Tamalãli La Satana Kuenje Eye u tili

“Pokoli ku Suku. Tamalãli Leliapu kuenje liu tili.”​—⁠TIAGO 4:⁠7.

1, 2. (a) Ocituwa cipi Celiapu ca lekisiwa volondaka vielivulu lia Isaya kocipama 14? (b) Apulilo api tu konomuisa vocipama cilo?

ELIAPU olio uvangi wocindekaise cepela. Epela liaye lia lekisiwa volondaka uprofeto Isaya a lombolola. Eci o Bavulono ka ya lingile handi ombala yuviali wa velapo voluali, omanu va Yehova va lomboluiwa ndu okuti va kala oku pisa soma yo Bavulono poku popia hati: “[Ove] wa popele vutima wove hati, [ndi londa] kilu, ñapa ocalo kilu liolombungululu via Suku, . . . ndonda kilu lialende, ndi lisoka la [Tõlo].” (Isaya 14:​3, 4, 12-15; Atendelo 24:​17) Epela lia Soma yo Bavulono,” lia sokisiwile leli lia Satana, “osuku yoluali lulo.” (2 Va  Korindo 4:⁠4) Pole, epela lia Satana lika sulila ndeci ca pita lolosoma vioko Bavulono.

² Etu tua kũlĩha okuti, Eliapu lia tunda kosimbu. Omo liaco, pamue tu lipula ndoco: Anga hẽ tu sukila oku kuatela usumba Satana? Momo lie a siatela oku nena elambalalo Kakristão? Ndamupi tu yuvula oku yapuisiwa Leliapu?

Anga hẽ tu Sukila Oku Kuatela Usumba Eliapu?

3, 4. Momo lie Akristão olombuavekua lolomeme vikuavo ka va kuetele usumba Leliapu?

³ Yesu Kristu wa popia olondaka vimue via pamisa Akristão olombuavekua hati: “Ku ka yokokele ohali o laika oku tala. Hu sapuila okuti Eliapu limba vamue pokati kene vokayike okuti vu nyikiwa. Kuenje wu tala ohali ekũi lioloneke. Pandikisa ño toke kokufa, kuenje hu iha ekolowa liomuenyo.” (Esituluilo 2:​10) Akristão olombuavekua kuenda olomeme vikuavo, ka va kuete usumba Leliapu. Pole, ekambo liaco liusumba ka li tundi kutõi va citiwa lawo. Olio li tunda koku sumbila Yehova loku ‘vunda vulembo wavava aye.’​—⁠Osamo 34:9; 36:⁠7.

⁴ Olondonge via Yesu via pokola ku Yehova toke koku fa ndaño lohali va liyaka layo. Ovo ka va kuatele usumba lovina vĩvi Satana a pondola oku va lingila. Momo va kũlĩhĩle okuti Yehova ka yanduluka omanu vana vo kolela. Cimuamue haico ci kasi oku pita koloneke vilo. Akristão olombuavekua kuenda olomeme vikuavo, ka va ecelela oku nyõla ekolelo liavo omo lielambalalo. Upostolo Paulu wa lombolola okuti, Eliapu li pondola oku nena olofa. Anga hẽ olondaka viaco ka vi tu vetiya oku kuata usumba?

5. Elivulu lia Va Heveru 2:​14, 15 li tu longisa nye?

⁵ Upostolo Paulo wa lombolola okuti, Yesu o kuetevo ositu losonde. Kuenje, “o yula lokufa u o kasi longusu yokufa, okuti Eliapu, loku yovola ava va kala apika omuenyo wavo wosi mekonda liusumba wokufa.” (Va Heveru 2:​14, 15) Satana omo okuti “o kasi longusu yokufa,” wa vetiya Yuda Isikariote lasongui vetavo lia va Yudea kuenda olombiali vio ko Roma, oco va ponde Yesu. (Luka 22:3; Yoano 13:​26, 27) Yesu Kristu omo liocilumba caye, wa yovola omanu vupika wa Satana kuenje wa tu ĩha elavoko liomuenyo ko pui.​—⁠Yoano 3:⁠16.

6, 7. Ndamupi Satana a kuete unene woku nena olofa?

⁶ Otembo yipi Satana a fetika oku nena olofa pokati komanu? Eye wa fetika oku nena olofa tunde kefetikilo liuhembi waye. Eci a kemba Adama, wo lueyisa vocihandeleko ca Suku kuenje wa nena olofa kepata liomanu vosi. (Va Roma 5:​12) Handi vali, oloñuatisi viaye palo posi via siata oku lambalala omanu va Yehova ndeci ca pita la Yesu Kristu.

⁷ Ka tuka simi okuti Eliapu li pondola oku nena olofa komunu una a yongola oku ponda. Yehova o teyuila omanu Vaye. Kuenda ka ecelela okuti, Satana o kundula afendeli vaye palo posi. (Va Roma 14:⁠8) Yehova o pondola oku ecelela elambalalo lolofa komanu vaye omo liovituwa Vieliapu. Pole, Embimbiliya lieca elavoko liepinduko komanu vana ‘va kasi velivulu lionjivaluko ya Yehova.’ Kuenje Eliapu ka li pondola oku tateka epinduko liaco.​—⁠Malakiya 3:16; Yoano 5:​28, 29; Ovilinga 24:⁠15.

Momo Lie Satana a tu Lambalalela?

8. Momo lie Eliapu lia siatela oku lambalala omanu va Suku?

⁸ Nda tua pokola ku Suku, Satana o pondola oku tu lambalala. Momo o yongola oku nyõla ekolelo lietu ku Yehova. Eye oyongolavo oku nyola ukamba wetu la Yehova. Ovilinga via Satana, ka vi tu komohĩsa. Momo vocumbo Cendene Yehova wa popele okuti, pokati, ‘kukãi lonyõha’ kuenda ombuto yavo paka kala esuvu. (Efetikilo 3:​14, 15) Embimbiliya li lekisa okuti, Eliapu eye ‘onyõha yosiahũlu.’ Kuenda li lombolola okuti, eye o kasi lonyeño yalua. Momo otembo yaye yoku nyõliwa yi kasi ocipepi. (Esituluilo 12:​9, 12) Osimbu esuvu liamamako pokati kombuto yukãi leyi yonyõha, omanu va Yehova va lavoka elambalalo. (2 Timoteo 3:​12) Ove hẽ wa kũlĩha esunga liaco?

9, 10. Ocitangi cipi Satana a katula? Ocitangi caco catiamisiwila ndati kepokolo liomanu?

⁹ Eliapu lia katula ocitangi catiamẽla kuviali wa Yehova. Pole, ocitangi caco catiamisiwilavo kepokolo liomanu. Eye wa nenele elambalalo ku Yovi, ulume umue wa sunguluka. Momo lie? Momo wa yonguile oku nyõla epokolo liaye ku Yehova. Ukãi wa Yovi kuenda ‘olondembeleki viaye viesanda,’ va kala oku tẽlisa ocipango Celiapu. Ndomo ca lekisiwa kelivulu lia Yovi, Satana wa kala oku tamalãla la Suku. Momo wa popia okuti, nda Yehova wo wecelela oku seteka omanu, lomue okamamako oku pokola Kokuaye. Pole, epokolo lia Yovi lia eca uvangi wokuti, Satana ohembi. (Yovi 1:8–2:9; 16:2; 27:5; 31:⁠6) Koloneke vilo, Satana wa siatavo oku lambalala Olombangi via Yehova oco a nyõle epokolo liavo ku Yehova. Momo oyongola oku tẽlisa olondaka viaye.

¹⁰ Tua kũlĩha okuti, Eliapu lia siata oku nena elambalalo kokuetu. Momo li yongola oku nyõla ekolelo lietu ku Yehova. Ukũlĩhĩso waco u tu kuatisa oku amamako lepandi loku kuata utõi. (Esinumuĩlo 31:⁠6) Yehova Ombiali ya Velapo, o tu kuatisa oku amamako lepandi. Omo liaco, tu sukila oku sanjuisa utima Waye poku lekisa epokolo kokuaye. Nda tua ci linga, eye oka eca etambululo ku Satana una wa siata oku wimbula.​—⁠Olosapo 27:⁠11.

‘Tu Popele Kondingaĩvi’

11. Oku pinga ku Yehova hati, “ku ka tu songuile veyonjo,” ci lomboloka nye?

¹¹ Oku amamako lepokolo ku Yehova ka ca lelukile. Pole, ohutililo yi pondola oku tu kuatisa. Olondaka Yesu a tukula vohutililo yaye vi kuete esilivilo liocili. Eye wa likutilila ku Suku hati: “Ku ka tu songuile veyonjo, puãi tu popele [kondingaĩvi].” (Mateo 6:​13) Yehova ka tu yonjela kekandu. (Tiago 1:​13) Pole, olonjanja vimue omo lioku ecelela ovitangi, Embimbiliya li lekisa ndu okuti eye wa vi nena. (Ruti 1:​20, 21) Nda tua likutilila ku Yehova ndomo Yesu a ci popia, Eye oka yevelela ohutililo yetu. Kuenda kaka tu yanduluka eci tu yonjiwa. Momo Embimbiliya li tu likuminya hati: “Suku wa kolelua, kuenje ka tava okuti wu yonjiwa, te leli wu tela, puãi kumue leyonjo u muisivo evelo lioku puluka okuti vu soka lalio.”​—⁠1 Va  Korindo 10:⁠13.

12. Momo lie tu likutilila hati: ‘Tu popele kondingaĩvi’?

¹² Yesu noke yoku tukula eyonjo vohutililo yaye, wa popia hati: “Tu popele [kondingaĩvi].” Pole, Vembimbiliya Liumbundu, ocinimbu eci ci popia hati: “Tu popele kũvi.” Ambimbiliya akuavo a popia hati: “Tu teyuile kevĩho.” Ondaka yoku popia hati, ‘tu popele,’ yi tiamisiwila komanu. Kuenje Evangeliu lia Mateo poku tukula Eliapu lia popia hati, “Uyonji,” cilomboloka okuti, ‘omunu.’ (Mateo 4:​3, 11) Omo liaco, tu sukila oku pinga ku Yehova oco a tu popele ku Satana Eliapu ‘ondingaĩvi.’ Eye wa siata oku tu yonja oco tu tombe ovihandeleko via Suku. (1 Va  Tesalonike 3:⁠5) Eci tu likutilila ku Suku hati, ‘tu popele kondingaĩvi,’ tu kasi oku pinga Kokuaye oco a tu songuile okuti ka tu kupukila veyonjo lia Satana.

Kuka Yuliwe Leliapu

13, 14. Momo lie Akristão voko Korindo va sukilile oku ecela omunu una wa lingile ekandu liukahonga vekongelo?

¹³ Eci Paulu a vetiya Akristão voko Korindo oco va liecele pokati, wa popia hati: “[Omunu] wosi ene weceli lamevo ndi wecela. Eci ame nda ecela, nda nda ecela cimue, ndo ceceleli ene kovaso a Kristu. Nda ci lingila okuti Satana ka tu yuli. Momo ka tu kasi lonumbi yatutu aye.” (2 Va  Korindo 2:​10, 11) Eliapu li pondola oku tu yonja lovina vialua. Oco hẽ, momo lie Paulu a popela olondaka evi?

¹⁴ Paulu wa pisa Akristão voko Korindo omo lioku ecelela vekongelo ulume umue ukuakahonga. Ocituwa caco ca sanjuisa Satana. Momo ‘ukahonga waco ka wa siatele pokati ka vakualofeka.’ Noke ulume waco wa tundisiwa vekongelo. (1 Va  Korindo 5:​1-5, 11-​13) Vokuenda kuotembo ulume waco wa likekembela. Kuenje Akristão voko Korindo va sukilile oku ecela omunu waco. Momo lie? Momo nda ka va ci lingile, nda va yuliwa leyonjo likuavo Lieliapu okuti, ekambo liocisola lohenda ndeci eye a tuwa. Handi vali, nda ulume waco wa liwekelepo oku vumba Yehova omo ‘liesumuo,’ akulu vekongelo nda va kuata ekandu ku Yehova Suku yohenda. (2 Va  Korindo 2:7; Tiago 2:13; 3:⁠1) Ocili okuti, lomue Ukristão oyongola oku kuama ovilinga via Satana poku kala ongangala loku lekisa ekambo liocisola, lohenda.

Oku Kuatisiwa Lovimãleho Via Suku

15. Uyaki upi tu kuete? Nye tu sukila oku linga oco tu yule uyaki waco?

¹⁵ Oco tu popeliwe Keliapu, tu sukila oku yaka laspiritu ãvi. Pole, tu pondola lika oku yula nda tua ‘wala ovimalẽho viosi via Suku.’ (Va Efeso 6:​11-​18) Vovimalẽho viaco, mua kongela ‘esunga likasi ndociteyuilo covonete.’ (Va Efeso 6:​14) Soma Saulu ko Isareli, eci a linga ekandu ku Yehova, wa pumba espiritu sandu. (1 Samuele 15:​22, 23) Omo liaco, nda tua linga esunga, loku wala ovimalẽho viespiritu, tuka tambula espiritu sandu lia Suku. Kuenje tuka kuata unene woku liteyuila ku Satana kuenda kaspiritu ãvi.​—⁠Olosapo 18:⁠10.

16. Tu pondola ndati oku amamako oku liteyuila kaspiritu ãvi?

¹⁶ Oco tu liteyuile kaspiritu ãvi, tu sukila oku lilongisa Ondaka ya Suku. Tu sukilavo oku pokola kolonumbi vi sangiwa valivulu a sandekiwa ‘lukuenje wa lungaka.’ (Luka 12:​42) Momo poku cilinga tu yukisa utima wetu lovina viespiritu ndomo Paulu a ci popia hati: “Avakuetu, mopia siti, cosi cocili, cosi ca sumbiwa, cosi cesunga, cosi ca pua evĩho, cosi ca posoka, cosi ci sivayaiwa, nda kuli esunga, kuenda nda kuli eci ci sesamẽla oku sivayiwa, sokololi ovina evi.”​—⁠Va Filipoi 4:⁠8.

17. Nye ci tu vetiya oku kuata ombili kupange woku kunda?

¹⁷ Yehova o tu kuatisa oco tu wale ‘kolomãhi eliangiliyo liondaka yiwa yombembua.’ (Va Efeso 6:​15) Oku endaenda kolohongele olonjanja viosi, ci tu vetiya oku kuata ombili yoku kunda olondaka viwa Viusoma. Oku kuatisa vakuetu oco va kũlĩhe Yehova loku amamako kespiritu, ci nena esanju lialua. (Yoano 8:​32) ‘Osipata yespiritu okuti Ondaka ya Suku,’ yi tu kuatisa oku yuvula alongiso esanda loku pandikisa kovitangi. (Va Efeso 6:17; 2 Va  Korindo 10:​4, 5) Handi vali, oku kuata ukũlĩhĩso Wembimbiliya ku tu kuatisa oku longisa vakuetu ocili catiamẽla ku Suku, kuenda ku tu teyuila kayonjo Eliapu.

18. Tu tẽla ndati ‘oku tamalãla latutu Eliapu’?

¹⁸ Paulu poku lombolola ovimalẽho vietu viespiritu, wa fetika loku popia hati: “Kolisiko vu Ñala kuenda longusu yunene waye. Malẽhi ovimalẽho viosi via Suku okuti vu tẽla oku tamalãla latutu Eliapu.” (Va Efeso 6:​10, 11) Kelimi lio Helasi ondaka ‘oku tamalãla,’ yi tiamisiwila kesualali li lava ocitumãlo caye. Satana wa siata oku sanda olonjila vioku nyola elitokeko lietu, alongiso etu, kuenda ekolelo lietu ku Yehova. Pole, tu sukila oku teyuila ekalo lietu kespiritu. Satana lalimue eteke a yula.a

Tamalãli Leliapu Kuenje Liu Tili

19. Nye ci tu kuatisa oku tamalãla Leliapu?

¹⁹ Lekuatiso lia Yehova, tu pondola oku yula uyaki wetu woku tamalãla Leliapu kuenda aspiritu ãvi. Ka tu sukila oku kuata usumba la Satana. Ndonge Tiago wa popia hati: “Pokoli ku Suku. Tamalãli Leliapu kuenje liu tili.” (Tiago 4:⁠7) Oco tu tamalãle la Satana kuenda aspiritu ãvi, tu sukila oku yuvula ovina viosi viatiamẽla koku tãha kuenda alumbu. Embimbiliya li lekisa okuti, omanu va Yehova va sukila oku yuvula uloño woku tãha olombungululu kuenda umbanda. Nda tua lekisa ombili kovina viespiritu, ka tu kuata usumba lomanu vakuavituwa viaco.​—⁠Atendelo 23:23; Esinumuĩlo 18:​10-12; Isaya 47:​12-15; Ovilinga 19:​18-20.

20. Ndamupi tu pondola oku tamalãla Leliapu?

²⁰ Tu pondola lika oku ‘tamalãla Leliapu’ nda tua pokola kolonumbi Viondaka ya Suku. Oluali lu kasi povaka a Satana momo eye Suku yaluo. (2 Va  Korindo 4:⁠4) Omo liaco, tu sukila oku yuvula ovituwa violuali ndeci: Epela, ocipululu, ukahonga, ungangala, kuenda oku sakalala lovokuasi. Etu tua kũlĩha okuti, eci Yesu a yonjiwa Leliapu vekalasoko, olio lia tila. Momo wa tukula ovisonehua. (Mateo 4:​4, 7, 10, 11) Cimuamue haico ci pita letu. Nda tua pokola ku Suku loku kolela Kokuaye, Satana o ‘tu tila.’ (Va Efeso 6:​18) Lekuatiso lia Yehova kuenda Omõlaye Yesu, lomue o tẽla oku nyõla ekolelo lietu, ndaño Eliapu.​—⁠Osamo 91:​9-11.

[Atosi pombuelo yamẽla]

O Tambulula Ndati?

• Citava hẽ okuti tu kuata usumba la Satana Eliapu?

• Momo lie Satana a siatela oku nena elambalalo Kakristão?

• Momo lie tu sukilila oku likutilila oco tu popeliwe ‘kondingaĩvi’?

• Ndamupi tu tẽla oku yula uyaki wetu wespiritu?

[Elitalatu kemẽla 8]

Olondonge via Yesu via pandikisa toke koku fa.

[Elitalatu kemẽla 9]

Eliapu ka li pondola oku tateka epinduko liomanu vana Yehova a yongola oku pindula

[Elitalatu kemẽla 10]

Ove hẽ wa siata oku likutilila oco o popeliwe ku Satana?

[Elitalatu kemẽla 11]

Ove hẽ wa ‘wala ovimalẽho viosi via Suku’?