27-تەتقىق ماقالىسى
139-ناخشا ئۇلارنى چىڭ تۇرۇشقا ئۆگەتكىن
مۇقەددەس كىتابنى ئۆگىنىۋاتقانلارنىڭ خۇدانىڭ خىزمەتچىسى بولۇشىغا ياردەم بېرىڭ
«ئىمان-ئېتىقادتا چىڭ تۇرۇڭلار، . . . مەردانە ۋە كۈچلۈك بولۇڭلار».—1-كورىنت. 16:13.
مەركىزى ئىدىيە
مۇقەددەس كىتابنى ئۆگىنىۋاتقانلارنىڭ كۈچلۈك ئىمان-ئېتىقادنى يېتىلدۈرۈپ، يۈرەكلىك ھالدا يەھۋاغا خىزمەت قىلىشنى قارار قىلىشىغا قانداق ياردەم بېرەلەيمىز؟
1، 2. (1) نېمىشقا مۇقەددەس كىتابنى ئۆگىنىۋاتقان بەزى كىشىلەر يەھۋا تەرەپتە تۇرۇشتىن ئىككىلىنىپ قالىدۇ؟ (2) بۇ ماقالىدە نېمىنى كۆرۈپ چىقىمىز؟
سىز يەھۋا گۇۋاھچىسى بولۇشتىن ئاۋۋال، ئىككىلىنىپ كۆڭلىڭىزدە قورقۇنچ پەيدا بولغانمۇ؟ بەلكىم، سىز ئۆز ۋاقتىدا خىزمەتداشلىرىڭىز، دوستلىرىڭىز ياكى ئۇرۇق-تۇغقانلىرىڭىزنىڭ قارشى چىقىشىدىن ئەنسىرىگەن. ياكى بولمىسا، يەھۋانىڭ ئۆلچەم-قائىدىلىرى بويىچە ياشاشنى قىيىن دەپ ئويلىغان. شۇنداق بولغان بولسا، سىز چوقۇم مۇقەددەس كىتابنى ئۆگىنىۋاتقان بەزى كىشىلەرنىڭ نېمە ئۈچۈن يەھۋا گۇۋاھچىسى بولۇشنى قارار قىلىشنى قىيىن ھېس قىلىۋاتقانلىقىنى ياخشى چۈشىنەلەيسىز.
2 ئەيسا مەسىھ شۇنداق قورقۇنچ ياكى ئەنسىرەش بەزىلەرنىڭ يەھۋاغا خىزمەت قىلىشىغا توسالغۇ بولىدىغانلىقىنى ياخشى چۈشەنگەن (مەتتا 13:20–22). لېكىن، ئەيسا ئۆزىگە ئەگىشىشتىن ئىككىلىنىپ قالغانلاردىن ۋەز كەچمىگەن. ئۇ ئۆز شاگىرتلىرىغا تەلىم بېرىپ، ئۇلارنى شۇنداق كىشىلەرگە تۆۋەندىكى تۆت جەھەتتىن ياردەم بېرىشكە دەۋەت قىلغان: (1) يەھۋاغا خىزمەت قىلىشنى قارار قىلىشقا نېمە توسالغۇ بولۇۋاتقانلىقىنى كۆرۈپ يېتىش، (2) يەھۋاغا بولغان سۆيگۈ-مۇھەببىتىنى كۈچەيتىش، (3) ھاياتىدا نېمىنى بىرىنچى ئورۇنغا قويۇش ۋە (4) قىيىنچىلىقلارغا قارشى تۇرۇش. بىزمۇ ئەيسا مەسىھنى ئۈلگە قىلىپ، «مەڭگۈ شاد-خۇرام ياشاڭ!» ناملىق كىتابنىڭ ياردىمى بىلەن مۇقەددەس كىتابنى ئۆگىنىۋاتقانلارنىڭ يەھۋاغا خىزمەت قىلىشنى قارار قىلىشىغا ياردەم بېرەلەيمىز. ئۇنداقتا، قانداق ياردەم بېرەلەيمىز؟
يەھۋاغا خىزمەت قىلىشىغا نېمە توسالغۇ بولۇۋاتقانلىقىنى كۆرۈپ يېتىشىگە ياردەم بېرىڭ
3. نىكودىمنىڭ ئەيسانىڭ شاگىرتى بولۇشىغا نېمە توسالغۇ بولغان؟
3 نىكودىم يەھۇدىيلارنىڭ رەھبەرلىرىدىن بىرى بولۇپ، جەمئىيەتتە تۇتقان ئورنى يۇقىرى بولغاچقا، ئەيسانىڭ شاگىرتى بولۇشتا توسالغۇغا دۇچ كەلگەن. ئەيسا ۋەز قىلىشنى باشلاپ ئالتە ئاي كېيىن، نىكودىم خۇدانىڭ ۋەدە قىلىنغان مەسىھ سۈپىتىدە ئەيسانى ئەۋەتكەنلىكىنى چۈشەنگەن (يۇھاننا 3:1، 2). بىراق، ئۇ يەھۇدىيلاردىن قورققاچقا، ئەيسانىڭ قېشىغا قاراڭغۇ چۈشكەندە كەلگەنىدى (يۇھاننا 7:13؛ 12:42). ئۇ ئەيسانىڭ شاگىرتى بولسا، ھوقۇقتىن ۋە بايلىقتىن ئايرىلىپ قېلىشتىن ئەنسىرىگەن بولۇشى مۇمكىنa.
4. ئەيسا مەسىھ نىكودىمغا قانداق ياردەم بەرگەن؟
4 نىكودىم تەۋرات قانۇنىنى ياخشى بىلگەن بولسىمۇ، يەھۋا ئۇنىڭدىن نېمە تەلەپ قىلغانلىقىنى چۈشەنمىگەن. ئۇنداقتا، ئەيسا مەسىھ ئۇنىڭغا قانداق ياردەم بەرگەن؟ ئەيسا ئۆز ۋاقتىنى چىقىرىپ، ھەتتا ئۇنىڭ بىلەن كېچىدە كۆرۈشۈشكە تەييار بولغان. ئۇنىڭدىن باشقا، ئەيسا نىكودىمغا ئۇنىڭ شاگىرتى بولۇش ئۈچۈن نېمە قىلىش كېرەكلىكىنى ئېنىق چۈشەندۈرگەن: ئۇ گۇناھلىرىغا توۋا قىلىپ، سۇغا چۆمۈلدۈرۈلۈشى ۋە خۇدانىڭ ئوغلىغا ئىشىنىشى كېرەك ئىدى.—يۇھاننا 3:5، 14–21.
5. مۇقەددەس كىتابنى ئۆگىنىۋاتقان كىشىنىڭ يەھۋاغا خىزمەت قىلىشىغا نېمە توسالغۇ بولۇۋاتقانلىقىنى كۆرۈپ يېتىشىگە قانداق ياردەم بېرەلەيسىز؟
5 گەرچە مۇقەددەس كىتابنى ئۆگىنىۋاتقان كىشى ئاز بولمىغان بىلىمگە ئىگە بولغان بولسىمۇ، ئۇ باشقىلارنىڭ ياردىمىدە، ئۆزىنىڭ يەھۋاغا خىزمەت قىلىشنى قارار قىلىشتا قانداق توسالغۇغا دۇچ كېلىۋاتقانلىقىنى كۆرۈپ يېتەلىشى مۇمكىن. مەسىلەن، ئۇ ئائىلىسىنى بېقىش ئۈچۈن كۆپ ئىشلەيدىغاندۇ ياكى ئۇرۇق-تۇغقانلىرى ئۇنىڭ يەھۋا گۇۋاھچىسى بولۇشىغا قارشى چىققاندۇ. شۇڭا، ئەيسانى ئۈلگە قىلىپ، مۇقەددەس كىتابنى ئۆگىنىۋاتقانلارغا ياردەم بېرىش ئۈچۈن ۋاقىت چىقىرىڭ. ئۇنىڭ بىللە سەيلە قىلىش ياكى بىر يەردە ئولتۇرۇپ، قەھۋە ئىچكەچ پاراڭلىشىشقا چاقىرىڭ. بىللە ۋاقىت ئۆتكۈزگەندە، ئۇ سىزگە ھاياتى ۋە قىيىنچىلىقلىرى توغرۇلۇق كۆپرەك ئېيتىپ بېرىشى مۇمكىن. شۇنداق پەيتتە، ئۇنى ھاياتىدا بەزى ئۆزگىرىشلەرنى قىلىشقا دەۋەت قىلىڭ ۋە ئۇ سىزنى ئەمەس، ياراتقۇچى يەھۋاغا بولغان سۆيگۈ-مۇھەببىتىنى نامايان قىلىپ، ئۇنى خۇرسەن قىلىش ئۈچۈن شۇنداق ئۆزگىرىشلەرنى قىلىشى كېرەكلىكىنى ئېسىگە سېلىڭ.
6. مۇقەددەس كىتابنى ئۆگىنىۋاتقان كىشىنىڭ ئۆگەنگەنلىرىنى ئەمەلىيەتتە قوللىنىشىغا قانداق ياردەم بېرەلەيسىز؟ (1-كورىنتلىقلار 16:13)
6 ئەگەر مۇقەددەس كىتابنى ئۆگىنىۋاتقان كىشى ئۆزىنىڭ مۇقەددەس كىتابنىڭ ئۆلچەملىرىگە ماس ياشىشىغا يەھۋا ياردەم بېرىدىغانلىقىغا ئىشەنسە، ئۇ ئۆگەنگەنلىرىنى ھاياتىدا ئەمەلىي قوللىنالايدۇ (1-كورىنتلىقلار 16:13-نى ئوقۇڭ). ئويلاپ كۆرۈڭ: مەكتەپتە بىر كۆيۈمچان مۇئەللىم ئوقۇغۇچىغا بىلىم بېرىپلا قالماي، يەنە ئۇنىڭ ئۆز-ئۆزىگە بولغان ئىشەنچىسىنى تۇرغۇزۇشىغا ياردەم بېرىدۇ. خۇددى شۇنىڭدەك، سىز مۇقەددەس كىتابنى ئۆگىنىۋاتقان كىشىلەرگە خۇدانىڭ ئۆلچەم-قائىدىلىرىنى ئۆگىتىپ قالماي، ئۇنىڭ خۇداغا بولغان ئىمان-ئېتىقادىنى يېتىلدۈرۈشىگە ياردەم بېرىڭ. شۇنداق قىلسىڭىز، ئۇ كىشى ئۆزىنىڭ ئۆزگىرىشلەرنى قىلىشىغا يەھۋا چوقۇم ياردەم بېرىدىغانلىقىغا ئىشىنىدۇ. ئۇنداقتا، قانداق ياردەم بېرەلەيمىز؟
يەھۋاغا بولغان سۆيگۈ-مۇھەببىتىنى كۈچەيتىشىگە ياردەم بېرىڭ
7. ئەيسا مەسىھ تەلىملىرىنى ئاڭلىغانلارنىڭ يەھۋاغا بولغان سۆيگۈ-مۇھەببىتىنى كۈچەيتىشىگە قانداق ياردەم بەرگەن؟
7 يەھۋاغا بولغان سۆيگۈ-مۇھەببەت كىشىنى ئۆگەنگەنلىرىنى ھاياتىدا ئەمەلىي قوللىنىشقا دەۋەت قىلىدۇ. ئەيسا مەسىھ بۇنى بىلگەچكە، ئۆز شاگىرتلىرىنىڭ ئاسماندىكى ئاتىسىغا بولغان سۆيگۈ-مۇھەببىتىنى تېخىمۇ كۈچەيتىشىگە ياردەم بېرىش ئۈچۈن تەلىملەرنى بەرگەن. مەسىلەن، ئەيسا تەمسىل كەلتۈرۈپ، يەھۋانى بالىلىرىغا ياخشى نەرسىلەرنى بېرىدىغان دادا بىلەن سېلىشتۇرغان (مەتتا 7:9–11). بەلكىم، ئەيسانىڭ تەلىملىرىنى ئاڭلىغان بەزى ئادەملەرنىڭ كۆيۈمچان دادىسى بولمىغان. يەنە بىر تەمسىلدە، ئەيسا ئىنتايىن كۆپ يامانلىقلارنى قىلغان ئوغلىنى قۇچاقلاپ قارشى ئالغان بىر دادا توغرۇلۇق سۆزلىگەندە، شۇ كىشىلەر قانداق ھېس-تۇيغۇدا بولغانلىقىنى تەسەۋۋۇر قىلىپ كۆرۈڭ. ئەيسانىڭ بۇ تەمسىلىنى ئاڭلىغانلار چوقۇم يەھۋانىڭ ئۆزلىرىگە بولغان چوڭقۇر سۆيگۈ-مۇھەببىتىنى كۆرۈپ يېتىپ، ئىنتايىن تەسىرلەنگەن.—لۇقا 15:20–24.
8. مۇقەددەس كىتابنى ئۆگىنىۋاتقان كىشىنىڭ يەھۋاغا بولغان سۆيگۈ-مۇھەببىتىنى كۈچەيتىشىگە قانداق ياردەم بېرەلەيسىز؟
8 سىزمۇ مۇقەددەس كىتابنى ئۆگىنىۋاتقان كىشى بىلەن يەھۋانىڭ ئېسىل پەزىلەتلىرى توغرۇلۇق كۆپرەك پاراڭلىشىپ، ئۇ كىشىنىڭ ياراتقۇچىغا بولغان سۆيگۈ-مۇھەببىتىنى كۈچەيتىشىگە ياردەم بېرەلەيسىز. ھەر قېتىم بىرلىكتە ئۆگەنگەندە، ئۇنى شۇ ئۆگەنگەن مەزمۇندىن يەھۋانىڭ سۆيگۈ-مۇھەببىتىنى قانداق كۆرۈپ يېتەلەيدىغانلىقى توغرۇلۇق ئويلىنىشقا دەۋەت قىلىڭ. ئۇنىڭدىن باشقا، ئەيسانىڭ تۆلەم قۇربانلىقى توغرۇلۇق ئۆگەنگەندە، يەھۋانىڭ پەقەت پۈتۈن ئىنسانىيەتنى ئەمەس، بەلكى شەخسەن شۇ كىشىنى سۆيگەنلىكى ئۈچۈن تۆلەم بەرگەنلىكىنى كۆرۈپ يېتىشىگە ياردەم بېرىڭ (رىملىقلار 5:8؛ 1-يۇھاننا 4:10). ئەگەر مۇقەددەس كىتابنى ئۆگىنىۋاتقان كىشى يەھۋانىڭ ئۇنى سۆيىدىغانلىقىنى كۆرۈپ يەتسە، ئۇمۇ خۇدانى چىن قەلبىدىن سۆيۈشكە ھەرىكەت قىلىشى مۇمكىن.—گالاتىيا. 2:20.
9. مايكىلنىڭ ھاياتىنى ئۆزگەرتىشىگە نېمە ياردەم بەرگەن؟
9 ھىندونېزىيىدە ياشايدىغان مايكىل كىچىكىدىن ھەقىقەتنى بىلسىمۇ، سۇغا چۆمۈلدۈرۈلۈشتىن ئۆتمىگەن ئىدى. ئون سەككىز يېشىدا، ئۇ ئىشلەش ئۈچۈن باشقا دۆلەتكە كېتىپ، ئاندىن توي قىلىش ئۈچۈن ھىندونېزىيىگە قايتىپ كەلگەن. ئەمما، كېيىن ئۇ ئايالى بىلەن قىزىنى ئۆيىدە قويۇپ، ئۆزى يەنە چەتئەلگە كېتىپ قالغان. شۇ مەزگىلدە، ئايالى بىلەن قىزى مۇقەددەس كىتابنى ئۆگىنىشنى باشلاپ، ئۆگەنگەنلىرىنى ئەمەلىيەتتە قوللانغان. ئاپىسى ئۆلۈپ كەتكەندە، مايكىل دادىسىغا قاراش ئۈچۈن ۋەتىنىگە قايتىپ كەلگەن ۋە قايتىدىن مۇقەددەس كىتابنى ئۆگىنىشكە باشلىغان. «مەڭگۈ شاد-خۇرام ياشاڭ!» ناملىق كىتابنىڭ 27-دەرسىدىكى «چوڭقۇرراق قېزىڭ» دېگەن رامكىدىكى مەلۇمات مايكلىغا قاتتىق تەسىر قىلغان. ئۇ يەھۋا ئۆز ئوغلىنىڭ قاتتىق ئازاب چەككەنلىكىنى كۆرگەندە قانداق ھېس-تۇيغۇدا بولغانلىقى توغرۇلۇق ئويلىنىپ، كۆزىگە ياش ئالغان. مايكىل يەھۋا خۇدا بىلەن ئەيسا مەسىھنىڭ ئۇنى قانچىلىك سۆيىدىغانلىقىنى چۈشىنىپ يەتكەندە، چىن قەلبىدىن مىننەتدار بولغان. شۇنىڭ بىلەن، ئۇ ھاياتىنى ئۆزگەرتىپ، سۇغا چۆمۈلدۈرۈلۈشتىن ئۆتكەن.
يەھۋانى ھاياتىدا بىرىنچى ئورۇنغا قويۇشنى ئۆگىتىڭ
10. شاگىرتلىرىنىڭ يەھۋاغا كۆپرەك خىزمەت قىلىش ئۈچۈن ھاياتىدا ئۆزگەرتىشلەرنى قىلىشىغا ئەيسا مەسىھ قانداق ياردەم بەرگەن؟ (لۇقا 5:5–11) (رەسىمگە ھەم قاراڭ).
10 بەزىلەر دەسلەپتىلا ئەيسانىڭ مەسىھ ئىكەنلىكىنى ناھايىتى تېزلا كۆرۈپ يەتكەن. لېكىن، ئۇلار يەھۋاغا خىزمەت قىلىش ئۈچۈن قىزغىنلىق بىلەن ۋەز قىلىشى كېرەكلىكىنى تېخى چۈشەنمىگەنىدى. ئەيسا، پېترۇس بىلەن ئەندەرنى ئۇنىڭغا ئەگىشىشكە تولۇق ۋاقىت خىزمەت قىلىشقا چاقىرغاندا، ئۇلار ئاللىقاچان ئۇنىڭ شاگىرتلىرى بولغانىدى (مەتتا 4:18، 19). ئۇلار ياقۇپ ۋە يۇھاننا بىلەن بىللە بېلىقچىلىق بىلەن شۇغۇللىنىپ، ئىشلىرى ئىلگىرى باسقان (ماركۇس 1:16–20). پېترۇس بىلەن ئەندەر بېلىقچىلىقنى تاشلىغاندا، ئۆز ئائىلىسىدىكىلەرنى قانداق قامداش توغرۇلۇق ئالدىنئالا ئويلىنىپ قويغان. نېمە ئۈچۈن ئۇلار ۋەز قىلىشنى كۆپرەك پۇل تېپىشتىن مۇھىمراق ئورۇنغا قويغان؟ لۇقا كىتابىدا يېزىلغاندەك، ئەيسانىڭ بىر مۆجىزىسى ئۇلارنى يەھۋا ئۆز سادىق خىزمەتچىلىرىنى ئېھتىياجلىق نەرسىلەر بىلەن تەمىنلەيدىغانلىقىغا ئىشەندۈرگەن.—لۇقا 5:5–11-نى ئوقۇڭ.
ئەيسا مەسىھ ئۆز شاگىرتلىرىنىڭ خۇداغا خىزمەت قىلىشنى ھاياتىدا بىرىنچى ئورۇنغا قويۇشىغا ياردەم بەرگەن. بىز ئۇنى قانداق ئۈلگە قىلالايمىز؟ (10-ئابزاسقا قاراڭ)b
11. مۇقەددەس كىتابنى ئۆگىنىۋاتقان كىشىنىڭ ئىشەنچىسىنى كۈچەيتىش ئۈچۈن ئۇنىڭغا نېمىلەرنى ئېيتىپ بېرەلەيمىز؟
11 بىز ئەيسادەك مۆجىزىلەرنى قىلالمىساقمۇ، مۇقەددەس كىتابنى ئۆگىنىۋاتقان كىشىلەرگە، ھاياتىدا يەھۋانى بىرىنچى ئورۇنغا قويغانلارنى، ئۇ قانداق قوللاپ-قۇۋۋەتلىگەنلىكى ھەققىدىكى ئىش-ۋەقەلەرنى ئېيتىپ بېرەلەيمىز. مەسىلەن، سىز يىغىلىشلارغا بېرىشنى باشلىغاندا، يەھۋانىڭ سىزگە قانداق ياردەم بەرگەنلىكى ئېسىڭىزدىمۇ؟ بەلكىم، ئىش ئورنىدا باشلىقىڭىزغا يىغىلىش كۈنلىرى نېمە ئۈچۈن كەچتە ۋاقىت قوشۇپ ئىشلىيەلمەيدىغانلىقىڭىزنى چۈشەندۈرۈشكە توغرا كەلگەن بولغۇيتتى. مۇقەددەس كىتابنى ئۆگىنىۋاتقان كىشىگە، ھاياتىڭىزدا يەھۋانى بىرىنچى ئورۇنغا قويۇشىڭىزغا ئۇ قانداق ياردەم بەرگەنلىكىنى ۋە بۇ ئىشەنچىڭىزنى قانداق كۈچەيتكەنلىكىنى ئېيتىپ بېرىڭ.
12. (1) ئۆگىنىشكە پەرقلىق قېرىنداشلارنى چاقىرىش نېمە ئۈچۈن پايدىلىق؟ (2) فىلىملەرنىڭ ياردىمىدە مۇقەددەس كىتابنى ئۆگىنىۋاتقان كىشىنىڭ ھاياتىدا يەھۋانى بىرىنچى ئورۇنغا قويۇشىغا قانداق ياردەم بېرەلەيسىز؟ مىسال كەلتۈرۈڭ.
12 ئۇلارغا يەنە باشقا قېرىنداشلارنىڭ ھاياتىدا خۇداغا خىزمەت قىلىشنى بىرىنچى ئورۇنغا قويۇش ئۈچۈن قانداق ئۆزگىرىشلەرنى قىلغانلىقىنى ئېيتىپ بېرىڭ. بۇمۇ ئۇلارغا ياردەم بېرىدۇ. شۇڭا، ئۆگىنىش قىلغاندا، پەرقلىق قېرىنداشلارنى چاقىرىشقا تىرىشىڭ. ئۇلاردىن ھەقىقەتنى قانداق تونۇغانلىقىنى ۋە يەھۋاغا خىزمەت قىلىشنى ھاياتىدا بىرىنچى ئورۇنغا قويۇش ئۈچۈن تۇرمۇشىدا قانداق ئۆزگەرتىشلەرنى قىلغانلىقىنى سورىسىڭىز بولىدۇ. بۇنىڭدىن باشقا، «مەڭگۈ شاد-خۇرام ياشاڭ!» ناملىق كىتابىنىڭ «چوڭقۇرراق قېزىڭ» ياكى «ئىزدىنىپ كۆرۈڭ» دېگەن بۆلەكلىرىدىكى فىلىملەرنى ئاشۇ ئۆگىنىۋاتقان كىشى بىلەن بىللە كۆرۈپ چىقىڭ. مەسىلەن، 37-دەرسنى ئۆگىنىۋاتقاندا، «يەھۋا بىزگە غەمخورلۇق قىلىدۇ» دېگەن فىلىمدىكى پرىنسىپلارغا دىققەت ئاغدۇرۇڭ.
دۇچ كەلگەن قىيىنچىلىقلارنى يېڭىشىغا ياردەم بېرىڭ
13. ئەيسا ئۆز شاگىرتلىرىنىڭ قارشىلىقلارغا تەييار بولۇشىغا قانداق ياردەم بەرگەن؟
13 ئەيسا قايتا-قايتا شاگىرتلىرىغا قارشىلىقلارغا دۇچ كېلىدىغانلىقىنى، ھەتتا ئۇرۇق-تۇغقانلىرىنىڭ قارشىلىقلىرىغا ئۇچرايدىغانلىقىنى ئېيتقان (مەتتا 5:11؛ 10:22، 36). ئەيسا ئۆلتۈرۈلۈشتىن سەل ئاۋۋال شاگىرتلىرىنى ئاگاھلاندۇرۇپ، ئۇلار يەھۋاغا خىزمەت قىلغانلىقى ئۈچۈن ئۆلۈم خەۋىپىگە دۇچ كېلىشى مۇمكىنلىكىنى ئېيتقان (مەتتا 24:9؛ يۇھاننا 15:20؛ 16:2). ئۇ ئۇلارغا ۋەز قىلغاندا ئېھتىياتچان بولۇشنى ئەسكەرتىپ، ئۇلارنى قارشى چىققۇچىلار بىلەن تالاش-تارتىش قىلماي، ئويلىنىپ سۆزلەشكە ۋە ھەرىكەت قىلىشقا دەۋەت قىلغان.
14. مۇقەددەس كىتابنى ئۆگىنىۋاتقان كىشىنىڭ قارشىلىقلارغا تەييارلىنىشىغا قانداق ياردەم بېرەلەيمىز؟ (2-تىموتىي 3:12)
14 ئەيساغا ئوخشاش، بىزمۇ مۇقەددەس كىتابنى ئۆگىنىۋاتقانلارغا خىزمەتداشلىرى، دوستلىرى ياكى ئۇرۇق-تۇغقانلىرىنىڭ قارشىلىق قىلىشى مۇمكىنلىكىنى ئېيتساق بولىدۇ (2-تىموتىي 3:12-نى ئوقۇڭ). ئۇ ھازىر مۇقەددەس كىتاب ئۆلچەملىرى بويىچە ياشاۋاتقاچقا، خىزمەتداشلىرى ئۇنى زاڭلىق قىلىشى مۇمكىن. باشقىلار، ھەتتا ئۇرۇق-تۇغقانلىرى ئۇ مۇقەددەس كىتابتىن ئۆگەنگەن ھەقىقەتلەرنى تەنقىد قىلىشى مۇمكىن. شۇڭلاشقا، بىز مۇقەددەس كىتابنى ئۆگىنىۋاتقان كىشىلەرنىڭ قارشىلىقلارغا تاقابىل تۇرۇشقا تەييارلىنىشىغا قانچە بالدۇر ياردەم بەرسەك، شۇنچە ياخشى. شۇنداق بولغاندا، ئۇ قارشىلىقلارغا دۇچ كەلگەندە ھەيران قالمايدۇ ۋە نېمە دېيىش ياكى نېمە قىلىش كېرەكلىكىنى بىلىدۇ.
15. مۇقەددەس كىتابنى ئۆگىنىۋاتقان كىشىنىڭ ئائىلىسىدىكىلەرنىڭ قارشىلىقلىرىغا تاقابىل تۇرۇشىغا نېمە ياردەم بېرەلەيدۇ؟
15 ئەگەر مۇقەددەس كىتابنى ئۆگىنىۋاتقان كىشى ئائىلىسىدىكىلەرنىڭ قارشىلىقىغا دۇچ كەلسە، ئۇلار نېمە ئۈچۈن ئۇنىڭ مۇقەددەس كىتابنى ئۆگىنىشىگە قارشى تۇرىدىغانلىقىنى چۈشىنىشىگە ياردەم بېرىڭ. بەلكىم، تۇغقانلىرى ئۇنى ئالدىنىپ قالدى ياكى يەھۋا گۇۋاھچىلىرى يامان ئادەملەر دەپ ئويلاپ قالدىمۇ؟ ھەتتا ئەيسانىڭ ئائىلىسىدىكىلەرمۇ ئۇنىڭغا قارشى چىققان ۋە ئۇنى ئەقلىدىن ئېزىپتۇ دەپ ئويلىغان (ماركۇس 3:21؛ يۇھاننا 7:5). سىز مۇقەددەس كىتابنى ئۆگىنىۋاتقان كىشىگە ئائىلە ئەزالىرى ۋە باشقىلارغا سەۋرچان بولۇشنى ۋە ئۇلارغا سۆزلىگەندە مېھرىبان ۋە مۇلايىم بولۇشنى ئۆگىتىڭ.
16. مۇقەددەس كىتابنى ئۆگىنىۋاتقان كىشىنىڭ ئېھتىياتچانلىق بىلەن ئۆزى ئۆگەنگەن ھەقىقەتلەر توغرۇلۇق باشقىلارغا ۋەز قىلىشىغا قانداق ياردەم بېرەلەيمىز؟
16 ھەتتا، ئۇرۇق-تۇغقانلىرى مۇقەددەس كىتاب توغرۇلۇق بىلىپ بېقىشقا قىزىقسا، مۇقەددەس كىتابنى ئۆگىنىۋاتقان كىشى ئۆگەنگەنلىرىنىڭ ھەممىسىنى ئۇلارغا باشتىن-ئاخىرى ئېيتىپ بەرمەسلىكى كېرەك. چۈنكى، بىر قېتىمدا ھەممىسىنى ئېيتىپ بەرسە، ئۇرۇق-تۇغقانلىرىغا ئۇلارنى چۈشىنىپ ھەزىم قىلىش قىيىن كېلىپ، كېيىن ئۇلار قايتا ھەقىقەت توغرۇلۇق سۆزلىشىشنى خالىماسلىقى مۇمكىن. شۇڭا، ئۇنى ئۆزىنىڭ ئۆگەنگەنلىرىنى باشقىلارغا ئاددىي سۆز بىلەن قىسقا چۈشەندۈرۈشكە دەۋەت قىلىڭ (كولوسى. 4:6). شۇنداق قىلسا، بەلكىم ئۇرۇق-تۇغقىنى باشقا ۋاقىتتا مۇقەددەس كىتاب توغرۇلۇق يەنە سۆھبەتلىشىشنى خالايدۇ. ئۇ ئۇرۇق-تۇغقانلىرىنى jw.org تور بېكىتىمىزنى زىيارەت قىلىشقا دەۋەت قىلالايدۇ. شۇنداق بولغاندا، ئۇلار خالىغان ۋاقىتتا ئۆزلىرى قىزىققان ماۋزۇلار توغرۇلۇق مەلۇماتلارنى ئوقۇيالايدۇ.
17. مۇقەددەس كىتابنى ئۆگىنىۋاتقان كىشىنىڭ يەھۋا گۇۋاھچىلىرى توغرۇلۇق سورالغان سوئاللارغا جاۋاب بېرىشنى ئۆگىنىشىگە قانداق ياردەم بېرەلەيسىز؟ (رەسىمگە ھەم قاراڭ).
17 تور بېكىتىمىزدىكى «كۆپ سورالغان سوئاللار» دېگەن سەھىپىدىكى بىر قاتار ماقالىلەرنى قوللىنىپ، مۇقەددەس كىتابنى ئۆگىنىۋاتقان كىشىنىڭ خىزمەتداشلىرى ۋە ئۇرۇق-تۇغقانلىرى سورىغان سوئاللارغا ئاددىي جاۋاب بېرىشكە تەييارلىنىشىغا ياردەم بېرەلەيسىز (2-تىموت. 2:24، 25). «مەڭگۈ شاد-خۇرام ياشاڭ!» ناملىق كىتابتىكى ھەربىر دەرسنىڭ ئاخىرىدىكى «بەزىلەر مۇنداق دەيدۇ» دېگەن رامكىنى كۆرۈپ چىقىشنى ئۇنتۇماڭ. ئۇنى نېمىگە ئىشىنىدىغانلىقىنى ئۆز سۆزلىرى بىلەن چۈشەندۈرۈشكە دەۋەت قىلىڭ. ئىككىلەنمەي، ئۇنىڭ مۇقەددەس كىتابتىكى ھەقىقەتلەرنى تېخىمۇ ياخشىراق چۈشەندۈرۈشنى ئۆگىنىشىگە ياردەم بېرىڭ. ۋاقىت چىقىرىپ ئۇنىڭ بىلەن مەشىق قىلىپ تەييارلىق قىلساڭلار، ئۇ ئۆز ئىمان-ئېتىقادىنى قوغدىيالايدۇ.
ۋەز قىلىشنى بىرلىكتە ئالدىن مەشىق قىلىش ئارقىلىق، مۇقەددەس كىتابنى ئۆگىنىۋاتقان كىشىنى خۇش خەۋەرنى جاكارلاشقا دەۋەت قىلىڭ (17-ئابزاسقا قاراڭ)c
18. مۇقەددەس كىتابنى ئۆگىنىۋاتقان كىشىنى ۋەز ئېيتقۇچى بولۇشقا قانداق دەۋەت قىلالايسىز؟ (مەتتا 10:27)
18 ئەيسا مەسىھ شاگىرتلىرىنى خالايىقنىڭ ئالدىدا خۇش خەۋەرنى جاكارلاشقا ئۈندىگەن (مەتتا 10:27-نى ئوقۇڭ). مۇقەددەس كىتابنى ئۆگىنىۋاتقان كىشى ۋەز قىلىشنى قانچە بالدۇرراق باشلىسا، يەھۋانىڭ ياردىمىنى ھېس قىلىپ، ئۇنىڭغا تايىنىشنى شۇنچە تېزراق ئۆگىنىدۇ. ئۇ كىشىنىڭ ئۆزىگە مەقسەت قويۇشىغا قانداق ياردەم بېرەلەيسىز؟ جامائەتتە مەخسۇس ۋەز ئېيتىش پائالىيىتى توغرۇلۇق ئۇقتۇرۇش ئېلان قىلىنغاندا، مۇقەددەس كىتاب ئۆگىنىۋاتقان كىشىنى ۋەز ئېيتقۇچى بولۇش ئۈچۈن نېمە قىلىشى كېرەكلىكى توغرۇلۇق ئويلىنىشقا دەۋەت قىلىڭ. ئۇنىڭغا شۇنداق پائالىيەتلەر مەزگىلىدە ۋەز قىلىشنى باشلاش ئاسانراق بولىدىغانلىقىنى چۈشەندۈرۈڭ. ئۇنى ھەپتە ئارىلىقىدىكى يىغىلىشلاردا تاپشۇرۇقلار بىلەن چىقىش ئۈچۈن، شۇنىڭغا لاياقەتلىك بولۇشقا تىرىشىپ كۆرۈشكە دەۋەت قىلىڭ. ئۇ «ۋەز خىزمىتىمىز ۋە ھاياتىمىز» يىغىلىشىدا تاپشۇرۇقلار بىلەن چىققاندا، ئۇ مۇقەددەس كىتاب تەلىملىرىنى تېخىمۇ ياخشىراق چۈشەندۈرۈشنى ئۆگىنىدۇ.
ئۇنىڭغا ئىشىنىدىغانلىقىڭىزنى كۆرسىتىڭ
19. ئەيسا ئۆز شاگىرتلىرىغا ئىشىنىدىغانلىقىنى قانداق كۆرسەتكەن ۋە بىز ئۇنى قانداق ئۈلگە قىلالايمىز؟
19 ئاسمانغا كۆتۈرۈلۈشتىن ئاۋۋال، ئەيسا ئۆز شاگىرتلىرىغا بىر كۈنى ئۇلار بىلەن قايتا بىرگە بولىدىغانلىقىنى ئېيتقان. ئۇلار ئۆزلىرىنىڭ ئەيسا بىلەن جەم بولۇش ئۈچۈن ئاسمانغا چىقىدىغانلىقىنى چۈشەنمىگەن ئىدى. شۇنداقتىمۇ، ئەيسا ئۇلاردىن ۋەز كەچمىگەن. چۈنكى، ئۇلار ھەممە ئىشلارنى چۈشەنمىگەن بولسىمۇ، يەھۋا خۇدانى خۇرسەن قىلىدىغان ئىشلارنى قىلىشنى خالايدىغانلىقىغا ئىشەنگەن (يۇھاننا 14:1–5، 8). ئەيسا ئۆز شاگىرتلىرىنىڭ ئاسماندا ياشاش ئۈمىدىنى چۈشىنىشى ئۈچۈن بىراز ۋاقىت كېتىدىغانلىقىنى بىلگەن (يۇھاننا 16:12). بىزمۇ ئەيسانى ئۈلگە قىلىپ، مۇقەددەس كىتاب ئۆگىنىۋاتقان كىشىلەرنىڭ يەھۋانى مەمنۇن قىلىشنى خالايدىغانلىقىغا ئىشىنىدىغانلىقىمىزنى كۆرسىتەيلى.
مۇقەددەس كىتابنى ئۆگىنىۋاتقان كىشى قانچە بالدۇر ۋەز قىلىشنى باشلىغاندا، يەھۋا خۇدانىڭ ياردىمىنى ھېس قىلىپ، ئۇنىڭغا تايىنىشنى شۇنچە تېزراق ئۆگىنىدۇ
20. مالاۋىدىكى قېرىندىشىمىز مۇقەددەس كىتابنى ئۆگىنىۋاتقان كىشىگە ئىشەنچ قىلغانلىقىنى قانداق كۆرسەتكەن؟
20 مۇقەددەس كىتابنى ئۆگىنىۋاتقان كىشىنىڭ توغرا ئىش قىلىشنى خالايدىغانلىقىدىن گۇمان قىلماڭ. مالاۋىدا ياشايدىغان چىفۇندو ئىسىملىك قېرىندىشىمىز كاتولىك دىنىغا ئىشىنىدىغان ئالىنافى ئىسىملىك ياش ئايال بىلەن «مەڭگۈ شاد-خۇرام ياشاڭ!» دېگەن كىتابنى ئىشلىتىپ تەتقىق ئۆگىنىشى ئۆتكۈزۈشنى باشلىغان. 14-دەرسنى مۇھاكىمە قىلىپ بولغاندىن كېيىن، چىفۇندو ئىبادەت قىلغاندا بۇتلارنى ئىشلىتىشكە قانداق قارايدىغانلىقىنى سورىغان. ئالىنافى خاپا بولۇپ: «بۇ ئۆزۈمنىڭ شەخسىي قارارى»،— دەپ جاۋاب بەرگەن. چىفۇندو ئەمدى ئالىنافى ئۆگىنىشنى توختىتىدۇ دەپ ئويلىغان. لېكىن، ئۇ سەۋرچان بولۇپ، ئالىنافى بىلەن داۋاملىق ئۆگىنىشنى داۋاملاشتۇرغان ۋە ئالىنافىنىڭ ھامان بىر كۈنى ئۆزگىرىشىدىن ئۈمىد ئۈزمىگەن. بىرنەچچە ئايدىن كېيىن، 34-دەرسنى ئۆگىنىۋاتقاندا. چىفۇندو ئالىنافىدىن: «ھازىرغىچە مۇقەددەس كىتاب ۋە ھەق خۇدا يەھۋا ھەققىدە ئۆگىنىش سىزگە قانداق ياردەم بەردى؟»،— دەپ سورىغان. ئالىنافى قانداق جاۋاب بەرگەن؟ چىفۇندو مۇنداق دەيدۇ: «ئالىنافى ئۆزىنىڭ نۇرغۇن مۇھىم ھەقىقەتلەرنى ئۆگەنگەنلىكىنى ئېيتتى. ئۇلاردىن بىرى: «يەھۋا گۇۋاھچىلىرى مۇقەددەس كىتابقا زىت بولغان ئىشلارنى قىلمايدۇ»». شۇنىڭدىن كۆپ ۋاقىت ئۆتمەي، ئالىنافى بۇتلىرىنى تاشلىۋېتىپ، سۇغا چۆمدۈرۈلۈشتىن ئۆتتى.
21. مۇقەددەس كىتابنى ئۆگىنىۋاتقان كىشىنىڭ يەھۋاغا خىزمەت قىلىش ئارزۇ-ئىستىكىنى قانداق كۈچەيتەلەيمىز؟
21 گەرچە يەھۋا ئۆزى ئۆستۈرۈۋاتقان بولسىمۇ، بىزمۇ مۇقەددەس كىتابنى ئۆگىنىۋاتقان كىشىلەرنىڭ ئىمان-ئېتىقادتا ئۆسۈپ ئالغا ئىلگىرىلىشىگە ئۆز ھەسسىمىزنى قوشۇۋاتىمىز (1-كورىنت. 3:7). بىز ئۇلارغا پەقەت خۇدانىڭ ئۇلاردىن نېمىلەرنى تەلەپ قىلىدىغانلىقىنى ئۆگىتىپ قويمايمىز. ئۇلارنىڭ يەھۋاغا بولغان سۆيگۈ-مۇھەببىتىنى كۈچەيتىشىگە ۋە ھاياتىدا يەھۋاغا خىزمەت قىلىشنى بىرىنچى ئورۇنغا قويۇش ئارقىلىق ئۆزىنىڭ ياراتقۇچىسىغا بولغان سۆيگۈ-مۇھەببىتىنى ئىپادىلەشنى ئۆگىنىشىگە ياردەم بېرىشىمىز كېرەك. ئۇنىڭدىن باشقا، قىيىنچىلىقلارغا دۇچ كەلگەندە، ئۇلارنىڭ يەھۋاغا تايىنىشنى ئۆگىنىشىگە ياردەم بېرىشىمىز ۋە ئۆزىمىزنىڭ ئۇلارغا ئىشىنىدىغانلىقىمىزنى كۆرسىتىشىمىز لازىم. شۇنداق بولغاندا، ئۇلارنىڭ ئىمان-ئېتىقادىنى كۈچەيتىشىگە ۋە يۈرەكلىك بىلەن يەھۋاغا خىزمەت قىلىشنى باشلىشىغا ياردەم بېرەلەيمىز.
33-ناخشا ئۇلاردىن قورقماڭلار!
a نىكودىم ئەيسا بىلەن سۆزلەشكەندىن كېيىن ئىككى يېرىم يىل ئۆتۈپ، ئۇ تېخىغىچە يەھۇدىيلارنىڭ ئالىي كېڭىشىنىڭ ئەزاسى بولغان (يۇھاننا 7:45–52). بەزى تارىخچىلارنىڭ قارىشىچە، نىكودىم ئەيسا مەسىھ ئۆلگەندىن كېيىن ئۇنىڭ شاگىرتى بولغان.—يۇھاننا 19:38–40.
b رەسىملەردە: پېترۇس ۋە باشقىلار بېلىقچىلىق كەسپىنى تاشلاپ، ئەيساغا ئەگەشكەن.
c رەسىمدە: قېرىندىشىمىز مۇقەددەس كىتابنى ئۆگىنىۋاتقان كىشىنىڭ ۋەز خىزمىتىگە تەييارلىنىشىغا ياردەم بېرىۋاتىدۇ.