Йәһва гувачилири өз хизмитини яхши атқуруши үчүн билимни қәйәрдин алиду?

Йәһва гувачилири Худаға лайиқ һаят кәчүрүп, хизмитини яхши атқуруш үчүн дайим тәлим алиду. Бу хизмәт — Худа Падишалиғи тоғрилиқ хуш хәвәрни вәз қилиш вә тәлим беришни өз ичигә алиду. Әйса пәйғәмбәр буни шагиртлириға буйриған еди (Мәтта 24:14; 28:19, 20). Биз бу тапшуруқни орунлаш үчүн һәр һәптидә өтидиған җамаәт учришишлирида, регионлуқ вә районлуқ конгрессларда үгинимиз. Шундақла, тәшкилатта яки җамаәттә қандақту бир вәзиписи бар Йәһва гувачилири Муқәддәс китапқа асасланған мәктәпләрдә мәхсус билим алиду.

Бу мақалидә:

• Йәһва гувачилири билимни қәйәрдин алиду?

• Йәһва гувачилириниң Муқәддәс китапқа асасланған мәктәплири

• Йәһва гувачилириниң алидиған тәлими немигә асаслиниду?

• Улар алидиған билими үчүн пул төләмду?

• Улар алидиған билиминиң қандақ пайдисини көрмәктә?

Йәһва гувачилири билимни қәйәрдин алиду?

Җамаәт учришишлири. Биз һәр һәптидә икки қетим Ибадәт өйи дәп атилидиған җайда җәм болимиз. Бир учришишимиз һәптиниң оттурисида, йәнә башқиси дәм елиш күнлири өтиду. Һәммиси үчүн ишик очуқ вә пул жиғилмайду.

• Һәптә оттурисидики учришиш. Бу учришишта биз саватлиқ оқуш, адәмләр билән сөһбәтлишиш, сәһнидин сөзләш, вәз қилиш вә тәлим бериш маһаритимизни ашуримиз. Буларни нутуқлар, муһакимиләр, көрүнүшләр һәм видеолар арқилиқ үгинимиз. Бу билим бизгә адәмләргә Муқәддәс китаптики хәвәрни йәткүзүшкә вә көпирәк билишни халиған адәмләр билән үгиниш дәрисини яхши өткүзүшкә ярдәм бериду. Учришишқа қатнашқанларниң һәммиси бу билимниң пайдисини көрәләйду. Әң муһими, бизниң учришишлиримиз Худаға болған ишәнчимизни вә меһир- муһәббитимизни күчәйтип, етиқатдашлиримизни яхши көрүшни үгитиду.

• Дәм елиш күнлири өтидиған учришиш. Бу учришиш икки қисимдин ибарәт болуп, көпчиликкә беғишланған аммивий нутуқтин башлиниду. Кейин «Күзитиш мунари» журналидики бир мақалә соал-җавап арқилиқ муһакимә қилинидуa. Бу мақалиләрдә күндилик турмушимизда һәм Худаға болған хизмитимизни яхши атқурушқа ярдәм беридиған Муқәддәс китаптики мавзулар вә принциплар чүшәндүрүлиду.

Конгресслар. Биздә һәр жили 3 чоң учришиш болиду. Бу учришишқа көплигән җамаәтләр қатнишиду. Конгрессларда Муқәддәс китапқа асасланған бир мавзу чоңқурирақ қараштурилиду һәм нутуқлар, көрүнүшләр, сөһбәтләр вә видеолар болиду. Конгресслиримиз башқиму учришишларға охшаш, Муқәддәс китапни чоңқурирақ билип, яхши вәз ейтқучи вә тәлим бәргүчи болушқа ярдәм бериду. Һәммиси үчүн ишик очуқ вә пул жиғилмайду.

Йәһва гувачилириниң Муқәддәс китапқа асасланған мәктәплири

Бәзибир Йәһва гувачилири көпирәк билим елиш үчүн Муқәддәс китапқа асасланған һәрхил мәктәпләргә тәклип қилиниду. Бу қандақ мәктәпләр? Мәктәпләрниң мәхсити немә вә у йәрдә қанчә вақит оқуш керәк? Кимләр бу мәктәпләргә тәклип қилиниду?

Пионерлиқ хизмәт мәктиви

• Мәхсити: Пионерb — толуқ вақитлиқ хизмәтчи. Улар вәз қилиш вә тәлим бериш маһаритини ашуруш үчүн мошу мәктәптә оқуйду. Дәрисләр муһакимә, нутуқлар, көрүнүшләр вә тәҗрибилик савақлардин тәшкилләнгән.

• Қанчә вақит давамлишиду? Алтә күн.

• Кимни тәклип қилиду? Пионер сүпитидә хизмәт қилғиниға бир жил болғанлар вә ахирқи 5 жилда Пионерлиқ хизмәт мәктивидә оқумиғанларму чақирилиду.

Падишалиқ вәз ейтқучилири үчүн мәктәп

• Мәхсити: Тәҗрибә топлиған толуқ вақитлиқ хизмәтчиләр мошу мәктәптә мәхсус тәлим алиду. Оқуғучилар вәз қилиш билән тәлим бериш маһаритини ашуриду вә Муқәддәс китапни чоңқур тәтқиқ қилиду. Мәктәпни тамамлиған оқуғучиларниң көпинчиси вәз ейтқучиларға муһтаҗ болған йәрләргә хизмәт қилишқа әвәтилиду.

• Қанчә вақит давамлишиду? Икки ай.

• Кимни тәклип қилиду? Бу мәктәпкә бәлгүлүк тәләпләргә мас келидиған һәм вәз ейтқучилар аз йәрдә хизмәт қилишқа имканийити бар пионерлар тәклип қилиниду.

Җамаәт ақсақаллири үчүн мәктәп

• Мәхсити: Бу мәктәп ақсақалларғаc тәлим бериш вә җамаәт әзалириға илһам-мәдәт беришкә охшаш җамаәттики вәзипилирини яхши орунлашқа үгитиду. Шундақла, Худаға вә етиқатдашларға болған меһир-муһәббитини ашурушқа ярдәм бериду (Петрусниң 1-хети 5:2, 3).

• Қанчә вақит давамлишиду? Бәш күн.

• Кимни тәклип қилиду? Йеңидин тәйинләнгән ақсақаллар вә ахирқи бәш жил ичидә бу мәктәптә оқумиған тәҗрибилик ақсақаллар тәклип қилиниду.

Районға җавапкар ақсақаллар билән аяллириға беғишланған мәктәп

• Мәхсити: Җамаәтләрни зиярәт қилидиған хизмәтчиләр районға җавапкар ақсақал дәп атилиду. Бу мәктәп уларни өз вәзипилирини үнүмлүк атқурушқа ярдәм бериду (Тимотийға 1-хәт 5:17). Мәзкүр мәктәп районға җавапкар ақсақалларғаd вә уларниң аяллириға Муқәддәс китапни чоңқурирақ чүшинишкә ярдәм бериду.

• Қанчә вақит давамлишиду? Бир ай.

• Кимни тәклип қилиду? Йеңидин тәйинләнгән районға җавапкар ақсақаллар вә уларниң аяллири бир жил хизмәт қилғандин кейин тәклип қилиниду. Кейин улар мошу мәктәптә бәш жилда бир қетим оқуйду.

Падишалиқ хизмәт мәктиви

• Мәхсити: Ақсақалларға вә хизмәт ярдәмчилиригәe ахирқи өзгиришләргә вә еһтияҗларға мас җамаәттики вәзипилирини орунлашқа ярдәм бериду (Тимотийға 2-хәт 3:1). Бу мәктәп бирнәччә жилда бир қетим өтиду.

• Қанчә вақит давамлишиду? Һәрхил, көпинчә бир күн.

• Кимни тәклип қилиду? Районға җавапкар ақсақаллар, җамаәттики ақсақаллар вә хизмәт ярдәмчилири оқуйду.

Бәйтәллик хизмәт мәктиви

• Мәхсити: Бәйтәлдәf хизмәт қиливатқанларға өз хизмәтлирини үнүмлүк атқурушқа, Худани вә адәмләрни көпирәк яхши көрүшкә ярдәм бериду.

• Қанчә вақит давамлишиду? Бәш йерим күн.

• Кимни тәклип қилиду? Бәйтәлдә йеңидин хизмәт қилишқа башлиған хизмәтчиләр бу мәктәпкә тәклип қилиниду. Бәйтәлдә узақ вақит хизмәт қиливатқанлар болса, бәш жилда бир қетим мошу мәктәпкә тәклип қилиниши мүмкин.

Гилиад мәктиви

• Мәхсити: Оқуғучиларниң Худаниң Сөзигә болған миннәтдарлиғини техиму өстүрүп, билгәнлирини әмәлийәттә қоллинишқа ярдәм бериш (Салоникилиқларға 1-хәт 2:13). Гилиад мәктивидә билим алған Худаниң садиқ хизмәтчилири Йәһва Худаниң тәшкилатида вә дуниявий ақартиш ишида көпирәк ярдәм берәләйду. Мәктәпни тамамлиғучилар өз дөлитидә яки башқа дөләттә йә вәз ейтиш хизмитигә, йә филиалда хизмәт қилишқа тәйинлиниши мүмкин.

• Қанчә вақит давамлишиду? Бәш ай.

• Кимни тәклип қилиду? Филиал толуқ вақит хизмәт қиливатқанларни таллап, уларни илтимас хетини толдурушқа сорайду. Бу мәктәп Қошма Штатлардики Нью-Йорк шәһири, Паттерсондики Күзитиш мунариниң маарип мәркизидә өтиду.

Филиал комитетиниң әзалири вә аяллириға беғишланған мәктәп

• Мәхсити: Филиал комитетиниңg әзалирини филиалда атқурулуватқан ишларға вә филиалниң қол астидики территориядики Йәһва гувачилириниң иш-паалийитигә яхши ғәмхорлуқ қилишни үгитиду.

• Қанчә вақит давамлишиду? Икки ай.

• Кимни тәклип қилиду? Йәһва гувачилириниң дуниявий баш идариси филиал комитетлириниң әзалирини таллап, уларни аяллири билән мошу мәктәптә тәлим елишқа чақириду. Мәзкүр мәктәп Нью-Йорк шәһири, Паттерсондики Күзитиш мунариниң маарип мәркизидә өтиду.

Йәһва гувачилириниң алидиған тәлими немигә асаслиниду?

Йәһва гувачилириниң алидиған һәммә билими Муқәддәс китапқа асасланған. Муқәддәс китап Худаниң рәһбәрлиги астида йезилип, униңда һаятимизниң һәрбир саһасида пайдилиқ болидиған әң яхши мәслиһәтләр йезилғанлиғиға ишәнчимиз камил (Тимотийға 2-хәт 3:16, 17).

Улар алидиған билими үчүн пул төләмду?

Яқ. Мәктәпләрниң һәммиси һәқсиз. Йәһва гувачилириниң иш-паалийити ихтиярий ианиләрниң ярдими билән әмәлгә ашиду (Коринтлиқларға 2-хәт 9:7).