Embimbiliya li Pondola Oku Eca Ekuatiso Kolohuela Viove
OLOHUELA ondaka yimue okuti komanu vamue yi vetiya ovisimĩlo vina viwa haivio vi koka esanju. Pole, komanu vakuavo ondaka yaco yi vala kutima. Ukãi umue wa liyeya hati: “Nda yeva evalo lialua kutima wange okuti lia lisoka levalo liomunu una wa nyaliwa. Olonjanja viosi ndi liyeva okuti ka va ndi kapeleko kuenda ndi kasi ulika.”
Nye ci pondola oku nyõla ocisola comanu vavali cina ovo va likuminya pokati haivo va likuetele onjongole yocili? Cimue pokati kovina vialua ekambo lioku kuata ukũlĩhĩso weci ci lomboloka olohuela. Umue ukuakueca esapulo liatiamẽla kuloño woku sakula wa lombolola hati: “Etu cilo tua kuela, pole ka tu kuete elomboloko lalimue liatiamẽla kolohuela.”
Ndomo ca lomboluiwa vekonomuiso limue lia lingiwa li tukuiwa okuti, Projeto Nacional sobre o Casamento, Kosikola Yavelapo yi tukuiwa hati, Rutgers kolupale luo New Jersey kofeka yo Estados Unidos, koloneke vilo omanu ka valuile va kũlĩha eci ci lomboloka olohuela. Umue kesongo kupange waco wa lombolola hati: “Omanu valua vatiamẽla kupange waco woku konomuisa eci ci lomboloka olohuela va kulila volohuela vimue okuti ka via litundile ciwa, ale vepata liolonjali vina via linyala. Ovo va kũlĩha ciwa eci ci lomboloka olohuela vina vi kuete ovitangi pole, ka va kũlĩhĩle eci ci lomboloka olohuela vina viwa okuti ka vi kuete ovitangi. Vamue va pondola lika oku eca elomboluilo liolohuela viwa ndoco; “ocina cimue ca litepa leci nda siata oku mõla vepata liange.”
Anga hẽ Akristão ka va siatele oku kuata ovitangi viatiamẽla kolohuela? Sio hacoko. Akristão vamue kocita catete va sukilile elungulo oco ka va ka sandiliye onjila ‘yoku panduluka’ kolohuela viavo. (1 Va Korindo 7:27) Olohuela viomanu vavali ka va lipuile ocili okuti olonjanja vimue vi kuata ovitangi, pole etu tu pondola oku sanga ekuatiso. Alume kuenda akãi va likuele va pondola oku pamisa elitokeko liavo poku kapako komuenyo wavo olonumbi vina vi sangiwa Vembimbiliya.
Ocili okuti, Embimbiliya helivuluko limue lia sonehiwila lika oku eca olonumbi viatiamẽla kolohuela. Omo okuti Vembimbiliya mu sangiwa olondaka vina via eciwa la Una wa sovola olohuela, etu tua li kolela okuti li pondola oku tu kuatisa calua. Lekuatiso liuprofeto Isaya Yehova Suku wa popia hati: “Ame ndi Yehova Suku yove, hu longisa eci ci ku kuatisa, hu songuila vonjila ya ku sungulukila. Nda wa yevelile ovihandeleko viange! Nda ombembua yove nda ya lingile ndolui, kuenda esunga liove ndapuku okalunga.”—Isaya 48:17, 18.
Anga hẽ ocisola cina ca kala pokati kene ca fetika oku tepuluka? Ove hẽ o li yevite ndomunu umue o kasi oku wila vociliva colohuela vina ka vi kuete ocisola? Ukãi umue o kuete ale eci ci soka 26 kanyamo tunde eci eye a kuela wa lombolola hati: “Evalo omunu a pondola oku yeva volohuela ndevi, ka ca lelukile oku li lombolola. Eci ocina cimue ci kala kutima womunu olonjanja viosi kuenje ka ca lelukile oku tunda kutima.” Oco ku ka tave lika olohuela ndevi, okuti ka vi pondola oku tẽlisa eci o yongola, momo lie ku likolisilako oku lingako cimue? Ocipama ci kuãimo cika eca olonumbi vina vi sangiwa Vembimbiliya viatiamẽla kolohueli cikale kakãi ale kalume okuti vi pondola oku eca ekuatiso kokuavo.