2-تەتقىق ماقالىسى
36-ناخشا «خۇدا قوشقاننى ئىنسان ئايرىمىسۇن»
ئەرلەر، ئايالىڭلارنى ئەزىزلەڭلار
«ئەي ئەرلەر … ئايالىڭلارنى … ئەزىزلەڭلار».—1-پېتر. 3:7.
مەركىزى ئىدىيە
ئەر كىشى گەپ-سۆزلىرى ۋە ئىش-ھەرىكەتلىرى ئارقىلىق ئايالىنى ئەزىزلەيدىغانلىقىنى كۆرسىتەلەيدۇ.
1. نېمە ئۈچۈن ياراتقۇچى يەھۋا نىكاھلىق تۇرمۇشنى سوۋغات قىلغان؟
يەھۋا — «شاد-خۇرام» خۇدادۇر. ئۇ بىزنىڭمۇ خۇشال-خۇرام بولۇشىمىزنى خالايدۇ (1-تىموت. 1:11). ئۇ خۇشال-خۇرام ياشىشىمىز ئۈچۈن بىزگە نۇرغۇن سوۋغاتلارنى بەرگەن (ياقۇپ 1:17). شۇ سوۋغاتلاردىن بىرى — نىكاھلىق تۇرمۇش. توي قىلغان كۈنى، بىر جۈپ ئەر-ئايال نىكاھ قەسىمى بېرىپ، بىر-بىرىنى سۆيىدىغانلىقى ۋە ھۆرمەتلەيدىغانلىقىنى ۋەدە قىلىشىدۇ. ئەر-ئايال تويدىن كېيىن، ئارىسىدىكى سۆيگۈ-مۇھەببەت رىشتىسىنى داۋاملىق كۈچەيتسە، ئۇلار چوقۇم شاد-خۇرام ئىچىدە بەختلىك ھايات كەچۈرەلەيدۇ.—پەند ن. 5:18.
2. بۈگۈنكى كۈندە نۇرغۇن كىشىلەرنىڭ نىكاھى قانداق ئەھۋالغا چۈشۈپ قالغان؟
2 ئەپسۇسكى، بۈگۈنكى كۈندە نۇرغۇن ئەر-ئاياللار توي كۈنى قىلغان قەسەملىرىنى ئۇنتۇپ قالىدۇ. نەتىجىدە، ئۇلار خۇشال-خۇرام ھايات كەچۈرمەيدۇ. دۇنيا سەھىيە تەشكىلاتىنىڭ تەكشۈرۈش دوكلاتىدا كۆرسىتىلىشىچە، نۇرغۇن ئەرلەر ئايالىنى ئۇرۇپ-سوقىدۇ، ھاقارەتلىك سۆزلەر بىلەن ياكى باشقا ئۇسۇلدا خورلايدۇ. بەزى ئەرلەر ئۆزلىرىنى باشقىلارنىڭ ئالدىدا ئايالىنى ئەزىزلەپ، ياخشى مۇئامىلە قىلىدىغاندەك بىرى كۆرسىتىدۇ، لېكىن، ئۆيىدە تامامەن باشقىچە، ئايالىغا ناچار مۇئامىلە قىلىدۇ. ئۇنىڭدىن باشقا، كەڭ تارقالغان بىر مەسىلە ئەرلەرنىڭ شەھۋانىي مەزمۇندىكى نەرسىلەرنى كۆرۈشى بولۇپ، بۇ ئايال كىشىنى ئېرى ئۇنى سۆيمەيدىغاندەك ياكى ئەزىزلىمەيدىغاندەك ھېس قىلدۇرىدۇ.
3. نېمە ئۈچۈن بەزى ئەرلەر ئايالىنى خورلايدۇ؟
3 بەزى ئەرلەر نېمە ئۈچۈن ئايالىغا ناچار مۇئامىلە قىلىدۇ؟ بەلكىم، ئۇلار كىچىكىدىن دادىسىنىڭ ئاپىسىغا قوپال مۇئامىلە قىلغانلىقىنى كۆرۈپ چوڭ بولغان، شۇڭا ئۇلار شۇنداق مۇئامىلە قىلىشنى نورمال ئەھۋال دەپ ئويلايدۇ. يەنە بەزىلەر مەدەنىيەتنىڭ تەسىرىگە ئۇچرىغان. ئۇلار «ھەقىقىي ئەر» قاتتىق قول بولۇپ، ئايالىغا ئائىلىدە كىم خوجايىن ئىكەنلىكىنى بىلدۈرۈپ تۇرۇشى كېرەك دەپ ئويلايدۇ. يەنە بىر قىسىم ئەرلەر ئۆزىنى قانداق تۇتۇۋېلىشنى ۋە ئاچچىقىنى بېسىۋېلىشنى بىلمەيدۇ. يەنە بەزىلىرى دائىم شەھۋانىي مەزمۇندىكى نەرسىلەرنى كۆرگەچ، ئۇلارنىڭ ئايال كىشىگە ۋە جىنسىي مۇناسىۋەتكە قارىتا كۆز قارىشى بۇرمىلانغان. بۇنىڭدىن باشقا، تەتقىقات نەتىجىسىدە كۆرسىتىلىشىچە، 19-COVID تاجىسىمان ۋىرۇسى تارقىلىپ يۈرگەن مەزگىلدە، ئائىلىدە ئەرلەرنىڭ ئاياللىرىغا زوراۋانلىق قىلىشى تېخىمۇ كۆپىيىپ كەتتى. ئەلۋەتتە، يۇقىرىدا تىلغا ئېلىپ ئۆتكەن تۈرلۈك ئامىللارنىڭ ھېچبىرى ئەرلەرنىڭ ئاياللىرىغا زوراۋانلىق قىلىشىغا سەۋەب بولالمايدۇ.
4. ئەيسانىڭ ھەقىقىي ئەگەشكۈچىسى بولغان ئەرلەر قايسى جەھەتتىن پەخەس بولۇشى كېرەك ۋە نېمە ئۈچۈن؟
4 ئەيسانىڭ ھەقىقىي ئەگەشكۈچىلىرى بولغان ئەرلەر بۇ دۇنيا كىشىلىرىنىڭ ئاياللارغا بولغان ناتوغرا كۆز قارىشىنىڭ تەسىرىگە ئۇچراشتىن پەخەس بولۇشى كېرەكa. نېمە ئۈچۈن؟ چۈنكى، خاتا ئوي-پىكىرلەر ھەمىشە كىشىنى خاتا ئىش-ھەرىكەتكە يېتەلەيدۇ. ئەلچى پاۋلۇس رىمدىكى مەسىھ قىلىنغان ئېتىقادچىلارنى «بۇ دۇنيانىڭ قېلىپىغا كىرمەڭلار» دەپ ئاگاھلاندۇرغان (رىملىقلار 12:1، 2). شۇ چاغدا، رىمدىكى جامائەتنىڭ قۇرۇلغانلىقىغا بىرنەچچە يىل بولغان بولسىمۇ، جامائەتتىكى بەزى قېرىنداشلار يەنىلا بۇ دۇنيادىكى ئەنئەنىۋى كۆز قارىشى ۋە ئۆرپ-ئادەتلىرىنىڭ تەسىرىگە ئۇچرىغان. شۇ سەۋەبتىن، پاۋلۇس ئۇلارنى ئوي-پىكىرى ۋە ئىش-ھەرىكىتىنى ئۆزگەرتىشكە دەۋەت قىلغان. بۈگۈنكى كۈندىمۇ جامائەتتىكى ئەرلەر بۇ نەسىھەتكە قۇلاق سېلىشى كېرەك. ئېچىنارلىقى، بەزى توي قىلغان بۇرادەرلەر بۇ دۇنيانىڭ يامان تەسىرىگە ئۇچراپ قىلماي، ھەتتا ئايالىنى خورلىغانb. ئۇنداقتا، يەھۋا خۇدا ئەرلەردىن ئايالىغا قانداق مۇئامىلە قىلىشىنى تەلەپ قىلىدۇ؟ بۇ سوئالنىڭ جاۋابىنى ماقالىنىڭ ئاساسىي تېما ئايىتىدىن تاپالايمىز.
5. 1-پېترۇس 3:7-ئايەتكە ئاساسەن، ئەر كىشى ئايالىغا قانداق مۇئامىلە قىلىشى كېرەك؟
5 1-پېترۇس 3:7-نى ئوقۇڭ. يەھۋا ئەرلەرگە ئايالىنى ئەزىزلەشنى بۇيرىغان. بۇ ئەزىزلەش سۆزى بولسا، ئەرنىڭ ئايالىغا سۆيگۈ-مۇھەببەت ۋە ئىززەت-ھۆرمەت بىلەن مۇئامىلە قىلىشى كېرەكلىكىنى كۆرسىتىدۇ. بۇ ماقالىدە، بىز ئەرنىڭ ئۆز ئايالىنى ئەزىزلەيدىغانلىقىنى قانداق كۆرسىتەلەيدىغانلىقىنى كۆرۈپ چىقىمىز. لېكىن، بىز ئاۋۋال ئەرلەر قايسى بەزى ئىش-ھەرىكەتلەردىن چوقۇم ئۆزىنى ئېلىپ قېچىشى كېرەكلىكىنى مۇھاكىمە قىلايلى.
ئايالىڭىزنىڭ كۆڭلىگە ئازار بېرىدىغان ئىشلاردىن يىراق تۇرۇڭ
6. يەھۋا ئايالىغا قول تەگكۈزگەن ئەرلەرگە قانداق قارايدۇ؟ (كولوسىلىقلار 3:19)
6 ئايالىغا قول تەگكۈزۈش. يەھۋا زوراۋان كىشىلەرنى ئۆچ كۆرىدۇ (زەبۇر 11:5). بولۇپمۇ، ئايالىنى ئۇرغان ئەرلەردىن نەپرەتلىنىدۇ (مالاك. 2:16؛ كولوسىلىقلار 3:19-نى ئوقۇڭ). ماقالىنىڭ ئاساسىي ئايىتى، 1-پېترۇس 3:7-ئايەتكە ئاساسلانغاندا، ئەر ئۆز ئايالىغا ياخشى مۇئامىلە قىلمىسا، ئۇنىڭ خۇدا بىلەن بولغان مۇناسىۋىتى بۇزۇلىدۇ. ھەتتا يەھۋا ئۇنىڭ دۇئالىرىغا قۇلاق سالماسلىقى مۇمكىن.
7. ئەفەسلىكلەر 4:31، 32-ئايەتلەرگە ئاساسلانغاندا ئەر كىشى ئايالىغا قانداق گەپ-سۆزلەرنى قىلىشتىن ساقلىنىشى كېرەك؟ («سۆز-ئىبارە مەنىسىگە» قاراڭ).
7 ئايالىغا قوپال سۆزلەش. بەزى ئەرلەر ئايالىغا قوپال، كۆڭلىگە ئازار بېرىدىغان سۆزلەرنى قىلىدۇ. لېكىن، ياراتقۇچى يەھۋا «ئاچچىقلىنىش، غەزەپلىنىش، جېدەللىشىش ۋە ھاقارەتلەش»نى ئۆچ كۆرىدۇc (ئەفەسلىكلەر 4:31، 32-نى ئوقۇڭ). بىزنىڭ قىلغان ھەربىر ئېغىز سۆزىمىزنى يەھۋا ئاڭلاپ تۇرىدۇ. ھەتتا ئەر-ئايال ئۆيدە يالغۇز قالغاندا، ئەرنىڭ ئايالىغا قىلغان سۆزىگە دىققەت قىلىدۇ. قەستەن ئايالىنىڭ دىلىغا ئازار بېرىدىغان سۆزلەرنى قىلىدىغان كىشى پەقەت نىكاھىغا ئەمەس، بەلكى خۇدا بىلەن بولغان دوستلۇقىغا زىيان يەتكۈزىدۇ.—ياقۇپ 1:26.
8. يەھۋا شەھۋانىي مەزمۇندىكى نەرسىلەرگە قارىتا قانداق كۆز قاراشتا ۋە نېمە ئۈچۈن؟
8 شەھۋانىي مەزمۇندىكى نەرسىلەرنى كۆرۈش. يەھۋا شەھۋانىي مەزمۇندىكى نەرسىلەرنى كۆرگەنلەرنى ئۆچ كۆرىدۇ. شۇڭا، شەھۋانىي مەزمۇندىكى نەرسىلەرنى كۆرىدىغان كىشى ئۆزىنىڭ خۇدا بىلەن بولغان مۇناسىۋىتىگە بۇزغۇنچىلىق قىلىپ قالماي، ئايالىغا ھۆرمەتسىزلىك قىلغان بولىدۇd. يەھۋا ئەرلەردىن ئايالىغا پەقەت ئىش-ھەرىكەتلىرىدە ئەمەس، ھەتتا ئوي-پىكىرىدە ھەم ۋاپادار بولۇشىنى تەلەپ قىلىدۇ. ئەيسا مەسىھ ئېيتقاندەك، «كىمكى بىر ئايالغا كۆزىنى ئۈزمەي قاراپ، شەھۋانىي ئوي-خىيالدا بولسا، ئاللىقاچان كۆڭلىدە زىنا قىلغان بولىدۇ»e.—مەتتا 5:28، 29.
9. ئەر كىشى ئۆز ئايالىنى جىنسىي جەھەتتىن خورلىسا، نېمە ئۈچۈن يەھۋا بۇنىڭدىن نەپرەتلىنىدۇ؟
9 جىنسىي خورلاش. بەزى ئەرلەر ئايالى بىلەن جىنسىي ئالاقىدە بولغاندا، ئايالىنىڭ كۆڭلى كۆتۈرمەيدىغان ياكى ئۆزىنى خورلانغاندەك ھېس قىلدۇرىدىغان ئىشلارنى قىلىشقا مەجبۇرلايدۇ. يەھۋا شۇنداق شەخسىيەتچىلىك ۋە مېھىر-شەپقەتسىزلىك تولغان ئىش-ھەرىكەتلەردىن نەپرەتلىنىدۇ. خۇدانىڭ ئەرلەردىن تەلەپ قىلىدىغىنى، ئۆز ئايالىنى سۆيۈش، ئۇنى قەدىرلەش ۋە ھېس-تۇيغۇلىرىنى ھۆرمەتلەش (ئەفەس. 5:28، 29). يەھۋا گۇۋاھچىسى بولغان كىشى ئاللىقاچان ئايالىنىڭ كۆڭلىگە ئازار بەرگەن، ئۇنى خورلىغان ياكى شەھۋانىي مەزمۇندىكى نەرسىلەرنى كۆرگەن بولسىچۇ؟ ئۇ ئوي-پىكىرى ۋە ئىش-ھەرىكەتلىرىنى قانداق ئۆزگەرتەلەيدۇ؟
ئايالىڭىزنىڭ كۆڭلىگە ئازار بېرىدىغان ئىشلارنى قانداق تاشلىيالايسىز؟
10. ئەرلەر ھەزرىتى ئەيسانىڭ قالدۇرغان ئۈلگىسىدىن نېمىنى ئۆگىنەلەيدۇ؟
10 ئايالىنىڭ كۆڭلىگە ئازار بېرىپ، خورلۇق ھېس قىلدۇرىدىغان ئىش-ھەرىكەتلەرنى تاشلاش ئۈچۈن ئەرلەر نېمە قىلسا بولىدۇ؟ ئۇ ئەيسا مەسىھنى ئۈلگە قىلىشقا تىرىشسا بولىدۇ. ئەيسا ئۆيلەنمىگەن بولسىمۇ، بارچە توي قىلغان ئەرلەر ئۈچۈن ئەڭ ياخشى ئۈلگە قالدۇرغان. ئەيسانىڭ ئۆز شاگىرتلىرىغا قىلغان مۇئامىلىسىدىن ئەرلەر ئۆز ئايالىغا قانداق مۇئامىلە قىلىشنى ئۆگىنەلەيدۇ (ئەفەس. 5:25). كېلىڭلار، ئەيسانىڭ شاگىرتلىرىغا قانداق مۇئامىلە قىلغانلىقى؛ قانداق سۆزلىگەنلىكىنى مۇھاكىمە قىلىپ، ئەرلەر ئەيسانىڭ ئۈلگىسىدىن نېمىلەرنى ئۆگىنەلەيدىغانلىقىنى كۆرۈپ چىقايلى.
11. ئەيسا مەسىھ ئۆز ئەلچىلىرىگە قانداق مۇئامىلە قىلغان؟
11 ئەيسا مەسىھ ئۆز ئەلچىلىرىگە ھەردائىم كۆيۈنگەن ۋە ئۇلارنىڭ ئىززەت-ھۆرمىتىنى قىلغان. ئۇ ھېچقاچان قوپال تەگمىگەن ۋە قاتتىق قول بولمىغان. گەرچە ئەيسا ئۇلاردىن كۆپ كۈچلۈك ياكى ھوقۇقلۇق بولسىمۇ، ھېچقاچان ئۆز ھوقۇقىنى ئۇلارغا بېسىم ياكى ھەيۋە قىلىش ئۈچۈن ئىشلەتمىگەن. ئەكسىنچە، ئەيسا كەمتەرلىك بىلەن ئۇلارنىڭ خىزمىتىدە بولغان (يۇھاننا 13:12–17). ئەيسا ئەلچىلىرىگە: «مەن مۇلايىم ۋە كەمتەرمەن، … مەندىن ئۆگىنىڭلار. شۇنداق قىلىپ جېنىڭلار ئارام تاپىدۇ»،— دېگەن (مەتتا 11:28–30). بۇ ئايەتتىن كۆرگىنىمىزدەك، ئەيسا مۇلايىم بولغان. مۇلايىم كىشى ھەرگىزمۇ ئاجىز ئەمەس، بەلكى ئۇ ئۆزىنى تۇتۇۋالالايدىغان كۈچلۈك كىشىدۇر. كىمدۇ-بىرلىرى تېرىكتۈرگەندە، مۇلايىم كىشى ئۆزىنى بېسىۋېلىپ، سەۋرچانلىق كۆرسىتەلەيدۇ.
12. ئەيسا مەسىھ گەپ-سۆزلەرنى قىلىشتا قانداق ئۈلگە قالدۇرغان؟
12 ئەيسا مەسىھ ھەردائىم باشقىلارغا تەسەللى ۋە ئىلھام-مەدەت بېرىدىغان سۆزلەرنى قىلغان. ئۇ ھېچقاچان شاگىرتلىرىغا قوپال سۆزلىمىگەن (لۇقا 8:47، 48). ھەتتا دۈشمەنلىرى ھاقارەتلەپ، ئەتەي ئۇنىڭ ئاچچىقىنى كەلتۈرمەكچى بولغاندا، ئەيسا «ھاقارەت بىلەن جاۋاب قايتۇرمىغان» (1-پېتر. 2:21–23). بەزىدە، قوپال سۆز بىلەن جاۋاب قايتۇرۇشنىڭ ئورنىغا، ئۇ ئۈندىمەي جىم تۇرۇشنى تاللىغان (مەتتا 27:12–14). ئەيسا مەسىھ ھەقىقەتەن ئەرلەر ئۈچۈن ئاجايىپ ئۈلگە!
13. مەتتا 19:4–6-ئايەتلەرگە ئاساسلانغاندا، ئەر كىشى قانداق قىلىپ «ئايالى بىلەن باغلىنىدۇ»؟ (رەسىمگە ھەم قاراڭ).
13 ئەيسا مەسىھ ئەرلەر ئاياللىرىغا ۋاپادار بولۇشى كېرەكلىكىنى ئۆگەتكەن. ئۇ ئاتىسى يەھۋانىڭ سۆزلىرىنى تەكرارلاپ، ئەر كىشى «… ئۆز ئايالى بىلەن باغلىنىدۇ» دېگەن (مەتتا 19:4–6-نى ئوقۇڭ). بۇ ئايەتتىكى «باغلىنىش» دېگەن گرېكچە سۆز ئۇدۇل مەنىدە «چاپلىشىش» دېگەننى بىلدۈرىدۇ. دېمەك، ئەر-خوتۇنلۇق مۇناسىۋەت خۇددى ئۇلار يېلىم بىلەن چاپلاشقاندەك كۈچلۈك بولۇشى كېرەك. ئەگەر ئۇلاردىن بىرى ئۆز جۈپتىنىڭ كۆڭلىنى ئاغرىتىدىغان بىر ئىشنى قىلسا، چوقۇم ھەر ئىككىلىسى ئازاب چېكىدۇ. ئايالىنى چىن دىلىدىن سۆيىدىغان ئەر كىشى ھەرقانداق شەھۋانىي مەزمۇندىكى نەرسىلەرگە يېقىن يولىمايدۇ. ئۇ دەرھال كۆزلىرىنى «ئەرزىمەس نەرسىلەرگە قاراشتىن» ئېلىپ قاچىدۇ (زەبۇر 119:37). باشقىچە ئېيتقاندا، ئۇ ئۆز ئايالىدىن باشقا ئاياللارغا ئارزۇ-ھەۋەس بىلەن تىكىلىپ قارىماسلىق ئۈچۈن كۆزلىرى بىلەن ئەھدە تۈزىدۇ.—ئايۇپ 31:1.
ۋاپادار ئەر شەھۋانىي مەزمۇندىكى نەرسىلەرنى كۆرۈشنى رەت قىلىدۇ (13-ئابزاسقا قاراڭ)g
14. ئايالىنى خورلايدىغان ئەرلەر ياراتقۇچى يەھۋا ۋە ئايالى بىلەن بولغان مۇناسىۋەتنى ئەسلىگە كەلتۈرۈش ئۈچۈن نېمە قىلالايدۇ؟
14 ئايالىغا قول تەگكۈزىدىغان ياكى قوپال سۆزلەيدىغان ئەرلەر يۇقىرىدا تىلغا ئالغان ئىشلاردىن باشقا، يەنە چوقۇم تۆۋەندىكى بىرنەچچە قەدەم باسقۇچلارنى بېسىش ئارقىلىق ياراتقۇچى يەھۋا بىلەن ۋە ئايالى بىلەن مۇناسىۋەتنى ئەسلىگە كەلتۈرۈشى كېرەك. بىرىنچى، ئۆزىنىڭ ناتوغرا قىلىۋاتقانلىقىنى ئېتىراپ قىلىش لازىم. يەھۋا قىلغان ھەربىر ئىشىمىزنى كۆرىدۇ ۋە ھەربىر سۆزىمىزنى ئاڭلايدۇ (زەبۇر 44:21؛ ۋەز 12:14؛ ئىبرانىي. 4:13). ئىككىنچى، چوقۇم ئايالىنى خورلاشنى توختىتىپ، ئۆزىنى ئۆزگەرتىشى كېرەك (پەند ن. 28:13). ئۈچىنچى، سەمىمىيلىك بىلەن ئايالىدىن ۋە يەھۋادىن ئەپۇ سوراپ، ئۇلارنىڭ كەچۈرۈمىگە ئېرىشىش كېرەك (ئەلچى. 3:19). ئۇنىڭدىن باشقا، ئۇ يەھۋاغا يالۋۇرۇپ دۇئا قىلىپ، ئۆزىدە ئۆزىنى ئۆزگەرتىش ئارزۇ-ئىستىكى بولۇشى ۋە يەنە ئوي-پىكىرى، گەپ-سۆزلىرى، ئىش-ھەرىكەتلىرىنى تىزگىنلەش كۈچى بولۇشى ئۈچۈن ياردەم سورىشى لازىم (زەبۇر 51:10–12؛ 2-كورىنت. 10:5؛ فىلىپى. 2:13). تۆتىنچى، دۇئاسىغا ماس ئىش-ھەرىكەت قىلىپ، ھەرقانداق زورلۇق-زومبۇلۇقنى ۋە ھاقارەتلىك گەپ-سۆزلەرنى ئۆچ كۆرۈشنى ئۆگىنىشى كېرەك (زەبۇر 97:10). بەشىنچى، ئۇ دەرھال جامائەت ئاقساقاللىرىدىن ياردەم سورىشى كېرەك (ياقۇپ 5:14–16). ئالتىنچى، قايتا ناتوغرا ئىشلارنى تەكرارلىماسلىق ئۈچۈن ئېنىق بىر پىلان تۈزۈشى لازىم. شەھۋانىي مەزمۇندىكى نەرسىلەرنى كۆرىدىغان ئەرلەرمۇ مۇشۇ ئالتە قەدەم باسقۇچ بويىچە قىلىشى كېرەك. ئۆزىنى ئۆزگەرتىش ئۈچۈن پۈتۈن كۈچى بىلەن تىرىشىۋاتقان ئەرلەرنى يەھۋا چوقۇم بەرىكەتلەيدۇ (زەبۇر 37:5). بىراق، ئايالىنىڭ كۆڭلىگە ئازار بېرىدىغان ئىشلارنى قىلىشنى توختىتىشى يېتەرلىك ئەمەس، ئەر كىشى چوقۇم ئايالىغا سۆيگۈ-مۇھەببەت ۋە ئىززەت-ھۆرمەت كۆرسىتىشنى ھەم ئۆگىنىشى لازىم. ئۇ بۇنى قانداق قىلالايدۇ؟
ئايالىڭىزغا سۆيگۈ-مۇھەببەت ۋە ئىززەت-ھۆرمەت كۆرسىتىڭ
15. ئەر كىشى ئۆز ئايالىغا سۆيگۈ-مۇھەببىتىنى قانداق ئىزھار قىلالايدۇ؟
15 سۆيگۈ-مۇھەببەت ئىزھار قىلىڭ. بەزى بۇرادەرلەر جۈپتى بىلەن بەختلىك تۇرمۇش كەچۈرۈش ئۈچۈن ھەر كۈنى ئايالىغا سۆيگۈ-مۇھەببىتىنى ئىزھار قىلىشنى ئادەتكە ئايلاندۇرىدۇ (يۇھاننا 1-خ. 3:18). ئەر كىشى ئايالىنىڭ قولىنى تۇتۇش ياكى ئايالىنى قۇچاقلاپ قويۇشتەك ئاددىي يوللار بىلەن سۆيگۈ ئىزھار قىلالايدۇ. ياكى بولمىسا، ئايالىغا «سىزنى سېغىندىم» ياكى «كۈنىڭىز قانداق ئۆتۈۋاتىدۇ؟» دېگەندەك قىسقا ئۇچۇرلارنى ئەۋەتسە بولىدۇ. ئاندا-ساندا شىرىن-تاتلىق سۆزلەر بىلەن سۆيگۈ ئىزھار قىلىدىغان خەتلەرنى يېزىپ قالدۇرۇپ قويسىمۇ بولىدۇ. ئەر كىشى مۇشۇنىڭغا ئوخشاش ئىشلارنى قىلغاندا، ئۇ ئايالىنى ئەزىزلەيدىغانلىقىنى كۆرسىتىپ، نىكاھ رىشتىسىنى كۈچەيتەلەيدۇ.
16. ئەر كىشى نېمە ئۈچۈن ئايالىنى ماختاپ تۇرۇشى كېرەك؟
16 ئۇنى ماختاڭ ۋە مىننەتدارلىق بىلدۈرۈڭ. ياخشى ئەر دائىم يېقىملىق سۆزلەر بىلەن ئايالىنىڭ ئۆزى ئۈچۈن بەكمۇ قەدىرلىك ئىكەنلىكىنى ئېيتىپ، ئايالىغا ئەزىزلىنىدىغانلىقىنى ھېس قىلدۇرۇپ تۇرىدۇ. بۇنداق قىلىشنىڭ بىر يولى ئەر ئۆزىنى قوللاپ-قۇۋۋەتلىگىنى ئۈچۈن ئايالىغا مىننەتدارلىق بىلدۈرۈشنى ئۇنتۇماسلىقى كېرەك (كولوسى. 3:15). ئەگەر ئەر كىشى ئايالىنى چىن كۆڭلىدىن ماختىسا، ئايالىنىڭ كۆڭلىنى كۆتۈرەلەيدۇ. شۇنداق بولغاندا، ئايال كىشى ئۆزىنى بىخەتەر، سۆيۈلگەن ۋە ئەزىزلەنگەندەك ھېس قىلىدۇ.—پەند ن. 31:28.
17. ئەر كىشى ئايالىغا ئىززەت-ھۆرمەت كۆرسىتىش ئۈچۈن نېمە قىلالايدۇ؟
17 ئايالىڭىزغا كۆيۈنۈپ، ئىززەت-ھۆرمەت كۆرسىتىڭ. ئايالىنى سۆيىدىغان ئەر ئۇنى قەدىرلەيدۇ ۋە ئەزىزلەيدۇ. ئۇ ئايالىنى ياراتقۇچى يەھۋادىن كەلگەن قىممەتباھا سوۋغات دەپ قارايدۇ (پەند ن. 18:22؛ 31:10). شۇڭا، ئەر ھەتتا ئۇلار ئىككىسى يالغۇز چاغلاردىمۇ، ئايالنىڭ ھېس-تۇيغۇلىرىغا كۆڭۈل بۆلۈپ، كۆيۈمچانلىق بىلەن مۇئامىلە قىلىدۇ. جىنسىي ئالاقە قىلغاندا، ئايالىنىڭ كۆڭلى كۆتۈرمەيدىغان، خورلۇق ھېس قىلدۇرىدىغان ياكى ۋىجدانىنى ئازابلايدىغان ئىشلارنى قىلىشقا مەجبۇرلىمايدۇf. ئەر ئۆزىمۇ يەھۋانىڭ ئالدىدا پاك ۋىجدان بىلەن تۇرۇشقا تىرىشىدۇ.—ئەلچى. 24:16.
18. ئەرلەر نېمە قىلىشقا قەتئىي بەل باغلىشى كېرەك؟ («ئايالىڭىزغا ئىززەت-ھۆرمەت كۆرسىتىشنىڭ تۆت ئۇسۇلى» ناملىق رامكىغا قاراڭ)،
18 ئەرلەر، يەھۋا سىلەرنىڭ گەپ-سۆز ۋە ئىش-ھەرىكەتلەردە ئايالىڭلارغا ئىززەت-ھۆرمەت بىلدۈرۈش ئۈچۈن كۆرسەت تىرىشچانلىقىڭلارنى كۆرۈپ، چوقۇم ناھايىتى خۇشال بولىدۇ. سىلەر ئايالىڭلارنىڭ كۆڭلىگە ئازار بېرىدىغان ھەرقانداق ئىشلارنى قىلشتىن ساقلىنىش، ئۇلارغا كۆيۈمچان بولۇش، ئىززەت-ھۆرمەت كۆرسىتىش ۋە سۆيگۈ-مۇھەببەت ئىزھار قىلىش ئارقىلىق ئۇلارنى ئەزىزلەشكە قەتئىي بەل باغلاڭلار. شۇنداق قىلساڭلار، ئايالىڭلارنى سۆيىدىغان ۋە قەدىرلەيدىغانلىقىڭلارنى كۆرسىتەلەيسىلەر. ئەڭ مۇھىمى، ئايالىڭلارنى ئەزىزلەپ، ياراتقۇچى يەھۋا بىلەن بولغان دوستلۇقىڭلارنى ساقلاپ قالالايسىلەر.—زەبۇر 25:14.
52-ناخشا قەلبىڭنى چىڭ قوغدا!
a ئەرلەر «كۈزىتىش مۇنارى» ژۇرنىلى، 2024-يىل، يانۋار سانىدىكى «ئاياللارغا يەھۋاغا ئوخشاش مۇئامىلە قىلامسىز؟» ناملىق ماقالىنى ئوقۇپ چىقسا بولىدۇ.
b ئېرىدىن خورلۇق كۆرگەن ئاياللار «ئائىلە زوراۋانلىقىغا ئۇچرىغانلارغا ياردەم» دېگەن ماقالىدىن ياخشى مەسلىھەتلەرنى تاپالايدۇ (jw.org تور بېكىتى ۋە «®yJW Librar» پروگراممىسىدىكى «باشقا ماۋزۇلار»).
c سۆز-ئىبارە مەنىسى: «كۆڭۈلگە ئازار بېرىدىغان سۆزلەر» ھاقارەتلىك ۋە قوپال گەپ-سۆزلەر بىلەن تىللاش، كەمسىتىش ۋە تەنقىدلەپ ئەيىبلەشنى ئۆز ئىچىگە ئالىدۇ. ئەسلىدە غەرەزلىك ھالدا كەم سۇندۇرىدىغان ۋە ھاقارەتلەيدىغان ھەرقانداق سۆزلەرنى قىلىش خورلاش ھېسابلىنىدۇ.
d jw.org تور بېكىتى ۋە «JW Library» پروگراممىسىدىن «شەھۋانىي مەزمۇندىكى نەرسىلەرنىڭ نىكاھنى ۋەيران قىلىشىغا يول قويماڭ» دېگەن ماقالىنى ئوقۇپ بېقىڭ.
e ئېرى شەھۋانىي مەزمۇنلاردىكى نەرسىلەرنى كۆرىدىغان ئاياللار «كۈزىتىش مۇنارى» ژۇرنىلى، 2023-يىل، ئاۋغۇست سانىدىكى «ئۆمۈرلۈك جۈپتىڭىز شەھۋانىي مەزمۇندىكى نەرسىلەرنى كۆرگەندە» دېگەن ماقالىنى ئوقۇسا بولىدۇ.
f مۇقەددەس كىتابتا جىنسىي ئالاقە قىلغاندا، ئەر-ئايالنىڭ قانداق ئىش-ھەرىكەتلىرى پاك ياكى ناپاك ئىكەنلىكى ئېنىق يېزىلمىغان. بۇ مەسىلىدە، خۇداغا ئىبادەت قىلىدىغان ئەر-ئايال ياراتقۇچىسى يەھۋانى ھۆرمەتلەيدىغان، بىر-بىرىنى خۇشال قىلىدىغان ۋە پاك ۋىجدانىنى ساقلىيالايدىغان قارارنى چىقىرىشى كېرەك. ئادەتتە ئەر-ئايال ئۆزلىرىنىڭ جىنسىي تۇرمۇشى ھەققىدە باشقىلار بىلەن مۇھاكىمە قىلمايدۇ.
g رەسىمنىڭ چۈشەندۈرۈشى: يەھۋا گۇۋاھچىسى ئەمەس خىزمەتداشلىرى بىر بۇرادەرگە شەھۋانىي سۈرەتلەر بېسىلغان ژۇرناللارنى كۆرسەتمەكچى بولۇۋاتىدۇ.