Ondaka ya Yehova yi Kasi Lomuenyo
Atosi Avelapo Vonepa Yatete Yelivulu Liolosamo
ELIVULU li lombolola olondaka viesivayo lia Yehova Ululiki wetu, li sesamẽla osapi yipi? Li sesamẽla osapi ya sunguluka okuti, Olosamo. Osamo yi lomboloka esivayo. Elivulu Liolosamo li kuete ovisungo via fina vi situlula ovituwa via Yehova kuenda ovilinga vikuavo vi komohĩsa. Li lombololavo ovitumasuku vialua Viembimbiliya. Onepa yalua yovisungo vi sangiwamo, vi situlula esumuo liasonehi vaco eci va tala ohali. Ovisungo viaco via sokiyiwa vokuenda kuohulukãi yanyamo, okupisa kotembo ya Mose toke kumandekua wa va Isareli. Elivulu Liolosamo lia sonehiwa la Mose, la Daviti kuenda asonehi vakuavo. Olonoño via siata oku popia hati, ocitunda Esera eye wa soneha ovipama via sulako vielivulu Liolosamo.
Elivulu Liolosamo lia tepiwa volonepa vitãlo. Onepa yatete, yupisa Kosamo 1 toke 41. Yavali, yupisa Kosamo 42 toke 72. Yatatu, yupisa Kosamo 73 toke 89. Onepa yakuãla, yupisa Kosamo 90 toke 106. Kuenda yatãlo, yupisa Kosamo 107 toke 150. Vocipama cilo, tu konomuisa onepa yatete. Soma Daviti eye wa soneha ovipama viosi vionepa yatete. Pole, volonepa viaco mu sangiwa vimue vitatu, okuti hayeko wa vi soneha. Asonehi Vosamo yatete, leyi yekũi kuenda yakũi atatu latatu, ka va tukuiwile.
‘SUKU YANGE, EYE EWE LIANGE’
Osamo yatete yi popia hati, omunu wosi o sanjukila ovihandeleko via Yehova wa sumũlũha. Yavali ya tukula eci catiamẽla Kusoma.a Vonepa eyi yolosamo, mu sangiwa olondaka vialua violohutililo via lingiwa ku Suku. Osamo 3 toke 5, 7, 12, 13 kuenda 17, vi lombolola olohutililo viekuatiso lioku popeliwa kovanyãli. Osamo 8, yi lombolola okuti, unene wa Yehova ka u sokisiwa lowu womanu.
Daviti poku lombolola catiamẽla ku Yehova okuti o teyuila omanu vaye, wa imba ocisungo hati: ‘Suku yange, eye ewe liange, kokuaye oko ndi vunda.’ (Osamo 18:2) Osamo 19, yeca esivayo ku Yehova Ululiki haeye Ukuavihandeleko. Osamo 20, yi tukula Yehova okuti, eye Onjovoli. Kuenda Osamo 21, yi popia hati, Yehova eye Onjovoli ya Yesu ombuavekua yaye. Osamo 23, yi popia hati, Yehova eye Ungombo Wavelapo. Kuenda Osamo 24 yi popia hati, Yehova eye Osoma yulamba.
Atambululo Kapulilo Embimbiliya:
2:1, 2—‘Ovina vipi viesanda’ olofeka via siata oku sokolola? ‘Ovina viesanda,’ vi lomboloka oku sakalala loku amamako luviali wavo. Esakalalo liaco ka li silivila. Momo olombiali lalimue eteke vika tẽlisa olohuminyo viavo. Anga hẽ olombiali vi lavoka oku yula poku tumbikila ongombo Yehova kumue lombuavekua yaye’?
2:7—“Oluiya lua Yehova” lu lomboloka nye? Lu lomboloka ocisila Cusoma Yehova a linga Lomõlaye Yesu Kristu.—Luka 22:28, 29.
2:12—Olombiali violuali vi pondola ndati oku ‘sipula omõla’? Kosimbu, oku eca esipulo, kua kala ondimbukiso yukamba kuenda oku koleliwa. Esipulo lia kalavo ondimbukiso yoku yolela akombe. Olombiali violuali, vi kasi oku vetiyiwa oku sipula Omõla. Oku sipula kuaco ku lomboloka oku limbuka Mesiya okuti eye Soma.
3:—Olondaka vi sangiwa kefetikilo Liolosamo vimue vi kuete esilivilo lie? Vi kuete esilivilo lioku situlula onduko yusonehi Wosamo yaco. Vi lekisavo ekalo liotembo Osamo yaco ya sonehiwa, ndomo ca lomboluiwa Kosamo 3. Olondaka viaco, vi lombololavo esilivilo Liosamo yaco ndeci osamo 4 leyi ya 5. Kuenda yecavo olonumbi viocisikilo caco ndomo ca lomboluiwa Vosamo 6.
11:3—Oviseveto vipi vi nyõleha? Oviseveto vi nyõleha, vi lomboloka ovihandeleko viomanu kuenda olonumbi viavo. Eci vofeka yimue muiya ovitangi, omanu ka va pokola vali kovihandeleko. Kuenje, ka ku kala vali esunga. Pole, vakuesunga va kolela lika ku Yehova.—Osamo 11:4-7.
21:3—“Ekolowa liulu wa fina” li lomboloka nye? Embimbiliya ka lilombolola nda ekolowa liaco lia Daviti lioku yula ovanyali vaye lia kala liocili ale liocindekaise. Pole, ovinimbu evi Viembimbiliya, vi lombolola ekolowa Yesu a tambula kunyamo wo 1914, eci a tumbikiwa komangu yuviali kilu. Ekolowa liaco poku pangiwa lulu, ci lomboloka okuti usoma wa Yesu owo lika wa velapo.
22:1, 2—Momo lie Daviti a simĩlile hati Yehova wo yanduluka? Daviti wa simĩle okuti Yehova wo yanduluka omo lielambalalo liovanyali vaye. Kuenje ‘utima waye wa kala ndesela, wa yenguluka vokati kaye.’ (Osamo 22:14) Eye wa simĩle okuti, Yehova wo yanduluka. Eci Yesu a talisiwa ohali, wa liyakavo locitangi caco. (Mateo 27:46) Olondaka via Daviti, vi lomboloka esumuo a kuatele eci a tala ohali. Pole, ohutililo Daviti a linga Vosamo 22:16-21, yi lekisa okuti, ka puile ekolelo ku Suku.
Ceci tu Lilongisilako:
1:1. Tu sukila oku yuvula ukamba la vana ka va vumbi Yehova.—1 Va Korindo 15:33.
1:2. Tu sukila oku konomuisa ovina viespiritu oloneke viosi.—Mateo 4:4.
4:4. Nda tu kasi lonyeño, tu sukila oku likandangiya oco ka tuka popie ondaka yimue okuti noke yi tu sumuisa.—Va Efeso 4:26.
4:5. Ovilumba vietu vi taviwa lika la Yehova nda tu vieca lutima wa sunguluka loku lekisa ovituwa viwa kuenda oku pokola kolonumbi viaye.
6:5. Oku sivaya Yehova ku tu kuatisa oku amamako lomuenyo.—Osamo 115:17.
9:12. Yehova o yambula vana va pesela osonde. Pole, ivaluka “oku liyula kuomanu va talisiwa ohali.”
15:2, 3; 24:3-5. Afendeli va Yehova, va sukila oku vangula ocili kuenda oku yuvula uhembi.
15:4. Tu sukila oku tẽlisa olohuminyo vietu ndaño okuti olonjanja vimue ka ca lelukile.
15:5. Etu tuafendeli va Yehova tu sukila oku lunguka oco tu kũlĩhe ndomo tu talavaya lolombongo vietu.
17:14, 15. Koloneke vilo, omanu va sakalala lika loku sanda ovokuasi, oku tekula epata liavo kuenda oku sia ovipiñalo. Pole, Soma Daviti wa sakalalele loku sanda onduko yiwa kovaso a Yehova. Omo liaco, wa sitika ocipala caye oco a taviwe la Yehova. Daviti wa sanjukile calua poku kũlĩha olohuminyo via Yehova. Kuenje, wa limbuka okuti wa kala laye. Omo liaco, tu sukila oku kuama ongangu ya Daviti yoku tiamisila utima kovina viespiritu.
19:1-6. Ovina ka vi popi Yehova a lulika via siata oku eca esivayo Kokuaye. Omo okuti etu tu popia kuenda tu sokolola, tu sukila oku eca ku Yehova esivayo lia velapo.—Esituluilo 4:11.
19:7-11. Olonumbi via Yehova vi tu kuatisa calua.
19:12, 13. Tu sukila oku yuvula ekandu li tunda kepela.
19:14. Ka tu sukila lika oku sakalala leci tu yongola oku linga. Pole, tu sukilavo oku sokolola eci tu yongola oku popia.
‘OVE WA NDI KUATISA OMO LIESUNGA LIANGE’
Volosamo evi vivali, Daviti wa lekisa onjongole yoku amamako oku pokola ku Suku. Eye wa imba ocisungo hati: “Ame puãi ngendaenda lesunga liange.” (Osamo 26:11) Daviti poku likutilila oco Yehova owecele akandu aye, wa popia hati: “Osimbu sia litavelele akandu ange etimba liange lia hongua, omo nda liyula ño eteke liosi.” (Osamo 32:3) Noke wa popia hati: “Ovaso a Yehova a vanja vakuesunga. [Eye] o vonguila ovatũi aye kevilikiyo liavo.”—Osamo 34:15.
Osamo 37, ya kuatisa calua va Isareli. Kuenda yi kuetevo esilivilo kokuetu tu kasi koloneke vilo via sulako. (2 Timoteo 3:1-5) Poku lombolola eci catiamẽla ku Yesu, Osamo 40:7, 8, yi popia hati: “Tala, ndeya. Velivulu liovisonehua mua sonehiwa okuti, oku linga ocipango cove, a Suku yange, oco [ndi] sanjukila. Ovihandeleko viove vi kasi vutima wange.” Osamo ya sulako konepa yilo yatete, yi lombolola epingilo Daviti a linga ku Yehova eci a liyaka lovitangi omo lioku linga uvasi la Batisieva. Eye wa imba ocisungo hati: ‘Ove wa ndi kuatisa omo liesunga liange.’—Osamo 41:12.
Atambululo Kapulilo Embimbiliya:
26:6—Tu pondola ndati oku ñuala kutala wa Yehova ndeci Daviti a linga? Utala waco, u lomboloka ocipango ca Yehova coku tava ocilumba ca Yesu coku yovola omanu. (Va Heveru 8:5; 10:5-10) Etu tu ñuala kutala wa Yehova poku lekisa ekolelo kocilumba caco.
29:3-9—Ondaka ya Yehova yi sokisiwa ndati locikẽlu combela ci lulumisa? Yi sokisiwa locikẽlu, momo Yehova o kuete unene u komohisa.
31:23—Vakuakulitunula onima yipi va sesamẽla? Va sesamẽla eyambulo. Pole, omo okuti vakuesunga ka va lingi akandu ocipango, va tambula onima yoku pindisiwa la Yehova. Vakuakulitunula omo okuti ka va yongola oku likekembela, va sesamẽla eyambulo linene.—Olosapo 11:31; 1 Petulu 4:18.
33:6—‘Ofela’ yi tunda vomẽla wa Yehova yi lomboloka nye? Yi lomboloka ongusu yaye ya pama a lulika layo ovina viosi vi kasi kilu. (Efetikilo 1:1, 2) Ofela yaco, yi lombolokavo ongusu yi tunda vomẽla waye momo o yi tuma palo posi oco yi tẽlise ovina viosi a yongola oku linga.
35:19—Daviti wa popia hati, kuka ecelele okuti ovanyãli vange va tieña kiso. Olondaka evi vi lomboloka nye? Ovanyãli poku tieña kiso, ci lomboloka okuti va sanjukilile oku talisa ohali Daviti. Kuenje, wa pinga ku Yehova oco ka vaka tẽlise onjongole yavo.
Ceci tu Lilongisilako:
26:4. Tu sukila oku lunguka poku linga ukamba lomanu vana va limbika ekalo liavo vo televisão, kosikola, kuenda kupange okuti va yongola oku linga akamba vetu lonjongole yimue yĩvi.
26:7, 12; 35:18; 40:9. Tu sukila oku sivaya Yehova vekongelo.
26:8; 27:4. Anga hẽ tu sanjukila oku endaenda kolohongele?
26:11. Daviti wa nõlelepo oku amamako loku pokola ku Yehova. Kuenda wa pingavo oco o yovole. Etu tu sukilavo oku amamako loku pokola ku Yehova ndaño ka tua lipuile.
29:10. Olondaka viokuti, Yehova wa tumala kovava okilu, vi lomboloka okuti o kuete unene woku viala ovina viosi.
30:5. Ocituwa ca velapo ca Yehova, ocisola, okuti onyeño hayoko.
32:9. Yehova ka yongola okuti tu kala ndokavalu ale ndocimbulu okuti ci pokola lika losikote. Pole, o yongola okuti tu pokola kokuaye omo lioku kuata elomboloko liocipango caye.
33:17-19. Voluali lulo lomue omunu o tẽla oku nena eyovo. Omo liaco, tu sukila oku kolela ku Yehova kuenda Kusoma waye.
34:10. Omanu vana va pitisa kovaso Usoma wa Yehova, va kuete elavoko liocili.
39:1, 2. Nda olondingaĩvi vi sandiliya asapulo ãvi oku pisa vamanji, tu sukila oku sitika komẽla wetu kuenda oku lilava kueci tu popia.
40:1, 2. Oku kolela ku Yehova, ku tu kuatisa oku liyaka lovitangi vi kasi ‘ndocitunyu ceyuka onata.’
40:5, 12. Ndaño okuti tu liyaka lovitangi vialua, lacimue ci tẽla oku tu yapula vonjila ya Yehova. Momo tu lavoka oku tambula asumũlũho alua.
‘Yehova a Sivayiwe’
Ulandu u sangiwa Kosamo yatete toke yakũi akuãla lamosi, u pamisa ekolelo lietu. Ndaño okuti tu liyaka lovitangi, tu pondola oku sanga elembeleko Vondaka ya Yehova. (Va Heveru 4:12) Olosamo tua konomuisa ndeti, vi kuete olonumbi vialua vi pondola oku tu songuila. Omo liaco, ndaño tu liyaka lovitangi, Yehova ka tu yanduluka.
Osamo ya sulako yonepa yatete tua mãla oku konomuisa yi malusula lolondaka viokuti: “Yehova a pandiyiwe, eye Suku ya va Isareli, tunde kakuci toke kakuci. Amene. Amene.” (Osamo 41:13) Noke yoku konomuisa onepa yilo yatete yolosamo, tu vetiyiwa oku sivaya Yehova.
[Atosi pombuelo yamẽla]
[Elitalatu kemẽla 30]
Ovina ka vi popi Yehova a lulika vi eca esivayo kokuaye. Omo liaco, tu sukila oku eca esivayo lia velapo Kokuaye.
[Elitalatu kemẽla 29]
Stars: Courtesy United States Naval Observatory
[Elitalatu kemẽla 29]
Tu sukila oku konomuisa ovina viespiritu oloneke viosi
[Elitalatu kemẽla 31]
Daviti wa soneha eci ci soka 41 kolosamo vi sangiwa vonepa yilo yatete
[Elitalatu kemẽla 31]
Stars, pages 30, 31 and 32: Courtesy United States Naval Observatory
[Elitalatu kemẽla 32]
Ove hẽ wa kũlĩha Osamo yi popia hati, Yehova eye Ungombo Wavelapo?