Kuata Ukamba la Suku

Yehova wa Velisapo Umbombe Atendelo 12:​1-15

EPELA, esepa, ocipululu. Evi ovio ovituwa via siata pokati komanu vana va kuete ocikele coku songuila vakuavo voluali lulo. Anga hẽ ovituwa viaco vi tu kuatisa oku kuata ukamba la Yehova Suku? Ka vi tu kuatisa, momo Yehova wa velisapo umbombe wafendeli vaye. Uvangi waco wa lekisiwa kulandu u sangiwa kelivulu Liatendelo kocipama 12. Ulandu waco wa pita vekalasoko lia Sinai eci va Isareli va yovuiwa Kegito.

Miriama la Arone va fetika oku “sokola Mose” manjavo umalẽhe. (Ocinimbu 1) Ovo ka va vanguile la Mose, pole va popia ovina vĩvi viatiamẽla kokuaye, kuenje va fetika oku sandula olondaka viaco ku vakuavo. Citava okuti Miriama una wa tukuiwa tete, eye wa fetika oku lisiõsiõla. Esunga liatete lioku lisiõsiõla kuavo lieli okuti, Mose wa kuelele ukãi umue wo kofeka yo Kusi. Anga hẽ, Miriama wa kuatela esepa ukãi waco omo ka kaile u Isareli?

Kua kala esunga likuavo. Miriama la Arone va popia hati: “Yehova nga wa popia lika la Mose? Ka popelevo letu?” (Ocinimbu 2) Anga hẽ, onjongole yoku kuata unene loku sumbiwa lomanu, oyo yo vetiya oku lisiõsiõla?

Ulandu waco u lekisa okuti, Mose ka tambuluile cimue kondaka yaco. Pole, wa pandikisa lolondaka viavo vĩvi. Eye lepandi liocili, wa eca uvangi weci Embimbiliya lia popia catiamẽla kokuaye hati, “ulume womboka cimue” okuti omanu vosi voluali ci sule.a (Ocinimbu 3) Mose ka sandele onjila yoku liteyuila. Omo okuti Yehova wa ci yeva, wa teyuila Mose.

Yehova wa tendele oku lisiõsiõla kuavo okuti, kua suñamisiwile kokuaye, momo eye wa nõlele Mose. Suku poku pisa omanu vaco, wa lekisa kokuavo ukamba a kuatele la Mose eci a popia hati: “Mopia laye omẽla lomẽla.” Noke Yehova wa pula Miriama la Arone hati: “Nye ka co lingilili usumba oku sokola . . . Mose?” (Ocinimbu 8) Ovo poku popia lãvi Mose, ca kala ndu okuti olondaka viaco va vi suñamisile ku Suku. Kuenje omo lietombo liavo, veya oku yambuiwa lonyeño ya Yehova.

Miriama una wa pitile kovaso loku lisiõsiõla, wa yambuiwa lovilundu. Noke Arone wa livondela Mose oco a kuatise mukãi waye. Ivaluka okuti, oco Miriama a kale lomuenyo, wa sukilile ekuatiso liomunu una a popele lãvi! Kuenje Mose omo liumbombe, wa linga eci vo pinga. Eye wa likutilila ku Yehova oco a kuatise mukãi waye. Vulandu waco, eyi oyo onjanja yatete Mose a vangula. Miriama ndaño wa sakuiwa, puãi, wa kutisua osõi momo wa kapiwile ocipãla locilombo oloneke epanduvali omo liuvei waye.

Ulandu owu u situlula ovituwa Yehova a velisapo kuenda ovituwa a nyale. Nda tu yongola oku kuata ukamba la Suku, tu sukila oku likolisilako oku yuvula epela, esepa, kuenda ocipululu ci kasi vutima wetu. Omo Yehova o sole ambombe, wa likuminya hati: “Ambombe puãi va piñala ofeka, kuenje va sanjukila okusalala kualua.”​—⁠Osamo 37:11; Tiago 4:⁠6.

[Atosi pombuelo yamẽla]