Кыӵе инты басьтэ Иеговалэн нимыз милям улонамы?

1, 2. Кытысь адӟиське, Иеговалэн нимыз — Иисус понна самой валтӥсез шуыса?

ИЕГОВАЛЭН нимыз — Иисус понна самой валтӥсез. Иисус котькинлэсь трос лэсьтӥз, Атаезлэсь нимзэ мукетъёсызлы усьтон понна. Кызьы ми тодӥмы кылем статьяысь, Иегова святой но со ваньзэ шонер лэсьтэ шуыса возьматон понна, Иисус аслэсьтыз улонзэ сётӥз (Марк 14:36; Евр. 10:7—9). Сюрс ар ӵоже кивалтэмез бере Иисус кивалтэтсэ Иеговалы сётоз, малы ке шуоно солэн потэ, Атаез ваньмыз понна данъямын мед луоз шуыса (1 Кор. 15:26—28). Иисус Иеговалэсь нимзэ туж гажа. Та возьматэ, со аслэсьтыз Атайзэ туж яратэ шуыса.

² Иисус музъем вылэ Иеговалэн нимыныз лыктӥз (Иоанн 5:43; 12:13). Со та нимез аслаз дышетскисьёсызлы усьтӥз (Иоанн 17:6, 26). Иисус дышетӥз но паймымон ужъёс лэсьтылӥз Атаезлэн нимыныз (Иоанн 10:25). Озьы ик Иисус Иеговалы вӧсяськиз, со дышетскисьёссэ мед утёз шуыса. Соку но Иисус Атайзэ куриз сое аслаз нимыныз лэсьтыны (Иоанн 17:11). Адӟиське, Атаезлэн нимыз Иисус понна туж дуно вал. Соин ик, кин ке но Атаезлэсь нимзэ уг тоды но уже уг куты ке, со Иисуслэн зэмос дышетскисез луыны уг быгаты.

3. Мае ми эскеромы та статьяын?

³ Ми христианъёс бере, ми котьма ласянь Иисуслэсь адӟем кариськомы (1 Пётр 2:21). Соин ик ми Атаезлэсь нимзэ яратӥськомы но гажаськомы. Та статьяысь ми тодомы, малы соос, кинъёс Эксэйлык сярысь ӟеч иворез иворто, Иеговалэсь нимзэ нулло (Матф. 24:14). Озьы ик ми эскеромы, кыӵе инты басьтыны кулэ та ним милям улонамы.

«АСЛЭСЬТЫЗ НИМЗЭ НУЛЛӤСЬ КАЛЫК»

4. а) Кыӵе уж сётӥз Иисус аслаз дышетскисьёсызлы инме берытскемезлэсь азьло? б) Мае ми тодомы азьланяз?

⁴ Инме берытскемезлэсь азьло Иисус дышетскисьёсызлы шуиз: «Тӥ вылэ Святой Дух васькоз но, тӥ кужым басьтоды. Иерусалимын но, быдэс Иудеяын но, Самарияын но, быдэс музъемлэн пумысеныз пумозяз ик Мынам адӟисьёсы-ивортӥсьёсы тӥ луоды» (Ап. уж. 1:8). Та возьматэ вал, дыр ортчыса, ӟеч ивор Израиль сьӧрын вӧлмоз но пӧртэм калыкъёсысь адямиос Иисуслэн дышетскисьёсыз луыны быгатозы шуыса (Матф. 28:19, 20). Иисус шуиз: «Мынам адӟисьёсы-ивортӥсьёсы тӥ луоды». Возьматэ вал-а та, выль дышетскисьёс Иисуслэн гинэ адӟись-ивортӥсьёсыз луозы шуыса? Яке соослы Иеговалэсь но нимзэ тодыны кулэ луоз? Тае валаны юрттоз Апостолъёслэн ужъёссы книгаысь 15-тӥ люкет.

5. Кызьы Иерусалимысь апостолъёслэн но тӧроослэн пумиськонзы валаны юрттӥз, вань адямиос Иеговалэсь нимзэ тодыны кулэ шуыса? (Озьы ик учке суредэз.)

⁵ Асьме вакытысь 49-тӥ арын Иерусалимысь апостолъёс но тӧроос люкаськизы, кулэ луись юанэз эскерон понна: кулэ-а мукет калыкъёсысь адямиослы, кудъёсызлэн христианъёс луэмзы потэ, вандӥськон сямез ортчыны? Пумиськонзылэн пумаз Иаков, Иисуслэн выныз, вераз: «[Пётр] валэктӥз, кызьы Инмар азьвыл ик язычникъёс пумысен сюлмаськиз, Аслэсьтыз нимзэ нуллӥсь калык кылдытон понна соос пӧлысь адямиосты люказ». Кыӵе ним сярысь вераз Иаков? Тае валаны юрттэ Амослэн азьпалзэ ивортонэз, кудӥз сярысь Иаков берлогес шуиз: «Мукет адямиос но, вань калыкъёс но, кинъёс пушкын Мынам нимы тодытэмын луоз, мед утчалозы Кузё-Инмарез,— тае лэсьтӥсь Кузё-Инмар шуэ» (Ап. уж. 15:14—18). Озьыен, выль дышетскисьёслы, Иеговалэсь нимзэ тодэм сяна, Кузё-Инмарез утчаны, яке солэсь нимзэ нуллыны кулэ вал. Та возьматэ вал, соос мукет адямиосты Инмарлэн нимыныз тодматозы но соосты солэсь адӟись-ивортӥсьёссэ кадь тодозы шуыса.

6, 7. а) Малы Иисус музъем вылэ лыктӥз? б) Кыӵе эшшо но кулэ луись ужпумез вал Иисуслэн?

⁶ Иисуслэн нимыз возьматэ, «Иегова — утиськон» шуыса. Иисус пыр Иегова уте котькинэ, кин солы но солэн Пиезлы оске. Иисус музъем вылэ лыктӥз адямиос понна улонзэ сётыны (Матф. 20:28). Солы луыса Иегова быгатэ сьӧлыкъёсмес простить карыны но милемлы пырак улон кузьманы (Иоанн 3:16).

⁷ Малы Иисуслы адямиос понна улонзэ сётоно вал? Со герӟаськемын соин, мар луиз Едем садын. Кызьы вераськиз ини кылем статьяын, Адам но Ева Иеговалы пумит ӝутскизы но пырак улыны луонлыксэс ыштӥзы (Ул.-выл. 3:6, 24). Но Иисус, адямиосты утён понна гинэ, музъем вылэ ӧз лыкты. Солэн эшшо но кулэ луись ужпумез вал — Инмарлэсь нимзэ чылкытатыны. Шайтан Инмарлэсь нимзэ саптаз (Ул.-выл. 3:4, 5). Соин ик вань адямиослы тодыны кулэ, Инмар ваньзэ шонер лэсьтэ но со яратӥсь Атай шуыса. Иисус Иеговалэн нимыныз лыктӥз но ваньзэ солэн эрикезъя лэсьтӥз бере, со котькинлэсь умой Иеговалэсь нимзэ чылкытатыны быгатӥз.

8. Мае валаны кулэ вал Иисуслэн вань дышетскисьёсызлы?

⁸ Иисуслэн вань дышетскисьёсызлы — еврейёслы но, мукет калыкъёсысь адямиослы но,— валаны кулэ вал, Иегова Инмар утьыны быгатэ шуыса (Иоанн 17:3). Озьы ик, Иисус сямен, соослы Иеговалэсь нимзэ нуллоно вал. Со сяна, соослы валано вал, макем кулэ Инмарлэсь нимзэ чылкытатыны. Соку гинэ соос утиськыны быгатысалзы (Ап. уж. 2:21, 22). Соин ик котькинлы, кинлэн Иисуслэн дышетскисез луэмез потэ вал, Иисус сярысь но, Иегова сярысь но тросгес тодоно вал. Паймонэз ӧвӧл, малы вӧсяськонэзлэн пумаз Иисус шуиз: «Мон соослы Тынэсьтыд нимдэ тодмо кари, эшшо но тодмогес каро на. Тынад Монэ яратонэд соос бордын но мед улоз, нош Мон соос бордын уло» (Иоанн 17:26).

«ТӤ... МЫНАМ АДӞИСЬЁСЫ»

9. Мар кароно Иисуслэн вань зэмос дышетскисьёсызлы?

⁹ Иисуслэн вань зэмос дышетскисьёсызлы Иеговалэсь нимзэ чылкытатоно (Матф. 6:9, 10). Мукет нимъёс сярысь, Иеговалэн нимыз милемлы самой дуно. Кызьы милям Иеговалэсь нимзэ чылкытатэммы но возьматэммы луэ, ваньмыз, мар вера Шайтан Инмармы сярысь, зэм ӧвӧл шуыса?

10. Кыӵе суд сярысь вераське Исаиялэн книгаысьтыз 42-тӥысен 44-тӥ люкетозь? (Исаия 43:9; 44:7—9). (Озьы ик учке суредэз.)

¹⁰ Исаиялэн книгаысьтыз 42-тӥысен 44-тӥ люкетозь лыдӟыса, тодыны луэ, кызьы милям Иеговалэсь нимзэ чылкытатэммы луэ. Отын вераське суд сярысь, кудаз эскериське кулэ луись юан: кин со зэмос Инмар? Иегова ӵектэ ваньмызлы, кинъёс асьсэды инмаръёсын лыдъяло, возьматыны, соос инмаръёс шуыса. Озьы ик Инмар соослэсь юа, вань-а адӟисьёс, кудъёсыз соослы дур басьтысалзы. Но сыӵе адӟисьёс ӧвӧл! (Лыдӟе Исаиялэсь 43:9; 44:7—9.)

11. Мар вера Иегова аслаз ужась-тыршисьёсызлы, Исаиялэн 43:10—12 лыдэ басьтыса?

¹¹ Лыдӟе Исаиялэсь 43:10—12. Иегова ужась-тыршисьёсызлы вера: «Мон — Инмар, тӥ... адӟисьёс луиськоды». Иегова соослэсь юа: «Мон сяна, мукет Инмар вань на-а?» (Ис. 44:8). Милемлы бадӟым дан висъямын — та юанлы валэктон сётыны. Кылъёсынымы но ужъёсынымы ми возьматӥськомы, Иегова — одӥг гинэ зэмос Инмар шуыса. Солэн нимыз, мукет нимъёс сярысь, вылӥгес. Улонэнымы ми возьматӥськомы, Иеговаез зэм но яратӥськомы шуыса. Кызьы гинэ Шайтан ми вылэ медам зӥбы, ми Иеговалы оскымон кылиськомы. Озьы ми Инмарлэсь нимзэ чылкытатӥськомы.

12. Кызьы быдэсмиз азьпалзэ ивортон, кудӥз гожтэмын Исаиялэн 40:3, 5?

¹² Озьы ик Исаия пророклэн верамезъя, луоз со, кин «Кузё-Инмарлы сюрес» дасялоз (Ис. 40:3). Кызьы быдэсмиз та азьпалзэ ивортон? Иоанн Пылатӥсь Иисуслы сюрес дасяз. Но вераны луоз, со Иеговалы сюрес дасяз шуыса, малы ке шуоно Иисус лыктӥз но Иеговалэн нимыныз вераськиз (Матф. 3:3; Марк 1:2—4; Лука 3:3—6). Со ик азьпалзэ ивортонын гожтэмын: «Кузё-Инмарлэн данэз лыктоз» (Ис. 40:5). Кызьы быдэсмизы та кылъёс? Иисусэз музъем вылэ Иегова ыстӥз. Иисус солы сётэм ужез туж умой быдэстӥз. Со шоры учкыса, адямиос валаны быгато вал, кызьы ассэ возьысал Иегова, со ачиз музъем вылэ лыктысал ке (Иоанн 12:45).

13. Кызьы милям Иисуслэсь адӟем кареммы луэ?

¹³ Иеговалэсь ӟеч нимзэ утьыса, ми Иисус Христослэсь адӟем кариськомы. Иисус сямен, ми но Иеговалэн адӟись-ивортӥсьёсыз луиськомы. Ми Инмарлэсь нимзэ нуллӥськомы но котькинлы солэн паймымон ужъёсыз сярысь вераськомы. Со сяна, ми адямиослы вераны кулэ, мар кариз Иисус, Инмарлэсь нимзэ чылкытатон понна (Ап. уж. 1:8). Иисус — Иеговалэн валтӥсь Адӟись-Ивортӥсез, нош ми Иисуслэсь адӟем кариськомы (Усьт. 1:5). Озьыен, ойдолэ эскеромы, кыӵе инты басьтэ Иеговалэн нимыз милям улонамы.

КЫӴЕ ИНТЫ БАСЬТЭ ИЕГОВАЛЭН НИМЫЗ МИЛЯМ УЛОНАМЫ

14. Псалтирез 104:3 лыдэ басьтыса, кызьы ми учкиськомы Иеговалэн нимыз шоры?

¹⁴ Ми данъяськыса Иеговалэн нимыз сярысь вераськомы. (Лыдӟе Псалтирез 104:3.) Иеговалэн потэ, ми соин мед ушъяськомы шуыса (Иер. 9:23, 24; 1 Кор. 1:31; 2 Кор. 10:17). Соос, кинъёс Иеговаен ушъясько, данъясько, со соослэн Инмарзы шуыса. Ми понна бадӟым дан — Иеговалэсь ӟеч нимзэ утьыны но ваньмызлы вераны, со — святой Инмар шуыса. Милемлы ноку но возьыт луыны кулэ ӧвӧл ӵош ужасьёсмылы, ӵош дышетскисьёсмылы, бускельёсмылы но мукет адямиослы вераны, ми Иеговалэн Адӟись-Ивортӥсьёсыз шуыса. Шайтанлэн потэ, ми адямиосты Инмарлэн нимыныз тодматэмысь мед дугдомы шуыса (Иер. 11:21; Усьт. 12:17). Шайтанлэн но со сьӧры мынӥсьёслэн потэ, адямиос Иеговалэсь нимзэ мед вунэтозы шуыса (Иер. 23:26, 27). Нош ми солэсь нимзэ яратӥськомы но котькуд тупась учыре сое данъяськомы (Пс. 5:12; 88:17).

15. Мар кароно, Иеговалэн нимызлы вазиськон понна?

¹⁵ Ми Иеговалэн нимызлы вазиськиськомы (Иоиль 2:32; Рим. 10:13, 14). Иеговалэн нимызлы вазиськон понна, сое тодыны но солы нимызъя вазиськыны гинэ тырмыт ӧвӧл. Ми Инмарез умой тодӥськомы, солы оскиськомы но солэсь юрттэт но визь-кенеш куриськомы (Пс. 19:8; 98:6; 114:4; 144:18). Озьы ик ми мукетъёсызлы вераськомы, кызьы солэн нимыз но макем паймымон со Инмар. Ми адямиослы юрттӥськомы воштӥськыны, соос Иеговаез шумпоттыса улыны но утиськыны мед быгатозы шуыса (Ис. 12:4; Ап. уж. 2:21, 38).

16. Кызьы милям возьматэммы луэ, Шайтан пӧяське шуыса?

¹⁶ Иеговалэн нимыз понна ми шуг-секытъёсты но чиданы дась (Иак. 5:10, 11). Секыт дыръя Иеговалы оскымон кыльыса, ми возьматӥськомы, Шайтан пӧяське шуыса. Иов улон нуналъёсы Шайтан Инмарлэсь ужась-тыршисьёссэ тазьы янгыше уськытӥз: «Аслаз улонэз понна адями сётоз ваньзэ, маиз солэн вань» (Иов 2:4). Шайтан вераз, адямиос Иеговалы умой дыръя гинэ ужало-тыршо, нош секыт дыръя соос соку ик сое кельтозы шуыса. Иов возьматӥз, со озьы ӧвӧл шуыса. Милям но сое возьматэммы луэ. Кызьы гинэ Шайтан милемлы люкетыны медам тыршы, ми ноку но Иеговалэсь ум палэнске. Ми юн оскыны быгатӥськомы, аслаз нимыз понна Иегова милемыз утёз шуыса (Иоанн 17:11).

17. Кызьы ми быгатӥськомы Иеговалэсь нимзэ данъяны, 1 Пётрлэсь 2:12 лыдэ басьтыса?

¹⁷ Ми туж тыршиськомы Иеговалэсь нимзэ данъяны (Мад. 30:9; Иер. 7:8—11). Ми Иеговалэсь нимзэ нуллӥськомы. Озьыен, милям ужъёсмы солэсь нимзэ яке данъяны, яке саптаны быгато. (Лыдӟе 1 Пётрлэсь 2:12.) Соин ик ми тыршиськомы чакланы, кызьы асьмеды возиськомы но мар вераськомы. Ми сьӧлыкоесь ке но, ми тыршиськомы лэсьтыны ваньзэ, мае быгатӥськомы, Иеговалэсь нимзэ данъян понна.

18. Кызьы эшшо милям возьматэммы луэ, Иеговалэн нимыз ми понна дуно шуыса? (Озьы ик учке сноскаез.)

¹⁸ Милям ӟеч ниммы сярысь, Иеговалэн нимыз ми понна дуногес (Пс. 137:2). Ми Иеговаез яратӥськомы. Милям солэн законъёсызъя улэммы потэ. Ӵем дыръя котырысьтымы адямиослы со уг кельшы, соин ик соос ми сярысь уродзэ вералоa. Иисусэз йыруж лэсьтӥсез кадь судъязы. Адямиос сое адӟемпотостэм каризы. Но, Иеговалэсь нимзэ данъян понна, со кулыны но дась вал. Со ӧз кышка сантэманлэсь, яке мултэс ӧз сюлмаськы со понна, мар со сярысь адямиос малпалозы (Евр. 12:2—4). Нырысь ик Иисуслэн Иеговаез кылзӥськемез потэ вал (Матф. 26:39).

19. Кызьы тӥ учкиськоды Иеговалэн нимыз шоры но малы?

¹⁹ Ми данъяськиськомы, Иеговалы ужаськомы-тыршиськомы шуыса. Солэн Адӟись-Ивортӥсьёсыз луыны — ми понна бадӟым дан. Солэн нимыз понна ми котьмае чиданы дась. Милям ниммы сярысь, Иеговалэн нимыз милемлы дуногес. Соин ик, кызьы гинэ Шайтан милемлы медам люкеты, ойдолэ азьланяз но Инмармылэсь нимзэ данъяломы. Озьы ми возьматомы, Иисуслы кадь ик, милемлы Иеговалэн нимыз котьмалэсь дуно шуыса.