Мәңгү мәвҗут болидиған шәһәрни күтәйли

1. Әйса Йерусалим тоғрилиқ қандақ пәйғәмбәрлик сөзләрни ейтқан?

ӘЙСА өлүминиң алдидики бирнәччә күн бурун шагиртлириға Йерусалим вә ибадәтханиниң вәйран болуши тоғрилиқ пәйғәмбәрлик сөзләрни ейтқан. Шу вақитта бу пәйғәмбәрлик сөзләр биринчи қетим әмәлгә ешиши керәк болған. У Йерусалимниң қоршавда болидиғанлиғини агаһландурған (Луқа 21:20). Әйса әгәшкүчилиригә шу әскәрләрни көргәндә, Йәһудийәдин қечиши керәклигини ейтқан. Униң сөзлири әмәлгә ешип, Рим әскәрлири Йерусалимни қоршавалди (Луқа 21:21, 22).

2. Әлчи Паул Йәһудийә вә Йерусалимда яшиған мәсиһийләргә немә дегән?

² Рим әскәрлири Йерусалимни қоршавалғандин бирнәччә жил бурун, әлчи Паул Йерусалим вә Йәһудийәдә яшиған мәсиһийләргә әһмийәтлик ойлар йезилған бир хәтни әвәткән. һазир бу хәтни «Ибранийларға йезилған хәт» дәп билимиз. Әлчи Паул кәлгүсидә болидиған еғир күнләргә тәйяр болушқа ярдәм беридиған нәсиһәтләрни бәргән. Уларни қандақ вақиәләр күтүп турған еди? Йерусалим вәйран болуши керәк еди. Мәсиһ әгәшкүчилири аман қелиши үчүн өйлиридин вә тиҗаритидин ваз кечишкә тәйяр болуши керәк еди. Әлчи Паул Йерусалим шәһири тоғрилиқ: «Бу җайда бизниң шәһәримиз йоқ. Лекин биз кәлгүсидә болған шәһәрни әстаидил истәймиз»,— дәп язған (Ибр. 13:14).

3. «Мустәһкәм һули бар шәһәр» дегән немә вә биз немә үчүн униңға үмүт бағлаймиз?

³ Биринчи әсирдики Мәсиһ әгәшкүчилири Йерусалимдин кетишкә қарар қилғанда, көплигән адәмләр уларниң үстидин күлүп, ахмақ дәп заңлиқ қилған. Бирақ бу қарар уларниң һаятини сақлап қалған. Бүгүнки күндиму көплигән адәмләр бизни ахмақ дәп ойлайду. Чүнки биз бу дунияниң мал-мүлкигә үмүт бағлимаймиз вә мошу дуниядики қийинчилиқларни инсанийәтниң өзи һәл қилиду дәп күтмәймиз. Биз немә үчүн шундақ қарарға кәлдуқ? Чүнки биз Худа Падишалиғи мошу зулум дунияни йоқ қилидиғанлиғини билимиз. Биз Худа Падишалиғини күтимиз, чүнки «у мустәһкәм һули бар шәһәрa» (Ибр. 11:10; Мәт. 6:33). Бу мақалидә мону соалларға җавап алимиз: 1) Паулниң нәсиһити биринчи әсирдики Мәсиһ әгәшкүчилиригә Худа Падишалиғиға үмүт бағлашқа қандақ ярдәм бәрди? 2) Паул Йерусалимниң вәйран болушиға уларни қандақ тәйярлиди? 3) Паулниң нәсиһити бизгә қандақ ярдәм бериду?

СИЗНИ ҺЕЧҚАЧАН ТАШЛИМАЙДИҒАН ХУДАҒА ИШИНИҢ

4. Йерусалим Мәсиһ әгәшкүчилири үчүн немишкә әһмийити зор бир шәһәр болған?

⁴ Йерусалим мәсиһийләр үчүн әһмийити зор бир шәһәр болған. Чүнки милади 33-жили, Йерусалимда мәсиһийләр җамаити орунлаштурулған еди. Буниңдин башқа бу шәһәрдә көплигән етиқатдашлиримизниң өз өйлири вә мал-мүлки болған. Шундақ болсиму, Әйса шагиртлириға Йерусалимдин, һәтта Йәһудийәдин қечиш керәклигини ейтқан (Мәт. 24:16).

5. Әлчи Паул мәсиһийләргә келәчәктики вақиәләргә тәйяр болушқа қандақ ярдәм бәргән?

⁵ Әлчи Паул Мәсиһ әгәшкүчилирини келәчәктә болидиған вақиәләргә тәйярлаш үчүн, әнди Йәһваниң Йерусалимға қандақ қарайдиғанлиғини чүшәндүрди. Әлчи Паул Йәһва Худа әнди ибадәтханидики роһанийларниң хизмитини қобул қилмайдиғанлиғини вә у йәрдә қилинған қурбанлиқлар өз күчини йоқатқанлиғини әскә салған (Ибр. 8:13). Йерусалимниң нурғун турғунлири Мәсиһни рәт қилған еди. Әнди Йерусалим пак ибадәтниң мәркизи болмай, йеқин арида вәйран болуши керәк еди (Луқа 13:34, 35).

6. Әлчи Паулниң Ибранийларға 13:5, 6дики сөзлири мәсиһийләр үчүн немишкә дәл өз вақтида ейтилған?

⁶ Әлчи Паул ибранийларға хәт язған вақтида, Йерусалим гүлләнгән шәһәр еди. Шу вақиттики бир Рим язғучиси Йерусалимни «шәриқтики әң атақлиқ шәһәр» дәп тәсвирлигән. Йәһудийлар һәрхил җайлардин мәйрәмләрни нишанлаш үчүн Йерусалимға келәтти. Улар бу йәрдә көп пул сәрип қилип, шәһәрниң ихтисадий җәһәттин гүллинишигә чоң һәссисини қошқан. Шуңа бәзи мәсиһийләрниң ихтисадий әһвали яхши болған. Бәлким, шуниң үчүн Паул уларға: «Һаятиңларда пулпәрәсликкә орун болмисун. Бариға қанаәт қилиңлар»,— дәп мәслиһәт бәргән. Кейин у Худаниң һәммә хизмәтчилиригә тегишлик Йәһваниң вәдисини ейтти: «Сени һәргиз қалдурмаймән һәм сени һечқачан ташлимаймән» (Ибранийларға 13:5, 6ни оқуң; Қ. шәр. 31:6; Зәб. 118:6). Йерусалим вә Йәһудийәдики Мәсиһ әгәшкүчилири бу сөзләрни ядида сақлаш керәк еди. Немишкә? Бу хәтни елип көп өтмәй, улар өйлирини, тиҗарәтлирини вә һәммә мал-мүлкини ташлап, қечиши керәк болған. Улар қечип баридиған йәрдә йеңи шараитта яшишиға тоғра келәтти. Бу оңай болмиған.

7. Йәһваға болған ишәнчимизни һазирниң өзидә мустәһкәмләш немә үчүн муһим?

⁷ Буниңдин қандақ савақ алимиз? Келәчәктә балаю-апәт башлинип, мошу зулум дунияниң ахири келиду (Мәт. 24:21). Бизму биринчи әсирдики мәсиһийләргә охшаш садақәтмәнлигимизни йоқатмай, келәчәктики вақиәләргә тәйяр болушимиз муһим (Луқа 21:34—36). Балаю-апәт вақтида өйүмизни вә башқиму мал-мүлкүмизни ташлашқа тоғра келиши мүмкин. Шу вақитта Йәһваға пүтүнләй тайинип, У бизни һечқачан ташлимайдиғанлиғиға қәтъий ишинишимиз лазим. Һазирниң өзидә, балаю-апәт башланмай туруп, Йәһваға пүтүнләй тайинидиғанлиғимизни көрситәләймиз. Өзүңиздин мундақ дәп сорап беқиң: Мениң иш-һәрикәтлирим вә мәхсәтлирим пулға әмәс, Йәһваға тайинип, үмүт бағлайдиғанлиғимни көрситәмду? (Тим. 1-х. 6:17) Әлвәттә, бизниң вәзийитимиз биринчи әсирдики мәсиһийләргә охшаш болғанлиқтин, улардин көп нәрсиләрни үгинәләймиз. Бирақ алдимизда болидиған балаю-апәттә техиму еғир болиду. Шуңа, балаю-апәт кәлгәндә немә қилишимиз керәклигини нәдин биләләймиз?

ҖАВАПКАР БУРАДӘРЛӘРГӘ БОЙСУНУҢ

8. Әйса шагиртлириға қандақ көрсәтмә бәргән?

⁸ Йерусалимдики мәсиһийләр Паулниң ибранийларға язған хетини елип бирнәччә жил өткәндин кейин, Рим әскәрлири Йерусалимни қоршавалди. Буни көргән мәсиһийләр шәһәрниң вәйран болидиғанлиғини вә у йәрдин қечиши керәклигини чүшәнди (Мәт. 24:3; Луқа 21:20, 24). Бирақ улар қәйәргә қечиши керәк еди? Әйса: «Йәһудийәдә болғанлар тағларға қачсун» дәп ейтқан еди (Луқа 21:21). Әтрапта нурғун тағлар болғанлиқтин, улар қайси таққа қечиш керәклигини нәдин биләтти?

9. Қайси таққа қечиш керәклигини ениқлаш немишкә қийин болди? (Хәритигә қараң.)

⁹ Мәсиһийләр қечип баридиған бәзи тағларни көрүп бақайли. Мәсилән, Самарийә, Җәлилийә, Ливан тағлири, Хәрмон теғи вә Иордан дәриясиниң бойидики тағлар (хәритигә қараң). Шу тағлардики шәһәрләр бехәтәр болуп көрүнәтти. Мәсилән, Гамла шәһири егиз таққа җайлашқан еди. Бу шәһәргә йетиш қийин болғачқа, йәһудийлар Гамла шәһирини бехәтәр пана дәп ойлиған болуши мүмкин. Лекин Гамла шәһиридә римлиқлар билән йәһудийларниң арисида кәскин җәң болуп, шәһәрниң көплигән турғунлири һалак болған едиb.

10, 11. а) Йәһва Худа рәһбәрликни қандақ бәргән болуши мүмкин? (Ибранийларға 13:7, 17) ә) Мәсиһ әгәшкүчилири җавапкарлиқни өз бойниға алған бурадәрләргә бойсунушниң қандақ пайдисини көрди? (Рәсимгиму қараң.)

¹⁰ Йәһва Худа җамаәттә рәһбәрликни өз үстигә алған бурадәрләр арқилиқ йол-йоруқ бәргәнлиги ениқ. Евсевий исимлиқ бир тарихчи мундақ дәп язған: «Йерусалим җамаитидики талланған әр кишиләр Худадин вәһий алди. Худа уларға җәң башланмай туруп, Переядики Пелла дегән шәһәргә қечишқа рәһбәрлик бәрди». Һәқиқәтән, Пелла Мәсиһ әгәшкүчилири үчүн бехәтәрлик җай болған. Пелла шәһири Йерусалимдин анчә жирақ болмиғанлиқтин, у йәргә бериш қийин болмиған. Бу шәһәрниң турғунлириниң көпинчиси йәһудий болмиғачқа, улар римлиқларға қарши җәң қилишни ойлимиған (хәритигә қараң).

¹¹ Таққа қечип кәткән Мәсиһ әгәшкүчилири Паулниң «араңларда өзлиригә рәһбәрлик алидиғанларға итаәтчан болуп, беқиниңлар» дегән нәсиһитигә қулақ салған (Ибранийларға 13:7, 17ни оқуң). Нәтиҗидә, Худа хәлқи аман қалди. Бу вақиә «мустәһкәм һули бар шәһәрни», йәни Худа Падишалиғини күтүватқанларни Йәһва һечқачан ташлимайдиғанлиғиға ишәндүриду (Ибр. 11:10).

12, 13. Қийин вақитларда Йәһва Өз хәлқини қандақ йетәклигән?

¹² Буниңдин қандақ савақ алимиз? Йәһва Худа Өз хәлқини йетәкләш үчүн рәһбәрликни өз үстигә алған бурадәрләр арқилиқ көрсәтмиләрни бериду. Буниңға Муқәддәс китапта көплигән дәлил-испатлар бар. Йәһва Худа қийин вақитларда Өз хәлқини йетәкләш үчүн садиқ әр кишиләрни тәйинлигән (Қ. шәр. 31:23; Зәб. 77:20). Бүгүнки күндиму Йәһва җавапкарлиқни өз бойниға алған бурадәрләр арқилиқ бизгә йол-йоруқ көрситиватқанлиғиниң дәлил-испатлири нурғун.

¹³ Мәсилән, COVID-19 вируси башланғанда, җавапкар бурадәрләр җамаәтләргә рәһбәрлик бәргән. Җамаәттики ақсақаллар учришишимиз қандақ өтидиғанлиғи вә давамлиқ Йәһваға қандақ ибадәт қилишимиз тоғрилиқ көрсәтмиләрни алған. Пандемия башлинип бирнәччә ай өткәндин кейин конгресслиримиз 500дин ошуқ тилда өтти. Бурадәр вә қериндашлар программини интернет, телевизор вә радио арқилиқ тиңшиған. Тарихта конгрессимизниң мундақ өтүши биринчи қетим еди. Шундақ қийин әһвал болсиму, биз роһий озуқни өз вақтида елип турдуқ. Буниңдин биз, келәчәктә қандақ қийин әһвал болмисун, Йәһва җавапкар бурадәрләр арқилиқ бизгә давамлиқ ярдәм беридиғанлиғини көрүмиз. Балаю-апәткә тәйяр болуп, шу қийин вақитта даналиқ билән иш-һәрикәт қилиш үчүн Йәһваға тайинип, җавапкар бурадәрләргә қулақ селишимиз интайин муһим. Буниңдин башқа бизгә йәнә қандақ хисләтләр керәк?

ЕТИҚАТДАШЛАРҒА МЕҺИР-МУҺӘББӘТ КӨРСИТИП, МЕҺМАНДОСТ БОЛУҢ

14. Ибранийларға 13:1—3 айәтләргә бенаән, мәсиһийләр Йерусалимниң вәйран болуши йеқинлашқансири, қандақ хисләтләрни көрситиши керәк еди?

¹⁴ Балаю-апәт башланғанда, етиқатдашларға буниңдинму көпирәк меһир-муһәббәт көрситишимиз керәк болиду. Биз бу тәрәптин Йерусалим вә Йәһудийәдики Мәсиһ әгәшкүчилиридин үлгә алалаймиз. Улар дайим бир-биригә меһир-муһәббәт көрсәткән (Ибр. 10:32—34). Бирақ Йерусалимниң вәйран болуши йеқинлашқансири, улар бир-биригә техиму көпирәк қериндашлиқ меһир-муһәббәт көрситип, меһмандост болуши керәк едиc (Ибранийларға 13:1—3ни оқуң). Бизму мошу дунияниң ахири йеқинлашқансири, бир-биримизгә меһир-муһәббәт көрситишимиз лазим.

15. Немә үчүн Пеллаға қачқан мәсиһийләр меһир-муһәббәт көрситип, меһмандост болуши керәк еди?

¹⁵ Рим әскәрлири Йерусалимни қоршавалғандин кейин, улар һәммини ташлап, туюқсиз кетип қалди. Шу чағда мәсиһийләр шәһәрдин қечиши керәк еди. Бирақ улар өзлири билән көп нәрсиләрни алалмиди (Мәтта 24:17, 18). Улар Пеллаға кетип барған йолда бир-бириниң ярдимигә, шундақла, шу шәһәрдә йеңи һаят башлиғанда тамақ, кийим-кечәк вә туридиған җайға муһтаҗ болған. Шуңа, уларниң бир-биригә яр-йөләк болуп, меһир-муһәббәт көрситишигә вә қолида бар нәрсилири билән бөлүшүп, меһмандост болушқа пурсити болған (Титқа 3:14).

16. Ярдәмгә муһтаҗ болған етиқатдашларға меһир-муһәббәт көрситишниң қандақ йоллири бар? (Рәсимгиму қараң.)

¹⁶ Буниңдин қандақ савақ алимиз? Меһир-муһәббәт муһтаҗлиқта болған бурадәр-қериндашларға ярдәм беришкә дәвәт қилиду. Мәсилән, бизниң көплигән етиқатдашлиримиз уруштин яки тәбиий апәттин мусапир болуп қалған бурадәр-қериндашларға хошаллиқ билән ярдәм бәргән. Украинидики уруш сәвәвидин өйини ташлап кетишкә тоғра кәлгән бир қериндишимиз мундақ дәйду: «Йәһва Худа бурадәрләр арқилиқ бизни йетәкләп, ярдәм бәргәнлигини һис қилдуқ. Улар бизни Украинида, Венгриядә вә Германиядә иллиқ қарши елип меһир-муһәббитини көрсәтти». Әгәр биз бурадәр-қериндашларға меһир-муһәббәт көрситип, уларға ғәмхорлуқ қилсақ, Йәһваниң қолида пайдилиқ қурал болумиз (Пәнд н. 19:17; Кор. 2-х. 1:3, 4).

17 Немә үчүн меһир-муһәббәтни вә меһмандостлуқни йетилдүрүшимиз керәк?

¹⁷ Биз балаю-апәт вақтида бир-биримизгә техиму көпирәк ярдәм беришимиз керәк. Атимиз Йәһва бизни етиқатдашларға меһир-муһәббәт көрситишкә вә меһмандост болушқа үгитиватиду (Һаб. 3:16—18). Бу хисләтләр шу вақитта керәк болиду.

БИЗНИ АЛДИМИЗДА НЕМӘ КҮТИВАТИДУ?

18. Биринчи әсирдики Мәсиһ әгәшкүчилиридин немини үгинимиз?

¹⁸ Йерусалим вәйран болғанда, Әйсаниң сөзлиригә бойсунуп, таққа қачқан мәсиһийләр аман қалған. Улар шәһәрни ташлап кәтти, амма Йәһва уларни ташлимиди. Биз уларниң үлгисидин қандақ савақ алимиз? Кәлгүсидә биз немә болидиғанлиғини тәпсилий билмәймиз. Бирақ Әйса бойсунушқа тәйяр болушимиз керәклигини агаһландурған (Луқа 12:40). Шундақла биз әлчи Паулниң Ибранийларға язған хетидики мәслиһәтләр тоғрилиқ чоңқур ойлинип, уларни һаятимизда қоллинишимиз муһим. Атимиз Йәһва бизни һечқачан ташлимайдиғанлиғиға капаләт бериду (Ибр. 13:5, 6). Ундақта мәңгү мәвҗут болидиған шәһәрни, йәни Худа Падишалиғини күтәйли. Шу чағда әҗайип бәрикәтләрдин мәңгү һузурлиналаймиз (Мәт. 25:34).