Ocipama 9

Velie Hẽ Akamba Va Suku?

Yesu Kristu eye Omõla a Yehova kuenda walitokeka kokuaye okuti ekamba limue lisoliwe calua. Eci handi keyile oku kala lomuenyo ndomunu palo posi, Yesu wakuatele ale omuenyo kilu okuti ungelo wavelapo. (Yoano 17:⁠5) Noke eye weya palo posi okulongisa omanu ocili ca Suku. (Yoano 18:37) Eye wa ecavo omuenyo waye oco okuti omanu vapokola kokuaye ova popela kekandu kuenda kokufa. (Va Roma 6:23) Yesu cilo Osoma Yuviali wa Suku, okuti uviali wokilu u ka nena Ofeka Yelau palo posi.​—⁠Esituluilo 19:⁠16.

Ovangelo lavovo akamba va Suku. Ovangelo kava fetikile omuenyo wavo ndomanu palo posi. Ovo Suku wa valulikila kilu eci handi osi kayapangiwile. (Yovi 38:​4-7) Kuli olohuluwa viovangelo. (Daniele 7:10) Akamba ava ndeti va Suku vayongola okuti omanu valilongisa ocili catiamẽla ku Yehova.​—⁠Esituluilo 14:⁠6, 7.

Suku okuetevo akamba palo posi; eye ovatukula okuti olombangi viaye. Ombangi kombonge yesombiso yivangula eci eye akũlĩha catiamẽla komunu ale kocina cimue. Olombangi via Yehova visapuila vakuavo eci ovo vakũlĩha catimẽla ku Yehova kuenda konjongole yaye. (Isaya 43:10) Kumosi lovangelo, Olombangi viyongolavo oku ku kuatisa oco okũlĩhe ocili catiamẽla ku Yehova. Ovo vakuyonguila okuti okalavo ekamba lia Suku.