21-تەتقىق ماقالىسى
40-ناخشا ئاۋۋال خۇدا پادىشاھلىقىنى ئىزدە!
مەڭگۈ قالىدىغان شەھەرنى كۈتۈڭ
«بىز كەلگۈسىدە كېلىدىغان شەھەرنى ئىنتىزارلىق بىلەن كۈتۈۋاتىمىز».—ئىبرانىي. 13:14.
مەركىزى ئىدىيە
ئىبرانىيلار 13-باب، بىزگە ھازىر ۋە كېلەچەكتە قانداق ياردەم بېرىدىغانلىقىنى كۆرۈپ چىقىمىز.
1 .ئەيسا يېرۇسالىم توغرۇلۇق قانداق بېشارەتنى ئالدىن ئېيتقان؟
ئەيسا ئۆلۈمىدىن بىرنەچچە كۈن بۇرۇن شاگىرتلىرىغا يېرۇسالىم شەھىرى ۋە ئۇ شەھەردىكى ئىبادەتخانىنىڭ ۋەيران بولۇشى توغرۇلۇق تەپسىلىي بېشارەت بەرگەن. شۇ ۋاقىتتا، ئاشۇ بېشارەتلىك سۆزلەر بىرىنچى قېتىم ئەمەلگە ئېشىشى كېرەك ئىدى. ئەيسا يېرۇسالىمنى قورشاۋغا ئالىدىغان دۈشمەن قوشۇنلىرى توغرۇلۇق ئاگاھلاندۇرغان (لۇقا 21:20). ئەيسا ئەگەشكۈچىلىرىگە شۇ قوشۇنلارنى كۆرگەندە، دەرھال يەھۇدىيىدىن قېچىشى كېرەكلىكىنى ئېيتقان. دەرۋەقە، ئۇنىڭ سۆزلىرى ئەمەلگە ئېشىپ، رىم ئەسكەرلىرى يېرۇسالىمنى قورشاۋالغان.—لۇقا 21:21، 22.
2 .ئەلچى پاۋلۇس يەھۇدىيە ۋە يېرۇسالىمدا ياشىغان مەسىھ ئەگەشكۈچىلىرىگە قانداق نەسىھەتلەرنى بەرگەن؟
2 رىم قوشۇنلىرى يېرۇسالىمنى قورشاۋغا ئېلىشتىن بىرنەچچە يىل بۇرۇن، ئەلچى پاۋلۇس يېرۇسالىم ۋە يەھۇدىيىدە ئۆلكىسىدە ياشىغان مەسىھ ئەگەشكۈچىلىرىگە، ھازىر «ئىبرانىيلار يېزىلغان خەت» دەپ ئاتالغان ئىلھام-مەدەت بېرىدىغان بىر خەتنى يېزىپ ئەۋەتكەن. ئەلچى پاۋلۇس ئاشۇ خېتىدە، كەلگۈسىدىكى ئېغىر كۈنلەرگە تەييار بولۇشقا ياردەم بېرىدىغان نەسىھەتلەرنى بەرگەن. ئۇنداقتا، يېرۇسالىم ۋە يەھۇدىيىدىكى مەسىھ ئەگەشكۈچىلىرىنى قانداق ۋەقەلەر كۈتۈۋاتاتتى؟ يېرۇسالىمنىڭ كېلەچەكتە ۋەيران بولۇشى. شۇ جايلاردا ياشايدىغان ئەيسانىڭ ئەگەشكۈچىلىرى ئامان قېلىش ئۈچۈن ئۆي-جايلىرى ۋە تىجارەتلىرىدىن ۋاز كېچىشكە تەييار بولۇشى كېرەكتى. شۇڭا، ئەلچى پاۋلۇس يېرۇسالىم شەھىرى توغرۇلۇق مۇنداق سۆزلەرنى يازغان: «چۈنكى، بۇ يەردە ئەبەدىي قالىدىغان شەھىرىمىز يوقتۇر، لېكىن كەلگۈسىدە كېلىدىغان شەھەرنى ئىنتىزارلىق بىلەن كۈتۈۋاتىمىز».—ئىبرانىي. 13:14.
3 .«ئۇلى مۇستەھكەم سېلىنغان» شەھەر دېگەن نېمە ۋە نېمە ئۈچۈن بىز ئۇنىڭغا ئۈمىد باغلايمىز؟
3 بىرىنچى ئەسىردە يېرۇسالىم ۋە يەھۇدىيىدىن كېتىشنى قارار قىلغان مەسىھ ئەگەشكۈچىلىرىنى كۆپلىگەن ئادەملەر مەسخىرە ۋە ھاقارەت قىلغان. بىراق، بۇ قارار ئۇلارنىڭ ھاياتىنى ساقلاپ قالغان. بۈگۈنكى كۈندىمۇ كۆپلىگەن ئادەملەر بىزنى مەسخىرە قىلىشى مۇمكىن. چۈنكى، بىز مال-دۇنياغا ئۈمىد باغلىمايمىز ۋە بۇ دۇنيادىكى قىيىنچىلىقلارنى ئىنسانىيەت ئۆزى ھەل قىلالايدىغانلىقىغا ئىشەنمەيمىز. بىز نېمە ئۈچۈن شۇنداق قارارغا كەلدۇق؟ چۈنكى، بىز بۇ رەزىل دۇنيانىڭ ۋاقتىنچە مەۋجۇت بولۇپ تۇرۇۋاتقانلىقىنى بىلىمىز. شۇڭا، «ئۇلى مۇستەھكەم سېلىنغان، . . . شەھەرنىa»، يەنى خۇدا پادىشاھلىقىنى كۈتۈۋاتىمىز (ئىبرانىي. 11:10؛ مەتتا 6:33). بۇ ماقالىدە مۇنۇ ئۈچ سوئاللارغا جاۋاب تاپىمىز: (1) پاۋلۇسنىڭ نەسىھىتى بىرىنچى ئەسىردىكى مەسىھ ئەگەشكۈچىلىرىنىڭ خۇدا پادىشاھلىقىغا ئۈمىد باغلىشىغا قانداق ياردەم بەرگەن؟ (2) پاۋلۇس ئۇلارنىڭ كەلگۈسىدىكى ئېغىر كۈنلەرگە تەييارلىنىشىغا قانداق ياردەم بەرگەن؟ (3) پاۋلۇسنىڭ نەسىھىتى بۈگۈنكى كۈندە بىزگە قانداق ياردەم بېرىدۇ؟
سىزنى ھېچقاچان تاشلىمايدىغان خۇداغا ئىشىنىڭ
4 .نېمە ئۈچۈن يېرۇسالىم مەسىھ ئەگەشكۈچىلىرى ئۈچۈن مۇھىم شەھەر بولغان؟
4 يېرۇسالىم مەسىھنىڭ ئەگەشكۈچىلىرى ئۈچۈن مۇھىم بىر شەھەر بولغان. چۈنكى، مىلادى 33-يىلى، يېرۇسالىمدا مەسىھ ئەگەشكۈچىلىرىنىڭ جامائىتى قۇرۇلغان ۋە يېتەكچى كېڭەش ھەم شۇ يەردە ئىدى. بۇنىڭدىن باشقا، بۇ شەھەردە ياشايدىغان كۆپلىگەن ئېتىقادچى قېرىنداشلارنىڭ ئۆز ئۆيلىرى ۋە يىغقان مال-مۈلكى بار ئىدى. شۇنداقتىمۇ، ئەيسا شاگىرتلىرىغا يېرۇسالىمدىن، ھەتتا يەھۇدىيىدىن قېچىش كېتىشى كېرەكلىكىنى ئېيتقان.—مەتتا 24:16.
5 .ئەلچى پاۋلۇس كېلەچەكتە يېرۇسالىمدا يۈز بېرىدىغان ۋەقەگە مەسىھ ئەگەشكۈچىلىرىنى قانداق تەييارلىغان؟
5 مەسىھ ئەگەشكۈچىلىرىنى كېلەچەكتە يۈز بېرىدىغان ئىش-ۋەقەلەرگە تەييارلاش ئۈچۈن، ئەلچى پاۋلۇس ئەمدى يەھۋانىڭ يېرۇسالىمغا قانداق كۆز قاراشتا ئىكەنلىكىنى تىلغا ئېلىپ نەسىھەت بەرگەن. پاۋلۇس ئۇلارنى ئاگاھلاندۇرۇپ، يەھۋانىڭ نەزىرىدە يېرۇسالىمدىكى ئىبادەتخانا، روھانىيلىق خىزمىتى ۋە سۇنۇلىدىغان قۇربانلىقلار ئاللىقاچان ئەھمىيىتىنى يوقاتقانلىقىنى ئېسىگە سالغان (ئىبرانىي. 8:13). ئۇنىڭدىن باشقا، يېرۇسالىمدىكى نۇرغۇن پۇقرالار مەسىھنى رەت قىلغانىدى. شۇڭا، يېرۇسالىمدىكى ئىبادەتخانا ئەمدى پاك ئىبادەتنىڭ مەركىزى بولمىغان ۋە پات-ئارىدا ۋەيران قىلىنىشى كېرەك ئىدى.—لۇقا 13:34، 35.
6 .نېمە ئۈچۈن ئەلچى پاۋلۇسنىڭ ئىبرانىيلار 13:5، 6-ئايەتلەردىكى نەسىھەت سۆزلىرى مەسىھ ئەگەشكۈچىلىرىگە بەك مۇھىم ئاگاھلاندۇرۇش بولغان؟
6 ئەلچى پاۋلۇس ئىبرانىيلارغا خەت يازغاندا، يېرۇسالىم گۈللەنگەن شەھەر ئىدى. شۇ ۋاقىتتا ياشىغان بىر رىم يازغۇچىسى يېرۇسالىمنى «شەرقتىكى ئەڭ داڭلىق شەھەر» دەپ تەسۋىرلىگەن. ھەر يىلى يۇرت-يۇرتلاردىن يەھۇدىيلار يېرۇسالىمغا كېلىپ، بايراملارنى ئۆتكۈزەتتى. شۇڭا، بۇ بايراملار شەھەرنىڭ ئىقتىسادىي جەھەتتىن گۈللىنىشىگە چوڭ ھەسسىسىنى قوشقان. شەك-شۈبھىسىزكى، بەزى مەسىھ ئەگەشكۈچىلىرىنىڭ ئىقتىسادىي ئەھۋالى ياخشى بولغان. شۇ سەۋەب، ئېھتىمال پاۋلۇس ئۇلارغا: «پۇلپەرەسلىكتىن خالىي ياشاڭلار، بارىغا شۈكۈر-قانائەت قىلىڭلار»،— دەپ نەسىھەت بەرگەن. كېيىن، ئۇ يەھۋا ئۆز خىزمەتچىسىگە شەخسەن بەرگەن ۋەدىسىنى نەقىل كەلتۈرۈپ مۇنداق دېگەن: «سەندىن ئەسلا ئايرىلمايمەن، سېنى ھەرگىز تاشلىمايمەن» (ئىبرانىيلار 13:5، 6-نى ئوقۇڭ؛ تەكرار. قا 31:6؛ زەبۇر 118:6). يېرۇسالىم ۋە يەھۇدىيەدىكى مەسىھ ئەگەشكۈچىلىرى بۇ ۋەدىنى ئېسىدە مەھكەم ساقلىشى كېرەك ئىدى. نېمىشقا؟ چۈنكى، ئۇلار پاۋلۇسنىڭ بۇ خېتىنى تاپشۇرۇۋېلىپ كۆپ ئۆتمەي، ئۆيلىرىنى، تىجارەتلىرىنى ۋە كۆپلىگەن مال-مۈلكىنى تاشلاپ قېچىپ كېتىشكە ۋە ئاندىن ياقا يۇرتلاردا يېڭى تۇرمۇشىنى باشلاشقا توغرا كېلەتتى. ئەلۋەتتە، بۇ ئاسان ئەمەس ئىدى.
7 .نېمە ئۈچۈن يەھۋاغا بولغان ئىشەنچىمىزنى ھازىرنىڭ ئۆزىدە مۇستەھكەملىشىمىز لازىم؟
7 بىز ئۈچۈن ساۋاق: كېلەچەكتە دەھشەتلىك چوڭ بالايىئاپەت باشلىنىپ، مۇشۇ رەزىل دۇنيانىڭ ئاخىرى كېلىدۇ (مەتتا 24:21). بىزمۇ بىرىنچى ئەسىردىكى مەسىھنىڭ ئەگەشكۈچىلىرىگە ئوخشاش ساداقەتمەنلىكىمىزنى ساقلاپ، كېلەچەكتە بىزنى كۈتۈۋاتقان ۋەقەلەرگە تەييار بولۇشىمىز لازىم (لۇقا 21:34–36). شۇ دەھشەتلىك چوڭ بالايىئاپەت مەزگىلىدە بەزى مال-مۈلكىمىزنى ياكى پۈتۈن مال-دۇنيالىرىمىزنى تاشلاپ كېتىشكە توغرا كېلىشى مۇمكىن. شۇ ۋاقىتتا، پۈتۈنلەي يەھۋاغا تايىنىپ، ئۇ بىزنى ھېچقاچان تاشلىمايدىغانلىقىغا قەتئىي ئىشىنىشىمىز لازىم. ئەمەلىيەتتە ھازىرنىڭ ئۆزىدە، شۇ چوڭ بالايىئاپەت باشلىنىشتىن ئاۋۋال، پۈتۈنلەي يەھۋاغا تايىنىدىغانلىقىمىزنى كۆرسىتىش پۇرسىتىمىز بار. ئۆز-ئۆزىڭىزدىن مۇنداق سوراپ بېقىڭ: «مېنىڭ ئىش-ھەرىكەتلىرىم ۋە پىلان-مەقسەتلىرىم بايلىققا ئەمەس، يەھۋاغا تايىنىدىغانلىقىمنى كۆرسىتەمدۇ؟» (1-تىموت. 6:17) ئەلۋەتتە، بىرىنچى ئەسىردىكى مەسىھ ئەگەشكۈچىلىرىدىن كۆپ ساۋاق ئالالايمىز. شۇنداقتىمۇ، ئالدىمىزدىكى دەھشەتلىك چوڭ بالايىئاپەت ئەيسانىڭ ئەگەشكۈچىلىرى ئۈچۈن ھېچقاچان دۇچ كېلىپ باقمىغان ئاجايىپ قىيىن سىناق بولىدۇ. ئۇنداقتا، شۇ دەھشەتلىك بالايىئاپەت باشلانغاندا، ئېنىق نېمە قىلىشىمىز كېرەكلىكىنى قەيەردىن بىلىمىز؟
يېتەكچىلىك قىلىدىغانلارغا بويسۇنۇڭ
8 .ئەيسا شاگىرتلىرىغا قانداق كۆرسەتمە بەرگەن؟
8 يېرۇسالىمدىكى مەسىھ ئەگەشكۈچىلىرى پاۋلۇسنىڭ ئىبرانىيلار يازغان خېتىنى تاپشۇرۇۋېلىپ بىرنەچچە يىلدىن كېيىن، رىم قوشۇنلىرى يېرۇسالىمنى قورشاۋغا ئالغان ئىدى. بۇنى كۆرگەن ئېتىقادچىلار ئۆزلىرىنىڭ قېچىپ كېتىشى كېرەكلىكىنى چۈشەنگەن، چۈنكى يېرۇسالېم شەھىرى پات-ئارىدا ۋەيران قىلىناتتى (مەتتا 24:3؛ لۇقا 21:20، 24). بىراق، ئۇلار قەيەرگە قېچىشى كېرەك؟ ئەيسا مەسىھ ئاددىيلا شۇنداق دېگەنىدى: «يەھۇدىيىدە بولغانلار تاغلارغا قېچىشقا باشلىسۇن» (لۇقا 21:21). شۇ ئەتراپتا نۇرغۇن تاغلار بار ئىدى. ئۇنداقتا، ئۇلار زادى قايسى تاغقا قېچىشنى نەدىن بىلىدۇ؟
9 .قايسى تاغلارغا قېچىشنى قارار قىلىش نېمە ئۈچۈن قىيىن بولغانىدى؟ (خەرىتىگە قاراڭ).
9 مەسىھ ئەگەشكۈچىلىرى قېچىپ بارالايدىغان بەزى تاغلارنى كۆرۈپ باقايلى. مەسىلەن، سامارىيە، جەلىلىيە، لىۋان تاغلىرى، خەرمون تېغى ۋە ئىئوردان دەرياسى بويىدىكى تاغلار (خەرىتىگە قاراڭ). شۇ تاغلىق رايونلاردىكى بەزى شەھەرلەر قارىماققا ناھايىتى بىخەتەر ئىدى. مەسىلەن، گاملا شەھىرى ئېگىز تاغقا جايلاشقان بولۇپ، بۇ شەھەرگە بېرىش بەك قىيىن بولغان. شۇڭا، بەزى يەھۇدىيلار گاملا شەھىرىنى بىخەتەر پاناھگاھ جاي دەپ ئويلىغان بولۇشى مۇمكىن. لېكىن، گاملا شەھىرىدە رىملىقلار بىلەن يەھۇدىيلارنىڭ ئارىسىدا شىددەتلىك جەڭ بولۇپ، شەھەردىكى نۇرغۇن پۇقرالار ئۆلگەن ئىدىb.
مەسىھ ئەگەشكۈچىلىرى ئۈچۈن قاچىدىغان تاغلار كۆپ بولغان، لېكىن ئۇ يەردە ياشاش بىخەتەر ئەمەس ئىدى (9-ئابزاسقا قاراڭ)
10، 11 .(1) يەھۋا يوليورۇقنى قانداق بەرگەن بولۇشى مۇمكىن؟ (ئىبرانىيلار 13:7، 17) (2) شۇ زاماندا مەسىھ ئەگەشكۈچىلىرى يېتەكچىلىكنى ئۆز زىممىسىگە ئالغان بۇرادەرلەرگە بويسۇنۇپ قانداق پايدىغا ئېرىشكەن؟ (رەسىمگە ھەم قاراڭ).
10 يەھۋا قارىماققا، جامائەتتىكى يېتەكچىلىكنى ئۆز ئۈستىگە ئالغان بۇرادەرلەر ئارقىلىق قېرىنداشلارنىڭ ئېنىق نېمە قىلىشى كېرەكلىكى توغرۇلۇق يوليورۇق بەرگەن. يېسېبۇس ئىسىملىك تارىخچى مۇنداق دەپ يازغان: «يېرۇسالىمدىكى تاللانغان ئەرلەر خۇدادىن ۋەھىي ئالغانىدى. جەڭ باشلىنىشتىن بۇرۇن، خۇدا ئۇلارنى شەھەردىن قېچىپ چىقىپ، پېرېئادىكى پېللا شەھىرىگە بېرىشقا بۇيرۇغان». پېللا شەھىرى مەسىھ ئەگەشكۈچىلىرى ئۈچۈن ھەقىقەتەن بىخەتەر جاي بولغان. پېللا شەھىرى يېرۇسالىمدىن ئانچە يىراق ئەمەس بولغاچقا، ئۇ يەرگە بېرىش ئاسانراق ئىدى. ئۇنىڭىدىن باشقا، بۇ شەھەرنىڭ كۆپ ساندىكى پۇقرالىرى يەھۇدىي بولمىغاچقا، ئۇلارنىڭ رىملىقلاردىن ئەركىن بولۇش ئۈچۈن، ئۇلارغا قارشى جەڭ قىلىشى ھاجەتسىز ئىدى (خەرىتىگە قاراڭ).
11 تاغقا قېچىپ كەتكەن مەسىھ ئەگەشكۈچىلىرى پاۋلۇسنىڭ «ئاراڭلاردا سىلەرگە يېتەكچىلىكنى ئۆز زىممىسىگە ئالغانلارغا ئىتائەت قىلىڭلار ۋە بويسۇنۇڭلار» دېگەن نەسىھىتىگە قۇلاق سالغان (ئىبرانىيلار 13:7، 17-نى ئوقۇڭ). نەتىجىدە، خۇدا خەلقى ئامان قالغان. بۇ ۋەقە «ئۇلى مۇستەھكەم سېلىنغان، . . . شەھەرنى»، يەنى خۇدا پادىشاھلىقىنى كۈتۈۋاتقانلارنى يەھۋا ھېچقاچان تاشلىمايدىغانلىقىغا ئىشەندۈرىدۇ.—ئىبرانىي. 11:10.
پېللا مەسىھ ئەگەشكۈچىلىرى ئۈچۈن بىخەتەر جاي بولغان (10، 11-ئابزاسلارغا قاراڭ)
12، 13 .قىيىن كۈنلەردە يەھۋا ئۆز خەلقىنى قانداق يېتەكلىگەن؟
12 بىز ئۈچۈن ساۋاق: يەھۋا يېتەكچىلىكنى ئۆز زىممىسىگە ئالغان بۇرادەرلەر ئارقىلىق ئۆز خەلقىگە يوليورۇقلارنى بېرىدۇ. مۇقەددەس كىتابنى ئوقۇساق، يەھۋانىڭ سادىق كىشىلەرنى ئىشلىتىپ، قىيىن كۈنلەردە ئۆز خەلقىنى يېتەكلىگەنلىكى توغرۇلۇق نۇرغۇن مىساللارنى تاپالايمىز (تەكرار. قا 31:23؛ زەبۇر 77:20). بۈگۈنكى كۈندىمۇ شۇنى ناھايىتى ئېنىق كۆرۈۋېلىشقا بولىدۇكى، يەھۋا يېتەكچىلىكنى ئۆز زىممىسىگە ئالغان بۇرادەرلەر ئارقىلىق بىزگە يوليورۇقلارنى بېرىۋاتىدۇ.
13 مەسىلەن، 19-COVID يۇقۇملۇق ۋىرۇسى كەڭ تارقىلىشقا باشلانغاندا، خۇدانىڭ خەلقى ئارىسىدىكى يېتەكچىلىك قىلىدىغان بۇرادەرلەر جامائەتلەرگە كۆرسەتمىلەرنى بېرىپ، ئاقساقاللارغا يەھۋاغا ئىبادەت قىلىشنى داۋاملاشتۇرۇش ئۈچۈن قېرىنداشلارنى يىغىلىشلارغا قانداق تەشكىللەشنى ئېيتقان. يۇقۇملۇق كېسەل تارقىلىپ، بىرنەچچە ئاي ئۆتكەندىن كېيىن، چوڭ ئىبادەت يىغىلىشىمىز 500-دىن كۆپرەك تىلدا ئۆتكۈزۈلدى ۋە قېرىنداشلار پروگراممىنى ئىنتېرنېت، تېلېۋىزور ۋە رادىئو ئارقىلىق ئاڭلىدى. تارىختا تۇنجى قېتىم شۇنداق چوڭ يىغىلىش ئۆتكۈزۈلدى. شۇنداق قىيىن ئەھۋالدا بولغاندىمۇ، ئۆز ۋاقتىدا روھىي ئوزۇقلۇقتىن بەھرىمەن بولۇپ، ئىناق-ئىتتىپاقلىقنى ساقلىدۇق. دېمەك، بۇنىڭدىن شۇنى كۆرۈپ يېتەلەيمىزكى، كېلەچەكتە قانداق قىيىنچىلىقلارغا دۇچ كەلمەيلى، يەھۋا يېتەكچىلىكنى ئۆز ئۈستىگە ئالغان بۇرادەرلەر ئارقىلىق بىزگە داۋاملىق ياردەم بېرىدۇ. يەھۋاغا ئىشەنچ باغلاش ۋە ئۇنىڭ كۆرسەتمىلىرىگە بويسۇنۇشتىن باشقا، ئۆزىمىزنى دەھشەتلىك چوڭ بالايىئاپەتكە تەييارلاشقا ۋە ئاشۇ جاھاننى زىل-زىلىگە كەلتۈرىدىغان پەيتتە دانالىق بىلەن ھەرىكەت قىلىشىمىزغا يەنە قانداق پەزىلەتلەر ياردەم بېرىدۇ؟
ئېتىقادداشلارغا سۆيگۈ-مۇھەببەت كۆرسىتىپ، مېھماندوست بولۇڭ
14 .ئىبرانىيلار 13:1–3 ئايەتلەرگە ئاساسلانغاندا، يېرۇسالىمنىڭ ۋەيران قىلىنىشتىن بىرقانچە يىل ئاۋۋال، مەسىھ ئەگەشكۈچىلىرى قانداق پەزىلەتلەرنى كۆرسىتىشكە توغرا كەلگەن ئىدى؟
14 دەھشەتلىك چوڭ بالايىئاپەت باشلانغاندا، ئېتىقادچى قېرىنداشلارغا بۇنىڭدىنمۇ كۆپرەك سۆيگۈ-مۇھەببەت كۆرسىتىشىمىزگە توغرا كېلىدۇ. بۇ جەھەتتە يېرۇسالىم ۋە يەھۇدىيەدىكى مەسىھ ئەگەشكۈچىلىرىنىڭ ئۈلگىلىرىگە ئەگىشىشىمىز لازىم. ئۇلار دائىم بىر-بىرىگە سۆيگۈ-مۇھەببەت كۆرسەتكەن (ئىبرانىي. 10:32–34). بىراق، يېرۇسالىم ۋەيران بولۇشتىن بىرقانچە يىل ئىلگىرى، ئۇلار بىر-بىرىگە تېخىمۇ كۆپرەك قېرىنداشلارچە سۆيگۈ-مۇھەببەت كۆرسىتىپ، مېھماندوست بولۇشى زۆرۈر ئىدىc (ئىبرانىيلار 13:1–3-نى ئوقۇڭ). بىزمۇ مۇشۇ دۇنيانىڭ ئاخىرى يېقىنلاشقانسېرى، بىر-بىرىمىزگە سۆيگۈ-مۇھەببەت كۆرسىتىشىمىز لازىم.
15 .نېمە ئۈچۈن پېللاغا قاچقان مەسىھ ئەگەشكۈچىلىرىنىڭ بىر-بىرىگە سۆيگۈ-مۇھەببەت كۆرسىتىپ، مېھماندوست بولۇشى زۆرۈر ئىدى؟
15 رىم قوشۇنلىرى يېرۇسالىمنى قورشاۋغا ئالغاندىن كېيىن، تۇيۇقسىز چېكىنىپ كېتىپ قالغانىدى. شۇ چاغدا، مەسىھ ئەگەشكۈچىلىرىنىڭ شەھەردىن قېچىپ چىقىپ كېتىشى ئۈچۈن پۇرسەت توغۇلغان. بىراق، ئۇلار ئۆزلىرى بىلەن كۆپ نەرسىلەرنى ئېلىپ كېتەلمىگەن (مەتتا 24:17، 18). ئۇلار پېللاغا قېچىپ كېتىپ بارغاندا، يول ئۈستىدە چوقۇم بىر-بىرىگە ياردەم بېرىشى كېرەك ئىدى. پېللاغا يېتىپ كەلگەندە، يېڭى تۇرمۇشىنى باشلىغاندا يېمەك-ئىچمەك، كىيىم-كېچەك ۋە تۇرىدىغان جايغا موھتاج بولغان. شۇڭا، ئۇلارنىڭ قېرىنداشلارچە سۆيگۈ-مۇھەببەت كۆرسىتىش ۋە مېھماندوست بولۇپ ئۆزىدە بارىنى باشقىلار بىلەن ئورتاقلىشىش ئارقىلىق بىر-بىرىگە يار-يۆلەك بولۇشىغا نۇرغۇن پۇرسەتلەر توغۇلغان.—تىتۇس 3:14.
16 .ياردەمگە مۇھتاج بولغان ئېتىقادداشلارغا سۆيگۈ-مۇھەببەت كۆرسىتىشنىڭ قانداق يوللىرى بار؟ (رەسىمگە ھەم قاراڭ).
16 بىز ئۈچۈن ساۋاق: سۆيگۈ-مۇھەببەت بىزنى موھتاجلىقتا قالغان قېرىنداشلارغا يار-يۆلەك بولۇشقا دەۋەت قىلىدۇ. مەسىلەن، كۆپلىگەن ئېتىقادچى قېرىنداشلىرىمىز ئۇرۇش ياكى تەبىئىي ئاپەت تۈپەيلى، كۆچمەن بولۇپ ياشاۋاتقان قېرىنداشلارغا خۇشاللىق بىلەن ياردەم بەرگەن. ئۇرۇش سەۋەبلىك ئۇكرائىنادىكى ئۆيىنى تاشلاپ كېتىشكە توغرا كەلگەن بىر قېرىندىشىمىز مۇنداق دەيدۇ: «يەھۋا قېرىنداشلىرىمىز ئارقىلىق بىزنى يېتەكلەپ، ياردەم بەرگەنلىكىنى ھېس قىلدۇق. ئۇلار بىزنى ئۇكرائىنادا، ۋېنگرىيىدە ۋە گېرمانىيىدە ئىللىق قارشى ئېلىپ، سۆيگۈ-مۇھەببەت كۆرسەتتى». ئەگەر بىز قېرىنداشلارغا سۆيگۈ-مۇھەببەت كۆرسىتىپ، ئۇلارنىڭ ئېھتىياجلىرىنى تەمىنلەپ بەرسەك، يەھۋا بىلەن مۆرىنى-مۆرىگە تىرەپ خىزمەت قىلغان بولىمىز.—پەند ن. 19:17؛ 2-كورىنت. 1:3، 4.
چەت ئەللەردىن قېچىپ كەلگەن ئېتىقادچى قېرىنداشلىرىمىز بىزنىڭ ياردىمىمىزگە مۇھتاج (16-ئابزاسقا قاراڭ)
17 نېمە ئۈچۈن سۆيگۈ-مۇھەببەت ۋە مېھماندوستلۇق كۆرسىتىشنى ئۆگىنىشىمىز كېرەك؟
17 دەھشەتلىك چوڭ بالايىئاپەت مەزگىلىدە، بىز ھازىرقىدىنمۇ بەكرەك بىر-بىرىمىزگە يار-يۆلەك بولۇشىمىز كېرەك (ھاباق. 3:16–18). ھازىر يەھۋا بىزنى ئېتىقادداشلارغا سۆيگۈ-مۇھەببەت كۆرسىتىشكە ۋە مېھماندوست بولۇشقا ئۆگىتىۋاتىدۇ. ئاشۇ چوڭ بالايىئاپەت مەزگىلىدە، بۇ پەزىلەتلەر بەك مۇھىم رول ئوينايدۇ.
بىزنى ئالدىمىزدا نېمە كۈتۈۋاتىدۇ؟
18 .بىرىنچى ئەسىردىكى مەسىھ ئەگەشكۈچىلىرىنى قانداق ئۈلگە قىلالايمىز؟
18 تارىخ شۇنى ئىسپاتلايدۇكى، يېرۇسالىم ۋەيران قىلىنغاندا، ئەيسانىڭ سۆزلىرىگە بويسۇنۇپ، تاغلارغا قاچقان مەسىھ ئەگەشكۈچىلىرى ھايات قالغان. ئۇلار شەھەرنى تاشلاپ كەتكەن، ئەمما يەھۋا ئۇلارنى ئەسلا تاشلىمىغانىدى. بىز ئۇلارنىڭ ئۈلگىسىدىن قانداق ساۋاق ئالالايمىز؟ كەلگۈسىدە بىز نېمە ئىشلارنىڭ يۈر بېرىدىغانلىقىنى تەپسىلىي بىلمەيمىز. بىراق، ئەيسانىڭ بىزنى ھەرقاچان تەييار تۇرۇشقا ئاگاھلاندۇرغانلىقىنى بىلىمىز (لۇقا 12:40). ئۇنىڭدىن باشقا، بىز ئەلچى پاۋلۇسنىڭ ئىبرانىيلار يازغان خېتىدىكى نەسىھەت سۆزلىرى توغرۇلۇق چوڭقۇر ئويلىنىپ، ئۇلارنى ھاياتىمىزدا ئەمەلىي قوللىنىشىمىز لازىم. ئاتىمىز يەھۋا بىزنى ھېچقاچان تاشلىمايدىغانلىقى ھەققىدە ھەربىرىمىزگە شەخسەن ۋەدە بەرگەن (ئىبرانىي. 13:5، 6). شۇنداق ئىكەن، مەڭگۈ مەۋجۇت بولىدىغان شەھەرنى، يەنى خۇدا پادىشاھلىقىنى ئىنتىزارلىق كۈتەيلى. شۇنداق قىلساق، كېلەچەكتە ئاجايىپ بەرىكەتلەردىن مەڭگۈ بەھرىمەن بولالايمىز.—مەتتا 25:34.
157-ناخشا مەڭگۈ تىنچلىق زامان
a قەدىمقى زاماندا بىر شەھەر بىر پادىشاھلىق بولاتتى، چۈنكى شۇ زامانلاردا بىر شەھەرگە بىر پادىشاھ ھۆكۈمرانلىق قىلغان.—يارىت. 14:2.
b بۇ ۋەقە مىلادى 67-يىلى، يەھۇدىيە ۋە يېرۇسالىمدىكى مەسىھ ئەگەشكۈچىلىرى قېچىپ كەتكەندىن كېيىن كۆپ ئۆتمەي يۈز بەرگەن.
c «قېرىنداشلارچە سۆيۈش» دېگەن سۆز ئادەتتە يېقىن تۇغقانلارغا قارىتا ئىشلىتىلىدۇ، بىراق، پاۋلۇس بۇ سۆزنى قوللىنىپ، مەسىھ ئەگەشكۈچىلىرى ئارىسىدىكى سۆيگۈ-مۇھەببەت رىشتىسىنى ئىپادىلىگەن.