Йәһва Худаниң сизни кәчүргәнлигигә ишиниң

1, 2. Гуналиримизға товва қилғанда, Йәһва Худа немә қилиду? (Рәсимгиму қараң.)

ДАВУТ ПАДИША қилған еғир гуналири үчүн өз гөшини өзи йегән (Зәб. 40:12; 51:3). Лекин у чин жүрәктин товва қилғанлиқтин, Йәһва Худа уни кәчүргән (Сам. 2-яз. 12:13). Давут Йәһва Худа уни кәчүргәнлигини чүшәнгәндә, интайин хошал болған (Зәб. 32:1).

² Йәһва Худа бизгә рәһим-шәпқәт көрситип, гуналиримизни кәчүргәндә, бизму Давутқа охшаш хошал болалаймиз. Һәтта еғир гуна қилип қойсақму, чин жүрәктин товва қилип, Йәһвадин кәчүрүм сорисақ, ақсақаллар билән сөзләшсәк вә бу ишни қайтилимаслиққа тиришсақ, Худайимиз бизни кәчүрүшкә тәйяр. Биз буни билгәндә, көңлүмиз арам тапиду (Пәнд н. 28:13; Әлч. 26:20; Йоһ. 1-х. 1:9). Йәһва Худа бизни кәчүргәндә миннәт қилмайдиғанлиғини вә һечқачан җазалимайдиғанлиғини билиш — зор хошаллиқ (Әзәк. 33:16).

3, 4. Бир қериндишимиз чөмдүрүлүгәндин кейин өзини қандақ һис қилди вә бу мақалидә немини муһакимә қилимиз?

³ Лекин бәзидә Йәһва Худа бизни һәқиқәтән кәчүргәнлигигә гуман қилишимиз мүмкин. Йәһва гувачилириниң аилисидә чоң болған Дженниферниң мисалини көрүп чиқайли. Өсмүр чеғида у ата-анисидин йошурун әхлақсиз ишларни қилди. Лекин вақит өтүп у һаятини өзгәртип, Йәһва Худаға һаятини беғишлап, чөмдүрүлүштин өтти. У мундақ дәйду: «Бурун мән бузуқчилиқ қилаттим, мәс болғичә ичәттим, байлиқни қоғлаттим вә аччиғим яман болатти. Муқәддәс китаптин төләмниң асасида Йәһва Худа гуналиримизни кәчүридиғанлиғини билсәмму, өзүмни буниңға ишәндүрәлмәттим».

⁴ Бәлким, сизму “қилған хаталиқлирим үчүн Йәһва Худа техичә маңа хапа болуватиду” дәп ойлайдиғансиз? Давут падиша Йәһваниң рәһим-шәпқәтлик екәнлигини билгәнликтин, уни кәчүргәнлигигә һеч гуман қилмиған. Йәһва Худа сизниңму шундақ һис-туйғуда болушиңизни халайду. Бу мақалидә биз Йәһваниң бизни кәчүргәнлигигә ишиниш немә үчүн муһим вә буниңға ишәнчлик болушимизға немә ярдәм берәләйдиғанлиғини көрүп чиқимиз.

ЙӘҺВАНИҢ БИЗНИ КӘЧҮРГӘНЛИГИГӘ ИШИНИШ НЕМӘ ҮЧҮН МУҺИМ?

5. Шәйтан бизниң немигә ишинишимизни халайду? Мисал кәлтүрүң.

⁵ Йәһваниң бизни кәчүргәнлигигә ишәнсәк, Шәйтанниң тузиғиға чүшүп қалмаймиз. Шәйтан Йәһва Худаға болған хизмитимизни тохтитишқа қайта-қайта урунидиғанлиғини унтумаң. Өз мәхситигә йетиш үчүн у бизни гуналиримиз интайин җиддий болғанлиқтин, Йәһва Худа бизни һечқачан кәчүрмәйду дегәнгә ишәндүрүшкә тиришиду. Җинсий әхлақсизлиқ сәвәвидин Коринт җамаитидин чиқирилған кишиниң мисалини көрүп чиқайли (Кор. 1-х. 5:1, 5, 13). Кейинирәк у товва қилған. Шундақ болсиму, Шәйтан җамаәттикиләрниң уни кәчүрүшини вә қайта җамаәткә қобул қилишини халимиған. Әгәр җамаәт уни кәчүрмигән болса, у Йәһва Худа уни һечқачан кәчүрмәйду дәп ойлап, һәтта Йәһваға хизмәт қилишни тохтитиши мүмкин еди. Шәйтан бүгүнму охшаш һийлә-микирләрни ишлитиду. Лекин биз униң һийлә-амаллиридин «бехәвәр әмәсмиз» (Кор. 2-х. 2:5—11).

6. Өтмүштә қилған гунайимиз үчүн өзүмизни техичә әйиплик һис қилсақ, немә қилалаймиз?

⁶ Йәһваниң бизни кәчүргәнлигигә ишәнгәндә, қайтидин хошаллиққа еришимиз. Гуна қилғанда, адәттә биз өзүмизни әйиплик һис қилимиз (Зәб. 51:17). Шундақ болғини яхши, чүнки өзүмизни әйиплик һис қилғанда, вижданимиз бизни яхши тәрәпкә өзгиришкә вә тоғра ишларни қилишқа дәвәт қилиду (Кор. 2-х. 7:10, 11). Лекин Йәһва Худа мени кәчүрмиди дәп ойлавәрсәк, чүшкүнлүккә чүшүп, һәтта Униңға хизмәт қилмай кетишимиз мүмкин. Әксичә, биз Худаниң бизни һәқиқәтән кәчүргәнлигигә ишәнгәндә, виждан азавидин айрилимиз. Шу чағда биз Йәһва Худаға пак виждан вә хошаллиқ билән хизмәт қилалаймиз (Кол. 1:10, 11; Тим. 2-х. 1:3). Ундақта, Йәһваниң бизни кәчүргәнлигигә өзүмизни қандақ ишәндүрәләймиз?

ЙӘҺВАНИҢ КӘЧҮРГӘНЛИГИГӘ ИШИНИШКӘ НЕМӘ ЯРДӘМ БЕРӘЛӘЙДУ?

7, 8. Йәһва Худа Өзи тоғрилиқ немә дегән вә бу бизни немигә ишәндүриду? (Чиқиш 34:6, 7)

⁷ Йәһва Худа Өзи тоғрилиқ немә ейтқанлиғи һәққидә ойлинип көрүң. Худаниң Синай теғида Муса пәйғәмбәргә немә ейтқанлиғиға диққәт ағдуруңa (Чиқиш 34:6, 7ни оқуң). Йәһваниң нурғун есил пәзиләтлири болсиму, У Өзини «рәһимлик һәм һиммәтлик» дәп тәсвирләшни орунлуқ көрди. Ундақта, Йәһва Худани яхши көридиған киши гуна қилип қоюп, гунасиға чин жүрәктин товва қилса, Худайимиз уни кәчүрмәйду дәп ойламсиз? Шундақ қилған болса, Йәһва Худа рәһимсиз вә таш жүрәк болатти. Лекин көйүмчан Атимизниң шундақ қилиши мүмкин әмәс.

⁸ Йәһва һәқиқәтниң Худаси вә У һечқачан ялған сөзлимәйду (Зәб. 31:5). Шуңа биз Униң рәһимлик екәнлигигә пүтүнләй ишинәләймиз. Әгәр қилған гуналириңиз үчүн өз-өзүңизни кәчүрәлмәйватсиңиз, өзүңиздин мундақ сорап көрүң: «Мән Йәһваниң һәқиқәтән рәһимлик екәнлигигә вә гунасиға товва қилған һәрқандақ кишини кәчүрәләйдиғанлиғиға ишинимәнму?» Буниңға ишәнсиңиз, Униң чоқум сизниму кәчүргәнлигигә һеч гуман қилмаң.

9. Зәбур 32:5-айәттин Йәһва Худаниң кәчүрүми тоғрилиқ немини үгинимиз?

⁹ Муқәддәс китапта Худаниң кәчүрүми тоғрилиқ немә йезилғанлиғи һәққидә ойлинип көрүң. Мәсилән, Давут падишаниң Йәһва Худаниң кәчүрүми тоғрилиқ немә язғанлиғини көрүп чиқайли (Зәбур 32:5ни оқуң). У мундақ дегән: «Сән мениңдин гунайимниң әйивини еливәттиң». Шуңа Йәһва Худа Давутни кәчүргәндә, у худди мүрисидин еғир бир жүк елип ташланғандәк һис қилған (Зәб. 32:2—4). Бизму Давутқа охшаш хошаллиққа еришәләймиз. Гуналиримизға чин жүрәктин товва қилсақ, биз зилдәк еғир әйиптин айрилип вә Йәһваниң бизни кәчүргәнлигини билип, хошал болалаймиз.

10, 11. Зәбур 86:5-айәттин Йәһва Худаниң кәчүрүми тоғрилиқ немини билимиз?

¹⁰ Зәбур 86:5ни оқуң. Бу айәттә Давут Йәһва Худаниң кәчүрүшкә тәйяр екәнлигини язған. Демәк, биз хаталиқ өткүзгәндә, Йәһва Худа дәрру аччиқланмайду вә товва қилған кишиләрни кәчүрүшкә тәйяр. Яратқучимиз немә үчүн шунчилик кәчүрүмчан? Бу айәттә мундақ чүшәндүрүлгән: «Сениң вапа меһриң Сени чақирған барлиғиға йетиду». Өткән мақалидә үгәнгинимиздәк, Йәһва Худа Уни яхши көргән кишиләргә садиқ меһир-муһәббәт көрситип, уларни һечқачан ташлап кәтмәйдиғанлиғини вәдә қилған. Гуна қилған киши гунасиға товва қилса, Йәһва Худа униңға рәһим-шәпқәт көрситип, уни толуғи билән кәчүриду (Йәшая 55:7). Шуңа Йәһва Худаниң гуналириңизни кәчүргәнлигигә ишиниш қийин болса, өзүңиздин мундақ сорап көрүң: «Мән Йәһваниң униңға дуа қилип, рәһим-шәпқитини сорап, гуналириға товва қилғанларниң һәммисини кәчүрүшкә тәйяр екәнлигигә ишинимәнму? Ундақта, Худаниң маңиму рәһим-шәпқәт көрситип, гуналиримни кәчүргәнлигигә ишинишим керәк әмәсму?»

¹¹ Муқәддәс китапта йезилғандәк, Йәһва Худа бизниң гунакар тәбиитимизни яхши билиду вә намукәммәл екәнлигимизни чүшиниду. Бу бизгә илһам-мәдәт бериду (Зәб. 139:1, 2). Давут язған йәнә бир зәбурни вә у Йәһваниң бизни кәчүргәнлигигә ишинишимизгә қандақ ярдәм берәләйдиғанлиғини көрүп чиқайли.

ЙӘҺВА ХУДАНИҢ БИЗНИ ЯХШИ БИЛИДИҒАНЛИҒИНИ УНТУМАЙЛИ

12, 13. Зәбур 103:14-айәткә мас, Йәһва Худа немини әстә тутиду вә бу Уни немә қилишқа дәвәт қилиду?

¹² Зәбур 103:14ни оқуң. Давут падиша Йәһва Худа «бизниң топа екәнлигимизни әстә тутиду» дәп ейтқан. Бу сөзләр билән Давут Йәһва Худаниң гуналириға товва қилған хизмәтчилирини кәчүрүшкә тәйяр болғанлиғиниң бир сәвәвини чүшәндүргән. У бизниң гунакар тәбиитимизни яхши билиду. Бу сөзләрниң мәнасини тәпсилий көрүп чиқайли.

¹³ Давут Йәһва Худаниң әслимизни яхши билидиғанлиғини ейтқан. Йәһва Худа Адәм атини топидин яратқанлиқтин, инсанларниң немигә муһтаҗ екәнлигини убдан билиду. Мәсилән, У һәтта мукәммәл адәмләрму тамақ йейишкә, ухлашқа вә нәпәс елишқа муһтаҗ екәнлигини чүшиниду (Ярит. 2:7). Лекин Адәм ата билән Һава ана гуна қилғанда, топидин яритилғанлиғимизниң башқа бир мәнаси ениқ болди. Гунани мирас қилғанлиқтин, биз яман ишларни қилишқа майил. Йәһва Худа буни яхши билиду. Лекин Йәһва Худа «топа екәнлигимизни әстә тутиду». Демәк, У бизниң дайим хаталиқларни өткүзидиғанлиғимизни билгәнликтин, бизгә рәһим-шәпқәт көрситиду. Яратқучимиз арилап-арилап гуна қилидиғанлиғимизни билгәчкә, чин жүрәктин товва қилғанлиғимизни көргәндә, бизни кәчүриду (Зәб. 78:38, 39).

14. а) Давут Йәһва Худаниң кәчүрүми тоғрилиқ йәнә немә ейтқан? (Зәбур 103:12) ә) Худаниң Давутни қандақ кәчүргәнлигидин немини үгинимиз? («Йәһва Худа кәчүриду вә гунани әскә алмайду» дегән рамкиға қараң.)

¹⁴ Зәбур 103-баптин Йәһваниң кәчүрүми тоғрилиқ йәнә немини биливалимиз? (Зәбур 103:12ни оқуң) Давут ейтқандәк, Йәһва Худа бизни кәчүргәндә, гуналиримизни «шәриқ ғәриптин қанчә жирақ» болса, шунчилик жирақ қилиду. Шәриқ билән ғәрип қариму қарши тәрәптә болғанлиқтин, улар һечқачан учрашмайду. Демәк, Йәһва Худа бизни кәчүргәндә, У гуналиримизни жирақ бир йәргә апирип ташлиғандәк болиду. У гуналиримизни әнди һечқачан әскә алмайду вә улар үчүн бизни әйипләп, җазалимайду (Әзәк. 18:21, 22; Әлч. 3:19).

15. Өтмүштики гуналириңиз үчүн өзүңизни әйиплисиңиз, немә қилсиңиз болиду?

¹⁵ Йәһваниң сизни кәчүргәнлигигә ишинишиңизгә Давутниң Зәбур 103-баптики сөзлири қандақ ярдәм берәләйду? Унтумаңки, Йәһва Худа намукәммәл екәнлигиңизни билиду. У гуналириға чин жүрәктин товва қилған кишиләрни кәчүриду. Сизму гунайиңизға пушайман қилип, һаятиңизни өзгәрттиңиз. Әстә тутуңки, Йәһва Худа кәчүрүп болған гуналиримизни һечқачан қайта әслимәйду. Шуңа У сизни гуналириңиз үчүн қайтидин әйиплимәйду яки җазалимайду (Зәб. 103:3). Йәһва Худа өтмүштики гуналириңизни әсләп, кона хаманни сорумайду. Сизму шундақ қилмаслиғиңиз керәк. Йәһваниң бизни һәқиқәтән кәчүргәнлигигә ишәнгәндә, өз-өзүмизни әйипләшни тохтитип, Униңға хошаллиқ билән хизмәт қилалаймиз.

16. Йәһва Худа кәчүрүп болған гуналиримиз тоғрилиқ қайта-қайта ойлашниң хәтәрлик екәнлигини чүшәндүрүп бериң (Рәсимгиму қараң.).

¹⁶ Бир мисални көрүп чиқайли. Бирси машинини һайдиғанда кәйнидә немә болуватқанлиғини көрүш үчүн анда-санда әйнәккә қариши керәк. Лекин у әйнәккә қаравәрсә, бу интайин хәтәрлик. Бехәтәр һайдаш үчүн у алдидики йолға диққәт ағдуруши керәк. Дәл шуниңға охшаш, бәзидә өткүзгән хаталиқлиримиз тоғрилиқ ойлансақ яхши. Шу чағда биз бу хаталиқларни қайтидин қилмайдиған болимиз. Амма биз Йәһва Худа кәчүрүп болған гуналиримиз тоғрилиқ қайта-қайта ойлавәрсәк, хошаллиғимизни йоқитип, Худаға бар күчимиз билән хизмәт қилалмаймиз. Буниң орниға, бар диққитимизни Йәһваға хизмәт қилишқа қаритип, өтмүштики яман ишлар әскә кәлмәйдиған әҗайип келәчәк тоғрилиқ ойлинайли (Йәшая 65:17; Пәнд н. 4:25).

ӨЗ-ӨЗҮҢИЗНИ ДАВАМЛИҚ ИШӘНДҮРҮҢ

17. Өз-өзүмизни Йәһваниң бизни яхши көридиғанлиғиға вә гуналиримизни кәчүридиғанлиғиға ишәндүрүш немә үчүн муһим?

¹⁷ Йәһваниң бизни яхши көридиғанлиғиға вә һәрқачан кәчүрүшкә тәйяр екәнлигигә ишәнчлик болушимиз керәк (Йоһ. 1-х. 3:19). Немә үчүн? Чүнки Шәйтан бизни Йәһва Худаниң меһир-муһәббити вә кәчүрүмигә лайиқ әмәс екәнлигимизгә ишәндүрмәкчи. Шәйтанниң мәхсити — Йәһва Худаға хизмәт қилишимизни тохтитиш. Шуңа Шәйтан өз вақтиниң аз қалғанлиғини билип, бизгә бар күчи билән һуҗум қилиду (Вәһ. 12:12). Лекин келиңлар, Шәйтанға қарши туруп, Худаға садиқ хизмәт қилишни давамлаштурайли!

18. Йәһваниң сизни яхши көридиғанлиғиға вә кәчүрүшкә тәйяр екәнлигигә немә үчүн ишинисиз?

¹⁸ Өткән мақалидә Йәһва Худаниң сизни яхши көридиғанлиғиға гуман қилмаслиқ үчүн немә қилишни үгинивалдиңиз. Бу мақалидә болса, Йәһва Худаниң сизни кәчүргәнлигигә ишәнчиңиз камил болуши үчүн немә қилишни биливалдиңиз. Мәсилән, Йәһва Худаниң Өзи тоғрилиқ немә ейтқанлиғини әстә тутуң. Муқәддәс китапта Йәһваниң қандақ кәчүридиғанлиғи тоғрилиқ йезилғанлар һәққидә чоңқур ойлиниң. Шундақла Худаниң гунакар екәнлигимизни билип, бизгә рәһим көрситидиғанлиғини унтумаң. У бизни кәчүргәндә гуналиримизни қайта әскә алмайду. Шу чағда сиз Йәһва Худа сизгә рәһим-шәпқәт көрсәткәнликтин хошал болуп, Давутқа охшаш: «Сән мениңдин гунайимниң әйивини еливәттиң»,— дәп ейталайсиз (Зәб. 32:5).