Lunguka Kuenda Lavulula!

“Oco lavululi, momo ka wa kulihili eteke liaco, ndaño ekumbi.”−MATEO 25:13.

1. Upostolo Yoano wakala okukevelela nye?

VOMBANGULO ya Yesu yasulako Vembimbiliya, eye walikuminya hati: “Ocili ndopo njiya.” Upostolo waye Yoano watambulula hati: “Amene. Enju, a Ñala Yesu.” Upostolo kakuatele atãtãhãi okuti Yesu wiya. Yoano wakala pamosi lovapostolo vapula Yesu hati: “Eteke li pi ovina evi vi lingiwa? Ondimbukiso yokutukuluka [kelimi lio Helasi, pa–rou–si’a] kuove ye? Londimbukiso yesulilo lioluali ye?” Ocili okuti, Yoano wakala okukevelela eci catiamẽla kokuiya kua Yesu kotembo yakovaso.−Esituluilo 22:20; Mateo 24:3.

2. Catiamẽla kokuiya kua Yesu, nye cikasi okupita lomanu vakuetavo?

² Ombangulo yaco yopokolika kayasiatele otembo yilo. Omanu valua vakuetavo okuti valongisa ondotilina yatiamẽla ‘kokuiya’ kua Yesu, pole kavialuile ovimatamata viavo vikuete elavoko eli. Ekalo liavo lilekisa okuti vaevalako okuiya kua Yesu. Elivulu litukuiwa okuti The Parousia in the New Testament lilombolola okuti: “Ekalo liomanu, locisimilo kuenda elongiso liatavo lilekisa, kavikuete elitokeko lialua leci catiamẽla Kokuiya [kua Yesu] Upange wavakuetavo wokukunda okulikekembela kuenda wokutuma olomisionariu oco vikunde ondaka wahongua kuenda kaukuete esilivilo!” Pole kawatiamẽle komanu vosi!

3. (a) Akristão vocili valiyevite ndati kueci catiamẽla ko pa.rou.si’a (cilomboloka okuiya kua Yesu)? (b) Nye okuti oco kaliye tukakulihisa pokolika?

³ Pole olondonge via Yesu vikasi okukevelela lonjogole yocili esulilo lioluali lulo. Osimbu cilingiwa lesunguluko, tusukila okuamamako lokutava eci catiamẽla kovina viosi viakongeliwa kokuiya kua Yesu kuenda okukala ndomo ovina viaco vikasi. Eci cikatuloñoluisa okuti ‘tupandikisa toke kesulilo oco tupopeliwe.’ (Mateo 24:13) Kovitumasuku visangiwa kelivulu lia Mateo 24 kuenda 25, Yesu waeca elungulo okuti tukuete okulikuama, oco tutambule ekuatiso liakolapo. Ocipama 25 cikuete olosapo okuti pamue wavikuliha ale, okukongelamo olusapo lumue luatiamẽla kafeko ekui okuti (vamue valunguka vakuavo aveke) kuenda olusapo luatiamẽla kolombongo. (Mateo 25:1–30) Ovindekaise evi vipondola ndati okutukuatisa?

Lunguka, Ndeci Cakala Afeko Vatãlo!

4. Lipi etosi liavelapo liatiamẽla kolusapo luafeko?

⁴ Citava okuti opondola okutanga eci catiamẽla kolusapo luafeko, lusangiwa kelivulu lia Mateo 25:1–13. Ekalo liaco liatiamẽla kocipito colohuela ca umue woko Yudea okuti sandombua enda konjo yisia ya ndombua oco asindikiliwe toke konjo ya sandombua (ale toke konjo yisia ya ndombua). Eci vakosindikila vaenda lokuimba ovisungo kuenda kacasukilile okukuliha otembo yokupitila. Volusapo, afeko ekui vakevelila luteke okupitila kua sandombua. Omo okuti afeko vatãlo vakala aveke kavanenele ulela utẽla wokukapa volondiyelo vaendele okukalanda. Afeko vakuavo vatãlo valunguka vanenele ale ulela wusupa oco okuti osimbu vakevelela nda volondiyelo wapuamo valongelamo vali. Afeko ava vatãlo ovo lika vakuatele olondiyelo povaka eci sandombua apitila. Omo liaco, ovo lika vataviwa okuiñila vonjo yocipito. Afeko vatãlo aveke eci vatiuka, kavakuatele vali epuluvi liokuiñila.

5. Ovinimbu vie Viembimbiliya vieca elomboloko liatiamẽla kueci cilomboloka olusapo luafeko?

⁵  Vialua viatiamẽla kolusapo olu vilomboloka ocindekaise. Ndeci, Embimbiliya lilombolola okuti Yesu eye sandombua. (Yoano 3:28–30) Yesu walisokisa eye muẽle ndomõla wasoma vangiliyila ocipito cuvala. (Mateo 22:14) Cisilivila calua okulimbuka okuti osimbu Akristão olombuavekua kolonepa vikuavo (Viembimbiliya) vatukuiwa okuti ‘olondombua’ via Kristu, olusapo kalutukula yimue ondombua. (Yoano 3:29; Esituluilo 19:7; 21:2, 9) Pole, olusapo lutukula afeko ekui, kuenda olombuavekua vikasi ndafeko valikuminya okutokekisa uvala la Kristu.−2 Va Korindo 11:2.a

6. Elungulo lie Liaeca Yesu eci amãlusula olusapo luatiamẽla kafeko?

⁶ Ndaño liovitumasuku viatukuiwa ale kuenda elomboloko liavio, kuli ovihandeleko tupondola okulilongisa volusapo olu. Pole, Yesu wamãlusula olusapo olu lolondaka viokuti: “Oco lavululi, momo ka wa kulihili eteke liaco, ndaño ekumbi.” Olusapo lulombolola eci catiamẽla kokuetu omunu lomunu oco tulunguke, kuenda oco tukulihe okuti tupanda kesulilo lioluali lulo. Ndaño katuakilihile eteke esulilo likeya, olio, likasi muẽle ocipepi. Omo liaco, tukulihisi ocituwa calekisiwa kovimunga vivali viafeko.

7. Momo lie afeko vatãlo vatukuiwila volusapo valingila aveke?

⁷ Yesu wapopia hati: “Va tãlo va wulua.” Ovo hẽ vawuluile omo kavatavele okuti sandombua wakala lokuiya? Anga hẽ kavakuatele vali onjongole yokukevelela? Ale ovo vakembiwile? Sio. Yesu wapopia hati afeko ava vatãlo vaendele “oku upilila sandombua.” Ovo vakulihile okuti eye wakala okuiya, kuenje vayonguile ‘okuiñila laye vonjo yuvala.’ Ocili hẽ okuti, ovo valipongiyile oco ciwa? Ovo vakala okukevelela ulela wavo, toke “vokati kuteke,” pole ovo kavalipongiyile oco vatave okuiya kuaye kelivala likuavo, momo citava okuti−iya selo ale ocilua, okuti eci vakevelela tete cisule.

8. Nye capopia afeko vatãlo vatukuiwa volusapo cilekisa okuti valunguka?

⁸ Afeko vakuavo vatãlo−okuti Yesu wavatukula hati valunguka−vakala posamua lolondiyelo viavo, oco vatambule sandombua wakala lokuiya. Handivo, vakala okukevelela, pole ‘valungukile.’ Ondaka yo Helasi yapongoluiwa okuti “va lunguka” citava okuti yilomboloka “okulunguka, olondunge, kuenda uluño.” Afeko ava vatãlo valekisa okuti valungukile omo vanenele ale ulela walua wokukapa volondiyelo viavo, nda cisukiliwa. Ocili okuti ovo valipongiyile muẽle oco vakevelile sandombua, omo liaco kavaponduile okueca ulela wavo kafeko vakuavo. Okulavulula kuaco kuakuata esilivilo liocili, omo okuti eci sandombua apitila ovo vakalapo. Ava okuti “va lipongiya ale va iñila laye kuvala, kuenje epito lia yikiwa.”

9, 10. Etosi lie liavelapo volusapo luatiamẽla kafeko, kuenda apulilo api etu muẽle tusesamẽla okulinga?

⁹ Yesu kakalele lokueca elongiso liatiamẽla kokuposuisa onjo yuvala, kuenda kakalele lokueca elungulo liatiamẽla kueci cilinga ava vakalapo. Eye walungula hati: “Oco lavululi, momo ka wa kulihili eteke liaco, ndaño ekumbi.” Lipula ove muẽle ndoco: Ocili hẽ okuti ndikasi okulavulula kuenda ndakapako okuiya kua Yesu?’ Tutava okuti Yesu kaliye walinga osoma oko kilu, anga hẽ tukasi okulavulula omo okuti ‘Omõla womunu iyilila valende okilu lunene kuenda lulamba walua?’ (Mateo 24:30) “Vokati kuteke” okuiya kua sandombua kuakala vali ocipepi okuti eci afeko vatundile oco vakosange cisule. Cimuamue haeco, okuiya Kuomõla womunu oco akundule oluali lulo luvi kukasi vali ocipepi okuti otembo tuafetika okutala kokuiya kuaye cisule. (Va Roma 13:11–14) Tukasi hẽ lokulavulula vali calua, omo otembo yipanda kesulilo?

¹⁰ Oco tukuame ocihandeleko ‘cokulavulula’ tusukila okulunguka oloneke viosi. Afeko vatãlo kavakuatele ulela kuenda vaendele lonjanga okukalanda oco vavokiyeko. Otembo yilo citava okuti Akristão vakala lokutaluka kuenje kavakasi okulipongiya ciwa oco vakevelele Yesu okuti ndopo wiya. Eci capita Lakristão vamue kocita catete. Citava okuti cipitavo lavamue otembo yilo. Omo liaco tulipulisi etu muẽle ndoco: ‘Eci cikasi hẽ okupitavo lame?’−1 Va Tesalonike 5:6–8; Va Heveru 2:1; 3:12; 12:3; Esituluilo 16:15.

Lavulula Momo Esulilo Likasi Ocipepi

11. Olusapo lue Yesu alinga noke, kuenda lualisetahãla lolusapo lupi?

¹¹ Yesu volusapo luaye lukuavo, wavetiya vali calua olondonge viaye oco vilavulule. Noke yokuvangula eci catiamẽla kafeko valunguka kuenda kafeko aveke, eye walombolola ocindekaise catiamẽla kolokondu. (Tanga Mateo 25:14–30) Konepa yikuavo olusapo olu lualisetahãla lolu Yesu alinga tete luatiamẽla kolokondu omo okuti omanu valua “va soka okuti usoma wa Suku u tukuluka ndopo.”−Luka 19:11–27.

12. Lipi etosi liavelapo liatiamẽla kolusapo luolokondu?

¹² Volusapo luolokondu, Yesu wapopia eci catiamẽla kulume umue okuti eci handi kalingile ungende wasokiya apika vatatu oco volingile upange. Upika watete wowiha olokondu vitãlo, ukuavo vivali, kuenda upika wasulako wowiha okondu yimosi−okuti “u ndeci a tẽla, u ndeci a tẽla.” Pole, okondu yimosi yopalata oyo okuti onalavayi oyitambula vokuenda kuanyamo 14, cilomboloka okuti−olombongo viaco vialua calua! Eci ulume atiuka, wavangula lavo oco akulihe upange valinga “osimbu yalua” eci eye akala vungende. Apika vavali vatete valinga omilu kuenje kilu liolokondu vatambuile kuamila vikuavo. Eye wa popia hati: “wa linga ciwa,” kuenje omunu lomunu wolikuminya okuvokiyako ocikele, kuenda wamalusula lombangulo hati: “Iñila vesanju lia cime cove.” Upika watambuile okondu yimosi kalingile layo lacimue oco yilivokiye, momo eye waliyeya hati, cime wotuma upange watila calua. Eye okondu yaco wayisoleka, kayikapele kombango oco yilivokiye. Okusulako cime wosapuila hati “vukuenje wa huka, haive ukuawesi” momo katẽlisile upange cime caye otumile. Omo liaco, votambula okondu yaco kuenje votundisila kosamua “oko ku kala oku lila loku likeleketa ovayo.”

13. Yesu walekisa ndati okuti eye cime volusapo?

¹³ Onjanja yimue vali okuti, cosi catiamẽla kondaka eyi cikuete elomboloko liocindekaise. Ndeci, Yesu wata olusapo luatiamẽla kulume walinga ungende, omo okuti eye wasia olondonge viaye, kuenje waenda kilu, kuenda wakevelela otembo yalua noke watumbula usoma.b (Osamo 110:1–4; Ovilinga 2:34–36; Va Roma 8:34; Va Heveru 10:12, 13) Omo liaco, citava okuti tukuata elomboloko liavelapo liocipama ale elomboloko liovihandeleko okuti vosi yetu tuvikuama komuenyo wetu. Ovihandeleko viaco vie?

14. Olusapo luatiamẽla kolokondu lualombolola nye cisilivila?

¹⁴ Cikale okuti elavoko lietu liokukuata omuenyo oko kilu okuti katufi ale liokukala vofeka yelau palo posi, olusapo lua Yesu lulomboloka okuti tukuete okulitumbika vali calu kupange wetu Tuakristão. Kuenje, ondaka yatiamẽla kolusapo olu citava okuyiteta onimbu vondaka yimosi yokuti: okulavulula. Okupisa kunyamo wa 33 K.K. ko Pendekoste ovapostolo vaeca ongangu yiwa. Tutanga ndoco: “Lolondaka vialua vikuavo, [Petulu] wa va peya, hati, Lipopeli kocitumbulukila eci cehungu.” (Ovilinga 2:40–42) Omo liaco hesanjukuolio eye akuata omo liokulikolisilako kuaye! Ndeci cakala apostolo vakongeliwa kupange Wakristão wokukunda, ovo valavuluilevo, kueci catiamẽla kolondaka viwa viusoma vikasi ‘okuamamako lokulivokiya voluali luosi.’−Va Kolosai 1:3–6, 23; 1 Va Korindo 3:5–9.

15. Vonepa ye yilikasi yatiamẽla kolusapo luolombongo okuti te tuyikuama?

¹⁵ Kuata elomboloko liolusapo olu−oluo ocitumasuku catiamẽla kokuiya kua Yesu. Tuakuliha ciwa okuti o pa.rou.si’a okuiya kua Yesu kukasi ocipepi kuenje onjongole yaye ndopo muẽle yikatẽlisiwa. Ivaluka olondaka viapopia Yesu viatiamẽla ‘kesulilo’ kuenda upange Akristão vakuete okulinga: “Olondaka evi viwa viusoma vikundiwila koluali luosi oco vilinge uvangi kolofeka viosi, noke kuiya esulilo.” (Mateo 24:14, NW) Lolondaka evi vutima, tuatiamẽla kapika vakasi ndati? Lipulisa ove muẽle ndoco: ‘Kuli hẽ esunga liokupopia okuti ndikasi ndupika wasoleka olombongo vowiha, pole wakala okutẽlisa olonjongole viaye muẽle? Ale ndikasi ndomanu vana vakuatele ovituwa viwa kuenda ekolelo? Ndanõlapo hẽ onjila yokuvokiya kupange Wacime olonjanja viosi?’

Okulunguka Lokulavulula Vokuenda Kuotembo Yokutukuluka Kuaye

16. Ondaka ye tualilongisa yatiamẽla kolosapo vivali okuti okuete okuyikuama?

¹⁶  Ocili okuti, lokukapela ponẽle elomboluilo liaye liocindekaise, olosapo evi vivali vituiha elomboloko likolisa litunda vomẽla wa Yesu. Eye wapopia hati: Lunguki; kuenda lavululi, capiãla vali enene eci ondimbukiso yo pa.rou–si’a okuti okuiya kua Kristu yimõlẽha. Otembo yaco oyo muẽle yilo. Tukasi hẽ okulavulula kuenda tualunguka?

17, 18. Elungulo lie liaeca ondonge Tiago liatiamẽla kokuiya kua Yesu?

¹⁷ Tiago manji ya Yesu kaendele Komunda yo Oliveira okukayevelela ovitumasuku via Yesu; pole noke eye weya okuvikuliha, kuenda weya okuvikuama. Eye wasoneha ndoco: “Oco, a vamanjange, pandikisi toke Ñala iya. Ivaluki okuti ongunja yi talamela ovaima a laika oku u tekula, toke a tunda posi, yi a kuetele epandi toke a lokiwa lohalula lombela ya kupupu. Lenevo pandikisivo. Pami vovitima, momo etukuluko lia Ñala li kasi ocipepi.”−Tiago 5:7, 8.

¹⁸ Lokukuliha okuti Suku okasombisa ndomo muasunguluka vosi vanyõlẽla ovohuasi avo kovina kavisilivila, Tiago wavetiya Akristão oco vakuate epandi osimbu vakevelela eteke lia Yehova. Ukristão kakuete epandi citava okuti olipanda noke ofetika okulitunula lokupopia hati otẽla okupengulula cosi civi cilingiwa. Kacasungulukile okukuata ocituwa eci, momo otembo yesombiso yikasi ocipepi. Ongangu yukuakulima oyo yicilekisa ndomo Tiago acilombolola.

19. Epandi lie liakuata umue u Isareli ukuakulima?

¹⁹ Umue u Isareli ukuakulima wakula ombuto wakevelela toke eci kuamõlẽha tete amẽla, kuenje ovikula viayela, kuenda noke kueya otembo yokungula. (Luka 8:5–8; Yoano 4:35) Vokuenda kuolosãi evi viokukevelela citava okuti kuapita otembo yalua kuenda eye wakala lasakalalo. Anga hẽ ombela yatete yikeya selo kuenda yikaloka calua? Ombela yikeya noke yikakala ndati? Ovipuka lofela vikanyõla hẽ ovikula? (Cisokisa la Yoeli 1:4; 2:23–25.) Omo liaco, u Isareli ukuakulima wakuatele ekolelo la Yehova kuenda wakolelele kombela yapangiwa laye. (Esinumuilo 11:14; Yeremiya 5:24) Epandi liukuakulima liokuatisa oco akolele cocili kelavoko liaye. Omo akuatele ekolelo liocili wakulihile okuti eci akala okukevelela cikeya muẽle ocili. Wakulihile okuti cikeya muẽle!

20. Tupondola ndati okulekisa epandi ndomo calekisiwa velungulo lia Tiago?

²⁰ Ndaño ukuakulima opondola okukuliha otembo yokungula, Akristão vokocita catete kavakapele eteke liokuiya kua Yesu. Pole, okuiya kuaco kuatẽlisiwa muẽle. Tiago wasoneha ndoco: “Etukuluko lia Ñala [kelimi lio Helasi, pa.rou.si’a] li kasi ocipepi.” Otembo Tiago asoneha olondaka evi, ondimbukiso yokutiuka kua Kristu kayakulihiwile handi voluali luosi. Pole uvangi ulekisa okuti yilo oyo otembo yaco! Omo liaco tuliyeva ndati otembo yilo? Ondimbukiso kaliye yikasi okumõlẽhá. Tuyilete. Tupondola okupopia ohuminyo yokuti: ‘Ndilete ondimbukiso yikasi okuamamako.’ Etu tupondola okupopia okuti: ‘Etukuluko lia Ñala likasi muẽle ocipepi.’

21. Nye tuanõlapo okulinga?

²¹ Omo okuti okuiya kua Ñala kuafetika ale okumõlẽha, tukuete esunga liocili liokutava kuenda okukuama lutate ovipama viavelapo tuamãla ndeti okukulihisa viatiamẽla kolosapo vivali vialongisiwa la Yesu. Eye wapopia hati: “Oco lavululi, momo ka wa kulihili eteke liaco, ndaño ekumbi.” (Mateo 25:13) Yilo oyo otembo yavelapo vali kokuetu yokukuata ombili kupange wetu Tuakristão. Eteke leteke komuenyo wetu tukuati elomboloko lieci Yesu alongisa. Tulunguki! Tulavululi!

[Etosi pombuelo yemela]

◻ Ondaka ye yavelapo yatiamẽla kafeko valunguka kuenda afeko aveke okuti oyo opondola okulilongisa?

◻ Kelomboloko liolusapo luolokondu, elungulo lie liavelapo Yesu aeca kokuove?

◻ Vonepa ye epandi liove liatiamẽla ko pa.rou.si’a likasi ndeli lialekisa u Isareli ukuakulima?

◻ Momo lie otembo tukasi cilo yalingila yesakalalo kuenda yovitangi?

[Alitalatu kemela 31]

Nye opondola okulilongisa catiamẽla kolusapo luafeko kuenda luolombongo?