Февраль

Хизқия падиша еғир кесәл билән ағриғанда, Йәһваға дуа қилип, кесилидин сақийишини өтүнгән. Йәһва Худа униң дуасиға җавап берип, уни сақайтқан (Пад. 2-яз. 20:1—6). Әлчи Паул Йәһвадин «тенидики тикәнни» еливетишни өтүнгән. Лекин Йәһва Худа уни сақайтмиди (Кор. 2-х. 12:7—9). Һирод падиша әлчи Яқуп билән Петрусни өлтүрүшни халиған. Яқуп өлтүрүлгән, Петрус болса, мөҗүзилик йол билән қутқузулған (Әлч. 12:1—11). Биз бәлким «Йәһва немишкә Петрусни қутқузди, лекин Яқупни қутқузмиған?» дәп ойлишимиз мүмкин. Муқәддәс китапта бу тоғрилиқ һечнемә дейилмигән. Бирақ биз Йәһва Худаниң барчә «йоллири адаләтликтур» екәнлигигә ишәнчлик болалаймиз (Қ. шәр. 32:4). Бәзи вақитларда Йәһва биз ойлиғандәк җавап бәрмәслиги мүмкин. Бирақ мәйли қандақ җавап бәрсиму, биз униңға һечқачан гуман кәлтүрмәймиз. Чүнки Йәһваниң дуалиримизға һәрдайим меһир-муһәббәт вә меһрибанлиқ билән җавап беридиғанлиғиға ишәнчимиз камил (Аюп 33:13). w23.11 21-б., 6-абз.

Яқуп хетидә дана кишиләрниң «беқинишқа тәйяр» екәнлигини ейтқан. Беқинишқа тәйяр киши Йәһва Худа мәлум дәриҗидә һоқуқ бәргән кишиләргә чин қәлбидин итаәт қилиду. Бирақ Йәһваниң буйруқлирини бузушни тәләп қилидиған кишиләргә бойсунмайду (Әлч. 4:18—20). Инсанға бойсунушқа қариғанда, Йәһваға бойсунуш биз үчүн асанирақ болуши мүмкин. Чүнки Йәһва дайим мукәммәл көрсәтмиләрни бериду (Зәб. 19:7). Бирақ һоқуққа егә инсанлар намукәммәл, шундақ болсиму асмандики Атимиз Йәһва ата-анимиз, һөкүмәт әмәлдарлири вә ақсақалларға мәлум дәриҗидә һоқуқ бәргән (Пәнд н. 6:20; Сал. 1-х. 5:12; Пет. 1-х. 2:13, 14). Биз уларға бойсунғанда, әмәлийәттә Йәһваға бойсунған болумиз. w23.10 6-б., 2, 3-абз.

Иман-етиқадимизни күчәйтишниң бир усули — Яратқучи Йәһваниң күч-қудрити һәққидә чоңқур ойлиниш. Униң пүтүн вәдилирини әмәлгә ашуруш күч-қудрити бар. Худайимиз Йәһва һәммигә қадир (Аюп 42:2; Марк 10:27; Әфәс. 3:20). У Ибраһим билән Сарәниң қериғанда бир оғуллуқ болидиғанлиғини ейтқан (Ярит. 17:15—17). У йәнә Ибраһимға Қанан зиминини униң әвлатлириға беридиғанлиғини вәдә қилған. Ибраһимниң әвладлири, йәни исраиллар Мисирда узун жиллар қул болғинида, бу вәдиләр һәргиз әмәлгә ашмайдиғандәк көрүнгән. Йәһва Өз Оғлини Мәрийәм дегән қизниң туғуп беридиғанлиғини ейтқан. Шуниң билән, Йәһва нәччә миң жил бурун Ерәм беғида вәдә қилған йәнә бир бәшарәт әмәлгә ашқан (Ярит. 3:15). Йәһваниң барлиқ вәдилири вә әшу вәдилирини қандақ әмәлгә ашурғанлиғи һәққидә ойланғинимизда, Униң әҗайип күч-қудрити барлиғини чүшинимиз вә йеңи дуния тоғрилиқ бәргән вәдисигә болған ишәнчимиз техиму күчийиду (Йәшуа 23:14; Йәшая 55:10, 11). w23.04 28-б., 10—12 абз.

Йәһва Худа Давутниң қутқузулуш үчүн қилған дуалириға җавап қайтурған (Сам. 1-яз. 19:10, 18—20; Сам. 2-яз. 5:17—25). Бизму шуниңға ишинәләймиз (Зәб. 145:18). Йәһва биз күткән усулда дуалиримизға җавап бәрмәслиги мүмкин. Әлчи Паул тенидики тикәнни еливетишни Худадин өтүнгән. Паул бу қийинчилиғи һәққидә үч қетим ениқ дуа қилған. Йәһва униң дуалириға җавап бәргәнму? Һә. Бирақ Паулниң үмүт қилғинидәк әмәс. Йәһва униң қийинчилиғини йоқ қилишниң орниға, давамлиқ садиқлиқ билән хизмәт қилиши үчүн керәклик күчни бәргән (Кор. 2-х. 12:7—10). Бизму бәзидә өзүмиз күткәндин пәриқлиқ усулда дуалиримизға җавап елишимиз мүмкин. Шуниңға ишинимизки, Йәһва неминиң биз үчүн әң яхши екәнлигини билиду. У һәтта биз тилигән яки хиял қилғандин зиядә ишларни қилишқа қадир (Әфәс. 3:20). Шу сәвәптин, биз ойлап бақмиған бир вақитта яки бир йол билән дуалиримизға җавап елишимиз мүмкин. w23.05 9-б., 4—6 абз.

Бәзи чағларда Муқәддәс китапниң келәчәктики тирилиш тоғрисидики вәдилири һәққидә чоңқур ойлиниш биз үчүн пайдилиқ. Немә үчүн? Чүнки һаятимизда қачан еғир кесәлгә гириптар болидиғанлиғимизни яки туюқсизла йеқин кишилиримиздин айрилип қалидиғанлиғимизни билмәймиз (Вәз 9:11; Яқуп 4:13, 14). Бизниң тирилиш үмүтимиз шундақ қийин вәзийәтләргә бәрдашлиқ беришимизгә ярдәм берәләйду (Сал. 1-х. 4:13). Муқәддәс Язмилар бизни шуниңға ишәндүриду: асмандики Атимиз бизни яхши билиду вә сөйиду (Луқа 12:7). Йәһва Худа бизни илгирики миҗәз-хулуқ вә әслимилиримиз билән тирилдүриду. Демәк, Униң бизни қанчилик яхши тонуйдиғанлиғини ойлап көрүң. Сөйгү-муһәббәтлик Йәһва Худа бизни мәңгү яшаш имканийитигә егә қилиду, һәтта биз өлүп кәтсәкму, У бизни тирилдүриду. Немишкә тирилиш вәдисигә ишинәләймиз? Сәвәви чоқум әшу вәдини бәргәнниң уни орунлаш арзу-истиги вә күч-қудрити яки иқтидари барлиғиға ишинимиз. w23.04 8, 9-б., 2—4 абз.

Йәһва билән болған достлуқ мунасивәтни күчлүк сақлаш үчүн бирликтә тиришчанлиқ көрсәткән. Улар аилә әзалири бирликтә ибадәт қилишниң муһимлиғини чүшәнгән (Луқа 2:22—24; 4:16). Бүгүнки күндики әр-аяллар үчүн улар һәқиқәтән яхши үлгә қалдурған. Әгәр Йүсүп билән Мәрийәмгә охшаш, силәрниң балилириңлар болса, бәлким жиғилишларға қатнишиш яки аиләвий ибадәт өткүзүш үчүн вақит орунлаштурушуңлар асан әмәс, һәтта әр-аял бирликтә тәтқиқ қилип үгиниш яки дуа қилишқа вақит чиқириш техиму қийин болуши мүмкин. Бирақ есиңларда болсунки, бирликтә Йәһваға дуа қилғиниңларда, Униңға вә өз ара бир-бириңларға болған муһәббәт техиму күчийиду. Шуңа, ибадәтни һаятиңларда биринчи орунға қоюңлар. Некаңизда қийинчилиқлар пәйда болса, қаримаққа, бирликтә аиләвий ибадәт өткүзүш мүмкин әмәстәк көрүниду. Шундақ болса, хошал-хорамлиқ ичидә қисқа муһакимә елип бериңлар. Мошу қәдәм араңлардики муһәббәт риштисини вә бирликтә Йәһваға ибадәт қилиш арзу-истигиңларни күчәйтәләйду. w23.05 22-б., 7, 8-абз.

Худадин әйминиш Обадиягә қандақ ярдәм бәргән? Биринчидин, бу уни сәмимий вә ишәнчлик қилған. Шуңа падиша уни хан җәмәтигә башқурғучи қилған (Нәһәмия 7:2ни селиштуруң). Худадин әйминиш Обадияни толуп ташқан җасарәткә егә қилған. Бу униң үчүн зөрүр бир пәзиләт болған. Чүнки у рәзил Ахаб падишаниң заманида яшиған (Пад. 1-яз. 16:30). Униң Баалға чоқунидиған аяли Изәбәл Йәһваға интайин өч болуп, шималий падишалиқтики һәқиқий ибадәт қилғучиларни йоқитишқа тиришқан. У һәтта нурғунлиған Худаниң пәйғәмбәрлирини өлтүргән (Пад. 1-яз. 18:4). Изәбәл Худаниң пәйғәмбәрлирини қоғлап, уларни өлтүрмәкчи болғанда, у 100 пәйғәмбәрни өңкүргә йошуруп, уларға нан вә су тәминләп бәргән (Пад. 1-яз. 18:13, 14). Әгәр униң ишлири ашкарә болуп қалған болса, Изәбәл бу җасарәтлик киши Обадияни өлтүрүвәткән болатти. Әлвәттә, Обадия өлүшни халимиған. Бирақ у Йәһвани вә Униңға хизмәт қилғанларни өзиниң һаятидинму бәкирәк сөйгән. w23.06 16-б., 9, 10-абз.

Йәһва Худа өтмүштә қилғандәк, бүгүнки күндиму Өз хәлқини йетәкләп келиватиду. У буни Муқәддәс китап вә җамаәтниң беши болған Оғли арқилиқ қиливатиду. Худа давамлиқ инсанлар арисидин Өзигә вәкиллик қилидиғанларни таллап, бүгүнки күндә ишлитиватқанлиғиниң дәлил-испатини көрәләймизму? Әлвәттә. Мәсилән, 1800-жилларниң ахирида йүз бәргән ишларни көрүп бақайли. Чарлз Тейз Расселл вә униң достлири бирликтә 1914-жили Худа Падишалиғи үчүн муһим бир жил болидиғанлиғини чүшәнгән (Дан. 4:25, 26). Улар Муқәддәс Язмилардики бәшарәтләрни тәкшүрүп, тәтқиқ қилиш арқилиқ шу хуласигә кәлгән. Уларниң Муқәддәс Язмиларни тәтқиқ қилишиға Йәһва Худа йетәкчилик қилғанму? Һә-ә, шундақ қилған. 1914-жили йүз бәргән вақиәләр Худа Падишалиғи һөкүмранлиқ қилишни башлиғанлиғини испатлиған. Шу жили Биринчи дуния уруши башланди, кәйни-кәйнидин жуқумлуқ кесәлликләр, йәр тәврәшләр вә ачарчилиқлар йүз бәргән (Луқа 21:10, 11). Йәһва һәқиқәтән бу садиқ хизмәтчилирини ишлитип, Өз хәлқигә ярдәм қилған. w24.02 22-б., 11-абз.

Йәһваниң хәлқи сүпитидә, У бизни сөйидиғанлиғини вә әң яхши турмуштин бәһримән болушимизни халайдиғанлиғини билимиз (Рим. 8:35—39). Шуниңға ишинимизки, Муқәддәс китап принциплирини әмәлий қоллансақ, бу һәрдайим биз үчүн пайдилиқ (Йәшая 48:17, 18). Ундақта, күтүлмигән қийинчилиқларға дуч кәлгәндә, қандақ инкас қайтурушимиз керәк? Мәсилән, аилимиздики бири мәлум ишта бизни үмүтсизләндүриду. Йәһваға хизмәт қилишқа тосқунлуқ қилидиған еғир кесилимиз бар. Тәбиий апәт түпәйли зиянға учраймиз. Яки иман-етиқадимиз сәвәплик зиянкәшликкә дуч келимиз. Биз мошундақ синақларға дуч кәлгинимиздә, бәлким мундақ соалларни сораймиз: «Немә үчүн бу иш мениң бешимға келиду? Бирәр ишни хата қилдимму? Бу Йәһваниң мени бәрикәтлимәйдиғанлиғини билдүрәмду?» Әгәр ой-хиялиңизда шундақ соаллар пәйда болса, униңдин үмүтсизләнмәң. Йәһваниң нурғун садиқ хизмәтчилириму мошуниңға охшаш қийинчилиқларға дуч кәлгән (Зәб. 22:1, 2; Һаб. 1:2, 3). w23.04 14-б., 1, 2-абз.

Езиқтурушқа дуч кәлгәндә, Йәһва Худа билән болған достлуғимизға зиян йәткүзидиған һәрқандақ ой-пикир яки иш-һәрикәтни дәрһал рәт қилимиз. Йәһва бизниң Униңға чин көңлүмиздин итаәт қилишимизни халайду (Рим. 6:17). Униң көрсәтмилири һәрдайим биз үчүн пайдилиқ. Биз униң қанунлирини өзгәртәлмәймиз (Йәшая 48:17, 18; Кор. 1-х. 6:9, 10). Иблис җисманий вә һиссий җәһәттин һуҗум қилиш усулини қоллинип, ирадимизни аҗизлаштуриду. Униң мәхсити бизни «жутуш», йәни Йәһва билән болған мунасивитимизни бузуш (Пет. 1-х. 5:8). Биринчи әсирдики Мәсиһ әгәшкүчилири мәһкәм туруш ирадиси қәтъий болғачқа, зиянкәшликкә учриған, таяқ йегән вә өлтүрүлгән (Әлч. 5:27, 28, 40; 7:54—60). Шәйтан бүгүнки күндиму зиянкәшлик қилишни давамлаштуриватиду. Буни Россия вә башқа дөләтләрдики қериндашлиримизға рәһимсиз муамилә қиливатқанлиғидин көрәләймиз. Шәйтан очуқ-ашкарә һуҗум қилиштин башқа йәнә һийлә-микирләрни ишлитиду (Әфәс. 6:11). w23.07 15, 16-б., 6—9 абз.

Худаниң Сөзини қанчә көп тәтқиқ қилғансири, Йәһваға болған сөйгү-муһәббитиңиз шунчә чоңқурлишиду. Әшу муһәббәт сизни үгиниватқанлириңизни һаятиңизда әмәлий қоллинишқа дәвәт қилиду. Сиз Муқәддәс китап принциплириға асасән техиму яхширақ қарарларни чиқириватисиз. Худани хурсән қилишни халиғачқа, көзқаришиңиз вә иш-һәрикәтлириңизни өзгәртиватисиз. Худди бир бала өзиниң көйүмчан ата-анисини үлгә қилғанға охшаш, сизму асмандики Атимизни үлгә қилишқа тиришиватисиз (Әфәс. 5:1, 2). Өзүмизгә мундақ соал қойсақ болиду: «Мениң Йәһваға болған муһәббитим дәсләптә Мәсиһ әгәшкүчиси болған вақитқа қариғанда күчлүкму? Мән чөмдүрүлгәндин буян ой-пикир қилиш вә жүрүш-турушумда, болупму, қериндашларға меһир-муһәббәт көрситиштә Йәһвани үлгә қилимәнму?» Әгәр дәсләптики муһәббитиңиз мәлум дәриҗидә совуп кәткән болса, униңдин үмүтсизләнмәң. Шундақ ишлар биринчи әсирдики Мәсиһ әгәшкүчилиридиму йүз бәргән. Әйса улардин ваз кәчмигән еди. У биздинму ваз кәчмәйду (Вәһ. 2:4, 7). У шуни билидуки, биз һәқиқәтни тунҗа қетим үгәнгән чағдики сөйгү-муһәббәтни қайтидин һис қилишни үгинәләймиз. w23.07 8-б., 2, 3-абз.

Әлчи Петрус бир нәччә қетим хаталиқ өткүзгән. Биринчи болуп, Петрус өзигә бәк ишинип кәткән, һәтта махтинип, башқа әлчиләр Әйсани ташлап кәткән тәғдирдиму, өзи чоқум униңға садиқ қалидиғанлиғини ейтқан (Марк 14:27—29). Униңдин кейин, Петрусни Әйса үч қетим дуа қилишқа агаһландурған болсиму, Петрус һошияр туралмай ухлап қалған (Марк 14:32, 37—41). Кейин кишиләр Әйсани тутуп кәткәндә, Петрус Әйсани ташлап қечип кәткән (Марк 14:50). Ахирида у үч қетим Әйсани тонуйдиғанлиғини инкар қилған, һәтта бу тоғрилиқ қәсәмму қилған (Марк 14:66—71). Петрус өзиниң гунасиниң еғирлиғини тонуп йәткәндә, қандақ инкас қайтурған? У интайин азаплинип, қаттиқ жиғлиған (Марк 14:72). Әйса Петрусниң илгири өткүзгән хаталиғи үчүн уни әйипләшниң орниға, өз достиға техиму чоң мәсъулийәтни тапшурғанлиғини ейтқан (Йоһ. 21:15—17). Петрус өзиниң еғир гуна қилғанлиғини биләтти, амма у өз-өзидин ваз кәчмигән. Немә үчүн? Чүнки у өз устази болған Әйса Мәсиһниң униңдин ваз кәчмигәнлигигә ишәнгән. Буниңдин немини үгәндуқ? Йәһва У бизни сөйидиғанлиғиға вә кәчүридиғанлиғиға ишинишимизни халайду (Рим. 8:38, 39). w24.03 18, 19-б., 13—15 абз.

Җинсий әхлақсизлиқ шәрмәндичиликкә қелиш, өзини һечнәрсигә яримас һис қилиш, халимиған һалда һамилдар болуш вә аилиниң бузулушидәк яман ақивәтләрни кәлтүрүп чиқириду. Демәк, наһайити ениқки, әқилсиз аялниң өйидин жирақ туруш даналиқтур. Униңдин башқа, Йәһва билән болған достлуқ бузулупла қалмай, җинсий әхлақсизлиқ қилғучилар өлүмгә йетәкләйдиған ағриқларға гириптар болиду (Пәнд н. 7:23). Пәнд-нәсиһәтләр 9:18-айәттә: «У чақирған меһманлар гөрдә» болидиғанлиғини ейтип, уларниң ақиветини хуласиләйду. Ундақта, немә үчүн шунчә көп кишиләр шундақ паҗиәлик ақивәткә йетәкләйдиған езиқтуруш тәкливини қобул қилиду? (Пәнд н. 9:13—18) Наһайити көп дуч келидиған бир тузақ — порнография. Бәзиләр порнография көрүшни зиянсиз дәп қарайду. Әксичә, у зиянлиқ, өз-өзигә вә башқиларға болған һөрмәтни йоқитишқа сәвәп болиду вә уни көрүш адитидин қутулуш бәк қийин. Әхлақсиз көрүнүшләр мейигә сиңип қалиду, уларни чиқирип ташлаш бәк қийин. Техиму муһим болғини, порнография хата арзу-һәвәсни техиму күчләндүриду (Кол. 3:5; Яқуп 1:14, 15). Шундақ шәһваний мәзмундики нәрсиләрни көридиған нурғун кишиләр җинсий әхлақсизлиқ қилишиду. w23.06 23-б., 10, 11-абз.

Гәрчә башқа дөләтләр бәзидә Англо-Америка дуния күчигә қарши җәң елан қилсиму, амма униң орнини алалмайду. Чүнки Худа Падишалиғиға вәкиллик қилидиған таш һәйкәлниң путини вәйран қилидиғанлиғини билимиз (Дан. 2:34, 35, 44, 45). Даниял китавидики төмүр вә лайниң арилашмисидин шәкилләнгән пут тоғрисидики бәшарәтниң тоғрилиғиға ишинәмсиз? Әгәр шундақ болса, бу һаят кәчүрүш тәрзиңизгә тәсир көрситиду. Пат арида бу рәзил дунияниң йоқ қилинидиғанлиғини билгәчкә, диққитиңизни көп пул тепиш яки маддий нәрсиләрни топлашқа қаратмайсиз (Луқа 12:16—21; Йоһ. 1-х. 2:15—17). Бу бәшарәтни чүшиниш вәз ейтиш вә тәлим бериш хизмитиниң муһимлиғини көрүп йетишиңизгә ярдәм бериду (Мәт. 6:33; 28:18—20). Бу бәшарәтни тәтқиқ қилғандин кейин, өзүңиздин шундақ сорап көрүң: «Чиқарған қарарлирим пат йеқинда Худа Падишалиғи барлиқ инсаний һакимийәтләрни пүтүнләй йоқ қилидиғанлиғиға ишинидиғанлиғимни көрситәмду?» w23.08 11-б., 13, 14-абз.

Йешиңиз, саламәтлигиңиз вә һазирқи әһвалиңиз түпәйли, бәзи ишни қилалмисиңиз, реаллиқни кәмтәрлик билән қобул қилиң. Худди Барзилайға охшаш, йешиңиз яки саламәтлигиңиз берилгән вәзипини орунлашқа йол қоймиса, разимәнлик билән шу имтияздин ваз кечиң (Сам. 2-яз. 19:35, 36). Мусаға охшаш, ярдәмни қобул қилиң вә мувапиқ пәйттә вәзипини башқиларға бөлүп бериң (Чиқ. 18:21, 22). Шундақ кичик пейиллиқ көрсәтсиңиз, бу сизни әмәлгә ашмайдиған арзу-үмүткә бағлинип қелиштин сақлайду вә һерип-чарчап кетиштин қоғдап қалиду. Биз башқилар чиқарған хата қарар үчүн өзүмизни әйипкар һис қилмаслиғимиз керәк. Биз башқилар үчүн қарар чиқиралмаймиз. Шуниңдәк, дайим уларни чиқарған хата қарарлириниң яман ақиветидин сақлап қалалмаймиз. Мәсилән, балилар Йәһваға хизмәт қилмаслиқни қарар қилиши мүмкин. Бу қарар ата-аниларни еғир қайғу-һәсрәткә салиду. Бирақ балисиниң чиқарған қарари үчүн өзини әйиплигән ата-анилар өз үстигә еғир жүкни артивалиду. Йәһва Худа уларниң бу еғир жүкни көтиришини халимайду. w23.08 29-б., 11, 12-абз.

Шимшон бизгә охшаш намукәммәл инсан болған. Шуңа, у бәзидә натоғра қарарларни чиқарған. Бир қетим у чиқарған қарар ечинишлиқ ақивәт елип кәлгән. Шимшон бир мәзгил һаким болуп хизмәт қилғандин кейин, «Шорек вадисида яшайдиған бир аялни яхши көрүп қалди. Униң исми Делила еди». Униңдин авал у филистийәлик бир аялға өйләнмәкчи болған, амма бу Йәһваниң ирадиси еди. Шу арқилиқ Шимшон филистийәликләргә қарши чиқиш үчүн пурсәт издигән. Кейинирәк, Шимшон филистийәликләрниң Газа шәһиридә бир паһишә аялниң өйидә турған еди. Шу чағда Худа Шимшонға күч-қувәт берип, у шәһәр дәрвазисини қомуруп ташлап, шәһәрни һимайисиз қалдурған (Һак. 14:1—4; 16:1—3). Бирақ Делила исраил аял болған болуши мүмкин. Делила филистийәликләрдин көп пул елип, Шимшонға сатқунлуқ қилған. w23.09 5-б., 12, 13-абз.

Әқил-парасәт бизгә мулайим болушимизға ярдәм берәләйду. Иман-етиқади қарши бир вәзийәткә дуч кәлгәндә, пәм-парасәтлик киши өзини тизгинләләйду. Бәзи соаллар яки талаш-тартишлар худди чоңирақ қисми су астида турған муз таққа охшайду. Адәмләр бәзи соалларни сорайду, амма униңда йошурун мәхсәт болуши мүмкин. Шуңа, җавап бериштин бурун шуни әстә сақлишимиз керәкки, кишиниң бу соални қандақ мәхсәттә қойғанлиғиниң сәвәвини билмәслигимиз мүмкин (Пәнд н. 16:23). Гидеонниң әпрайимлиқларға қандақ җавап бәргәнлигини көрүп бақайли. Әпрайимлиқлар өзлирини җәңгә чиқишқа балдурирақ чақирмиғанлиғи үчүн Гидеонға аччиқланған еди. Уларниң шундақ аччиқлинип, талаш-тартиш қилишниң һәқиқий сәвәви немә болған? Бәлким, бу уларниң ғуруриға тәгкәнду. Мәйли қандақ болуштин қәтъийнәзәр, Гидеон пәм-парасәтлик болуп, уларниң һис-туйғулирини чүшинишкә вә уларға мулайимлиқ билән җавап беришкә һәрикәт қилған. Нәтиҗиси қандақ болған? Улар қолидики қураллирини ташлиған вә аччиғи бесилип қалған (Һак. 8:1—3). w23.09 16-б., 8, 9-абз.

Йәһва билән Әйсаниң арисида худди бир ата билән оғул арисидики ата-балилиқ риштиси болған. Атиси Өз көзи билән Оғлиниң яман муамилигә учрап, рәт қилинип вә түрлүк азап-оқубәтләргә дучар болғанлиғини көргәндә, чоқум жүригигә пичақ санчилғандәк һис қилған. Балисидин айрилған ата-аниниң қайғу-һәсрәткә толған жүриги қан жиғлайду. Тирилишкә болған ишәнчимиз күчлүк болсиму, йеқин кишилиримиздин айрилип қалғанда, қәлбимиз қайғу-һәсрәткә толиду. Худди шуниңға охшаш, милади 33 жили сөйүмлүк Оғлиниң азап чекип өлгәнлигини көргәндә, Йәһваниң немиләрни һис қилғанлиғини аз болсиму чүшинимиз (Мәт. 3:17). Һазирдин башлап Хатириләш мәрасимиғичә шәхсий үгиниш яки аиләвий ибадәт өткүзгәндә, төләм һәққидә тәтқиқ қилиң. Хатириләш мәрасимида шу күн үчүн алаһидә тәйярланған әтигәнлик ибадәтни көрүшни унтумаң. Қәлбимиздә бу күнгә тәйярлиқ қилсақ, башқиларниңму бу учришишниң пайдисини көрүшигә ярдәм берәләймиз (Әзра 7:10). w24.01 11-б., 10—12 абз.

Йәһвадин күч-мәдәткә еришәлишимизниң бир йоли — дуада униңға йеқинлишиш. Йәһва дуалиримизға җавап қайтуруп, бизгә «адәттики күчтин ешип чүшидиған күчни» берәләйду (Кор. 2-х. 4:7). Униңдин башқа, Худаниң Сөзи болған Муқәддәс китапни оқуғанда вә оқуғанлиримиз үстидә чоңқур мулаһизә қилғанда, биз күчлинимиз (Зәб. 86:11). Йәһваниң Муқәддәс китаптики сөзлири күчлүктур (Ибр. 4:12). Йәһваға дуа қилип, Униң сөзини оқуғиниңизда бәрдашлиқ берип, хошаллиғиңизни йоқатмаслиқ үчүн яки мүшкүл бир вәзипини орунлаш үчүн муһтаҗ болған күч-қувәткә еришисиз. Йәһваниң Юнус пәйғәмбәрни қандақ күчләндүргәнлигигә диққәт қилип бақайли. Юнус пәйғәмбәр Йәһва тапшурған қийин вәзипидин қечип кәткән. Нәтиҗидә, у қаттиқ боран-чапқунда һаятидин айрилип қелишқа азла қалған вә кемидикиләрниң һаятини хәтәргә дучар қилған. Кемидики деңизчилар уни деңизға ташлиғанда, уни йоған бир белиқ жутувалған. У белиқниң қосиғида қап-қараңғу җайда болған. Белиқниң қосиғида ялғуз қалғинида, Юнус күч-қувәткә еришиш үчүн немә қилған? У Йәһваға дуа қилған (Юнус 2:1, 2, 7) w23.10 13-б., 4—6 абз.

Гәрчә әлчи Петрус биринчи әсирдә яшиған Мәсиһ әгәшкүчилиригә шу хәтләрни язған болсиму, бирақ Йәһва бу хәтләрни Муқәддәс китапқа киргүзгән. Шуңа, биз һазир бу хәтләрдин пайдиланалаймиз (Рим. 15:4). Әтрапимизда Муқәддәс китаптики бәшарәтләргә ишәнмәйдиған адәмләр нурғун. Биз узун жиллардин буян бу дунияниң ахирлишишини үмүт билән күткәчкә, нурғун қаршилашқучиларниң мәсқирисигә учрап келиватимиз. Бәзи тәңқит қилғучилар һәтта дунияниң ахири һечқачан кәлмәйду дәйду (Пет. 2-х. 3:3, 4). Әгәр биз вәз қилғанда учритидиған өй егиси, хизмәтдишимиз яки өз аилимиздики биридин мошу сөзләрни аңлисақ, етиқадимиз тәвринип қелиши мүмкин. Шундақ вәзийәттә Әлчи Петрус бизгә немә ярдәм берәләйдиғанлиғини чүшәндүргән. Бәзидә қаримаққа Йәһва бу рәзил дунияни йоқ қилидиған вақтини бәк кечиктүрүвәтти дәп қарайду. Петрусниң язғанлири бизниң тоғра көзқарашни сақлишимизға ярдәм берәләйду. Чүнки улар бизгә Йәһваниң вақитқа болған көзқариши инсанларниң көзқаришидин пәриқлиқ екәнлигини әскәртиду (Пет. 2-х. 3:8, 9). Йәһва Худа үчүн миң жил бир күнгә охшаш. У сәвирчан, һечкимниң һалак болушини халимайду. У бәлгүлигән күн кәлгәндә, бу рәзил дунияниң түзүми йоқ болиду. w23.09 26, 27-б., 2—5 абз.

Әлчи Паул Йәһудийәдә яшайдиған ибраний Мәсиһ әгәшкүчилиригә немә үчүн хәт язған? Буниң икки асасий сәвәви болуши мүмкин. Биринчи — уларға илһам-мәдәт бериш. Уларниң көпинчиси йәһудий диниға ишинип чоң болған. Бәлким, уларниң бурунқи диний рәһбәрлири уларни Мәсиһкә әгәшкәнлиги үчүн мәсхирә қилған. Немә үчүн? Чүнки Мәсиһ әгәшкүчилириниң ибадәт қилиш үчүн һәйвәтлик ибадәтханиси, Худаға қурбанлиқ сунидиған көзгә көрүнидиған қурбанлиқ суписи вә хизмәт қилидиған роһанийлири йоқ еди. Бәлким, бу Мәсиһниң шагиртлирини үмүтсизләндүргән вә етиқадиниң аҗизлап кетишигә сәвәп болған (Ибр. 3:12, 14). Һәтта бәзилири йәһудий диниға қайтишини ойлиған болуши мүмкин. Иккинчи, Паул ибраний етиқатчиларға уларниң Худа Сөзидики «қаттиқ тамақни» қобул қилип, тәлимләрни чоңқур тәтқиқ қилиш үчүн күч чиқармайватқанлиғини ейтқан (Ибр. 5:11—14). Ениқки, бәзилири техичә Тәврат қанунини чиң тутқан. w23.10 24, 25-б., 3, 4-абз.

Бәзи аяллар той қилмай өтүшни таллайду (Мәт. 19:10—12). Йәһва Худа вә Әйса Мәсиһ той қилмиған қериндашларни һәргизму кам дәп санимайду. Дунияниң һәрқайси җайлирида той қилмиған қериндашлар җамаәт үчүн чоң бәрикәт. Улар башқиларни яхши көрүп, сәмимий көңүл бөлгәнликтин, нурғун қериндашлар үчүн ача-сиңиллар вә аниларға охшаш болиду (Марк 10:29, 30). Бәзилири толуқ вақитлиқ хизмәтни башлиди. Дунияниң һәрқайси җайлирида аял қериндашлар вәз ейтиш хизмитидә көп әмгәк қилиду (Зәб. 68:11). Толуқ вақитлиқ хизмәт қилишни ойлиниватамсиз? Сиз пионер, қурулуш ишлирида пидаий хизмәтчи болушқа яки Бәйтәлдә хизмәт қилишқа мәхсәт қоялайсиз. Мәхситиңиз тоғрилиқ Йәһваға чин қәлбиңиздин дуа қилиң. Шундақ мәхсәткә йәткән қериндашлар билән параңлишиң. Өзүңизниңму шуниңға лаяқәтлик болуши үчүн немиләрни қилишиңиз керәклигини биливелиң. Өз әһвалиңизға қарап план түзүң. Әгәр сиз толуқ вақитлиқ хизмәтчи болсиңиз, Йәһва үчүн көпирәк хизмәт қилалайсиз. w23.12 22-б., 16, 17-абз.

Чоң балаю апәт йеқинлап кәлгәнсири, биз вәз хизмитигә қатнишишниң қанчилик муһим екәнлигини техиму көпирәк һис қилимиз. Амма биз ихтисадий қийинчилиқларға яки вәз хизмитидә қаршилиқларға дуч кәлсәк, хизмәткә пүтүн ғәйритимиз билән қатнишиш қийин болуши мүмкин. Ундақта, Худа Падишалиғини биринчи орунға қоюшимизға немә ярдәм берәләйду? «Қошунларниң Сәрдари Йәһва» бизгә ярдәм бериватқанлиғиға қәтъий ишинишимиз керәк. Әгәр биз давамлиқ Худа Падишалиғиниң мәнпәитини биринчи орунға қойсақ, Худа чоқум бизни қоллап-қувәтләйду вә биз һечнемидин қорқмаймиз (Һагай 2:4). Йәһва Худа шагирт тәйярлап, адәмләрни қутқузидиған ишни һаятимизда биринчи орунға қоюшимизни халайду. Һагай пәйғәмбәр хәлиқни ибадәтхана қурулушини қайтидин башлашқа дәвәт қилған. Әгәр улар қурулушни давамлаштурса, Йәһва уларни бәрикәтләйдиғанлиғини вәдә қилған (Һагай 2:18, 19). Бизму шуниңға қәтъий ишинәләймизки, әгәр пүтүн күчимиз билән Йәһва бизгә тапшурған хизмәтни қилсақ, Униң бәрикитигә чоқум еришәләймиз. w23.11 16-б., 8-абз.; 17-б., 11-абз.

Әлчи Паул Римлиқларға язған хетидә һәммә инсанларниң гунакар екәнлигини тилға алған. Ундақта, бирси Худаниң қобул қилишиға еришип, һәққаний яки әйипсиз киши болуши үчүн немә қилалайду? Худаниң һәммә садиқ хизмәтчилиригә бу соалға җавап тепишқа ярдәм бериш үчүн әлчи Паул Ибраһимниң мисалини қолланди. Ибраһим Қанан зиминида яшиғанда, Йәһва уни һәққаний киши дәп җакалиған. Немә үчүн Йәһва Худа шундақ ейталиған? Ибраһим Тәврат қанунини пүтүнләй орунлиғанлиғи үчүнму? Әлвәттә, яқ (Рим. 4:13). Чүнки Тәврат қануни бу вақиәдин 400 жил өткәндин кейин берилгән. Ундақта, Йәһва немә үчүн Ибраһимни һәққаний киши дәп атиған? Йәһва Худа меһир-шәпқитини көрситип, Ибраһимни униң етиқади үчүн һәққаний киши дәп җакалиған (Рим. 4:2—4). w23.12 3-б., 4, 5-абз.

Натан пәйғәмбәр Давут падишаға жуқурида кәлтүрүлгән сөзләрни ейтқан. Әшу күни кечиси, Йәһва Натанға бу ибадәтханини Давут салмайдиғанлиғини ейтқан (Тар. 1-яз. 17:3, 4, 11, 12). Давут мошу хәвәрни аңлиғанда, қандақ инкас қайтурған? У диққитини өз оғли Сулайманниң әшу қурулушни қилишиға керәклик пуллар вә қурулуш материаллирини топлашқа қаратқан (Тар. 1-яз. 29:1—5). Йәһва Давутниң ибадәтханини салидиған киши әмәслигини ейтқандин кейин дәрһал униң билән әһдә түзгән. Йәһва падиша Давутқа униң әвлатлири арисидин бири мәңгү һөкүмранлиқ қилидиғанлиғини вәдә бәргән (Сам. 2-яз. 7:16). Йеңи дунияда 1000 жиллиқ һөкүмранлиқ мәзгилидә, Давут падишалиқ қилидиған Әйса Мәсиһниң өзиниң бир әвлади болғанлиғини билгәндә, чоқум бәкму хошал болиду. Мошу үзүндә Йәһва үчүн қилишни арзу қилған барлиқ ишларни қилалмисақму, Худайимизниң бизгә өзүмиз хиялимизға кәлтүрүп бақмиған башқа әҗайип бәрикәтләрни беридиғанлиғини көрәлишимизгә ярдәм бериду. w23.04 16-б., 8—10 абз.

Қорққан вақитта Муқәддәс китаптики мәлум бир үзүндиләр сизгә тәсәлли берәләйду. Мәсилән, Аюп, Зәбур, Пәнд-нәсиһәтләр китаплири вә Мәтта китавиниң 6-бабидики Әйсаниң сөзлирини оқуң. Дуа қилип, Униң Сөзини оқуғиниңизда, Асмандики Атимиз сизгә илһам-мәдәт бериду. Шуниңға ишинимизки, бешимизға еғир күн кәлгәндә, Йәһва Худа чоқум йенимизда болиду. У бизни һечқачан ялғуз қалдурмайду (Зәб. 23:4). У бизни қоғдашқа, тәңпуң көзқарашта болушимизға ярдәм беришкә, қоллап-қувәтләшкә вә тәсәлли беришкә вәдә қилиду. Йәшая 26:3-айәттә Йәһва тоғрилиқ мундақ сөзләр йезилған: «Сән Саңа таянғанларниң барини күзитисән. Уларға түгимәйдиған течлиқни әвәтисән, чүнки улар Саңа пүтүнләй ишиниду». Ундақта, Йәһваға тайиниң вә Униң ярдимини қобул қилиң. Шу чағда бешиңизға мәйли қандақ еғир күн чүшсиму, күч-қувәткә еришисиз. w24.01 25-б., 16, 17-абз.

Бүгүнки күндә Муқәддәс роһниң илһами билән йезилған жуқуридики пәйғәмбәрлик сөзләр әмәлгә ашмақта. Адәмниң көңлигә тәсәлли беридиған төвәндики сөзләрму һазир әмәлгә ешиватиду: «Балилириңниң һәммиси Йәһваниң шагиртлири болиду һәм улардики течлиқ бүйүктур! Сән һәққанийлиқ билән тәстиқлинисән. . . чүнки сени қорқутидиған һечнәрсә болмайду һәм дәһшәт саңа йеқинлашмайду» (Йәшая 54:13, 14). Һәтта бу «дуния қурулуминиң худаси» Шәйтанму Йәһваниң хәлқи қиливатқан тәлим бериш ишини тохтиталмайду (Кор. 2-х. 4:4). Пак ибадәт әслигә кәлтүрүливатиду вә әнди һәргиз булғанмайду. У мәңгү мәвҗут болиду. Униңға қарши чиқидиған һечқандақ қурал ғәлибә қилалмайду. w24.02 4-б., 10-абз.

Биз Мәсиһ әгәшкүчиси сүпитидә өзүмизни Йәһваға беғишлиғанда, бәргән қәсимимизгә қәтъий садиқ болушқа тиришимиз. Бу аилимиздики ишлар тоғрилиқ чиқиридиған қарарлиримиз вә иш-һәрикәтлиримизгә тәсир көрситиду. Әлвәттә, биз аилимизниң еһтияҗлирини қамдаш үчүн тиришип ишләймиз. Амма биз һәргиз аилә әзалиримизниң арзу-истәклирини Йәһва биздин тәләп қилған ишларниң алдиға қоймаймиз (Мәт. 10:35, 36; Тим. 1-х. 5:8). Бәзидә Йәһвани хурсән қилиш үчүн чиқарған қарарлиримиз уруқ-туққанлиримизни хошал қилмаслиғи мүмкин. Аилә қурушни Йәһва Өзи орунлаштурған. У бизниң бәхит-саадәтлик аилимизниң болушини үмүт қилиду (Әфәс. 3:14, 15). Әгәр һәқиқий бәхит-саадәткә еришмәкчи болсақ, Йәһваниң көрсәтмиси бойичә иш қилишимиз керәк. Шуниңға ишиниңки, Йәһваға ибадәт қилиш үчүн бәргән қурбанлиқлириңизни шуниң билән бир вақитта аилиңизгә ғәмхорлуқ қилип, уларға көрсәткән сөйгү-муһәббәт вә һөрмитиңизни Яратқучимиз Йәһва интайин қәдирләйду (Рим. 12:10). w24.02 17-б., 11-абз., 18-б., 13-абз.