсь Эксэйлыксэ возьмаломы. Соку ми пырак дауръёс ӵоже бакель каронъёс басьтыса уломы (Матф. 25:34).