‘Olondaka Via Yehova’ vi ka Tẽlisiwa
“Njimba oluiya lua Yehova. Eye wa popia lame hati, Ove wumõlange . . . Minge, kuenje hu iha olofeka ha vi lingi ocipiñalo cove.”—OSAMO 2:7, 8.
1. Oku litepa kupi ku kasi pokati kocipango ca Suku leci colombiali?
YEHOVA SUKU o yongola oku tẽlisa ocipango caye palo posi. Olombiali vi yongolavo oku tẽlisa ocipango cavo. Pole, ocipango ca Yehova leci colombiali ca litepa calua. Esunga liaco, tu li sanga volondaka via Suku eci a popia hati: “Ndeci ilu li kasi kupãla longongo haico ovituwa viange vi kasi kupãla lovituwa viene, lovisimĩlo viange vi kasi kupãla lovisimĩlo viene.” Ocipango ca Suku cika tẽlisiwa muẽle momo eye wamisako hati: “Ndeci ombela la neve vi tunda kilu, kuenje ka vi tiukilako, puãi vi tapela ongongo loku yi yovisa, okuti yeca ombuto kukuakukũla, kuenda okulia kukuakulia, haico ondaka yange yi tunda vomẽla wange; ka yi tiukila ño kokuange, puãi yi linga ndeci nda panga oku tẽlĩsa, leci nda yi tumĩla.”—Isaya 55:9-11.
2, 3. Osamo yavali yi lekisa nye catiamẽla Kusoma wa Mesiya? Kuenda apulilo api a votuiwa?
2 Osamo yavali yi lekisa okuti ocipango ca Suku catiamẽla Kusoma wa Mesiya, cika tẽlisiwa muẽle. Soma Daviti eye wa soneha Osamo yaco. Eye wa vetiyiwa lespiritu sandu oco a sonehe eci catiamẽla kotembo olombiali violofeka vi tumbikila ongombo Yehova Suku kuenda Ombuavekua yaye. Pole ukualosamo wa imbavo hati: “Njimba oluiya lua Yehova. Eye wa popia lame hati, Ove wumõlange . . . Minge, kuenje hu iha olofeka ha vi lingi ocipiñalo cove, lasukiyo oluali ha a lingi ocitumalo cove.”—Osamo 2:7, 8.
3 “Oluiya lua Yehova” lu lomboloka nye kolombiali? Kuenda lu lombolokavo nye komanu vosi? ‘Oluiya luaco’ lu lombolokavo nye komanu vana va sumba Suku?
Olofeka Viongoloka
4. O tẽla hẽ oku lombolola atosi a velapo a sangiwa Vosamo 2:1, 2?
4 Ukualosamo wa lekisa ovilinga viomanu vakualofeka lolombiali viavo. Eye wa imba hati: ‘Olofeka vi ongolokela nye? Omanu vaco va sokoluila nye eci cesanda? Olosoma viokilu lieve via lipongiya. Olombiali vi tumbikila ongombo Yehova lombuavekua yaye.’—Osamo 2:1, 2.a
5, 6. Vakualofeka va kasi oku ‘sokolola’ ovina vipi ‘viesanda’?
5 Ovina vipi ‘viesanda’ omanu vakualofeka va kasi oku ‘sokolola’? Vakualofeka ka va tava ku Kristu, Ombuavekua ya Suku. Pole, va kasi oku ‘sokolola’ onjila yoku amisako ovoviali avo. Olondaka Viosamo eyi yavali via tẽlisiwa kocita catete, eci olombiali vioko Roma la va Yudea va tunga ongombo yoku ponda Yesu Kristu Soma wa nõliwa la Suku. Pole oku tẽlisiwa kua velapo kuolondaka evi kua fetika kunyamo wo 1914 eci Yesu a tumbikiwa Kusoma, oko kilu. Toke cilo, lacimue ocisoko copulitika ca tava oku pokola Kosoma ya tumbikiwa la Suku.
6 Ukualosamo wa popia hati, omanu vakualofeka va kasi oku ‘sokolola ovina viesanda.’ Eci ci lomboloka nye? Eci ci lomboloka okuti cosi omanu vaco va sima, ka ci tẽlisiwa. Ovo ka va ka tẽla oku nena ombembua lelitokeko pokati komanu. Pole va kasi handi oku amamako oku tamãlala. Kuenda ka va yongola oku pokola kuviali wa Suku. Ovo va liongolola kuenje va tungila ongombo Suku Tõlo kuenda Ombuavekua yaye. Pole, eci va kasi oku linga uveke.
Yehova Eye Osoma ya Velapo
7. Vohutililo olondonge via tiamisila ndati ku Yesu olondaka Viosamo 2:1, 2?
7 Olondonge via Yesu via tiamisilile Osamo 2:1, 2 kokuaye. Eci va pitile velambalalo omo liekolelo liavo, va likutilila hati: ‘A Suku, a Cime cetu, ove wa lulika ilu, losi, lokalunga, lovina viosi vi kasimo, haive wa popia lespiritu sandu lomẽla wukuenje wove Daviti, kukululu yetu, hati, Olofeka hẽ, via yuelela nye? Omanu vaco va sokoluila nye ovina viesanda? Olosoma viokilu lieve via lipongiya. Olombiali via tumbikila ongombo Ñala Yehova lombuavekua yaye. Herode, la Pondiu Pilato la vakualofeka, lomanu va Isareli, vongolokela Ukuenje wove o kola, okuti Yesu una ove wa waveka.’ (Ovilinga 4:24-27; Luka 23:1-12)b Olondaka evi vi lekisa okuti, kosimbu eci Yesu a kala palo posi, ovanyãli vaye vo suvukile calua. Pole, olondaka via sonehiwa Kosamo eyi, vi kasi oku tẽlisiwavo koloneke vilo.
8. Osamo 2:3 yi tiamisiwila ndati kolombiali viokoloneke vilo?
8 Kosimbu, eci pokati ka va Isareli pa tumbikiwile osoma, vakualofeka va enda loku tungila ongombo osoma yaco ya tumbikiwa la Suku oco va yi lundule. Anga hẽ otembo yilo omanu oco va siata oku lingavo? Olombiali violofeka koloneke vilo, ka vi yongolavo oku pokola kovihandeleko via Yehova ndaño ku Mesiya. Pole vi kasi oku popia hati: “Tu soyoli apanda avo. Ovikolo viavo tu vi inasi.” (Osamo 2:3) Ocihandeleko cosi ci tumbikiwa la Suku kuenda Lombuavekua yaye, olombiali ka vi ci tava. Pole, alikolisilo avo poku likala oku pokola ku Suku kuenda Kombuavekua yaye ka a ka tẽlisiwa.
Yehova o Pembula Olombiali
9, 10. Momo lie Yehova a yolela epembe olombiali violofeka?
9 Yehova ka sakalala lolombiali vi yongola oku tumbika uviali wavo. Momo osamo yavali yamisako hati: “U o kasi kilu o yola. Yehova o va pembula.” (Osamo 2:4) Suku amamako oku tẽlisa ocipango caye. Kokuaye ci kasi ño soketi olombiali viaco ka vi kasiko. Suku Tõlo o va yola epembe omo liepela liavo lioku yaka Laye. Ovo va lipandela ovisimĩlo viavo. Pole ku Yehova ovo va kasi ño ndocina cimue ci koka ovinjola. Eye o va yola, momo elikolisilo liavo ka li kuete esilivilo.
10 Kosamo yikuavo, Daviti o tiamisila olondaka viaye kovanyali va Suku poku popia hati: “Ove muẽle, a Yehova Suku yolohoka, ove u Suku ya Isareli. Votoka oku yambula olofeka viosi. Ku ka kuatele ohenda olondingaĩvi via tumba ahãla usuanji. Va tiuka oñolosi, va kukola ndolombua. Va ñuala ñuala vimbo. Vakuakututuma kovimela. Va kasi lolosipata vovimela viavo. Va linga vati, O ci yeva helie? Ove puãi, a Yehova, o va yola epembe. O fuanguila olofeka viosi.” (Osamo 59:5-8) Yehova o yola vakualofeka omo lioku litunula kuavo kuenda omo lioku seteka kuavo oku yaka laye.
11. Nye ci ka pita lolombiali vi kasi oku tateka ocipango ca Yehova?
11 Osamo yavali yi pamisa ekolelo lietu liokuti Suku o tẽla oku tetulula ovitangi viosi. Etu tua kolela muẽle okuti Suku otembo yosi o tẽlisa ocipango caye. Kuenda eye lalimue eteke a ivalako afendeli vaye vo kolela. (Osamo 94:14) Oco hẽ nye ci ka pita lolombiali vina vi kasi oku tateka ocipango ca Yehova? Osamo eyi yi lekisa okuti, Suku “o popia lavo loku tema, kuenje o va lingisa usumba lonyeño yaye ya lua.”—Osamo 2:5.
Suku wa Tumbika Osoma Yaye
12. Osoma ya tukuiwa Kosamo 2:6 ya vialekiwa pi?
12 Olondaka via kuamamo via Yehova via sumuisa calua vakualofeka. Yehova wa popia hati: “Nda kapa osoma yange komunda yange yi kola, Siono.” (Osamo 2:6) Omunda Siono, oyo ya lepele vali calua ko Yerusalãi. Ko Yerusalãi oko Daviti a vialekiwile oco a kale osoma ya va Isareli. Pole Osoma ya tukuiwa Vosamo eyi, ka yi ka viala ko Yerusalãi ale kimbo limue likuavo palo posi. Yehova Suku, wa tumbika ale Yesu Kristu Osoma yaye komunda Siono oko kilu.—Esituluilo 14:1.
13. Ocisila cipi Yehova a linga Lomõlaye?
13 Yesu Mesiya kaliye o vangula. Eye wa popia hati: “Njimba oluiya lua Yehova [una wa linga ale ocisila Cusoma Lomõlaye]. Eye wa popia lame hati, Ove wumõlange. Etali nda ku cita.” (Osamo 2:7) Yesu wa tukula ocisila Cusoma eci a sapuila olondonge viaye hati: “Ene, ene wa pandakaisi lame eci nda nyikaiwa. Oco, ndeci Tate a nukuila usoma haico ndu tukuili usoma.”—Luka 22:28, 29.
14. Nye tu popela okuti Yesu okuete omoko yoku kala osoma?
14 Olondaka Viosamo 2:7, vieya oku tẽlisiwa kepuluvi liepapatiso lia Yesu. Eci Yehova a linga hati, Ove wumõlange wa soliwa. Kuenda vieya oku tẽlisiwavo eci Yehova a pindula Yesu kolofa okuti wa linga omunu wespiritu. (Osamo 2:7; Marko 1:9-11; Va Roma 1:4; Va Heveru 1:5; 5:5) Yesu Omõla wongunga eye Osoma Yuviali wa Suku. (Yoano 3:16) Yesu okuete omoko yoku kala Osoma. Momo eye ukuambuto ya Daviti una wa kalavo osoma. (2 Samuele 7:4-17; Mateo 1:6, 16) Volondaka Viosamo eyi, Suku wa sapuila Omõlaye hati: “Minge, kuenje hu iha olofeka ha vi lingi ocipiñalo cove, lasukiyo oluali ha a lingi ocitumalo cove.”—Osamo 2:8.
15. Momo lie Yesu a pingila olofeka oco vi linge ocipiñalo caye?
15 Yesu Kristu okuti eye Soma wa nõliwa, koku viala kuaye o likuete omunga la isiaye Yehova. Yesu wa nyikiwa olonjanja vialua kuenje Yehova wa limbuka okuti wa koleliwa muẽle. Handi vali, Yesu eye Omõla Uveli wa Suku. Embimbiliya li popia hati: “Eye esetahãlo lia Suku u ka muiwa lovaso, haeye uveli pokati koviluvo viosi.” (Va Kolosai 1:15) Ovina viosi Yesu a pinga, ku Suku eye u vĩha. Kuenje wo ‘wiha olofeka ha vi lingi ocipiñalo caye. Lasukiyo oluali ha a lingi ocitumalo caye.’ Yesu wa linga epingilo eli omo okuti eye wa ‘sanjukila omãla vomanu.’ Kuenda o yongola oku tẽlisa ocipango ca Isiaye palo posi.—Olosapo 8:30, 31.
Yehova wa Temẽla Olofeka
16, 17. Nye ci ka pita lolofeka ndomo ca lekisiwa Vosamo 2:9?
16 Olondaka Viosamo yavali vi kasi oku tẽlisiwa otembo yilo. Momo Yesu wa fetika ale oku viala oko kilu. Oco hẽ nye olofeka vi lavoka? Soma ndopo oka tẽlisa olondaka via Suku eci a popia hati: “O va teya lepangati liutale. O va nyanyõla ndelonga liutungi wolombia.”—Osamo 2:9.
17 Epangati liutale kosimbu, lia kala ocindekaise comoko yoku viala. Kua kala apangati utale, ndeli lia tukuiwa ndeti Vosamo eyi. Upopi wa tukuiwa Vosamo eyi, u lekisa ndomo Yesu Kristu aka kundula lonjanga olofeka. Ombia yotuma nda ya vetiwa lepangati liutale, yi nyanyõha yosi. Kuenda ka ci tava vali oku yi tokeka. Cimuamue haico Yesu a ka linga la vana ka va pokola ku Suku.
18, 19. Nye olombiali violuali vi sukila oku linga oco vi taviwe la Suku?
18 Anga hẽ lacimue olombiali violofeka vi pondola oku linga oco vi puluke kenyõleho liaco? Kuli, momo ukualosamo o va vetiya hati: “Ene alosoma, kaliye, kuati olondunge. Lunguki, alonganji violuali.” (Osamo 2:10) Olosoma vi vetiyiwa oco vi kuate olondunge. Ovio vi sukila oku limbuka okuti ovisimĩlo viavo via litepa calua leci Usoma wa Suku uka lingila omanu.
19 Oco olombiali vi taviwe la Suku, vi sukila oku pongolola ovisimĩlo viavo. Ovio vi vetiyiwa oku ‘Vumba Yehova lusumba loku luluma.’ (Osamo 2:11) Oco hẽ nye cika pita lolosoma nda via tava oku pokola kolondaka evi? Nda via liwekapo oku sokolola ovina viesanda, vika tambula asumũlũho a tunda Kusoma wa Mesiya. Pole vi sukila tete oku siapo ocituwa coku livelisapo va siata oku lekisa kovoviali avo. Vi sukilavo oku kuata olondunge, oco vi limbuke okuti uviali wa Yehova owo wa velapo. Kuenda unene wa Suku lowu wa Soma yaye Mesiya, wa velapo okuti lomue o tẽla oku yaka lavo.
‘Sipuli Omõla wa Suku’
20, 21. Oku ‘sipula omõla wa Suku’ ci lomboloka nye?
20 Osamo yavali kaliye yeca elaleko liohenda kolosoma violuali oco vi liwekepo oku tungila ongombo Yehova Lombuavekua yaye. Oyo yi va laleka hati: ‘Sipuli olomãhi viomõla sanga Yehova Suku o tema. Kuenje vu nyõlẽhela vonjila, omo onyeño yaye yi wenguka lombili.’ (Osamo 2:12a) Omanu va sukila oku pokola koluiya lua Yehova Suku. Eci Eye a tumbika Omõlaye kusoma, olombiali violuali vio tungila ongombo. Kuenje via fetika oku ‘sokolola ovina viesanda.’ Suku o yongola okuti ovo va tava kuenda va pokola Kosoma yaye.
21 Momo lie olombiali vi sukilila oku ‘sipula omõla wa Suku’? Eci ukualosamo a soneha osamo eyi, oku li sipula kua siatele calua pokati kakamba. Kuenda ca kala ocituwa cimue coku tambula akombe lesanju. Oku li sipula kua kalavo ocindekaise coku likolela pokati. (1 Samuele 10:1) Vocinimbu eci cosamo yavali, Suku o vetiya olombiali violofeka oco vi yolele Omõlaye wa vialekiwa Kusoma.
22. Olombiali violofeka vi sukila oku pokola kelungulo lipi?
22 Vosi ka va tava oku pokola ko Soma ya tumbikiwa va wengula onyeño ya Yehova Suku. Momo va likala uviali wa Yehova Suku. Kuenda ka va lekisa esumbilo lekolelo kolondunge Viaye vioku nõla Osoma yiwa omanu va sesamẽla. Olombiali violuali nda ka via liwekelepo oku sokolola ovina viesanda, Suku oka vi nyõla lonyeño yaye ya piãla. “Onyeño yaye yi wenguka lombili.” Omo liaco, olombiali violuali vi sukila oku tava kelungulo eli kuenda oku pongolola ovisimĩlo viavo. Nda va ci linga, ka vaka nyõliwa.
23. Olombiali lomanu va kuete handi otembo yoku linga nye?
23 Osamo eyi, yi malusula lolondaka viti: “Vosi va wunda [ku Yehova] va sumũlũha.” (Osamo 2:12b) Olombiali lomanu va kuete handi otembo yoku sanga epopelo. Ovo ci tava okuti va tilila ku Yehova. Kuenje va sanga ociwundilo Vusoma waye. Pole te va ci linga muẽle cilo, osimbu handi Soma Mesiya ka nyõlele vana ka va pokola ku Suku.
24. Nye tu sukila oku linga oco omuenyo wetu wende ciwa?
24 Tu kasi voluali lueyuka ovitangi. Pole, nda tua likolisilako oku tanga Embimbiliya loku kapako alungulo alio, omuenyo wetu uka enda ciwa. Oku kapako olonumbi Viembimbiliya ci kuatisa apata oku kala lombembua. Kuenda ci yovola omanu kusumba wovitangi vi kasi oku veta omanu koloneke vilo. Oku kuama ovihandeleko Viembimbiliya ci tu ĩha ekolelo liokuti tu kasi oku sanjuisa Ululiki wetu. Yehova eye lika o tẽla oku tu ĩha ‘omuenyo uwa cilo kuenda owu u laika okuiya.’ Pole tete, oka nyõla omanu vosi ka va tava oku linga esunga haivo ka va pokola Kusoma waye.—1 Timoteo 4:8.
25. Omo okuti “oluiya lua Yehova” luka tẽlisiwa muẽle, nye tu lavoka kotembo yilo?
25 “Oluiya lua Yehova” luka tẽlisiwa muẽle. Yehova Suku, omo okuti eye Ululiki, wa kũlĩha eci ciwa omanu va sukila. Kuenje oka tẽlisa ocipango caye coku sumũlũisa omanu va pokola kokuaye, oco va kuate ombembua, lesanju Vusoma Womõlaye o soliwe. Catiamẽla kotembo yetu, uprofeto Daniele wa popia hati: “Koloneke violosoma viaco, Suku yokilu o katula usoma, kuenje ka u nyolẽha, . . . puãi owo u nyõla loku lia ovosoma aco osi, haiwo u kala muẽle hũ oloneke ka vi pui.” (Daniele 2:44) Omo liaco, yilo oyo otembo yoku ‘sipula omõla wa Suku’ kuenda oku vumba Yehova Suku.
[Atosi pombuelo yamẽla]
a Kefetikilo, Soma Daviti wa kala “ombuavekua” kuenda “Olosoma viokilu lieve” va kala olombiali via va Filisiti, vana va yaka laye.
b Ovisonehua vikuavo vio Helasi vi lekisavo okuti Yesu eye muẽle Ombuavekua ya Suku wa tukuiwa Kosamo yavali. Eci ci limbukiwila poku sokisa Osamo 2:7 leci ca sonehiwa kelivulu Liovilinga 13:32, 33 kuenda kelivulu lia Va Heveru 1:5; 5:5. Talavo Osamo 2:9 kuenda Esituluilo 2:27.
O Tambulula hẽ Ndati?
• Ovina vipi ‘viesanda’ omanu vakualofeka va kasi oku ‘sokolola’?
• Momo lie Yehova a pembuila olombiali?
• Oluiya lupi Suku a kasi oku eca komanu?
• Oku ‘sipula omõla wa Suku’ ci lomboloka nye?
[Ociluvialuvia kemẽla 16]
Daviti wa imba ocisungo catiamẽla keyulo lia Soma Mesiya
[Ociluvialuvia kemẽla 17]
Olombiali la va Isareli va suvukile Yesu
[Ociluvialuvia kemẽla 18]
Kristu wa vialekiwa komunda Siono oko kilu