Бурадәрләр, хизмәт ярдәмчиси болуш мәхситиңлар барму?

1. Әлчи Паул хизмәт ярдәмчилири тоғрилиқ қандақ көзқарашта болған?

ХИЗМӘТ ЯРДӘМЧИЛИРИ җамаәтләрдә муһим ишларни атқуриду. Әлчи Паул садақәтмән бурадәрләрни қәдирлигән. Мәсилән, у Филипитики етиқатдашларға хәт язғанда, пәқәт ақсақалларғила әмәс, хизмәт ярдәмчилиригиму салам йоллиди (Флп. 1:1).

2. Луис исимлиқ бурадәр өзиниң хизмәт ярдәмчиси вәзиписи һәққидә немә дегән?

² Нурғунлиған бурадәрләр яш өзгичилигигә қаримай, хизмәт ярдәмчиси болуп, җамаәт үчүн хизмәт қиливатқанлиғидин толиму хошал. Мәсилән, Дэван 18 йешида хизмәт ярдәмчиси болса, Луис 50 йешида бу хизмәткә тәйинләнгән. Луис мундақ дәйду: «Хизмәт ярдәмчиси болуп қериндашлиримни қоллап-қувәтләватқанлиғимдин интайин пәхирлинимән. Улар маңа көплигән усуллар билән муһәббитини көрситип келиватиду, әнди новәт маңа кәлди». Униң сөзигә нурғун бурадәрләр қошулиду.

3. Қандақ соалларни муһакимә қилимиз?

³ Әгәр сиз чөмдүрүштин өткән бурадәр болсиңиз, хизмәт ярдәмчиси болушқа мәхсәт қоюватамсиз? Сизни шундақ мәхсәт қоюшқа немә дәвәт қилиду? Хизмәт ярдәмчиси болуш үчүн немә қилишиңиз керәк? Мошу мақалидә бу соалларға җавап алимиз. Бирақ авал хизмәт ярдәмчилири җамаәттә қандақ ишларни атқуридиғанлиғини муһакимә қилайли.

ХИЗМӘТ ЯРДӘМЧИЛИРИ ҚАНДАҚ ИШЛАРНИ АТҚУРИДУ?

4. Хизмәт ярдәмчилири қандақ ишларни атқуриду? (Рәсимгиму қараң.)

⁴ Чөмдүрүштин өткән бурадәрләр хизмәт ярдәмчиси болуп хизмәт қилалайду. Улар җамаәттә һәртүрлүк ишларни атқуруп, ақсақалларға ярдәм бериш үчүн муқәддәс роһ билән тәйинлиниду. Бурадәрләр-қериндашларниң йетәрлик әдәбиятлири билән вәз қилиш территорияси болуши үчүн мошу хизмәт ярдәмчилири җавапкар. Башқилири болса, Ибадәт өйини сүпүрүп-тазилап, җөндәшкә ярдәм бериду. Буниңдин ташқири, улар җамаәт учришишлирида ярдәмчиләр сүпитидә хизмәт қилиду вә аудио-видеолар үчүн җавапкар болиду. Көпинчә вәзийәтләрдә хизмәт ярдәмчилири әмәлий ярдәм бериду. Әң муһими, улар Йәһва Худани яхши көриду вә Униң адил тәләплиригә мас яшайду. Шундақла улар қериндашларни чин жүригидин яхши көриду (Мәт. 22:37—39). Чөмдүрүштин өткән бурадәрләр хизмәт ярдәмчиси болуш үчүн йәнә немә қилиши керәк?

5. Бурадәр хизмәт ярдәмчиси болуши үчүн немә қилиши керәк?

⁵ Муқәддәс китапта хизмәт ярдәмчиси болушни халиғанлар үчүн тәләпләр йезилған (Тим. 1-х. 3:8—10, 12, 13). Шуниңға лайиқ болғуңиз кәлсә, у тоғрилиқ тәпсилий вә изчил тәтқиқ қилишқа күч чиқириң. Амма биринчидин, нийитиңларни тәкшүрүп көрүшиңлар керәк.

НЕМИШКӘ ХИЗМӘТ ЯРДӘМЧИСИ БОЛҒУҢИЗ КЕЛИДУ?

6. Етиқатдашлириңизға хизмәт қилишқа немә дәвәт қилиши керәк? (Мәтта 20:28; муқавидики рәсимгиму қараң.)

⁶ Әйса Мәсиһ қандақла иш қилсиму, Атиси Йәһвани вә башқиларни яхши көргәнликтин қилған. Бу муһәббәт Әйсани күчини айимай әмгәк қилишқа вә башқилар төвән дәп қарайдиған ишларни қилишқа дәвәт қилған (Мәтта 20:28ни оқуң; Йоһ. 13:5, 14, 15). Әгәр силәрниму хизмәт ярдәмчиси болушқа меһир-муһәббәт дәвәт қилса, ундақта Йәһва Худа сизниң тиришчанлиғиңизни чоқум бәрикәтләйду (Кор. 1-х. 16:14; Пет. 1-х. 5:5).

7. Немә үчүн бурадәр тәкәббур болмаслиғи керәк?

⁷ Мошу дунияда мәшһур яки атақлиқ кишиләрдин көпинчә адәмләр пәхирлиниду. Лекин Йәһваниң тәшкилатида тамамән башқичә. Әйсаға охшаш башқиларни сөйидиған бурадәрләр уларниң үстидин һөкүмранлиқ қилишқа яки нам-атаққа интилмәйду. Әгәр нам-атаққа еришишни халайдиған бурадәрни хизмәт ярдәмчиси қилип тәйинлисә, у төвән һесапланған ишларни қилиштин баш тартиши мүмкин. Шундақ ишлар униң қәдир-қиммитини чүшириду дәп ойлайду (Йоһ. 10:12). Йәһва Худа шундақ шәхсийәтчи вә тәкәббур адәмләрни һәргиз бәрикәтлимәйду (Кор. 1-х. 10:24, 33; 13:4, 5).

8. Һәзрити Әйса әлчилиригә қандақ нәсиһәт бәргән?

⁸ Бәзидә Әйсаниң йенидики шагиртлириму һарам нийәт билән мәртивилик ишқа интилишни халиған. Мәсилән, Яқуп билән Йоһан Әйсадин униң Падишалиғида алаһидә орун беришини сориған. Шөһрәт вә нам-атаққа еришишни ойлиған бу шагиртлирини Әйса махтимиған. У 12 әлчисини чақирип, мундақ деди: «Ким араңларда биринчи болушни халиса, у һәммиси үчүн қул болуши лазим» (Марк 10:35—37, 43, 44). Бурадәрләр ақ нийәт билән башқилар үчүн хизмәт қилишни халиса, бу җамаәт үчүн чоң бир бәрикәт (Сал. 1-х. 2:8).

БАШҚИЛАРҒА ХИЗМӘТ ҚИЛИШ АРЗУ-ИСТИГИҢИЗНИ ҚАНДАҚ РИВАҖЛАНДУРАЛАЙСИЗ?

9. Башқиларға хизмәт қилиш арзу-истигиңизни қандақ риваҗландуралайсиз?

⁹ Шәк-шүбһисиз, сиз Йәһва Худани яхши көрисиз вә башқиларғиму хизмәт қилғуңиз келиду. Шуниңға қаримастин хизмәт ярдәмчиси болушни халимисиңизчу? Ундақта арзу-истигиңизни риваҗландурушқа немә ярдәм бериду? Етиқатдашларға хизмәт қилишниң қанчилик хошаллиқ әкелидиғанлиғи һәққидә ойлап көрүң. Әйса: «Елиштин көрә бериш бәхитлигирәк»,— дегән (Әлч. 20:35). У өзи мошу сөзләргә мас яшиған. У башқиларға хизмәт қилишта һәқиқәтән хошаллиқ тапқан. Сизму шундақ хошаллиққа еришәләйсиз.

10. Һәзрити Әйса башқиларға хизмәт қилиштин хошаллиқ тапқанлиғини қандақ көрсәткән? (Марк 6:31—34)

¹⁰ Әйса башқиларға хошаллиқ билән хизмәт қилған. Бир мисални көрүп бақайли (Марк 6:31—34ни оқуң). Бир күни Әйса билән униң әлчилири қаттиқ һерип кәткән. Шуңа бираз дәм елиш үчүн һечким йоқ йәргә барған. Лекин Әйсадин тәлим елишни халайдиған адәмләр шу йәргә улардин бурун келивалған. Әйса билән шагиртлириниң һәтта тамақлинишқиму вақти болмиғачқа, халайиққа тәлим бәрмәй, бир-икки ойни ейтипла өйлиригә қайтуривәтсиму болатти. Бирақ Әйса бу адәмләрни яхши көргәнликтин, уларни «көп нәрсиләргә үгитишкә башлиди». Һәтта кәч болуп қалсиму, у тәлим беришни тохтатмиди (Марк 6:35). Әйса уларға борчи болғанлиқтин әмәс, ич ағритқанлиқтин тәлим бәргән. Әйса уларни қаттиқ яхши көргәнликтин, тәлим беришни халиған. Башқиларға хизмәт қилиштин Әйса зор хошаллиққа еришкән.

11. Һәзрити Әйса тиңшиғучилириға қандақ әмәлий ярдәм бәргән? (Рәсимгиму қараң.)

¹¹ Әйса хәлиққә тәлим берипла қоймай, уларниң җисманий еһтияҗлириғиму ғәмхорлуқ қилған. Мәсилән, у мөҗүзә қилип белиқ билән нанни көпәйткән. Кейин уларни шагиртлириға тарқитип беришни ейтқан (Марк 6:41). Шундақ қилип, у шагиртлирини башқиларға қандақ қилип хизмәт қилишқа болидиғанлиғини үгәткән. Шундақла у әмәлий ярдәм беришиниң қанчилик муһим екәнлигини көрсәтти. Бүгүнки күндиму җамаәтниң хизмәт ярдәмчилири шундақ иш қиливатиду. Шагиртлар белиқ билән нанни хәлиқниң һәммисигә тойғичә тарқитип бәргәндә, қанчилик хошал болғанлиғини тәсәввур қилип беқиң (Марк 6:42). Бу Әйса башқиларниң мәнпәәтлирини өзиниңкидин көпирәк ойлиғанлиғиниң пәқәтла бир мисали. У йәрдә болғанда, һаятини башқиларға хизмәт қилиш үчүн беғишлиған (Мәт. 4:23; 8:16). Әйса башқиларни үгитип, ярдәм бәргәндә интайин хошал болған. Шәк-шүбһисизки, хизмәт ярдәмчиси болуп, башқилар үчүн җан пидалиқ билән хизмәт қилсиңиз, сизму шундақ хошаллиққа еришәләйсиз.

12. Немә үчүн хизмәт ярдәмчиси болуш үчүн алаһидә қабилийитим йоқ дәп ойлимаслиғимиз керәк?

¹² Әгәр хизмәт ярдәмчиси болуш үчүн алаһидә қабилийитим йоқ дәп ойлисиңиз, көңлүңизни чүшәрмәң. Сиздә җамаәткә пайдилиқ болидиған хисләтлириңиз бар екәнлиги сөзсиз. Коринтлиқларға 1-хәт 12:12—30 айәтләрдики әлчи Паулниң сөзлирини оқуп, һаятиңизда қандақ қоллинишқа болидиғанлиғини чүшиниш үчүн Йәһвадин ярдәм сораң. Паулниң сөзлири сизниңму җамаәттә өз орниңиз бар екәнлигини ениқ көрситиду. Хизмәт ярдәмчиси болуш үчүн қоюлған тәләпләргә техи лайиқ болмисиңиз үмүт үзүшниң орниға, қолуңиздин келишичә Йәһва Худаға хизмәт қилиң вә етиқатдашларға ярдәм беришкә тиришиң. Ақсақаллар сизни һемишәм ойида тутиду. Улар қолуңиздин келидиған тапшуруқларни беридиғанлиғиға гуман қилмаң (Рим. 12:4—8).

13. Хизмәт ярдәмчилиригә қоюлған тәләпләрниң көпинчиси тоғрилиқ немә ейтишқа болиду?

¹³ Хизмәт ярдәмчи болушқа интилишниң йәнә бир сәвәви — уларға қоюлған тәләпләрниң көпинчиси Худаниң һәммә хизмәтчилиригә қоюлиду. Мәсилән, һәммимиз Йәһва Худа билән мунасивитимизни мәһкәм қилип, Уни хурсән қилишқа тиришимиз вә башқиларға ярдәм қилиштин хошал болумиз. Демәк, сиздә хизмәт ярдәмчиси болушқа керәклик хисләтләрниң көпинчиси бар. Мәхситиңизгә йетиш үчүн сизгә йәнә немә қилиш керәк?

ХИЗМӘТ ЯРДӘМЧИСИ БОЛУШ ҮЧҮН НЕМӘ ҚИЛИШ КЕРӘК?

14. «Җиддий болуш» немини билдүриду? (Тимотийға 1-хәт 3:8—10, 12)

¹⁴ Тимотийға 1-хәт 3:8—10, 12ни (оқуң) айәтләрдә йезилған бәзи тәләпләрни муһакимә қилайли. Хизмәт ярдәмчиси «җиддий болуши керәк». Бу сөз-ибарини «җавапкар», «һөрмәткә сазавәр», «инавәтлик болуш» дәп тәрҗимә қилишқа болиду. Бу күтүшкә яки чақ-чақ қилишқа болмайду дегәнни билдүрмәйду (Вәз 3:1, 4). Әксичә бәргән вәзипиләрни бар күчиңизни селип орунлишиңизни билдүриду. Әгәр ишәнчлик адәм болсиңиз, җамаәттики қериндашлар сизни һөрмәтләйдиған болиду.

15. «Иккиүзлүк» әмәс вә «натоғра киримгә тамагәр әмәс» дегән сөзләр немини билдүриду?

¹⁵ «Иккиүзлүк» әмәс дегән растчил, сәмимий вә ишәнчлик адәм болушни билдүриду. Шундақ адәм сөзидә туриду вә башқиларни алдимайду (Пәнд н. 3:32). У «натоғра киримгә тамагәр әмәс», йәни башқилар билән ишлигәндә растчил болиду. Ундақ адәм пул тепиш үчүн етиқатдашларни өз мәнпәити үчүн пайдиланмайду.

16. а) «Һарақ-шарапқа берилмәйду» дегән немини билдүриду? ә) «Пак вижданға» егә дегән немини билдүриду?

¹⁶ Хизмәт ярдәмчиси «Һарақ-шарапқа берилмәйду», йәни һарақ-шарапни көп ичмәйду вә шундақ атаққа егә әмәс. Шундақла у «пак вижданға» егә, демәк Худаниң тәләплиригә мас һаят кәчүриду. Намукәммәл болсиңизму, Йәһва Худа билән яхши мунасивәттә болуп, вижданиңиз таза, жүригиңиз тинч болалайду.

17. «Улар авал ярамлиққа синалсун» дегән немини билдүриду? (Тимотийға 1-хәт 3:10; рәсимгиму қараң.)

¹⁷ «Улар авал ярамлиққа синалсун» дегән сөзләр ақсақаллар сизниң тапшурулған вәзипиләрни атқуралайдиғанлиғиңизға вә җавапкар адәм екәнлигиңизгә көз йәткүзүши керәк. Шуңа, сизгә тапшурулған ишни ақсақалларниң вә тәшкилатимизниң көрсәтмилири бойичә қилиң. Вәзипиңизгә немә киридиғанлиғини вә уни қачан түгитишиңиз керәклигини ениғирақ чүшинивелиң. Берилгән һәрбир тапшуруқни әстаидил орунлайдиған болсиңиз, бурадәр-қериндашлар сизниң җавапкар адәм екәнлигиңизни байқайду. Ақсақаллар, чөмдүрүштин өткән бурадәрләрни һемишәм үгитиңлар (Тимотийға 1-хәт 3:10ни оқуң). Җамаитиңиздә чөмдүрүштин өткән 10—14 яштики яки униңдинму кичик балилар барму? Улар шәхсий үгиниш өткүзәмду вә җамаәт учришишлириға тәйярлиқ қиламду? Учришишларда дайим җавап берәмду? Вәз хизмитигә чиқамду? Әгәр шундақ қиливатқан болса, йешиға лайиқ тапшуруқларни бәрсәңлар болиду. Шу чағда уларниң ярамлиқ екәнлиги синилиду вә 17 яшқа киргәндә, хизмәт ярдәмчиси болуп тәйинлиниши мүмкин.

18. «Әйипсиз» болуш дегән немини билдүриду?

¹⁸ Хизмәт ярдәмчилири «әйипсиз» болуши лазим. Бу дегинимиз һечкимниң уларни еғир гуна қилди дәп әйипләшкә асаси болмаслиғи керәк. Әлвәттә, бәзидә башқилар мәсиһийләрни ялған әйиплиши мүмкин. Әйсағиму башқилар ялған яла япқан вә у әгәшкүчилириму шундақ вәзийәткә дуч келидиғанлиғини ейтқан (Йоһ. 15:20). Лекин Әйсаға охшаш жүрүш-турушиңлар пак болса, җамаәттикиләрниң алдида яхши нам-абройға еришәләйсиз (Мәт. 11:19).

19. «Бир аяллиқ» болуш дегән немини өз ичигә алиду?

¹⁹ Хизмәт ярдәмчиси «бир аяллиқ» болуши керәк. Йәһва Худа некада бир әр вә бир аял болғанлиғини халиған. Худаниң һәммә хизмәтчилири шуниңға лайиқ яшиши лазим (Мәт. 19:3—9). Мәсиһий әр киши һәргиз җинсий әхлақсизлиқ қилмаслиғи керәк (Ибр. 13:4). Униңдин башқа, у башқа аялға орунсиз көңүл бөлүштин нери болуп, өмүрлүк җорисиға вападар болуши муһим (Аюп 31:1).

20. Әр киши «пәрзәнтлирини вә өйдикилирини яхши башқуридиғанлиғини» қандақ көрситиду?

²⁰ «Пәрзәнтлирини вә өйдикилирини яхши башқуридиған болсун». Әгәр сиз аилә беши болсиңиз, вәзипилириңизни җавапкарлиқ билән атқуруң. Дайим аиләвий ибадәтни өткүзүп, аялиңиз вә балилириңиз билән вәз хизмитигә пат-пат чиқип туруң. Балилириңизға Йәһва Худа билән йеқин мунасивәттә болушиға ярдәм бериң (Әфәс. 6:4). Өз аилисигә яхши ғәмхорлуқ қилидиған әр киши җамаәттикиләргиму яхши ғәмхорлуқ қилалайду (Тимотийға 1-хәт 3:5ни селиштуруң).

21. Әгәр сиз техи хизмәт ярдәмчиси болмисиңиз, немә қилсиңиз болиду?

²¹ Бурадәрләр, әгәр техи хизмәт ярдәмчиси болмисиңиз, илтимас, бу мақалини пухта тәтқиқ қилип, хизмәт ярдәмчиси болуш тоғрилиқ дуа қилиң. Хизмәт ярдәмчилиригә қоюлған тәләпләрни тәтқиқ қилиң, кейин шу тәләпләргә лайиқ болуш үчүн бар күчиңизни чиқириң. Йәһва Худани, етиқатдашлириңизни қанчилик яхши көрүдиғанлиғиңиз тоғрилиқ ойлинип көрүң. Уларға хизмәт қилиш арзу-истигиңизни риваҗландуруң (Пет. 1-х. 4:8, 10). Шу чағда җамаәттики бурадәр-қериндашларға хизмәт қилиштин хошаллиққа еришисиз. Йәһва Худа хизмәт ярдәмчиси болуш үчүн қиливатқан һәрикәтлириңизни мол бәрикәтлисун! (Флп. 2:13)