1-تەتقىق ماقالىسى
138-ناخشا يەھۋا — سېنىڭ ئىسىمىڭ
يەھۋاغا شان-شەرەپ كەلتۈرۈڭلار!
2025-يىللىق ئايەت: «يەھۋاغا ئۆز ئىسىمىغا لايىق شان-شەرەپنى بېرىڭلار».—زەبۇر 96:8.
مەركىزى ئىدىيە
يەھۋاغا لايىق شان-شەرەپنى قانداق ئۇنىڭغا بېرەلەيدىغانلىقىمىزنى ئۆگىنىمىز.
1. بۈگۈنكى كۈندە كۆپىنچە ئادەملەر پەقەت نېمىگە كۆڭۈل بۆلىدۇ؟
بۈگۈنكى كۈندە كۆپىنچە ئادەملەرنىڭ پەقەت ئۆزىگە كۆڭۈل بۆلۈپ، ئۆزىنىلا ئويلايدىغانلىقىنى بايقىغانسىز؟ مەسىلەن، بەزىلەرنىڭ ئىجتىمائىي ئالاقە ۋاسىتىلىرى ئارقىلىق ئۆزلىرىنى ۋە ئېرىشكەن ئۇتۇقلىرىنى كۆرسىتىپ ماختىنىدۇ. لېكىن، بۈگۈنكى كۈندە ئاز ساندىكى كىشىلەرلا يەھۋاغا شان-شەرەپنى بېرىشنى خالايدۇ. بۇ ماقالىدە، يەھۋاغا ئۆزىگە لايىق شان-شەرەپنى بېرىش نېمىنى بىلدۈرىدىغانلىقى ۋە بىزنى شۇنداق قىلىشقا نېمە دەۋەت قىلىدىغانلىقىنى كۆرۈپ چىقىمىز. ئۇنىڭدىن باشقا، خۇدا كېلەچەكتە ئۆز ئىسىمىنى قانداق ئۇلۇغلايدىغانلىقىنى ئۆگىنىمىز.
يەھۋاغا شان-شەرەپ كەلتۈرۈش دېگەن نېمىنى بىلدۈرىدۇ؟
2. يەھۋا خۇدا سىناي تېغىدا نېمە قىلغان؟ ( رەسىمگە ھەم قاراڭ).
2 مۇقەددەس كىتابتا قۇدرەتلىك، ئۇلۇغ خۇدا يەھۋانىڭ شان-شەرەپ ۋە مەدھىيىگە لايىق ئىكەنلىكىنى كۆرسىتىلگەن. ئىسرائىل خەلقى مىسىردىكى قۇللۇقتىن ئازاد قىلىنىپ كۆپ ئۆتمەي، يەھۋا ئۆزىنىڭ شان-شەرىپىنى ئاجايىپ ئۇسۇلدا نامايان قىلغان. مىليونلىغان ئىسرائىللار سىناي تېغىنىڭ ئېتىكىگە يىغىلىپ، يەھۋانىڭ سۆزىنى ئاڭلىغاندا، تاغنى قويۇق قارا بۇلۇت ۋە ئىس-تۈتەك قاپلىغان، يەر قاتتىق سىلكىنىپ، ھاۋا گۈلدۈرلەپ، چاقماق چاققان ۋە ناھايىتى كۈچلۈك كاناي ئاۋازى ئاڭلانغان (چىق. 19:16–18؛ 24:17؛ زەبۇر 68:8). يەھۋانىڭ كۈچ-قۇدرىتى ۋە شان-شەرىپىنى كۆرگەندە، ئىسرائىل خەلقى نەقەدەر ھەيران بولغانلىقىنى تەسەۋۋۇر قىلىپ كۆرۈڭ!
سىناي تېغىدا يەھۋا ئىسرائىللارغا شۆھرىتىنى ئاجايىپ يول بىلەن كۆرسەتكەن (2-ئابزاسقا قاراڭ)
3. يەھۋاغا شان-شەرەپ كەلتۈرۈش دېگەن نېمىنى بىلدۈرىدۇ؟
3 ئەمەلىيەتتە، بىز ئىنسانلار ھەم يەھۋاغا شان-شەرەپ كەلتۈرەلەيمىز. بۇنىڭ بىر يولى — باشقىلارغا يەھۋانىڭ كۈچ-قۇدرىتى ۋە باشقا گۈزەل پەزىلەتلىرىنى بايان قىلىشتۇر. باشقا بىر يولى — يەھۋانىڭ ياردىمى بىلەن ئىشلىرىمىز ئوڭۇشلۇق بولسا، ياراتقۇچىمىزنى ئۇلۇغلاپ، شان-شەرەپنى ئۇنىڭغا بېرىشتۇر (يەشايا 26:12). شان-شەرەپنى يەھۋاغا بېرىشتە پادىشاھ داۋۇت بىز ئۈچۈن ئەڭ ياخشى ئۈلگە قالدۇرغان. ئۇ ئىسرائىل جامائىتىنىڭ ئالدىدا يەھۋاغا قىلغان دۇئاسىدا مۇنداق دېگەنىدى: «ئەي يەھۋا، ئۇلۇغلۇق، كۈچ-قۇدرەت، گۈزەللىك ۋە شان-شەرەپ ۋە ئىززەت-ھۆرمەت سېنىڭكى، چۈنكى ئاسمان ۋە يەر يۈزىدىكى ھەممىسى سېنىڭكىدۇر». داۋۇتنىڭ دۇئاسىدىن كېيىن، «يەھۋاغا پۈتۈن جامائەت ھەمدۇسانا ئېيتتى».—تار. 1-ياز. 29:11، 20.
4. ئەيسا يەھۋاغا لايىق شان-شەرەپنى قانداق بەرگەن؟
4 ئەيسا يەر يۈزىدە بولغاندا، ئۆزىنىڭ ئاتىسى بەرگەن كۈچكە تايىنىپ مۆجىزىلەرنى قىلغانلىقىنى ئېتىراپ قىلىپ، يەھۋاغا لايىق شان-شەرەپنى بېرىپ، ئۇنى مەدھىيىلىگەن (ماركۇس 5:18–20). ئۇ يەنە باشقىلارنىڭ يەھۋانىڭ نەقەدەر ياخشى ئاتا ئىكەنلىكىنى كۆرۈپ يېتىشىگە ياردەم بەرگەن. ئۇنىڭدىن باشقا، ئەيسا ئادەملەرگە ياخشى مۇئامىلە قىلىش ئارقىلىق باشقىلارنى يەھۋانى مەدھىيىلەشكە ئۈندىگەن. بىر كۈنى، ئۇ يەھۇدىيلارنىڭ ئىبادەتخانىسىدا تەلىم بېرىۋاتقاندا، ئاڭلاپ ئولتۇرغانلار ئارىسىدا جىن چاپلاشقانلىقتىن 18 يىلدىن بېرى بېلى مۈكچىيىپ، رۇسلىنىپ تىك تۇرالمىغان بىر ئايال بار ئىدى. ئەيسا ئۇ ئايالنىڭ ناھايىتى كۆپ دەرد تارتقانلىقىنى بىلىپ، ئۇنىڭغا ئىچى ئاغرىغان ھالدا مۇلايىملىق بىلەن: «كېسىلىڭىزدىن ساقايدىڭىز»،— دېگەن. ئاندىن، ئۇ قوللىرىنى ئايالنىڭ ئۈستىگە قويغان ۋە ئۇ ئايال دەرھال رۇسلىنىپ تىڭ تۇرۇپ، «خۇدانى مەدھىيىلەشكە» باشلىغان (لۇقا 13:10–13). بۇ ئايالغا ئوخشاش، بىزنىڭمۇ يەھۋانى مەدھىيىلەپ، ئۇنىڭغا لايىق شان-شەرەپنى بېرىشىمىز ئۈچۈن نۇرغۇن سەۋەبلەر بار.
نېمە ئۈچۈن يەھۋاغا شان-شەرەپ كەلتۈرىمىز؟
5. نېمە ئۈچۈن يەھۋاغا چوڭقۇر ھۆرمەت-ئېھتىرام بىلدۈرىمىز؟
5 يەھۋاغا چوڭقۇر ھۆرمەت-ئېھتىرام بىلدۈرىمىز. ياراتقۇچى يەھۋاغا چوڭقۇر ھۆرمەت-ئېھتىرام بىلدۈرۈش ئۈچۈن نۇرغۇن سەۋەبلىرىمىز بار. ئۇ ھەممىگە قادىر، كۈچ-قۇدرىتى چەكسىز خۇدا (زەبۇر 96:4–7). ئۇ ياراتقان مەۋجۇداتلار ئۇنىڭ تەسەۋۋۇر قىلغۇسىز دانالىقىنى نامايان قىلىدۇ. يەھۋا بىزگە ھاياتلىقنى بېرىپ قالماي، يەنە ھاياتىمىزنى ئېھتىياجلىق نەرسىلەرنى بىلەن تەمىنلەيدۇ (ۋەھىي. 4:11). ئۇ ۋاپادار (ۋەھىي. 15:4). ئۇنىڭدىن باشقا، ئۇ قىلغان ھەرقانداق مۇۋاپىقيەتلىك بولىدۇ ۋە ئۇ ھەردائىم ۋەدىسىنى ئەمەلگە ئاشۇرىدۇ (يەشۇئا 23:14). شۇڭا، يەرەمىيا پەيغەمبەر يەھۋا توغرۇلۇق مۇنداق ئېيتقان: «بارچە ئەللەرنىڭ ئارىسىدا ۋە بارچە پادىشاھلىقلارنىڭ ئارىسىدا، ساڭا ئوخشاش ھېچكىم يوقتۇر!» (يەرەم. 10:6، 7) ھەقىقەتەن، ئاسماندىكى ئاتىمىزغا ھۆرمەت-ئېھتىرام بىلدۈرۈشىمىز ئۈچۈن نۇرغۇن سەۋەبلىرى بار. لېكىن، ياراتقۇچىمىز يەھۋا ھۆرمەت-ئېھتىرام بىلدۈرۈشىمىزدىن باشقا، چىن قەلبىمىزدىن سۆيۈشىمىزگە ھەم لايىقتۇر.
6. نېمە ئۈچۈن يەھۋانى چىن قەلبىمىزدىن سۆيىمىز؟
6 يەھۋانى چىن قەلبىمىزدىن سۆيىمىز. يەھۋا ئۇنىڭ نۇرغۇنلىغان ئېسىل پەزىلەتلىرى بىزنى چىن قەلبىمىزدىن ئۇنى سۆيۈشكە دەۋەت قىلىدۇ. ئۇ رەھىمدىل ۋە كۆيۈمچان (زەبۇر 103:13؛ يەشايا 49:15). ئۇ بىزگە ناھايىتى كۆڭۈل بۆلىدۇ. بىز ئازاب-ئوقۇبەت چەكسەك، ئۇنىڭ كۆڭلى ئاغرىيدۇ (زەكەرىيا 2:8). ياراتقۇچىمىز بىزنىڭ ئۆزى توغرۇلۇق بىلىم ئېلىپ، ئۇنىڭ بىلەن يېقىن دوست بولۇشىمىزغا ياردەم بېرىدۇ (زەبۇر 25:14؛ ئەلچى. 17:27). شۇنداقلا، ئۇ بەك كىچىك پېئىل. مۇقەددەس كىتاب ئۇ ھەققىدە مۇنداق دەيدۇ: «ئۇ ئېگىلىپ ئاسمان بىلەن يەرگە نەزەر سالار، بىچارىنى توپا-چاڭلاردىن يۆلەپ تۇرغۇزار» (زەبۇر 113:6، 7). يەھۋانىڭ شۇنداق كۆپ گۈزەل پەزىلەتلىرى بار ئىكەن، ئۇنى مەدھىيىلەپ، بارچە شان-شەرەپنى ئۇنىڭغا بېرىشىمىز خالايمىز، شۇنداق ئەمەسمۇ؟!—زەبۇر 86:12.
7. بىزنىڭ قانداق ئالاھىدە پۇرسىتىمىز بار؟
7 ئىنسانلارنىڭ يەھۋا توغرۇلۇق بىلىشىنى خالايمىز. بۈگۈنكى كۈندە، نۇرغۇن ئىنسانلار يەھۋا توغرۇلۇق ھەقىقەتنى بىلمەيدۇ. نېمە ئۈچۈن؟ چۈنكى، شەيتان يالغان-ياۋىداقلارنى تارقىتىپ، كىشىلەرنىڭ «ئەقلىنى كور» قىلغان (2-كورىنت. 4:4). شەيتان ئادەملەرنى ئازدۇرۇپ، ئۇلارنى خۇدا رەھىمسىز، بىزگە كۆڭۈل بۆلمەيدۇ ۋە ئۇ دۇنيادىكى بارچە قىيىنچىلىقلارنى پەيدا قىلغان دېگەنلەرگە ئىشەندۈرگەن. لېكىن، بىز خۇدا توغرىسىدىكى ھەقىقەتنى ئوبدان بىلىمىز. بىزنىڭ باشقىلارنىڭ ھەقىقەتنى تونۇپ كۆزلىرى ئېچىلىپ، ياراتقۇچى يەھۋانى مەدھىيىلەپ، ئۇنى ئۇلۇغلاشنى ئۆگىنىشىگە ياردەم بېرىش پۇرسىتىمىز بار (يەشايا 43:10) زەبۇر 96-بابنىڭ مەزمۇنى ئاساسلىقى يەھۋانى ئۇلۇغلاشقا قارىتىلغان. ھازىر بىرلىكتە، بۇ بابتىن يەھۋاغا لايىق شان-شەرەپنى، ئۇنىڭغا بېرىشنىڭ يوللىرىنى كۆرۈپ چىقايلى.
يەھۋاغا ئۆز ئىسمىغا لايىق شان-شەرەپنى قانداق بېرەلەيمىز؟
8. يەھۋاغا شان-شەرەپ كەلتۈرۈشنىڭ يوللىرىدىن بىرى قايسى؟ (زەبۇر 96:1–3)
8 زەبۇر 96:1–3-نى ئوقۇڭ. بىز گەپ-سۆزلىرىمىز ئارقىلىق يەھۋاغا شان-شەرەپ كەلتۈرەلەيمىز. زەبۇردىكى بۇ ئايەتلەر بىزنى مۇنداق دەۋەت قىلىدۇ: «يەھۋاغا ناخشا ئېيتىڭلار»، «ئۇنىڭ ئىسىمىنى مەدھىيىلەڭلار، «ئۇنىڭ قۇتقۇزۇش خۇش خەۋىرىنى يەتكۈزۈڭلار»، «ئۇنىڭ ئۇلۇغلۇقىنى مىللەتلەر ئارىسىدا جاكارلاڭلار». بۇلارنىڭ ھەممىسى ئاسماندىكى ئاتىمىزغا شان-شەرەپ كەلتۈرۈشنىڭ يوللىرى. قەدىمكى زاماندىكى يەھۋانىڭ سادىق خىزمەتچىلىرى ياراتقۇچىنىڭ ئېسىل-پەزىلەتلىرى ۋە ئۇلارغا قىلغان ھەممە ياخشىلىقلىرى توغرىسىدا باشقىلارغا قىزغىنلىق بىلەن ئېيتقان ئىدى (دانىيال 3:16–18؛ ئەلچى. 4:29). بىز ئۇلاردىن قانداق ئۈلگە ئالالايمىز؟
9، 10. ئانجېلىنانىڭ مىسالىدىن نېمىنى ئۆگەنسەك بولىدۇ؟ (رەسىمگە ھەم قاراڭ).
9 ئامېرىكىدا ياشايدىغان ئانجېلىناa ئىسىملىك قېرىنداشنىڭ مىسالىنى كۆرۈپ چىقايلى. ئۇ ئىشى ئورنىدا جاسارەت بىلەن يەھۋانىڭ نام-شۆھرىتىنى قوغدىغان. ئۇ ئەمدىلا شۇ ئىش ئورنىغا كىرگەندە، بىر يىغىنغا قاتنىشىشقا تەكلىپ قىلىنغان. شۇ چاغدا، بارلىق يېڭى ئىشچىلار بىر-بىرلەپ ئۆزلىرىنى كۆپچىلىككە تونۇشتۇرغان. ئانجېلىنا يەھۋا گۇۋاھچىسى بولغىنى ئۈچۈن ناھايىتى خۇشال ئىكەنلىكىنى چۈشەندۈرۈش ئۈچۈن سۈرەتلەرنى تەييارلىغان. لېكىن، ئۇ سۆز باشلاشتىن ئاۋۋال، بىر خىزمەتدىشى ئۆزىنى تونۇشتۇرۇپ، يەھۋا گۇۋاھچىلىرىنىڭ ئائىلىسىدە چوڭ بولغانلىقىنى ئېيتىپ، يەھۋا گۇۋاھچىلىرىنىڭ ئىمان-ئېتىقادىنى زاڭلىق قىلىشقا باشلىغان. ئانجېلىنا مۇنداق دېگەن: «شۇ ۋاقىتتا، ناھايىتى جىددىيلىشىپ، يۈرىكىم ئاغزىمغا تىقىلىپ قالدى. لېكىن، ئۆز-ئۆزۈمگە شۇنداق دېدىم: بىرىنىڭ ياراتقۇچى يەھۋا توغرۇلۇق يالغان ئېيتىشىغا يول قويىمەنمۇ؟ ياق، ھەرگىز بولمايدۇ. مەن ھەقىقەتنى ئېيتىپ، يەھۋانىڭ نام-شۆھرىتىنى قوغدايمەن».
10 خىزمەتدىشى سۆزلەپ بولغاندىن كېيىن، ئانجېلىنا كۆڭلىدە قىسقا، ئۈنسىز دۇئا قىلغان. ئاندىن، ئۇ مۇلايىملىق بىلەن مۇنداق سۆز باشلىغان: «مەنمۇ سىزگە ئوخشاش يەھۋا گۇۋاھچىلىرىنىڭ ئائىلىسىدە چوڭ بولغان. ئەمما، ئوخشىمايدىغان يېرى، مەن مۇشۇ كەمگىچە يەھۋا گۇۋاھچىسى». كۆپچىلىك بىر قىسمەن بولۇپ قالسىمۇ، ئانجېلىنا جىددىيلەشمەي سۆزىنى داۋاملاشتۇرغان. ئۇ خىزمەتداشلىرىغا ئالاھىدە چوڭ يىغىلىشتا چۈشكەن سۈرەتلەرنى كۆرسىتىپ، ئۆزىنىڭ ئىمان-ئېتىقادىنى پەم-پاراسەت بىلەن چۈشەندۈرۈپ، يەھۋا خۇداغا خىزمەت قىلغىنى ئۈچۈن بەك خۇشال ئىكەنلىكىنى ئېيتقان (1-پېتر. 3:15). نەتىجىدە، ئانجېلىنا سۆزلەپ بولغاندىن كېيىن، شۇ يىگىتنىڭ قاپىقى ئېچىلغان. ئۇ ھەتتا كىچىكىدە يەھۋا گۇۋاھچىلىرى بىلەن ئارىلاشقاندا، بەزى كۆڭۈل ئۆتكەن چاغلىرىنى سۆزلەپ بەرگەن. ئانجېلىنا مۇنداق دەيدۇ: «يەھۋانىڭ نام-شۆھرىتى قوغدىشىمىزغا لايىقتۇر. ئۇ توغرىسىدىكى ھەقىقەتنى باشقىلارغا ئېيتىش مەن چوڭ شان-شەرەپ!». باشقىلار ياراتقۇچىمىز يەھۋاغا قارشى گەپ-سۆزلەرنى قىلغاندا، بىزمۇ يەھۋانى مەدھىيىلەپ، ئۇنىڭغا لايىق شان-شەرەپنى بېرىش بىز ئۈچۈن ھەم چوڭ شان-شەرەپتۇر.
بىز گەپ-سۆزلىرىمىز، ماددىي نەرسىلىرىمىز ۋە يۈرۈش-تۇرۇشىمىز ئارقىلىق يەھۋاغا شان-شەرەپ كەلتۈرەلەيمىز (9، 10-ئابزاسلارغا قاراڭ)b
11. خۇدانىڭ خىزمەتچىلىرى زەبۇر 96:8-ئايەتتىكى پرىنسىپقا قانداق ئەمەل قىلىۋاتىدۇ؟
11 زەبۇر 96:8-نى ئوقۇڭ. بىز ماددىي نەرسىلىرىمىز ئارقىلىق يەھۋاغا شان-شەرەپ كەلتۈرەلەيمىز. قەدىمدىن تاكى بۈگۈنكى كۈنگىچە، خۇدانىڭ خەلقى ئۆزىدە بار بولغان ماددىي نەرسىلەر ئارقىلىق يەھۋانى ئۇلۇغلاپ كېلىۋاتىدۇ (پەند ن. 3:9). مەسىلەن، ئىسرائىللار ئىبادەتخانىنى سېلىش ۋە ئۇنى ئاسراپ تۈزەش ئىشلىرى ئۈچۈن پۇل ۋە قىممەتباھا نەرسىلىرىنى ئىئانە قىلىشقان ئىدى (2-پادىشاھ. 12:4، 5؛ 1-تارىخ. 29:3–9). بەزى شاگىرتلار «ئۆز مال-مۈلۈكلىرى بىلەن»، ئەيسا مەسىھ ۋە ئۇنىڭ ئەلچىلىرىنىڭ خىزمىتىدە بولغان (لۇقا 8:1–3). ئۇنىڭدىن باشقا، بىرىنچى ئەسىردە ئاچارچىلىق يۈز بەرگەندە، مەسىھنىڭ شاگىرتلىرى ئاپەتتىن قۇتقۇزۇش بۇيۇملىرىنى ئەۋەتىپ ئېتىقادچى قېرىنداشلىرىغا ياردەم قولىنى سۇنغان (ئەلچى. 11:27–29). بۈگۈنكى كۈندە بىزمۇ ئىختىيارىي ئىئانىلىرىمىز ئارقىلىق يەھۋاغا شان-شەرەپ كەلتۈرەلەيمىز.
12. يەھۋاغا ئىئانىلىرىمىز قانداق شان-شەرەپ كەلتۈرەلەيدۇ؟ (رەسىمگە ھەم قاراڭ).
12 ئىئانىلىرىمىز قانداقلارچە يەھۋاغا شان-شەرەپ كەلتۈرەلەيدۇ؟ بىر مىسالنى كۆرۈپ چىقايلى. 2020-يىلى زىمبابۋېدا يۈز بەرگەن قۇرغاقچىلىق ئاپىتى ئۇزۇنغا سۇزۇلۇپ كەتكەن. شۇڭا، مىليونلىغان ئادەملەرنىڭ ھاياتى ئۆلۈم خەۋپىگە دۇچ كەلگەن، شۇلارنىڭ ئارىسىدا ئېتىقادچى قېرىندىشىمىز پرىسكامۇ بار ئىدى. شۇنداق قىيىنچىلىقنىڭ بولۇشىغا قارىماي، ئۇ داۋاملىق ھەپتە سەيشەنبە ۋە جۈمە كۈنلىرى ۋەز خىزمەتكە بارغان، ھەتتا يەر ھەيدەش پەسلىدە ھەم شۇنداق ۋەز خىزمىتىنى قولدىن بەرمىگەن. قوشنىلىرى ئۇنى: «ئېتىزدا ئىشلىمەي، بۇنداق يۈرسەڭ، چوقۇم ئاچ قېلىپ ئۆلىسەن»،— دەپ زاڭلىق قىلىشقان. پرىسكا ئىككىلەنمەي، ئىشەنچ بىلەن مۇنداق جاۋاب بەرگەن: «يەھۋا ئۆز خىزمەتچىلىرىنى ئەسلا تاشلىمايدۇ». كۆپ ئۆتمەي، بۇرادەرلەر ئۇنىڭغا ئوزۇق-تۈلۈك باشقا لازىمەتلىكلەرنى يەتكۈزۈپ بەرگەن. ھەربىرىمىزنىڭ ئىئانىلەرنى قىلغاچ، تەشكىلاتىمىز پرىسكا ۋە باشقا قېرىنداشلىرىمىزغا ياردەم بېرەلەيدۇ. پرىسكانىڭ قوشنىلىرى ھەيران بولۇشۇپ، ئۇنىڭغا: «خۇدا راستىنلا سېنى تاشلىمىدى، بىزمۇ خۇدايىڭ توغرۇلۇق كۆپرەك بىلىشنى خالايمىز»،— دېگەن. شۇنىڭ بىلەن، ئۇنىڭ يەتتە قوشنىسى جامائەت يىغىلىشلىرىغا كېلىشكە باشلىغان.
بىز ماددىي نەرسىلەر ئارقىلىق يەھۋاغا شان-شەرەپ كەلتۈرەلەيمىز (12-ئابزاسقا قاراڭ)c
13. يەھۋاغا يۈرۈش-تۇرۇشىمىز قانداق شان-شەرەپ كەلتۈرەلەيدۇ؟ (زەبۇر 96:9)
13 زەبۇر 96:9-نى ئوقۇڭ. بىز يۈرۈش-تۇرۇشىمىز ئارقىلىق يەھۋاغا شان-شەرەپ كەلتۈرەلەيمىز. ئىبادەتخانىدا خىزمەت قىلىشتىن ئاۋۋال، روھانىيلار چوقۇم ئۆز تېنىنى يۇيۇپ پاكىزلىشى كېرەك ئىدى (چىق. 40:30–32). لېكىن، جىسمانىي تازلىقتىنمۇ بەكرەك يۈرۈش-تۇرۇشىمىز يەنى، ئەخلاقىمىزنىڭ پاك بولۇشى مۇھىمراقتۇر (زەبۇر 24:3، 4؛ 1-پېتر. 1:15، 16). مۇقەددەس كىتابتا بىزگە «كونا تەبىئەتنى» سېلىپ تاشلاپ، «يېڭى تەبىئەتنى» كىيىشكە دەۋەت قىلىدۇ. بۇ يەھۋا ياقتۇرمايدىغان ئوي-پىكىر قىلىش ئۇسۇلى ۋە يۈرۈش-تۇرۇشنى تاشلاشنى بىلدۈرىدۇ. بۇنىڭ ئورنىغا، يەھۋانىڭ كۆز قاراشلىرى بويىچە ئويلىنىش ۋە ئىش قىلىشقا تىرىشىپ، ئۇنىڭ گۈزەل پەزىلەتلىرىنى ئۈلگە قىلىشىمىز لازىم (كولوسى. 3:9، 10). يەھۋانىڭ ياردىمى بىلەن، ھەتتا ئەڭ يىرگىنچلىك ۋە زوراۋان ئادەملەرمۇ يېڭى تەبىئەتنى كىيىپ، ئۆزىنى ئۆزگەرتەلەيدۇ.
14. جېكنىڭ مىسالىدىن نېمىنى ئۆگىنىمىز؟ (رەسىمگە ھەم قاراڭ).
14 جېكنىڭ مىسالىنى كۆرۈپ باقايلى. ئۇ ناھايىتى زوراۋان ۋە خەتەرلىك ئادەم بولغاچقا، ئۇنىڭغا «ئالۋاستى» دەپ لەقەم قويۇشقان. ئۇ ھەر تۈرلۈك جىنايەتلەرنى ئۆتكۈزگەچكە، ئۇ ئۆلۈم جازاسىغا ھۆكۈم قىلىنغان. لېكىن، ئۆلۈم جازاسىنى ئىجرا قىلىنىشىنى كۈتۈۋاتقاندا، ئۇ تۈرمىدە ۋەز قىلىشقا كەلگەن بۇرادەر بىلەن تونۇشۇپ، مۇقەددەس كىتابنى تەتقىق قىلىپ ئۆگىنىشكە باشلىغان. ئۆتمۈشتە نۇرغۇن رەزىل ئىشلارنى قىلسىمۇ، جېك كونا تەبىئىتىنى تاشلاپ، پۈتۈنلەي ئۆزگىرىپ، كېيىنرەك چۆمۈلدۈرۈشتىن ئۆتكەن. جېنىڭ ھەقىقەتەن كۆپ ئۆزگەرگەن ئىدىكى، ئۆلۈم جازاسى ئىجرا قىلىنغان كۈنى ھەتتا بەزى تۈرمە ساقچىلىرى ئۇنىڭ بىلەن خوشلىشىپ كۆزلىرىگە ياش ئالغان. بىر تۈرمە ئەمەلدارى مۇنداق دېگەن: «جېك تۈرمىگە كەلگەندە، ئەڭ قەبىھ جىنايەتچى ئىدى، ھازىر بولسا، ئۇ ئەڭ ياخشى ئادەم». جېك ئۆلتۈرۈلۈپ بىرقانچە كۈنلەردىن كېيىن، بەزى بۇرادەرلەر تۈرمىگە بېرىپ، شۇ ھەپتىدىكى ئىبادەت يىغىلىشىنى ئۆتكۈزگەندە، قاتناشقانلارنىڭ ئارىسىدا بىر جىنايەتچى بىرىنچى قېتىم يىغىلىشقا كەلگەن ئىدى. جېنىڭ ئۆزگەرگەنلىكى ئۇنىڭغا قاتتىق تەسىر قىلغاچقا، ئۇمۇ يەھۋاغا ئىبادەت قىلىش ئۈچۈن نېمە قىلىشى كېرەكلىكىنى بىلىشنى خالىغان. دېمەك، بۇ مىسالدىن كۆرگىنىمىزدەك، ياخشى يۈرۈش-تۇرۇشىمىز بىلەن ئاسماندىكى ئاتىمىزغا شان-شەرەپ كەلتۈرەلەيمىز.—1-پېتر. 2:12.
بىز يۈرۈش-تۇرۇشىمىز ئارقىلىق يەھۋاغا شان-شەرەپ كەلتۈرەلەيمىز (14-ئابزاسقا قاراڭ)d
يەھۋا پات-يېقىندا ئۆز ئىسىمىنى قانداق ئۇلۇغلايدۇ؟
15. پات-يېقىندا يەھۋا ئۆز ئىسىمىنى قانداق ئۇلۇغلايدۇ؟ (زەبۇر 96:10–13)
15 زەبۇر 96:10–13-نى ئوقۇڭ. زەبۇر 96-بابنىڭ ئاخىرقى ئايەتلىرىدە، يەھۋا ئادىل پادىشاھ ۋە سوتچى دەپ تەسۋىرلەنگەن. پات-يېقىندا يەھۋا ئۆز ئىسىمىنى قانداق ئۇلۇغلايدۇ؟ ئۇ ئادالەتنى ئورنىتىش ئارقىلىق بۇنى ئەمەلگە ئاشۇرىدۇ. يېقىن كەلگۈسىدە يىرگىنچلىك ئىشلارنى قىلىپ، يەھۋانىڭ نام-شۆھرىتىگە داغ تەگكۈزگەن كاتتا بابىلنى كۆزدىن يوقىتىدۇ (ۋەھىي. 17:5، 16؛ 19:1، 2). بەزىلەر كاتتا بابىلنىڭ ۋەيران قىلىنغانلىقىنى كۆرۈپ، بىزگە قوشۇلۇپ يەھۋاغا ئىبادەت قىلىشنى باشلىشى مۇمكىن. ئاخىرىدا، ئارماگېدون ئۇرۇشىدا، يەھۋا ئۆزىگە قارشى چىققانلارنى ۋە ئۇنىڭ ئىسىمىغا كۇپۇرلۇق قىلغانلارنىڭ ھەممىسىنى ھالاك قىلىدۇ. لېكىن، خۇدانى سۆيۈپ، ئۇنىڭغا بويسۇنغانلارنى ۋە ئۇنىڭ ئىسىمىغا شان-شەرەپ كەلتۈرگەنلەرنى قۇتقۇزىدۇ (ماركۇس 8:38؛ 2-سالونىكا. 1:6–10). مەسىھنىڭ مىڭ يىللىق ھۆكۈمرانلىقى ئاخىرلاشقاندا، ئىنسانلار ئەڭ ئاخىرقى سىناقتىن ئۆتكەندىن كېيىن، يەھۋا ئۆز ئىسىمىنى تەلتۆكۈس ئۇلۇغلاپ، پەقەت يالغۇز ئۇ ئىبادەتكە لايىق ئىكەنلىكىنى ئىسپاتلايدۇ (ۋەھىي. 20:7–10). شۇ چاغدا، «خۇددى سۇلار دېڭىزنى تولدۇرۇپ تۇرغاندەك، يەھۋانىڭ ئۇلۇغلۇقى ھەققىدىكى بىلىم پۈتكۈل يەر يۈزىنى تولدۇرىدۇ».—ھاباق. 2:14.
16. سىز نېمە قىلىشقا قەتئىي بەل باغلىدىڭىز؟ (رەسىمگە ھەم قاراڭ).
16 پات-يېقىندا، بارچە ئىنسانلارنىڭ ياراتقۇچى يەھۋاغا ئۆز ئىسىمىغا لايىق شان-شەرەپنى بېرىدۇ. شۇ كۈن كەلگەندە چەكسىز شاد-خۇراملىققا چۆمىمىز! بىراق، ھازىرنىڭ ئۆزىدە ھەم ھەربىر پۇرسەتنى قولدىن بەرمەي، خۇدايىمىز يەھۋا ھەققىدە سۆزلەش ۋە ئۇنىڭغا مەدھىيە ۋە شان-شەرەپ ئېلىپ كېلىدىغان ئىشلارنى قىلىش ئارقىلىق ئۇنى ئۇلۇغلىيالايمىز. بۇنىڭ نەقەدەر مۇھىملىقىنى تەكىتلەش ئۈچۈن، رەھبەرلىك كېڭەش 2025-يىلنىڭ يىللىق ئايىتى سۈپىتىدە زەبۇر 96:8-ئايەتنى تاللىغان: «يەھۋاغا ئۆز ئىسىمىغا لايىق شان-شەرەپنى بېرىڭلار».
ئاخىرىدا ھەممە ئىنسانلار يەھۋاغا ئۆز ئىسىمىغا لايىق شان-شەرەپنى بېرىدۇ! (16-ئابزاسقا قاراڭ)
2-ناخشا تەشەككۈر يەھۋا!
a بەزى ئىسىملار ئۆزگەرتىلگەن.
b سۈرەتتە: ئانجېلىنانىڭ سەھنىلەشتۈرۈلگەن كۆرۈنۈشى.
c سۈرەتتە: پرىسكانىڭ سەھنىلەشتۈرۈلگەن كۆرۈنۈشى.
d سۈرەتتە: جېكنىڭ سەھنىلەشتۈرۈلگەن كۆرۈنۈشى.