Ocipama 13

Owiñi Umue Wakahandangala Kovaso Yocalo ca Yehova

1. (a) Osimbu handi omanu va Suku cikale vana va kala lomuenyo eci handi Kristu ka citiwile, cikale o 144.000 ka va tambuile onima yavo, nye ci kuete oku lipita lavo? (b) Nye cika lingiwila “[l]owiñi wakahandangala” u kasi lomuenyo oloneke vilo?

AKUENJE va Suku vana va kolelua, okupisa ku Havele toke ku Yoano Upapatisi oku linga ocipango ca Suku ca kala ocina catete vomuenyo wavo. Pole vosi yavo va fa, kuenje va lavoka epinduko liomuenyo ko pui voluali luokaliye lua Suku. O 144.000 vaka viala la Kristu kilu Kusoma wa Suku, osimbu ka va tambuile onima yavo te va favo. Omo liaco, kelivulu Liesituluilo 7:9 ku lekisa okuti koloneke vilo via sulako kuka kala ‘owiñi umue wakahandangala’ uka tunda kolofeka viosi, okuti kava ka fa vali, pole vaka kuata elavoko liomuenyo ko pui palo posi. U umue hẽ pokati kavo?

Oku Situluiwa Kuowiñi Wakahandangala

2. Nye ca tuala kelomboloko limue liwa liatiamẽla koku situluiwa kuowiñi wakahandangala wa tukuiwa kelivulu Liesituluilo 7:⁠9?

² Kunyamo wo 1923 omanu va Yehova va pitila kelomboloko liokuti “olomeme” vina via tukuiwa volusapo lua Yesu lu sangiwa kelivulu lia Mateo 25:​31-46, kuenda “olomeme vikuavo” vina eye a tukula kelivulu lia Yoano 10:​16, ovo omanu vana vaka kuata epuluvi lioku kala lomuenyo otembo yenda hũ palo posi. Kunyamo wo 1931 kua sangiwavo elomboloko liokuti vana va lomboluiwa ko Ezekiele 9:​1-11 ndu okuti va kapiwa ondimbukiso kopolo yavo, ovo vana va kuete elavoko lioku kala palo posi. Noke, kunyamo wo 1935 kua lomboluiwa okuti owiñi wakahandangala u panga onepa kolomeme vikuavo vina via tukuiwa la Yesu. Etaili, owiñi wakahandangala wa pitahãla olohuluwa.

3. Momo lie ondaka “va talama kovaso yocalo” ka yi lomboloka ocisoko cimue co kilu?

³ Kelivulu Liesituluilo 7:​9, owiñi wakahandangala ka u letiwe ndu okuti u kasi kilu. Oku ‘talama kuavo kovaso yocalo’ ca Suku ka ci sukila okuti ovo va kala kilu. Ovo va letiwe lika la Suku. (Osamo 11:⁠4) Esunga lieci okuti owiñi wakahandangala una okuti “oku va tenda lomue o ci tẽla” hacisoko cimueko cokilu, ca lekisiwa leci ca sonehiwa kelivulu Liesituluilo 7:​4-8 kuenda Esituluilo 14:​1-4. Kelivulu eli etendelo liava vopiwa posi loku ambatiwa kilu lia lekisiwa okuti 144.000.

4. (a) ‘Ohali ya piãla’ yina okuti oko owiñi wakahandangala uka puluka yi lomboloka nye? (b) Ndomo ca popiwa kelivulu Liesituluilo 7:​11, 12, helie o lete owiñi wakahandangala loku panga lavo onepa kefendelo?

⁴ Kelivulu Liesituluilo 7:14 catiamẽla kowiñi wakahandangala, kua popia hati: “Ava, ovo vana va tunda kohali yalua.” Ovo va puluka kohali ya velapo okuti ka ya la pita vesapulo liomanu. (Mateo 24:21) Eci vaka eca olopandu viavo ku Suku kuenda ku Kristu, loviluliko viosi viokilu omo lieyovo liavo, vaka popia hati: “Amene. Esivayo lulamba lolondunge kuenda olopandu, lesumbilo lunene, lupami, vi eciwe ku Suku yetu oloneke vi enda ño-o hũ, ka vi pui. Amene.” Esituluilo 7:​11, 12.

Va Setekiwa Okuti va Sesamẽla Oku Puluka

5. Ndamupi tu pondola oku kũlĩha eci owiñi wakahandangala u sukila oku linga?

⁵ Oku popeliwa kuowiñi wakahandangala kohali ya piãla, ku litava lolonumbi via Yehova viesunga. Ovina vi situlula vana va yovuiwa, via lomboluiwa ciwa Vembimbiliya. Lonjila eyi ci tava okuti, vana va sole esunga cilo va likolisilako oku lekisa ovituwa viwa oco vaka puluke. Ava hẽ va sukila oku linga nye?

6. Momo lie ci tavela oku sokisa owiñi wakahandangala ndolomeme?

⁶ Olomeme viomboka kuenda vakuepokolo. Omo liaco, eci Yesu a popia hati o kuete olomeme vikuavo okuti ka vi pangi onepa kocisoko cava va enda kilu, wa kala loku tukula omanu vana vaka kala palo posi haivo vaka pokola kelongiso liaye. Eye wa popia hati: “Olomeme viange vi yeva ondaka yange. Nda vi kũlĩha kuenje vi ñuama.” (Yoano 10:​16, 27) Omanu vaco ovo vana va yevelela olondaka via Yesu loku pokola kokuaye, kuenje va linga olondonge viaye.

7. Ovituwa vipi ava va kuãi Yesu va sukila oku kuata?

⁷ Ovituwa vipi vikuavo vosi va kuãi Yesu va sukila oku kuata? Ondaka ya Suku yeca etambululo okuti: “Nda wa luli omunu wale una wa tiama komuenyo wale, haiwo wa vĩha loloñeyi vieliaño. . . Wali omunu wokaliye una wa tungiwa lesetahãlo lia Suku lesunga kuenda oku kola.” (Va Efeso 4:​22-24) Ovo vamamako loku kuata ovituwa vi vokiya elitokeko liomanu va Suku okuti: Ocisola, esanju ombembua, epandi, unu, esunga, ekolelo, umbombe, esuluviko.”—Va Galatia 5:​22, 23.

8. Ohali yipi owiñi wakahandangala uka tala omo lioku kuatisa ocisoko cava va enda kilu?

⁸ Owiñi wakahandangala u kasi loku kuatisa etendelo lia supapo liava va kuete elavoko liomuenyo ko pui kilu, haivo va kuete ocikele coku songola upange woku kunda. (Mateo 24:14; 25:40) Olomeme vikuavo vi kasi loku eca ekuatiso eli ndaño via kũlĩha okuti vaka suvukiwa, momo kefetikilo lioloneke vilo via sulako, Yesu Kristu lovangelo vaye va tundisa Satana lolondele viaye kilu. Eci ci lomboloka ‘ohali kongongo. . . momo eliapu lia lokila kokuayo lonyeño yalua, omo lia limbuka okuti oloneke vialio vitito.’ (Esituluilo 12:​7-12) Omo liaco, Satana wa siata oku vokiya oku lambalaliwa kuomanu va Suku osimbu esulilo lioluali lulo li kasi ocipepi.

9. Ndamupi omanu va Suku va siata oku litunda ciwa kupange wavo woku kunda? Kuenda momo lie?

⁹ Ndaño lelambalalo, upange woku kunda u kasi loku amamako. Kesulilo Liuyaki Watete Woluali Luosi, kua kala lika olohũlũkãi vitito viakundi vusoma, pole cilo kuli olohuluwa vialua, momo Yehova wa likuminya hati: “Lacimue ocimãlẽho va ci telela oku yaka love ci ku linga cimue.” (Isaya 54:17) Ndaño muẽle umue watiamẽlele kocisoko coku sombisa ko Yuda, wa limbukile okuti upange wa Suku ka u tatekiwa. Kocita catete, eye wa sapuila va Fariseo catiamẽla kolondonge hati: “Va kale ño, momo etavo eli, pamue upange u, nda womanu u nyõleha. Puãi, nda wa Suku, ene ka vu tẽla oku va yula. Kuli ohele sanga vu linga ndava va liyaka la Suku.”​—⁠Ovilinga 5:​38, 39.

10. (a) “Ondimbukiso” yi kasi komanu va Suku yi lomboloka nye? (b) Ndamupi ovo va pokola “kondaka yokilu”?

¹⁰ Ava va panga onepa kowiñi wakahandangala va lekisiwa ndu okuti va kuete ondimbukiso yoku puluka. (Esekiele 9:​4-6) “Ondimbukiso,” uvangi wokuti ovo va nolapo oku litumbika ku Yehova, va papatisiwa ndolondonge via Yesu kuenda va kasi loku likolisilako oku kuata ovituwa ndevi via Kristu. Va pokola kueci “ondaka yokilu” yi va sapuila catiamẽla kocisoko catavo oluali lulo lua Satana hati: “Amanu vange, tundi vimbo liaco, sanga wu linala lakandu alio, kuenda sanga afengi alio o kuati.” ​​—⁠Esituluilo 18:​1-5.

11. Lonjila yipi owiñi wakahandangala u lekisa okuti omanu va Yehova?

¹¹ Yesu wa sapuilavo kolondonge viaye hati: “Kokulisola kuene pokati oko omanu vosi va limbukila okuti vulondonge viange.” (Yoano 13:35) Pole, asongui vatavo oluali lulo, va ponda asongui vatavo akuavo vuyaki. Pamue va liponda voliavo omo ño lioku citiwila kolofeka via litepa! Ondaka ya Suku yiti: “Omãla va Suku lomãla veliapu va limbukiwa ndomo okuti, wosi ka lingi esunga hamõla a Suku ko, ndaño u ka sole ukuavo. . . Cetu oku lisola pokati, oku setahala ukueliapu Kaini, una wa ponda manjaye hacoko.” 1 Yoano 3:​10-12.

12. Vohali ya piãla, Yehova oka linga nye latavo vesanda okuti ovo ‘oviti’ vima apako ha-awako?

¹² Yesu hati: “Oviti viosi viwa vima apako awa, puãi uti ũvi wima apako ha-awako. Uti uwa ko tẽla oku ima apako ha-awako, haico uti ũvi ko tẽla oku ima apako awa. Uti wosi ka wimi apako awa u timbuiwa kuenje wimbiwa vondalu. Oco vu va limbukila kapako avo.” (Mateo 7:​17-20) Atavo oluali lulo, a kasi loku ima apako a va situlula ‘nduti’ wa vola, okuti ndopo uka nyõliwa la Yehova vohali ya piãla.​—⁠Esituluilo 17:16.

13. Ndamupi owiñi wakahandangala u lekisa okuti u likuete omunga “kovaso yocalo” ca Yehova?

¹³ Kesituluilo 7:​9-15 ku lombolola esunga lieci owiñi wakahandangala wa popeliwila. Ku lekisa okuti ovo va likuete omunga, “va talama kovaso yocalo” ca Yehova, poku teyuila omoko Yaye yoku viala. Ovo ‘Olonanga viavo oku vi sukula kuenda oku vi yelisa vosonde ya Kameme,’ ci lekisa okuti va limbuka ocilumba ca Yesu. (Yoano 1:29) Ovo va litumbika ku Suku kuenda va ci lekisila poku papatisiwa. Omo liaco, va kuete ekalo limue lia yela kovaso a Suku, okuti li lekisiwila kolonanga vi yela kuenda va kasi “loku u vumba utanya luteke.” Kuli hẽ olonjila vimue ove o pondola vali oku tokekisa omuenyo wove leci ca lomboluiwa palo?

Asumũlũho Cilo

14. Asumũlũho api vamue omanu va Suku va siata oku kuata cilo?

¹⁴ Pamue, wa siata oku mõla okuti vana va vumba Yehova va kuete ale asumũlũho muẽle cilo. Ndeci, eci ove wa fetika oku lilongisa eci catiamẽla kocipango ca Yehova, wa sanga elomboloko liokuti kuli elavoko limue liwa koloneke viokovaso. Omo liaco, cilo o kuete ocimãho cimue komuenyo, okuti oku fendela Suku yocili lelavoko lisanjuisa lioku kuata omuenyo ko pui vofeka yelau. Ocili okuti Soma Yesu Kristu “[owiñi wakahandangala] o u songuila kolono viovava omuenyo.”​—⁠Esituluilo 7:⁠17.

15. Ndamupi Olombangi via Yehova via sumũlũisiwa omo lioku kapako olonumbi Viembimbiliya viatiamẽla kovitangi viopulitika kuenda vievĩho lioluali lulo.

¹⁵ Owiñi wakahandangala u kuete Esumũlũho limue li komohĩsa omo liocisola lelitokeko li kasi pokati kavo ndomanu va Yehova voluali luosi. Omo okuti vosi tu lia okulia kumuamue kuespiritu, tu pokola kovihandeleko vimuamue kuenda kolonumbi vi sangiwa Vondaka ya Suku. Omo liaco, ka tua litepele omo liopulitika ale olonepele violofeka. Kuenda tua kapakovo olonumbi via sunguluka vina Suku a yonguila omanu vaye. (1 Va Korindo 6:​9-11) Pokati komanu va Suku ka pali ovoyaki, oku litepa tepa, evĩho li kasi voluali, pole omanu va Suku kespiritu va kasi ale vocumbo ceposo. Vanja ndomo ca lomboluiwa kelivulu lia Isaya 65:​13, 14.

16. Ndaño okuti Owiñi wakahandangala u kasi loku tala ohali, elavoko lipi u kuete?

¹⁶ Ka kuli omunu wa Yehova ukuasitu okuti wa lipua. Ovo va vetiwa lovitangi via siata vomuenyo woluali lulo, ale va vetiwa lovoyaki oluali. Va vetiwavo lovoveyi, ohali kuenda olofa. Pole, va kuete ekolelo liokuti voluali luokaliye Suku “[oka] puenya asuelela osi kovaso avo. Okufa ka ku kalako vali, ndaño oku lila loku liyula lupongo laviovo ka vi kalako vali. Momo ovina viatete via pita.”​—⁠ Esituluilo 21:⁠4.

17. Ndaño okuti cilo tu liyaka lovitangi, vana va vumba Suku yocili va kuete elavoko lie?

¹⁷ Ndaño okuti wa pumba omuenyo wove cilo omo lioku kuka, ovoveyi, ovilunga, ale oku lambalaliwa, Yehova oka ku pindula oco o kuate omuenyo Vofeka Yelau. (Ovilinga 24:15) Kuenje oka amamako oku sanjukila ocipito cespiritu vokuenda Kuohũlũkãi Yanyamo Yuviali wa Kristu. Ocisola o kuetele Suku cika amamako, poku mõla oku tẽlisiwa kuo cipango Caye ci komohĩsa. Kuenda asumũlũho ana Yehova aka ku ĩha aka vokiya vali ocisola U kuetele. (Isaya 25:​6-9) Hovowakuovo omanu vana va kasi loku fendela Suku yocili va lavoka koloneke viokovaso!

Apulilo Voku Pitulula

• Embimbiliya lia lombolola nye catiamẽla kowiñi wakahandangala?

• Nye tu kuete oku linga cilo nda tu yongola muẽle oku kongeliwa kowiñi wakahandangala?

• Kokuove asumũlũho owiñi wakahandangala u kuete cilo kuenda asumũlũho uka kuata voluali luokaliye, a kuete esilivilo lie?

[Elitalatu kemẽla 123]

Valua va panga onepa kowiñi wakahandangala va likuete omunga koku fendela lika Suku yocili