Va Roma
6 Oco hẽ, tu popia nye? Tu amamako vekandu oco ohenda ya piãla yi livokiye? 2 Hacoko! Nda tua fila ale vekandu, tu amamako ndati lomuenyo vekandu liaco? 3 Ale ka wa kũlĩhĩli okuti vosi yetu tua papatisiwila vu Kristu Yesu tua papatisiwilavo vokufa kuaye? 4 Kuenje tua kendiwa kumue laye omo tua papatisiwila vokufa kuaye, okuti ndeci Kristu a pinduiwa kuava va fa lulamba wa Tate, haico etu tu ambatavo omuenyo wokaliye. 5 Nda tua fa ndeci eye, tu pinduiwavo ndeye kuenje eci ci lekisa okuti tu likuete omunga laye. 6 Momo tua kũlĩha okuti ovituwa vietu viosimbu via valeliwa kumue laye kuti, okuti atimba etu ekandu a hongua kuenje ka tu lingi vali apika vekandu. 7 Momo wosi wa fa wa yovuiwa* kakandu.
8 Kuenje nda tu fila kumue la Kristu, tua kolela okuti tu muilavo omuenyo kumue laye. 9 Omo tua kũlĩha okuti cilo Kristu wa pinduiwa kuava va fa kuenje ka fi vali; oku fa ka ku u viala vali. 10 Eci a fa, wa fila akandu* osi onjanja yimosi, pole, o kasi lomuenyo oco a linge ocipango ca Suku. 11 Haico ene, litendi okuti wa fi vekandu, puãi vu kasi lomuenyo oco vu lingi ocipango ca Suku vu Kristu Yesu.
12 Ko ka eceleli okuti ekandu li amamako oku viala ndosoma vatimba ene a fa fa, okuti vu pokola koloñeyi viao. 13 Ko ka eci atimba* ene kekandu ndovimalẽho vievĩho, pole lieci ku Suku nda vana va file okuti cilo va kasi lomuenyo kuenda ecivo atimba* ene ndovimalẽho viesunga. 14 Ekandu ka li ka viale vokuene, momo ka vu kasi vemehi liocihandeleko, pole, vu kasi vemehi liohenda ya piãla.
15 Nye tu popia? Anga tu linga ekandu omo ka tu kasi vemehi liocihandeleko, pole, vemehi liohenda ya piãla? Hacoko! 16 Ka wa kũlĩhĩli hẽ okuti nda wa amamiko oku lieca komunu umue ndupika ukuepokolo, vu kala apika a una vu pokola, ci kale wekandu u tuala koku fa, ci kale wepokolo u tuala kesunga? 17 Pandu pandu ku Suku momo wa kali apika vekandu, pole, wa lingi vakuepokolo vutima kelongiso wa kundikiwi. 18 Kuenje omo wa yovuiwi kekandu, wa lingi apika vesunga. 19 Ñasi oku tukula olondaka via kũlĩhĩwa lomanu omo lioku hongua kuatimba ene; momo ndaño vu eci atimba ene ndapika vevĩho kuenda etombo li tuala ketombo, pole, cilo eci atimba ene ndapika vesunga li tuala koku kola. 20 Momo eci wa kali apika vekandu, ka wa tiamẽleli kesunga.
21 Eci wa kali apika vekandu, apako api wa endi oku ima? Ovina okuti cilo viu kutisi osõi. Momo esulilo liovina viaco oku fa. 22 Omo okuti cilo wa yovuiwi kekandu kuenje wa lingi apika va Suku, vu kasi oku ima apako a kola, okuti onima yaco, omuenyo ko pui. 23 Onima yekandu oku fa, pole, ongavelo ya eciwa la Suku omuenyo ko pui vu Kristu Yesu Ñala yetu.